ᐅᓈᑯᓂᑫᒃ 6 - ᐅᒋᐺ ᑭᒋᒪᓯᓇᐃᑲᓐᑮᑎᔭᓐ ᐁᑕᔑᓱᒡ 1 ᐋᔕ ᒦᓇ ᐃᔅᕒᐃᔭᓬᐊᒃ Israel ᑮᐃᔑᒋᑫᐗᒃ ᓅᒋᑯ ᐁᓈᓴᒦᓂᒡ ᑳᑎᐯᒋᑫᓂᒡ; ᒦᔥ ᑳᑮ ᐸᑭᑎᓈᓂᒡ ᒥᑎᔭᓐ Midianites ᑳᑎᓄᐎᓂᒡ ᒋᑎᐯᓂᒥᑯᓂᒡ ᓃᔣᓱ 7 ᐱᐴᓐ ᒥᓂᒃ᙮ 2 ᓇᐗᒡ ᓴ ᒥᑎᔭᓐ ᑳᑎᓄᐎᓂᒡ ᑮᒪᔥᑲᐌᑖᑯᓯᐗᐞ ᐊᐲᒡ ᐐᓐ ᐃᔅᕒᐃᔭᓬᐊᒃ᙮ ᒦᑕᔥ ᐃᔅᕒᐃᔭᓬᐊᒃ ᑳᑮ ᐅᒋ ᐅᔑᑕᒫᓱᐙᒡ ᐙᔕᓐ ᑫᐃᔑᑖᐙᒡ ᐁᔑ ᐸᐲᑾᑎᓈᓂᒃ, ᑳᔑ ᐗᐐᐹᐱᑳᓂᒃ ᑲᔦ ᑮᐃᔑ ᑳᓱᐗᒃ᙮ 3 ᐊᐲ ᓴ ᑯ ᐃᔅᕒᐃᔭᓬᐊᒃ ᑮᑭᑎᑫᐙᒡ, ᒥᑎᔭᓐ ᑳᑎᓄᐎᓂᒡ ᓴ ᑮᐲᔖᐗᐞ ᐁᑮ ᐱ ᐐᒌᐙᓂᒡ ᐊᒪᓬᐁᒃ ᑳᑎᓄᐎᓂᒡ Amalekites, ᐃᐃ ᑲᔦ ᑯᑕᒃ ᐊᐎᔭᐞ ᐙᐸᓄᕽ ᑳᑮ ᐅᒌᓂᒡ ᐁᑮ ᒦᑳᓂᑯᐙᒡ᙮ 4 ᒦᑕᔥ ᑲᔦ ᑳᐃᔑ ᑲᐯᔑᓂᒡ ᐃᐃᒫ ᐊᑮᕽ ᐁᑮ ᓂᔑᐗᓈᒋᑕᒫᑯᐙᒡ ᑳᑮ ᑭᑎᑳᑕᒧᐙᒡ ᐲᓂᔥ ᐌᑎ ᔖᐗᓄᕽ ᐃᓇᑫ ᐆᑌᓈᕽ ᑫᓴ Gaza ᐁᒋᑳᑌᓂᒃ᙮ ᐅᑮ ᒪᑲᒥᑯᐙᐞ ᑲᔦ ᑲᑭᓇ ᑳᑮ ᐊᔮᐙᐙᒡ ᒫᓇᒑᓂᔕᐞ, ᐱᔑᑭᐗᐞ, ᒫᔑ ᒥᑕᑎᒨᐞ ᑲᔦ᙮ ᑳᐐᓐ ᓴ ᑫᑰᓂ ᐅᑮ ᐃᔥᑯᓇᒫᑯᓰᐙᐞ ᑫᒦᒋᐙᒡ᙮ 5 ᑮᐲᔖᓂᒡ ᐃᓴ ᐅᑮ ᐲᓈᓂ ᐅᑕᐗᑳᓂᓂ, ᐁᑮ ᐲᑑᓂᒡ ᑲᔦ ᐅᐸᒀᓀᑲᒥᑯᓂ᙮ ᑖᐱᔥᑰ ᑕᔥ ᐸᐸᑭᓀᕽ ᑮᐊᐲᒋ ᐹᑏᓄᐗᐞ᙮ ᐃᓂᐌᓂᐗᐞ ᐯᒫᑎᓯᓂᒡ, ᐃᐃ ᑲᔦ ᐱᒀᐎᑲᓀ ᒥᑕᑎᒧᐞ, ᑳᐐᓐ ᐄᑐᒃ ᑮᑲᔥᑭᒋᑳᑌᓯᓂᓂ ᒋᐊᑭᒥᒥᓐᒡ ᑳᐊᐲᒋ ᐹᑏᓄᓂᒡ᙮ ᐗᐐᑫ ᓴ ᐱᑯ ᐅᑮ ᓂᔑᐗᓈᒋᑑᓂ ᐊᑮᓂ ᑮᐲᔖᓂᒡ᙮ 6 ᑳᐐᓐ ᓴ ᑫᑰᓐ ᐃᔅᕒᐃᔭᓬᐊᒃ ᐅᑮ ᑲᔥᑭᑑᓯᓈᐙ ᒋᐃᔑᒋᑫᐙᒡ ᐅᓵᒻ ᐁᑮ ᔖᑰᒋᐃᑯᐙᒡ ᒥᑎᔭᓐ ᑳᑎᓄᐎᓂᒡ᙮ ᒦᔥ ᐃᔅᕒᐃᔭᓬᐊᒃ ᑳᑮ ᔖᑯᐙᓈᐙᒡ ᑳᑎᐯᒋᑫᓂᒡ᙮ 7 ᒦ ᓴ ᐃ ᐯᒫᑎᓯᐙᒡ ᐃᔅᕒᐃᔭᓬᐊᒃ ᑳᑮ ᔖᑯᐙᓈᐙᒡ ᑳᑎᐯᒋᑫᓂᒡ ᒋᓈᑕᒫᑯᐙᒡ ᐃᐃ ᐅᒋ ᒥᑎᔭᓐ ᑳᑎᓄᐎᓂᒡ᙮ 8 ᒦᑕᔥ ᑳᑎᐯᒋᑫᒡ ᑳᑮ ᐃᔑᓂᔕᐙᒡ ᑳᑲᓅᑕᒫᑯᒡ ᐁᔑᐊᔮᓂᒡ ᐃᔅᕒᐃᔭᓬᐊᐞ ᐅᐅ ᒋᐃᑭᑑᑕᒫᑯᒡ, ᒦ ᓴ ᐁᑭᑐᒡ ᑳᑎᐯᒋᑫᒡ, ᑳᐅᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ, ᓃᓐ ᐅᔕ ᑳᑮ ᓵᑭᒋᐎᓂᓇᑰᒃ ᐌᑎ ᐄᒋᐸᑮᕽ Egypt, ᑳᑮ ᐃᔑ ᑲᒀᑕᑭ ᒥᑕᓄᑮᐃᑰᔦᑭᐸᓐ᙮ 9 ᑭᑮ ᔖᐾᐃᓂᓂᒻ ᑲᔦ ᑳᑮ ᐃᔑ ᑰᐹᒋᐃᓀᒀ ᐄᒋᐲᐎᓂᓂᐗᒃ, ᐃᑭ ᑲᔦ ᑲᑭᓇ ᐯᒫᑎᓯᐙᒡ ᑳᑮ ᒦᑳᓂᓀᒀ ᐅᐅᒫ ᐊᑮᕽ᙮ ᓂᑮ ᓵᑭᑖᒪᐙᒃ ᑲᔦ ᐁᑮ ᒦᓂᓇᑰᒃ ᐅᑕᑮᒥᐙ᙮ 10 ᑭᐐᑕᒪᐎᓂᓂᒻ ᐄᑐᒃ ᓃᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ; ᑫᑯ ᓴ ᑯᓯᒫᑫᒃ ᐅᒪᓂᑑᒥᐙᐞ ᐁᒧᕒᐄ ᑳᑎᓄᐎᐙᒡ Amorites ᑳᐐᒋᑖᒣᒀ ᐅᑕᑮᒥᐙᕽ᙮ ᑳᐐᓐ ᑕᔥ ᑭᑮ ᓇᐃᑕᐎᓰᒻ, ᑮᐃᑭᑐ᙮ 11 ᑳᑎᐯᒋᑫᒡ ᐃᑕᔥ ᐅᑌᒐᓬᐃᒪᓐ ᑮᐱ ᑕᑯᔑᓅᓐ ᐃᐃᒫ ᐆᑌᓈᕽ ᐅᐸᕒᐊ Ophrah ᑳᑮ ᐃᔑᑖᓂᐗᓂᓂᒃ ᐁᑮ ᐃᔑ ᓇᒪᑕᐱᓂᒡ ᔒᐹᔮᑎᒃ᙮ ᐊᐊ ᑕᔥ ᒎᐊᔑᕽ Joash ᑳᑮ ᐅᑕᑳᓀᓯᒡ ᐁᐱᐁᓴᕒᐃᕽ Abiezer ᑳᑮ ᐅᒌᒡ ᐅᑮ ᑎᐯᓂᒫᓐ ᐃᓂ ᒥᑎᑰᓐ᙮ ᐅᑯᓯᓴᓐ ᐃᑕᔥ ᑮᑎᔭᓐ Gideon ᑮᐃᔑᓂᑳᓱᐗᓐ᙮ ᒦᐗᓐ ᐃᑕᔥ ᐃᓂ ᑮᒨᒡ ᑳᑮ ᐸᐗᑲᓈᑕᒥᓐᒡ ᐸᑴᔑᑲᓂᐎ ᑭᑎᑳᓇᓐ ᐃᐃᒫ ᑳᑮ ᐃᔑ ᓂᑖ ᒫᒫᑯᔥᑭᑲᓂᐎᓂᒡ ᔔᒥᓇᐞ ᒋᐙᐸᒥᑯᓯᓂᒃ ᒥᑎᔭᓐ ᑳᑎᓄᐎᓂᒡ᙮ 12 ᒦᔥ ᐊᐊ ᑮᑎᔭᓐ ᑳᐃᑯᒡ ᑳᑎᐯᒋᑫᓂᒡ ᐅᑌᒐᓬᐃᒥᓂ ᐁᑮ ᓈᑯᓰᑖᑯᒡ ᐁᑮᐃᑯᒡ, ᑳᑎᐯᒋᑫᒡ ᐅᔕ ᑭᐐᒌᐎᒃ, ᑮᓐ ᑳᒪᔅᑲᐌᑖᑯᓯᔭᓐ ᒦᑳᓱᐎᓂᓂ, ᐅᑮᐃᑰᓐ᙮ 13 ᒦᔥ ᐅᐅ ᑮᑎᔭᓐ Gideon ᑳᐃᔑ ᓇᑴᑕᐙᒡ, ᓂᑑᑭᒫᒻ, ᑮᔥᐱᓐ ᓴ ᑳᑎᐯᒋᑫᒡ ᐐᒌᐎᔭᒥᓐᒡ, ᐌᑯᓀᓐ ᐃᑕᔥ ᐅᐅ ᐌᒋ ᐃᔑᓭᔮᕽ? ᐋᓃᓐ ᑕᔥ ᐃᓂᐌᓂᐗᓐ ᐅᒫᒪᑳᒋᒋᑫᐎᓇᓐ ᑳᐐᑕᒪᐎᔭᒥᑣ ᓂᑫᑌᔭᐋᒥᓈᐸᓃᒃ ᐁᐃᑭᑐᐙᒡ, ᑳᑎᐯᒋᑫᒡ ᐄᑐᒃ ᑳᑮ ᓵᑭᒋᐎᓂᓇᕽ ᐌᑎ ᐄᒋᐸᑮᕽ Egypt᙮ ᐃᓇᔥᑫ ᑕᔥ ᓅᑯᒻ ᑳᑎᐯᒋᑫᒡ ᓂᐌᐱᓂᑯᓈᓐ, ᐁᐸᑭᑎᓂᔭᒥᓐᒡ ᐱᓵᓂᑯ ᒋᑰᐹᒋᐃᔭᒥᒥᓐᒡ ᒥᑎᔭᓐ ᑳᑎᓄᐎᓂᒡ, ᑮᐃᑭᑐ᙮ 14 ᒦᑕᔥ ᐅᐅ ᑳᑎᐯᒋᑫᓂᒡ ᑳᐃᑯᒡ, ᒫᒑᓐ ᐅᐅ ᑳᔑ ᒪᔥᑲᐌᑖᑯᓯᔭᓐ ᒋᐱᒫᒋᐊᑣ ᐃᔅᕒᐃᔭᓬᐊᒃ ᒋᑲᒀᑕᑭᐃᑯᓯᒀ ᒥᑎᔭᓐ ᑳᑎᓄᐎᓂᒡ᙮ ᓃᓐ ᓴ ᐱᑯ ᑭᑎᔑᓂᔕᐅᓐ, ᐅᑮᐃᑰᓐ᙮ 15 ᒦᔥ ᐅᐅ ᑳᐃᓈᒡ ᑳᑎᐯᒋᑫᓂᒡ, ᑳᑎᐯᒋᑫᔭᓐ, ᐋᓃᓐ ᐃᑕᔥ ᑫᔑ ᓈᑕᒪᐗᒀᐸᓐ ᐃᔅᕒᐃᔭᓬᐊᒃ? ᓃᓇᐎᓐᑦ ᐄᑐᒃ ᒫᐗᒡ ᓂᒪᒉᑖᑯᓯᒥᓐ ᒪᓈᓴᑳᕽ Manasseh ᐁᐅᑕᑳᓀᓯᔮᕽ, ᓃᓐ ᐃᑕᔥ ᐃᑯ ᑲᔦ ᒫᐗᒡ ᐁᐊᑳᓭᑖᑯᓯᔮᓐ ᐃᐃᒫ ᓂᑌᑌ ᐅᑖᐎᓂᕽ, ᑮᐃᑭᑐ᙮ 16 ᒦᔥ ᐅᐅ ᑳᐃᑯᒡ, ᑌᐺ ᓃᓐ ᐃᑯ ᑭᑲ ᐐᒌᐎᓐ, ᑭᑲ ᐃᔑ ᔖᑰᒋᐋᒃ ᓴ ᒥᑎᔭᓐ ᑳᑎᓄᐎᐙᒡ ᑖᐱᔥᑰ ᑫᔑ ᔖᑰᒋᐊᑎᐸᓐ ᐯᔑᒃ ᐃᓂᓂ, ᐅᑮᐃᑰᓐ᙮ 17 ᒦᔥ ᑮᑎᔭᓐ ᑳᐃᑭᑐᒡ, ᑮᔥᐱᓐ ᓴ ᒥᓍᐸᒥᔭᓐ ᐁᓈᓴᒦᔭᓐ, ᑭᑭᓇᐙᒋᑕᒪᐎᔑᓐ ᓴ ᑫᐅᒋ ᑭᑫᑕᒫᓐ ᑮᓐ ᑌᐺ ᐁᑲᑲᓅᔑᔭᓐ᙮ 18 ᑫᑯ ᑕᔥ ᐅᐅᒫ ᐅᒋ ᒫᒑᑫᓐ ᐹᓂᒫ ᑮᐲᑕᒪᐎᓈᓐ ᑳᐐ ᐸᑭᑎᓇᒪᐎᓈᓐ ᒦᒋᒻ ᐁᓈᓴᒦᔭᓐ᙮ ᒦᑕᔥ ᑳᐃᑯᒡ ᑳᑎᐯᒋᑫᓂᒡ, ᒦ ᓴ ᐅᒫ ᑫᐊᔮᔮᓐ ᐲᓂᔥ ᒋᑕᑯᔑᓇᓐ, ᐅᑮᐃᑰᓐ᙮ 19 ᑮᑎᔭᓐ ᓴ ᑕᔥ ᑮᐲᑎᑫ ᐅᐙᑳᐃᑲᓂᕽ ᐁᑮ ᑮᔑᔂᒡ ᒫᓇᑎᑰᓴᓐ, ᐯᔑᑰᔥᑭᒧᑦ ᑲᔦ ᐸᑴᔑᑲᓇᓐ ᑳᑮ ᐅᐱᓯᑲᓂᐎᓯᓂᒃ᙮ ᐗᑕᐲᒪᑲᑯᕽ ᓴ ᐅᑮ ᐃᔑ ᐊᑑᓐ ᐐᔮᓯᓂ, ᐊᑭᑯᕽ ᐃᑕᔥ ᐅᑮ ᐃᔑ ᓰᑭᓈᓐ ᐊᐴᐲᓂ, ᐁᑮ ᐲᑖᐙᒡ ᐃᓂ ᑳᑮ ᓇᒪᑕᐱᓂᒡ ᔒᐹᔮᑎᒃ ᐁᑮ ᒦᓈᒡ᙮ 20 ᒦᔥ ᑳᐃᑯᒡ ᑭᔐᒪᓂᑑᓐ ᐅᑌᒐᓬᐃᒥᓂ, ᐃᐃ ᓴ ᐐᔮᔅ, ᐊᐊ ᑲᔦ ᐸᑴᔑᑲᓐ ᑳᐅᐱᓯᑲᓂᐎᓯᒃ ᐃᐃᒫ ᐊᓯᓃᕽ ᐃᔑ ᐊᔑ, ᒦᑕᔥ ᐃᐃᒫ ᐃᔑ ᓰᑭᓇᓐ ᐃᐃ ᐊᐴᑉ, ᐅᑮᐃᑰᓐ᙮ ᒦ ᓴ ᐃ ᑳᐃᔑᒋᑫᒡ᙮ 21 ᑳᑎᐯᒋᑫᒡ ᐅᑌᒐᓬᐃᒪᓐ ᓴ ᒥᑎᑯᓂ ᑳᑮ ᑕᑯᓇᕽ ᐅᑮ ᐋᐸᒋᑑᓐ ᐁᑮ ᓵᒫᑾᐊᕽ ᐃᐃ ᐐᔮᔅ, ᐃᓂ ᑲᔦ ᐸᑴᔑᑲᓇᓐ ᑳᑮ ᐅᐱᓯᑲᓂᐎᓯᓂᒃ᙮ ᒦᑕᔥ ᐃᐃᒫ ᐊᓯᓃᕽ ᑳᐅᒋ ᐅᐸᑯᓀᓂᒃ ᐃᔥᑯᑌ ᐁᑮ ᐊᒀᑭᑌᒃ ᐃᐃ ᐐᔮᔅ, ᐃᓂ ᑲᔦ ᐸᑴᔑᑲᓇᓐ᙮ ᒦᑕᔥ ᐃᓂ ᑳᑎᐯᒋᑫᓂᒡ ᐅᑌᒐᓬᐃᒥᓂ ᑳᐃᔑ ᐊᑯᓈᑯᓯᓂᒡ᙮ 22 ᒦᔥ ᑮᑎᔭᓐ ᑳᑮ ᑭᑫᑕᕽ ᐁᐋᐎᓂᒡ ᑳᑎᐯᒋᑫᓂᒡ ᐅᑌᒐᓬᐃᒥᓂ ᑳᑮ ᐙᐸᒫᒡ, ᒦ ᓴ ᑳᐃᑭᑯᒡ, ᐁᑕᑕᐌᓈ ᑌᐯᒋᑫᔭᓐ ᑭᔐᒪᓂᑑ! ᐃᓇᔥᑫ ᓴ ᓂᐙᐸᒥᒫᓐ ᑳᑎᐯᒋᑫᒡ ᐅᑌᒐᓬᐃᒪᓐ ᐁᑮ ᐌᐌᑖᓴᒥ ᑳᐸᐎᔮᕽ! ᑮᐃᑭᑐ᙮ 23 ᒦᑕᔥ ᑳᑎᐯᒋᑫᓂᒡ ᑳᐃᑯᒡ, ᐱᓵᓀᑕᓐ, ᑫᑯ ᓭᑭᓯᑫᓐ ᑳᐐᓐ ᑭᑲ ᓂᐳᓰ, ᐅᑮᐃᑰᓐ᙮ 24 ᒦᔥ ᑮᑎᔭᓐ ᐌᑎ ᑳᑮ ᐅᓈᐱᑭᓂᑫᑕᒪᐙᒡ ᑳᑎᐯᒋᑫᓂᒡ, ᐁᑮ ᐃᔑᓂᑳᑕᕽ, ᑳᑎᐯᒋᑫᒡ ᐅᔕ ᐐᓐ ᑎᓄᐎ ᐱᓵᓂᓯᐎᓐ᙮ ᓅᑯᒻ ᐃᑕᔥ ᑫᔮᐱ ᐊᔮᓂ ᐃᐃ ᑳᑮ ᐅᔑᑑᒡ ᐃᐃᒫ ᐅᐸᕒᐊ ᐌᒋ ᑎᐯᑖᑾᓂᓂᒃ ᑳᔑ ᐊᔮᓂᒡ ᐁᐱᐁᓴᕒ ᑳᑎᓄᐎᓂᒡ᙮ 25 ᒦᑕᔥ ᐁᑎᐱᑲᓂᓂᒃ ᑳᑎᐯᒋᑫᓂᒡ ᐅᑮᐃᑰᓐ, ᐅᑖᐱᓂᒻ ᑭᑌᑌ ᐅᑖᐯ ᐱᔑᑮᒪᓐ, ᑯᑕᒃ ᑲᔦ ᐋᐯ ᐱᔑᑭ ᒋᓃᔣᓱᐱᐴᓉᒡ᙮ ᐲᑯᐱᑖᐙᑲᓐ ᐃᑕᔥ ᑭᑌᑌ ᑳᔑ ᐸᑭᑎᓈᓲᑕᒪᐙᒡ ᐯᔭᓬᐊᓐ Baal, ᑲᐗᐙᑲᓐ ᑲᔦ ᐊᐊ ᒪᓂᑑ ᐙᑎᒃ ᑳᐸᑕᑭᓱᒡ ᐁᔑᐊᔮᒡ ᐊᐊ ᒪᓂᑑᑳᓐ ᐋᔕᕒᐊ Asherah ᑳᐃᓂᓐᒡ᙮ 26 ᒦᑕᔥ ᐃᐃᒫ ᐌᐌᓂ ᐁᔑ ᐱᑾᑲᒥᑳᒃ ᐃᔑᐅᔑᑑᑲᓐ ᒋᓲᑲᒃ ᑫᔑ ᐸᑭᑎᓈᓲᑕᒪᐎᓐᒡ ᑳᑎᐯᒋᑫᒡ ᑭᑭᔐᒪᓂᑑᒻ᙮ ᐊᐊ ᑕᔥ ᒥᑎᒃ ᑳᑮ ᑲᐗᐗᒡ ᒪᓂᑑ ᐙᑎᒃ ᑳᑮ ᐸᑕᑭᓱᒡ ᐋᔕᕒᐊᐗᓐ ᐁᔑᐊᔮᓂᒡ, ᒦ ᐊᐌ ᑫᐋᐸᒋᐊᒡ ᒋᐴᑕᐙᑫᔭᓐ ᐸᑭᑎᓈᓱᐙᑫᔭᓐ ᐊᐊ ᑯᑕᒃ ᐱᔑᑭ ᒋᐊᒀᑭᔀᒡ, ᐅᑮᐃᑰᓐ᙮ 27 ᒦᔥ ᑮᑎᔭᓐ ᑳᑮ ᒫᒌᓈᒡ ᒥᑖᓱ ᐅᑑᔥᑭᓃᑮᒪᐞ ᐁᓄᑮᑖᑯᒡ, ᐁᑮ ᐃᔑᒋᑫᒡ ᑳᑮᐃᑯᒡ ᑳᑎᐯᒋᑫᓂᒡ᙮ ᐅᓵᒻ ᐃᑕᔥ ᐁᑮ ᑯᓵᒡ ᐅᑎᓇᐌᒫᑲᓇᐞ ᐅᑌᑌᕽ ᐁᔮᓂᒡ, ᐃᐃ ᑲᔦ ᐃᓂᓂᐗᐞ ᐆᑌᓈᕽ ᐌᒌᓂᒡ, ᐁᑎᐱᑲᓂᓂᒃ ᓴ ᑮᐃᔑ ᐃᔑᒋᑫ ᑳᑮᐃᓂᓐᒡ᙮ 28 ᐊᐲ ᑕᔥ ᐐᐸ ᑭᔐᑉ ᐁᐗᓂᔥᑳᐙᒡ ᐃᓂᓂᐗᒃ ᐆᑌᓈᕽ ᑳᑮ ᐅᒌᐙᒡ, ᐅᑮ ᐙᐸᑖᓈᐙ ᐁᔑ ᐸᑭᑎᓈᓲᑕᒪᐎᒥᓐᒡ ᐯᔭᓬᐊᓐ ᐁᑮ ᐲᑯᐱᒋᑳᑌᓂᒃ᙮ ᐃᓂ ᑕᔥ ᑲᔦ ᐊᔕᕒᐊᐗᓐ ᐁᑮ ᑲᐗᐅᒥᓐᒡ ᐅᐱᒣ ᑳᑮ ᐊᔮᓂᒡ, ᐃᓂ ᑕᔥ ᑯᑕᒃ ᐋᐯ ᐱᔑᑭᐗᓐ ᐁᐲᐙᑭᓱᓂᒡ ᐁᑮ ᐸᑭᑎᓈᔂᑳᓱᓂᒡ ᐄᓴᓐ ᐃᐃᒫ ᑳᑮ ᐅᔥᑭ ᐅᔑᒋᑳᑌᓂᒃ ᑳᔑ ᐸᑭᑎᓈᓱᕽ᙮ 29 ᒦᑕᔥ ᑳᐃᔑ ᑲᑴᒋᑎᐙᒡ, ᐊᐌᓀᓐ ᐅᐅ ᐅᑎᔑᒋᑫᐎᓐ? ᑮᐃᑎᐗᒃ᙮ ᐁᓇᓈᑐᓀᐃᑫᐙᒡ ᐃᑕᔥ, ᐁᑲᑴᑗᐙᒡ ᑲᔦ ᒦᔥ ᑳᐃᓈᑲᓂᐎᐙᒡ, ᑮᑎᔭᓐ ᐅᔕ ᐄᓴᓐ ᐅᐅ ᑳᑮ ᐃᔑᒋᑫᒡ, ᒎᐊᔥ Joash ᐁᔑᓂᑳᓱᓂᒡ ᐅᑌᑌᓐ, ᑮᐃᑭᑐᐗᐞ᙮ 30 ᐃᑭ ᑕᔥ ᐃᓂᓂᐗᒃ ᐆᑌᓈᕽ ᐌᒌᐙᒡ ᐅᑮᐃᓈᐙᓐ ᒎᐊᔕᓐ, ᑕᑲ ᐲᔥ ᑭᑯᓯᔅ ᒋᓂᓴᑭᒡ! ᐐᓐ ᐄᑐᒃ ᑳᑮ ᐲᑯᐱᑑᒡ ᑳᔑ ᐸᑭᑎᓈᓲᑕᒪᐎᒥᓐᒡ ᐯᔭᓬᐊᓐ, ᐐᓐ ᑲᔦ ᑳᑮ ᑲᐗᐙᒡ ᐊᔕᕒᐊᐗᓐ ᑳᑮ ᐊᔮᓂᒡ ᐃᐃᒫ ᐅᐱᒣᔭᐄ, ᐅᑮᐃᓈᐙᓐ᙮ 31 ᒎᐊᔥ ᐃᑕᔥ ᐅᑮ ᐃᔑ ᓇᑴᑕᐙᐞ ᐃᐃ ᑳᑮ ᑲᑴᒋᒥᑯᒡ, ᑮᓇᐙ ᓈ ᑭᐐ ᐅᒋ ᑳᑮᑭᑐᒻ ᐯᔭᓬ ᐅᒋ? ᑭᐐ ᑲᑴ ᓈᑕᒪᐙᐙ ᓇ? ᐊᐌᓀᓐ ᓴ ᐱᑯ ᑫᒦᑳᓲᑕᒪᐙᒡ ᐯᔭᓬᐊᓐ ᑕᓂᓵ ᓅᑯᒻ ᑳᑭᔐᐹᐗᑲᓂᓂᒃ! ᑮᔥᐱᓐ ᓴ ᒣᓂᑑᐎᑴᓐ ᑕᑲ ᐐᓐ ᑕᓈᑕᒫᓱ, ᐋᓃᔥ ᐐᓐ ᐃᐃ ᐅᐸᑭᑎᓈᓱᐎᓐ ᐊᐎᔭᓐ ᑳᑮ ᐲᑯᐱᑑᓂᒡ, ᑮᐃᑭᑐ᙮ 32 ᒦᔥ ᐃᐃ ᐁᑮᔑᑲᓂᓂᒃ ᑮᑎᔭᓐ ᑳᐃᔑ ᒫᒌ ᑭᑫᑖᑯᓯᒡ ᒉᕒᐊᐯᔭᓬ Jerub-baal, ᒦ ᓴ ᐁᒋᑳᑌᓂᒃ, ᑕᑲ ᐐᓐ ᐯᔭᓬ ᑕᓈᑕᒫᓱ, ᐋᓃᔥ ᐐᓐ ᐃᐃ ᐅᐸᑭᑎᓈᓱᐎᓐ ᐊᐎᔭᓐ ᑳᑮ ᐲᑯᐱᑑᓂᒡ᙮ 33 ᑲᑭᓇ ᑕᔥ ᒥᑎᔭᓐ ᑳᑎᓄᐎᓂᒡ Midianites, ᐊᒪᓬᐁᒃ ᑳᑎᓄᐎᓂᒡ Amalekites, ᐃᐃ ᑲᔦ ᐃᓂᓂᐗᐞ ᐙᐸᓄᕽ ᐌᒌᓂᒡ ᑮᐅᑸᓄᐃᑎᐗᐞ᙮ ᒞᕒᑕᓐ Jordan ᓰᐱᕽ ᐃᑕᔥ ᑮᐱᔑ ᐋᔕᐎᔥᑳᐗᐞ, ᐃᐃᒫ ᓴ ᐁᔑ ᐸᓴᑎᓈᓂᒃ ᒉᔅᕒᐄᔭᓬ Jezreel ᐁᒋᑳᑌᓂᒃ ᑮᐃᔑ ᑲᐯᔑᐗᐞ᙮ 34 ᒦᑕᔥ ᑳᑎᐯᒋᑫᓂᒡ ᐅᑕᒑᑯᓂ ᑮᑎᔭᓐ ᑳᑮ ᐅᑎᓯᑯᒡ᙮ ᒦᔥ ᑳᑮ ᐴᑖᑕᕽ ᐅᐴᑖᒋᑲᓐ ᐁᑮ ᐊᑐᒫᒡ ᐁᐱᐁᓴᕒ ᑳᑎᓄᐎᓂᒡ Abiezerites ᒋᒫᒪᐎ ᐐᒌᐎᑯᒡ᙮ 35 ᐅᑮ ᐃᔑᓂᔕᐙᐞ ᑲᔦ ᐊᐎᔭᐞ ᒋᐊᐎ ᑎᐹᒋᒧᓂᒡ ᒥᓯᐌ ᐊᑮᕽ ᐁᔑᐊᔮᓂᒡ ᒣᓈᓴ Manasseh ᐌᑕᑳᓀᓯᓂᒡ ᐁᑮ ᐊᑐᒫᒡ ᒫᒪᐤ ᒋᐱ ᐐᒋᐃᑯᒡ᙮ ᐅᑮ ᐃᔑᓂᔕᐙᐞ ᑲᔦ ᐊᐎᔭᐞ ᒋᐊᐎ ᑎᐹᒋᒧᓂᒡ ᐌᑕᑳᓀᓯᓂᒡ ᐋᔕᕒᐃᕽ Asher, ᓭᐱᔪᓬᐊᓂᕽ Zebulun, ᓇᐱᑕᓬᐋᐃᕽ Naphtali ᑲᔦ, ᒦᑕᔥ ᑳᐃᔑ ᒫᒪᐎ ᐲᔖᓂᒡ᙮ 36 ᒦᑕᔥ ᑮᑎᔭᓐ ᑳᐃᓈᒡ ᑭᔐᒪᓂᑑᓐ, ᑮᔥᐱᓐ ᐐ ᐋᐸᒋᐃᔭᓐ ᒋᔖᐾᐙᒡ ᐃᔅᕒᐃᔭᓬᐊᒃ ᑳᑮ ᐃᑭᑐᔭᓐ, 37 ᐃᓇᔥᑫ ᓴ ᓂᐐ ᐊᑑᓐ ᑳᐲᓶᔮᒃ ᐲᐗᔾ ᐃᐃᒫ ᒥᒐᔭᐄ ᑳᑕᔑ ᐸᐗᑲᓈᒥᓐᒡ ᐸᑴᔑᑲᓐ᙮ ᑮᔥᐱᓐ ᐃᑕᔥ ᐃᐃ ᑳᐲᓶᔮᒃ ᐲᐗᔾ ᐁᑕ ᔕᑭᐊᔮᒃ, ᒥᓯᐌ ᑕᔥ ᐐᓐ ᑕᔑ ᐹᑾᑲᒥᑳᒃ; ᒦ ᓴ ᐃ ᒋᑭᑫᑕᒫᓐ ᐁᐐ ᐋᐸᒋᐃᔭᓐ ᒋᔖᐾᐃᑣ ᐃᔅᕒᐃᔭᓬᐊᒃ ᑖᐱᔥᑰ ᑳᑮ ᐃᑭᑐᔭᓐ᙮ 38 ᒦ ᓴ ᐃ ᒪᔮ ᑳᐃᔑᓭᓂᒃ᙮ ᐐᐸ ᓴ ᑭᑭᔐᑉ ᑮᐗᓂᔥᑳ ᐁᑮ ᓰᔅᑰᐲᑭᓇᕽ ᐃᐃ ᑳᑮ ᐲᓶᔮᓂᒃ ᐲᐗᔾ; ᓂᐲᓂ ᓴ ᐃᐃᒫ ᑳᑮ ᐅᒋᓭᓂᒃ ᐅᑮ ᒨᔥᑭᓀᐸᑑᓐ ᑭᒋ ᐅᓈᑲᓐ᙮ 39 ᑮᑎᔭᓐ ᐃᑕᔥ ᐅᑮᐃᓈᓐ ᑭᔐᒪᓂᑑᓐ, ᑫᑯ ᓂᔥᑳᑎᓰᑲᑕᐎᔑᑫᓐ, ᑕᑲ ᒫᓄ ᑫᔮᐱ ᐋᐱᑎᕽ ᓂᐐ ᑮᑭᑦ᙮ ᑕᑲ ᑫᔮᐱ ᐋᐱᑎᕽ ᑭᐐ ᐊᑕ ᐋᓉᑕᐎᓐ ᐁᐐ ᐋᐸᒋᑑᔮᓐ ᐅᐅ ᑳᐲᓶᔮᒃ ᐲᐗᔾ᙮ ᑕᑲ ᓅᑯᒻ ᑕᐹᑾᓐ ᐃᐃ ᑳᐲᓶᔮᒃ ᐲᐗᔾ, ᒥᓯᐌ ᑕᔥ ᐙᑳᔭᐄ ᒋᓂᐲᐗᑲᒥᑳᒃ, ᑮᐃᑭᑐ᙮ 40 ᒦ ᓴ ᐃ ᑳᐃᔑᒋᑫᓂᒡ ᑭᔐᒪᓂᑑᓐ ᐁᑎᐱᑲᓂᓂᒃ, ᐁᑮ ᐹᑾᓂᓂᒃ ᐃᐃ ᑳᐲᓶᔮᓂᒃ ᐲᐗᔾ, ᒥᓯᐌ ᑕᔥ ᐙᑳᔭᐄ ᐁᑮ ᔖᐳᐲᑲᒥᑳᓂᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society