Hosiiya 14 - ᐅᒋᐺ ᑭᒋᒪᓯᓇᐃᑲᓐᐅᓰᔭ ᑮᑲᓅᓈᒡ ᐃᔅᕒᐃᔭᓬᐊᐞ 1 ᐃᔅᕒᐃᔭᓬᐊᒃ Israel, ᑕᑲ ᑮᐌᓄᑕᐎᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ ᑭᒪᒋᑑᑕᒧᐎᓂᐙᓐ ᐅᔕ ᑳᐱᓱᑫᔥᑳᑯᔦᒃ ᑳᐅᒋ ᐸᑭᔑᓀᒃ᙮ 2 ᑮᐌ ᓈᓯᑲᐎᒃ ᑳᑎᐯᒋᑫᒡ, ᒦᔥ ᐅᐅ ᑫᔑ ᐊᓇᒥᐁᑕᐌᒃ, ᐴᓀᑕᓐ ᑲᑭᓇ ᑳᔑ ᒪᒋᐃᔑᐌᐱᓯᔮᕽ, ᐱᓵᓐ ᑕᔥ ᐅᑖᐱᓂᔑᓈᒻ᙮ ᓃᓇᐎᓐᑦ ᓴ ᓂᑑᓂᓈᓂᕽ ᒋᐅᒋ ᒦᑴᒋᐌᓂᒥᑰᔭᓐ᙮ 3 ᐊᓰᕒᐃᔭ Assyria ᐊᑮᕽ ᑳᐅᒌᐙᒡ ᓴ ᑳᐐᓐ ᓂᑖ ᐱᒫᒋᐃᑯᓰᓈᓂᒃ; ᒦᑳᓱᐎ ᒥᑕᑎᒨᒃ ᑲᔦ ᑳᐐᓐ ᓂᑲ ᓈᑕᒫᑯᓰᓈᓂᒃ᙮ ᑳᐐᓐ ᑲᔦ ᒦᓇᐙ ᐐᑳ ᓂᑲ ᐃᓈᓯᐙᓈᓂᒃ ᓂᓂᒌᓈᓂᕽ ᑳᑮ ᐅᒋ ᐅᔑᐊᑭᑣ, ᓂᒪᓂᑑᒥᓈᓂᒃ᙮ ᑌᐯᒋᑫᔭᓐ, ᑮᓐ ᐄᑐᒃ ᑭᑰᐹᑌᓂᒫᒃ ᐅᑯ ᐊᐎᔭᒃ ᑸᐗᔑᔖᓇᒃ᙮ ᑳᑎᐯᒋᑫᒡ ᑮᐊᔓᑕᒪᐙᒡ ᐅᔥᑭᐱᒫᑎᓯᐎᓐ ᐃᔅᕒᐃᔭᓬᐊᐞ 4 ᒦᑕᔥ ᐅᐅ ᑳᑎᐯᒋᑫᒡ ᐁᑭᑐᒡ, ᓂᑲ ᑮᐌ ᓈᓯᑲᐙᒃ ᓴ ᓂᐱᒫᑎᓰᒪᒃ ᒋᐲᓇᒀ ᑳᔑ ᐊᔮᐗᒃ᙮ ᐗᐐᑫ ᓴ ᑯ ᓂᑲ ᔕᐌᓂᒫᒃ; ᑳᐐᓐ ᐊᐗᔑᒣ ᓂᑲ ᓂᔥᑭᐃᑯᓰᒃ᙮ 5 ᑳᔕᑭᐊᔮᒃ ᓴ ᓂᑲ ᐃᓀᓂᒥᑰᒃ ᐃᔅᕒᐃᔭᓬᐊᒃ, ᒦᔥ ᒋᑮᔑᑭᐙᒡ ᑖᐱᔥᑰ ᐙᐱᑾᓃᓐ᙮ ᑖᐱᔥᑰ ᑮᔥᑳᑎᒃ ᓬᐁᐸᓇᓐ ᐊᑮᕽ ᑳᑯᑖᐎᑭᓂᓂᑭᓐ ᐅᒌᐱᑰᓐ ᐊᓈᒪᑲᒥᒃ, 6 ᒦᔥ ᐃᐃᒫ ᑫᐅᒋ ᒫᒌᑭᐙᒡ, ᒋᐊᓂ ᐊᐲᒋ ᒥᓄᓈᑯᓯᐙᒡ ᑖᐱᔥᑰ ᐋᓬᐃᑉ ᑎᓄᐙᑎᒃ ᑳᔑ ᒥᓄᓈᑯᓯᒡ᙮ ᒦᑕᔥ ᑫᐊᐲᒋ ᒥᓄᒫᑯᓯᐙᒡ ᑖᐱᔥᑰ ᑳᐃᔑ ᒫᑯᓯᐙᒡ ᑮᔥᑳᑎᑰᒃ ᓬᐁᐸᓇᓐ ᐊᑮᕽ ᐁᔮᐙᒡ᙮ 7 ᒦᑕᔥ ᒦᓇᐙ ᒋᑕᔑ ᐱᒫᑎᓯᐙᒡ ᑫᔑ ᑲᓇᐌᓂᒪᒀ᙮ ᒦᑕᔥ ᑲᔦ ᑫᔑ ᓂᑖᐎᑭᐙᒡ ᑖᐱᔥᑰ ᐸᑴᔑᑲᓐ ᑳᔑ ᒥᓄ ᓂᑖᐎᑭᒡ, ᑕᐃᔑ ᑮᔑᑭᐗᒃ ᑖᐱᔥᑰ ᔔᒥᓈᑎᒃ ᑳᔑ ᓂᑖᐎᑭᒋᑫᒡ᙮ ᐐᑫ ᑕᔥ ᑕᑭᑫᑖᑯᓯᐗᒃ ᑖᐱᔥᑰ ᑳᔑ ᑭᑫᑖᑾᒃ ᔔᒥᓈᐳ ᐃᐃᒫ ᓬᐁᐸᓇᓐ ᑳᐅᒌᒃ᙮ 8 ᑮᓇᐙ ᐄᐸᕒᐃᔭᒻ ᑳᐅᒌᔦᒃ, ᐋᓃᓐ ᑕᔥ ᑫᑑᑕᐗᒀ ᑭᒪᓂᑑᒥᐙᒃ? ᓃᓐ ᐄᑐᒃ ᑳᓇᑴᑕᐎᓇᑰᒃ, ᓃᓐ ᑲᔦ ᑳᑲᓇᐌᓂᒥᓇᑰᒃ᙮ ᒦ ᐃ ᐁᓀᑖᑯᓯᔮᓐ ᑖᐱᔥᑰ ᓃᓐ ᐊᐊ ᔑᒀᒃ ᑳᓀᐱᒋ ᐅᓵᐗᔥᑯᓯᒡ, ᒦᑕᔥ ᐃᐃᒫ ᐌᑎᓇᒣᒃ ᐃᐃ ᑳᓂᑖᐎᑭᑑᔦᒃ᙮ ᒦ ᐅᐌ ᐁᐊᓂᑮᔑᐲᐃᑳᑌᒃ 9 ᐊᐌᓀᓐ ᑕᔥ ᑫᑮᑖᐌᑕᕽ? ᐊᐌᓀᓐ ᑕᔥ ᓀᓯᑐᑕᒧᐎᓂᒡ? ᒦᐗᒃ ᓴ ᐃᑭ ᑳᑭᑫᑕᒧᐙᒡ, ᑳᓂᓯᑐᑕᒧᐙᒡ ᐅᐅᐌᓂ᙮ ᑳᑎᐯᒋᑫᒡ ᐅᑎᔑᑣᐎᓐ ᐁᑾᔭᑯᓈᑾᓂᓂᒃ; ᐅᑾᔭᒀᑎᓰᒃ ᑲᔦ ᐅᐅ ᓇᑫ ᐃᔑ ᐱᒧᓭᐗᒃ᙮ ᐃᑭ ᑕᔥ ᑳᔕᔒᐱᑕᒧᐙᒡ ᒦ ᐅᒫ ᐁᔑ ᐱᓱᑫᔑᓄᐙᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society