Maaihka 1 - ᐅᒋᐺ ᑭᒋᒪᓯᓇᐃᑲᓐ1 ᒫᐃᑲ Micah ᐌᒌᒡ ᐆᑌᓈᕽ ᒨᕒᐁᔐᑦ Moresheth ᐁᒋᑳᑌᓂᒃ ᐅᑮ ᒦᓂᑯᓐ ᑳᑎᐯᒋᑫᓂᒡ ᐋᓃᓐ ᑫᐃᑭᑐᒡ᙮ ᑳᑎᐯᒋᑫᓂᒡ ᐄᑐᒃ ᐅᑮ ᐙᐸᑕᐃᑰᓐ ᑲᑭᓇ ᐋᓃᓐ ᐁᔑᓈᑾᓂᓂᑭᓐ ᐆᑌᓇᐗᓐ ᓴᒣᕒᐃᔭ Samaria, ᒉᕒᐆᓴᓬᐊᒻ Jerusalem ᑲᔦ᙮ ᒦ ᐄᑐᒃ ᐃᐃ ᐊᐲ ᑮᑭᒋᐅᑭᒫᐎᓂᒡ ᒎᑕᒨᓐ Jotham, ᐁᐋᓴᓐ Ahaz ᐁᓯᑳᔭᐗᓐ Hezekiah ᐃᐃᒫ ᒎᑕ ᐊᑮᕽ᙮ ᒫᐃᑲ ᑮᒪᐎᑕᕽ ᐃᐃ ᓴᒣᕒᐃᔭ, ᐃᐃᐌᓂ ᑲᔦ ᒉᕒᐆᓴᓬᐊᒻ 2 ᐱᓯᑕᒧᒃ, ᑮᓇᐙ ᑲᑭᓇ ᐯᒫᑎᓯᔦᒃ᙮ ᐱᓯᑕᒧᒃ ᐅᐅ ᑮᓇᐙ ᑲᑭᓇ ᐅᐅᒫ ᐊᑮᕽ ᑳᐱᒫᑎᓯᔦᒃ᙮ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐅᔕ ᑭᐐ ᑎᐹᒋᒥᑯᐙ᙮ ᐃᓇᔥᑫ ᐱᓯᑕᒧᒃ, ᑭᔐᒪᓂᑑ ᐅᔕ ᐅᑭᒋ ᐊᓇᒥᐁᐎᑲᒥᑯᕽ ᐅᒋ ᑮᑭᑐ! 3 ᐃᓇᔥᑫ ᐃᓈᐱᒃ, ᑳᑎᐯᒋᑫᒡ ᐅᔕ ᐱᒥ ᐅᒋ ᑕᑯᔑᓐ ᐅᑖᐎᓂᕽ ᑳᔑ ᑭᑌᑖᑾᓂᓂᒃ; ᒦ ᐃ ᑳᐅᒋ ᐲᓈᔒᒡ ᐁᐐ ᑕᑕᑯᑳᑕᕽ ᐗᑭᒐᔭᐄ ᑳᐃᔥᐹᑲᒥᑳᓂᑭᓐ ᓀᑖ ᑕᔑ ᐊᓇᒥᐋᐎᓐᒡ᙮ 4 ᒦᔥ ᒋᓂ ᓂᑭᑌᓂᑭᓐ ᐃᓂ ᐗᒌᓐ ᑳᒫᑕᑯᔥᑲᕽ ᑖᐱᔥᑰ ᐱᒥᑌ ᑳᐅᒋ ᓂᑭᑌᒃ ᐙᓴᑯᓀᒋᑲᓂᕽ, ᐌᑎ ᑕᔥ ᑳᔑ ᐸᐸᓴᑎᓈᒃ ᑕᐃᔑᒋᐗᓐ ᐃᐃ ᑳᓂᑭᑌᒃ ᑖᐱᔥᑰ ᓂᐱ ᐗᑭᑕᑎᓐ ᑳᐅᒋᒋᐗᕽ, ᒦ ᐃ ᒪᔮ ᑫᐃᔑᓈᑾᒃ᙮ 5 ᒦᑕᔥ ᑲᑭᓇ ᑳᐐ ᐅᒋ ᐃᔑᓭᒃ ᐅᓵᒻ ᐋᓃᔥ ᐯᒫᑎᓯᐙᒡ ᐃᔅᕒᐃᔭᓬᐊᒃ ᑮᒪᒋᑑᑕᒧᒃ, ᐅᑮ ᔕᔒᐱᑕᐙᐙᓐ ᑲᔦ ᑭᔐᒪᓂᑑᓐ᙮ ᐊᐌᓀᓐ ᑕᔥ ᑫᐊᓈᒣᑖᑯᓯᐸᓐ ᐃᐃ ᑳᔑ ᔕᔒᐱᑕᒧᐙᒡ ᐃᔅᕒᐃᔭᓬᐊᒃ? ᐃᐃ ᐄᑐᒃ ᑭᒋ ᐆᑌᓇ ᑳᓃᑳᓀᑖᑾᒃ ᓴᒣᕒᐃᔭ Samaria ᐊᓈᒣᑖᑾᓐ᙮ ᐊᐌᓀᓐ ᑕᔥ ᐁᓈᒣᑖᑯᓯᐸᓐ ᐃᐃ ᑳᔑ ᓂᑖ ᒪᓂᑑᑫᓈᓂᐗᓂᓂᒃ ᐃᐃᒫ ᒎᑕ Judah ᐊᑮᕽ? ᐃᐃ ᐄᑐᒃ ᑭᒋ ᐆᑌᓇ ᒉᕒᐆᓴᓬᐊᒻ ᑕᐊᓈᒣᑖᑾᓐ᙮ 6 ᒦᑕᔥ ᐅᐅ ᐁᑭᑐᒡ ᑳᑎᐯᒋᑫᒡ, ᓂᑲ ᐃᔑᓭᑑᓐ ᓴ ᐃ ᓴᒣᕒᐃᔭ ᒋᐃᔑᓈᑾᒃ ᑖᐱᔥᑰ ᑫᑰᓐ ᑳᒥᒋ ᐅᑯᓯᕽ ᐌᑎ ᒥᔕᐗᑲᒥᒃ, ᑳᔑ ᑭᑎᑳᓱᐙᒡ ᔔᒥᓇᒃ᙮ ᐃᓂ ᓴ ᑳᑮ ᐋᐸᑕᑭᐸᓀᓐ ᑮᐅᔑᒋᑳᑌᒃ ᐆᑌᓇ, ᐌᑎ ᓴ ᐸᓴᑎᓈᕽ ᑕᐃᔑ ᐌᐱᓂᑳᑌᐗᓐ᙮ ᐃᑭᔥ ᑲᔦ ᐊᓯᓃᒃ ᑳᑮ ᐃᔑ ᐸᑕᑭᑌᑭᐸᓐ ᐃᐃ ᐆᑌᓇ ᐱᓂᔅᑴ ᑕᓇᓈᑯᓯᐗᒃ᙮ 7 ᐃᑭ ᓴ ᑕᔥ ᑲᑭᓇ ᒪᓂᑑᑳᓇᒃ ᐃᐃᒫ ᐌᒋ ᑎᐯᑖᑯᓯᐙᒡ ᐐᑫ ᑕᐱᑭᔥᑭᔑᓅᒃ᙮ ᑲᑭᓇ ᓴ ᑲᔦ ᑫᑰᓇᓐ ᑳᑮ ᒦᓂᒥᓐᒡ ᐃᐃ ᐱᔑᒀᒋᑴᐗᐞ ᐁᔮᓂᒡ ᐃᐃᒫ ᑭᒋ ᐊᓇᒥᐁᐎᑲᒥᑯᕽ ᑕᐊᒀᑭᓯᑳᑌᓂᐗᓐ᙮ ᑲᑭᓇ ᓴ ᑯ ᐅᒪᓂᑑᑳᓂᒪᐞ ᓂᑲ ᓂᔑᐗᓈᒋᐃᒫᐞ᙮ ᒦᐞ ᐄᑐᒃ ᐃᐃᒫ ᓴᒣᕒᐃᔭ ᐌᒋ ᑲᔥᑭᒋᑫᒪᑲᒃ ᑳᔑ ᑲᔥᑭᒋᑫᓂᒡ ᐃᐃ ᐱᔑᒀᒋᑴᐗᐞ᙮ ᐃᐃᐌᓂ ᑕᔥ ᐅᑲᔥᑭᒋᑫᐎᓂᓂ ᑳᔒᑫᓂᒥᐌᓂᒡ ᐅᑲ ᒫᒌᑑᓂ ᐸᑳᓐ ᒋᐎ ᑕᔑ ᐋᐸᒋᑑᓂᒡ ᐁᔑᐊᔮᓂᒡ ᑯᑕᒃ ᐱᔑᒀᒋᑴᐗᐞ ᐊᓇᒥᐁᐎᑲᒥᑯᕽ᙮ 8 ᒦᑕᔥ ᐅᐅ ᒫᐃᑲ ᑳᐃᑭᑐᒡ, ᒦᑕᔥ ᓃᓐ ᐌᒋ ᒫᓀᑕᒫᓐ, ᒦ ᑲᔦ ᐃ ᑫᐅᒋ ᒪᐎᔮᓐ᙮ ᒋᓈᑯᑑᔮᓐ ᑕᔥ ᐁᒫᓀᑕᒫᓐ ᓂᑲ ᐸᐹᒧᓭ ᓴ ᒋᐸᐹ ᔖᔖᑭᓂᓯᑌᔮᓐ, ᑳᐐᓐ ᑲᔦ ᑫᑰᓐ ᓂᑲ ᐸᐹ ᑭᑭᔥᑲᓰᓐ᙮ ᑖᐱᔥᑰ ᓴ ᑳᐃᓉᒡ ᒪᔭᑭ ᐙᑯᔥ jackal ᑮᐅᓄᒡ, ᑖᐱᔥᑰ ᑲᔦ ᑯᑯᑯᐅ ᑳᐃᓉᒡ, ᒦ ᓴ ᐃ ᑫᐃᓉᔮᓐ ᒪᐎᔮᓐ᙮ 9 ᐃᐃ ᓴ ᓴᒣᕒᐃᔭ Samaria ᑳᔑ ᒫᑭᒋᑳᑌᒃ ᑳᐐᓐ ᐐᑳ ᑕᒥᓄᐊᔮᒋᑳᑌᓯᓅᓐ; ᒦᑕᔥ ᐯᔑᑾᓐ ᐃᐃ ᒎᑕ ᐊᑭ ᑫᐃᔑᓭᒃ᙮ ᐃᐃ ᑳᓂᔑᐗᓈᒋᒋᑫᒪᑲᒃ ᐋᔕ ᐃᐃᒫ ᑳᔑ ᐃᔥᒀᑌᒥᐗᕽ ᒉᕒᐆᓴᓬᐊᒥᕽ ᐱᐸᑲᒥᔥᑳ; ᒦᐞ ᐄᑐᒃ ᐃᐃᒫ ᓂᐱᒫᑎᓰᒪᒃ ᐁᔑᑖᐙᒡ, ᑮᐃᑭᑐ᙮ ᑳᔒᑫᓂᒥᑯᐙᒡ ᐁᐱᑕᑯᔑᓂᓂᒡ ᒉᕒᐆᓴᓬᐊᒥᕽ 10 ᑫᑯ ᐐᑕᒪᐙᑫᒀᓂᒃ ᑳᔒᑫᓂᒥᓇᒀ ᑳᑦ Gath ᐆᑌᓈᕽ ᐁᔮᐙᒡ ᐁᑮ ᔖᑰᒋᐃᑰᐗᕽ᙮ ᑫᑯ ᑭᑲ ᐙᐸᒥᑯᓰᐙᒃ ᒋᒪᐎᔦᒃ᙮ ᐯᒫᑎᓯᔦᒃ ᐁᔮᔦᒃ ᐯᑦ ᓬᐄᐊᐸᕒᐊ Beth-Le-Aphrah ᐆᑌᓈᕽ ᑎᑎᐱᔑᒨᓄᒃ ᐹᔥᑭᓀᔭᐄᕽ ᒋᓈᑯᑑᔦᒃ ᐁᒫᓀᑕᒣᒃ᙮ 11 ᑮᓇᐙ ᓴ ᑕᔥ ᐁᔮᔦᒃ ᓭᐸᕒ Shaphir ᐆᑌᓈᕽ, ᐊᓂ ᒫᒑᒃ ᐃᐃ ᑳᒫᒌᓂᑰᔦᒃ ᐁᑭᑭᑯᓇᔦᓯᐌᒃ, ᐁᐊᑲᑌᑕᒧᐃᑰᔦᒃ ᑲᔦ᙮ ᐃᑭ ᓴ ᑕᔥ ᐁᔑᑖᐙᒡ ᐃᐃᒫ ᓭᐋᓇᓐ Zaanan ᐆᑌᓈᕽ ᑳᐐᓐ ᑲᓇᑫ ᒋᑲᔥᑭᑌᐁᐙᒡ ᒋᐱ ᓵᑲᐊᒧᐙᒡ ᐅᑑᑌᓈᒥᐙᕽ᙮ ᐊᐲ ᓴ ᑕᔥ ᓅᑕᐌᒀ ᒪᐎᐙᒡ ᐊᐎᔭᒃ ᐁᔮᐙᒡ ᐃᐃᒫ ᐯᑏᓭᔭᓬ Bethezel ᐆᑌᓈᕽ, ᒦ ᓴ ᐃ ᒋᑭᑫᑕᒣᒃ ᑳᐐᓐ ᐄᓴᓐ ᐃᐃᒫ ᒋᑮ ᐊᐸᐃᐌᓈᓂᐗᑭᐸᓐ᙮ 12 ᐃᑭ ᓴ ᐐᓐ ᐯᒫᑎᓯᐙᒡ ᐁᔮᐙᒡ ᒣᕒᐊᑦ Maroth ᐁᔮᐎᓂᕽ ᐅᑸᓇᐎ ᐲᑑᓈᐙ ᐊᐗᔑᒣ ᒋᐐᓴᑫᑕᓯᒀ, ᐋᓃᔥ ᑳᑎᐯᒋᑫᓂᒡ ᑮᑭᒋ ᐃᔑᒋᑫᐗᓐ ᐃᐃᒫ ᒌᑲᔭᐄ ᒉᕒᐆᓴᓬᐊᒻ ᐆᑌᓈᕽ᙮ 13 ᑮᓇᐙ ᑕᔥ ᓬᐁᑭᔥ Lachish ᐆᑌᓈᕽ ᐁᔑᑖᔦᒃ, ᑭᒥᑕᑎᒨᒥᐙᒃ ᐃᔑ ᐅᓇᐱᓂᑾᒃ ᒦᑳᓱᐎ ᐅᑖᐹᓈᑯᕽ᙮ ᐯᔑᑾᓐ ᐄᑐᒃ ᑭᑮ ᐃᔑ ᒪᒋᑑᑖᒻ ᑳᑮ ᐃᔑ ᒪᒋᑑᑕᒧᐙᒡ ᐃᔅᕒᐃᔭᓬᐊᒃ, ᒦᔥ ᑳᑮ ᐌᐱᐁᒀ ᒉᕒᐆᓴᓬᐊᒥᕽ ᐁᔮᐙᒡ ᒋᒪᒋᑑᑕᒧᐙᒡ᙮ 14 ᒦᔥ ᑮᓇᐙ ᒎᑕ ᐊᑮᕽ ᐁᔮᔦᒃ ᐃᔑ ᐴᔔᐃᑾᒃ ᐃᔑ ᒦᓂᑾᒃ ᒦᑭᐙᓇᓐ ᐃᔥᒀᒡ ᐁᐙᐸᒣᒀ ᒨᕒᐁᔐᑦ ᑳᑦ Moresheth Gath ᐁᔮᐙᒡ᙮ ᐃᔅᕒᐃᔭᓬᐃ ᑭᒋᐅᑭᒫᒃ ᓴ ᑳᐐᓐ ᑕᐅᒋ ᐐᒋᐋᓰᐗᒃ ᐌᑎ ᐊᒃᓯᑉ Aczib ᐆᑌᓈᕽ᙮ 15 ᑮᓇᐙ ᑕᔥ ᐐᓐ ᐁᔮᔦᒃ ᒪᕒᐄᔕ Mareshah ᐆᑌᓈᕽ, ᑳᑎᐯᒋᑫᒡ ᐅᔕ ᐅᐐ ᐸᑭᑎᓈᐞ ᑳᔒᑫᓂᒥᒥᓀᒃ ᒋᔖᑰᒋᐃᒥᓀᒃ, ᒋᑳᒋᒋᑑᓂᒡ ᑲᔦ ᑭᑑᑌᓈᒥᐙ᙮ ᐃᑭ ᓴ ᑕᔥ ᑳᓃᑳᓂᓯᐙᒡ ᐃᔅᕒᐃᔭᓬᐊᒃ ᐌᑎ ᑕᐊᐎᔑ ᑳᓱᐗᒃ ᐋᑕᓬᐊᒻ Adullam ᐆᑌᓈᕽ᙮ 16 ᐯᒫᑎᓯᔦᒃ ᐁᔮᔦᒃ ᒎᑕ ᐊᑮᕽ ᑮᔥᑭᔕᒧᒃ ᑮᓂᓯᓯᐙᓐ ᒋᒪᐎᒣᒀ ᑭᓃᒑᓂᓯᐙᒃ ᑳᓵᑭᐁᒀ᙮ ᐐᑫ ᐸᔥᑯᔕᒧᒃ ᑭᑎᒀᓂᐙᓐ ᒋᒥᑕᔅᑭᑎᒀᓀᔦᒃ ᒋᐃᔑᓈᑯᓯᔦᒃ ᑖᐱᔥᑰ ᒥᑕᔅᑭᑎᒀᓈᑫᓰᕽ ᐋᓃᔥ ᑭᓃᒑᓂᓯᐙᒃ ᑭᑲ ᒪᑲᒥᑰᒻ ᐸᑳᓐ ᐊᑮᕽ ᒋᐃᔑᐎᓂᑣ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society