Nikamonan 119 - ᐅᒋᐺ ᑭᒋᒪᓯᓇᐃᑲᓐᒋᑭᒋᐌᒋᑳᑌᓂᑭᐸᓐ ᐅᑑᓇᔓᐌᐎᓐ ᑳᑎᐯᒋᑫᒡ 57 ᐆ ᑌᐯᒋᑫᔭᓐ, ᑮᓐ ᐃᓴ ᐁᑕ ᑳᐊᑕᐌᓂᒥᓈᓐ, ᒦᔥ ᐁᔑ ᐊᔓᑕᒪᐎᓈᓐ ᐁᐐ ᓇᐃᑕᒫᓐ ᑭᑎᑭᑐᐎᓇᓐ᙮ 58 ᐁᓂᑯᑯᑌᐁᔮᓐ ᓴ ᑯ ᑭᑎᔑ ᐸᑯᓭᓂᒥᓐ ᒋᑰᐹᑌᓂᒥᔭᓐ ᒋᐃᔑᓭᒃ ᒪᔮ ᐁᑭᑐᔭᓐ᙮ 59 ᐁᑮ ᓈᓈᑲᑕᐌᑕᒫᓐ ᐋᓃᓐ ᐁᔑ ᐱᒫᑎᓯᔮᓐ, ᒦᔥ ᑳᑮ ᓇᑲᑕᒫᓐ ᒣᔥᑾᒡ ᐁᐐ ᐱᒥᓂᔕᐊᒫᓐ ᑭᑎᑭᑐᐎᓇᓐ᙮ 60 ᑳᐐᓐ ᓴ ᓂᑲ ᑆᑕᐐᓰ ᒋᐌᔩᐱᓯᔮᓐ ᒋᓇᐃᑕᒫᓐ ᑭᑑᓇᔓᐌᐎᓐ᙮ 61 ᒥᓴᐙ ᑯ ᑲᑴ ᓇᒀᔑᐙᒡ ᒣᒋᐃᔑᐌᐱᓯᐙᒡ, ᑳᐐᓐ ᓴ ᓂᑲ ᐗᓃᑫᓰ ᑭᑭᑭᓄᐊᒫᑫᐎᓐ᙮ 62 ᐋᐱᑖ ᑎᐱᑲᒃ ᓴ ᓂᑲ ᐗᓂᔥᑳ ᒋᒦᑴᒋᐌᓂᒥᓈᓐ, ᐋᓃᔥ ᑾᔭᑯᓯᓅᓐ ᑭᑑᓇᔓᐌᐎᓇᓐ᙮ 63 ᓂᓵᑭ ᐐᒌᐙᒃ ᓴ ᑲᑭᓇ ᑳᑯᑖᓀᓂᒥᒀ, ᑲᑭᓇ ᑳᐱᒥᓂᔕᐊᒧᐙᒡ ᐁᑭᑐᐗᒡ᙮ 64 ᐆ ᑌᐯᒋᑫᔭᓐ, ᑭᓵᑭᐃᐌᐎᓐ ᓴ ᑯ ᒥᓯᐌ ᐊᔮᒪᑲᓐ ᐊᑮᕽ; ᑭᑭᓄᐊᒪᐎᔑᓐ ᓴ ᑕᔥ ᑭᑑᓇᔓᐌᐎᓇᓐ᙮ ᑳᐊᐲᒋᑭᒋᐃᓀᑖᑾᓂᓂᒃ ᑳᑎᐯᒋᑫᒡ ᐅᑑᓇᓱᐌᐎᓐ 65 ᐆ ᑌᐯᒋᑫᔭᓐ, ᒥᓄᑑᑕᐎᔑᓐ ᓴ ᓃᓐ ᑌᐸᓭᓂᒧᔮᓐ ᑭᑕᓄᑮᐋᑲᓐ ᒪᔮ ᐱᑯ ᐁᔑᓯᕽ ᑭᑎᑭᑐᐎᓐ᙮ 66 ᑭᑭᓄᐊᒪᐎᔑᓐ ᒋᑭᑫᑕᒫᓐ ᐋᓃᓐ ᑫᓂ ᐃᔑᒋᑫᔮᓐ, ᒋᐅᑭᑫᑕᒫᐎᓂᔮᓐ ᑲᔦ, ᐋᓃᔥ ᓂᑌᐺᑖᓇᓐ ᑭᑑᓇᔓᐌᐎᓇᓐ᙮ 67 ᒋᑆ ᓴ ᓇᓇᐊᔑᔭᓐ ᓂᑮ ᓂᑖ ᐗᐗᓃᓈᐸᓐ, ᓅᑯᒻ ᐃᑕᔥ ᐐᓐ ᓂᑭᒋᐌᑖᓐ ᐁᑭᑐᔭᓐ᙮ 68 ᐁᑕᑕᐌ ᓴ ᑭᓴᓭᑳᔦᑖᑯᔅ ᐐᑫ ᓴ ᐁᓂᑖ ᒥᓄᑑᑖᑫᔭᓐ, ᑭᑭᓄᐊᒪᐎᔑᓐ ᓴ ᑭᑎᓈᑯᓂᑫᐎᓇᓐ᙮ 69 ᐃᑭ ᓴ ᑫᒋ ᐃᓀᓂᑎᓱᐙᒡ ᓅᒋᑯ ᓂᑎᓈᒋᒥᑰᒃ ᐁᑮᐗᓂᒧᐙᒡ; ᓃᓐ ᐃᑕᔥ ᐐᓐ ᐃᑯ ᐁᓂᑯᑯᑌᐁᔮᓐ ᓂᑲ ᑎᐱᑑᑖᓇᓐ ᑭᑎᓈᑯᓂᑫᐎᓇᓐ᙮ 70 ᑳᐐᓐ ᑲᓇᑫ ᒋᑰᐹᑌᓂᒥᐌᐙᒡ, ᓃᓐ ᐃᑕᔥ ᐐᓐ ᓂᒌᑫᑖᓐ ᐁᔑ ᑭᑭᑭᓄᐊᒫᑫᔭᓐ᙮ 71 ᑮᐅᓂᔑᔑᓂᑯᐸᓐ ᐄᓴᓐ ᑳᑮ ᓇᓇᐊᔑᔭᐸᓐ, ᒋᑮ ᐅᒋ ᑭᑫᑕᒫᐹᓐ ᑭᑎᓈᑯᓂᑫᐎᓇᓐ᙮ 72 ᑭᑑᓇᔓᐌᐎᓐ ᓴ ᑳᐐᑕᒪᓐ ᓇᐗᒡ ᓂᑑᓂᔑᔐᑖᓐ ᐊᐲᒡ ᐐᓐ ᓃᐱᐗᐞ ᑭᒋᒥᑖᔂᒃ ᐙᐹᐱᑯ ᔔᓂᔮᒃ, ᐅᓵᐎ ᔔᓂᔮᒃ ᑲᔦ᙮ ᑳᑌᐺᔦᒋᑳᑌᓂᒃ ᑳᑎᐯᒋᑫᒡ ᐅᑑᓇᔓᐌᐎᓐ᙮ 89 ᐆ ᑌᐯᒋᑫᔭᓐ, ᑭᑎᑭᑐᐎᓐ ᑮᓀᐱᒋ ᐅᓇᒋᑳᑌ ᒋᐊᔮᒃ ᑭᒋᑮᔑᑯᕽ᙮ 90 ᐃᐃ ᓴ ᑳᔑ ᑌᐺᔦᑖᑯᓯᔭᓐ ᓀᐱᒡ ᑕᓂ ᐊᔮᒪᑲᓐ ᒥᓂᒃ ᐃᑯ ᑫᓂ ᐊᔮᓂᑫ ᓂᑖᐎᑭᓈᓂᐗᕽ; ᑮᓐ ᐄᑐᒃ ᑳᑮ ᐅᓇᑑᔭᓐ ᐊᑭ ᑫᔑ ᐊᑌᒃ, ᒦᔥ ᐃᐃᒫ ᐁᔮᒃ᙮ 91 ᐃᐃ ᓴ ᑳᑮ ᐃᔑ ᐅᓇᒋᑫᔭᓐ ᑫᔮᐱ ᓅᑯᒻ ᑳᑮᔑᑲᒃ ᐱᒥᓭ, ᑮᓐ ᐋᓃᔥ ᑲᑭᓇ ᑫᑰᓐ ᑭᑎᐯᑖᓐ ᒋᐸᒦᑖᑯᔭᓐ᙮ 92 ᑭᑑᓇᔓᐌᐎᓐ ᓴ ᑳᒥᓉᑕᒥᐃᑯᔮᓐ᙮ ᑮᔥᐱᓐ ᐅᐅ ᐃᔑᓭᓯᓄᑭᐸᓐ, ᐋᔕ ᐄᓴᓐ ᓂᑖᑮ ᓂᓯᑰᓐ ᐅᐅ ᑳᔑ ᑲᒀᑕᑭᑑᔮᓐ᙮ 93 ᑳᐐᓐ ᓴ ᐐᑳ ᓂᑲ ᐗᓃᑫᓄᑕᓰᓇᓐ ᑳᐃᓈᑯᓂᑫᔭᓐ, ᒦ ᐄᑐᒃ ᐃᐃᒫ ᐌᒋ ᒦᔑᔭᓐ ᒋᐱᒫᑎᓯᔮᓐ᙮ 94 ᓈᑕᒪᐎᔑᓐ, ᑮᓐ ᐄᑐᒃ ᑭᑎᐯᓂᒥᔥ; ᓂᑲ ᑲᑴ ᐱᒥᓂᔕᐋᓇᓐ ᑭᑎᓈᑯᓂᑫᐎᓇᓐ᙮ 95 ᒣᒑᑎᓯᐙᒡ ᐅᔕ ᓂᑕᑲᒫᑰᒃ ᐁᐐ ᓂᔑᐙᒡ; ᔖᑰᒡ ᐃᑕᔥ ᓂᑲ ᓈᓈᑲᑕᐌᑖᓇᓐ ᑭᑎᓈᒋᒧᐎᓇᓐ᙮ 96 ᓂᑎᔑ ᑭᑫᑖᓐ ᓴ ᑲᑭᓇ ᑫᑰᓇᓐ ᐋᓇ ᑮᔑᓈᑾᑭᓐ ᔖᑰᒡ ᐃᑕᔥ ᒥᒋ ᑎᐱᓇᒪᐙᑳᑌᐗᓐ; ᑭᑎᓈᑯᓂᑫᐎᓇᓐ ᐃᑕᔥ ᐐᓐ ᑳᐐᓐ ᑎᐱᓂᑳᑌᓯᓅᓇᓐ᙮ ᑫᔑᓵᑭᒋᑳᑌᓂᑭᐸᓐ ᑳᑎᐯᒋᑫᒡ ᐅᑑᓇᔓᐌᐎᓐ 97 ᐁᑕᑕᐌ ᓴ ᓂᓵᑭᑑᓐ ᑭᑑᓇᔓᐌᐎᓐ, ᒦ ᓴ ᐃᐌ ᑲᐯᑮᔑᒃ ᑳᓈᓈᑲᑕᐌᑕᒫᓐ᙮ 98 ᑭᑎᓈᑯᓂᑫᐎᓇᓐ ᓴ ᒨᔕᒃ ᐁᐐᒌᐎᑯᔮᓐ ᒦ ᐃ ᓃᓐ ᓇᐗᒡ ᑳᐅᒋ ᑲᑮᑖᐌᑕᒫᓐ ᐊᐲᒡ ᐐᓐ ᐃᑭ ᑳᔒᑫᓂᒥᐙᒡ᙮ 99 ᓇᐗᒡ ᓴ ᓂᑑᓂᓯᑐᑕᒧᐎᓂᒻ ᐊᐲᒡ ᐐᓐ ᑲᑭᓇ ᑫᑭᓄᐊᒪᐎᐙᒡ, ᐋᓃᔥ ᑭᑎᓈᑯᓂᑫᐎᓇᓐ ᓂᓂᑖ ᓈᓈᑲᑕᐌᑖᓇᓐ᙮ 100 ᓇᐗᒡ ᑲᔦ ᓃᐱᐗᐞ ᓂᑑᓂᓯᑐᑕᒫᐎᓂᒻ ᐊᐲᒡ ᐐᓐ ᑭᒋ ᐊᔭᐋᒃ, ᐋᓃᔥ ᓂᓇᐃᑖᓇᓐ ᑭᑎᓈᑯᓂᑫᐎᓇᓐ᙮ 101 ᓂᑲᓇᐌᓂᑎᔅ ᐃᓴ ᒋᒪᒋᐃᔑᐌᐱᓯᓯᐙᓐ ᐋᓃᔥ ᓂᐐ ᓇᐃᑖᓐ ᑭᑎᑭᑐᐎᓐ᙮ 102 ᑳᐐᓐ ᓴ ᓂᑑᒋ ᓇᑲᑕᓰᓇᓐ ᑭᑭᑭᓄᐊᒫᑫᐎᓇᓐ, ᑮᓐ ᐄᑐᒃ ᐃᑯ ᑳᑭᑭᓄᐊᒪᐎᔑᔭᓐ᙮ 103 ᐁᑕᑕᐌ ᓴ ᓂᓵᑭᑑᓇᓐ ᑭᑎᑭᑐᐎᓇᓐ, ᐊᐲᒡ ᐐᓐ ᑳᔑ ᒥᓄᐱᑕᒫᓐ ᐋᒨᐎ ᓰᓯᐹᑾᑦ᙮ 104 ᑭᑎᑭᑐᐎᓂᕽ ᓴ ᓂᑑᑎᓈᓐ ᓂᓯᑐᑕᒧᐎᓐ; ᒦᑕᔥ ᑳᐅᒋ ᔒᑫᑕᒫᓐ ᐁᑕᓯᑭᓐ ᐗᓂᑑᑕᒧᐎᓇᓐ᙮ ᐁᔑᐙᓭᔥᑳᑫᒪᑲᓂᓂᒃ ᑳᑎᐯᒋᑫᒡ ᐅᑑᓇᔓᐌᐎᓐ 105 ᑭᑎᑭᑐᐎᓐ ᓴ ᓂᑑᐙᓴᑯᓀᒋᑲᓐ ᒋᑭᑭᓄᐎᓂᑯᔮᓐ, ᒦᔥ ᑫᐅᒋ ᐙᓭᔮᒃ ᐃᓇᑫ ᑫᓂ ᐃᔖᔮᓐ᙮ 106 ᑌᐯᒋᑫᔭᓐ, ᑌᐺ ᓴ ᓂᑮ ᐊᔩᒋ ᐊᐱᒻ ᐁᐐ ᑑᑕᒫᓐ ᑳᑾᔭᑴᑖᑾᑭᓐ ᑭᑑᓇᔓᐌᐎᓇᓐ᙮ 107 ᐆ ᑌᐯᒋᑫᔭᓐ ᐁᑕᑕᐌ ᓴ ᓂᐱ ᑭᒋ ᑲᒀᑕᑭᑑ; ᑮᐌ ᐱᒫᑎᓰᐃᔑᓐ ᒋᐃᔑᓭᒃ ᒪᔮ ᑳᐃᑭᑐᔭᓐ᙮ 108 ᐆ ᑌᐯᒋᑫᔭᓐ, ᒥᓍᐸᑕᓐ ᐅᐅ ᑳᔑ ᒦᑴᒋ ᐊᓇᒥᐁᑕᐎᓈᓐ, ᑭᑭᓄᐊᒪᐎᔑᓐ ᑭᑑᓇᔓᐌᐎᓇᓐ᙮ 