ᐄᐸᕒᐆᐗᒃ 6 - ᐅᒋᐺ ᑭᒋᒪᓯᓇᐃᑲᓐ1 ᑕᑲ ᑕᔥ ᓃᑳᓇᔭᐄ ᐃᓇᑫ ᐃᔑᒫᒑᑖ ᒋᓈᓯᑲᒪᕽ ᑳᐃᔑᑭᑭᓄᐊᒪᐎᑣ ᑳᑮᔖᐯᐎᐙᒡ, ᒋᓇᑲᑕᒪᕽ ᐃᓂ ᒫᐗᒡ ᐃᑯ ᓂᑕᒻ ᑳᑮᐃᔑ ᑭᑭᓄᐊᒫᑰᔭᑭᐸᓐ ᑮᒫᒌᐊᓇᒥᐁᐙᑎᓯᔭᕽ᙮ ᑳᐐᓐ ᒦᓇᐙ ᑭᑲ ᑲᑴ ᐅᓇᑑᓰᒥᓐ ᐅᓄ ᑳᐐᐐᑕᒫᓐ: ᐁᔑᑭᑭᓄᐊᒫᑎᕽ ᐊᐎᔭ ᒋᐅᒋᑴᑳᑎᓯᐸᓐ ᐃᔑᒋᑫᐎᓇᓐ ᓂᐳᐎᓂᕽ ᑳᐃᔑᐎᔑᐌᒪᑲᑭᓐ, ᐃᐃ ᑲᔦ ᑳᐃᔑᑌᐺᔦᓂᒥᓐᒡ ᐊᐊ ᑭᔐᒪᓂᑑ, 2 ᐃᐃ ᑲᔦ ᑳᐃᔑ ᐊᓇᒥᐁ ᑭᓰᔮᐹᐗᓱᕽ, ᐊᐎᔭ ᑲᔦ ᑳᐃᔑ ᐊᓇᒥᐁ ᓵᒥᓂᓐᒡ, ᐃᐃ ᑲᔦ ᑫᐃᔑᑮᐌᐱᒫᑎᓯᐙᒡ ᑳᓂᐳᐙᒡ, ᐃᐃ ᑲᔦ ᑫᐴᓂᓭᓯᓂᓂᒃ ᐐᑳ ᑎᐹᑯᓂᑰᐎᓐ᙮ 3 ᑕᑲ ᑕᔥ ᓃᑳᓇᔭᐄ ᐃᔑᒫᒑᑖ᙮ ᒦ ᓴ ᐅᐅ ᑫᔑᒋᑫᔭᕽ ᑮᔥᐱᓐ ᑭᔐᒪᓂᑑ ᐃᓀᑕᕽ᙮ 4 ᐃᑭ ᑕᔥ ᐋᔕ ᑳᑮᓂᓯᑐᑕᒧᐙᒡ, ᑳᑮᒪᓯᐳᑕᒧᐙᒡ ᑲᔦ ᒦᑭᐌᐎᓐ ᑭᒋᑮᔑᑯᕽ ᑳᑮᐅᒌᓂᒃ, ᑳᑮᐐᑑᑳᓱᐙᒡ ᑲᔦ ᑭᔐᒪᓂᑑᓐ ᐅᑕᒑᑯᓂ ᐁᓇᓄᑮᓂᒡ, 5 ᑳᑮᒥᓄᐳᑕᒧᐙᒡ ᑲᔦ ᑭᔐᒪᓂᑑᓐ ᑳᐅᓂᔑᔑᓂᓂᒃ ᐅᑎᑭᑐᐎᓂᓂ, ᐁᑮᑭᑫᑕᒧᐙᒡ ᑲᔦ ᒪᔥᑲᐎᓰᐎᓇᓐ ᑳᐐᐱ ᓈᑯᒋᑳᑌᓂᑭᓐ ᐌᑎ ᐱᒌᓇᒃ ᑳᐐᐊᓂ ᐃᔑᐌᐸᓂᓂᒃ – 6 ᐅᓄ ᑕᔥ ᐁᑮᑭᑫᑕᒧᐙᒡ, ᐃᔑᓇᑲᑕᒧᐙᒡ ᐃᑕᔥ ᑳᐃᔑᑌᐺᑕᐙᐙᒡ Xᑕᓐ, ᑳᐐᓐ ᑕᐃᔑᓈᑾᓯᓂᓂ ᒦᓇᐙ ᒋᐅᔥᑭ ᑴᑳᑎᓯᐃᑣᐸᓐ᙮ ᐋᓃᔥ ᒦ ᐃ ᑖᐱᔥᑰ ᐐᓇᐙ ᐱᑯ ᐁᐃᔑᒋᑫᐙᒡ ᐁᑮᐌ ᐊᑯᓴᑲᐙᐙᒡ ᑭᔐᒪᓂᑑᓐ ᐅᑯᓯᓯᓂ ᐃᐃᒫ ᐋᔑᑌᔮᑎᑯᕽ᙮ ᒦ ᓴ ᑲᔦ ᑖᐱᔥᑰ ᐁᑑᑕᐙᐙᒡ ᐱᓂᔅᑴ ᐱᑯ ᒋᒫᓀᒋᑲᓂᐎᓂᒡ᙮ 7 ᐃᐃ ᓴ ᑭᑎᑳᓇᑲᒥᒃ ᑳᒥᓂᑴᒪᑲᒃ ᐊᐲ ᐁᑭᒥᐗᕽ, ᐋᐱᒋ ᓴ ᐃᓂ ᒦᒋᒥ ᑭᑎᑳᓇᓐ ᑕᒥᓄᑭᓅᓐ ᐃᐃᒫ ᑭᑎᑫᐗᑲᒥᑯᕽ᙮ ᐃᑭ ᓴ ᑳᓈᑲᒋᑕᒪᐎᑣ ᐃᐃ ᑭᑎᑫᐗᑲᒥᑯᓂ ᐋᐱᒋ ᐅᑲᑭᑖᐸᒋᑑᓈᐙᓐ ᐃᓂ ᒦᒋᒥ ᑭᑎᑳᓇᓐ᙮ ᑭᔐᒪᓂᑑ ᑲᔦ ᐅᑲᒥᓄᓭᑑᓐ ᐃᐃ ᑭᑎᑳᓇᑲᒥᒃ᙮ 8 ᑮᔥᐱᓐ ᐃᑕᔥ ᐐᓐ ᐅᑳᐎᒥᓇᑲᔒᒃ, ᒪᒑᑎᑰᒃ ᑲᔦ ᐁᑕ ᓂᑖᐎᑭᐙᒡ ᐃᐃᒫ ᑭᑎᑳᓇᑲᒥᑯᕽ, ᑳᐐᓐ ᑫᑰᓐ ᑕᐃᓈᐸᑕᓯᓅᓐ ᐃᐃ ᑭᑎᑳᓇᑲᒥᒃ᙮ ᒦ ᐁᑕ ᑯ ᐁᔑᓈᑾᓂᓂᒃ ᑭᔐᒪᓂᑑ ᒋᐃᑕᕽ ᒋᓂᔑᐗᓈᑕᓂᓂᒃ, ᒦᑕᔥ ᐃᐃ ᑲᔦ ᒋᒑᑭᓯᑳᑌᒃ᙮ 9 ᑳᓵᑭᐃᑰᔦᒃ, ᐋᓇᐐᓐ ᐅᐅ ᐁᐃᔑᑮᔗᔮᕽ, ᔖᑰᒡ ᐃᑕᔥ ᑭᑌᐺᔦᓂᒥᑰᒻ ᑮᓇᐙ ᓇᐗᒡ ᒋᒥᓄᓭᔦᒃ᙮ ᐋᓃᔥ ᑭᑲᐅᑎᓯᑯᒻ ᑳᐅᓂᔑᔑᑭᓐ ᐱᒫᒋᐃᑰᐎᓂᕽ ᑳᑕᑯ ᐅᒌᑭᓐ᙮ 10 ᐌᐌᓂ ᐋᓃᔥ ᑭᔐᒪᓂᑑ ᐊᐎᔭᓐ ᐅᑑᑕᐙᓐ᙮ ᑳᐐᓐ ᐅᑲᐸᓈᐸᑕᓰᓐ ᐋᓃᓐ ᑳᑮᐃᓇᓄᑮᔦᒃ᙮ ᑳᐐᓐ ᑲᔦ ᑕᐗᓃᑫᓰ ᐁᓈᑯᑕᐌᒃ ᐁᓵᑭᐁᒃ ᐁᐱᐐᑑᑲᐎᒣᒃ ᑫᔮᐱ ᑲᔦ ᐁᐸᒥᐃᒣᒃ ᑭᔐᒪᓂᑑ ᐅᐱᒫᑎᓰᒪᐞ᙮ 11 ᒦ ᓴ ᑕᔥ ᐁᔑᐸᑯᓭᓂᒥᑰᔦᒃ ᑮᓇᐙ ᑳᑕᓱᐯᔑᑯᔦᒃ ᒋᑖᐱᑕᐎᒋᑫᔦᒃ ᑳᐱ ᐃᔑᒋᑫᔦᒃ ᐲᓂᔥ ᐌᑎ ᐃᔥᒀᒡ, ᑫᒋᓈᒡ ᒋᐙᐸᑕᒣᒃ ᐃᐃ ᑳᐃᔑᐊᐯᓂᒧᔦᒃ᙮ 12 ᑳᐐᓐ ᐃᑕᔥ ᑭᓇᑕᐌᓂᒥᑰᓰᒻ ᒋᐊᓂᑭᑎᒫᑎᓯᔦᒃ᙮ ᓇᓈᐱᓇᐎᑰᒃ ᐃᑕᔥ ᐃᑭ ᑳᑮᐅᒋ ᑌᐱᓇᒧᐙᒡ ᑭᔐᒪᓂᑑᓐ ᐅᑕᔓᑕᒫᑫᐎᓂᓂ ᐅᑌᐺᑕᒧᐎᓂᐙᕽ, ᐅᔕᔒᐯᑕᒧᐎᓂᐙᕽ ᑲᔦ᙮ ᑭᔐᒪᓂᑑ ᑳᑌᐺᔦᑖᑾᓂᓂᒃ ᐅᑕᔓᑕᒫᑫᐎᓐ 13 ᐊᐲ ᑕᔥ ᑭᔐᒪᓂᑑ ᑮᐊᔓᑕᒪᐙᒡ ᐁᐸᕒᐊᐋᒪᓐ Abraham, ᐐᓐ ᐃᑯ ᐅᐐᓱᐎᓐ ᐅᑮᐋᐸᒋᑑᓐ ᐁᑮᐊᐱᒧᒡ, ᐋᓃᔥ ᑳᐐᓐ ᐊᐎᔭᓐ ᐸᑳᓐ ᐅᐐᓱᐎᓂᓂ ᐊᐗᔑᒣ ᑌᐊᐲᑌᑖᑾᓯᓂᓂ᙮ 14 ᒦᑕᔥ ᐅᐅ ᑳᑮᐃᑭᑐᒡ: ᑌᐺ ᓴ ᑭᑕᔓᑕᒪᐎᓐ ᐁᐐᔕᐌᓂᒥᓈᓐ, ᐋᐱᒋ ᑲᔦ ᑕᐹᑏᓄᐗᒃ ᐃᑭ ᑭᐲᐌᓰᒪᒃ᙮ 15 ᐁᐸᕒᐊᐋᒻ ᐃᑕᔥ ᐐᑫ ᑮᔕᔒᐯᑕᒻ᙮ ᒦᑕᔥ ᐃᐃ ᑳᑮᐅᒋᑌᐱᓇᕽ ᐃᐃ ᑳᑮᐃᔑ ᐊᔓᑕᒫᑯᒡ ᑭᔐᒪᓂᑑᓐ᙮ 16 ᐊᐲ ᓴ ᐃᓂᓂᐗᒃ ᑮᐐᐋᔩᒋᐊᔓᑕᒫᑎᐙᒡ, ᐊᐎᔭᓐ ᓴ ᐸᑳᓐ ᐅᑕᑯᐐᓈᐙᓐ ᓇᐗᒡ ᑫᒋ ᐃᓀᑖᑯᓯᓂᒡ ᐊᐲᒡ ᐐᓇᐙ᙮ ᒦᑕᔥ ᐃᐃᒫ ᑳᑮᐃᔑᐅᓇᑑᐙᒡ ᐁᑮᐊᐱᒧᐙᒡ, ᑳᐐᓐ ᐊᐗᔑᒣ ᑕᑲᑴᔖᑰᓱᑎᓰᐗᒃ᙮ 17 ᒦᑕᔥ ᐃᐃ ᑭᔐᒪᓂᑑ ᑳᑮᐅᒋᑑᑕᕽ ᐁᐐᓈᑯᑕᒪᐙᒡ ᐃᐃ ᑳᐐᑌᐱᓇᒥᓂᒡ ᐅᑕᔓᑕᒫᑫᐎᓐ, ᐁᑮᐊᑕᐌᓂᒫᒡ ᒋᑭᑫᑕᒥᓂᒡ ᐐᑳ ᐁᐐᐋᑌᑕᓯᒃ᙮ ᒦᑕᔥ ᐃᐃᒫ ᐅᑕᐱᒧᐎᓂᕽ ᑳᑮᐅᒋᐋᔩᑕᑑᒡ ᐅᑕᔓᑕᒫᑫᐎᓐ᙮ 18 ᐅᓄ ᑕᔥ ᓃᔑᓐ ᑫᑰᓇᓐ ᑳᐱᑕᔑᑕᒫᕽ ᑳᐐᓐ ᐐᑳ ᑖᐋᒋᓭᓯᓅᓇᓐ᙮ ᑳᐐᓐ ᐐᑳ ᑖᐃᔑᓈᑾᓯᓂᓂ ᑭᔐᒪᓂᑑ ᒋᑮᐗᓂᒧᒡ᙮ ᒦ ᓴ ᑕᔥ ᑳᐅᒋᒪᔥᑲᐌᑕᒪᕽ, ᐋᓃᔥ ᑭᑮᓈᒋᐸᐃᐙᑕᒧᐙᒥᓐ ᐁᑲᑴᑌᐱᓇᒧᐗᕽ ᐊᐯᓂᒧᐎᓐ ᑳᐐᒦᓂᓇᕽ᙮ 19 ᐃᐃ ᓴ ᑭᒋᐙᒥᑲᐃᑲᓐ ᑳᑭᒋᐙᒥᑭᓯᕽ, ᒦ ᓴ ᑖᐱᔥᑰ ᐁᔑᓈᑾᒃ ᐃᐃ ᑭᑕᐯᓂᒧᐎᓂᓈᓐ, ᑭᐱᒫᑎᓯᐎᓂᓈᓐ ᐁᔑᐋᔩᒋᒥᒋᒪᐱᑌᒃ᙮ ᐋᐱᒋ ᓴ ᑫᒋᓈᐅᐌᑖᑾᓐ, ᑳᐐᓐ ᐊᐎᔭ ᐅᑲᑲᔥᑭᑑᓰᓐ ᒋᐗᑲᐎᐱᑑᒡ! ᐅᐅ ᑕᔥ ᐊᐯᓂᒧᐎᓐ ᐁᑌᐹᐲᑲᒧᒃ ᐌᑎ ᒫᐗᒡ ᐲᑎᒃ ᑳᐃᔑᑭᐲᑲᑰᑌᒃ ᑭᒋᑮᔑᑯᕽ ᑳᐃᔑ ᑭᒋᐊᓇᒥᐁᐎᑲᒥᑯᐗᕽ᙮ 20 ᒋᓴᔅ ᐃᑕᔥ ᑭᑮᓃᑳᓂ ᐲᑎᑫᑕᒫᑯᓈᓐ ᐋᓃᔥ ᐐᓐ ᐱᔑᔑᒃ ᒫᐗᒡ ᑕᑭᒋᐊᓇᒥᐁᐎᑭᒫᐎ, ᐯᔑᑾᓐ ᒋᐃᔑᓈᑯᓯᒡ ᐃᐃ ᑳᑮᐃᓇᓄᑮᓂᑯᐸᓀᓐ ᐃᓂ ᒣᓬᑭᓯᑌᑰᓐ Melchizedek ᑳᑮ ᑭᒋᐊᓇᒥᐁᐎᑭᒫᐎᓂᑯᐸᓀᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society