Maaihka 7 - ᐅᒋᐺ ᑭᒋᒪᓯᓇᐃᑲᓐᐁᑕᔑᑌᓂᑭᓐ ᐃᔅᕒᐃᔭᓬᐊᒃ ᐅᒪᒋᐃᔑᒋᑫᐎᓂᐙᓐ 1 ᐁᑕᑕᐌ ᓴ ᓂᑲᒀᑕᑭᓭ! ᑖᐱᔥᑰ ᓴ ᐃᓂᓂ ᑳᒫᒨᔕᑭᓇᕽ ᔒᐎᒦᒋᒻ ᐁᓃᐱᓂᓂᒃ ᐃᐃᒫ ᐁᔑ ᑭᑎᑳᓱᓂᒡ ᔔᒥᓇᐞ᙮ ᑳᐐᓐ ᓴ ᑲᓇᑫ ᒋᒥᑲᐗᒀ ᔔᒥᓇᒃ ᑫᐊᒶᒀᐸᓐ᙮ ᑳᐐᓐ ᑲᔦ ᒋᒥᑲᒫᓐ ᐃᓂ ᑫᒦᒋᔮᐹᓐ ᓂᑕᒻ ᑳᐊᑎᑌᑭᓐ ᐱᒃ figs ᑎᓄᐎᒥᓇᓐ᙮ ᒦ ᓴ ᐃ ᐁᓀᑖᑯᓯᔮᓐ ᑖᐱᔥᑰ ᐃᓂᓂ ᑳᒥᑲᓯᒃ ᔒᐎᒦᒋᒻ ᒥᑎᑯᕽ, ᑳᒥᑲᐙᓯᒃ ᑲᔦ ᔔᒥᓇᐞ ᒋᐊᔮᓂᒡ ᔔᒥᓈᑎᑯᕽ᙮ ᐋᔕ ᐄᑐᒃ ᑲᑭᓇ ᔔᒥᓇᐞ, ᐃᓂ ᑲᔦ ᒣᓄᐳᑾᑭᓐ ᐱᒃ ᑎᓄᐎᒥᓇᓐ ᑮᒑᑭ ᒨᔕᑭᓂᑳᑌᐗᓐ᙮ 2 ᑳᐐᓐ ᓴ ᐊᐙᒡ ᐯᔑᒃ ᑾᔭᒃ ᐃᓂᓂ ᒋᑭᑫᑖᑯᓯᒡ ᐅᐅᒫ ᐊᑮᕽ, ᑳᐐᓐ ᑲᔦ ᐊᐎᔭ ᒋᑭᒋᐌᓂᒫᒡ ᑭᔐᒪᓂᑑᓐ᙮ ᑲᑭᓇ ᐯᒫᑎᓯᐙᒡ ᓴ ᒦ ᐃ ᐁᔑᒋᑫᐙᒡ ᐁᐊᑲᑑᐙᒡ ᐁᐐ ᓂᔑᐌᐙᒡ᙮ ᐁᑕᓱ ᐯᔑᑯᐙᒡ ᓴ ᐅᓇᓈᑐᓀᐙᐙᐞ ᐐᒋᐱᒫᑎᓰᐙᐞ ᑫᓂᓯᑎᐙᒡ᙮ 3 ᐐᑫ ᓴ ᐅᑌᑕᑯ ᓇᑲᒋᑑᓈᐙ ᓅᒋᑯ ᐁᐃᔑᒋᑫᐙᒡ᙮ ᐃᑭ ᓴ ᐅᑭᒫᒃ, ᐃᑭ ᑲᔦ ᐅᑎᐹᑯᓂᑫᒃ ᐐᓇᐙ ᐊᑐᑕᒫᑫᐗᒃ ᒋᑎᐸᐊᒪᐎᑣ ᒋᑆ ᐅᓀᑕᒧᐙᒡ ᑫᑰᓂᓂ᙮ ᐃᑭ ᑲᔦ ᑳᒪᔥᑲᐌᑖᑯᓯᐙᒡ ᐅᐐᑖᓈᐙ ᐁᑕᐌᑕᒧᐙᒡ, ᒦᔥ ᐃᐃ ᐁᔑ ᒫᒪᐎᒋᑫᐙᒡ᙮ 4 ᐃᑭ ᓴ ᒫᐗᒡ ᓭᓭᑳ ᐃᓂᓃᐎᐙᒡ, ᑫᒋ ᐃᓀᑖᑯᓯᐙᒡ ᑳᐐᓐ ᐊᐙᒡ ᐸᑮ ᐃᓀᑖᑯᓯᓰᐗᒃ ᑖᐱᔥᑰ ᒪᔥᑯᓰᓐ ᑫᑰᓐ ᐁᓀᑖᑾᓯᓂᑭᓐ᙮ ᒦ ᐅᔕ ᐃ ᐋᔕ ᑮᐅᒋᒋᑮᔑᑲᓂᓂᒃ ᑭᔐᒪᓂᑑ ᒋᓇᓇᐊᓵᒡ ᐯᒫᑎᓯᓂᒡ, ᑳᑮ ᐃᔑ ᐊᔮᒀᒥᑖᑯᓯᑯᐸᓀᓐ ᑮᐋᐸᒋᐋᑯᐸᓀᓐ ᐅᑕᔕᐙᐲᐎᓂᓃᒪᐞ ᑳᑲᓅᑕᒫᑯᒡ᙮ ᒦᑕᔥ ᓅᑯᒻ ᐯᒫᑎᓯᐙᒡ ᑳᐅᒋ ᐗᐙᓀᑕᒧᐙᒡ᙮ 5 ᑫᑯ ᑲᔦ ᐊᐙᒡ ᑌᐺᐗᑫᓂᒫᑫᓐ ᑭᐐᒋᑖᒫᑲᓐ, ᐊᐊ ᑲᔦ ᑳᓵᑭ ᐐᒌᐗᒡ᙮ ᐊᔮᒀᒥᓯᓐ ᑲᔦ ᐋᓃᓐ ᐁᓇᒡ ᑭᐎᐤ ᑳᓵᑭᐊᒡ᙮ 6 ᐅᐅ ᓴ ᐊᐲ ᐅᑯᓯᓯᒫ ᑳᐐᓐ ᐅᑭᑌᓂᒫᓰᓐ ᐅᑌᑌᓐ, ᐊᐊ ᑲᔦ ᐅᑖᓂᓯᒫ ᐅᑲᓂ ᒫᔑ ᐐᒌᐙᓐ ᐅᒫᒫᓐ᙮ ᐊᐊᔥ ᑫᐐᓐ ᐅᔒᒥᓯᒫ ᐅᑲᓂ ᒫᔑ ᐐᒌᐙᓐ ᐅᓯᑯᓴᓐ᙮ ᐃᓂᓂ ᓴ ᑫᔒᑫᓂᒥᑯᒡ ᐅᑖᐎᓂᕽ ᑕᐅᒌᐗᐞ, ᑎᐱᓇᐌ ᐐᓐ ᐃᑯ ᐅᑎᓇᐌᒫᑲᓇᐞ᙮ 7 ᓃᓐ ᑕᔥ ᐐᓐ ᓂᑲ ᐊᔕᐙᐸᒫ ᑳᑎᐯᒋᑫᒡ, ᓂᑲ ᐲᐋ ᑲᔦ ᓂᑭᔐᒪᓂᑑᒻ ᑳᐱᒫᒋᐃᒡ᙮ ᓂᑭᔐᒪᓂᑑᒻ ᓴ ᓂᑲ ᓅᑖᒃ᙮ ᑭᔐᒪᓂᑑ ᐁᐱᒫᒋᐋᒡ ᐯᒫᑎᓯᓂᒡ 8 ᑳᔒᑫᓂᒥᔮᕽ, ᑫᑯ ᑕᔥ ᐹᐱᓄᑕᐎᔑᓈᑳᕽ᙮ ᒥᓴᐙ ᑯ ᑲᐎᓭᔮᕽ, ᓂᑲ ᐸᓯᑸᒥᓐ ᓴ! ᒥᓴᐙ ᑯ ᑲᔦ ᑳᔑ ᑲᔥᑮᑎᐱᑲᒃ ᐊᔮᔮᕽ, ᑳᑎᐯᒋᑫᒡ ᓴ ᓂᑲ ᐙᓭᔥᑲᒫᑯᓈᓐ᙮ 9 ᐁᑮ ᒪᒫᔑᑲᑕᐗᑭᒡ ᐃᑕᔥ ᒦ ᐃ ᐁᔑᓈᑾᓂᓂᒃ ᒋᐸᑲᒥᔥᑳᑯᐗᕽ ᐅᓂᔥᑳᑎᓯᐎᓐ᙮ ᐌᑎ ᑕᔥ ᐃᔥᒀᒡ ᑭᑲ ᓈᑕᒫᑯᓈᓐ ᒋᑾᔭᑯ ᑑᑕᐎᔭᒥᓐᒡ ᐃᐃ ᑳᑮ ᐃᔑ ᒪᒫᔑ ᑑᑖᑯᐗᕽ᙮ ᑳᔑ ᐙᓭᔮᓂᒃ ᓴ ᑭᑲ ᐃᔑᐎᓂᑯᓈᓐ; ᒦᑕᔥ ᐃᐃ ᒋᐙᐸᑕᒧᐗᕽ ᐅᑾᔭᒀᑎᓯᐎᓐ! 