Hosiiya 4 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᑳᔑᐊᓈᒥᒫᒡ ᐃᔅᕒᐃᔭᓬᐊᐞ 1 ᐃᔅᕒᐃᔭᓬᐊᒃ Israel, ᑕᑲ ᐱᓯᑕᐎᒃ ᐁᓂᓀᒃ ᑳᑎᐯᒋᑫᒡ᙮ ᑳᑎᐯᒋᑫᒡ ᐅᔕ ᑫᑰᓂᓂ ᐅᑕᔮᓐ ᐁᔑ ᒫᓈᐸᒥᓀᒃ ᐅᐅᒫ ᐊᑮᕽ ᑳᑕᔑ ᐱᒫᑎᓯᔦᒃ; ᒦᔥ ᐅᐅ ᐁᓂᓀᒃ, ᑳᐐᓐ ᓴ ᑲᓇᑫ ᑌᐺᔦᑖᑯᓯᐎᓐ, ᓵᑭᐃᐌᐎᓐ ᑲᔦ ᐊᔮᓯᓅᓐ ᐅᐅᒫ ᐊᑮᕽ᙮ ᐯᒫᑎᓯᐙᒡ ᑲᔦ ᑳᐐᓐ ᐃᑭᑐᓰᐗᒃ ᐁᑭᔐᒪᓂᑑᐎᐗᒃ᙮ 2 ᒦ ᐁᑕ ᑯ ᐁᔑᒋᑫᓈᓂᐗᕽ ᐁᒪᒋ ᑳᑮᑭᑐᕽ, ᐁᑮᐗᓂᒧᓈᓂᐗᕽ, ᐁᓂᓯᑎᕽ, ᐁᑮᒨᑎᕽ, ᐁᐱᔑᒀᑎᓯᕽ ᑲᔦ᙮ ᓅᒋ ᐃᔑᒋᑫᐎᓐ ᐁᐊᓂ ᐹᑏᓇᑎᕽ, ᐁᐊᓂ ᐊᔮᓂᑫ ᓂᓯᑎᓈᓂᐗᕽ᙮ 3 ᒦᑕᔥ ᑳᐅᒋ ᒪᐎᓈᓂᐗᕽ ᐃᐃᒫ ᐊᑮᕽ ᐋᓃᔥ ᐯᒫᑎᓯᐙᒡ ᐃᐃᒫ ᐊᑮᕽ ᐊᓂ ᓂᔑᐗᓈᑎᓯᐗᒃ᙮ ᐊᔭᐋᐎᔕᒃ ᒥᔕᐗᑲᒥᒃ ᐁᔮᐙᒡ, ᐱᓀᔒᔕᒃ ᑲᔦ ᐯᐹᒥᓭᐙᒡ ᐃᔥᐱᒥᕽ, ᐃᑭ ᑲᔦ ᑮᑰᔭᒃ ᑭᒋᑲᒦᕽ ᐁᔮᐙᒡ ᑲᑭᓇ ᑕᓂᐳᐗᒃ᙮ ᑳᑎᐯᒋᑫᒡ ᑮᐊᓈᒥᒫᒡ ᐊᓇᒥᐁᐎᑭᒫᐞ 4 ᑕᑲ ᑫᑯ ᐊᐎᔭ ᑕᒪᒥᔑᑖᑯᓯᓰ, ᑫᑯ ᑲᔦ ᐊᐎᔭᒃ ᑕᐊᓈᒣᓂᑎᓰᐗᒃ᙮ ᑮᓇᐙ ᐅᔕ ᑳᐊᓇᒥᐁᐎᑭᒫᐎᔦᒃ ᑳᒫᓈᐸᒥᓇᑰᒃ᙮ 5 ᐁᑕᓱ ᑮᔑᒃ, ᐁᑕᓱ ᑎᐱᒃ ᑲᔦ ᐁᐃᓀᑖᑾᒃ ᐁᐸᐹᐱᓱᑫᔑᓀᒃ, ᑭᔐᒪᓂᑑᓐ ᑫᓅᑕᒪᐙᐙᒡ ᐁᐐᒋᐎᓀᒀ᙮ ᒦᔥ ᑳᐐ ᐅᒋ ᓂᔑᐗᓈᒋᐊᒃ ᑭᒫᒫᐙ, ᐃᔅᕒᐃᔭᓬ ᐊᑭ ᑳᐃᑕᒫᓐ᙮ 6 ᐁᑭᑫᓂᒥᓯᒀ ᐅᔕ ᓂᐱᒫᑎᓰᒪᒃ ᑳᐅᒋ ᓂᔑᐗᓈᑎᓯᐙᒡ᙮ ᐋᓃᔥ ᑮᓇᐙ ᑭᑎᑭᑐᒻ ᐁᑭᑫᓂᒥᓯᐌᒃ, ᑭᑖᓇᐌᑖᒻ ᓴ ᑲᔦ ᑳᐃᓈᑯᓂᑫᔮᓐ ᐁᑭᔐᒪᓂᑑᐎᔮᓐ᙮ ᒦᑕᔥ ᑳᐅᒋ ᐋᓇᐌᓂᒥᓇᑰᒃ ᐊᓇᒥᐁᐎᑭᒫᐎᔦᒃ, ᑳᐅᒋ ᐋᓇᐌᓂᒪᒀ ᑕᔥ ᑲᔦ ᑭᓃᒑᓂᓯᐙᒃ᙮ 7 ᐋᓇᑮ ᐊᓂ ᐹᑏᓄᐙᒡ ᓴ ᑕᔥ ᐊᓇᒥᐁᐎᑭᒫᒃ, ᒦ ᓴ ᐃ ᐋᒋᑯ ᐊᓂᔑ ᑳᒋ ᒪᒋᑑᑕᐎᔦᒃ᙮ ᐃᐃ ᓴ ᑳᔑ ᑭᑌᑖᑯᓯᔦᑭᐸᓐ ᓂᐐ ᑴᑭᓈᓐ ᒣᔥᑾᒡ ᑕᔥ ᑭᑲ ᐊᑲᑌᑖᑯᓯᒻ᙮ 8 ᑳᔑ ᒪᒋᐃᔑᐌᐱᓯᐙᒡ ᓂᐱᒫᑎᓰᒪᒃ ᒦ ᐃᒫ ᐌᒋ ᐌᓅᑎᓯᔦᒃ, ᒦᔥ ᑳᐅᒋ ᐊᑕᐌᓂᒣᒀ ᐋᒋᑯ ᒋᐊᓂ ᒪᒋᐃᔑᒋᑫᐙᒡ᙮ 9 ᒦᑕᔥ ᐯᔑᑾᓐ ᑫᑮᓇᐙ ᑫᔑ ᓇᓇᐊᓯᓇᑰᒃ ᑫᔑ ᓇᓇᐊᓴᒀ ᐯᒫᑎᓯᐙᒡ᙮ ᒦᔥ ᑲᑭᓇ ᑳᐐ ᐅᒋ ᓇᓇᐊᓯᓇᑰᒃ ᒋᑎᐸᐊᒣᒃ ᐋᓃᓐ ᐁᔑ ᒪᒋᐃᔑᐌᐱᓯᔦᒃ᙮ 10 ᐋᓇ ᑕᔥ ᐅᑕᒋᑫᔦᒃ ᐸᑭᑎᓈᓱᐎᓂᕽ, ᔖᑰᒡ ᓴ ᑭᑲ ᓅᑌᔅᑲᑌᒻ᙮ ᐋᓇ ᑕᔥ ᐱᔑᒀᒋᒋᑫᔦᒃ, ᑳᐐᓐ ᑕᔥ ᑭᑲ ᐊᓂ ᐹᑏᓄᓰᒻ, ᐋᓃᔥ ᑭᑮ ᓇᑲᓈᐙ ᑭᑭᔐᒪᓂᑑᒥᐙ ᐸᑳᓐ ᒪᓂᑑᒃ ᐁᐱᒥᓂᔕᐌᒀ᙮ ᑳᑎᐯᒋᑫᒡ ᑮᐋᓍᐸᑕᕽ ᒪᓂᑑᑫᐎᓐ 11 ᒦᔥ ᐁᑭᑐᒡ ᑳᑎᐯᒋᑫᒡ, ᒦ ᓴ ᐃ ᑳᐅᒋ ᐅᓂᓯᑐᑕᒫᐎᓂᓯᒀ ᐅᓵᒻ ᐁᐃᔒᑲᒧᐙᒡ ᐱᔑᒀᒋᒋᑫᐎᓐ, ᑫᑌ ᔔᒥᓈᐴᓂ, ᐅᔥᑭ ᔔᒥᓈᐴᓂ ᑲᔦ᙮ 12 ᒥᑎᑯ ᒪᓂᑑᑳᓇᐞ ᓴ ᑫᑰᓂᓂ ᐅᑲᑴᒋᒫᐙᐞ, ᒦᔥ ᑲᔦ ᒥᑎᑯᓂ ᐄᓴᓐ ᐁᔑ ᓇᑴᑖᑯᐙᒡ᙮ ᒦᔥ ᐁᔑ ᓇᑲᔑᐙᒡ ᐱᔑᒀᒋᑴᕽ ᐁᐃᓀᑖᑯᓯᐙᒡ ᑾᔭᒃ ᐁᑑᑕᐙᓯᒀ ᐅᑭᔐᒪᓂᑑᒥᐙᓐ᙮ 13 ᐌᑎ ᓴ ᑭᒋ ᐗᒌᐗᑎᓈᑳᕽ ᐃᔑ ᓂᑖ ᐸᑭᑎᓈᓱᐗᒃ, ᐌᑎ ᑲᔦ ᐁᔑ ᐗᐗᑭᑕᑎᓈᓂᒃ ᐃᔑ ᓂᑖ ᒥᓈᓯᑫᐗᒃ ᐁᔑ ᒥᓄ ᐊᑲᐙᑌᑭᓱᓂᒡ ᐅᐅ ᐅᒃ ᑎᓄᐙᑎᑰᐞ oak, ᐊᓵᑏᐞ poplar, ᑌᕒᐊᐱᓐᑦ terebinth ᑲᔦ ᑎᓄᐙᑎᒃ᙮ ᒦ ᓴ ᑕᔥ ᐃᐃ ᑭᑖᓂᓯᐙᒃ ᑳᐊᓂ ᐅᒋ ᐱᔑᒀᒋᑴᐎᐙᒡ ᑭᔑᒥᓯᐙᒃ ᑲᔦ ᑳᐊᓂ ᐅᒋ ᐐᐯᒫᐙᒡ ᑯᑕᒃ ᐃᓂᓂᐗᐞ᙮ 14 ᑳᐐᓐ ᐃᑕᔥ ᓂᐐ ᓇᓇᐊᓵᓰᒃ ᑭᑖᓂᓯᐙᒃ ᑮᐊᓂ ᐱᔑᒀᒋᑴᐎᐙᒡ, ᑭᔑᒥᓯᐙᒃ ᑲᔦ ᑮᐊᓂ ᐅᒋ ᐐᒌᐙᐙᒡ ᑯᑕᒃ ᐃᓂᓂᐗᐞ, ᐅᓵᒻ ᐋᓃᔥ ᑳᐃᓂᓃᐎᔦᒃ ᑫᑮᓇᐙ ᑭᓈᓯᑲᐙᐙᒃ ᐱᔑᒀᒋᑴᐗᒃ, ᑭᐐᒋ ᐸᑭᑎᓈᓲᒫᐙᒃ ᑲᔦ ᐱᔑᒀᒋᑴᐗᒃ ᐁᔮᐙᒡ ᑭᒋ ᐊᓇᒥᐁᐎᑲᒥᑯᕽ᙮ ᐯᒫᑎᓯᐙᒡ ᓴ ᑳᐅᓂᓯᑐᑕᒧᐎᓂᓯᒀ ᑕᓂᔑᐗᓈᑎᓯᐗᒃ! 