ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 23 - ᐅᒋᐺ ᑭᒋᒪᓯᓇᐃᑲᓐᒋᓴᔅ ᑮᐲᓇᐎᒡ ᐁᔑᐊᔮᓂᒡ ᐹᐃᓬᐊᑑᓐ (Matthew 27.1-2,11-14; Mark 15.1-5; John 18.28-38) 1 ᑲᑭᓇ ᓴ ᑳᐅᓇᔓᐌᐙᒡ ᒫᒪᐤ ᑮᐸᓯᑸᐗᒃ ᐁᑮᐃᔑᐎᓈᐙᒡ ᒋᓴᓲᓐ ᐁᓈᓴᒦᓂᒡ ᐹᐃᓬᐊᑑᓐ Pilate᙮ 2 ᒦᑕᔥ ᐃᐃᒫ ᑳᑮᒫᒌ ᐊᓈᒥᒫᐙᒡ ᒋᓴᓲᓐ ᐁᑮᐃᑭᑐᐙᒡ: ᓂᑮ ᑳᒋᑎᓈᓈᓐ ᐅᔕ ᐗᐊ ᐃᓂᓂ ᐁᐗᓂᒫᒡ ᑭᐱᒫᑎᓰᒥᓈᓂᐞ, ᐁᐐᑕᒫᑫᒡ ᒋᑎᐸᐊᒪᐙᓯᐎᒥᓐᒡ ᒫᐗᒡ ᑭᒋᐅᑭᒫᓐ ᑖᑭᔅ ᔔᓂᔮᓐ᙮ ᒦᑕᔥ ᑲᔦ ᐁᓍᓂᑎᓱᒡ ᐐᓐ ᐁᐋᐎᒡ ᑭᔐᒪᓂᑑᓐ ᑳᐅᓈᐸᒥᑯᒡ, ᐐᓐ ᐄᓴᓐ ᐁᑭᒋᐅᑭᒫᐎᒡ᙮ 3 ᐹᐃᓬᐊᑦ ᑕᔥ ᐅᑮ ᑲᑴᒋᒫᓐ ᒋᓴᓲᓐ: ᑮᓐ ᐃᓇ ᐅᑭᒋ ᐅᑑᑭᒫᒥᐙᓐ ᒎᐗᒃ? ᒦᑕᔥ ᑳᐃᑯᒡ: ᒦ ᑾᑐᔕ ᐃ ᐁᑭᑐᔭᓐ᙮ 4 ᒦᑕᔥ ᐹᐃᓬᐊᑦ ᑳᐃᓈᒡ ᑭᒋᐊᓇᒥᐁᐎᑭᒫᐞ ᐃᐃ ᑲᔦ ᑳᐹᑏᓄᓂᒡ: ᑳᐐᓐ ᑫᑰᓐ ᓂᒥᑲᒧᐙᓰᓐ ᑫᐅᒋ ᑎᐹᑯᓂᑎᐸᓐ ᐗᐊ ᐃᓂᓂ, ᑮᐃᑭᑐ᙮ 5 ᐋᒋᑯ ᑕᔥ ᑮᑲᑴ ᔖᑰᓱᑖᑯᓯᐗᐞ ᐁᑮᐃᑭᑐᓂᒡ: ᐗᐊ ᐃᓂᓂ ᐁᔑ ᑭᑭᓄᐊᒫᑫᒡ ᑮᐅᒋ ᐅᒻᐺᑲᒥᑲᓂᓂ ᒥᓯᐌ ᒎᑏᔭ ᐊᑮᕽ᙮ ᐌᑎ ᓴ ᑮᐃᔑ ᒫᒋᑖ ᑳᓬᐊᓬᐃᐎ ᐊᑮᕽ Galilee ᐲᓃᔥ ᑕᔥ ᐅᐅᒫ ᐁᑮ ᐱᑕᑯᔑᕽ᙮ ᑮᐊᓂ ᐃᔑᓂᔕᐅᓐᒡ ᐁᕒᐊᑕᓐ ᒋᐙᐸᒥᑯᒡ 6 ᐊᐲ ᑕᔥ ᐹᐃᓬᐊᑦ ᑳᓅᑕᕽ ᐅᐅ ᑮᑲᑴᑗ: ᐊᐊᐌ ᐃᓂᓂ ᑳᓬᐊᓬᐄᕽ Galilee ᐃᓇ ᐅᒌ? 7 ᐊᐲ ᐹᐃᓬᐊᑦ ᑳᑭᑫᑕᕽ ᒋᓴᓲᓐ ᐁᐅᒌᓂᒡ ᐁᕒᐊᑕᓐ Herod ᑳᐃᔑ ᑎᐯᒋᑫᓂᒡ, ᒦ ᐃ ᑳᑮᐃᔑᓂᔕᐙᒡ ᐁᔑ ᐊᔮᓂᒡ ᐁᕒᐊᑕᓐ᙮ ᒉᕒᐆᓴᓬᐊᒥᕽ ᐄᑐᒃ ᓇᐃᑖᒃ ᑮᐊᔮᐗᓐ ᐃᐃ ᐊᐲ᙮ 8 ᐐᑫ ᑕᔥ ᐁᕒᐊᑦ ᑮᒥᓉᑕᒻ ᐁᐙᐸᒫᒡ ᒋᓴᓲᓐ᙮ ᐋᔕ ᑭᓉᔥ ᑮᐱᐅᒋ ᓈᓅᑕᒻ ᐁᑕᔑᒥᒥᓐᒡ, ᐅᑮᐃᔑ ᒥᓴᐌᑖᓐ ᑲᔦ ᐁᐐᐙᐸᒫᒡ ᒋᓴᓲᓐ ᒫᒪᑳᒋᒋᑫᓂᒡ᙮ 9 ᓃᐱᐗᐞ ᐃᑕᔥ ᑫᑰᓇᓐ ᐅᑮ ᑲᑴᒋᒫᓐ, ᑳᐐᓐ ᑕᔥ ᒋᓴᓲᓐ ᐅᑮᐅᒋ ᓇᑴᑖᑯᓰᓐ᙮ 10 ᐃᑭ ᑕᔥ ᑭᒋᐊᓇᒥᐁᐎᑭᒫᒃ ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᒪᑌ ᑳᐸᐎᐗᒃ ᐁᑮᑲᑴ ᒪᔥᑲᐎ ᐊᓈᒥᒫᐙᒡ᙮ 11 ᒦᔥ ᐁᕒᐊᑦ ᐃᐃ ᑲᔦ ᐅᔑᒫᑲᓂᔒᒪᐞ ᐅᑮ ᐹᐱᓄᑕᐙᐙᓐ ᒋᓴᓲᓐ ᑲᔦ ᑕᔥ ᐁᑮ ᒦᑭᓱᒫᐙᒡ᙮ ᐅᑮ ᐱᓯᑲᒨᓈᐙᓐ ᑲᔦ ᒫᐗᒡ ᐌᓂᔑᔑᓂᓂᒃ ᑲᔥᑮᑮᐎᓐ᙮ ᒦᔥ ᑳᐃᔑ ᑮᐌᓂᔕᐙᐙᒡ ᒦᓇᐙ ᐁᔑ ᐊᔮᓂᒡ ᐹᐃᓬᐊᑑᓐ᙮ 12 ᒦᑕᔥ ᐃᐃ ᐊᐲ ᐁᑮᔑᑲᓂᓂᒃ ᐁᕒᐊᑦ ᐊᐊ ᑲᔦ ᐹᐃᓬᐊᑦ ᑳᑮᒥᓄ ᐐᒌᑎᐙᒡ, ᐅᑖᓈᕽ ᐄᑐᒃ ᑮᔒᑫᓂᑎᐗᒃ᙮ ᑮᐅᓇᔓᐙᓂᓐᒡ ᒋᓴᔅ ᒋᓂᐳᒡ (Matthew 27.15-26; Mark 15.6-15; John 18.39—19.16) 