10 ᐊᐲ ᓴ ᑕᔥ ᐃᑭ ᑳᔒᑫᓂᒥᔭᒥᑣ ᐙᐸᑕᒧᐙᒡ ᐅᐅ, ᐋᐱᒋ ᓴ ᑕᑭᒋ ᐊᑲᑌᑕᒧᒃ᙮ ᒦᔥ ᐅᐅ ᑫᐃᔑᔭᒥᑣ, ᐋᓃᓐ ᐃᑕᔥ ᐃᓇ ᐊ ᑳᑎᐯᒋᑫᒡ ᑭᑭᔐᒪᓂᑑᒥᐙ? ᓂᑲ ᐙᐸᒫᒃ ᓴ ᒋᔖᑰᒋᐃᑣ, ᐐᑫ ᓴ ᓂᑲ ᓂᑯᒌᔥᑲᐗᑭᔥᑲᐙᓈᓂᒃ ᐃᐃᒫ ᒦᑲᓈᕽ! 11 ᒉᕒᐆᓴᓬᐊᒥᕽ ᐁᔮᔦᒃ, ᒦ ᐅᔕ ᐃ ᐋᔕ ᐁᐅᒋᒋᓭᒃ ᒋᑮ ᐅᔑᑑᔦᑭᐸᓐ ᐃᐃ ᑭᐙᑳᔮᐱᑭᓂᑲᓂᐙᓐ, ᒋᓇᑭ ᒦᓂᑰᔦᒃ ᑫᐊᑯ ᑎᐯᑕᒣᒃ ᑭᑕᑮᒥᐙ᙮ 12 ᒦᔥ ᐃᐃ ᐊᐲ ᑮᒋᐱᒫᑎᓰᐙᒃ ᒥᓯᐌ ᑕᐱ ᐅᒌᐗᒃ ᒋᐱᑮᐌ ᓈᓯᑲᐎᓀᒀ᙮ ᐌᑎ ᐊᓰᕒᐃᔭ Assyria ᐊᑮᕽ, ᐌᑎ ᑲᔦ ᑭᒋ ᐆᑌᓈᑲᕽ ᐄᒋᐸᑮᕽ Egypt ᑕᐱ ᐅᒌᐗᒃ᙮ ᐌᑎ ᓴ ᑲᔦ ᓇᑫ ᑕᐱ ᐅᒌᐗᒃ ᓰᐱᕽ ᐃᔫᐸᕒᐁᑏᔅ Euphrates ᐁᒋᑳᑌᓂᒃ, ᑭᒋᑲᒦᕽ ᑲᔦ ᓇᑫ, ᐌᑎ ᑲᔦ ᓇᑫ ᑳᔑ ᐊᔮᑭᓐ ᑭᒋ ᐗᒌᓐ᙮ 13 ᐃᐃ ᑕᔥ ᐊᑭ ᑕᓂ ᐃᓀᑖᑾᓐ ᑖᐱᔥᑰ ᐱᑾᑕᑲᒥᒃ, ᐅᓵᒻ ᐋᓃᔥ ᑭᒋ ᒪᒋᑑᑕᒨᒃ ᐃᑭ ᐃᐃᒫ ᑳᑖᐙᒡ᙮ ᑳᑎᐯᒋᑫᒡ ᑮᑰᐹᑌᓂᒫᒡ ᐃᔅᕒᐃᔭᓬᐊᐞ 14 ᑌᐯᒋᑫᔭᓐ, ᑕᑲ ᐃᔑ ᓈᓈᑲᒋᐃᔑᓈᒻ ᐅᑲᓇᐎ ᒫᓇᒑᓂᔑᐌ ᑳᑑᑕᐙᒡ ᒫᓇᒑᓂᔕᐞ, ᓃᓇᐎᓐᑦ ᐄᑐᒃ ᑭᐱᒫᑎᓰᒪᒃ ᑳᑮ ᐅᓈᐸᒥᔮᕽ᙮ ᐋᓇᐐᓐ ᐁᐃᔑᑖᔮᕽ ᐌᑎ ᐱᑾᑕᑲᒥᒃ, ᔖᑰᒡ ᓴ ᐙᑳᔭᐄ ᐊᔮᓂ ᑳᔑ ᐗᑫ ᓂᑖᐎᑭᕽ ᑫᑰᓐ᙮ ᑕᑲ ᒦ ᐌᑎ ᑫᐃᔖᔮᕽ, ᒋᐊᑕ ᐐᓯᓂᔮᕽ ᑳᔑ ᒪᔥᑯᓰᑳᒃ ᐯᔕᓐ Bashan ᐊᑮᕽ, ᑭᓬᐃᔭᑦ Gilead ᐊᑮᕽ ᑲᔦ, ᑖᐱᔥᑰ ᑳᑮ ᓂᑖ ᐃᔑᒋᑫᔮᑭᐸᓐ ᒣᐎᔕ᙮ 15 ᒫᒪᑳᒋᒋᑫᑕᒪᐎᔑᓈᒻ ᑌᐯᒋᑫᔭᓐ, ᑳᑮ ᐃᔑᒋᑫᐃᔮᑭᐸᓐ ᐊᐲ ᐄᒋᐸᑮᕽ Egypt ᑮᓵᑭᒋᐎᔑᔮᑭᐸᓐ! 