ᐃᐃᐌ ᒥᓍᒋᒧᐎᓐ ᑳᐃᓈᑐᑕᕽ ᐊᐊ ᓬᐅᒃ 22 - ᐅᒋᐺ ᑭᒋᒪᓯᓇᐃᑲᓐᑮᐅᓀᑕᒧᐙᒡ ᐋᓃᓐ ᑫᔑᓂᓵᐙᒡ ᒋᓴᓲᓐ (Matthew 26.1-5; Mark 14.1-2; John 11.45-53) 1 ᐋᔕ ᐁᐊᓂ ᐯᔓᓈᑾᒃ ᐃᐃᐌ ᑳᑮᓂᑖ ᒫᐗᒋᐃᑎᓈᓂᐗᕽ ᑮᐊᒧᓐᒡ ᑳᐅᐱᓯᑲᓂᐎᓯᒃ ᐸᑴᔑᑲᓐ, ᒦ ᐃ ᑳᐃᔑᓂᑳᑌᒃ ᐱᒫᒋᐃᑰᐎ ᐐᑾᑎᐎᓐ᙮ 2 ᑭᒋᐊᓇᒥᐁᐎᑭᒫᒃ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᐅᑮ ᑯᓵᐙᐞ ᐯᒫᑎᓯᓂᒡ, ᒦᑕᔥ ᑳᐃᔑᑲᑴ ᒥᑲᒧᐙᒡ ᐋᓃᓐ ᐃᓇᑫ ᑫᔑ ᑮᒨᒋ ᓂᓵᐙᒡ ᒋᓴᓲᓐ᙮ ᒎᑕᔅ ᑮᐊᔓᑕᒫᑫᒡ ᐁᐐᐐᒋᑣᒡ ᒋᑳᒋᑎᓂᒥᓐᒡ ᒋᓴᓲᓐ (Matthew 26.14-16; Mark 14.10-11) 3 ᒦᑕᔥ ᓭᑕᓇᓐ Satan ᑳᑮ ᐲᑎᑫᔥᑳᑯᒡ ᒎᑕᔅ ᐃᔅᑫᕒᐃᔭᑦ Judas Iscariot ᑳᐃᓂᓐᒡ, ᑫᐐᓐ ᐄᑐᒃ ᒎᑕᔅ ᐯᔑᒃ ᑮᑎᓄᐎ ᑳᑮᒥᑖᔑ ᓃᔑᓂᒡ 12 ᑭᑭᓄᐊᒪᐙᑲᓇᐞ᙮ 4 ᒦᑕᔥ ᒎᑕᔅ ᑳᐃᔑ ᒫᒑᒡ ᐁᑮᐊᐎ ᑲᓅᓈᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᔑᒫᑲᓂᔕᓐ ᑳᓂᑖ ᑲᓇᐌᑕᒥᓂᒡ ᒋᐊᓇᒥᐁᐎᑲᒥᑯᓂ ᑭ ᐋᓃᓐ ᑫᔑ ᐐᒋᐋᒡ ᒋᑳᒋᑎᓈᓂᒡ ᒋᓴᓲᓐ᙮ 5 ᐐᑫ ᓴ ᑮᒥᓉᑕᒨᐞ, ᒦᔥ ᑳᑮᐊᔓᑕᒫᑯᒡ ᐁᐐᒦᓂᑯᒡ ᔔᓂᔮᓐ᙮ 6 ᒎᑕᔅ ᑕᔥ ᐅᑮ ᓇᐁᑖᓐ, ᒦᔥ ᑳᐃᔑ ᒫᒌ ᓈᓈᑲᒋᐋᒡ ᐋᓃᓐ ᐊᐲ ᑫᓇᐃᓭᓂᒃ ᒋᑳᒋᑎᓈᒡ ᒋᓴᓲᓐ, ᐊᐲ ᑲᔦ ᐁᐐᒪᒥᔑᒫᒡ ᒋᑭᑫᑕᓯᓂᒃ ᐯᒫᑎᓯᓂᒡ᙮ ᒋᓴᔅ ᑮᐐᒋᐎᓯᓃᒫᒡ ᐅᑭᑭᓄᐊᒪᐙᑲᓇᐞ (Matthew 26.17-25; Mark 14.12-21; John 13.21-30) 7 ᑮᐱ ᐅᒋᒋᓭ ᐁᑮᐃᔑ ᑮᔑᑲᒃ ᐊᐲ ᑮᐊᒧᓐᒡ ᑳᐅᐱᓯᑲᓂᐎᓯᒃ ᐸᑴᔑᑲᓐ᙮ ᒦ ᐄᑐᒃ ᐃᐃ ᐊᐲ ᑳᑮᓂᓯᑣ ᒫᓇᒑᓂᔐᓴᒃ ᑫᐋᐸᑎᓯᐙᒡ ᐱᒫᒋᐃᑰᐎ ᐐᑾᑎᕽ᙮ 8 ᒋᓴᔅ ᑕᔥ ᐅᑮᐃᔑᓂᔕᐙᓐ ᐲᑕᕒᐆᓐ Peter ᐃᓂ ᑲᔦ ᒞᓇᓐ John ᐅᐅ ᐁᑮᐃᓈᒡ: ᒫᒑᒃ, ᐊᑕᐎ ᑾᔮᒋᑑᒃ ᐱᒫᒋᐃᑰᐎ ᐐᑾᑎᐎᓐ ᑫᑕᔑ ᐐᓯᓂᔭᕽ, ᐅᑮᐃᓈᐞ᙮ 9 ᐋᑎ ᐁᔑ ᐊᑕᐌᑕᒪᓐ ᒋᐃᔑ ᑾᔮᒋᑑᔮᕽ? ᐅᑮᐃᑰᐞ᙮ 10 ᒦᔥ ᑳᐃᓈᒡ: ᐊᐲ ᐊᓂ ᐲᑎᑫᔥᑳᔦᒃ ᑭᒋ ᐆᑌᓇ ᑭᑲ ᐙᐸᒫᐙ ᒋᒣᒀᔥᑲᐌᒃ ᐃᓂᓂ ᐄᓴᓐ ᐁᑮ ᓈᑕᐃᐲᒡ ᐊᑑᐹᓂᕽ᙮ ᑭᑲ ᐱᒥᓂᔕᐙᐙ ᑕᔥ ᐋᑎ ᐱᑯ ᐁᓂᔑ ᐲᑎᑫᒡ ᐙᑳᐃᑲᓂᕽ᙮ 11 ᐅᐅᐌ ᑭᑲᐃᓈᐙ: ᐅᑭᑭᓄᐊᒫᑫ ᑭᑎᒃ, ᐋᑎ ᒪᐗᑎᔑᐌᐎᑲᒥᒃ ᐁᔮᒃ ᑫᑕᔑ ᐐᒋ ᐐᓯᓃᒪᒀ ᓂᑭᑭᓄᐊᒪᐙᑲᓇᒃ ᐁᐐ ᐱᒫᒋᐃᑰᐎ ᐐᑾᑎᔮᕽ, ᒦ ᐃ ᑫᐃᓀᒃ᙮ 12 ᑭᑲ ᐙᐸᑕᐃᑯᐙ ᐃᔥᐱᒥᕽ ᐁᔮᓂᒃ ᐁᒥᒑᓂᒃ ᒪᐗᑎᔑᐌᐎᑲᒥᒃ ᑲᑭᓇ ᑫᑰᓐ ᐃᐃᒫ ᐁᑾᔮᑕᑌᓂᒃ᙮ ᒦᑕᔥ ᐃᐃᒫ ᑫᔑ ᑾᔮᑕᑑᔦᒃ ᑲᑭᓇ ᑫᑰᓐ, ᐅᑮᐃᓈᐞ᙮ 13 ᒦᑕᔥ ᑭᑭᓄᐊᒪᐙᑲᓇᒃ ᑳᐃᔑ ᒫᒑᐙᒡ ᐁᑮᐃᔑ ᒥᑲᒧᐙᒡ ᑲᑭᓇ ᑫᑰᓐ ᐃᐃᐌᓂ ᒋᓴᓲᓐ ᑳᑮᐃᔑ ᐐᑕᒫᑯᐙᒡ᙮ ᒦᔥ ᐃᐃᒫ ᑳᑕᔑ ᑾᔮᒌᐙᒡ ᑫᑕᔑ ᐱᒫᒋᐃᑰᐎ ᐐᑾᑎᐙᒡ᙮ ᐃᔥᒀᒡ ᑮᐐᒋᐐᓯᓃᒫᒡ ᒋᓴᔅ ᐅᑭᑭᓄᐊᒪᐙᑲᓇᐞ (Matthew 26.26-30; Mark 14.22-26; 1 Corinthians 11.23-25) 14 ᐊᐲ ᑎᐸᐃᑲᓐ ᐁᐃᔑᓭᓂᒃ ᒋᐐᓯᓂᓈᓂᐗᕽ ᒋᓴᔅ ᑮᐅᓈᑯᔑᓐ ᐃᔑ ᐅᐱᒣ ᑕᐸᓯ ᑑᐳᐎᓈᑯᕽ᙮ ᐅᑎᔑᓂᔕᐙᑲᓇᐞ ᑲᔦ ᑮᐅᓇᐱᐗᐞ᙮ 15 ᒦᑕᔥ ᑳᐃᓈᒡ: ᒫᐗᒡ ᐁᑮᐊᑕᐌᑕᒫᓐ ᐅᐅᐌ ᒋᐐᒋ ᐐᓯᓃᒥᓇᑰᒃ ᐅᐅᐌ ᑳᑑᑕᒪᕽ ᐱᒫᒋᐃᑰᐎ ᐐᑾᑎᐗᓐ ᒋᑆ ᑲᒀᑕᑭᑑᔮᓐ᙮ 16 ᑌᐺ ᐅᐌ ᑳᐐᑕᒪᐎᓇᑰᒃ, ᑳᐐᓐ ᒦᓇᐙ ᐅᐅ ᓂᑲᐃᔑ ᐐᓯᓂᓰ ᑳᐐᑾᑎᔭᕽ ᐹᓂᒫ ᑮᑎᐱ ᑮᔑᓈᑾᓂᓂᒃ ᑭᔐᒪᓂᑑ ᐅᑎᐯᒋᑫᐎᓐ᙮ 17 ᒦᑕᔥ ᒋᓴᔅ ᑳᑮᐅᑖᐱᓇᕽ ᒥᓂᒀᑲᓐ ᐁᑮᓇᓈᑯᒫᒡ ᑭᔐᒪᓂᑑᓐ ᑲᔦ ᑕᔥ ᐁᑮᐃᑭᑐᒡ: ᐅᑖᐱᓇᒧᒃ ᐅᐅᐌ ᑳᑕᔑᔦᒃ ᒋᐅᒋ ᒫᒪᐎ ᒥᓂᑴᔦᒃ᙮ 18 ᒦᔥ ᐁᔑ ᐐᑕᒪᐎᓇᑰᒃ, ᑳᐐᓐ ᒦᓇᐙ ᓂᑲᐅᒋ ᒥᓂᑴᓰ ᐅᐅ ᑎᓄ ᔔᒥᓈᐳ ᐹᓂᒫ ᑭᔐᒪᓂᑑ ᐅᑎᐯᒋᑫᐎᓐ ᐱᑕᑯᔑᓅᒪᑲᓂᓂᒃ᙮ 19 ᐅᑮᐅᑖᐱᓈᓐ ᑲᔦ ᐸᑴᔑᑲᓇᓐ ᐁᑮᓇᓈᑯᒧᒡ ᐁᑮ ᐸᑴᐱᓈᒡ ᐁᑮᒫᒦᓈᒡ ᒋᐊᒸᓂᒡ ᐁᑮᐃᓈᒡ: ᒦ ᐅᐌ ᓃᐎᔭᐤ ᑳᐸᑭᑎᓇᒫᑰᔦᒃ᙮ ᒨᔕᒃ ᐅᐅ ᐃᔑᒋᑫᒃ ᒋᒫᒥᑲᐎᓄᑕᐎᔦᒃ᙮ 20 ᑳᐃᔥᒀ ᐐᓯᓂᐙᒡ ᑕᔥ, ᒦ ᐃ ᐯᔑᑾᓐ ᒋᓴᔅ ᑳᐃᔑ ᒦᓈᒡ ᐃᐃ ᒥᓂᒀᑲᓐ ᐁᑮᐃᑭᑐᒡ: ᒦ ᐅᐌ ᒥᓂᒀᑲᓐ ᑭᔐᒪᓂᑑ ᐅᑑᔥᑭ ᐊᔓᑕᒫᑫᐎᓐ ᓂᒥᔅᑸᒥᕽ ᑳᐅᒋ ᐋᔩᒋᓈᑾᒃ ᑳᓰᑭᓂᑳᑌᒃ ᑮᓇᐙ ᐅᒋ᙮ 21 ᐃᓇᔥᑫ ᑭᐐᒋ ᐐᓯᓃᒥᑯᓈᓐ ᐅᐅᒫ ᑑᐳᐎᓈᑯᕽ ᐊᐊ ᑳᐐᒪᒥᔑᐃᒡ᙮ 22 ᐃᓂ ᓴ ᐃᓂᓂ ᐅᑯᓯᓴᓐ ᑕᐃᔑᓭᐗᓐ ᑖᐱᔥᑰ ᑭᔐᒪᓂᑑ ᑳᑮᐃᔑ ᐅᓀᑕᕽ᙮ ᐋᐱᒋ ᑕᔥ ᑕᑭᒋ ᑰᐹᒋᓭᐗᓐ ᐃᓂᐌᓂᐗᓐ ᑫᒪᒥᔑᒥᑯᒡ᙮ 23 ᒦᑕᔥ ᑳᑮᒫᒌ ᑲᑴᒋᑎᓂᒡ ᑳᓂᑲ ᐊᐌᓀᓐ ᐅᐅᐌ ᑫᐃᔑᒋᑫᑴᓐ᙮ ᒋᓴᔅ ᐁᐐᑕᒪᐙᒡ ᐊᐌᓀᓐ ᐊᐊ ᑫᑭᒋ ᐃᓀᑖᑯᓯᒡ 24 ᒦᑕᔥ ᐅᑭᑭᓄᐊᒪᐙᑲᓇᐞ ᐁᑮᒫᒌ ᑲᑲᓅᓂᑎᓂᒡ ᐊᐌᓀᓐ ᐊᐊ ᑳᑕᔑᓂᒡ ᒫᐗᒡ ᑫᑭᒋ ᐃᓀᑖᑯᓯᓂᒡ᙮ 25 ᒦᑕᔥ ᐅᐅ ᒋᓴᔅ ᑳᐃᓈᒡ: ᐃᑭ ᓴ ᑳᑎᐯᓂᒫᐙᒡ ᐯᒫᑎᓯᓂᒡ ᑳᑭᑫᓂᒫᓯᓂᒃ ᑭᔐᒪᓂᑑᓐ, ᐐᑫ ᐅᑎᐯᓂᒫᐙᐞ, ᐃᑭ ᑕᔥ ᑳᐅᑭᒫᑲᑖᑫᐙᒡ ᐃᔑᓂᑳᓂᑎᓱᐗᒃ ᑳᒥᓄᓭᐃᐌᐙᒡ᙮ 26 ᑮᓇᐙ ᑕᔥ ᐐᓐ ᑳᐐᓐ ᐃᐃ ᑭᑲ ᐃᔑᒋᑫᓰᒻ᙮ ᑌᑾᒡ ᓴ ᑮᓐ ᑫᒋ ᐃᓀᑖᑯᓯᔭᓐ ᒋᑮᐃᓀᑖᑯᓯᔭᐸᓐ ᑖᐱᔥᑰ ᒫᐗᒡ ᑳᐅᔥᑳᑎᓯᒡ᙮ ᐊᐊ ᑕᔥ ᑲᔦ ᑳᑎᐯᓂᒥᐌᒡ ᒋᑮᐃᓀᑖᑯᓯᐸᓐ ᑖᐱᔥᑰ ᑳᐸᒦᑖᑫᒡ᙮ 27 ᐊᐌᓀᓐ ᑕᔥ ᓇᐗᒡ ᑫᒋ ᐃᓀᑖᑯᓯᒡ? ᐊᐊ ᓇ ᑳᓇᒪᑕᐱᒡ ᑳᐐ ᐐᓯᓂᒡ, ᑯᒫ ᑲᔦ ᐊᐊ ᑳᐸᒦᑖᑫᒡ? ᐊᐊᐌ ᐄᑐᒃ ᑳᓇᒪᑕᐱᒡ᙮ ᐁᐐᒌᐎᓇᑰᒃ ᑕᔥ ᓃᓐ ᑭᐸᒦᑕᐎᓂᓂᒻ᙮ 28 ᑮᓇᐙ ᑕᔥ ᑳᐱ ᐐᒌᐎᔦᒃ ᐃᐃ ᑲᑭᓇ ᑳᐱᔑ ᑲᑴᒋᐃᑰᔮᓐ᙮ 29 ᑖᐱᔥᑰ ᓅᔅ ᑳᑮᐃᔑ ᒦᔑᒡ ᒋᐅᑭᒫᑲᑖᑫᐗᒃ, ᒦᔥ ᐯᔑᑾᓐ ᑫᑮᓇᐙ ᐁᔑ ᒦᓂᓇᑰᒃ᙮ 30 ᑮᓇᐙ ᑕᔥ ᑭᑲᑕᔑ ᐐᓯᓂᒻ, ᑭᑲᑕᔑ ᒥᓂᑴᒻ ᑲᔦ ᓂᑑᐳᐎᓈᑯᕽ ᑳᑕᔑ ᑎᐯᒋᑫᔮᓐ᙮ ᑮᓇᐙ ᑭᑲᔑ ᐊᐱᒻ ᑭᒋᐅᑭᒫᐗᐱᐎᓂᕽ ᒋᐅᓈᑯᓀᒀ ᒥᑖᔑ ᓃᔑᓐ 12 ᑳᑕᓶᐙᓇᑭᓯᐙᒡ ᐃᔅᕒᐃᔭᓬᐊᒃ Israel ᐯᒫᑎᓯᐙᒡ᙮ ᑭᑲᔨᔥ ᐁᑭᑫᓂᒥᓯᐗᓐ ᑮᐃᓈᒡ ᐲᑕᕒᐆᓐ (Matthew 26.31-35; Mark 14.27-31; John 13.36-38) 31 ᓵᐃᒪᓐ Simon, ᓵᐃᒪᓐ ᐱᓯᑕᐎᔑᓐ, ᓭᑕᓐ ᐅᔕ ᑮᑲᑴᑗ, ᑮᐸᑭᑎᓇᒪᐙ ᑲᔦ ᐁᐐ ᑯᒋᐃᓀᒃ ᑖᐱᔥᑰ ᑭᑎᑫᐎᓂᓂ ᑳᔑ ᓀᓈᐎᓇᕽ ᐌᓂᔑᔑᓂᓂᑭᓐ, ᑳᒪᒋᓈᑾᓂᓂᑭᓐ ᑲᔦ ᐸᑴᔑᑲᓂᒥᓇᓐ᙮ 32 ᓵᐃᒪᓐ, ᐋᔕ ᑕᔥ ᑭᑮᐊᓇᒥᐁᑕᒪᐎᓐ, ᒋᑆᓇᐎᒋᑫᒪᑲᓯᓄᒃ ᑭᑌᐺᑕᒧᐎᓐ᙮ ᐊᐲ ᑕᔥ ᑲᔦ ᐱᑮᐌᓄᑕᐎᔭᓐ, ᐐᒋᐋᑲᓐ ᑭᐐᒋ ᑭᑭᓄᐊᒪᐙᑲᓇᒃ ᒋᒪᔥᑲᐎᓰᐙᒡ᙮ 33 ᐅᐅ ᑕᔥ ᐲᑕᕒ Peter ᑮᐃᔑ ᓇᑴᑕᒻ: ᑌᐯᒋᑫᔭᓐ, ᓂᑲ ᑾᔮᒌ ᐅᔕ ᐁᐐᐃᔑ ᐐᒌᐎᓈᓐ ᑭᐸᐅᑏᐎᑲᒥᑯᕽ, ᑲᔦ ᑕᔥ ᓂᐳᐎᓂᕽ, ᑮᐃᑭᑐ᙮ 34 ᒦᑕᔥ ᒋᓴᔅ ᑳᐃᓈᒡ: ᑭᐐᑕᒪᐎᓐ ᐲᑕᕒ, ᒋᑆ ᓅᑖᑯᓯᒡ ᐋᐯ ᐊᐹᑲᐋᒀᓐ ᓅᑯᒻ ᑳᑎᐱᑲᒃ, ᒦ ᐃ ᐋᔕ ᓂᓯᕽ 3 ᒋ ᐃᑭᑐᔭᓐ ᐁᑭᑫᓂᒥᓯᐗᓐ, ᐅᑮᐃᓈᓐ᙮ ᔔᓂᔮᐗᔥ, ᐸᔥᑴᐗᔥ, ᐸᔑᐸᐃᑫᐎᑯᒫᓐ ᑲᔦ ᐁᑕᔑᑌᑭᓐ 35 ᒦᑕᔥ ᑳᐃᔑ ᑲᑴᒋᒫᒡ ᑲᑭᓇ: ᐊᐲ ᑳᑮᒫᒋᓂᔕᐅᓇᑰᑭᐸᓐ ᐌᑎ ᐅᑖᓈᕽ, ᑮᒫᒌᑑᓯᐌᑭᐸᓐ ᔔᓂᔮᐗᔥ, ᐸᔥᑴᐗᔥ ᑲᔦ, ᐃᓂ ᑲᔦ ᒪᑭᓯᓇᓐ, ᑫᑰᓐ ᐃᓇ ᑭᑮᓅᑌᓭᒻ? ᑳᐐᓐ ᑫᑰᓐ ᓂᑮᓅᑌᓭᓰᒥᓐ, ᐅᑮᐃᑰᐞ᙮ 36 ᒦᑕᔥ ᑳᐃᓈᒡ: ᓅᑯᒻ ᐃᑕᔥ ᐊᐌᓀᓐ ᐃᑯ ᐁᔮᑴᓐ ᔔᓂᔮᐗᔥ, ᑯᒫ ᑲᔦ ᐸᔥᑴᐗᔥ ᐱᓵᓐ ᐅᑲ ᒫᒌᑑᓐ᙮ ᐊᐌᓀᓐ ᐃᑕᔥ ᐃᑯ ᐁᔮᓯᒃ ᐸᔑᐸᐃᑫᐎᑯᒫᓐ, ᐅᑲ ᐊᑖᐙᑫᓐ ᐅᑲᔥᑮᑮᐎᓐ ᒋᐊᑖᐌᒡ ᐸᔑᐸᐃᑫᐎᑯᒫᓐ᙮ 37 ᒦᑕᔥ ᐁᔑᐲᐃᑳᑌᒃ: ᑫᐐᓐ ᐄᑐᒃ ᑮᐃᓇᑭᑎᓱ ᐁᐐᒌᐙᒡ ᐅᒪᒋᑑᑕᒨᐞ᙮ ᒦᔥ ᐁᔑ ᐐᑕᒪᐎᓇᑰᒃ ᓃᓐ ᐃᐃ ᑳᑕᔑᒥᑰᔮᓐ ᒋᑎᐱᓭᒃ᙮ ᐃᐃ ᓴ ᑌᐺ ᑳᔑ ᑕᔑᒥᑰᔮᓐ ᒦ ᐃ ᐋᓴ ᒋᒨᔥᑭᓀᓭᒃ᙮ 38 ᒦᑕᔥ ᑳᐃᑯᒡ ᐅᑭᑭᓄᐊᒪᐙᑲᓇᐞ: ᑌᐯᒋᑫᔭᓐ, ᐃᓇᔥᑫ ᐲᓈᐱᓐ᙮ ᐃᓇ ᐅᓄ ᓃᔑᓐ ᐸᔑᐸᐃᑫᐎᑯᒫᓇᓐ, ᐅᑮᐃᑰᐞ᙮ ᒦ ᐃ ᑌᒥᓂᒃ, ᑮᐃᑭᑐ᙮ ᒋᓴᔅ ᑮᑕᔑᐊᓇᒥᐋᒡ ᑳᔑ ᐃᔥᐸᑎᓈᓂᒃ ᐋᓬᐃᑉ ᑭᑎᑳᓈᑎᑯᑳᕽ (Matthew 26.36-46; Mark 14.32-42) 39 ᒋᓴᔅ ᑕᔥ ᑮᐊᓂ ᒫᒑ ᐁᑮᐃᔖᒡ ᑳᑮᓂᑖ ᐃᔖᐙᒡ ᑳᔑ ᐃᔥᐸᑎᓈᓂᒃ ᐋᓬᐃᑉ Olive ᑭᑎᑳᓈᑎᑯᑳᕽ, ᐅᑭᑭᓄᐊᒪᐙᑲᓇᐞ ᐁᐐᒌᐎᑯᒡ᙮ 40 ᐊᐲ ᐌᑎ ᑳᑕᑯᔑᕽ ᑳᑮᓂᑖ ᐃᔖᐙᒡ, ᐅᐅ ᐅᑮᐃᓈᐞ ᐅᑭᑭᓄᐊᒪᐙᑲᓇᐞ: ᐊᓇᒥᐋᒃ ᒋᓈᓯᑳᑯᓯᐌᒃ ᑲᑴᒋᐃᑰᐎᓐ᙮ 41 ᒦᑕᔥ ᐐᓐ ᑫᔮᐱ ᐊᐗᔑᒣ ᑮᐊᓂ ᒫᒑ ᐁᑮᓇᑲᓈᒡ ᐅᑭᑭᓄᐊᒪᐙᑲᓇᐞ᙮ ᐁᑯ ᑌᐱ ᐌᐱᓂᑳᓂᐗᕽ ᒥᓂᒃ ᑮᐃᔖ, ᐁᑮᐅᒋᒌᑾᓇᐱᑖᒡ ᐁᑮᐊᓇᒥᐋᒡ: 42 ᓅᔅ, ᑮᔥᐱᓐ ᓴ ᐃᔑᓈᑾᑭᐸᓐ, ᑕᑲ ᐅᑖᐱᓇᒪᐎᔑᓐ ᐅᐅ ᒥᓂᒀᑲᓐ ᑳᐐᐃᔑ ᑲᒀᑕᑭᑑᔮᓐ᙮ ᑳᐐᓐ ᓴ ᓃᓐ ᐁᔑ ᒥᓴᐌᑕᒫᓐ, ᑮᓐ ᓴ ᐁᔑ ᐊᑕᐌᑕᒪᓐ ᑕᐃᔑᒋᑳᓂᐗᓐ, ᑮᐃᑭᑐ᙮ 43 ᐁᒐᓬᐊᐗᓐ ᑕᔥ ᑭᒋᑮᔑᑯᕽ ᐅᑮᐱ ᐅᒋ ᓈᓯᑳᑰᓐ ᐁᒦᓂᑯᒡ ᓰᑐᓂᑰᐎ ᒪᔥᑲᐎᓰᐎᓐ᙮ 44 ᐐᑫ ᓴ ᑮᑭᒋ ᐐᓴᑫᑕᒻ ᐁᑮᐊᓇᒥᐋᒡ ᑌᐺ ᐱᑯ, ᒦᔥ ᐅᑖᐺᓱᐎᓐ ᑳᑮ ᐱᒫᔑᑲᐎᓂᓂᒃ ᑖᐱᔥᑰ ᒥᔅᑶ ᑳᐸᑭᑲᐎᕽ ᐊᑮᑳᕽ᙮ 45 ᑮᐸᓯᑸ ᑕᔥ ᑳᐃᔥᒀ ᐊᓇᒥᐋᒡ ᐁᑮᐃᔖᒡ ᐁᔑ ᐊᔮᓂᒡ ᐅᑭᑭᓄᐊᒪᐙᑲᓇᐞ᙮ ᐅᑮᐅᑎᓵᐞ ᐁᓂᐹᓂᒡ, ᐋᓃᔥ ᑮᐊᔦᑯᓯᐗᐞ ᑳᐊᐲᒋ ᒥᒋᓇᐌᓯᓂᒡ᙮ 46 ᒦᔥ ᑳᐃᓈᒡ: ᐌᑯᓀᓐ ᐌᒋ ᓂᐹᔦᒃ? ᐗᓂᔥᑳᒃ, ᐊᓇᒥᐋᒃ ᒋᓈᓯᑳᑯᓯᐌᒃ ᑲᑴᒋᐃᑰᐎᓐ᙮ ᒋᓴᔅ ᑮᑕᑯᓂᓐᒡ (Matthew 26.47-56; Mark 14.43-50; John 18.3-11) 47 ᒣᒀ ᑕᔥ ᒋᓴᔅ ᐁᑲᑮᑭᑐᒡ, ᑮᐱᐅᒋ ᑕᑯᔑᓅᐞ ᐁᐹᑏᓄᓂᒡ ᐊᐎᔭᐞ ᒎᑕᔅ Judas ᐁᔑᓂᑳᓱᓂᒡ ᐯᔑᒃ ᑳᑮᒥᑖᔑ ᓃᔑᓂᒡ ᐅᑭᑭᓄᐊᒪᐙᑲᓇᓐ ᐁᑮ ᐲᓈᓂᒡ᙮ ᒦᐗᓐ ᑕᔥ ᐃᓂ ᒋᓴᔅ ᑳᑮᐅᒌᒥᑯᒡ᙮ 48 ᒦᑕᔥ ᒋᓴᔅ ᑳᐃᓈᒡ: ᒎᑕᔅ, ᑭᑑᒌᒥᒫᓐ ᐃᓇ ᐃᓂᓂ ᐅᑯᓯᓴᓐ ᒋᒪᒥᔑᐃᒪᒡ? 49 ᐊᐲ ᑕᔥ ᑭᑭᓄᐊᒪᐙᑲᓇᒃ ᐁᐙᐸᑕᒧᐙᒡ ᐋᓃᓐ ᐙᐃᔑᓭᓂᒃ ᒦ ᐃ ᑳᐃᑭᑐᐙᒡ: ᑌᐯᒋᑫᔭᓐ, ᓂᐸᔑᐸᐃᑫᐎᑯᒫᓂᓈᓂᓐ ᐃᓇ ᓂᑲ ᐋᐸᒋᑑᒥᓐ ᒋᒦᑳᓱᔮᕽ᙮ 50 ᐯᔑᒃ ᑕᔥ ᒋᓴᔅ ᐅᑭᑭᓄᐊᒪᐙᑲᓇᓐ ᐅᑮ ᐸᑭᑌᐙᓂ ᐃᓂ ᐯᔑᒃ ᐅᑕᓄᑮᐋᑲᓂᓂ ᐃᓂ ᒫᐗᒡ ᑭᒋᐊᓇᒥᐁᐎᑭᒫᓐ, ᒦᑕᔥ ᐁᑮ ᑮᔥᑭ ᐌᐸᑲᓈᑕᒪᐙᒡ ᐅᑕᐗᑳᓂ᙮ 51 ᒋᓴᔅ ᑕᔥ ᑮᐃᑭᑐ: ᒦ ᐃ ᒥᓂᒃ! ᒦᔥ ᑳᐃᔑ ᓵᒥᓈᒡ ᐅᑕᐗᑳᓃᕽ ᐃᓂ ᐊᓄᑮᐋᑲᓇᓐ ᐁᑮᒥᓍᒋᐋᒡ᙮ 52 ᒦᑕᔥ ᒋᓴᔅ ᑳᐃᓈᒡ ᑭᒋᐊᓇᒥᐁᐎᑭᒫᐞ, ᐃᐃ ᑲᔦ ᑫᓇᐌᑕᒥᓂᒡ ᑭᒋᐊᓇᒥᐁᐎᑲᒥᒃ, ᐃᐃ ᑕᔥ ᑲᔦ ᑳᓃᑳᓀᑖᑯᓯᓂᒡ ᑳᑮᐱ ᓈᓯᑳᑯᒡ: ᓃᓐ ᐃᓇ ᐅᑮᒨᒋᔥᒃ, ᐁᐲᔖᔦᒃ ᐁᐱ ᑭᑮᔦᒃ ᐸᔑᐸᐃᑫᐎᑯᒫᓇᓐ, ᐃᓂ ᑲᔦ ᐸᑭᑌᐃᑲᓈᑎᑰᓐ? 53 ᐁᑕᓱ ᑮᔑᒃ ᐄᑐᒃ ᑭᑮᐐᒌᐎᓂᓂᒻ ᑭᒋᐊᓇᒥᐁᐎᑲᒥᑯᕽ, ᑳᐐᓐ ᑕᔥ ᑭᑮ ᐸᐹᒣᓂᒥᓰᒻ᙮ ᒦᑕᔥ ᐅᐅᐌ ᑮᓇᐙ ᑭᑎᐸᐃᑲᓂᐙ, ᐊᐲ ᑳᑲᔥᑮ ᑎᐱᑲᒃ ᑮᒫᒌ ᑎᐯᒋᑫᒪᑲᒃ᙮ ᐲᑕᕒ ᑮ ᐃᑭᑐᒡ ᐁᑭᑫᓂᒫᓯᒃ ᒋᓴᓲᓐ (Matthew 26.57-58,69-75; Mark 14.53-54,66-72; John 18.12-18,25-27) 54 ᒦᔥ ᑳᑮᐅᑖᐱᓈᐙᒡ ᒋᓴᓲᓐ ᐁᑮᐃᔑᐎᓈᐙᒡ ᐅᐙᑳᐃᑲᓂᓃᕽ ᒫᐗᒡ ᑭᒋᐊᓇᒥᐁᐎᑭᒫᓐ᙮ ᐲᑕᕒ Peter ᑕᔥ ᓇᐗᒡ ᐃᑯ ᐙᓴ ᐅᑖᓈᕽ ᑮᐅᒋ ᐱᒥᓂᔕᐃᑫ᙮ 55 ᐊᑾᒌᕽ ᑕᔥ ᑮᐴᑕᐌᐗᐞ ᒫᐗᒡ ᑭᒋᐊᓇᒥᐁᐎᑭᒫᓐ ᐅᐙᑳᐃᑲᓂᓃᕽ ᓈᐗᔭᐄ ᑳᔑ ᐙᑳ ᒣᓂᑲᓈᑰᓂᑳᑌᓂᒃ ᐁᑮᐙᑳᓇᐱᓂᒡ᙮ ᒦᔥ ᑫᐐᓐ ᐃᐃᒫ ᐲᑕᕒ ᑳᑕᑾᐱᒡ᙮ 56 ᐯᔑᒃ ᑕᔥ ᐃᓂ ᐅᔥᑭᓃᑭᑴᐎ ᐊᓄᑮᐋᑲᓇᓐ ᐅᑮᐙᐸᒥᑰᓐ ᐃᐃᒫ ᐁᓇᒪᑕᐱᒡ ᒌᑭᔥᑯᑌ᙮ ᐌᐌᓂ ᐅᑮ ᑲᓇᐙᐸᒥᑰᓐ ᒦᔥ ᑳᐃᑭᑐᓂᒡ: ᐗᐊ ᓴ ᐃᓂᓂ ᑫᐐᓐ ᐅᑮᐐᒌᐙᓐ ᒋᓴᓲᓐ᙮ 57 ᐲᑕᕒ ᑕᔥ ᑮᐋᓉᑕᒻ: ᐃᑴ, ᑳᐐᓐ ᐅᔕ ᓂᑭᑫᓂᒫᓰ, ᐅᑮᐃᓈᓐ᙮ 58 ᓈᓈᑫ ᑕᔥ ᐁᐊᓂ ᐃᔑᓭᒃ ᐃᓂᓂᐗᓐ ᐲᑕᕒ Peter ᐅᑮᐙᐸᒥᑰᓐ ᐁᑮᐃᑯᒡ: ᑫᑮᓐ ᐄᑐᒃ ᐯᔑᒃ ᑳᑎᓄᐎᔭᓐ᙮ ᒦᔥ ᐲᑕᕒ ᑳᐃᓈᒡ: ᐃᓂᓂ, ᑳᐐᓐ ᓃᓐ ᓂᑖᐎᓰ! 59 ᓈᓈᑫ ᑕᔥ ᐯᔑᑯ ᑎᐸᐃᑲᓐ ᐁᐃᔑᓭᓂᒃ ᑯᑕᒃ ᐃᓂᓂᐗᓐ ᑮᑲᑴ ᑌᐺᐗᓐ ᐁᑮᐃᑭᑐᓂᒡ: ᐗᐊ ᓴ ᐃᓂᓂ ᑫᐐᓐ ᐅᑮᐐᒌᐙᓐ ᒋᓴᓲᓐ, ᑫᐐᓐ ᐄᑐᒃ ᑳᓬᐊᓬᐄᐎᓂᓃᐎ Galilean! 60 ᒦᑕᔥ ᑳᐃᔑ ᓇᑴᑕᐙᒡ: ᑳᐐᓐ ᑲᓇᑫ ᓂᑭᑫᑕᓰᓐ ᐃᐃ ᑳᑕᔑᑕᒪᓐ᙮ ᒣᒀ ᑕᔥ ᐁᑮᑭᑐᒡ, ᐋᐯ ᐋᐸᑲᐋᒀᓇᓐ ᑮᐅᒋ ᓅᑖᑯᓯᐗᓐ᙮ 61 ᑳᑎᐯᒋᑫᒡ ᑮᑴᑭᑳᐸᐎ ᐁᑮ ᑲᓇᐙᐸᒫᒡ ᐱᑦᑕᕒᐆᓐ᙮ ᒦᑕᔥ ᐲᑕᕒ ᑳᑮᒫᒥᑲᐎᒡ ᑳᑮᐃᑯᒡ ᑳᑎᐯᒋᑫᓂᒡ: ᒋᑆ ᓅᑖᑯᓯᒡ ᓈᐯ ᐊᐹᑲᐋᒀᓐ ᓅᑯᒻ ᑳᑎᐱᑲᒃ, ᒦ ᐃ ᐋᔕ ᓂᓯᕽ 3 ᒋᐃᑭᑐᔭᓐ ᐁᑭᑫᓂᒥᓯᐗᓐ᙮ 62 ᐲᑕᕒ ᑕᔥ ᑮᓵᑲᐊᒻ ᐁᑮᐊᐎ ᐐᓴᑲᑌᒧᒡ᙮ ᒋᓴᔅ ᑮᒫᓀᓂᒥᓐᒡ ᑲᔦ ᑕᔥ ᑮᐸᐸᔕᔐᐅᓐᒡ (Matthew 26.67-68; Mark 14.65) 63 ᐃᑭ ᑕᔥ ᐃᓂᓂᐗᒃ ᑳᑮ ᑲᓇᐌᓂᒫᐙᒡ ᒋᓴᓲᓐ ᐅᑮᒫᒌ ᒦᑭᓱᒫᐙᓐ ᑲᔦ ᑕᔥ ᐁᑮ ᐸᐸᑭᑌᐙᐙᒡ᙮ 64 ᐅᑮᐋᑲᐙᐸᐱᓈᐙᓐ ᐁᑮ ᑲᑴᒋᒫᐙᒡ: ᐊᑕᑭᑫᑕᓐ, ᐐᑕᒪᐎᔑᓈᒻ ᐊᐌᓀᓐ ᑳᐸᑭᑌᐅᒃ᙮ 65 ᓃᐱᐗᐞ ᑲᔦ ᑯᑕᒃ ᑫᑰᓇᓐ ᐅᑮᐊᔨᓈᐙᓐ ᐁᑮᒫᓀᓂᒫᐙᒡ᙮ ᒋᓴᔅ ᑮᐅᒋᔥᑲᐎᑳᐸᐎᑕᐙᒡ ᐅᓇᔓᐌᐎᓂᓂᐗᓐ (Matthew 26.59-66; Mark 14.55-64; John 18.19-24) 66 ᐊᐲ ᐁᐊᓂ ᑭᔐᐹᐗᑲᓂᓂᒃ ᑳᓃᑳᓂᓯᐙᒡ ᐅᓇᔓᐌᐎᓂᕽ, ᑭᒋᐊᓇᒥᐁᐎᑭᒫᒃ ᑲᔦ, ᐃᑭ ᑲᔦ ᑳᑭᑭᓄᐊᒫᑫᐙᒡ ᐅᓇᔓᐌᐎᓐ ᑮᒫᒪᐎ ᓇᑭᔥᑯᑖᑎᐗᒃ᙮ ᒋᓴᔅ ᑕᔥ ᑫᐐᓐ ᐃᐃᒫ ᑮᐲᒋᑲᓂᐎ ᒋᐅᒋᔥᑲᐎ ᑳᐸᐎᑕᐙᒡ ᑳᓂᑖ ᐅᓈᑯᓂᑫᓂᒡ᙮ 67 ᒦᔥ ᑳᐃᓈᐙᒡ: ᐐᑕᒪᐎᔑᓈᒻ, ᑮᓐ ᐃᓇ ᑭᔐᒪᓂᑑ ᑳᑮᐅᓈᐸᒫᒡ ᒋᐱᒫᒋᐃᐌᓂᒡ? ᒦᑕᔥ ᑳᐃᔑ ᓇᑴᑕᐙᒡ: ᑮᔥᐱᓐ ᐋᓇ ᐐᑕᒪᐎᓇᑰᒃ, ᑳᐐᓐ ᑭᑖ ᑌᐺᑕᐎᓰᒻ᙮ 68 ᑲᑴᒋᒥᓇᑰᒃ ᑲᔦ ᑫᑰᓐ ᑳᐐᓐ ᑭᑖ ᓇᑴᑕᐎᓰᒻ᙮ 69 ᐅᐅ ᑕᔥ ᐃᔑᐊᐲ ᒦ ᐃ ᒋᒫᒋᓭᒃ ᐃᓂᓂ ᐅᑯᓯᓴᓐ ᒋᐊᐱᓂᒡ ᐅᑭᒋᓂᑭᓃᕽ ᐃᓇᑫ ᑳᑭᒋ ᐃᓀᑖᑯᓯᓂᒡ ᑭᔐᒪᓂᑑᓐ, ᒋᓴᔅ ᑮᐃᑭᑐ᙮ 70 ᒦᔥ ᑲᑭᓇ ᑳᐃᑭᑐᓂᒡ: ᑮᓐ ᐃᓇ ᑕᔥ ᑭᔐᒪᓂᑑ ᐅᑯᓯᓴᓐ? ᐅᐅ ᑕᔥ ᑮᐃᔑ ᓇᑴᑕᒻ: ᒦ ᐃ ᐁᑭᑐᔦᒃ ᓃᓐ ᐁᐋᐎᔮᓐ᙮ 71 ᒦᑕᔥ ᑳᐃᑭᑐᓂᒡ: ᑳᐐᓐ ᐊᐎᔭᓐ ᐊᐗᔑᒣ ᐅᑖ ᑎᐹᒋᒥᑯᓰᓐ ᐋᓃᔥ ᑮᓇᐎᓐᑦ ᐃᑯ ᑭᓅᑕᐙᓈᓐ ᐋᓃᓐ ᐃᐃᐌᓂ ᑳᐃᑭᑐᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society