13 ᐹᐃᓬᐊᑦ Pilate ᐅᑮᒫᒪᐎ ᐊᑐᒫᐞ ᑭᒋᐊᓇᒥᐁᐎᑭᒫᐞ, ᑳᓃᑳᓂᑕᒪᐙᓂᒡ ᑲᔦ ᒎᐗᐞ, ᐃᐃ ᑲᔦ ᐯᒫᑎᓯᓂᒡ᙮ 14 ᒦᔥ ᑳᐃᓈᒡ: ᑭᑮ ᐲᑕᒪᐎᔑᒻ ᐗᐊ ᐃᓂᓂ ᐁᑮᐃᑭᑐᔦᒃ ᐁᐗᓂᒫᒡ ᐯᒫᑎᓯᓂᒡ ᑳᐅᒋ ᐅᒻᐺᑲᒥᑭᓯᓂᒡ᙮ ᐁᓈᓴᒦᔦᒃ ᑕᔥ ᑮᐊᑕᑭᑫᓂᒫ, ᑳᐐᓐ ᑕᔥ ᑫᑰᓐ ᓂᑎᔑ ᒥᑲᒧᐙᓰᓐ ᑫᐅᒋ ᑌᐱᒣᑭᐸᓐ ᐃᐃᐌᓂ ᑳᐃᓀᒃ᙮ 15 ᑳᐐᓐ ᑕᔥ ᑲᔦ ᐁᕒᐊᑦ Herod ᐅᑮᒥᑲᓰᓐ ᑫᑰᓐ ᒋᑮᐗᓂᑑᑕᒥᓂᒡ ᒦᔥ ᑳᑮᐱ ᐅᒋ ᑮᐌᓂᔕᐙᒡ᙮ ᑳᐐᓐ ᒥᑭᑳᑌᓯᓂᓂ ᑫᑰᓐ ᑫᐅᒋ ᓂᓯᑎᐸᓐ᙮ 16 ᒦᑕᔥ ᑫᐃᔑᒋᑫᔮᓐ ᒋᐸᐸᔕᔐᐅᓐᒡ, ᒦᔥ ᑫᔑ ᐸᑭᑎᓇᒃ, ᑮᐃᑭᑐ᙮ 17 ᒦ ᐃ ᐄᑐᒃ ᑳᐃᔑᓭᓂᒃ ᐅᒋᑕ ᑯ ᐯᔑᒃ ᑕᑯᓂᑲᓇᓐ ᒋᑮ ᐸᑭᑎᓈᐸᓐ ᐃᐃ ᐊᐲ ᐁᐐᑾᑏᐗᑲᒥᑭᓯᐎᓐᒡ᙮ 18 ᐃᑭ ᑕᔥ ᑲᑭᓇ ᑳᒫᐗᒋᐃᑎᐙᒡ ᑮᒫᒪᐎ ᔖᑯᐌᐗᒃ: ᓂᓯᒃ ᐐᓐ ᐊᐊ ᐃᓂᓂ᙮ ᐸᑭᑎᓇᒪᐎᔑᓈᒻ ᐊᐊ ᐸᕒᐋᐸᔅ Barabbas! ᑮᐃᑭᑐᐗᒃ᙮ 19 ᐊᐊ ᐄᑐᒃ ᐸᕒᐋᐸᔅ ᑮᐲᒋ ᐌᐱᓈ ᑭᐸᐅᑏᐎᑲᒥᑯᕽ ᐁᑮᒪᒫᔑᒡ ᐁᑮᐅᒻᐺᑲᒥᓯᑯᐸᓀᓐ ᐃᐃᒫ ᐆᑌᓈᕽ᙮ ᑲᔦ ᑕᔥ ᐁᑮᓂᔑᐌᑯᐸᓀᓐ᙮ 20 ᐹᐃᓬᐊᑦ ᐅᑮᐊᑕᐌᑖᓐ ᒋᑮ ᐸᑭᑎᓈᐸᓐ ᒋᓴᓲᓐ, ᒦᔥ ᒦᓇᐙ ᑳᑮ ᑲᓅᓈᒡ ᑳᐹᑏᓄᓂᒡ ᐯᒫᑎᓯᓂᒡ᙮ 21 ᒦᑕᔥ ᐁᓂᑯᒃ ᑳᑮ ᔖᑯᐌᓂᒡ ᐁᑮᐃᑭᑐᓂᒡ: ᐊᑯᓴᑲᐅ, ᐊᑯᓴᑲᐅ! 22 ᒦᑕᔥ ᐅᐅ ᓂᓯᕽ ᐹᐃᓬᐊᑦ ᑳᐃᓈᒡ: ᐋᓃᓐ ᑕᔥ ᑳᐃᔑ ᒪᒫᔑᒡ? ᑳᐐᓐ ᑫᑰᓐ ᓂᒥᑲᒧᐙᓰᓐ ᑫᐅᒋ ᓂᓯᑎᐸᓐ᙮ ᓂᑲ ᐊᓅᑮ ᒋᐸᐸᔕᔐᐅᓐᒡ, ᒦᔥ ᑫᔑ ᐸᑭᑎᓂᓐᒡ, ᑮᐃᑭᑐ᙮ 23 ᐋᒋᑯ ᑕᔥ ᐁᓂᑯᒃ ᑮᑭᔒᐌᐗᐞ ᐁᔖᑯᐌᓂᒡ ᐁᑮᐃᑭᑐᓂᒡ ᒋᐊᑯᓴᑲᐅᒥᓐᒡ ᒋᓴᓲᓐ, ᐲᓂᔥ ᐁᑮ ᔖᑰᓱᑖᑯᓯᓂᒡ᙮ 24 ᐹᐃᓬᐊᑦ ᑕᔥ ᐅᑮᐃᓈᑯᓈᓐ ᒋᓴᓲᓐ ᐃᐃ ᑳᑮᐃᔑ ᑲᑴᑗᓂᒡ᙮ 25 ᒦᑕᔥ ᑳᑮ ᐸᑭᑎᓈᒡ ᐃᓂ ᐃᓂᓂᐗᓐ ᑳᑮᐊᑕᐌᓂᒥᒥᓐᒡ ᑳᑮᒪᒫᔑᓂᐸᓐ ᐁᐅᒻᐺᑲᒥᑭᓯᓂᒡ ᐃᐃᒫ ᐆᑌᓈᕽ᙮ ᐅᑮ ᐸᑭᑎᓈᐞ ᐱᓵᓐ ᐃᑯ ᐁᓀᑕᒥᓂᒡ ᒋᑑᑕᐙᓂᒡ ᒋᓴᓲᓐ᙮ ᒋᓴᔅ ᑮᐊᑯᓴᑲᐅᓐᒡ ᐋᔑᑌᔮᑎᑯᕽ (Matthew 27.32-44; Mark 15.21-32; John 19.17-27) 26 ᔑᒫᑲᓂᔕᒃ ᑕᔥ ᐅᑮᒫᒌᓈᐙᓐ ᒋᓴᓲᓐ᙮ ᒣᒀ ᐁᐊᓂ ᐱᒥ ᐊᔮᐙᒡ ᐅᑮᒣᒀᔥᑲᐙᐙᓐ ᐃᓂᓂᐗᓐ ᓴᐃᕒᐄᓃᕽ Cyrene ᐌᒌᓂᒡ, ᓵᐃᒪᓐ Simon ᐁᔑᓂᑳᓱᓂᒡ, ᐁᐱ ᑕᑯᔑᓂᓂᒡ ᐃᐃᒫ ᐆᑌᓈᕽ ᐱᑾᒐᔭᐄᕽ ᐁᑮᐲ ᐅᒌᓂᒡ᙮ ᒦᐗᓐ ᐃᓂ ᑳᑮᒪᓂᐱᓈᐙᒡ ᐁᑮ ᐱᒋᐗᓀᐋᐙᒡ ᐋᔑᑌᔮᑎᑰᓐ ᒋᐱᒥᐎᑕᒪᐙᓂᒡ ᐅᑖᓈᕽ ᐃᓇᑫᔭᐄ ᒋᓴᓲᓐ ᑳᐃᔑ ᐱᒧᓭᓂᒡ᙮ 27 ᐋᐱᒋ ᑕᔥ ᑮᐹᑏᓄᐗᒃ ᐯᒫᑎᓯᐙᒡ ᐁᐱᒥᓂᔕᐙᐙᒡ ᒋᓴᓲᓐ᙮ ᐋᓂᑕ ᑲᔦ ᐃᑴᐗᒃ ᐁᑮᒪᐎᐙᒡ, ᐁᑮᒥᒋᓇᐌᓯᐙᒡ ᑲᔦ᙮ 28 ᒋᓴᔅ ᑕᔥ ᑮᑴᑭ ᑳᐸᐎ ᐁᑮᐃᓈᒡ: ᑮᓇᐙ ᐃᑴᐗᒃ ᒉᕒᐆᓴᓬᐊᒥᕽ ᐌᒌᔦᒃ, ᑫᑯ ᓃᓐ ᒪᐎᒥᔑᑫᒃ᙮ ᑮᓇᐙ ᐱᑯ ᒪᐎᑎᓱᒃ, ᑭᑕᐱᓅᒌᔑᒥᐙᒃ ᑲᔦ ᒪᐎᒥᑾᒃ᙮ 29 ᓂᑯᑎᕽ ᐅᔕ ᑕᐅᒋᒋᓭ ᒋᔑ ᑮᔑᑲᒃ ᐊᐲ ᐯᒫᑎᓯᐙᒡ ᒋᐃᑭᑐᐙᒡ: ᐋᐱᒋ ᔕᐌᑖᑯᓯᐗᒃ ᐃᑭ ᐃᑴᐗᒃ ᑳᑆᓇᐎ ᐅᑕᐱᓅᒌᔑᒥᐙᒡ, ᐃᑭ ᑲᔦ ᑳᓂᑖᐎᑭᐋᓯᒀ ᐊᐱᓅᒌᔕᐞ, ᐐᑳ ᑲᔦ ᑳᐱ ᓅᓂᐋᐗᓱᓯᒀ᙮ 30 ᒦᑕᔥ ᐃᐃ ᐊᐲ ᐯᒫᑎᓯᐙᒡ ᑫᐃᑕᒧᐙᒡ ᑭᒋ ᐗᒌᓐ: ᐸᑕᑯᔥᑲᐎᔑᓈᒻ᙮ ᒦᔥ ᑲᔦ ᒋ ᐃᑕᒧᐙᒡ ᑳᐱᑾᑎᓈᓂᑭᓐ: ᐋᑲᐎᔥᑲᐎᔑᓈᒻ᙮ 31 ᑮᔥᐱᓐ ᑕᔥ ᐅᐅᐌᓂ ᐃᔑᒋᑫᐙᒡ ᒣᒀ ᒥᑎᑰᓐ ᐁᐊᔥᑳᑎᑯᐎᓂᒡ, ᐋᓃᓐ ᑕᔥ ᐐᓐ ᑫᐃᔑᐌᐸᒃ ᐊᐲ ᐹᓱᒡ ᐊᐊ ᒥᑎᒃ? 32 ᓃᔑᓐ ᑕᔥ 2 ᑯᑕᒃ ᐃᓂᓂᐗᒃ ᑳᑮ ᑭᒋ ᒪᒫᔑᐙᒡ ᑫᐐᓇᐙ ᑮᐃᔑᐎᒋᑲᓂᐎᐗᒃ ᒋᐐᒋ ᓂᐴᒫᐙᒡ ᒋᓴᓲᓐ᙮ 33 ᐊᐲ ᑳᐅᑎᑕᒧᐙᒡ ᐃᐃᒫ ᐅᑎᒀᓂᑫᑲᓂᑳᕽ ᐁᔑᓂᑳᑌᓂᒃ ᒦ ᐃᒫ ᒋᓴᔅ ᑳᑮᑕᔑ ᐊᑯᓴᑲᐅᓐᒡ, ᐃᐃ ᑲᔦ ᓃᔑᓐ ᐅᒪᒫᔑᐞ᙮ ᐯᔑᒃ ᐅᑭᒋ ᓂᑭᕽ ᐃᓇᑫ, ᑯᑕᒃ ᐃᑕᔥ ᐅᓇᒪᑎ ᓂᑭᕽ ᐃᓇᑫ ᑮᐃᔑ ᐊᑯᓴᑲᐅᒫᐗᐞ᙮ 34 ᒦᔥ ᒋᓴᔅ ᑳᐃᑭᑐᒡ: ᓅᔅ, ᐴᓀᑕᒪᐤ, ᑳᐐᓐ ᐅᑭᑫᑕᓰᓈᐙ ᐋᓃᓐ ᐁᔑᒋᑫᐙᒡ᙮ ᔑᒫᑲᓂᔕᒃ ᑕᔥ ᑮᑲᑴ ᐸᑭᓈᑎᐗᒃ ᐁᑮᐊᐸᑭᒋᑫᐙᒡ ᐁᑮᓀᓈᐎᓇᒫᑎᐙᒡ ᐃᐃ ᐅᑭᑭᔥᑭᑲᓂᓂ᙮ 35 ᐃᑭᐌᓂᐗᒃ ᑕᔥ ᐯᒫᑎᓯᐙᒡ, ᐃᑭ ᑲᔦ ᑳᓃᑳᓃᑕᒫᑫᐙᒡ ᒎᐗᒃ ᑮᓃᐸᐎᐗᒃ ᐁᑲᓇᐙᐱᐙᒡ ᐅᑮ ᐸᐱᓄᑕᐙᐙᓐ ᒋᓴᓲᓐ ᐁᑮᐃᓈᐙᒡ: ᐅᑮ ᐱᒫᒋᐋᐞ ᐄᑐᒃ ᑯᑕᒃ ᐊᐎᔭᐞ᙮ ᑕᑲ ᑕᔥ ᑕᐱᒫᒋᐃᑎᓱ ᑮᔥᐱᓐ ᐐᓐ ᑌᐺ ᐊᔮᐎᑴᓐ ᑭᔐᒪᓂᑑ ᐅᑐᓈᐸᒫᑲᓇᓐ ᒋᐱᒫᒋᐃᐌᓂᒡ᙮ 36 ᔑᒫᑲᓂᔕᒃ ᑕᔥ ᑫᐐᓇᐙ ᐅᑮ ᐹᐱᓄᑕᐙᐙᓐ᙮ ᐁᑮᐱ ᓈᓯᑲᐙᐙᒡ ᐁᑮᐎᒥᓇᐋᐙᒡ ᔔᒥᓈᐳ ᑳᐐᓴᑳᑲᒥᓂᓂᒃ 37 ᐁᑮᐃᓈᐙᒡ: ᐱᒫᒋᐃᑎᓱᓐ ᑮᔥᐱᓐ ᑮᓐ ᐅᑭᒋᐅᑑᑭᒫᒥᐙᓐ ᒎᐗᒃ, ᐅᑮᐃᓈᐙᓐ᙮ 38 ᐃᔥᐱᒥᕽ ᐃᓇᑫ ᑳᐃᔑ ᐊᑰᒋᕽ ᑮᐊᑰᑌᓂ ᐅᔑᐲᐃᑲᓐ ᐁᑮᐃᔑᐲᐃᑳᑌᓂᒃ: ᒦᐗᓐ ᐅᓄ ᐅᑭᒋᐅᑑᑭᒫᒥᐙᓐ ᒎᐗᒃ᙮ 39 ᐯᔑᒃ ᑕᔥ ᐅᒪᒫᔒᓐ ᑳᑮᐐᒋ ᐊᑯᓴᑲᐅᑰᒫᒡ ᐅᑮᐅᒋ ᑲᓅᓂᑰᓐ: ᑳᐐᓐ ᐃᓇ ᑮᓐ ᑳᐅᓈᐸᒥᓐᒡ ᒋᐱᒫᒋᐃᐌᒡ? ᐱᒫᒋᐃᑎᓱᓐ, ᑫᓃᓇᐎᓐᑦ ᑕᔥ ᐱᒫᒋᐃᔑᓈᒻ᙮ 40 ᐃᓂ ᑕᔥ ᑯᑕᒃ ᐅᒪᒫᔒᓐ ᐅᑮ ᑭᔒ ᑲᓅᓈᓂ: ᑳᐐᓐ ᐃᓇ ᑭᑯᓵᓰ ᑭᔐᒪᓂᑑ? ᑲᑭᓇ ᐅᐅ ᑳᔑ ᓂᓯᔭᕽ 3 ᐯᔑᑾᓐ ᑭᑮᐃᔑ ᐅᓇᔓᐙᓂᑰᒥᓐ ᑫᔑ ᑲᒀᑕᑭᐃᑰᔭᕽ᙮ 41 ᑮᓇᐎᓐᑦ ᐐᓐ ᑾᔭᒃ ᑭᑎᓈᑯᓂᑰᒥᓐ, ᑭᑎᔑᒋᑫᐎᓂᓈᓂᕽ ᐁᐅᒋ ᑲᔥᑭᑕᒫᓱᔭᕽ ᐅᐅ᙮ ᐐᓐ ᑕᔥ ᑳᐐᓐ ᑫᑰᓐ ᑮᐃᔑ ᐗᓂᑑᑕᓰ᙮ 42 ᒦᔥ ᑳᐃᓈᒡ ᒋᓴᓲᓐ: ᒋᓴᔅ, ᒫᒥᑲᐌᓂᒦᔒᑲᓐ ᐊᐲ ᐱᑕᑯᔑᓇᓐ ᑭᑑᑭᒫᐎᐎᓂᕽ᙮ 43 ᒋᓴᔅ ᑕᔥ ᐅᑮᐃᓈᓐ ᐃᓂ ᐃᓂᓂᐗᓐ: ᑭᑕᔓᑕᒪᐎᓐ, ᓅᑯᒻ ᑳᑮᔑᑲᒃ ᑭᑲ ᐐᒌᐎᔥ ᐃᐃᒫ ᐸᕒᐊᑖᐃᓯᕽ Paradise ᑳᐃᔑᐎᓂᑣ ᑳᔕᐌᑖᑯᓯᐙᒡ᙮ ᒋᓴᔅ ᑮᓂᐳᒡ ᐋᔑᑌᔮᑎᑯᕽ (Matthew 27.45-56; Mark 15.33-41; John 19.28-30) 44 ᒦᑕᔥ ᐃᐃᐌ ᓂᑯᒋ ᑯ ᐊᐲ ᐁᐋᐱᑕ ᑮᔑᑲᒃ ᑮᐊᓂ ᑲᔥᑮ ᑎᐱᑲᓐ ᒥᓯᐌ ᐊᑮᕽ ᐲᓂᔥ ᐁᑮᐊᓂ ᓂᓱᑎᐸᐃᑲᓀᔮᒃ 3᙮ 45 ᑮᓯᔅ ᑲᔦ ᑮᐴᓂ ᓵᑳᓯᑫ᙮ ᒦᑕᔥ ᐃᐃ ᑭᒋᐊᓇᒥᐁᐎᑲᒥᑯᕽ ᑭᒋᑭᐲᑲᐃᑲᓐ ᓈᐗᔭᐄ ᑳᑮ ᑖᔥᑮᑭᓭᒃ᙮ 46 ᒦᑕᔥ ᒋᓴᔅ ᐁᓂᑯᒃ ᑳᑮ ᔖᑯᐌᒡ ᐁᐃᑭᑐᒡ: ᓅᔅ, ᑭᑲᓇᐌᑕᐃᓐ ᓂᑕᒑᒃ! ᐊᐲ ᐃ ᑳᐃᔥᒀ ᐃᑭᑐᒡ, ᒦ ᐃ ᑳᐃᔑ ᓂᐳᒡ᙮ 47 ᐊᐊ ᑕᔥ ᔑᒫᑲᓂᔒᐎᑭᒫ ᑳᐙᐸᑕᕽ ᐋᓃᓐ ᑳᐃᔑᓭᓂᒃ ᐅᑮᓇᓈᑯᒫᓐ ᑭᔐᒪᓂᑑᓐ ᐁᑮᐃᑭᑐᒡ: ᑌᐺ ᐄᓴᓐ ᑾᔭᒃ ᑮᐃᓂᓃᐎ ᐗᐊ! 48 ᐃᑭ ᑕᔥ ᐯᒫᑎᓯᐙᒡ ᑳᑮ ᐹᑏᓄᐙᒡ ᐁᒫᐗᒋᐃᑎᐙᒡ ᐁᐙᐸᑕᒧᐙᒡ ᐅᐅᐌᓂ, ᐋᓃᓐ ᑲᔦ ᑳᐃᔑᓭᓂᒃ, ᑮᐊᓂ ᑮᐌᐗᒃ ᐁᑮ ᐸᐸᑭᑌ ᔮᑭᑲᓀᐅᑎᓱᐙᒡ ᑳᐊᐲᒋ ᒥᒋᓇᐌᓯᐙᒡ᙮ 49 ᑲᑭᓇ ᐃᑭ ᑳᑮ ᑭᑫᓂᒫᐙᒡ ᒋᓴᓲᓐ, ᐃᑭ ᑲᔦ ᐃᑴᐗᒃ ᑳᓬᐊᓬᐄᕽ Galilee ᑳᑮᐅᒋ ᐱᒥᓂᔕᐙᐙᒡ ᐙᓴᔩᔥ ᐃᑯ ᑮᓃᐸᐎᐗᒃ ᑳᐅᓵᐱᐙᒡ᙮ ᒋᓴᔅ ᐅᐐᔭᐤ ᑮᓇᐃᓂᑳᑌᓂᒃ (Matthew 27.57-61; Mark 15.42-47; John 19.38-42) 50 ᑮᐊᔮ ᐃᓂᓂ ᒎᓴᑉ Joseph