16 ᐃᑭ ᓴ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ ᐙᐸᑕᒧᐙᒡ ᐅᐅ, ᒦ ᓴ ᐃ ᒋᐊᑲᑌᓂᑎᓱᐙᒡ ᐋᓇᐐᓐ ᐁᒪᔥᑲᐌᑖᑯᓯᐙᒡ᙮ ᒦᑕᔥ ᐃᐃ ᐁᔑ ᑭᐱᑑᓀᓂᑎᓱᐙᒡ, ᑕᑭᐱᑕᐗᑫᓂᑎᓱᐗᒃ ᑲᔦ ᑫᐊᐲᑕᑲᒋᐙᒡ᙮ 17 ᑖᐱᔥᑰ ᓴ ᑭᓀᐱᑰᒃ ᑳᐱᒨᑌᐙᒡ ᑳᔑ ᐹᔥᑭᓀᑲᒥᑯᑳᓂᒃ ᒦ ᓴ ᑫᐃᔑᓈᑯᓯᐙᒡ᙮ ᐅᑕᐸᐃᐌᐎᑲᒥᑯᐙᕽ ᓴ ᑕᐱ ᐅᒌᐗᒃ ᒋᓂᓂᑭᔥᑳᐙᒡ ᑫᐊᐲᑖᓂᒥᓯᐙᒡ᙮ ᒦᑕᔥ ᒋᑴᑫᑕᒧᐙᒡ ᒋᑯᑖᓀᓂᒫᐙᒡ ᑳᑎᐯᒋᑫᓂᒡ ᑭᑭᔐᒪᓂᑑᒥᓈᓂᓐ᙮ 18 ᑌᐯᒋᑫᔭᓐ, ᑳᐐᓐ ᓴ ᐸᑳᓐ ᒪᓂᑑ ᐊᔮᓰ ᑮᓐ ᑎᓄ; ᑮᓐ ᓴ ᑳᐸᑭᑎᓇᑣ, ᑳᐴᓀᑕᒪᐗᑣ ᑲᔦ ᐅᒪᒋᑑᑕᒧᐎᓂᐙᓐ ᑳᑎᐱᓇᐌᐎᓯᔭᓐ ᑭᐱᒫᑎᓰᒪᒃ ᑳᐃᔥᑯᓭᐙᒡ᙮ ᑳᐐᓐ ᓴ ᑭᓉᔥ ᑭᐱᒥ ᑭᑖᓱᓰ, ᐋᐱᒋ ᑕᔥ ᑭᒥᓉᑖᓐ ᐁᐙᐸᑕᐃᔮᕽ ᑭᑰᐹᓯᓈᑫᐎᓐ᙮ 19 ᑮᓐ ᓴ ᑕᔥ ᒦᓇᐙ ᑭᑲ ᑰᐹᓯᓇᐎᔑᓈᒻ, ᑭᑲ ᑕᑕᑯᑳᑖᓇᓐ ᑲᔦ ᓂᒪᒋᑑᑕᒧᐎᓂᓈᓂᓐ, ᑭᑲ ᐃᔑᐌᐱᓈᓇᓐ ᑲᔦ ᒫᐗᒡ ᐃᑯ ᑳᔑ ᑮᔥᑲᔭᐙᒃ ᑭᒋᑲᒦᕽ᙮ 20 ᑌᐺ ᑲᔦ ᑭᑲ ᑑᑕᐙᒃ, ᒋᓵᑭᐊᑣ ᑭᐱᒫᑎᓰᒪᒃ, ᑳᐅᑕᑳᓀᓯᐙᒡ ᐁᐸᕒᐊᐋᒥᕽ Abraham, ᒉᑲᐳᕽ Jacob ᑲᔦ, ᑖᐱᔥᑰ ᑳᑮ ᐃᔑ ᐊᔓᑕᒪᐙᐗᑣᐸᓐ ᓂᑫᑌᔭᐋᒥᓈᐸᓃᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society