Hosiiya 13 - ᐅᒋᐺ ᑭᒋᒪᓯᓇᐃᑲᓐᐁᐐᑌᓂᒃ ᐋᓃᓐ ᐃᔅᕒᐃᔭᓬᐊᒃ ᐃᔥᒀᒡ ᐙᐃᓈᑯᓂᑣ 1 ᐄᐸᕒᐃᔭᒻ Ephraim ᐌᒌᐙᒡ ᓴ ᑫᑰᓐ ᑮᐃᑭᑐᐙᐸᓐ, ᑯᑕᒃ ᐃᔅᕒᐃᔭᓬᐊᐞ ᑮᓭᑭᓯᐗᐞ᙮ ᐐᓇᐙ ᒫᐗᒡ ᑮᓃᑳᓀᑖᑯᓯᐗᒃ᙮ ᒦᑕᔥ ᑳᑮ ᒪᒋᐃᔑᒋᑫᐙᒡ ᐁᑮ ᐊᓇᒥᐁᑕᐙᐙᒡ ᒪᓂᑑᑳᓇᓐ ᐯᔭᓬ Baal ᐁᓂᒥᓐᒡ᙮ ᒦᑕᔥ ᐃᐃ ᑳᑮ ᐅᒋ ᓂᐳᐙᒡ᙮ 2 ᒦᑕᔥ ᐊᐗᔑᒣ ᐁᓂᔑ ᑳᒋ ᒪᒋᑑᑕᒧᐙᒡ ᐙᐹᐱᑯ ᔔᓂᔮ ᐙᐱᑯᕽ ᐁᐅᒋ ᐅᔑᑕᒫᓱᐙᒡ ᒪᓂᑑᑳᓇᐞ᙮ ᐐᑫ ᓴ ᑯ ᐅᒥᓄᓈᑯᐋᐙᐞ, ᑲᑭᓇ ᑯ ᐲᐙᐱᑯᑫᐎᓂᓂᐗᓐ ᐁᐅᔑᐋᓂᒡ᙮ ᒦᔥ ᐁᑭᑐᐙᒡ, ᐊᐎᔪᒃ, ᐊᐎᔭᐎ ᐱᑭᑎᓈᓱᐎᓇᓐ ᐸᑭᑎᓈᓲᑕᒪᐎᑾᒃ! ᒦᔥ ᑲᔦ ᐁᔑ ᐅᒌᒫᐙᒡ ᐃᐃ ᐱᔑᑮᓯᐎ ᐅᔑᒋᑲᓇᐞ᙮ 3 ᒦᑕᔥ ᑫᐃᔑᓈᑯᓯᐙᒡ ᑖᐱᔥᑰ ᑳᐹᔥᑭᓀᔮᒃ ᑮᑭᔐᐹᐗᑲᒃ, ᑖᐱᔥᑰ ᑲᔦ ᑳᔕᑭᐊᔮᒃ ᐐᐸ ᑳᓂ ᐊᑾᒃ᙮ ᑖᐱᔥᑰ ᑲᔦ ᐸᑴᔑᑲᓂᒥᓐ ᐅᑯᓄᔮᓐ ᑳᐅᒋ ᐅᒻᐺᔮᓯᕽ ᐁᑕᔑ ᐸᐎᑲᓈᒋᑫᕽ, ᑖᐱᔥᑰ ᑲᔦ ᐅᑭᒌᑳᓐ ᑳᐹᔥᑭᓀᒃ; ᒦ ᐃ ᐁᓀᑖᑯᓯᐙᒡ᙮ 4 ᓃᓐ ᐄᑐᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᓵᑭᒋᐎᓂᓀᒃ ᐄᒋᐸᑮᕽ᙮ ᑳᐐᓐ ᑯᑕᒃ ᒪᓂᑑ ᑭᑭᑫᓂᒫᓯᐙᐙ, ᓃᓐ ᐁᑕ ᑯ᙮ ᑳᐐᓐ ᑯᑕᒃ ᐊᔮᓰ ᐯᒫᒋᐃᐌᒡ, ᓃᓐ ᐁᑕ ᑯ᙮ 5 ᓃᓐ ᓴ ᑳᑮ ᑲᓇᐌᓂᒥᓇᑰᒃ ᐌᑎ ᐱᑾᑕᑲᒥᒃ ᑳᔑ ᑭᔑᑌᒃ᙮ 6 ᐊᐲ ᓴ ᑮᐊᔕᒪᒀᐸᓐ, ᐁᑮ ᑌᐐᓯᓂᐙᒡ, ᒦ ᓴ ᐃ ᑳᐊᓂ ᐃᔑ ᑭᒋ ᐃᓀᓂᑎᓱᐙᒡ, ᒦᔥ ᑳᐃᔑ ᐗᓃᑫᓄᑕᐎᐙᒡ᙮ 7 ᒥᔑᐱᔒᕽ ᓴ ᑕᔥ ᓂᑲ ᐃᓀᑖᑯᓰᑲᑕᐙᒃ᙮ ᑖᐱᔥᑰ ᑭᒋ ᐴᔒᔅ ᑳᐊᑲᑑᒡ ᒦᑲᓈᕽ, ᒦ ᓴ ᐃ ᑫᔑ ᐊᑲᒪᐗᒀ᙮ 8 ᑖᐱᔥᑰ ᓴ ᒪᑾ ᑳᐃᔑᒋᑫᒡ ᑳᒪᑲᒥᓐᒡ ᐅᒪᑰᓯᒪᐞ, ᒦ ᓴ ᐃᐃᓇᑫ ᑫᔑ ᒦᑳᓇᒀ, ᒋᐸᑯᒌᐱᓇᒀ᙮ ᑖᐱᔥᑰ ᒥᔑᐱᔑᐤ ᑳᔑ ᑭᑕᒧᐌᒡ ᓂᑲᔑ ᑭᑕᒸᒃ᙮ ᓂᑲ ᐲᓯᐱᓈᒃ ᑖᐱᔥᑰ ᑳᔑ ᐲᓯᐱᔑᐌᓂᒡ ᐱᑾᒋ ᐊᔭᐋᐎᔕᓐ᙮ 9 ᑮᓇᐙ ᐃᔅᕒᐃᔭᓬᐊᒃ, ᒦ ᐅᐌ ᑳᐅᒋ ᓂᔑᐗᓈᑎᓯᔦᒃ ᐁᐋᓍᐸᒥᔦᒃ ᐋᓇ ᐎ ᐐᒋᐃᓇᑰᒃ᙮ 10 ᐋᓃᑎ ᑕᔥ ᐁᔮᒡ ᑭᑭᒋᐅᑭᒫᒥᐙ ᑫᔖᐾᐃᓀᑭᐸᓐ? ᐋᓃᑎ ᑲᔦ ᐁᔮᐙᒡ ᐃᑭ ᑲᑭᓇ ᑳᓃᑳᓂᓰᑕᒪᐎᓀᒀ ᑫᓈᑕᒪᐎᓀᒀᐸᓐ? ᒦᐗᒃ ᐄᑐᒃ ᐃᑭ ᑳᑮ ᑲᑴᑗᔦᑭᐸᓐ ᐁᑮ ᐃᑭᑐᔦᑭᐸᓐ, ᑕᑲ ᒦᔑᔑᓈᒻ ᑭᒋᐅᑭᒫ, ᑳᓃᑳᓂᓯᐙᒡ ᑲᔦ! 11 ᒦᔥ ᑳᑮ ᓂᔥᑳᑎᓯᔮᓐ ᐁᒦᓂᓇᑰᒃ ᑭᒋᐅᑭᒫ᙮ ᒦᔥ ᑳᑮ ᐅᑖᐱᓇᒃ ᑭᑑᑭᒫᒥᐙ ᐁᐋᑯᑭᑖᓱᔮᓐ᙮ 12 ᐁᔑ ᒪᒋᑑᑕᒧᐙᒡ ᓴ ᐄᐸᕒᐃᔭᒻ ᐌᒌᐙᒡ ᑲᓇᐌᒋᑳᑌᓂᐗᓐ, ᐅᔑᐲᐃᑳᑌᓂᐗᓐ ᑲᔦ ᐁᓇᐃᓂᑳᑌᓂᑭᓐ᙮ 13 ᐃᔅᕒᐃᔭᓬᐊᒃ ᓴ ᑕᐱᒫᑎᓯᐗᒃ, ᐅᓵᒻ ᐃᑕᔥ ᑲᑮᐹᑎᓯᐗᒃ ᐃᐃ ᒋᐃᔑᒋᑫᐙᐸᓐ᙮ ᒦ ᓴ ᐃ ᐁᓀᑖᑯᓯᐙᒡ ᑖᐱᔥᑰ ᐊᐱᓅᒌᔥ ᐋᔕ ᑫᑳ ᑳᓂᑖᐎᑭᒡ, ᑳᐃᓀᑕᓯᒃ ᐃᑕᔥ ᒋᐱ ᓵᑲᐊᕽ ᑫᐅᒋ ᓂᑖᐎᑭᐸᓐ᙮ 14 ᓂᑲ ᐅᒋ ᔖᐾᐋᒃ ᓴ ᐁᔑᐊᔮᓂᒡ ᑳᓂᐳᓂᒡ, ᓂᐳᐎᓂᕽ ᑲᔦ ᓂᑲ ᐅᒋ ᑮᐌ ᐱᒫᒋᐋᒃ᙮ ᓂᐳᐎᓐ, ᐋᓃᑎ ᑕᔥ ᐁᔮᑭᓐ ᑭᑎᓈᐱᓇᒋᑫᐎᓇᓐ? ᒌᐯᑲᒥᒃ, ᐋᓃᑎ ᑕᔥ ᐃᐃ ᑭᓂᔑᐗᓈᒋᐃᐌᐎᓐ? ᑳᐐᓐ ᓴ ᓂᑲ ᑰᐹᑌᓂᒥᐌᓰ᙮ 15 ᒥᓴᐙ ᓴ ᑯ ᐃᔅᕒᐃᔭᓬᐊᒃ ᐊᓂ ᐹᑏᓄᐙᒡ ᑖᐱᔥᑰ ᒪᔥᑯᓯᐗᓐ, ᑳᑎᐯᒋᑫᓂᒡ ᓴ ᐙᐸᓄᕽ ᐃᓇᑫ ᐁᔑᐊᔮᓂᒃ ᐱᑾᑕᑲᒥᒃ ᑕᐅᑖᓂᒪᓄᑫᐗᓐ᙮ ᒦᔥ ᒋᐃᔅᑲᑌᓂᒃ ᑳᒨᑭᒋᐗᓂᓂᒃ, ᐅᓂᐲᒥᐙ ᐅᑑᑕᐃᐹᓂᐙᓐ ᑲᔦ᙮ ᐅᑕᑖᓱᐎᑲᒥᑯᐙᓐ ᑲᔦ ᑕᒪᔕᔥᑯᓂᑳᑌᓂᐗᓐ ᐋᓃᓐ ᐁᔑ ᐌᓅᑕᓂᓂᑭᐸᓀᓐ᙮ 16 ᐯᒫᑎᓯᐙᒡ ᐊᔮᐙᒡ ᓴᒣᕒᐃᔭ Samaria ᓴ ᐐᓇᐙ ᐱᑯ ᑕᓇᓇᐊᓵᐗᒃ ᐃᐃ ᐅᒋ ᑳᔑ ᒪᒋᑑᑕᒧᐙᒡ ᐋᓃᔥ ᐅᔕᔒᐱᑕᐙᐙᓐ ᐅᑭᔐᒪᓂᑑᒥᐙᓐ᙮ ᐸᔑᐸᐃᑫᐎᑯᒫᓂᕽ ᓴ ᑕᐅᒋ ᓂᓵᐗᒃ᙮ ᐅᑕᐱᓅᒌᔑᒥᐙᐞ ᓴ ᑕᔥ ᒥᑕᑲᒥᒃ ᑕᔑ ᐋᐱᒋᔑᒫᐗᐞ᙮ ᐅᑎᑴᒥᐙᐞ ᑫᑭᔥᑲᐙᐗᓱᓂᒡ ᓴ ᑕᑖᑐᒌᐌᐱᔣᐗᐞ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society