ᐁᑮᐃᔑᓂᑳᓱᒡ᙮ ᑾᔭᒃ ᑮᐃᓂᓃᐎ, ᑲᔦ ᑕᔥ ᑮᒥᓍᑎᓯ, ᐁᑮ ᑕᑾᐱᒡ ᑳᓂᑖ ᐅᓈᑯᓂᑫᓂᒡ᙮ 51 ᐁᕒᐊᒪᑏᔭ Arimathea ᐆᑌᓈᕽ, ᒎᑏᔭ ᐊᑮᕽ ᑮᐅᒌ᙮ ᑫᐐᓐ ᐄᑐᒃ ᐅᑮ ᐲᑑᓐ ᐃᐃ ᑳᐐᒫᒌ ᑎᐯᒋᑫᓂᒡ ᑭᔐᒪᓂᑑᓐ᙮ ᑳᐐᓐ ᑲᔦ ᐐᓐ ᐅᑮᓇᐁᑕᓰᓐ ᑳᑮᐃᓀᑕᒥᓂᒡ, ᐃᐃ ᑲᔦ ᑳᑮᐃᔑᒋᑫᓂᒡ᙮ 52 ᑮᐃᔖ ᐁᓈᓴᒦᓂᒡ ᐹᐃᓬᐊᑑᓐ Pilate ᐁᑮ ᑲᑴᑗᒡ ᐅᐐᔭᐎᓂ ᒋᓴᓲᓐ᙮ 53 ᒦᑕᔥ ᑳᑮ ᐱᓇᐊᕽ, ᐁᑮᐐᑴᔩᑭᓇᕽ ᐙᐱᔥᑮᑭᓄᕽ᙮ ᒦᔥ ᑳᐃᔑ ᐊᑑᒡ ᓇᐃᓂᑏᐎᑲᒥᑯᕽ ᑳᑮᐃᔑ ᐐᐹᐱᑲᐃᑳᑌᓂᒃ ᐊᓯᓃᑳᕽ, ᐐᑳ ᐁᑮ ᐱᐅᒋ ᐋᐸᑕᓯᓂᓂᒃ᙮ 54 ᒦ ᐃ ᐁᑮᐃᔑ ᑮᔑᑲᒃ ᑳᓂᑖ ᑾᔮᒌᐙᒡ, ᐋᓃᔥ ᐋᔕ ᑫᑳ ᑮᒫᒋᓭ ᒋᐊᓉᐲᐎ ᑮᔑᑲᒃ᙮ 55 ᐃᑭᐌᓂᐗᒃ ᑕᔥ ᐃᑴᐗᒃ ᑳᑮᐱ ᐅᒋ ᐱᒥᓂᔕᐙᐙᐸᓐ ᒋᓴᓲᓐ ᑳᓬᐊᓬᐄᕽ Galilee ᐅᒋ, ᐅᑮ ᐱᒥᓂᔕᐙᐙᓐ ᒎᓴᐴᓐ᙮ ᐅᑮᐙᐸᑖᓈᐙ ᑕᔥ ᐃᐃ ᓇᐃᓂᑏᐎᑲᒥᒃ, ᑲᔦ ᑕᔥ ᐅᑮᐙᐸᑖᓈᐙ ᐋᓃᓐ ᒋᓴᓲᓐ ᐅᐐᔭᐎᓂ ᑳᐃᓇᒋᑳᑌᓂᒃ᙮ 56 ᒦᑕᔥ ᑳᐃᔑ ᑮᐌᐙᒡ ᐁᑮ ᑾᔮᒋᑑᐙᒡ ᒥᓈᑯᐅᓇᓐ, ᑲᔦ ᑕᔥ ᑎᓄ ᒣᓄᒫᑾᓂᓂᒃ ᐴᓰᐎᓐ ᑳᐊᒋᑳᑌᒃ ᐐᔭᐎᒫᕽ᙮ ᐁᐊᓉᐲᐎ ᑮᔑᑲᓂᓂᒃ ᑮᐊᓉᐱᐗᒃ ᐅᓇᔓᐌᐎᓐ ᑳᐃᓇᑌᒃ ᒋᑑᒋᑳᑌᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society