ᒫᓀᑕᒧᐎᓐ 1 - ᐅᒋᐺ ᑭᒋᒪᓯᓇᐃᑲᓐᑭᒋᐆᑌᓇ ᒉᕒᐆᓴᓬᐊᒻ ᐁᑕᔑᑌᒃ ᐋᓃᓐ ᑳᑮᐃᔑᐗᓯᑖᐎᓭᒃ 1 ᐐᑫ ᓴ ᓰᐱᔅᑳᑌᑖᑾᓐ ᑭᒋ ᐆᑌᓇ ᒉᕒᐆᓴᓬᐊᒻ ᐁᐱᔑᔑᒀᒃ᙮ ᐋᐱᑎᕽ ᐐᑫ ᐁᑮ ᒨᔥᑭᓀᐙᒡ ᐯᒫᑎᓯᐙᒡ ᐃᐃᒫ, ᒫᐗᒡ ᐁᑮ ᑭᑌᑖᑾᑭᐸᓐ, ᓅᑯᒻ ᑕᔥ ᑖᐱᔥᑰ ᑮᐙᒋᑴᕽ ᐁᐃᓀᑖᑾᒃ᙮ ᒫᐗᒡ ᐁᓃᑳᓀᑖᑾᑭᐸᓐ, ᓅᑯᒻ ᑕᔥ ᑕᑯᓂᑲᓂᕽ ᐁᐃᓀᑖᑾᒃ᙮ 2 ᑲᐯᑎᐱᒃ ᐁᒪᐎᒡ, ᐁᐐᓴᑫᑕᕽ; ᐅᓯᐲᒀᓇᓐ ᐁᐱᒥᒋᐗᓂᓂᑭᓐ ᐅᐗᓄᐎᕽ! ᐃᐃ ᓴ ᑯ ᑲᑭᓇ ᐁᑕᔑᓂᒡ ᑳᑮ ᓵᑭᐃᑯᒡ, ᑳᐐᓐ ᑲᓇᑫ ᐊᐎᔭᓐ ᐯᔑᒃ ᒋᐐ ᑲᑴ ᒥᓉᑕᒧᐃᑯᒡ᙮ ᑲᑭᓇ ᓴ ᐅᐐᒌᐙᑲᓇᐞ ᐅᑮ ᑲᔦᔑᐃᑰᐞ; ᒦᔥ ᓅᑯᒻ ᑳᐅᒋ ᔒᑫᓂᒥᑯᒡ᙮ 3 ᒎᑕ ᐊᑮᕽ ᐯᒫᑎᓯᐙᒡ ᑳᐅᒌᐙᒡ ᓴ ᑳᐐᓐ ᑫᑰᓐ ᐅᑎᔑ ᑲᔥᑭᑑᓰᓈᐙ ᒋᔑ ᓈᑕᒫᓱᐙᒡ ᑳᐃᔑ ᑲᒀᑕᑭ ᒥᑕᓄᑮᐃᑣ᙮ ᐯᐸᑳᓐ ᐊᑮᕽ ᐁᑮ ᐃᔑᐎᓂᑣ, ᑳᐐᓐ ᓂᑯᒋ ᐃᔑᑖᓰᐗᒃ, ᒥᓯᐌ ᓴ ᑳᔒᑫᓂᒥᑯᐙᒡ ᐅᐙᑳᔥᑳᑯᐙᐞ, ᑳᐐᓐ ᒋᑲᔥᑭᑑᐙᒡ ᒋᑕᐸᓰᐙᒡ᙮ 4 ᑳᐐᓐ ᓴ ᐊᐎᔭ ᐊᐗᔑᒣ ᐲᔖᓰ ᑭᒋ ᐊᓇᒥᐁᐎᑲᒥᑯᕽ ᓅᑯᒻ ᒋᐱ ᐊᓇᒥᐋᒡ ᑮᐐᑾᑏᐗᑲᒥᑭᓯᕽ᙮ ᑳᐐᓐ ᑲᓇᑫ ᐊᐎᔭ ᒋᐱ ᐲᑎᑫᒡ ᑭᒋ ᐃᔥᒀᑌᒥᑳᕽ, ᓵᔭᓐ ᐁᑲᒀᑕᑫᑕᒨᒪᑲᒃ᙮ ᐃᑭ ᓴ ᐃᑴᐗᒃ ᑳᓂᑖ ᓂᑲᒧᐙᐸᓐ ᐃᐃᒫ ᒫᓀᑕᒧᒃ᙮ ᐊᓇᒥᐁᐎᑭᒫᒃ ᑲᔦ ᒥᒋ ᒨᑯᓀᐗᒃ᙮ 5 ᒦᑕᔥ ᓅᑯᒻ ᑳᔒᑫᓂᒥᑯᒡ ᐊᐊ ᑭᒋ ᐆᑌᓇ ᒉᕒᐆᓴᓬᐊᒻ ᐐᑫ ᐅᑎᐯᓂᒥᑰᐞ, ᐁᑮ ᔖᑰᒋᐃᑯᒡ᙮ ᑳᑎᐯᒋᑫᓂᒡ ᐅᔕ ᑳᑑᑖᑯᒡ ᑳᐅᒋ ᑲᒀᑕᑭᑑᒡ ᐅᓵᒻ ᐋᓃᔥ ᐹᑏᓇᑎᓂᓂᐗᓐ ᐅᒪᒋᑑᑕᒧᐎᓇᓐ᙮ ᑲᑭᓇ ᓴ ᐅᐱᒫᑎᓰᒪᐞ ᐃᐃᒫ ᐌᒌᓂᒡ ᑮᒫᒌᒋᑲᓂᐎᐗᐞ᙮ 6 ᐃᐃ ᓴ ᐁᔑ ᑭᒋ ᐃᓀᑖᑾᑭᐸᓐ ᒉᕒᐆᓴᓬᐊᒻ ᑳᐐᓐ ᑲᓇᑫ ᒋᑭᑫᑖᑾᒃ᙮ ᑳᑮ ᓃᑳᓂᓯᓂᒡ ᐅᑎᓂᓃᒪᐞ ᓴ ᐃᓀᑖᑯᓯᐗᐞ ᑖᐱᔥᑰ ᐙᐙᔥᑫᔑᐗᐞ ᑳᒪᑎᓯᓂᒡ ᑳᓅᑌᔅᑲᑌᓂᒡ᙮ ᒦ ᐃ ᐁᔑᓈᑯᓯᓂᒡ ᑳᓅᑌ ᒑᑮᓂᒡ ᐙᐙᔥᑫᔑᐗᐞ ᐅᓇᑕᐌᒋᑫᐞ ᑳᐱᒥᓂᔕᐅᑯᓂᒡ᙮ 7 ᓅᑯᒻ ᐃᑕᔥ ᒉᕒᐆᓴᓬᐊᒻ ᓂᔑᑫ ᓇᓇᐎᔑᓐ, ᐁᐃᔑ ᓈᓈᑲᑕᐌᑕᒨᒪᑲᒃ ᐅᑖᓈᕽ ᑳᑮ ᐃᔑ ᒥᓄᓈᑾᑭᐸᓐ᙮ ᐊᐲ ᓴ ᒉᕒᐆᓴᓬᐊᒻ ᐅᐱᒫᑎᓰᒪᐞ ᑮᔖᑰᒋᒋᑲᓂᐎᓂᒡ, ᑳᐐᓐ ᓴ ᐊᐎᔭᓐ ᑮᐊᔮᓰᐗᓐ ᑫᓈᑕᒫᑯᒡ᙮ ᑳᑮ ᔖᑰᒋᐃᑯᒡ ᐅᑮ ᐹᐱᐃᑰᐞ ᐊᐲ ᑮᓃᓯᓭᒡ᙮ 8 ᒉᕒᐆᓴᓬᐊᒻ ᐐᑫ ᓴ ᑮᑭᒋ ᒪᒋᑑᑕᒻ, ᐐᑫ ᑲᔦ ᑮᐐᓂᐃᑎᓱ᙮ ᒦᔥ ᑳᔑ ᑭᑌᑖᑯᓯᐸᓐ ᑳᐅᒋ ᑭᑫᑖᑾᓯᓂᓂᒃ᙮ ᑲᑭᓇ ᓴ ᑳᑮ ᑭᑌᓂᒥᑯᐸᓐ ᐅᑖᓇᐌᓂᒥᑰᐞ᙮ ᒦᔥ ᐁᔑᓈᑯᓯᒡ ᑫᑰᓐ ᐁᑭᑭᔥᑲᓯᒃ, ᐁᐊᑲᒋᐃᑎᓱᒡ ᑲᔦ᙮ ᒦᔥ ᐌᒋ ᒨᑯᓀᒡ, ᒦ ᑲᔦ ᐃ ᐌᒋ ᐊᑲᒋᐃᑎᓱᒡ᙮ 9 ᐃᐃ ᓴ ᑳᔑ ᐐᓂᓈᑯᓯᒡ ᐐᑫ ᐯᑌᓈᑾᓂᓂ, ᔖᑰᒡ ᐃᑕᔥ ᑳᐐᓐ ᐅᐸᐹᐱᓯᔅᑫᑕᓰᓐ ᐋᓃᓐ ᑫᓂ ᐃᔑᓭᒡ᙮ ᐐᑫ ᓴ ᑮᑭᒋ ᔖᑰᒋᒋᑲᓂᐎ; ᑳᐐᓐ ᐊᐎᔭᓐ ᑮᐊᔮᓰᐗᓐ ᒋᑮ ᒥᓉᑕᒧᐃᑯᐸᓐ᙮ ᑳᔒᑫᓂᒥᑯᒡ ᐅᑮ ᔖᑰᒋᐃᑰᐞ, ᒦᔥ ᑳᐅᒋ ᔖᑯᐙᓈᒡ ᑳᑎᐯᒋᑫᓂᒡ᙮ 10 ᑳᔒᑫᓂᒥᑯᒡ ᓴ ᐅᑮ ᑮᒨᑎᒥᑰᐞ ᑲᑭᓇ ᑳᑮ ᐃᔑ ᐌᓅᑎᓯᐸᓐ᙮ ᐅᑮ ᐙᐸᒫᐞ ᐃᓴ ᐱᑯ ᑲᔦ ᐁᐲᑎᑫᓂᒡ ᑭᒋ ᐊᓇᒥᐁᐎᑲᒥᑯᕽ, ᑳᑎᐯᒋᑫᒡ ᐃᑕᔥ ᐁᑮ ᐅᒋᐋᓂᐸᓐ ᒋᐃᔖᓯᓂᑭᐸᓐ ᐃᐃ ᑳᒎᐎᐎᓯᓂᒃ ᐃᐃᒫ᙮ 11 ᑲᑭᓇ ᓴ ᐅᐱᒫᑎᓰᒪᐞ ᒨᑯᓀᐗᐞ ᐁᐸᐹ ᓇᓈᑕᐗᔅᑲᑌᓂᒡ; ᐁᔑ ᐌᓅᑎᓯᓂᒡ ᒣᔥᑾᒡ ᐁᒦᑭᐌᓂᒡ ᑫᐅᑖᑎᓯᓂᒡ᙮ ᒦᑕᔥ ᒉᕒᐆᓴᓬᐊᒻ ᐁᔑ ᔖᑯᐌᒡ, ᑌᐯᒋᑫᔭᓐ, ᑕᑲ ᑲᓇᐙᐸᒥᔑᓐ ᐅᐅ ᑳᔑ ᐗᓯᑖᐎᓭᔮᓐ᙮ 12 ᒦᑕᔥ ᑲᔦ ᐁᓂ ᐃᑭᑑᒪᑲᒃ ᒉᕒᐆᓴᓬᐊᒻ, ᐁᑲᓅᓈᒡ ᑳᒪᔮᔥᑳᑯᒡ, ᐃᓇᔥᑫ ᑲᓇᐙᐸᒥᔑᒃ! ᑳᐐᓐ ᐅᔕ ᐊᐎᔭ ᐐᑳ ᐊᐲᒋ ᐐᓴᑫᑕᓰ ᑖᐱᔥᑰ ᑳᐊᐲᒋ ᐐᓴᑫᑕᒫᓐ, ᑳᑎᐯᒋᑫᒡ ᐅᔕ ᐃ ᑳᑑᑕᐎᒡ᙮ ᐐᓐ ᐄᑐᒃ ᐅᐅ ᐃᔑ ᐊᐲ ᓂᔥᑳᑎᓯ᙮ 13 ᐌᑎ ᑕᔥ ᐃᔥᐱᒥᕽ ᐅᐱᐅᒋ ᐃᔑᓂᔕᐋᓐ ᐃᔥᑯᑌᓂ, ᒦᔥ ᐃᐃᐌ ᑳᒑᑭᓱᑯᔮᓐ ᐲᒐᔭᐄ᙮ ᐅᑮ ᑕᔗᑭᔑᒫᓐ ᐃᓴ ᐊᓴᐲᓐ ᒋᐱᓱᑫᔑᓄᐗᒃ, ᒦᔥ ᑳᑮ ᑲᐎᓭᐗᒃ᙮ ᓂᑮ ᑑᑖᒃ ᐃᓴ ᒋᐲᑯᓈᑯᓯᐗᒃ, ᒨᔕᒃ ᐃᑯ ᒋᐐᓴᑫᑕᒧᐗᒃ ᐁᑮ ᑑᑕᐎᒡ᙮ 14 ᐅᑮ ᒫᒪᐎᓈᓇᓐ ᓴ ᓂᒪᒋᑑᑕᒧᐎᓇᓐ, ᒦᔥ ᑳᐃᔑ ᒫᐗᑑᐱᑑᒡ᙮ ᓂᑴᑲᓂᕽ ᐁᑮ ᐃᔑ ᐊᑾᐱᑑᒡ, ᒦᑕᔥ ᐃᐃ ᑳᒑᑮᐃᑯᔮᓐ ᐅᓵᒻ ᐁᑯᓯᑾᑭᓐ᙮ ᓂᑮ ᐃᔑ ᐸᑭᑎᓂᒃ ᐁᔑᐊᔮᓂᒡ ᑳᔒᑫᓂᒥᒥᒡ, ᑳᐐᓐ ᑕᔥ ᓂᑮ ᑲᔥᑭᑑᓰᓐ ᑫᑰᓐ ᒋᔑ ᓈᑕᒫᓱᔮᓐ᙮ 15 ᑳᑎᐯᒋᑫᒡ ᓴ ᐅᑮ ᐹᐱᐋᐞ ᓂᔑᒫᑲᓂᔒᒪᐞ ᒣᔥᑲᐎᓰᓂᒡ; ᒦᔥ ᑳᐃᔑ ᐃᔑᓂᔕᐙᒡ ᑯᑕᒃ ᔑᒫᑲᓂᔕᐞ ᑫᔖᑰᒋᐋᓂᒡ ᓂᑑᔥᑭᓃᑮᒪᐞ᙮ ᒎᑕ ᓴ ᐁᑮ ᐃᓀᑖᑯᓯᐙᒡ ᐯᑭ ᐅᔥᑭᓃᑭᑴᕽ᙮ ᑳᑎᐯᒋᑫᓂᒡ ᐅᑮ ᐸᑭᑎᓂᑯᐙᓐ ᐃᑕᔥ ᐱᓵᓐ ᒋᔑᑯᔥᑲᐎᑣ ᑖᐱᔥᑰ ᔔᒥᓇᒃ ᑳᑑᑕᐎᑣ᙮ 16 ᒦᑕᔥ ᐃᐃ ᒨᔕᒃ ᑳᐅᒋ ᒪᐎᔮᓐ, ᑳᐅᒋ ᐱᒫᔑᑲᐎᓯᐲᑴᔮᓐ ᑲᔦ᙮ ᑳᐐᓐ ᓴ ᐊᐎᔭ ᐊᔮᓰ ᑫᒥᓉᑕᒧᐃᐸᓐ, ᑳᐐᓐ ᑲᔦ ᓂᑎᑯᓰ ᒋᒪᔥᑲᐌᑕᒧᐗᒃ᙮ ᑳᔒᑫᓂᒥᐙᒡ ᓴ ᓂᑮ ᔖᑰᒋᐃᑰᒃ, ᓂᐱᒫᑎᓰᒪᒃ ᓴ ᑕᔥ ᐐᑫ ᑰᐹᒋᓭᐗᒃ᙮ 17 ᓂᑖᓇᑮ ᓃᒥᓂᑫᓐ ᐅᔕ, ᑳᐐᓐ ᑕᔥ ᐊᐎᔭ ᑲᓇᑫ ᓂᑮ ᐐᒋᐃᑯᓰ᙮ ᑳᑎᐯᒋᑫᒡ ᑕᔥ ᐅᑮ ᑲᓅᓈᐞ ᑳᔒᑫᓂᒥᒥᒡ ᒥᓯᐌ ᒋᐅᒋ ᐙᑳᔥᑲᐎᒥᒡ; ᒦ ᓴ ᐃ ᐁᑑᑕᐎᐙᒡ ᑖᐱᔥᑰ ᓅᒋᑯ ᑫᑰᓐ, ᑫᑰᓐ ᑳᐐᓇᑎᕽ᙮ 18 ᔖᑰᒡ ᑕᔥ ᑳᑎᐯᒋᑫᒡ ᑾᔭᒃ ᐃᔑᐊᔮ, ᓃᓐ ᐅᔕ ᑳᔕᔒᐱᑕᐗᒃ᙮ ᐯᒫᑎᓯᔦᒃ, ᒥᓯᐌ ᐁᔮᔦᒃ, ᑕᑲ ᐱᓯᑕᐎᔑᒃ᙮ ᐃᓇᔥᑫ ᑲᓇᐙᐸᒥᔑᒃ ᐅᐅ ᑳᔑ ᐐᓴᑫᑕᒫᓐ᙮ ᓂᑑᔥᑭᓃᑮᒪᒃ, ᓂᑑᔥᑭᓃᑭᑴᒪᒃ ᑲᔦ ᑮᒫᒌᒋᑲᓂᐎᐗᒃ ᐁᑕᑯᓂᑣ᙮ 19 ᓂᑖᓇᑮ ᑲᓅᓈᒃ ᓴ ᑳᓂᑖ ᓈᑕᒪᐎᐙᐸᓐ, ᑳᐐᓐ ᑕᔥ ᑮᐃᓀᑕᓰᐗᒃ ᒋᐐᒋᐃᐙᒡ᙮ ᐊᓇᒥᐁᐎᑭᒫᒃ, ᑳᓃᑳᓂᓯᐙᒡ ᑲᔦ ᑮᑕᔑ ᓂᐳᐗᒃ ᐁᔑ ᒪᒦᑲᓈᐗᓂᓂᒃ ᑭᒋ ᐆᑌᓈᕽ, ᐋᓇᑮ ᓇᓈᑕᐙᐸᑕᒧᐙᒡ ᑫᑰᓐ ᑫᒦᒋᐙᒡ ᐁᑮ ᑲᑴ ᐱᒫᒋᐃᑎᓱᐙᒡ᙮ 20 ᐆ ᑌᐯᒋᑫᔭᓐ, ᐃᓇᔥᑫ ᐙᐸᒥᔑᓐ ᐁᐲᒋ ᑲᒀᑕᑭᑑᔮᓐ ᐲᒐᔭᐄ ᓂᐱᒫᑎᓯᐎᓂᕽ᙮ ᐐᑫ ᐅᔕ ᓂᐲᑯᑌᐁ ᐁᐲᒋ ᒫᓀᑕᒧᐃᑯᔮᓐ ᓂᒪᒋᑑᑕᒧᐎᓇᓐ᙮ ᒥᓯᐌ ᐅᔕ ᐁᔑ ᒪᒦᑲᓈᐗᕽ ᐊᔮᒪᑲᓐ ᓂᔑᐌᐎᓐ, ᒥᓴᐙ ᑯ ᐲᑎᒃ ᐁᐊᔮᒃ ᓂᐳᐎᓐ᙮ 21 ᐯᒫᑎᓯᐙᒡ ᐅᔕ ᐅᓅᑖᓈᐙ ᐁᔑ ᑲᒀᑕᑭᑑᐗᒃ; ᑳᐐᓐ ᑕᔥ ᐊᐎᔭ ᐊᔮᓰ ᑫᒥᓉᑕᒧᐃᒡ᙮ ᑳᔒᑫᓂᒥᐙᒡ ᐅᔕ ᐁᑕᑕᐌ ᒥᓉᑕᒨᒃ ᐅᐅ ᑳᑮ ᐃᔑ ᒫᔑᓭᐃᔭᓐ᙮ ᑕᑲ ᐃᔑᑮᔑᑲᓄᑫᓐ ᑳᑮ ᐃᔑ ᐊᔓᑕᒫᑫᔭᓐ; ᒋᐃᔑᐊᑣ ᑳᔒᑫᓂᒥᐙᒡ ᑫᐐᓇᐙ ᒋᔑ ᑲᒀᑕᑭᑑᐙᒡ ᐅᐅ ᑳᔑ ᑲᒀᑕᑭᑑᔮᓐ᙮ 22 ᑑᑕᐤ ᐅᒪᒋᑑᑕᒧᐎᓂᐙᕽ ᒋᐅᒋ ᑲᒀᑕᑭᑑᐙᒡ; ᓇᓇᐊᔑ ᑫᐐᓇᐙ ᑳᑮ ᑑᑕᐎᔭᓐ ᓂᒪᒋᐃᔑᒋᑫᐎᓇᓐ ᐅᒋ᙮ ᒦ ᐅᔕ ᐃ ᑳᐅᒋ ᒨᑯᓀᔮᓐ ᐁᑲᒀᑕᑫᑕᒫᓐ, ᓂᑌᐃᕽ ᐐᑫ ᐁᓃᓇᒥᓯᔮᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society