Iisiihkiyoo 34 - ᐅᒋᐺ ᑭᒋᒪᓯᓇᐃᑲᓐᑳᓃᑳᓃᑕᒪᐙᐙᒡ ᐃᔅᕒᐃᔭᓬᐊᐞ ᑮᑲᓅᓂᑣ 1 ᒦᑕᔥ ᐅᐅ ᑳᑎᐯᒋᑫᒡ ᑳᐃᔑᒡ, 2 ᐁᓂᓃᐎᔭᓐ, ᑕᑲ ᑲᓅᔥ ᐃᑭ ᑳᓃᑳᓃᑕᒪᐙᐙᒡ ᐃᔅᕒᐃᔭᓬᐊᐞ Israel ᐅᑲᓇᐎ ᒫᓇᒑᓂᔑᐌᕽ ᐁᓀᑖᑯᓯᐙᒡ, ᒦᔥ ᐅᐅ ᑫᐃᓇᑣ, ᒦ ᐅᔕ ᐅ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᑭᑐᒡ: ᐁᑕᑕᐌ ᑭᑭᒋ ᑰᐹᓯᓈᑯᓯᒻ ᑳᓃᑳᓃᑕᒪᐌᒀ ᐃᔅᕒᐃᔭᓬᐊᒃ, ᑮᓀᑕᐙ ᐁᐊᔕᑎᓱᔦᒃ! ᐱᓇᒫ ᐄᑐᒃ ᒋᑮ ᐊᔕᒣᒀᐸᓐ ᒫᓇᒑᓂᔕᒃ! 3 ᑮᓇᐙ ᒎᒎᔖᐳ ᐁᒥᓂᑴᔦᒃ, ᐁᑭᑭᔥᑲᒣᒃ ᑕᔥ ᑲᔦ ᑭᑭᔥᑭᑲᓇᓐ ᒫᓇᒑᓂᔑᐗᔮᓂᕽ ᐌᒌᑭᓐ ᑲᔦ ᑭᓂᓵᐙᒃ ᒫᐗᒡ ᐃᑯ ᓴᓭᑳ ᒫᓇᒑᓂᔕᒃ ᐁᐊᒬᒀ᙮ ᑳᐐᓐ ᑕᔥ ᑭᓈᓈᑲᒋᐋᓯᐙᐙᒃ ᒫᓇᒑᓂᔕᒃ᙮ 4 ᑳᐐᓐ ᓴ ᑭᐐᒋᐋᓯᐙᐙᒃ ᑳᓃᓇᒥᓯᐙᒡ, ᑳᐐᓐ ᑲᔦ ᑭᓇᑕᐎᐋᓯᐙᐙᒃ ᑳᐋᑯᓯᐙᒡ᙮ ᑳᐐᓐ ᑲᔦ ᑭᓰᑑᐱᓈᓯᐙᐙᒃ ᑳᒫᑭᔑᓄᐙᒡ᙮ ᑳᐐᓐ ᑲᔦ ᑭᑮ ᑮᐌ ᓈᓯᑲᐙᓯᐙᐙᒃ, ᑳᐐᓐ ᑲᔦ ᑭᑮ ᐊᑐᓀᐙᓯᐙᐙᒃ ᑳᑮ ᐗᓂᔑᓄᐙᒡ᙮ ᐐᑫ ᑭᑮ ᐌᓵᓂᐋᐙᒃ ᐁᑮ ᑲᒀᓂᓴᑭᓰᑲᑕᐌᒀ ᑮᑎᐯᓂᒣᒀ᙮ 5 ᒥᓯᐌ ᓴ ᑕᔥ ᑮᐃᔑ ᒥᓯᑌᔥᑳᐗᒃ ᐁᑮ ᐃᓀᑖᑯᓯᐙᒡ ᑖᐱᔥᑰ ᒫᓇᒑᓂᔕᒃ ᐁᔮᐙᓯᒀ ᐅᑲᓇᐎ ᒫᓇᒑᓂᔑᐌᓐ᙮ ᒥᓯᐌ ᑕᔥ ᐁᑮ ᐃᔑ ᒥᓯᑌᔥᑳᐙᒡ, ᒦᔥ ᐊᔭᐋᐎᔕᐞ ᑳᑮ ᓂᓯᑯᐙᒡ ᐁᑮ ᐊᒧᑯᐙᒡ᙮ 6 ᓂᐱᒫᑎᓰᒪᒃ ᒫᓇᒑᓂᔑᕽ ᑳᐃᓀᓂᒪᒀ ᒥᓯᐌ ᑭᒋ ᐗᒌᑳᕽ ᑕᔑ ᐗᐙᓀᑕᒧᒃ, ᒥᓯᐌ ᑲᔦ ᑳᔑ ᐸᐲᑾᑎᓈᓂᒃ᙮ ᒥᓯᐌ ᓴ ᐊᑮᕽ ᑕᔑ ᐗᐙᓀᑕᒧᒃ, ᑳᐐᓐ ᑕᔥ ᐊᐎᔭᓐ ᐅᓇᓈᑐᓀᐅᑯᓰᐙᓐ, ᑳᐐᓐ ᑲᔦ ᐊᐎᔭᓐ ᐅᓇᓈᑕᐙᐸᒥᑯᓰᐙᓐ᙮ 7 ᑕᑲ ᑕᔥ ᓅᑯᒻ ᑮᓇᐙ ᐅᑲᓇᐎ ᒫᓇᒑᓂᔑᐌᒃ, ᐱᓯᑕᐎᔑᒃ ᐋᓃᓐ ᐁᓂᓇᑰᒃ ᓃᓐ ᑳᑎᐯᒋᑫᔮᓐ᙮ 8 ᑌᐺ ᓴ ᑯ ᓃᓐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᑳᐃᓂᓇᑰᒃ; ᐅᓵᒻ ᓂᐱᒫᑎᓰᒪᒃ ᒫᓇᒑᓂᔑᕽ ᑳᐃᓀᓂᒪᒀ ᑳᐐᓐ ᐅᑕᔮᐙᓯᐙᐙᐞ ᑳᓈᑲᒋᐃᑯᐙᒡ᙮ ᒦᔥ ᑳᐅᒋ ᐌᓵᓂᐃᑣ, ᑲᔦ ᐁᐊᒧᑯᐙᒡ ᐊᔭᐋᐎᔕᐞ᙮ ᓂᑲᓇᐎ ᒫᓇᒑᓂᔑᐌᒪᒃ ᐋᓃᔥ ᑳᐐᓐ ᐅᑮ ᐊᑐᓀᐙᓯᐙᐙᐞ ᑳᐗᓂᔑᓂᓂᒡ ᒫᓇᒑᓂᔕᐞ᙮ ᒦ ᓴ ᐃ ᐐᓀᑕᐙ ᑳᑮ ᓈᓈᑲᒋᐃᑎᓱᐙᒡ ᐁᑮ ᐸᐹᐱᓯᔅᑫᓂᒫᓯᒀ ᒫᓇᒑᓂᔕᐞ᙮ 9 ᑮᓇᐙ ᑕᔥ ᐅᑲᓇᐎ ᒫᓇᒑᓂᔑᐌᒃ, ᐱᓯᑕᐎᒃ ᐋᓃᓐ ᐁᓂᓀᒃ ᑳᑎᐯᒋᑫᒡ᙮ 10 ᒦ ᓴ ᐅᐌ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᓂᓀᒃ, ᑳᐐᓐ ᓴ ᑭᒥᓍᐸᒥᓯᓅᓂᓂᒻ ᑮᓇᐙ ᐅᑲᓇᐎ ᒫᓇᒑᓂᔑᐌᒃ, ᑮᓇᐙ ᓴ ᑭᑲ ᐸᑲᒥᔥᑳᑯᒻ ᑫᑰᓂᓂ ᑳᔑ ᒫᔑᓭᐙᒡ ᓂᒫᓇᒑᓂᔑᒪᒃ᙮ ᑳᐐᓐ ᓴ ᑭᐐ ᐸᑭᑎᓂᓯᓅᓂᓂᒻ ᐊᐗᔑᒣ ᒋᓈᓈᑲᒋᐁᒀ ᓂᒫᓇᒑᓂᔑᒪᒃ᙮ ᑳᐐᓐ ᑲᔦ ᑫᔮᐱ ᐃᐃᒫ ᒋᐅᑕᒋᑫᓰᐌᒃ᙮ ᒦ ᐅᔕ ᐃ ᐁᐐ ᓈᑕᒪᐗᒀ ᓂᒫᓇᒑᓂᔑᒪᒃ ᑮᓇᐙ ᐅᒋ ᒋᐊᒸᓯᐎᑣ᙮ ᐌᓂᔑᔑᒡ ᐅᑲᓇᐎᒫᓇᒑᓂᔑᐌ 11 ᒦᑕᔥ ᐅᐅ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᑭᑐᒡ, ᐃᑕᐙ ᓴ ᓃᓐ ᐃᑯ ᓂᑲ ᓇᓈᑐᓀᐙᒃ, ᓂᒫᓇᒑᓂᔑᒪᒃ ᐁᐐ ᓈᓈᑲᒋᐊᒀ᙮ 12 ᑖᐱᔥᑰ ᓴ ᐅᑲᓇᐎ ᒫᓇᒑᓂᔑᐌ ᑳᔑ ᓇᓈᑐᓀᐙᒡ ᐅᒫᓇᒑᓂᔑᒪᐞ ᑳᑮ ᒥᓯᑌᔥᑳᓂᒡ, ᒦ ᓴ ᑫᓃᓐ ᑫᐃᔑᒋᑫᔮᓐ᙮ ᓂᑲ ᔖᐾᐋᒃ ᓴ ᐱᑯ ᐋᓃᑎ ᑳᑮ ᐃᔑ ᒥᓯᑌᓂᔕᐅᑣᐸᓐ ᐊᐲ ᐁᑮᔑᑲᓂᓂᒃ ᑮᓂᑾᑾᓂᓂᒃ, ᑮᑲᔥᑮᑎᐱᑲᓂᓂᒃ ᑲᔦ᙮ 13 ᐌᑎ ᓴ ᐯᐸᑳᓐ ᐊᑮᕽ ᑳᔑ ᐊᔭᔮᐙᒡ ᓂᑲ ᐅᒋ ᒫᐗᑑᓈᒃ, ᐁᐐ ᐲᓇᒀ ᐅᑕᑮᒥᐗᕽ ᐃᐃᒫ ᐃᔅᕒᐃᔭᓬᐊᑮᕽ᙮ ᒦ ᐄᑐᒃ ᐃᐃᒫ ᑳᔑ ᑭᒋ ᐗᒌᑳᓂᒃ, ᑳᔑ ᐗᐙᓇᑎᓈᓂᒃ ᑲᔦ᙮ ᒥᓯᐌ ᑲᔦ ᑳᐊᔨᔑᑖᓂᐗᓂᓂᒃ ᐁᐐ ᑕᔑ ᐊᔕᒪᒀ ᐁᔑ ᐗᐌᓅᒋ ᒪᔥᑯᓰᑳᓂᒃ᙮ 14 ᐱᓵᓐ ᓴ ᑯ ᓂᑲ ᐸᑭᑎᓈᒃ ᐃᐃᒫ ᑭᒋ ᐗᒌᕽ ᒋᑕᔑ ᐐᓯᓂᐙᒡ ᑳᔑ ᐗᐌᓅᒋ ᒪᔥᑯᓰᑳᓂᒃ᙮ ᑳᔑ ᒪᒥᓄᔥᑯᓯᐗᑳᓂᒃ ᓴ ᑕᔥ ᑲᔦ ᑕᔑ ᐱᒥᔑᓅᒃ᙮ ᑳᔑ ᐗᐌᓅᒋ ᒪᔥᑯᓰᑳᓂᒃ ᓴ ᐃᐃᒫ ᑕᔑ ᐗᐐᓯᓂᐗᒃ ᑳᔑ ᐸᐲᑾᑎᓈᓂᒃ ᐃᔅᕒᐃᔭᓬᐊᑮᕽ Israel᙮ 15 ᓃᓐ ᓴ ᑕᔥ ᐃᑯ ᓂᑲ ᓈᓈᑲᒋᐋᒃ ᓂᒫᓇᒑᓂᔑᒪᒃ᙮ ᓂᑲ ᐃᔑᐎᓈᒃ ᑲᔦ ᑫᔑ ᐊᓉᔑᓄᐙᒡ, ᒦ ᐃ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ 16 ᓂᑲ ᐊᑐᓀᐙᒃ ᓴ ᑳᐗᓂᔑᓄᐙᒡ, ᒋᐲᓇᒀ ᐃᑭ ᑳᐸᐹ ᐗᐙᓀᑕᒥᔥᑳᐙᒡ ᑲᔦ᙮ ᓂᑲ ᓰᑑᐱᓈᒃ ᓴ ᐃᑭ ᑳᐐᓴᑭᔑᓄᐙᒡ, ᒋᐊᑕᐎᐊᒀ ᑲᔦ ᑳᐋᑯᓯᐙᒡ᙮ ᐃᑭ ᑕᔥ ᐐᓐ ᑳᐋᔮᒋᐳᐙᒡ, ᑳᒪᔥᑲᐎᓰᐙᒡ ᓂᐐ ᓂᔑᐗᓈᒋᐋᒃ᙮ ᓃᓐ ᐄᑐᒃ ᐌᐌᓂ ᑳᓈᑲᒋᐋᒡ ᒫᓇᒑᓂᔕᐞ ᑾᔭᒃ ᐁᔑᒋᑫᒡ᙮ 17 ᒦᑕᔥ ᐅᐅ ᓃᓐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᔮᓐ ᐁᓂᓇᑰᒃ ᓂᐱᒫᑎᓰᒪᒃ ᒫᓇᒑᓂᔑᕽ ᐁᓀᓂᒥᓇᑰᒃ, ᑭᐐ ᐅᓈᑯᓂᓂᓂᒻ ᐅᔕ ᓂᒫᓇᒑᓂᔑᒪᒃ ᐌᓂᔑᔑᔦᒃ, ᑳᒪᒋᐊᔮᔦᒃ ᐃᑕᔥ᙮ ᐃᑭ ᑲᔦ ᓂᐐ ᐅᓈᑯᓈᒃ ᐋᐯ ᒫᓇᒑᓂᔕᒃ, ᐋᐯ ᒫᓇᑎᑾᒃ ᑲᔦ᙮ 18 ᑳᐐᓐ ᐃᓇ ᑌᒥᓂᒃ ᑭᑎᓀᑕᓰᒻ ᐁᐅᑕᒋᑫᔦᒃ ᐃᐃᒫ ᑳᔑ ᐌᓅᑕᑭᓐ ᒪᔥᑯᓰᓐ? ᔖᑰᒡ ᑕᔥ ᐅᒋᑕ ᐁᑕᑕᑯᑳᑕᒣᒃ ᐃᐃᐌ ᑳᒦᒋᓯᐌᒃ ᑳᔑ ᐌᓅᑕᑭᓐ ᒪᔥᑯᓰᓐ᙮ ᑳᐐᓐ ᐃᓇ ᑌᒥᓂᒃ ᑭᑎᓀᑕᓰᒻ ᐁᒥᓂᑴᔦᒃ ᑳᐯᑳᑲᒥᒃ ᓂᐱ? ᐅᒋᑕ ᓇ ᑭᑎᔑᒋᑫᒻ ᐁᐸᑴᐲᑭᐌᐱᔥᑲᒣᒃ ᐃᐃ ᓂᐱ ᑮᐃᔥᒀ ᒥᓂᑴᔦᒃ? 19 ᒦ ᓇ ᑕᔥ ᐃᐃᒫ ᓂᒫᓇᒑᓂᔑᒪᒃ ᑫᐅᑕᒋᑫᐙᒡ ᑳᑮ ᑕᑕᑯᑳᑕᒣᒃ? ᒦ ᓇ ᑲᔦ ᐃᐃᒫ ᑫᐅᑖᑲᒪᒋᑫᐙᒡ ᓂᐲᕽ ᑳᑮ ᐃᔑ ᐸᑴᐲᑭᐌᐱᔥᑭᑫᔦᒃ? 20 ᓃᓐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ, ᒦ ᐅ ᐁᓂᓇᑰᒃ ᐁᐐ ᐅᓈᑯᓂᓇᑰᒃ ᒫᓇᒑᓂᔕᒃ ᑳᒪᔥᑲᐙᑎᓯᔦᒃ, ᑲᔦ ᑳᓃᓇᒥᓯᔦᒃ᙮ 21 ᐅᓵᒻ ᐋᓃᔥ ᑳᒪᔥᑲᐙᑎᓯᔦᒃ ᓂᑯᒋ ᑭᑎᔑ ᑳᒋᐌᐱᔥᑲᐙᐙᒃ ᑳᓃᓇᒥᓯᐙᒡ, ᓂᑯᒋ ᑲᔦ ᐁᐃᔑ ᑳᒋᐌᐸᐌᒀ ᑳᓃᓇᒥᓯᐙᒡ, ᒦᔥ ᐲᓂᔥ ᓂᑯᒋ ᐁᔑ ᐃᓈᒧᑮᔦᒃ᙮ 22 ᓂᐐ ᓈᑕᒪᐙᒃ ᐅᔕ ᓂᒫᓇᒑᓂᔑᒪᒃ, ᑳᐐᓐ ᑕᔥ ᒦᓇᐙ ᐐᑳ ᑕᐌᓵᓂᐋᓰᐗᒃ᙮ ᓃᓐ ᓴ ᓂᐐ ᓀᓈᐎᓈᒃ ᓂᒫᓇᒑᓂᔑᒪᒃ ᑳᐅᓂᔑᔑᐙᒡ, ᑳᒪᒑᑎᓯᐙᒡ ᐃᑕᔥ ᐁᐐ ᐅᓈᑯᓇᒀ᙮ 23 ᓂᑲ ᐅᓇᓯᒫᓐ ᓴ ᐯᔑᒃ ᑫᑲᓇᐌᓂᒥᑯᐙᒡ ᐅᑲᓇᐎ ᒫᓇᒑᓂᔑᐌᓐ᙮ ᓂᑕᓄᑮᐋᑲᓇᓐ ᓴ ᑌᐱᑦ David ᐁᔑᓂᑳᓱᓂᒡ ᐅᑲ ᓈᓈᑲᒋᐃᑯᐙᓐ ᑫᐊᔕᒥᑯᐙᒡ᙮ 24 ᓃᓐ ᓴ ᑕᔥ ᑳᑎᐯᒋᑫᔮᓐ ᓂᑲ ᐅᑭᔐᒪᓂᑑᒥᒥᑰᒃ, ᓂᑕᓄᑮᐋᑲᓇᓐ ᐃᑕᔥ ᑌᐱᑑᓐ ᐅᑲ ᑎᐯᓂᒥᑯᐙᓐ ᐁᔑᐊᔮᐙᒡ᙮ ᓃᓐ ᐅᔕ ᑳᑎᐯᒋᑫᔮᓐ ᐅᐅ ᑳᐃᑭᑐᔮᓐ᙮ 25 ᒦᔥ ᒋᐅᔑᑕᒪᐗᒀ ᐊᔓᑕᒫᑫᐎᓐ ᐱᓵᓐ ᒋᐊᔮᐙᒡ᙮ ᓂᑲ ᒑᑭᐃᒫᐞ ᑲᔦ ᐊᔭᐋᐎᔕᐞ ᑳᐋᒀᑎᓯᓂᒡ, ᐱᓵᓐ ᒋᐊᔨᑖᐙᒡ ᐱᑾᑕᑲᒥᒃ, ᐱᓵᓐ ᑲᔦ ᓅᐱᒦᕽ ᒋᓇᓂᐹᐙᒡ᙮ 26 ᒦᑕᔥ ᒋᒥᓄᓭᐙᒡ᙮ ᑕᒥᓄᓭᓂ ᑲᔦ ᐃᐃᒫ ᐙᑳᔭᐄ ᑫᐃᔑᑖᐙᒡ ᓂᐗᒌᒥᕽ᙮ ᓂᑲ ᐃᔑᒋᑫᐙᓐ ᓴ ᒋᑭᒥᐗᓂᓂᒃ ᐊᐲ ᓅᑌᓭᐙᒡ᙮ ᑕᑭᒥᐗᓂᓂ ᓴ ᑫᐊᐲᒋ ᔕᐌᓂᒪᒀ᙮ 27 ᒥᑎᑰᒃ ᓴ ᒥᔕᐗᑲᒥᒃ ᑳᐸᑕᑭᓱᐙᒡ ᐅᑲ ᓂᑖᐎᑭᑑᓈᐙ ᒦᒋᒻ, ᑕᐌᓅᒋ ᓂᑖᐎᑭᓐ ᑲᔦ ᑫᑰᓐ ᐊᑮᕽ, ᒦᔥ ᒋᑭᑫᑕᒧᐙᒡ ᐁᑲᓇᐌᑖᑯᓯᐙᒡ ᐃᐃᒫ ᐅᑕᑮᒥᐙᕽ᙮ ᒦᑕᔥ ᐃᐃ ᒋᑭᑫᑕᒧᐙᒡ ᓃᓐ ᐁᑎᐯᒋᑫᐗᒃ, ᓃᓐ ᑲᔦ ᐁᐲᑯᓇᒧᐗᒃ ᐲᐙᐱᑰᓐ ᑳᒥᒋᒥᓂᑯᐙᒡ, ᓃᓐ ᐁᑮ ᓈᑕᒪᐗᒀ ᐊᐗᔑᒣ ᒋᑲᒀᑕᑭᐃᑯᓯᒀ ᑳᑕᑯᓂᑯᐙᒡ᙮ 28 ᑳᐐᓐ ᑕᔥ ᒦᓇᐙ ᐅᑲ ᑲᒋᔥᑳᓂᒥᐃᑯᓰᐙᐞ ᐯᑳᓉᐙᓇᑭᓯᓂᒡ ᐯᒫᑎᓯᓂᒡ, ᑳᐐᓐ ᑲᔦ ᐊᔭᐋᐎᔕᐞ ᑳᐋᒀᑎᓯᓂᒡ ᐅᑲ ᐸᐹᒣᓂᒥᑯᓰᐗᐞ᙮ ᐱᓵᓐ ᓴ ᑕᐸᐱᒫᑎᓯᐗᒃ, ᑳᐐᓐ ᑲᔦ ᐊᐎᔭᓐ ᒦᓇᐙ ᐅᑲ ᓭᑭᐃᑯᓰᐙᓐ᙮ 29 ᒦᔥ ᑲᔦ ᒋᒦᓇᒀ ᐊᑮᓂ ᑫᑰᓐ ᑫᔑ ᐌᓅᒋ ᓂᑖᐎᑭᓂᓂᒃ, ᑳᐐᓐ ᑕᔥ ᐊᐗᔑᒣ ᑕᑲᐗᔅᑲᑌᓰᐗᒃ᙮ ᑳᐐᓐ ᑕᔥ ᑲᔦ ᐊᐗᔑᒣ ᐯᑳᓉᐙᓇᑭᓯᓂᒡ ᐯᒫᑎᓯᓂᒡ ᐅᑲ ᒫᓀᓂᒥᑯᓰᐙᐞ᙮ 30 ᒦᑕᔥ ᑲᑭᓇ ᒋᑭᑫᑕᒧᐙᒡ ᓃᓐ ᐁᑎᐯᒋᑫᐗᒃ ᐁᐅᑭᔐᒪᓂᑑᒥᒥᐙᒡ ᐃᔅᕒᐃᔭᓬᐊᒃ, ᐁᓈᑕᒪᐗᒀ, ᐁᑎᐯᓂᒪᒀ ᑲᔦ, ᒦ ᐃ ᐁᑭᑐᒡ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ 31 ᑮᓇᐙ ᓂᒫᓇᒑᓂᔑᒪᒃ ᑳᐊᔮᔦᒃ ᑳᔑ ᒪᔥᑯᓰᑳᒃ᙮ ᑮᓇᐙ ᓂᐱᒫᑎᓰᒪᒃ, ᓃᓐ ᐃᑕᔥ ᑭᑭᔐᒪᓂᑑᒥᐙ, ᐃᑭᑐ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society