Nikamonan 145 - ᐅᒋᐺ ᑭᒋᒪᓯᓇᐃᑲᓐᒦᑴᒋᐎᐊᓇᒥᐁᓂᑲᒧᓐ ᒦ ᐅᐌᓂ ᐯᔑᒃ ᑌᐱᑦ ᐅᓂᑲᒧᓐ 1 ᓂᑭᔐᒪᓂᑑᒻ ᑫᒋᐅᑭᒫᑲᑕᐎᔭᓐ, ᓂᑲ ᑕᔑᑖᓐ ᓴ ᑭᑭᒋ ᐃᓀᑖᑯᓯᐎᓐ, ᒦᑴᒡ ᑭᑲᐃᓂᓐ ᓀᐱᒡ ᐃᑯ᙮ 2 ᐁᑕᓱ ᑮᔑᒃ ᓴ ᑭᑲ ᒦᑴᒋᐌᓂᒥᓐ, ᑭᐐᓱᐎᓐ ᑲᔦ ᑭᑲ ᒦᑴᒋᐌᓂᒥᓐ ᓀᐱᒡ ᐃᑯ᙮ 3 ᐋᐱᒋ ᓴ ᑭᒋ ᐃᓀᑖᑯᓯ ᑳᑎᐯᒋᑫᒡ, ᐃᔥᐯᑖᑯᓯ ᒋᒦᑴᒋᐌᓂᒥᑎᐸᓐ, ᑳᐐᓐ ᓴ ᐐᑳ ᑕᑌᐱᒋ ᑭᑫᒋᑳᑌᓯᓂᓂ ᐁᔑ ᑭᒋ ᐃᓀᑖᑯᓯᒡ᙮ 4 ᐯᔑᑴᐙᓐ ᓴ ᐯᒫᑎᓯᐙᒡ ᐅᑲ ᐊᓂ ᐊᔮᓂᑫ ᐐᑕᒪᐙᐙᐞ ᑯᑕᒃ ᑫᓂ ᐊᔮᓂᑫ ᓂᑖᐎᑭᓂᒡ; ᒋᐊᓂ ᑕᔑᑕᒧᐙᒡ ᐁᔑ ᒪᔥᑲᐎᒋᑫᐗᒡ᙮ 5 ᐅᑲ ᑕᔑᑖᓈᐙ ᓴ ᑭᑭᒋ ᐃᓀᑖᑯᓯᐎᓐ, ᐁᔑ ᑭᒋᐅᑭᒫᐌᑖᑯᓯᐗᒡ ᑲᔦ, ᓃᓐ ᐃᑕᔥ ᓂᑲ ᓈᓈᑲᑕᐌᑖᓇᓐ ᑳᒫᒪᑳᑌᑖᑾᑭᓐ ᑭᑎᔑᒋᑫᐎᓇᓐ᙮ 6 ᐯᒫᑦᓯᐙᒡ ᓴ ᐅᑲ ᑕᔑᑖᓈᐙ ᐁᔑ ᒪᔥᑲᐌᑖᑾᓂᓂᒃ ᑳᑯᑖᓀᑖᑾᓂᓂᑭᓐ ᑭᑕᓄᑮᐎᓇᓐ, ᑫᓃᓐ ᐃᑕᔥ ᓂᑲ ᐐᑕᒫᑫ ᐁᔑ ᑭᒋ ᐃᓀᑖᑯᓯᔭᓐ᙮ 7 ᐅᑲ ᑕᔑᑖᓈᐙ ᓴ ᑲᑭᓇ ᐁᔑ ᐌᓅᑕᓂᓂᒃ ᑭᒥᓄᑑᑖᑫᐎᓐ, ᑕᒌᑭ ᓇᑲᒧᐗᒃ ᑲᔦ ᒋᓂᑲᒨᑕᒧᐙᒡ ᑭᑾᔭᒀᑎᓯᐎᓐ᙮ 8 ᑳᑎᐯᒋᑫᒡ ᓴ ᑭᔐᐙᑎᓯ, ᑰᐹᑌᒋᑫ ᑲᔦ᙮ ᔕᔒᐱᑭᑖᓱ, ᐌᓅᒋ ᓵᑭᐃᐌ ᑲᔦ᙮ 9 ᑲᑭᓇ ᓴ ᐊᐎᔭᓐ ᐁᑕᓱ ᐯᔑᑯᓂᒡ ᐅᒥᓄᑑᑕᐙᓐ, ᐅᑰᐹᑌᑖᓐ ᑲᑭᓇ ᑫᑰᓐ ᑳᑮ ᐅᔑᑑᒡ᙮ 10 ᐆ ᑌᐯᒋᑫᔭᓐ, ᑲᑭᓇ ᓴ ᑫᑰᓐ ᑳᑮ ᐅᔑᑑᔭᓐ ᑭᑲ ᓇᓈᑯᒥᑯᓐ; ᐯᒫᑎᓯᐙᒡ ᑌᐱᓇᐌᐎᓯᔭᓐ ᑭᑲ ᒦᑴᒋᐌᓂᒥᑰᒃ᙮ 11 ᑕᐐᑕᒫᑫᐗᒃ ᓴ ᐁᔑ ᑭᒋ ᐃᓀᑖᑾᓂᓂᒃ ᑭᑑᑭᒫᐎᐎᓐ, ᐅᑲ ᑕᔑᑖᓈᐙ ᑲᔦ ᐁᔑ ᒪᔥᑲᐎᒋᑫᐗᒡ᙮ 12 ᒦᔥ ᑲᑭᓇ ᐊᐎᔭᒃ ᐯᒫᑎᓯᐙᒡ ᒋᑭᑫᑕᒧᐙᒡ ᐁᔑ ᒪᔥᑲᐎᒋᑫᐗᒡ, ᐁᔑ ᑭᒋᐅᑭᒫᐌᑖᑾᓂᓂᒃ ᑲᔦ ᑭᑑᑭᒫᐎᐎᓐ᙮ 13 ᐃᐃ ᑭᑑᑭᒫᐎᐎᓐ ᑳᐐᓐ ᐐᑳ ᑕᐴᓂᓭᓯᓅᓐ, ᐁᔑ ᑎᐯᒋᑫᔭᓐ ᑲᔦ ᑕᓂ ᓀᐱᒋ ᐊᔮ ᔖᑄᔭᐄ ᐁᓂ ᑕᔑᐙᒡ ᑫᓂ ᐊᔮᓂᑫ ᓂᑖᐎᑭᐙᒡ᙮ ᑳᑎᐯᒋᑫᒡ ᓴ ᑫᒋᓈᒡ ᑕᐃᔑᒋᑫ ᑲᑭᓇ ᐁᔑ ᐊᔓᑕᒫᑫᒡ, ᐅᓵᑭᑑᓐ ᑲᔦ ᑲᑭᓇ ᑫᑰᓐ ᑳᑮ ᐅᔑᑑᒡ᙮ 14 ᐅᓰᑐᓈᐞ ᓴ ᑲᔦ ᑳᒫᔑᓭᓂᒡ, ᐅᒪᔮᐎᑳᐸᐎᐋᐞ ᑲᑭᓇ ᑳᐸᑭᔑᓂᓂᒡ᙮ 15 ᑲᑭᓇ ᓴ ᐊᐎᔭᒃ ᑭᑲᓇᐙᐸᒥᑰᒃ ᐁᐸᑯᓭᓂᒥᒀ, ᑭᑲ ᐊᔕᒫᒃ ᐃᑕᔥ ᓇᐃ ᐊᐲ ᓅᑌᓭᐙᒡ᙮ 16 ᑭᓂᒌᕽ ᓴ ᑫᑰᓐ ᑭᑑᒋ ᒦᑭᐌ, ᒦᔥ ᐁᔑ ᑌᐱᓭᐙᒡ ᐁᔑ ᒥᓴᐌᒋᑫᐙᒡ ᑲᑭᓇ ᐁᑕᔑᐙᒡ ᐯᒫᑎᓯᐙᒡ᙮ 17 ᑳᑎᐯᒋᑫᒡ ᓴ ᑲᑭᓇ ᑫᑰᓐ ᐁᔑᒋᑫᒡ ᑾᔭᑴᑖᑾᓂᓂ, ᐁᔑ ᑰᐹᑌᒋᑫᒡ ᓴ ᑲᔦ ᑲᑭᓇ ᑫᑰᓐ ᐅᑑᑖᓐ᙮ 18 ᐋᐱᒋ ᓴ ᐅᐯᔣᐸᒫᐞ ᐃᐃ ᑲᑭᓇ ᑳᑲᓅᓂᑯᒡ, ᑲᑭᓇ ᓴ ᑯ ᑌᐺᐎᓂᕽ ᑳᔑ ᑲᓅᓂᑯᒡ᙮ 19 ᐅᑲ ᒨᔥᑭᓀ ᒦᓈᐞ ᓴ ᐁᔑ ᒥᓴᐌᑕᒥᓂᒡ ᐃᐃ ᑴᑖᓀᓂᒥᑯᒡ᙮ ᐅᑲ ᓅᑕᐙᐞ ᑲᔦ ᐁᔖᑯᐙᓂᑯᒡ, ᒦᔥ ᑫᔑ ᐱᒫᒋᐋᒡ᙮ 20 ᑳᑎᐯᒋᑫᒡ ᓴ ᐅᓈᓈᑲᒋᐋᐞ ᑲᑭᓇ ᑳᓵᑭᐃᑯᒡ; ᑲᑭᓇ ᑕᔥ ᐐᓐ ᐅᑲ ᓂᔑᐗᓈᒋᐋᐞ ᒣᒑᑎᓯᓂᒡ᙮ 21 ᓂᑑᓂᕽ ᓴ ᓂᑲ ᐅᒋ ᒦᑴᒋᐌᓂᒫ ᑳᑎᐯᒋᑫᒡ᙮ ᑕᑲ ᑲᑭᓇ ᐊᐎᔭᐞ ᑳᑮ ᐅᔑᐋᒡ ᐅᑲ ᒦᑴᒋᐌᑕᒥᓂ ᑫᑌᑖᑾᓂᓂᒃ ᐅᐐᓱᐎᓐ ᓀᐱᒡ ᐃᑯ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society