ᐅᓈᑯᓂᑫᒃ 16 - ᐅᒋᐺ ᑭᒋᒪᓯᓇᐃᑲᓐᓵᒥᓴᓐ ᑮᐊᔮᒡ ᑫᓴ ᐆᑌᓈᕽ 1 ᓵᒥᓴᓐ Samson ᐃᑕᔥ ᑮᐃᔖ ᑫᓴ Gaza ᐆᑌᓈᕽ᙮ ᐅᑮ ᐙᐸᒫᓐ ᓴ ᐱᔑᒀᒋᑴᐗᓐ ᐌᑎ, ᒦᑕᔥ ᑮᐃᔑ ᐲᑎᑲᐙᒡ᙮ 2 ᐊᐲ ᑕᔥ ᐃᐃ ᐃᓂᓂᐗᐞ ᑫᓴ ᐁᔮᓂᒡ ᐁᓅᑕᒥᓂᒡ ᐁᑮ ᑕᑯᔑᕽ, ᐅᑮ ᐙᑳᔥᑲᒥᓂ ᐁᔑᐊᔮᒡ, ᐁᑮ ᐲᐃᑯᒡ ᑲᐯᑎᐱᒃ ᐃᐃᒫ ᐆᑌᓈᐎ ᑭᒋ ᐃᔥᒀᑌᕽ᙮ ᑳᐐᓐ ᑕᔥ ᐊᐎᔭᓐ ᑮᓅᑖᑎᓰᐗᓐ ᑲᐯᑎᐱᒃ᙮ ᒦ ᐃ ᑳᐃᑭᑐᓂᒡ, ᑕᑲ ᐲᑑᑖ ᐲᓂᔥ ᒋᐙᐸᕽ, ᒦᑕᔥ ᐃᐃ ᒋᓂᓴᕽ, ᑮᐃᑭᑐᐗᐞ᙮ 3 ᓂᑯ ᐋᐱᑖᑎᐱᒃ ᐃᓴ ᐁᑕ ᓵᒥᓴᓐ ᑮᐸᐱᒥᔑᓐ᙮ ᐁᐋᐱᑖ ᑎᐱᑲᓂᓂᒃ ᓴ ᑮᐗᓂᔥᑳ, ᐁᑮ ᐊᔪᓂᓇᕽ ᐃᐃ ᐆᑌᓈᐎ ᐃᔥᒀᑌᒻ, ᐃᐃ ᑲᔦ ᐃᔥᒀᑌᒫᑎᑰᐞ, ᒦ ᓴ ᑳᐃᔑ ᐸᑾᒋᐱᑑᒡ ᑭᑭᐲᐙᐱᒃ᙮ ᒦᑕᔥ ᑳᐃᔑ ᐱᒋᓂᑫᒡ, ᐁᑮ ᐊᒀᒪᒋᐌᐎᑑᒡ ᐌᑎ ᐗᑭᑕᑎᓐ ᐄᐸᕒᐊᓐ Hebron ᐁᒋᑳᑌᓂᒃ, ᑳᑮ ᐅᒋ ᓇᐃᓈᑾᓂᓂᒃ ᐆᑌᓈᓂ᙮ ᓵᒥᓴᓐ, ᐊᐊ ᑲᔦ ᐃᑴ ᑎᓬᐋᐃᓬᐊ 4 ᐅᐅ ᑕᔥ ᐁᑮ ᐃᔥᒀ ᐊᔨᑎᒡ ᐅᑮ ᒥᓉᓂᒫᓐ ᐃᑴᐗᓐ ᐌᑎ ᑳᑮ ᐃᔑᑖᓂᒡ ᐸᓴᑎᓈᕽ ᓲᕒᐁᒃ Zorek ᐁᒋᑳᑌᓂᒃ᙮ ᑎᓬᐋᐃᓬᐊ Delilah ᓴ ᑮᐃᔑᓂᑳᓱᐗᓐ᙮ 5 ᐃᐃ ᑕᔥ ᑳᑮ ᐅᑭᒫᐎᓂᒡ ᐱᓬᐃᔅᑏᐗᑮᕽ ᐅᑮ ᐱ ᓈᓯᑲᐙᓂ ᐃᓂ ᐃᑴᐗᓐ ᐁᑮᐃᓈᓂᒡ, ᑲᑴ ᑲᔥᑭᒻ ᒋᐐᑕᒪᐎᒃ ᐋᑎ ᐁᑕᓀᑖᑾᓂᓂᒃ ᐃᐃ ᐅᒪᔥᑲᐎᓰᐎᓐ, ᐋᓃᓐ ᑲᔦ ᑫᐃᔑ ᔖᑰᒋᒋᑲᓂᐎᐸᓐ ᒋᒪᒫᒋᑾᐱᒋᑲᓂᐎᐸᓐ, ᒋᑑᑕᐎᑎᐸᓐ ᑫᔑ ᑲᔥᑭᑑᓯᒃ ᒋᓈᑕᒫᓱᒡ᙮ ᓃᓇᐎᓐᑦ ᓴ ᐱᑯ ᑳᑕᓱ ᐯᔑᑯᔮᕽ ᑭᑲ ᒦᓂᑰ ᒥᑖᔑᐯᔑᒀᒃ 1,100 ᐙᐹᐱᑯ ᔔᓂᔮᒃ, ᑮᐃᑭᑐᐗᐞ᙮ 6 ᒦᔥ ᓵᒥᓴᓐ ᑳᐃᑯᒡ ᑎᓬᐋᐃᓬᐊᐗᓐ, ᑕᑲ ᐐᑕᒪᐎᔑᓐ ᐋᑎ ᐁᑕᓀᑖᑾᒃ ᑭᑭᒋ ᒪᔥᑲᐎᓰᐎᓐ, ᐋᓃᓐ ᑲᔦ ᑫᑑᑖᑰᔭᐸᓐ ᒋᒪᒫᒋᑾᐱᓂᑰᔭᓐ ᒋᐌᓵᓂᐃᑰᔭᐸᓐ, ᐅᑮᐃᑰᓐ᙮ 7 ᒦᔥ ᓵᒥᓴᓐ ᑳᐃᓈᒡ, ᑮᔥᐱᓐ ᐋᐸᒋᑑᐙᒡ ᓃᔣᓱ ᐅᔥᑭ ᐊᒑᐲᓐ ᒪᔑ ᑳᐋᐸᑕᓯᓂᓂᑭᓐ ᒪᒫᒋᑾᐱᔑᐙᒡ, ᒦ ᓴ ᐃ ᒋᒪᒌᐗᑮᔮᓐ ᑖᐱᔥᑰ ᑯᑕᒃ ᐃᓂᓂᐗᒃ, ᐅᑮᐃᓈᓐ᙮ 8 ᐃᐃ ᑕᔥ ᑳᑮ ᐅᑭᒫᐎᓂᒡ ᐱᓬᐃᔅᑏᐗᑮᕽ ᐅᑮ ᐲᑕᒪᐙᓂ ᐃᓂ ᐃᑴᐗᓐ ᓃᔣᓱ ᐅᔥᑭ ᐊᒑᐲᓐ ᒪᔑ ᑳᑮ ᐋᐸᑕᓯᓂᓂᑭᓐ᙮ ᒦᑕᔥ ᑳᐃᔑ ᒪᒫᒋᑾᐱᓂᑯᒡ ᓵᒥᓴᓐ ᐁᑮ ᐋᐸᒋᑑᓂᒡ ᑳᑮ ᐲᒋᑳᑌᓂᑭᓐ᙮ 9 ᑎᓬᐋᐃᓬᐊᐗᓐ ᓴ ᐅᑮ ᑳᓈᓂ ᐃᓂᓂᐗᐞ ᐸᑳᓐ ᐸᑫᒋᑲᓂᒃ᙮ ᒦᑕᔥ ᑳᐃᑯᒡ, ᓵᒥᓴᓐ, ᐱᓬᐃᔅᑏᐎᓂᓂᐗᒃ ᐋᔕ ᑭᑑᑎᓯᑰᒃ! ᐅᑮ ᐸᐸᑭᐱᑑᓇᓐ ᓴ ᐃᓂ ᐊᒑᐲᓐ ᑖᐱᔥᑰ ᑲᔥᑭᒀᒋᑲᓀᔮᑉ ᑳᔑ ᐸᑭᓭᒡ ᑮᒑᑭᓱᒡ᙮ ᑳᐐᓐ ᒋᑮ ᑭᑫᑖᑾᓂᓂᒃ ᐋᑎ ᑳᐅᒋ ᒪᔥᑲᐎᓰᒡ᙮ 10 ᒦᔥ ᒦᓇᐙ ᑳᐃᑯᒡ ᑎᓬᐋᐃᓬᐊᐗᓐ, ᐃᓇᔥᑫ ᐋᐱᒋ ᑭᑲᑮᐹᓯᓈᑯᐃᔥ, ᐁᑮᐗᓂᒧᑕᐎᔭᓐ, ᑕᑲ ᑕᔥ ᓅᑯᒻ, ᐐᑕᒪᐎᔑᓐ ᐋᓃᓐ ᑫᑑᑖᑰᔭᐸᓐ ᒋᒪᒫᒋᑾᐱᓂᑰᔭᓐ, ᐅᑮᐃᑰᓐ᙮ 11 ᒦᔥ ᐅᐅ ᑳᐃᓈᒡ, ᑮᔥᐱᓐ ᐋᔩᑕᐱᔑᐙᒡ ᐋᐸᒋᑑᐙᒡ ᐅᔥᑭ ᔑᓅᑖᑲᓇᓐ ᐐᑳ ᒪᔑ ᑳᐋᐸᑕᓯᓂᓂᑭᓐ, ᒦ ᓴ ᐃ ᒋᒪᒌᐗᑮᔭᓐ ᑖᐱᔥᑰ ᑯᑕᒃ ᐃᓂᓂᐗᒃ, ᐅᑮᐃᓈᓐ᙮ 12 ᑎᓬᐋᐃᓬᐊᐗᓐ ᓴ ᐅᑮ ᐋᐸᒋᑑᓂ ᐅᔥᑭ ᔑᓅᑖᑲᓇᓐ ᐁᒪᒫᒋᑾᐱᓂᑯᒡ᙮ ᒦᑕᔥ ᑳᐃᑯᒡ, ᓵᒥᓴᓐ ᐱᓬᐃᔅᑏᐎᓂᓂᐗᒃ ᐋᔕ ᑭᑑᑎᓯᑰᒃ! ᐃᓂᓂᐗᐞ ᐄᑐᒃ ᑮᑳᓱᐗᐞ ᐸᑳᓐ ᐸᑫᒋᑲᓂᒃ᙮ ᒦᔥ ᓵᒥᓴᓐ ᑳᑮ ᐸᐸᑭᐱᑑᒡ ᔑᓅᑖᑲᓇᓐ ᐁᑮ ᑑᑕᕽ ᑖᐱᔥᑰ ᑲᔥᑭᒀᒋᑲᓀᔮᐲᕽ᙮ 13 ᒦᑕᔥ ᑳᐃᑯᒡ ᑎᓬᐋᐃᓬᐊᐗᓐ, ᐅᐅ ᑕᔥ ᐃᔑᐊᐲ ᑭᐗᓂᒥᔥ, ᐁᑮᐗᓂᒧᑕᐎᔭᓐ, ᑕᑲ ᐐᑕᒪᐎᔑᓐ ᐋᓃᓐ ᑫᑑᑖᑰᔭᐸᓐ ᒋᒪᒫᒋᑾᐱᓂᑰᔭᓐ᙮ ᒦᔥ ᐅᐅ ᑳᐃᓈᒡ, ᑮᔥᐱᓐ ᓴ ᒫᒪᐗᐱᑳᑕᒪᓐ ᐃᓂ ᓃᓂᓯᓴᓐ ᓃᔣᓱᔦᒃ ᑳᔑ ᐊᔪᑾᐱᑌᑭᓐ, ᑭᒋᐙᑾᐊᒪᓐ ᑕᔥ ᐃᐃᒫ ᐊᐱᑳᓈᑎᑯᕽ, ᒦ ᓴ ᐃ ᑫᓃᓐ ᒋᒪᒌᐗᑮᔭᓐ ᑖᐱᔥᑰ ᑯᑕᒃ ᐃᓂᓂᐗᒃ, ᐅᑮᐃᑰᓐ᙮ 14 ᒣᒀ ᑕᔥ ᓵᒥᓴᓐ ᐁᓂᐹᒡ, ᑎᓬᐋᐃᓬᐊᐗᓐ ᓴ ᐅᑮ ᒫᒪᐙᑾᐊᒥᓂ ᓃᔣᓱᔦᒃ ᐐᓂᓯᓴᓐ ᑳᑮ ᐊᔪᑾᐱᑌᓂᑭᓐ᙮ ᒦᑕᔥ ᑳᐃᔑ ᑭᒋᐙᑾᐊᒥᓂᒡ ᒥᑎᑯᓂ ᐁᑮ ᐋᐸᒋᑑᓂᒡ᙮ ᒦᑕᔥ ᑳᑮᐃᑯᒡ, ᓵᒥᓴᓐ, ᐱᓬᐃᔅᑏᐎᓂᓂᐗᒃ ᐋᔕ ᑭᑑᑎᓯᑰᒃ᙮ ᓵᒥᓴᓐ ᓴ ᑕᔥ ᑮᐗᓂᔥᑳᐸᓂᐅ ᑳᑮ ᐃᔑ ᓂᐹᐸᓐ, ᐁᑮ ᐸᑾᒋᐱᑑᒡ ᒥᑎᑯᓂ ᐃᐃᒫ ᐐᓂᓯᓯᕽ ᑳᑮ ᐃᔑ ᒫᒪᐙᑾᐃᑳᑌᓂᑭᓐ ᑭᒋ ᓈᐱᔕᐃᑲᓂᕽ᙮ 15 ᒦᔥ ᑎᓬᐋᐃᓬᐊᐗᓐ ᑳᐃᑯᒡ, ᐋᓃᓐ ᑕᔥ ᑫᔑ ᐃᑭᑐᔭᐸᓐ ᐁᓵᑭᐃᔭᓐ, ᑭᑌᐃᕽ ᑕᔥ ᐁᐃᔑ ᓵᑭᐃᓯᐗᓐ᙮ ᓂᓯᕽ ᐅᔕ ᐋᔕ ᑭᐗᓂᒥᔥ, ᑳᐐᓐ ᒪᔑ ᑭᐐᑕᒪᐎᓰ ᐋᑎ ᐁᑕᓀᑖᑾᒃ ᑭᒪᔥᑲᐎᓰᐎᓐ᙮ 16 ᑳᐐᓐ ᐃᑕᔥ ᐅᑮ ᐴᓂᒥᑯᓰᓐ ᐁᑕᓱ ᑮᔑᒃ ᐁᑮ ᑲᑴᒋᒥᑯᒡ, ᐁᑮ ᑲᑳᓱᒥᑯᒡ ᑲᔦ, ᐋᐱᒋ ᓴ ᑮᑭᒋ ᐐᔭᑭᔥᑫᑕᒻ, ᐁᑮ ᐊᑕᐌᑕᕽ ᒋᓂᐳᒡ᙮ 17 ᒦᑕᔥ ᑫᑲᐲ ᓴᒻᓱᓐ ᑌᐺ ᐁᓂᑯᑯᑌᐁᒡ ᑳᑮ ᐐᑕᒪᐙᒡ ᐁᑮᐃᓈᒡ, ᑳᐐᓐ ᐅᔕ ᐐᑳ ᓂᐸᔥᒀᑯᑎᑾᓀᔓᑰᓰ, ᓂᒫᒫ ᓴ ᑮᓂᑖᐎᑭᐃᒡ ᓂᑮ ᐅᒋ ᒫᒌᑎᓄᐤ ᓈᓴᕒᐋᔨᑦ Nazirite, ᐁᑮ ᑎᐱᓇᐌᐎᓰᒥᒡ ᑭᔐᒪᓂᑑ᙮ ᑮᔥᐱᓐ ᑕᔥ ᐸᔅᑯᔑᑳᑌᒃ ᓂᑎᒀᓐ, ᒦ ᓴ ᐃ ᒋᓇᑲᓂᑯᔮᓐ ᓂᒪᔥᑲᐎᓰᐎᓐ, ᒋᔑ ᒪᒌᐗᑮᔮᓐ ᑖᐱᔥᑰ ᑯᑕᒃ ᐃᓂᓂᐗᒃ, ᐅᑮᐃᓈᓐ᙮ 18 ᒦᔥ ᑎᓬᐋᐃᓬᐊᐗᓐ ᑳᑮ ᑭᑫᑕᒥᓂᒡ ᑌᐺ ᐁᑮ ᐐᑕᒪᐙᒡ ᐁᓂᑯᑯᑌᐁᒡ᙮ ᐅᑮ ᐊᑐᒫᓂ ᐌᑭᒫᐎᓂᒡ ᐱᓬᐃᔅᑏᐗᑮᕽ ᐁᑮᐃᓈᓂᒡ, ᐊᐯᔪᒃ, ᔐᒫᒃ ᐃᑯ, ᐋᔕ ᐅᔕ ᓂᑮ ᐐᑕᒫᒃ ᑌᐺ ᐁᓂᑯᑯᑌᐁᒡ᙮ ᐃᓂ ᑕᔥ ᐌᑭᒫᐎᓂᒡ ᐅᑮ ᐲᓈᓂ ᔔᓂᔮᓐ ᐁᑮ ᒦᓈᓂᒡ ᐃᓂ ᐃᑴᐗᓐ᙮ 19 ᒦᔥ ᑎᓬᐋᐃᓬᐊᐗᓐ ᑳᑮ ᓂᐯᐃᑯᒡ ᐅᒌᑾᓂᓃᕽ, ᒦᑕᔥ ᑳᐃᔑ ᑲᓅᓈᓂᒡ ᐃᓂᓂᐗᓐ ᒋᐸᔥᑯᔕᒥᓂᒡ ᑳᑮ ᐃᔑ ᓃᔣᓱ ᐊᐱᑫᒡ᙮ ᒦᔥ ᑎᓬᐋᐃᓬᐊᐗᓐ ᑳᐃᔑ ᐌᓵᓂᐃᑯᒡ, ᐁᑮ ᓇᑲᓂᑯᒡ ᐅᒪᔥᑲᐎᓰᐎᓐ᙮ 20 ᑎᓬᐋᐃᓬᐊᐗᓐ ᓴ ᑕᔥ ᐅᑮᐃᑰᓐ, ᓵᒥᓴᓐ, ᐱᓬᐃᔅᑏᐎᓂᓂᐗᒃ ᐋᔕ ᑭᑑᑎᓯᑰᒃ᙮ ᒦ ᐃ ᑳᐃᔑ ᐊᒪᒋᓭᒡ ᐁᓂᐹᐸᓐ ᐁᑮ ᐃᓀᑕᕽ, ᒦ ᓴ ᐯᔑᑾᓐ ᑫᐃᔑᒋᑫᔮᓐ ᑳᐱ ᓂᑖ ᐃᔑᒋᑫᔮᓐ ᒋᑳᒋᑎᓂᑰᓯᐙᓐ, ᐁᑮ ᐃᓀᑕᕽ᙮ ᑳᐐᓐ ᐅᑮ ᑭᑫᑕᓰᓐ ᐁᑮ ᓇᑲᓂᑯᒡ ᑳᑎᐯᒋᑫᓂᒡ᙮ 21 ᒦᔥ ᐱᓬᐃᔅᑏᐎᓂᓂᐗᐞ ᑳᑮ ᑳᒋᑎᓂᑯᒡ, ᒦ ᓴ ᑲᔦ ᑳᐃᔑ ᑭᒑᐸᐅᑯᒡ, ᐁᑮ ᐃᔑᐎᓂᓐᒡ ᑫᓴ Gaza ᐆᑌᓈᕽ ᐁᑮ ᒪᒫᒋᑾᐱᓂᓐᒡ ᐅᓵᐙᐱᑯ ᓴᑳᐹᓀᔮᐲᓐ ᐁᑮ ᐋᐸᑕᓂᓂᑭᓐ᙮ ᒦᔥ ᑳᐃᓇᓄᑮᐃᓐᒡ ᒋᔑᑾᐙᒡ ᐸᑴᔑᑲᓂᒥᓇᓐ ᐃᐃᒫ ᑕᑯᓂᑏᐎᑲᒥᑯᕽ᙮ 22 ᐃᓇᔥᑫ ᑕᔥ ᐐᓂᓯᓴᓐ ᑮᐊᓂ ᑮᐌ ᓂᑖᐎᑭᓂᓂᐗᓐ, ᑳᐃᔥᒀ ᐹᔥᑯᔑᑳᑌᓂᒃ ᐅᑎᒀᓐ᙮ ᐁᑕᔑᑌᓂᒃ ᓵᒥᓴᓐ ᐅᓂᐳᐎᓐ 23 ᑳᑮ ᐅᑭᒫᐎᐙᒡ ᐃᑕᔥ ᐱᓬᐃᔅᑏᐗᑮᕽ ᑮᐅᑸᓄᐃᑎᐗᒃ, ᐁᐐ ᒌᑫᑕᒧᐙᒡ, ᐁᐐ ᐸᑭᑎᓈᓲᑕᒪᐙᐙᒡ ᐅᒪᓂᑑᒥᐙᓐ ᑌᑲᓐ Dagon ᐁᓂᒥᓐᒡ; ᐅᐅ ᐁᑮ ᐃᑭᑐᐙᒡ, ᓂᒪᓂᑑᒥᓈᓐ ᓴ ᓂᑮ ᒦᓂᑯᓈᓐ ᒋᔖᑰᒋᐃᒪᑭᒡ ᓵᒥᓴᓅᓐ Samson ᑳᔒᑫᓂᒥᔭᒥᓐᒡ, ᑮᐃᑭᑐᐗᒃ᙮ 24 ᐊᐲ ᑕᔥ ᐯᒫᑎᓯᐙᒡ ᐁᐙᐸᒫᐙᒡ, ᐋᐱᒋ ᓴ ᐅᑮ ᑭᒋ ᐃᓉᐋᐙᓐ ᐅᒪᓂᑑᒥᐙᓐ ᐁᑮ ᐃᑭᑐᐙᒡ, ᓂᒪᓂᑑᒥᓈᓐ ᐅᔕ ᓂᑮ ᒦᓂᑯᓈᓐ ᒋᔖᑰᒋᐃᒪᑭᒡ ᑳᔒᑫᓂᒥᔭᒥᓐᒡ, ᑳᓂᔑᐗᓈᒋᑑᓂᒡ ᓂᑕᑮᒥᓈᓐ, ᓃᐱᐗᐞ ᑲᔦ ᑳᑮ ᓂᓯᒥᔭᒥᓐᒡ, ᑮᐃᑭᑐᐗᒃ᙮ 25 ᐊᐲ ᓴ ᑳᐊᓂ ᒌᑲᒪᒋᐅᐙᒡ ᒦ ᐃ ᑳᐃᑭᑐᐙᒡ, ᐊᑐᒥᒃ ᓵᒥᓴᓐ ᑫᒥᓉᑕᒥᐃᓇᕽ᙮ ᒦ ᐃ ᑳᐃᔑ ᐊᑐᒫᐙᒡ ᓵᒥᓴᓅᓐ ᑳᑮ ᐃᔑ ᑭᐸᐅᒥᓐᒡ ᐁᑮ ᐲᓈᐙᒡ ᒋᒥᓉᑕᒧᐃᑯᐙᒡ᙮ ᐅᑮ ᐃᔑ ᓃᐸᐎᐋᐙᓐ ᓴ ᐃᐃᒫ ᓇᓴᐗᔭᐄ ᑳᑮ ᐅᒋ ᐋᔀᑭᑌᓂᒃ ᐃᐃ ᑭᒋ ᐙᑳᐃᑲᓐ᙮ 26 ᒦᑕᔥ ᓵᒥᓴᓐ ᑳᐃᓈᒡ ᑸᐎᓭᓴᓐ ᑳᑮ ᓴᑭᓂᑫᓂᑯᒡ, ᑕᑲ ᐸᑭᑎᓂᔑᓐ ᐁᐐ ᓵᒥᓇᒀ ᐃᑭ ᑳᐅᒋ ᐋᔀᑭᑌᓂᒃ ᐅᐅ ᐙᑳᐃᑲᓐ᙮ ᐁᐐ ᐃᔑ ᐋᔂᑯᑳᐸᐎᔮᓐ, ᐅᑮᐃᓈᓐ᙮ 27 ᐃᐃᒫ ᐙᑳᐃᑲᓂᒃ ᑭᒧᔥᑭᓇᐃᑎᐗᐞ, ᐃᑴᐗᐞ, ᑲᑭᓇ ᑲᔦ ᐌᑭᒫᐎᓂᒡ ᐱᓬᐃᔅᑏᐗᑮᕽ᙮ ᓂᑯᒋ ᑯ ᓂᓯᕽ ᒥᑖᔂᒃ 3,000 ᐃᓂᓂᐗᐞ, ᐃᑴᐗᐞ ᑲᔦ ᐁᑮ ᑕᔑᓂᒡ ᐗᑭᑕᐸᒃ ᐁᑮ ᐅᓵᐸᒥᑯᒡ ᓵᒥᓴᓐ ᐁᒥᓉᑕᒥᐃᐌᒡ᙮ 28 ᒦᑕᔥ ᓵᒥᓴᓐ ᑳᑮ ᑲᓅᓈᒡ ᑳᑎᐯᒋᑫᓂᒡ ᐁᑮᐃᓈᒡ, ᑮᓐ ᑳᑎᐯᒋᑫᔭᓐ ᑭᔐᒪᓂᑑ, ᑕᑲ ᒫᒥᑴᓂᒥᔑᓐ, ᑕᑲ ᑲᔦ ᑫᔮᐱ ᐋᐱᑎᕽ ᒪᔥᑲᐎᓰᐃᔑᓐ, ᑮᓐ ᑳᑭᔐᒪᓂᑑᐎᔭᓐ᙮ ᐁᐐ ᓇᓇᐊᓴᒀ ᐱᓬᐃᔅᑏ ᑳᑎᓄᐎᐙᒡ ᐋᓃᔥ ᒥᒋᓃᔥ ᓂᔥᑮᔑᑰᓐ ᐅᑮ ᐅᑖᐱᓈᓈᐙᓐ, ᑮᐃᑭᑐ᙮ 29 ᒦᔥ ᓵᒥᓴᓐ ᑳᑮ ᐊᔫᓂᓈᒡ ᓃᔑᓐ ᑳᑮ ᐸᑕᑭᓱᓂᒡ ᑳᑮ ᐃᔑ ᐋᔀᑭᑌᓂᒃ ᐙᑳᐃᑲᓐ; ᐌᐌᓂ ᑲᔦ ᐁᑮ ᐋᓱᔑᒨᓄᒡ ᐯᔑᒃ ᐅᑭᒋᓂᑭᕽ, ᑯᑕᒃ ᑕᔥ ᐅᓇᒪᑎᓂᑭᕽ᙮ 30 ᒦᑕᔥ ᑳᐃᑭᑐᒡ, ᑕᑲ ᐱᓵᓐ ᓂᑲ ᐐᒋ ᓂᐴᒫᒃ ᐱᓬᐃᔅᑏ ᑳᑎᓄᐎᐙᒡ! ᐁᐲᒌᒡ ᐃᑕᔥ ᐃᑯ ᑮᑳᑎᓂᑫ᙮ ᐃᐃ ᓴ ᐙᑳᐃᑲᓐ ᑮᓃᓯᓭ ᐁᑮ ᐸᑕᑯᔥᑰᓱᐙᒡ ᑲᑭᓇ ᐌᑭᒫᐎᐙᒡ, ᑲᑭᓇ ᑲᔦ ᐯᒫᑎᓯᐙᒡ ᐃᐃᒫ ᑳᑮ ᐊᔮᐙᒡ ᐲᑎᒃ᙮ ᐅᐅᐌᓂᐗᐞ ᑕᔥ ᑳᑮ ᓂᓵᒡ ᒦ ᐃᒫ ᑫᐐᓐ ᑳᐃᔑ ᓂᐳᒡ, ᓇᐗᒡ ᓃᐱᐗᐞ ᐃᐃᒫ ᐅᑮ ᓂᓵᐞ, ᐊᐲᒡ ᐐᓐ ᒥᓂᒃ ᑳᑮ ᐱᓂᓵᒡ ᒣᒀ ᑮᐱᐱᒫᑎᓯᒡ᙮ 31 ᐐᒋᑭᐌᔭᐞ ᓴ, ᐃᐃ ᑲᔦ ᑲᑭᓇ ᐅᑌᑌᕽ ᑳᑮ ᐅᒋ ᐃᓇᐌᒫᒡ ᑮᐲᔖᐗᐞ ᐁᑮ ᐱᓈᓯᑲᒥᓂᒡ ᐅᐐᔭᐤ᙮ ᐌᑎ ᑕᔥ ᓇᓴᐗᔭᐄ ᑳᑮ ᐃᔑᐊᔮᓂᑭᓐ ᐆᑌᓇᐗᓐ ᓲᕒᐊ Zorah, ᐁᔥᑌᔪᓬ Eshtaol ᑲᔦ ᑮᐃᔑ ᓇᐃᓂᑲᓂᐎ ᑳᑮ ᐃᔑ ᓇᐃᓂᒥᓐᒡ ᐅᑌᑌᓐ ᒣᓅᐗ Manoah ᑳᑮ ᐃᔑᓂᑳᓱᓂᒡ᙮ ᓃᔥᑕᓇ 20 ᑕᓱ ᐱᐴᓐ ᓴ ᐅᑮ ᐅᓈᑯᓈᐞ ᐃᔅᕒᐃᔭᓬᐊᐞ Israel᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society