109 ᐋᓇᐐᓐ ᒨᔕᒃ ᓴ ᑯ ᐁᓇᓃᓵᓂᓈᑾᒃ ᓂᐱᒫᑎᓯᐎᓐ; ᑳᐐᓐ ᐃᑕᔥ ᓂᑲ ᐗᓃᑫᓰ ᑭᑑᓇᔓᐌᐎᓐ᙮ 110 ᒣᒋᐃᔑᐌᐱᓯᐙᒡ ᓴ ᐅᑑᓇᑑᓈᐙ ᐙᐃᔑ ᑳᒋᒋᐃᐙᒡ, ᔖᑰᒡ ᐃᑕᔥ ᑳᐐᓐ ᓂᑑᒋ ᐸᑫᓄᑕᓰᓇᓐ ᑭᑎᓈᑯᓂᑫᐎᓇᓐ᙮ 111 ᑭᑎᓈᑯᓂᑫᐎᓇᓐ ᓴ ᓂᓀᐱᒋ ᑎᐱᓇᐌᐎᔅ ᐁᑭᑕᑭᑕᒫᓐ, ᒦ ᐄᑐᒃ ᐃᐃᒫ ᐌᒋ ᒥᓉᑕᒫᓐ ᓂᑌᐃᕽ᙮ 112 ᓂᑌᐃᕽ ᓴ ᑯ ᓂᑮ ᐃᔑ ᐅᓀᑖᓈᐸᓐ ᐁᐐ ᑲᓇᐌᑕᒫᓐ ᑭᑎᓈᑯᓂᑫᐎᓐ ᒥᓂᒃ ᐃᑯ ᑫᐱᒫᑎᓯᔮᓐ᙮ ᐁᒥᓴᐌᑖᑾᒃ ᒋᓇᐃᒋᑳᑌᓂᑭᐸᓐ ᑳᑎᐯᒋᑫᒡ ᐅᑑᓇᔓᐌᐎᓐ 129 ᐁᑕᑕᐌ ᓴ ᒫᒪᑳᓯᑖᑾᓅᓐ ᑭᑎᓈᑯᓂᑫᐎᓇᓐ, ᒦᑕᔥ ᐐᑫ ᒥᓯᐌ ᐱᑯ ᑳᐅᒋ ᐃᓀᑕᒫᓐ ᐁᐐ ᑲᓇᐌᑕᒫᓐ᙮ 130 ᑫᑭᓄᐊᒫᑫᔭᓐ ᓴ ᑳᔑ ᑮᑳ ᐙᐐᑌᑭᓐ ᒦ ᐃᒫ ᐌᒋ ᐙᓭᔮᒃ᙮ ᒦ ᐄᑐᒃ ᐃᐃᒫ ᑳᐅᓂᓯᑐᑕᒫᐎᓂᓯᒀ ᑫᐅᒋ ᒫᒌ ᑲᑮᑖᐌᑕᒧᐙᒡ᙮ 131 ᐐᑫ ᓴ ᐱᑯ ᑌᐺ ᓂᒥᓴᐌᑖᓇᓐ ᑭᑑᓇᔓᐌᐎᓇᓐ ᐁᐃᓀᑖᑾᒃ ᑖᐱᔥᑰ ᐁᓅᑕᔮᐹᑴᓄᑕᒫᓐ ᑭᑎᑭᑐᐎᓇᓐ᙮ 132 ᐲᓈᐱᓐ, ᒋᑰᐹᑌᓂᒥᔭᓐ, ᒋᑑᑕᐎᔭᓐ ᑳᓂᑖ ᑑᑕᐗᑣ ᐃᑭ ᑳᓵᑭᐃᒀ᙮ 133 ᑳᑮ ᐃᔑ ᐊᔓᑕᒪᐎᔭᓐ ᓴ ᐃᔑᒋᑫᐃᔑᓐ ᒋᑲᓇᐌᓂᒥᔭᓐ ᒋᐱᓱᑫᔑᓯᐙᓐ, ᑫᑯ ᐸᑭᑎᓇᑫᓐ ᒣᒋ ᑫᑰᓐ ᒋᑎᐯᓂᒥᑯᔮᓐ᙮ 134 ᔖᐾᐃᔑᓐ ᓴ ᑳᐐ ᑑᑕᐎᐙᒡ ᐃᓂᓂᐗᒃ ᑫᐌᓵᓂᐃᐙᒡ ᒦᔥ ᐱᓵᓐ ᒋᓇᐃᑕᒫᓐ ᑭᑎᓈᑯᓂᑫᐎᓇᓐ᙮ 135 ᑕᑲ ᓴ ᐐᑫ ᒥᓍᐸᒥᔑᓐ, ᑭᑭᓄᐊᒪᐎᔑᓐ ᑭᑎᑭᑐᐎᓇᓐ᙮ 136 ᓰᐲᐌᑖᑾᓐ ᓴ ᑳᔑ ᐅᒋᑲᐙᐱᔮᓐ ᐅᓵᒻ ᐋᓃᔥ ᑳᐐᓐ ᐊᐎᔭᒃ ᐅᓇᐃᑕᓰᓈᐙ ᑭᑑᓇᔓᐌᐎᓐ᙮ ᐌᐌᓂ ᐁᐃᓈᑯᓂᑫᒪᑲᓂᓂᒃ ᑳᑎᐯᒋᑫᒡ ᐅᑑᓇᔓᐌᐎᓐ 137 ᐆ ᑌᐯᒋᑫᔭᓐ, ᑮᓐ ᓴ ᑭᑾᔭᒀᑎᔅ, ᑾᔭᒃ ᐁᐃᓈᑯᓂᑫᔭᓐ᙮ 138 ᐃᓂ ᓴ ᑭᑎᓈᑯᓂᑫᐎᓇᓐ ᑳᐅᓇᑑᔭᓐ ᑌᐺᔦᑖᑾᓅᓐ ᐐᑫ ᑲᔦ ᐁᑾᔭᑴᑖᑾᑭᓐ᙮ 139 ᐋᐱᒋ ᓴ ᓂᓂᔥᑭᐃᑯᐙᓇᓐ ᐁᔑᒋᑫᐙᒡ ᐃᑭ ᑳᔒᑫᓂᒥᐙᒡ ᐁᐸᐹᒥᑕᓯᒀ ᑭᑎᑭᑐᐎᓇᓐ᙮ 140 ᑲᑭᓇ ᓴ ᐁᔑ ᐊᔓᑕᒫᑫᔭᓐ ᑫᒋᓈᒡ ᑌᐺᔦᑖᑾᓅᓐ, ᐁᑕᑕᐌ ᓂᓵᑭᑑᓇᓐ᙮ 141 ᐐᑫ ᓴ ᓃᓐ ᓂᑕᐸᓭᑖᑯᔅ, ᓂᑖᓇᐌᑖᑯᔅ ᑲᔦ, ᔖᑰᒡ ᐃᑕᔥ ᑳᐐᓐ ᓂᐗᓃᑫᓄᑕᓰᓇᓐ ᑭᑎᓈᑯᓂᑫᐎᓇᓐ᙮ 142 ᐁᔑ ᑾᔭᒀᑎᓯᔭᓐ ᓴ ᑳᐐᓐ ᐐᑳ ᑕᐴᓂᓭᓯᓅᓐ, ᑭᑑᓇᔓᐌᐎᓐ ᓴ ᑲᔦ ᑌᐺᐗᓐ᙮ 143 ᐋᓇᐐᓐ ᐅᑎᓯᑯᔮᓐ ᒫᔑᓭᐎᓐ, ᐗᓯᑖᐌᑕᒧᐎᓐ ᑲᔦ, ᔖᑰᒡ ᐃᑯ ᑭᑎᓈᑯᓂᑫᐎᓂᕽ ᓂᑑᒋ ᒌᑫᑕᒻ᙮ 144 ᑭᑎᓈᑯᓂᑫᐎᓇᓐ ᓴ ᓀᐱᒡ ᐃᑯ ᑾᔭᑴᑖᑾᓅᓐ᙮ ᒦᔑᔑᓐ ᓴ ᑾᔭᒃ ᒋᓂᓯᑐᑕᒫᓐ ᒋᐱᒫᑎᓯᔮᓐ᙮ ᑫᔑᑲᑴᑗᑭᐸᓐ ᐊᐎᔭ ᒋᐐᒋᐃᓐᒡ 153 ᐃᓇᔥᑫ ᑲᓇᐙᐸᒥᔑᓐ ᐁᔑ ᑲᒀᑕᑭᓭᔮᓐ ᒋᓈᑕᒪᐎᔭᓐ, ᑳᐐᓐ ᐄᑐᒃ ᓂᐗᓃᑫᓄᑕᓰᓐ ᑭᑑᓇᔓᐌᐎᓐ᙮ 154 ᓈᑕᒪᐎᔑᓐ ᐅᐅ ᑳᐃᔑ ᒫᔑᓭᔮᓐ, ᒋᑕᑯ ᓵᑭᓯᐃᔭᓐ, ᒋᑮᐌ ᐱᒫᑎᓰᐃᔭᓐ ᒪᔮ ᐱᑯ ᒋᐃᔑᓭᒃ ᐁᔑᓯᑭᓐ ᑭᑎᑭᑐᐎᓇᓐ᙮ 155 ᒣᒑᑎᓯᐙᒡ ᓴ ᐐᑫ ᐅᓈᐙᐸᑖᓈᐙ ᐱᒫᒋᐃᑰᐎᓯᐎᓐ, ᐅᓵᒻ ᑳᐐᓐ ᐃᔑᒋᑫᓰᐗᒃ ᒋᐐ ᑲᑴ ᓇᐃᑕᒧᐙᐸᓐ ᑭᑎᓈᑯᓂᑫᐎᓇᓐ᙮ 156 ᐐᑫ ᓴ ᐌᓅᑕᓐ ᐁᔑ ᑰᐹᑌᓂᒥᐌᔭᓐ ᐆ ᑌᐯᒋᑫᔭᓐ, ᑑᑕᐎᔑᓐ ᑌᐺ ᒋᐱᒫᑎᓯᔮᓐ ᒋᐃᔑᓭᒃ ᒪᔮ ᐁᔑᓯᑭᓐ ᑭᑎᓈᑯᓂᑫᐎᓇᓐ᙮ 157 ᐹᑏᓄᐗᒃ ᓴ ᑳᔒᑫᓂᒥᐙᒡ ᑫᒀᑕᑭᐃᐙᒡ, ᑳᐐᓐ ᐃᑕᔥ ᓂᑑᒋ ᓇᑲᑕᓰᓇᓐ ᑭᑎᑭᑐᐎᓇᓐ᙮ 158 ᑮᑲᓇᐙᐸᒪᒀ ᓴ ᐃᑭ ᒣᒋᐃᔑᐌᐱᓯᐙᒡ, ᐐᑫ ᓴ ᓂᑲᒀᓂᓴᑲᒪᒋᐞ, ᐋᓃᔥ ᑳᐐᓐ ᐅᓇᐃᑕᓰᓈᐙ ᑭᑎᑭᑐᐎᓐ᙮ 159 ᐃᓇᔥᑫ ᓃᓐ ᐁᐲᒋ ᓵᑭᑑᔮᓐ ᑭᑎᑭᑐᐎᓇᓐ, ᐆ ᑌᐯᒋᑫᔭᓐ ᑲᓇᐌᑕᓐ ᓂᐱᒫᑎᓯᐎᓐ ᑖᐱᔥᑰ ᑳᔑ ᓵᑭᐃᐌᔭᓐ᙮ 160 ᑲᑭᓇ ᓴ ᑭᑎᑭᑐᐎᓇᓐ ᑌᐺᔦᑖᑾᓅᓐ; ᑲᑭᓇ ᑴᔭᑴᑖᑾᑭᓐ ᑭᑑᓇᔓᐌᐎᓇᓐ ᓀᐱᒡ ᑕᐊᔮᐗᓐ᙮ ᑫᔑᐊᓇᒥᐋᕽ ᐊᐎᔭ ᒋᐐᒋᐃᑰᐎᓯᒡ 169 ᐆ ᑌᐯᒋᑫᔭᓐ, ᑕᑲ ᓅᑕᐎᔑᓐ ᐅᐅ ᑳᔑ ᔖᑯᐙᓂᓈᓐ ᒋᐐᒋᐃᔭᓐ, ᒦᔑᔑᓐ ᓂᓯᑐᑕᒧᐎᓐ ᒋᐃᔑᓭᒃ ᒪᔮ ᐁᔑᓯᕽ ᑭᑎᑭᑐᐎᓐ᙮ 170 ᐱᓯᑕᐎᔑᓐ ᐅᐅ ᑳᔑ ᑲᑴᒋᒥᓈᓐ, ᐃᔑ ᓈᑕᒪᐎᔑᓐ ᐃᓇᑫ ᑳᑮ ᐃᔑ ᐊᔓᑕᒪᓐ᙮ 171 ᑕᑲ ᓴ ᓂᑑᓂᕽ ᑭᑲ ᐅᒋ ᒦᑴᒋᐌᓂᒥᓐ, ᑭᑭᑭᓄᐊᒪᐤ ᐋᓃᔥ ᑭᑎᑭᑐᐎᓇᓐ᙮ 172 ᑕᑲ ᓴ ᓂᑲ ᓂᑲᒨᑖᓇᓐ ᑭᑎᑭᑐᐎᓇᓐ, ᑲᑭᓇ ᐄᑐᒃ ᑭᑎᓈᑯᓂᑫᐎᓇᓐ ᑾᔭᑴᑖᑾᓅᓐ᙮ 173 ᑕᑲ ᒨᔕᒃ ᐊᔛᓐ ᒋᐎ ᐐᒋᐃᔭᓐ, ᑭᑎᑭᑐᐎᓇᓐ ᐄᑐᒃ ᓂᑮ ᐅᓀᑖᓇᓐ ᐁᐐ ᐱᒥᓂᔕᐊᒫᓐ᙮ 174 ᐆ ᑌᐯᒋᑫᔭᓐ, ᐐᑫ ᓴ ᓂᒥᓴᐌᑖᓐ ᑭᐱᒫᒋᐃᐌᐎᓐ, ᐁᒥᓉᑕᒫᓐ ᑭᑑᓇᔓᐌᐎᓐ᙮ 175 ᑕᑲ ᓂᑲ ᐱᒫᑎᔅ ᒋᒦᑴᒋᐌᓂᒥᓈᓐ; ᒋᐐᑑᑳᑯᔮᓐ ᑭᑑᓇᔓᐌᐎᓐ᙮ 176 ᓂᑮ ᐗᓂᔑᓐ ᓴ ᑖᐱᔥᑰ ᒫᓇᒑᓂᔥ᙮ ᐊᑐᓀᐅᔑᓐ, ᓃᓐ ᐄᑐᒃ ᑭᑕᓄᑮᐋᑲᓐ, ᑳᐐᓐ ᐄᑐᒃ ᓂᐗᓃᑫᓄᑕᓰᓇᓐ ᑭᑑᓇᔓᐌᐎᓇᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society