Neham 1 - ᐅᒋᐺ ᑭᒋᒪᓯᓇᐃᑲᓐ1 ᒦ ᓴ ᐅᐌ ᑳᐃᔑᐲᐃᑳᑌᒃ ᐐᑕᒫᑫᐎᓐ ᐃᐃ ᐅᒋ ᑭᒋ ᐆᑌᓇ ᓂᓂᐯ Nineveh ᑳᑮ ᐃᔑ ᐙᐸᑕᐃᓐᒡ ᓀᐊᒻ Nahum ᐌᒌᒡ ᐁᓬᑯᔥ Elkosh ᐁᒋᑳᑌᓂᒃ᙮ ᑳᑎᐯᒋᑫᒡ ᑳᑮᐃᔑᓂᔥᑭᐃᑯᒡ ᓂᓂᐯ 2 ᑌᐯᒋᑫᒡ ᑭᔐᒪᓂᑑ ᐅᑌᑕᒻ, ᐁᐐ ᓇᓇᐊᓵᒡ ᐃᐃ ᐁᐊᓇᒥᐁᑕᐙᓂᒡ ᒪᓂᑑᑳᓇᐞ᙮ ᑳᑎᐯᒋᑫᒡ ᓴ ᑕᑯ ᓂᔥᑳᑎᓯ ᐊᐲ ᑮᓇᓇᐊᓵᒡ ᑳᓇᑳᔥᑳᑯᒡ᙮ ᐅᓇᓇᐊᓵᐞ ᑲᔦ ᑳᓂᔥᑫᓂᒥᑯᒡ, ᑳᐐᓐ ᑲᔦ ᐅᐴᓂ ᓂᔥᑭᐃᑯᓰᐞ ᑳᔒᑫᓂᒥᑯᒡ᙮ 3 ᑳᑎᐯᒋᑫᒡ ᓴ ᑳᐐᓐ ᐗᑫ ᓂᔥᑳᑎᓯᓰ, ᐐᓐ ᑲᔦ ᐋᐱᒋ ᒪᔥᑲᐌᑖᑯᓯ᙮ ᐊᐎᔭᓐ ᑳᐊᓈᒣᑖᑯᓯᓂᒡ ᐅᒋᑕᑯ ᑳᑎᐯᒋᑫᒡ ᐅᑲᓇᓇᐊᓵᓐ᙮ ᐋᓂᑎ ᓴ ᐱᑯ ᑳᑎᐯᒋᑫᒡ ᐁᔑ ᐱᒧᓭᒡ, ᒦ ᐃ ᐁᔑ ᑭᒋ ᐲᑖᓂᒪᓂᓂᒃ᙮ ᐗᑸᓐ ᐃᓴ, ᒦᐗᓐ ᐃᓂ ᐁᐹᔥᑭᓀᐌᐱᔥᑭᑫᒡ᙮ 4 ᑮᑲᓅᑕᕽ ᓴ ᑭᒋᑲᒻ, ᒦ ᐃ ᐁᔑ ᐹᑾᓂᓂᒃ᙮ ᓰᐲᓐ ᑲᔦ ᐅᑑᑖᓇᓐ ᒋᐹᑾᓂᓂᑭᓐ᙮ ᐃᐃ ᓴ ᐯᔕᓐ Bashan ᒥᔕᐗᑲᒥᒃ ᑕᓂ ᐹᑌ᙮ ᐃᐃ ᑲᔦ ᑭᒋ ᐗᒋᐤ ᑳᕒᒪᓬ Carmel ᐁᒋᑳᑌᒃ ᑕᓂ ᐅᓵᐎᓈᑾᓐ᙮ ᐃᓂᔥ ᑲᔦ ᐙᐱᑾᓃᓐ ᓀᑖ ᐊᔮᑭᓐ ᐃᐃᒫ ᓬᐁᐸᓇᓂᕽ Lebanon ᑕᓂ ᐙᐱᒌᐋᑌᐗᓐ᙮ 5 ᑭᒋ ᐗᒌᓐ ᓴ ᐗᑲᐎᓭᓂᐗᓐ ᐁᓈᓴᒦᒡ ᑳᑎᐯᒋᑫᒡ, ᑳᐱᑾᑎᓈᓂᑭᓐ ᑲᔦ ᓂᑭᔥᑳᓂᐗᓐ᙮ ᐊᑮᓂ ᐗᑲᐎᓭᓂ ᑮᓈᑯᓯᒡ ᑳᑎᐯᒋᑫᒡ, ᒥᓯᐌᑲᒥᒃ ᑲᔦ, ᑲᑭᓇ ᑲᔦ ᐯᒫᑎᓯᓂᒡ ᐃᐃᒫ ᐁᔮᓂᒡ ᑕᓂᓂᑳᓂᒥᓯᐗᐞ᙮ 6 ᐊᐲ ᑕᔥ ᑮᓂᔥᑳᑎᓯᒡ, ᐊᐌᓀᓇᓐ ᐃᑕᔥ ᑫᔖᐾᓂᐸᓐ? ᐊᐎᔭᓐ ᐃᓇ ᐅᑖ ᔖᐾᑲᑕᒥᓂ ᐅᑎᔥᑯᑌᐎ ᓂᔥᑳᑎᓯᐎᓐ? ᐅᓰᑭᓈᓐ ᐄᑐᒃ ᐃᔥᑯᑌᕽ ᐁᓀᑖᑾᓂᓂᒃ ᐅᓂᔥᑳᑎᓯᐎᓐ ᒦᔥ ᐊᓯᓃᐞ ᐁᔑ ᐲᓯᓭᓂᒡ ᐁᐊᓂ ᐹᔥᑭᓀᓭᓂᒡ ᐁᓈᓴᒦᒡ ᑳᑎᐯᒋᑫᒡ᙮ 7 ᑳᑎᐯᒋᑫᒡ ᐅᔕ ᒥᓍᑎᓯ᙮ ᐅᓈᑕᒪᐙᐞ ᐅᐱᒫᑎᓰᒪᐞ ᐊᐲ ᑮᒫᔑᓭᓂᒡ, ᐅᑲᓇᐌᓂᒫᐞ ᐃᐃ ᑳᑌᐺᔦᓂᒥᑯᒡ᙮ 8 ᑖᐱᔥᑰ ᓴ ᑳᑭᒋ ᑭᔒᒋᐗᕽ ᑮᒨᔥᑲᐊᕽ ᒦ ᓴ ᐃ ᓇᑫ ᑫᔑ ᑌᑕᑯ ᓂᔑᐗᓈᒋᐋᒡ ᑳᔒᑫᓂᒥᑯᒡ᙮ ᑲᔦ ᑕᔥ ᐅᑎᔑᓂᔕᐙᐞ ᐃᐃ ᑳᔒᑫᓂᒥᑯᒡ ᐁᔑ ᑲᔥᑮᑎᐱᑲᓂᓂᒃ᙮ 9 ᐋᓃᓐ ᐃᑕᔥ ᐗᐃᔑ ᒪᒋᑑᑕᐌᒃ ᑳᑎᐯᒋᑫᒡ? ᑭᑲ ᑑᑖᑯᐙ ᐅᔕ ᒋᓂᔑᐗᓈᑎᓯᔦᒃ᙮ ᐐᓐ ᐄᑐᒃ ᐊᐎᔭᓐ ᓃᔑᕽ ᐐᑳ ᐅᓇᑳᔥᑳᑯᓰᓐ᙮ 10 ᑖᐱᔥᑰ ᓴ ᑳᐅᑯᐆᑌᑭᓐ ᑳᔑᓰᓐ, ᔔᒥᓈᐴᕽ ᐌᒋ ᑮᐗᔥᑴᐲᐙᒡ, ᑲᑭᓇ ᓴ ᑕᐊᒀᑭᓱᐗᒃ ᑖᐱᔥᑰ ᑳᔑ ᒑᑭᑌᑭᓐ ᑳᐹᑌᑭᓐ ᒪᔥᑯᓰᓐ᙮ 11 ᑮᓇᐙ ᐄᑐᒃ ᓂᓂᐯ ᑭᒋ ᐆᑌᓈᕽ ᐁᔮᔦᒃ, ᐃᐃᒫ ᐯᒥ ᐅᒌᒡ ᐃᓂᓂ ᑳᐐ ᒪᒋᑑᑕᐙᒡ ᑳᑎᐯᒋᑫᓂᒡ, ᑳᐊᓅᑮᒡ ᓅᒋᑯ ᒋᐃᔑᒋᑫᐎᓐᒡ᙮ 12 ᒦᑕᔥ ᐅᐅ ᐁᓂᓀᒃ ᑳᑎᐯᒋᑫᒡ ᑮᓇᐙ ᐃᔅᕒᐃᔭᓬ, ᐋᓇᐐᓐ ᐁᑭᒋ ᒪᔥᑲᐌᑖᑯᓯᐙᒡ, ᐁᑭᒋ ᐹᑏᓄᐙᒡ ᑲᔦ ᐊᓰᕒᐃᔭ Assyria ᐊᑮᕽ ᐌᒌᐙᒡ, ᑲᑭᓇ ᓴ ᑕᓂᔑᐗᓈᒋᐋᐗᒃ ᑳᐐᓐ ᑕᑭᑫᑖᑯᓯᓰᐗᒃ᙮ ᑮᓇᐙ ᑕᔥ ᒎᑕ Judah ᐁᔮᔦᒃ, ᐁᑮ ᑑᑕᐎᓇᑰᒃ ᒋᑲᒀᑕᑭᓭᔦᒃ, ᑳᐐᓐ ᐃᑕᔥ ᒦᓇᐙ ᐃᐃ ᓂᑲ ᐃᔑᒋᑫᓰ᙮ 13 ᒦᑕᔥ ᑫᑑᑕᐎᓇᑰᒃ ᒋᐴᓂ ᑰᐹᒋᐃᓀᒀ ᐊᓰᕒᐃᔭ ᐊᑮᕽ ᐌᒌᐙᒡ, ᑲᔦ ᑕᔥ ᒋᐲᑯᓇᒧᐗᒃ ᓴᑳᐹᓀᔮᐲᓐ ᑳᑕᑯᐱᓂᓀᒀ᙮ 14 ᒦᑕᔥ ᐅᐅ ᑳᑎᐯᒋᑫᒡ ᐁᓈᒡ ᐊᓰᕒᐃᔭ ᐊᑮᕽ ᐌᒌᓂᒡ, ᑳᐐᓐ ᐄᑐᒃ ᐅᑲ ᐊᔮᐙᓯᐙᐙᐞ ᑫᓂ ᐋᓂᑫ ᐱᒥᐎᑑᓂᒡ ᐅᐐᓱᐎᓂᐙᓐ᙮ ᓂᑲ ᓂᔑᐗᓈᒋᐃᒫᐞ ᐅᔑᑯᒋᑲᓂᐎ ᒪᓂᑑᑳᓇᐞ ᐁᔮᓂᒡ ᐅᑕᓇᒥᐁᐎᑲᒥᑯᐙᕽ᙮ ᓂᑾᔮᒋᑖᐙᓇᓐ ᑲᔦ ᐗᐃᔑ ᓇᐃᓇᒀ, ᑳᐐᓐ ᐄᑐᒃ ᑌᐊᐲᑌᑖᑯᓯᓰᐗᒃ ᒋᐱᒫᑎᓯᐙᒡ᙮ 15 ᐃᓇᔥᑫ ᐌᑎ ᑭᒋ ᐗᒌᕽ ᐃᓈᐱᒃ, ᐊᐎᔭ ᐁᐲᒋᐸᑑᒡ ᐁᐱ ᒥᓍᒋᒧᒡ, ᐁᐲᑖᑐᑕᕽ ᐱᓵᓐ ᐊᔮᐎᓐ᙮ ᑮᓇᐙ ᐁᔮᔦᒃ ᐅᐅᒫ ᒎᑕ ᐊᑮᕽ ᒌᑲᑲᒥᑭᓯᒃ, ᒋᐃᔑᒋᑫᔦᒃ ᑳᑮ ᐃᔑ ᐋᔩᒋ ᐊᔓᑕᒪᐌᑭᐸᓐ ᑳᑎᐯᒋᑫᒡ᙮ ᐃᑭ ᓴ ᒣᒋᐃᔑᐌᐱᓯᐙᒡ ᑳᐐᓐ ᒦᓇᐙ ᐐᑳ ᑭᑲ ᐱ ᒪᐎᓀᐅᑯᓰᐙᒃ᙮ ᐐᑫ ᓴ ᑯ ᑕᓂᔑᐗᓈᒋᒋᑲᓂᐎᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society