Hosiiya 12 - ᐅᒋᐺ ᑭᒋᒪᓯᓇᐃᑲᓐ1 ᐄᐸᕒᐃᔭᒻ ᐌᒌᐙᒡ ᓴ ᒦ ᐃ ᐁᔑᓈᑯᓯᐙᒡ ᑖᐱᔥᑰ ᐁᐱᒥᓂᔕᐊᒧᐙᒡ ᓅᑎᓐ᙮ ᐁᐱᒥᓂᔕᐊᒧᐙᒡ ᐙᐸᓂ ᓅᑎᓐ ᑲᐯᑮᔑᒃ, ᒦᔥ ᐁᔑ ᐹᑏᓇᑑᐙᒡ ᐁᔑ ᑮᐗᓂᒧᐙᒡ, ᐁᔑ ᐅᒻᐺᑲᒥᑭᓯᐙᒡ ᑲᔦ᙮ ᒦ ᐃ ᐁᓈᐙᒡ ᐊᓰᕒᐃᔭ Assyria ᐊᑮᕽ ᐌᒌᓂᒡ ᐱᓵᓐ ᐁᐐ ᐐᒌᐙᐙᒡ, ᐁᐃᔑᓂᔕᐊᒪᐙᐙᒡ ᑲᔦ ᐋᓬᐃᑉ ᑎᓄ ᐱᒥᑌᓂ ᐄᒋᐸᑮᕽ᙮ 2 ᑳᑎᐯᒋᑫᒡ ᐅᔕ ᐅᑕᔮᓐ ᑫᑰᓐ ᐁᔑ ᐊᓈᒥᒫᒡ ᒎᑕ ᐊᑮᕽ ᐌᒌᓂᒡ, ᐅᐐ ᓇᓇᐊᓵᓐ ᑲᔦ ᒉᑲᐴᓐ Jacob ᑳᑮ ᐃᔑᒋᑫᓂᒡ, ᐅᐐ ᑎᐸᐊᒪᐙᓐ ᑲᔦ ᑳᑮ ᐱ ᐃᔑᒋᑫᓂᒡ᙮ 3 ᒣᒀ ᐄᑐᒃ ᒉᑲᑉ ᑮᐲᓱᑯᐸᓀᓐ ᐅᒫᒫᓐ ᐅᒥᓴᑖᓃᕽ, ᐅᑮ ᓴᑭᑑᑕᓀᓈᓐ ᐄᑐᒃ ᐐᒋᑭᐌᔭᓐ; ᑮᑮᔖᐯᐎᒡ ᐃᑕᔥ ᑮᓇᐗᑎᓂᑎᐗᒃ ᑭᔐᒪᓂᑑ᙮ 4 ᐅᑮ ᓇᐗᑎᓈᓐ ᑲᔦ ᐁᒐᓬᐊᓐ ᑭᔐᒪᓂᑑᕽ ᑳᑮ ᐅᒌᓂᒡ ᐁᑮ ᔖᑰᒋᐋᒡ; ᒦᔥ ᑳᑮ ᒪᐎᒡ ᐁᑮ ᐸᑯᓭᓂᒧᒡ ᒋᒥᓍᐸᒥᑯᒡ᙮ ᒦᑕᔥ ᑳᑮ ᓇᑭᔥᑳᑯᒡ ᑭᔐᒪᓂᑑᓐ ᐌᑎ ᐯᑕᓬ Bethel ᐁᒋᑳᑌᓂᒃ ᐁᑮ ᑲᑲᓅᓂᑯᒡ᙮ 5 ᒦᐗᓐ ᓴ ᐃᓂ ᑳᑎᐯᒋᑫᓂᒡ ᑭᔐᒪᓂᑑᓐ ᑳᒫᐗᒋ ᒪᔥᑲᐎᓰᓂᒡ; ᑳᑎᐯᒋᑫᒡ ᐄᑐᒃ ᐃᔑᓂᑳᓱᐗᓐ᙮ 6 ᒦᑕᔥ ᐃᐃ ᐃᔑ ᑮᐌ ᓈᓯᑲᐎᒃ ᑭᑭᔐᒪᓂᑑᒥᐙ; ᒋᓵᑭᐃᐌᔦᒃ, ᐌᐌᓂ ᑲᔦ ᒋᑑᑖᑫᔦᒃ, ᒨᔕᒃ ᑲᔦ ᒋᐲᐁᒃ ᑭᑭᔐᒪᓂᑑᒥᐙ᙮ ᑫᔮᐱ ᐁᐃᓈᒡ ᐙᐃᔑᓇᓇᐊᓵᒡ 7 ᒦᑕᔥ ᑳᑎᐯᒋᑫᒡ ᐁᑭᑐᒡ, ᐃᔅᕒᐃᔭᓬᐊᒃ ᓴ ᒦ ᐃ ᐁᔑ ᐗᔦᔑᑫᐙᒡ ᑖᐱᔥᑰ ᑫᓇᓐ ᑳᑎᓄᐎᓂᒡ ᐁᒥᓉᑕᒧᐙᒡ ᒋᐗᔦᔑᒫᐙᒡ ᑳᐊᑖᒥᑯᐙᒡ ᐁᐋᐸᒋᑑᐙᒡ ᑎᐹᐲᔥᑰᒋᑲᓇᓐ ᑳᐗᔦᔑᒥᐌᒪᑲᓂᓂᑭᓐ᙮ 8 ᒦᔥ ᐄᐸᕒᐃᔭᒻ ᐌᒌᐙᒡ ᐁᑭᑐᐙᒡ, ᐐᑫ ᓴ ᓂᐌᓅᑎᓯᒥᓐ, ᒫᐗᒋᑯ ᐁᐊᓂ ᐌᓅᑎᓯᔮᕽ, ᑳᐐᓐ ᐃᑕᔥ ᐊᐎᔭ ᑫᑰᓐ ᓂᑖ ᐃᔑ ᐊᓈᒥᒥᑯᓰᓈᓐ ᒋᐃᔑᔭᒥᓐᒡ ᐁᐗᔦᔑᑫᔮᕽ! 9 ᓃᓐ ᐄᑐᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᓵᑭᒋᐎᓂᓀᒃ ᐄᒋᐸᑮᕽ Egypt; ᑭᑲ ᑑᑕᐎᓂᓂᒻ ᓴ ᒦᓇᐙ ᐸᒀᓀᑲᒥᑯᕽ ᒋᐃᔑᑖᔦᒃ ᑖᐱᔥᑰ ᑳᑮ ᐊᔨᑎᔦᑭᐸᓐ ᐊᐲ ᑳᑮ ᐱ ᓈᓯᑲᐎᓇᑰᑭᐸᓐ ᐌᑎ ᐱᑾᑕᑲᒥᒃ᙮ 10 ᓃᓐ ᐅᔕ ᑳᑮ ᑲᓅᓇᒀ ᑭᔐᒪᓂᑑᓐ ᑳᑲᓅᑕᒪᐙᐙᒡ, ᑳᑮ ᑑᑕᐗᒀ ᑲᔦ ᒋᑭᒋ ᐙᐸᑕᒧᐙᒡ ᐃᔑᓇᒧᐎᓇᓐ᙮ ᓂᑮ ᒦᓈᒃ ᑲᔦ ᐊᐌᒋᑲᓇᓐ ᒋᑎᐹᑐᑕᒧᐙᒡ᙮ 11 ᔖᑰᒡ ᐃᑕᔥ ᐯᒫᑎᓯᐙᒡ ᐌᑎ ᑭᓬᐃᔭᑦ Gilead ᐁᔮᐙᒡ ᒪᒋᐃᔑᐌᐱᓯᐗᒃ ᐁᐊᓇᒥᐁᑕᐙᐙᒡ ᒪᓂᑑᑳᓇᐞ᙮ ᒦᐗᒃ ᓴ ᐃᑭ ᑫᓂᐳᐙᒡ᙮ ᐋᐯ ᐱᔑᑭᐗᒃ ᓴ ᑲᔦ ᐸᑭᑎᓈᓱᐙᑲᓂᐎᐗᒃ ᐌᑎ ᑭᓬᑲᓬ Gilgal ᐆᑌᓈᕽ, ᐅᑑᓈᐱᑭᓂᑲᓂᐙᓐ ᐁᔑ ᐸᑭᑎᓈᓱᕽ ᓴ ᑕᐅᒀᐱᑭᓯᓂᓂᐗᓐ ᐌᑎ ᒥᔕᐗᑲᒥᒃ᙮ 12 ᒦᑕᔥ ᒉᑲᑉ Jacob ᑳᑮ ᐊᐸᐃᐌᒡ ᒣᓱᐳᑌᒥᔭ Mesopotamia ᐊᑮᕽ, ᐁᑮ ᐊᓄᑮᑕᐙᒡ ᐊᐎᔭᓐ ᐌᑎ ᐁᑮ ᑲᓇᐌᓂᒫᒡ ᐅᒫᓇᒑᓂᔑᒥᓂ ᐁᑮ ᑎᐸᐙᒡ ᑫᐐᐎᒡ᙮ 13 ᑳᑎᐯᒋᑫᒡ ᐃᑕᔥ ᑳᑲᓅᑕᒫᑯᒡ ᐅᑮ ᐋᐸᒋᐋᓐ ᐁᓵᑭᒋᐎᓈᒡ ᐅᐱᒫᑎᓰᒪᐞ ᐌᑎ ᐄᒋᐸᑮᕽ, ᒋᓈᓈᑲᒋᑕᒫᑯᒡ ᑲᔦ᙮ 14 ᐃᑭ ᓴ ᐄᐸᕒᐃᔭᒻ Ephraim ᐌᒌᐙᒡ ᐅᑮ ᐋᑯᓇᐌᐋᐙᓐ ᑳᑎᐯᒋᑫᓂᒡ; ᒦᔥ ᐁᔑᓈᑾᓂᓂᒃ ᒋᐅᒋ ᓂᐳᐙᐸᓐ ᐅᑎᔑᒋᑫᐎᓂᐙᓐ ᐅᒋ᙮ ᑳᑎᐯᒋᑫᓂᒡ ᓴ ᐅᑲ ᑎᐸᐊᒫᑯᐙᓐ ᐋᓃᓐ ᐃᓇᑫ ᑳᑮ ᑑᑕᐙᐙᒡ ᑫᐅᒋ ᐹᐱᓄᑕᐎᒥᓐᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society