15 ᐋᓇ ᓴ ᑯ ᐱᔑᒀᒋᒋᑫᔦᒃ ᐃᔅᕒᐃᔭᓬ ᐊᑮᕽ ᐌᒌᔦᒃ, ᑕᑲ ᑳᐐᓐ ᐃᐃ ᐯᔑᑾᓐ ᒎᑕ ᐊᑮᕽ ᐌᒌᐙᒡ ᑕᐃᔑᒋᑫᓰᐗᒃ᙮ ᑫᑯ ᐃᔖᑫᒃ ᑭᓬᑲᓬ Gilgal ᐆᑌᓈᕽ, ᑯᒫ ᑲᔦ ᐌᑎ ᐯᑦ ᐁᐸᓐ Beth-aven ᒋᐊᐎ ᐊᓇᒥᐋᔦᒃ᙮ ᑫᑯ ᑲᔦ ᐊᐱᒧᐙᑫᒃ ᑳᑎᐯᒋᑫᒡ ᐅᐐᓱᐎᓐ ᒋᐃᑭᑐᔦᒃ, ᑌᐺ ᓴ ᑯ ᑳᔑ ᐱᒫᑎᓯᒡ ᑳᑎᐯᒋᑫᒡ! 16 ᐃᔅᕒᐃᔭᓬᐊᒃ ᓴ ᒦ ᐃ ᐁᓀᑖᑯᓯᐙᒡ ᑖᐱᔥᑰ ᑳᐁᔖᐙᑎᓯᓯᒃ ᐱᔑᑮᔅ, ᐋᓃᓐ ᐃᑕᔥ ᐃᓈ ᑫᔑ ᐊᔕᒪᒀᐸᓐ ᐁᔑ ᒪᔥᑯᓰᑳᓂᒃ ᑖᐱᔥᑰ ᑳᑑᑕᐎᓐᒡ ᒫᓇᒑᓂᔐᔅ? 17 ᐃᔅᕒᐃᔭᓬᐊᒃ ᓴ ᐃᔑ ᐊᑸᐗᒃ ᒪᓂᑑᑫᐎᓂᕽ, ᑫᑯ ᑕᔥ ᐸᐹᒣᓂᒫᑫᒀᓂᒃ᙮ 18 ᒥᓴᐙ ᑯ ᑮᒑᑭᓭᐙᒡ ᑳᒥᓂᒀᑕᒧᐙᒡ, ᒦ ᐃ ᑳᐐᓐ ᒋᐐ ᐴᓂᑑᐙᒡ ᐅᐱᔑᒀᒋᒋᑫᐎᓂᐙᓐ; ᓇᐗᒡ ᐁᐊᑕᐌᑕᒧᐙᒡ ᒋᐊᑲᑌᑖᑯᓯᐙᒡ ᐊᐲᒡ ᐐᓐ ᒋᑭᑌᓂᒥᑣᐸᓐ᙮ 19 ᔑᐱᒋᒎᔑᕽ ᓴ ᑕᔥ ᑕᔑ ᒫᒌ ᐌᐹᔑᐗᒃ᙮ ᐃᐃ ᓇᑫ ᑳᔑ ᓂᑖ ᐸᑭᑎᓈᓱᐙᒡ, ᒦ ᐃᒫ ᑫᐅᒋ ᐊᑲᑌᑖᑯᓯᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society