Hosiiya 6 - ᐅᒋᐺ ᑭᒋᒪᓯᓇᐃᑲᓐᐃᔅᕒᐃᔭᓬᐊᒃ ᑌᐺ ᑮᑴᑳᑎᓯᓯᒀ 1 ᒦᑕᔥ ᐅᐅ ᐯᒫᑎᓯᐙᒡ ᐁᑭᑐᐙᒡ, ᑕᑲ ᑮᐌ ᓈᓯᑲᐙᑖ ᑳᑎᐯᒋᑫᒡ! ᐐᓐ ᐄᑐᒃ ᑳᐐᓴᑫᑕᒧᐃᓇᕽ, ᒦᔥ ᒋᐊᑕᐎᐃᓇᕽ, ᐐᓐ ᑲᔦ ᑳᒫᑭᐃᓇᕽ, ᒦᔥ ᒋᓰᑑᐱᓂᓇᕽ! 2 ᓃᔓᑮᔑᒃ ᑕᔥ ᐃᔑᓭᓂᒃ ᒦ ᐃ ᒋᑮᐌ ᐱᒫᑎᓰᐃᓇᕽ; ᓂᓱᑮᔑᒃ ᑕᔥ ᐃᔑᓭᓂᒃ ᒦ ᐃ ᒋᑮᐌ ᐅᓇᓯᓇᕽ᙮ ᒦᑕᔥ ᐃᐃ ᒋᐱᒫᑎᓯᐗᕽ ᐁᓈᓴᒦᒡ᙮ 3 ᑕᑲ ᓴ ᐃᑭᑐᑖ ᐁᑭᑫᓂᒪᕽ ᑳᑎᐯᒋᑫᒡ; ᒫᓄ ᑲᔦ ᑲᑴ ᑭᑫᓂᒫᑖ᙮ ᑫᒋᓈᒡ ᓴ ᑳᔑ ᒨᑲᐊᕽ ᑮᓯᔅ, ᒦ ᒫᐐᓐ ᐃᐃ ᓇᑫ ᑫᔑ ᓈᓯᑲᐎᓇᕽ᙮ ᑳᔑ ᑭᒥᐗᕽ ᓴ ᑮᓰᑾᕽ, ᒦ ᒫᐐᓐ ᐃᐃ ᓇᑫ ᑫᒋᓈᒡ ᑳᑎᐯᒋᑫᒡ ᑫᔑ ᓈᓯᑲᐎᓇᕽ᙮ 4 ᐅᐅ ᑕᔥ ᑳᑎᐯᒋᑫᒡ ᐃᑭᑐ, ᐄᐸᕒᐃᔭᒻ ᐌᒌᔦᒃ, ᑮᓇᐙ ᑲᔦ ᒎᑕ ᐌᒌᔦᒃ, ᐋᓃᓐ ᑕᔥ ᑫᑑᑕᐎᓇᑰᒃ? ᑖᐱᔥᑰ ᓴ ᑳᐹᔥᑭᓀᔮᒃ ᑮᑭᔐᐹᐗᑲᒃ, ᑳᔕᑭᐊᔮᒃ ᑲᔦ ᑮᑭᔐᐹᐗᑲᒃ ᑭᓉᔥ ᑳᐊᔮᒪᑲᓯᓄᒃ, ᒦ ᓴ ᐃ ᐁᓀᑖᑾᒃ ᑭᓵᑭᐃᐌᐎᓂᐙ᙮ 5 ᒦ ᐅᔕ ᐃ ᑳᐅᒋ ᐃᔑᓂᔕᐗᒀ ᑳᑲᓅᑕᒪᐎᐙᒡ ᐁᔑᐊᔮᔦᒃ ᐁᐱᒥᐎᑑᐙᒡ ᓂᑎᐹᒋᒧᐎᓐ ᐁᐐᑕᒪᐎᓀᒀ ᑳᐐ ᐃᔑ ᑴᑕᑐ ᑎᐹᑯᓂᓂᓇᑰᒃ, ᑳᐐ ᐃᔑ ᓂᔑᐗᓈᒋᐃᓂᓇᑰᒃ ᑲᔦ᙮ ᐃᐃ ᓴ ᑳᐊᑕᐌᑕᒪᐎᓈᓐ ᐐᑫ ᐯᑌᓈᑾᓐ᙮ 6 ᑭᑭᔐᐙᑎᓯᐎᓂᐙ ᐅᔕ ᑳᐊᑕᐌᑕᒫᓐ ᑳᐐᓐ ᐐᓐ ᑳᐸᑭᑎᓈᓲᑕᒪᐎᔦᒃ᙮ ᓇᐗᒡ ᐄᑐᒃ ᓂᑖ ᒥᓉᑖᓐ ᐯᒫᑎᓯᐙᒡ ᒋᑭᑫᓂᒥᐙᐸᓐ ᐊᐲᒡ ᐐᓐ ᒋᐸᑭᑎᓈᓲᑕᒪᐎᐙᐸᓐ᙮ 7 ᑖᐱᔥᑰ ᐋᑕᒻ Adam ᑳᑮᐃᔑ ᐲᑯᓇᕽ ᐃᐃ ᐊᓱᑕᒫᑎᐎᓐ, ᒦ ᓴ ᐃ ᑫᐐᓇᐙ ᑳᑮ ᐲᑯᓇᒧᐙᒡ ᑳᑮ ᐅᔑᑕᒪᐗᒀᐸᓐ᙮ 8 ᐃᐃᒫ ᓴ ᑭᓬᐃᔭᑦ Gilead ᐆᑌᓈᕽ ᐐᑫ ᐹᑏᓄᐗᒃ ᒣᒋᐃᔑᐌᐱᓯᐙᒡ ᐃᓂᓂᐗᒃ, ᑳᓂᑖ ᓂᔑᐌᐙᒡ ᑲᔦ᙮ 9 ᐊᓇᒥᐁᐎᑭᒫᒃ ᓴ ᒦ ᐃ ᐁᔑᒋᑫᐙᒡ ᑖᐱᔥᑰ ᑳᐊᔪᑸᓄᐙᒡ ᐅᑭᒨᒋᔥᑲᒃ ᑳᐊᑲᒪᐙᐙᒡ ᐊᐎᔭᓐ᙮ ᑳᐐᓐ ᓴ ᔖᑴᓂᒧᓰᐗᒃ ᐃᐃᒫ ᐁᑕᔑ ᓂᔑᐌᐙᒡ ᒦᑲᓈᕽ ᐁᓇᒧᓂᓂᒃ ᐌᑎ ᔒᑲᒻ Shechem ᐆᑌᓈᕽ᙮ ᑫᒋᓈᒡ ᓴ ᒪᒋᐃᔑᒋᑫᐗᒃ ᐅᐅ ᑳᑑᑕᒧᐙᒡ᙮ 10 ᓂᐙᐸᑖᓐ ᓴ ᑫᑰᓐ ᐁᑭᒋ ᑲᒀᓂᓴᑫᑖᑾᒃ ᐁᔑᐊᔮᐙᒡ ᐃᔅᕒᐃᔭᓬᐊᒃ; ᑌᐺ ᓴ ᐁᔮᒪᑲᓐ ᐱᔑᒀᒋᒋᑫᐎᓐ ᐃᐃᒫ ᐄᐸᕒᐃᔭᒻ Ephraim ᐊᑮᕽ᙮ ᐃᔅᕒᐃᔭᓬᐊᒃ ᓴ ᐐᓀᑖᑯᓯᐗᒃ᙮ 11 ᑫᑮᓇᐙ ᓴ ᒎᑕ ᐊᑮᕽ ᐁᔮᔦᒃ, ᓂᑮ ᐅᓇᑑᓐ ᐅᔕ ᐊᐲ ᑫᑮᓇᐙ ᐙᓇᓇᐊᓯᓂᓇᑰᒃ ᑭᑎᔑᒋᑫᐎᓂᐙᓐ ᐅᒋ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society