Maaihka 5 - ᐅᒋᐺ ᑭᒋᒪᓯᓇᐃᑲᓐ1 ᐯᒫᑎᓯᔦᒃ ᒉᕒᐆᓴᓬᐊᒥᕽ Jerusalem ᑳᐊᔮᔦᒃ, ᒫᐗᑑᓂᑾᒃ ᑭᔑᒫᑲᓂᔒᒥᐙᒃ ᒫᒪᐎ ᒪᔥᑲᐎᑳᐸᐎᒃ! ᑭᐙᑳᔥᑳᑰᒥᓐ ᐄᑐᒃ! ᐅᐐ ᒦᑳᓈᐙᓐ ᐄᑐᒃ ᐃᓂ ᑳᓃᑳᓃᑕᒪᐙᓂᒡ ᐃᔅᕒᐃᔭᓬᐊᐞ᙮ ᑭᔐᒪᓂᑑ ᑮᐊᔓᑕᒫᑫᒡ ᐁᐐᒦᑭᐌᒡ ᑫᑎᐯᓂᒫᓂᒡ ᐃᔅᕒᐃᔭᓬᐊᐞ ᒋᐅᒌᓂᒡ ᐯᑕᓬᐃᐁᒥᕽ 2 ᒦᔥ ᑳᑎᐯᒋᑫᒡ ᐁᑭᑐᒡ, ᐯᑕᓬᐃᐁᒻ Bethlehem ᐁᐸᕒᐊᑕ Ephrathah, ᑮᓐ ᒫᐗᒡ ᐯᔑᒃ ᑭᑕᑳᓭᑖᑯᔅ ᑳᑕᓯᑭᓐ ᐆᑌᓇᐗᓐ ᐃᐃᒫ ᒎᑕ Judah ᐊᑮᕽ᙮ ᒦᑕᔥ ᐃᐃᒫ ᑫᐅᑎᓇᒃ ᑫᑎᐯᓂᒫᒡ ᐃᔅᕒᐃᔭᓬᐊᐞ Israel, ᐙᓴ ᐅᑖᓈᕽ ᐅᑑᑕᑳᓀᓯᐎᓐ ᑳᐱ ᑭᑫᑖᑾᓂᓂᒃ᙮ 3 ᑳᑎᐯᒋᑫᒡ ᓴ ᐅᑲ ᓇᑲᓈᐞ ᐅᐱᒫᑎᓰᒪᐞ ᒋᑎᐯᓂᒥᑯᓂᒡ ᑳᔒᑫᓂᒥᑯᓂᒡ᙮ ᐹᓂᒫ ᑕᔥ ᐃᓂ ᐃᑴᐗᓐ ᑮᐃᔥᒀ ᓂᑖᐎᑭᐋᓂᒡ ᐅᑯᓯᓯᓂ, ᒦ ᐃ ᐸᔦᔥ ᒋᐴᓂ ᑎᐯᓂᒥᑯᓂᒡ᙮ ᒦᑕᔥ ᐃᐃ ᐊᐲ ᑳᑮ ᒫᒌᒋᑲᓂᐙᐸᓐ ᐃᔅᕒᐊᐁᓬ ᒋᐱᑮᐌ ᐐᒋᐊᔮᒫᐙᒡ ᒦᓇᐙ ᐅᐐᒋ ᐱᒫᑎᓰᒥᐙᐞ᙮ 4 ᐊᐲ ᑕᔥ ᐱᑕᑯᔑᕽ ᐅᑲ ᑎᐯᓂᒫᐞ ᓴ ᐅᐱᒫᑎᓰᒪᐞ ᒋᐋᐸᒋᑑᒡ ᒪᔥᑲᐎᓰᐎᓐ ᑫᒦᓂᑯᒡ ᑳᑎᐯᒋᑫᓂᒡ, ᑕᑯ ᑲᔦ ᐁᓀᑖᑯᓯᓂᒡ ᐅᑎᔑᓂᑳᓱᐎᓂᓃᕽ ᑳᑎᐯᒋᑫᓂᒡ ᐅᑭᔐᒪᓂᑑᒪᓐ᙮ ᐅᐱᒫᑎᓰᒪᐞ ᓴ ᑕᔥ ᐱᓵᓐ ᑕᐊᔨᑖᐗᐞ, ᐋᓃᔥ ᒥᓯᐌ ᐊᑮᕽ ᐁᔮᓂᒡ ᐯᒫᑎᓯᓂᒡ ᐅᑲ ᐐᑕᒥᓂ ᐁᑭᒋ ᐃᓀᑖᑯᓯᒡ᙮ 5 ᐐᓐ ᑕᔥ ᑲᔦ ᑫᐲᑑᒡ ᐱᓵᓐ ᒋᐊᔮᐎᓐᒡ᙮ ᐊᐲ ᓴ ᑕᔥ ᐊᓰᕒᐃᔭ Assyria ᐊᑮᕽ ᐌᒌᐙᒡ ᐱᐊᑕ ᒦᑳᓱᐙᒡ ᑭᑕᑮᒥᓈᓂᕽ, ᐱᔖᐳᔥᑳᐙᒡ ᐃᑕᔥ ᑭᑕᐸᐃᐌᐎᑲᒥᑯᓈᓂᓐ, ᒦ ᓴ ᐃ ᒋᐃᔑᓂᔕᐗᑭᑣ ᒫᐗᒡ ᒣᔥᑲᐌᑖᑯᓯᐙᒡ ᑳᓃᑳᓂᓯᐙᒡ ᒋᓇᓈᑯᓈᐙᒡ᙮ ᒋᓈᑕᒪᐎᑣ ᑲᔦ ᒋᓇᓇᐊᓯᑣ 6 ᒦᑕᔥ ᒋᑎᐯᑕᒧᐙᒡ ᐊᓰᕒᐃᔭ ᐊᑮᓂ ᑮᐃᔥᒀ ᔖᑰᒋᑣᐙᒡ, ᐃᐃ ᑲᔦ ᓂᒻᕒᐋᑦ Nimrod ᐊᑮᓂ ᐅᑲ ᑎᐯᑖᓈᐙ᙮ ᒦᑕᔥ ᐃᐃ ᓇᑫ ᑫᔑ ᓈᑕᒪᐎᓇᑭᑣ ᐊᐲ ᐊᓰᕒᐃᔭ ᐌᒌᓂᒡ ᐱᐊᑕ ᒦᑳᓱᓂᒡ ᑭᑕᑮᒥᓈᓂᕽ᙮ 7 ᐃᑭ ᐃᔅᕒᐃᔭᓬᐊᒃ ᑫᐃᔥᑯ ᐱᒫᑎᓯᐙᒡ ᑕᐃᓀᑖᑯᓯᐗᒃ ᑖᐱᔥᑰ ᑳᐅᔥᑭ ᔕᑭᐊᔮᒃ ᑳᑎᐯᒋᑫᒡ ᑫᐃᔑᓂᔕᐊᒪᐙᒡ ᑯᑕᒃ ᐯᒫᑎᓯᓂᒡ᙮ ᑖᐱᔥᑰ ᑳᔕᑭᐲᓴᐊᕽ ᐁᔑ ᓂᑖᐎᑭᑭᓐ ᑫᑰᓇᓐ ᑕᐃᓀᑖᑯᓯᐗᒃ᙮ ᑭᔐᒪᓂᑑᓐ ᓴ ᑕᐊᐯᓂᒧᐗᒃ, ᑳᐐᓐ ᐐᓐ ᐃᓂᓂᐗᓐ᙮ 8 ᐃᔅᕒᐃᔭᓬᐊᒃ ᓴ ᑕᔥ ᑫᐊᔮᐙᒡ ᒣᑴᔭᐄ ᐁᔑᐊᔮᓂᒡ ᑳᐯᐸᑳᓉᐙᓇᑭᓯᓂᒡ ᐯᒫᑎᓯᓂᒡ᙮ ᒦ ᓴ ᐃ ᑫᐃᓀᑖᑯᓯᐙᒡ ᑖᐱᔥᑰ ᒥᔑᐱᔑᐤ ᐁᔮᒡ ᒣᑴᔭᐄ ᓅᐱᒦᕽ ᐁᔑᐊᔮᓂᒡ ᑯᑕᒃ ᐊᔭᐋᐎᔕᐞ᙮ ᑖᐱᔥᑰ ᐅᔥᑭ ᒥᔑᐱᔑᐤ ᑳᐅᑎᑎᓈᒡ ᒫᓇᒑᓂᔕᐞ ᑳᐲᓯᐱᓈᒡ ᐃᑕᔥ, ᑳᐐᓐ ᓴ ᐊᐎᔭᓐ ᐅᑲ ᑲᔥᑭᑑᓰᓂ ᒋᓈᑕᒫᑯᓂᒡ᙮ 9 ᐃᔅᕒᐃᔭᓬᐊᒃ ᓴ ᐅᑲ ᔖᑰᒋᐋᐙᐞ ᑳᔒᑫᓂᒥᑯᐙᒡ, ᑲᑭᓇ ᑲᔦ ᐅᑲ ᒑᑭᐋᐙᐞ᙮ 10 ᒦᔥ ᐁᑭᑐᒡ ᑳᑎᐯᒋᑫᒡ, ᒦ ᓴ ᐃ ᐊᐲ ᐃᔑ ᑮᔑᑲᒃ, ᒋᐅᑖᐱᓇᒀ ᑭᒥᑕᑎᒨᒥᐙᒃ, ᒋᓂᔑᐗᓈᒋᐊᒀ ᑲᔦ ᑭᒦᑳᓱᐎ ᐅᑖᐹᓈᑯᐙᒃ᙮ 11 ᑭᑑᑌᓈᒥᐙᓐ ᑲᔦ ᐁᔮᑭᓐ ᑭᑕᑮᒥᐙᕽ ᒋᓂᔑᐗᓈᒋᑑᔮᓐ, ᓂᑲ ᐲᑯᐱᑑᓇᓐ ᑲᔦ ᑭᑕᐸᐃᐌᐎᑲᒥᑯᐙᓐ᙮ 12 ᑳᔑ ᒪᒫᑖᐎᓯᔦᒃ ᑲᔦ ᓂᑲ ᓂᔑᐗᓈᒋᑑᓐ, ᒦᔥ ᑳᐐᓐ ᑭᑲ ᑲᔥᑭᑑᓰᒻ ᑫᑰᓐ ᒋᐃᓈᐱᓇᔑᐌᔦᒃ᙮ 13 ᑭᒪᓂᑑᑳᓂᐙᒃ ᓴ ᓂᑲ ᓂᔑᐗᓈᒋᐋᒃ, ᐃᑭ ᑲᔦ ᐊᓯᓃᒃ ᐁᓇᒥᐁᔦᓂᒣᒀ᙮ ᑳᐐᓐ ᐃᑕᔥ ᐊᐗᔑᒣ ᑭᑲ ᐊᓇᒥᐁᑕᐙᓯᐙᐙᒃ ᑭᓂᒌᐙᕽ ᑳᑮ ᐅᒋ ᐅᔑᐁᒀ᙮ 14 ᓂᑲ ᐸᑾᑕᑮᐱᓈ ᑲᔦ ᐃᑴ ᒪᓂᑑᑳᓐ ᑳᒥᑎᑯᐎᒡ ᑳᐸᑕᑭᓂᓐᒡ ᐋᔕᕒᐊ Asherah ᐁᔮᒡ ᑭᑕᑮᒥᐙᕽ, ᑭᑭᒋ ᐆᑌᓈᒥᐙᓐ ᑲᔦ ᓂᑲ ᓂᔑᐗᓈᒋᑑᓇᓐ᙮ 15 ᐐᑫ ᓴ ᑕᔥ ᓂᑭᒋ ᓂᔥᑭᐃᑰᒃ ᑲᑭᓇ ᑯᑕᒃ ᐯᒫᑎᓯᐙᒡ ᑳᐃᓀᑕᓯᒀ ᒋᓇᐃᑕᐎᐙᒡ, ᒦᔥ ᑳᐐ ᐅᒋ ᓇᓇᐊᓴᒀ, ᐃᑭᑐ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society