Nikamonan 104 - ᐅᒋᐺ ᑭᒋᒪᓯᓇᐃᑲᓐᐁᒦᑴᒋᐌᓂᒥᓐᒡ ᑲᑭᓇ ᑫᑰᓐ ᑳᑮᐅᔑᑑᒡ 1 ᓂᑕᒑᑯᕽ ᓴ ᓂᑲ ᐅᒋ ᒦᑴᒋᐌᓂᒫ ᑳᑎᐯᒋᑫᒡ᙮ ᐆ ᑌᐯᒋᑫᔭᓐ ᓂᑭᔐᒪᓂᑑᒻ ᐁᑕᑕᐌ ᑭᑭᒋ ᐃᓀᑖᑯᔅ; ᐁᑭᑭᔥᑲᒪᓐ ᑭᑌᑖᑯᓯᐎᓐ, ᐅᑭᒫᐌᑖᑯᓯᐎᓐ ᑲᔦ; 2 ᑳᐙᓭᔮᒃ ᑲᔦ ᑭᐱᓯᑳᓐ ᑖᐱᔥᑰ ᑳᔑ ᑭᑭᔥᑭᑳᑌᒃ ᑲᔥᑮᑮᐎᓐ᙮ ᒦ ᑲᔦ ᑳᑑᑕᒪᓐ ᑮᔑᒃ ᐁᑮ ᑕᔗᔩᑭᐱᑑᔮᓐ ᑖᐱᔥᑰ ᑳᑑᒋᑳᑌᒃ ᐸᒀᓀᑲᒥᒃ᙮ 3 ᑭᑮ ᐃᔑ ᐅᔑᑑᓐ ᑲᔦ ᑭᑖᐎᓐ ᐃᔥᐱᒥᕽ ᓂᐲᑳᕽ᙮ ᒦ ᑲᔦ ᐁᓍᑕᒪᓐ ᐙᑸᓐ ᑭᒦᑳᓱᐎᐅᑖᐹᓂᕽ, ᑮᐱᒥᓅᐌᒃ ᒦ ᐃᒫ ᐁᔑ ᐱᒥ ᐊᔮᔭᓐ᙮ 4 ᓅᑎᓐ ᑲᔦ ᒦ ᐃ ᐁᓍᑕᒪᓐ ᑳᐸᐹᒫᒋᒧᐙᒡ ᐊᐎᔭᒃ, ᑳᐙᐙᑌᓭᒃ ᑭᑎᓍᑖᓐ ᑖᐱᔥᑰ ᑳᐊᓄᑮᑕᐎᒀ᙮ 5 ᑮᓐ ᑲᔦ ᐐᑫ ᑭᑮ ᐋᔩᑕᑑᓐ ᐊᑭ ᐃᐃᒫ ᑳᔑ ᐊᑌᒃ, ᑳᐐᓐ ᑕᔥ ᐐᑳ ᑕᐗᑲᐎᓭᓯᓅᓐ᙮ 6 ᑮᐅᔑ ᐸᑭᑎᓇᒪᓐ ᓴ ᓂᐱ ᑭᒋᑲᒦᕽ ᒦ ᓴ ᑳᑑᑕᒪᓐ ᑖᐱᔥᑰ ᑲᔥᑮᑮᐎᓐ ᑳᐸᑭᒌᑭᓂᑳᑌᒃ; ᑭᒋ ᐗᒌᓐ ᑕᔥ ᐐᑫ ᑮᓂᑭᐲᐗᓐ᙮ 7 ᐊᐲ ᑕᔥ ᑮᑭᔒ ᑲᓅᑕᒪᓐ ᓂᐱ, ᒦ ᐃ ᑳᐃᔑ ᒫᒌᔮᑲᒥᓭᒃ; ᐁᑮ ᒫᒌᐸᐃᐌᔮᑲᒥᓭᒃ ᐊᐲ ᑮᓅᑕᒫᒪᑲᒃ ᑳᑮ ᐃᔑ ᔖᑯᐌᐗᒡ ᑮᐱᓀᓰᐎᑖᑯᓯᐗᒡ᙮ 8 ᑭᒋ ᐗᒌᑳᕽ ᓴ ᐃᑕᔥ ᑮᐊᓂ ᐊᔨᔑᒋᐗᓐ ᐲᓂᔥ ᐁᑮ ᐊᓂ ᐅᒋᒋᒋᐗᕽ ᑳᔑ ᐸᐸᓴᑎᓈᒃ, ᑳᑮ ᐃᔑ ᐅᔑᑑᐗᐸᓀᓐ ᑫᐃᔑᐊᔮᒃ ᐃᐃ ᓂᐱ᙮ 9 ᑭᑮ ᐅᔑᓯᑑᓐ ᓴ ᐋᑎ ᑫᐊᑯ ᐃᔖᒪᑲᒃ ᐃᐃ ᓂᐱ ᒦᓇᐙ ᐐᑳ ᒋᓂᑭᐲᓯᓄᒃ ᐅᐅ ᐊᑭ᙮ 10 ᑭᑎᔑᑑᓐ ᑲᔦ ᒨᑭᒋᐎᓂᐱ ᒋᒪᒨᑭᒋᐗᕽ ᑳᔑ ᐸᐸᓴᑎᓈᒃ, ᓰᐲᓐ ᑲᔦ ᒋᐊᔨᔑᒋᐗᑭᓐ ᑳᔑ ᓇᓇᓴᐗᑎᓈᒃ᙮ 11 ᒦ ᓴ ᑕᔥ ᐃᐃᒫ ᐌᑖᑲᒪᒋᑫᐙᒡ ᐊᔭᐋᐎᔕᒃ ᒥᔕᐗᑲᒥᒃ ᑳᐊᔮᐙᒡ, ᐱᑾᒋ ᒫᔑᒥᑕᑎᒨᒃ ᑲᔦ ᐌᒋ ᑌᒥᓂᑴᐙᒡ᙮ 12 ᐱᓀᔒᔕᒃ ᑲᔦ ᑳᐸᐹᒥᓭᐙᒡ ᒦ ᐃᒫ ᐁᔑ ᐗᓯᔀᓄᑫᐙᒡ ᒌᑭᐲᒃ, ᐁᑕᓉᐎᑕᒧᐙᒡ ᒣᑴᔭᐄ ᑳᔑ ᐗᐗᑎᑾᓂᑳᓂᒃ᙮ 13 ᐌᑎ ᑕᔥ ᐃᔥᐱᒥᕽ ᑳᔑ ᐊᔮᔭᓐ ᑭᑑᒋ ᐃᔑᒋᑫ ᒋᔑ ᑭᒥᐗᕽ ᑳᔑ ᐸᐲᑾᑎᓈᒃ, ᒦᑕᔥ ᐅᐅ ᐊᑭ ᐁᔑ ᑌᐱᓇᐌᓰᒪᑲᒃ ᒥᓯᐌ ᐁᓈᑾᒃ ᑭᑕᓄᑮᐎᓐ᙮ 14 ᑮᓐ ᑳᐃᔑᑑᔭᓐ ᒪᔥᑯᓰᓐ ᒋᒫᒌᑭᑭᓐ ᑫᒦᒋᐙᒡ ᐱᔑᑭᐗᒃ, ᑭᑎᑳᓇᓐ ᑲᔦ ᐃᓂᓂ ᑫᐸᒥᑑᒡ, ᒋᓂᑖᐎᑭᑑᒡ ᑫᒦᒋᒡ ᐃᐃᒫ ᐊᑮᕽ᙮ 15 ᒋᐅᔑᑑᒡ ᑲᔦ ᔔᒥᓈᐴᓂ ᑫᒥᓄᑌᐁᔥᑳᑯᒡ, ᐱᒥᑌᓂ ᑲᔦ ᑫᒥᐧᓃᓐᑴᔥᑳᑯᒡ, ᒋᐅᔑᐋᒡ ᑲᔦ ᐸᑴᔑᑲᓇᓐ ᑫᒪᔥᑲᐎᓰᔥᑳᑯᒡ᙮ 16 ᑮᔥᑳᑎᑰᒃ ᓬᐁᐸᓇᓐ Lebanon ᐊᑮᕽ ᑳᐊᔮᐙᒡ ᓴ ᐐᑫ ᑌᐱᓭᐗᒃ ᓂᐲᓂ, ᑳᑎᐯᒋᑫᒡ ᐅᒥᑎᑯᒪᐞ ᐐᓐ ᐃᑯ ᑳᑮ ᑭᑎᑳᓈᒡ᙮ 17 ᒦᑕᔥ ᐃᐃᒫ ᐱᓀᔒᔕᐞ ᐁᔑ ᐅᔑᑑᓂᒡ ᐅᐗᓯᔀᓂᓂ; ᑭᒋ ᒨᔅᑲᐅᓯᐗᐞ ᑲᔦ ᒦ ᐃᒫ ᐁᔑ ᐗᓯᔀᓄᑫᓂᒡ ᑮᔥᑳᑎᑯᕽ᙮ 18 ᐱᑾᒋ ᒫᓇᑎᑾᒃ ᓴ ᑮᐅᔑᑕᒪᐙᐗᒃ ᐗᒌᓐ ᒋᐃᔑᑖᐙᒡ, ᑳᔑ ᐊᔭᓯᓃᑳᓂᒃ ᑕᔥ ᐐᓐ ᐹᒑᕒᐗᒃ Badger ᐃᔑ ᑳᓱᐗᒃ᙮ 19 ᑮᓐ ᑭᑮ ᐃᔑᐋ ᑎᐱᑭ ᑮᓯᔅ ᑫᐅᒋ ᑭᑫᒋᑳᑌᒃ ᐋᓃᓐ ᑫᓂ ᐃᔑᐌᐸᒃ; ᑮᓯᔅ ᑲᔦ ᐅᑭᑫᑖᓐ ᐊᐲ ᑫᐸᑭᔑᒧᒡ᙮ 20 ᑮᓐ ᑭᑮ ᐅᔑᑑᓐ ᑳᑲᔥᑮᑎᐱᑲᒃ᙮ ᑮᑎᐱᑲᓂᓂᒃ ᑕᔥ ᒦ ᐃ ᑲᑭᓇ ᐊᔭᐋᐎᔕᒃ ᓅᐱᒦᕽ ᑳᐊᔮᐙᒡ ᐁᔑ ᒪᑌᔩᐙᒡ᙮ 21 ᐅᔥᑭ ᒥᔑᐱᔑᐗᒃ ᓴ ᑲᔦ ᓅᑖᑯᓯᐗᒃ ᑮᐊᑕᐌᒋᑫᐙᒡ, ᐁᓇᓈᑕᐙᐸᑕᒧᐙᒡ ᒦᒋᒻ ᑭᔐᒪᓂᑑᓐ ᑳᒦᑭᐌᓂᒡ᙮ 22 ᑮᓯᓲᓐ ᑕᔥ ᐁᐱ ᒨᑲᐊᒥᓂᒡ, ᒦ ᐃ ᐁᔑ ᑮᐌᐙᒡ ᐁᐊᐎ ᐱᒥᔑᓄᐙᒡ ᐅᐙᔑᐙᕽ᙮ 23 ᒦ ᓴ ᐐᓐ ᐃᐃ ᐊᐲ ᐯᒫᑎᓯᐙᒡ, ᐁᔑ ᑑᑕᒧᐙᒡ ᐅᑕᓄᑮᐎᓂᐙᓐ, ᐁᐊᓄᑮᐙᒡ ᐲᓂᔥ ᐁᐊᓂ ᐅᓈᑯᔑᓂᓂᒃ᙮ 24 ᑌᐯᒋᑫᔭᓐ, ᐁᑕᑕᐌ ᓴ ᓃᐱᐗᐞ ᑫᑰᓇᓐ ᑭᑮ ᐅᔑᑑᓇᓐ, ᑭᑲᑮᑖᐌᑕᒧᐎᓃᕽ ᐅᔕ ᑲᑭᓇ ᑫᑰᓐ ᑭᑮ ᐅᒋ ᐅᔑᑑᓐ! ᒨᔥᑭᓀᐗᒃ ᐅᔕ ᐅᐅᒫ ᐊᑮᕽ ᑲᑭᓇ ᑳᑮ ᐅᔑᐊᑣ! 25 ᐃᐃ ᑕᔥ ᑲᔦ ᑭᒋᑲᒻ ᐗᐐᑫ ᒥᒑ, ᒪᑲᑌᔮ ᑲᔦ, ᒦ ᓴ ᐃᒫ ᐁᔮᐙᒡ ᑳᑲᔥᑭᐋᓯᐎᑣ ᒋᐊᑭᒥᑣᐸᓐ ᐁᐲᒋ ᐹᑏᓄᐙᒡ ᐊᔭᐋᐎᔕᒃ ᑳᒪᒫᑎᑐᐙᒡ, ᑳᐊᔭᑳᔒᔑᐙᒡ ᑲᔦ᙮ 26 ᑭᒋ ᒌᒫᓇᓐ ᑲᔦ ᐱᒫᓯᓅᓐ ᑭᒋᑲᒦᕽ, ᒦ ᑲᔦ ᐃᒫ ᑭᒋ ᐅᑳᑏᑭᓀᐱᒃ ᑳᑮ ᐅᔑᐊᒡ ᐁᑕᔑ ᐅᑕᒥᓄᒡ᙮ 27 ᑲᑭᓇ ᓴ ᑭᑕᐯᓂᒧᓄᑖᑰᒃ ᒋᐊᔕᒪᑣ ᐊᐲ ᑮᐐ ᐐᓯᓂᐙᒡ᙮ 28 ᑮᐊᔕᒪᑣ ᑕᔥ ᒦ ᐃ ᐁᔑ ᒦᒋᐙᒡ, ᑮᓐ ᐄᑐᒃ ᑳᐅᑎᓇᒪᐗᑣ ᐁᔑ ᐐᓯᓂᐙᒡ, ᒦᔥ ᐃᐃ ᐁᔑ ᑌᐐᓯᓂᐙᒡ᙮ 29 ᐊᐲ ᓴ ᑕᔥ ᑮᑳᓱᐗᒡ, ᒦ ᐃ ᐐᑫ ᐁᔑ ᓭᑭᓯᐙᒡ; ᑮᐅᑖᐱᓇᒧᐗᒡ ᑲᔦ ᐅᐸᑭᑕᓈᒧᐎᓂᐙᓐ, ᒦ ᐃ ᐁᔑ ᓂᐳᐙᒡ ᐁᐊᓂ ᑮᐌ ᐃᔑᐊᔮᐙᒡ ᐹᔥᑭᓀᑲᒥᑯᕽ ᑳᑮ ᐅᒋ ᐅᔑᐋᐎᑣᐸᓀᓐ᙮ 30 ᑮᒦᓇᑣ ᑕᔥ ᐸᑭᑕᓈᒧᐎᓐ ᒦ ᐃ ᐁᔑ ᐅᔑᐃᑣ, ᑮᓐ ᑲᔦ ᐅᔥᑭ ᐱᒫᑎᓯᐎᓐ ᑭᑕᑑᓐ ᐅᐅᒫ ᐊᑮᕽ! 31 ᑕᑲ ᑳᑎᐯᒋᑫᒡ ᐅᑭᒋ ᐃᓀᑖᑯᓯᐎᓐ ᓀᐱᒡ ᑕᐊᔮᓂ, ᑕᑲ ᑲᔦ ᐅᑲ ᒥᓉᑖᓇᓐ ᑳᑮ ᐅᔑᑑᒡ! 32 ᑮᑲᓇᐙᐸᑕᕽ ᐊᑮᓂ ᒦ ᐃ ᐁᔑ ᓂᓂᑭᔥᑳᓂᒃ; ᑮᓵᒥᓇᕽ ᑭᒋ ᐗᒌᓂ ᒦ ᐃ ᐁᔑ ᐹᔥᑭᓀᓂᑭᓐ᙮ 33 ᓂᑲ ᓂᑲᒨᑕᐙ ᓴ ᑳᑎᐯᒋᑫᒡ ᓂᑭᔐᒪᓂᑑᒻ ᒥᓂᒃ ᐃᑯ ᑫᐱᒫᑎᓯᔮᓐ, ᒋᐃᓇᐊᒫᓐ ᐁᒦᑴᒋᐌᓂᒪᒃ᙮ 34 ᑕᑲ ᑲᔦ ᑳᔑ ᓈᓈᑲᑕᐌᑕᒧᐗᒃ ᐅᑲ ᒥᓍᐸᑕᓐ, ᐐᓐ ᐄᑐᒃ ᑳᑎᐯᒋᑫᒡ ᑳᐅᒋ ᒥᓉᑕᒧᐗᒃ᙮ 35 ᑕᑲ ᐅᒪᒋᑑᑕᒨᒃ ᑕᓂᔑᐗᓈᒋᒋᑲᓂᐎᐗᒃ ᐅᐅᒫ ᐊᑮᕽ, ᐃᑭ ᑲᔦ ᑳᒪᒋᐃᔑᐌᐱᓯᐙᒡ ᑕᑲ ᑳᐐᓐ ᐊᐗᔑᒣ ᑕᐊᔮᓰᐗᒃ᙮ ᓂᑕᒑᑯᕽ ᓂᑲ ᐅᒋ ᓇᓈᑯᒫ ᑳᑎᐯᒋᑫᒡ! ᓇᓈᑯᒫᑖ ᑳᑎᐯᒋᑫᒡ! |
Ojibwe Shorter Bible (Syllabic Script) © 2008 Canadian Bible Society
Canadian Bible Society