ᐄᐸᕒᐆᐗᒃ 11 - ᐅᒋᐺ ᑭᒋᒪᓯᓇᐃᑲᓐᑌᐺᔦᑕᒧᐎᓐ ᐁᑕᔑᑌᒃ 1 ᐃᓇᔥᑫ ᑕᔥ, ᑳᐅᑌᐺᔦᑕᒧᐎᓂᔭᕽ ᑭᑐᒋᑫᒋᓈᐅᒥᓐ ᐃᓂ ᑫᑰᓇᓐ ᑳᐊᐯᓂᒧᓄᑕᒪᕽ ᑌᐺ ᐁᐊᔮᑭᓐ, ᑭᑑᒋᑭᑫᑖᒥᓐ ᑲᔦ ᑫᒋᓈᒡ ᐁᐊᔮᑭᓐ ᑫᑰᓇᓐ ᑳᐙᐸᒋᑳᑌᓯᓄᑭᓐ᙮ 2 ᐅᑌᐺᔦᑕᒧᐎᓂᐙᕽ ᐄᑐᒃ ᒣᐎᔕ ᐃᓂᓂᐗᒃ ᑳᑮᐱᒫᑎᓯᐙᒡ ᐅᑮᐅᒋᒥᓍᐸᒥᑯᐙᓐ ᑭᔐᒪᓂᑑᓐ᙮ 3 ᑌᐺᔦᑕᒧᐎᓂᕽ ᓴ ᓂᑑᒋᓂᓯᑐᑖᒥᓐ ᑲᑭᓇ ᑫᑰᓇᓐ ᑮᔑᑯᕽ ᑳᐊᔮᑭᓐ ᐊᑮᕽ ᑲᔦ ᐁᑮᐅᒋᐅᔑᒋᑳᑌᑭᓐ ᐃᐃᒫ ᑭᔐᒪᓂᑑ ᐅᑎᑭᑐᐎᓂᕽ᙮ ᐃᓂ ᑕᔥ ᑳᓈᑾᑭᓐ ᑮᐅᒋᐅᔑᒋᑳᑌᐗᓐ ᐃᐃᒫ ᑫᑰᓂᕽ ᑳᓈᑾᓯᓄᑭᓐ᙮ 4 ᑌᐺᔦᑕᒧᐎᓂᕽ ᓴ ᐁᐸᓬ Abel ᑳᑮᐅᒋᐸᑭᑎᓇᒪᐙᑯᐸᓀᓐ ᑭᔐᒪᓂᑑᓐ ᓇᐗᒡ ᑳᑮᐅᓂᔑᔑᓂᓂᒃ ᐸᑭᑎᓈᓱᐎᓐ ᐊᐲᒡ ᐐᓐ ᐃᓂᐌᓂᐗᓐ ᑫᓇᓐ Cain᙮ ᒦ ᓴ ᑕᔥ ᐃᐃ ᑳᑮᐅᒋᒥᓍᐸᒥᑯᑯᐸᓀᓐ ᑭᔐᒪᓂᑑᓐ ᐁᑮᐃᓇᑭᒥᑯᒡ ᐅᑾᔭᒀᑎᔅ, ᐋᓃᔥ ᐅᑮᒥᓍᐸᑕᒥᓂ ᐅᒦᑭᐌᐎᓐ᙮ ᐋᓇ ᑕᔥ ᐐᓐ ᓅᑯᒻ ᐁᐱᒫᑎᓯᓯᒃ ᒦ ᐃᐌ ᐁᔑᓈᑾᓂᓂᒃ ᐅᑌᐺᔦᑕᒧᐎᓂᕽ ᑫᔮᐱ ᐁᐅᒋᑳᑮᑭᑐᒡ᙮ 5 ᐄᓄᒃ Enoch ᐃᑕᔥ ᐅᑌᐺᔦᑕᒧᐎᓂᕽ ᑳᑮᐅᒋ ᐃᔑᐎᓂᓐᒡ ᐃᔥᐱᒥᕽ, ᑳᑮᐅᒋ ᐅᑎᓵᐸᑕᓯᑯᐸᓀᓐ ᒋᓂᐳᒡ᙮ ᑭᔐᒪᓂᑑᓐ ᓴ ᐅᑮᒥᒋ ᐅᑖᐱᓂᑰᓐ, ᒦᑕᔥ ᐊᐎᔭᐞ ᑳᑮᐅᒋᒥᑳᑯᓯᒃ᙮ ᑭᒋᒪᓯᓇᐃᑲᓐ ᓴ ᐃᔑᐲᐃᑳᑌ: ᐋᐱᒋ ᐄᓈᒃ ᐅᑮᒥᓍᐸᒥᑰᓐ ᑭᔐᒪᓂᑑᓐ ᒋᑆ ᒫᒌᓂᑯᒡ᙮ 6 ᑳᐐᓐ ᐃᑕᔥ ᐊᐎᔭ ᐅᑖᒥᓍᐸᒥᑯᓰᓐ ᑭᔐᒪᓂᑑᓐ ᑮᔥᐱᓐ ᐊᔮᓯᒃ ᑌᐺᔦᑕᒧᐎᓐ᙮ ᐊᐎᔭ ᓴ ᑳᐱᓈᓯᑲᐙᒡ ᑭᔐᒪᓂᑑᓐ ᒦ ᐃ ᐁᔑᓈᑾᓂᓂᒃ ᒋᑌᐺᔦᓂᒫᒡ ᐁᐊᔮᓂᒡ, ᐁᑎᐸᐊᒪᐙᓂᒡ ᑲᔦ ᐌᐌᓂ ᑳᐊᑐᓀᐅᑯᓂᒡ᙮ 7 ᓅᐗ Noah ᐅᔕ ᐅᑌᐺᔦᑕᒧᐎᓂᕽ ᑳᑮᐅᒋᓅᑕᐙᑯᐸᓀᓐ ᑭᔐᒪᓂᑑᓐ ᓃᔮᒃ ᐁᑮᐐᑕᒫᑯᒡ ᐋᓃᓐ ᐙᐊᓂ ᐃᔑᐌᐸᓂᓂᒃ, ᐋᓇᐐᓐ ᐁᑮᐙᐸᑕᓯᒃ, ᐅᑮᓇᐃᑕᐙᓐ ᐁᑯᑖᓀᓂᒫᒡ ᑭᔐᒪᓂᑑᓐ᙮ ᒦᑕᔥ ᑳᑮᐅᔑᑑᒡ ᑭᒋᒥᑎᑯᒌᒫᓐ ᐋᑎ ᑫᐅᒋᐱᒫᑎᓯᒡ, ᐃᐃ ᑲᔦ ᑲᑭᓇ ᑳᑕᔑᒡ ᐅᑖᐎᓂᕽ᙮ ᒦᑕᔥ ᐅᑌᐺᑕᒧᐎᓂᕽ ᑳᑮᐃᔑᓈᑯᑕᒪᐙᒡ ᑯᑕᒃ ᐯᒫᑎᓯᓂᒡ ᓭᓯᒃ ᐁᑮᐃᔑᐱᒫᑎᓯᓯᓂᒃ, ᑳᑮᐅᒋᑌᐱᓇᕽ ᑲᔦ ᑾᔭᒀᑎᓯᐎᓐ ᑌᐺᔦᑕᒧᐎᓂᕽ ᑳᐅᒌᓂᒃ᙮ 8 ᐁᐸᕒᐊᐋᒻ Abraham ᓴ ᐅᑌᐺᔦᑕᒧᐎᓂᕽ ᑳᑮᐅᒋᓇᐃᑕᐙᑯᐸᓀᓐ ᑭᔐᒪᓂᑑᓐ ᑮᑲᓅᓂᑯᒡ ᐸᑳᓐ ᐊᑮᕽ ᒋᐃᔖᒡ, ᐁᑮᐊᔓᑕᒫᑯᒡ ᐊᑮᓂ ᐁᐐᒦᓂᑯᒡ ᒋᐊᔮᒡ᙮ ᐅᑮᓇᑲᑖᓐ ᐃᑕᔥ ᐅᑕᑮᒻ ᐁᑮᑭᑫᑕᓯᒃ ᐋᑎ ᐁᔖᒡ᙮ 9 ᐁᑮᑌᐺᑕᕽ ᐃᑕᔥ ᑳᑮᐅᒋ ᐊᔨᔑᑖᒡ ᐃᐃᒫ ᐊᑮᕽ ᑭᔐᒪᓂᑑᓐ ᑳᑮᐃᔑ ᐊᔓᑕᒫᑯᒡ, ᐁᑮᑕᔑᐲᐎᑌᐎᒡ ᐃᐃᒫ ᐊᑮᕽ, ᐸᒀᓀᑲᒥᑯᕽ ᐁᑮᐃᔑᑖᒡ᙮ ᒦᑕᔥ ᐯᔑᑾᓐ ᐋᐃᓯᒃ Isaac, ᒉᑲᑉ Jacob ᑲᔦ ᑳᐃᔑᒋᑫᐙᒡ, ᑫᐐᓇᐙ ᐯᔑᑾᓐ ᐁᑮᑌᐱᓇᒧᐙᒡ ᐅᑕᔓᑕᒫᑰᐎᓂᓂ᙮ 10 ᐁᐸᕒᐊᐋᒻ ᐋᓃᔥ ᐅᑮᐲᑑᓐ ᐃᐃ ᑳᐅᓈᐱᑭᓯᒋᑳᑌᓂᒃ ᑭᒋᐆᑌᓈᓂ ᑫᓀᐱᒋᐊᔮᓂᒃ, ᑭᔐᒪᓂᑑᓐ ᑳᑮᐅᓀᑕᒥᓂᒡ ᐋᓃᓐ ᑫᐃᔑᓈᑾᓂᓂᒃ, ᑳᑮᐅᔑᑑᓂᒡ ᑲᔦ᙮ 11 ᐅᑌᐺᔦᑕᒧᐎᓂᕽ ᐃᑕᔥ ᑳᑮᐅᒋᐅᑌᑌᒫᐎᒡ ᐋᓇᐐᓐ ᐁᑮᐊᑭᐌᓰᐎᒡ, ᐐᐗᓐ ᐃᑕᔥ ᑲᔦ ᓭᕒᐊᐗᓐ Sarah ᐁᑮᑲᔥᑭᑑᓯᓂᒃ ᒋᐅᑕᐱᓅᒌᔑᒥᓂᒡ, ᐁᑮᑫᒋᓈᐋᒡ ᑭᔐᒪᓂᑑᓐ ᒋᑲᓇᐌᑕᒥᓂᒡ ᑳᑮᐃᔑᐊᔓᑕᒫᑫᓂᒡ᙮ 12 ᐃᓇᔥᑫ ᑕᔥ ᐊᐊ ᐯᔑᒃ ᐃᓂᓂ ᐁᐸᕒᐊᐋᒻ ᐋᔕ ᐹᑲᒡ ᑮᐃᓀᑖᑾᓂᓂᑯᐸᓐ ᒋᐅᑌᑌᒫᐎᓯᒃ, ᒦ ᓴ ᐃᐃᒫ ᑕᑾᒡ ᓃᐱᐗᐞ ᐯᒫᑎᓯᓂᒡ ᑳᐅᒌᓂᒡ, ᐁᑮᐊᐲᒋ ᐹᑏᓄᓂᒡ ᑖᐱᔥᑰ ᑳᑕᔑᓂᒡ ᐗᓇᑯᔕᐞ ᐌᑎ ᑮᔑᑯᕽ, ᐁᑮᑕᔑᓂᒡ ᑲᔦ ᒋᑌᐸᑭᒥᒫᓯᐎᓐᒡ ᑖᐱᔥᑰ ᑳᐊᐲᒋ ᐹᑏᓉᐙᐗᑳᒃ ᐃᐃ ᓀᐗᕽ ᐃᐃᒫ ᑳᐃᔑ ᓇᓈᓀᐙᐗᑳᒃ ᑭᒋᑲᒦᕽ᙮ 13 ᐃᑭ ᑕᔥ ᑲᑭᓇ ᑳᑮᑌᐺᔦᑕᒧᐙᒡ ᐋᔕ ᑮᓂᐳᐗᒃ, ᐁᑮᑌᐱᓇᓯᒀ ᑳᑮᐊᔓᑕᒪᐎᑣᐸᓐ, ᔖᑰᒡ ᐃᑕᔥ ᓃᔮᒃ ᐅᑮᒥᒋᑌᐹᐸᑖᓈᐙᓐ ᐃᓂ ᑳᑮᐃᔑᐊᔓᑕᒪᐎᑣ, ᐙᓴ ᑲᔦ ᐅᑮᐅᓵᐸᑖᓈᐙᓐ, ᐅᑮᐅᑖᐱᓈᓈᐙᓐ ᐃᑕᔥ ᑲᔦ, ᐁᑮᐃᑭᑐᐙᒡ ᐁᑮᐲᐎᑌᐎᐙᒡ, ᐁᐅᒋᑎᐯᑖᑯᓯᓯᒀ ᐋᓇᐐᓐ ᐁᑮᐃᔑᑖᐙᒡ ᐅᐅᒫ ᐊᑮᕽ᙮ 14 ᐃᑭ ᑕᔥ ᐃᐃ ᑳᐃᑭᑐᐙᒡ, ᒦ ᐃᒫ ᐁᔑᓈᑾᓂᓂᒃ ᐁᓇᓈᑕᐙᐸᑕᒧᐙᒡ ᐊᑮᓂ ᐐᓇᐙ ᐱᑯ ᐁᐐᑎᐱᓇᐌᐎᓯᐙᒡ᙮ 15 ᑳᐐᓐ ᑕᔥ ᑲᔦ ᒨᔕᒃ ᐅᑮᓈᓈᑲᑕᐌᑕᓰᓈᐙ ᐃᐃ ᐊᑮᓂ ᑳᑮᐱᐅᒋᒫᒑᐙᒡ, ᐋᓃᔥ ᑮᔥᐱᓐ ᐃᐃ ᐃᔑᒋᑫᐙᐸᓐ, ᑖᑮᐃᔑᓭᓂ ᐄᑐᒃ ᒋᑮᑮᐌᐙᐸᓐ᙮ 16 ᐃᐃᐌᓂ ᑕᔥ ᓇᐗᒡ ᑳᐅᓂᔑᔑᓂᓂᒃ ᐊᑮᓂ ᐅᑮᐊᑕᐌᑖᓈᐙ᙮ ᑭᒋᑮᔑᑯᐎ ᐊᑮᓂ ᐅᑮᐊᑕᐌᑖᓈᐙ᙮ ᒦᑕᔥ ᐃᐃ ᑭᔐᒪᓂᑑ ᑳᐅᒋᐊᑲᒋᓯᒃ, ᓂᑭᔐᒪᓂᑑᒻ ᒋᐃᔑᓂᑳᓂᑯᒡ, ᐋᓃᔥ ᐅᑮᑾᔮᒋᑕᒪᐙᐞ ᑭᒋᐆᑌᓈᓂ ᑫᐃᔑᐊᔮᓂᒡ᙮ 17 ᐁᐸᕒᐊᐋᒻ ᐃᑕᔥ ᐅᑌᐺᑕᒧᐎᓂᕽ ᑳᑮᐅᒋᓇᐃᑕᐙᒡ ᑭᔐᒪᓂᑑᓐ ᐊᐲ ᑮᐊᑕᑭᑫᓂᒥᑯᒡ, ᑮᑲᓅᓂᑯᒡ ᒋᐸᑭᑎᓈᒡ ᐃᓂ ᐅᑯᓯᓴᓐ ᐋᐃᓯᑰᓐ ᒋᐃᓍᓈᒡ ᐸᑭᑎᓈᓱᐎᓂᕽ᙮ ᐐᓐ ᐄᑐᒃ ᑳᑮᐊᔓᑕᒫᑯᒡ ᑭᔐᒪᓂᑑᓐ, ᔖᑰᒡ ᐃᑕᔥ ᑮᐃᓀᑕᒻ ᐁᑮᐐᐸᑭᑎᓈᒡ ᐅᑯᓯᓴᓐ ᑳᑮᒥᒋᐯᔑᑯᓂᒡ᙮ 18 ᑭᔐᒪᓂᑑᓐ ᓴ ᐅᑮᐃᑯᐸᓃᓐ: ᐃᑭ ᓴ ᑳᑮᐊᔓᑕᒪᐎᓈᓐ ᑫᐅᐲᐌᓰᒥᔭᓐ, ᐋᐃᓯᑯᕽ ᑕᐅᒌᐗᒃ᙮ 19 ᐁᐸᕒᐊᐋᒻ ᐃᑕᔥ ᐅᑮᑭᑫᓂᒫᓐ ᑭᔐᒪᓂᑑᓐ ᒋᑲᔥᑭᐋᓂᒡ ᒋᑮᐌᐱᒫᑎᓯᐋᓂᒡ ᐋᐃᓯᑰᓐ ᑮᐃᔥᒀᓂᐳᓂᒡ᙮ ᐃᓇᔥᑫ ᑕᔥ ᑌᐺ ᐁᐸᕒᐊᐋᒻ ᐅᑮᐃᔑᓇᐙᓐ ᐋᐃᓯᑰᓐ ᑖᐱᔥᑰ ᐁᑮᓂᐳᓂᒡ, ᐁᑮᑮᐌᒦᓂᓐᒡ ᐃᑕᔥ ᑲᔦ ᑮᐃᔥᒀ ᑮᐌᐱᒫᑎᓯᐃᒥᓐᒡ᙮ 20 ᐋᐃᓯᒃ ᐃᑕᔥ ᐁᑮᑌᐺᔦᑕᕽ ᑳᑮᐅᒋ ᓃᑳᓂ ᔕᐌᓂᒫᒡ ᒋᐊᓂᒥᓄᓭᓂᒡ ᒉᑲᐴᓐ, ᐄᔂᓐ Esau ᑲᔦ, ᐁᑮᑕᔑᑕᒪᐙᒡ ᐋᓃᓐ ᓃᔮᒃ ᑫᓂ ᐃᔑᓭᓂᒡ᙮ 21 ᒉᑲᑉ ᐃᑕᔥ ᐁᑮᑌᐺᔦᑕᕽ ᐋᔕ ᐱᑯ ᑫᑳ ᐁᐐᓂᐳᒡ ᑳᑮᐅᒋ ᔕᐌᓂᒫᒡ ᒋᐊᓂᒥᓄᓭᓂᒡ ᒎᓴᐴᓐ Joseph ᐅᑯᓯᓯᓂ᙮ ᐁᑮᐋᐸᑖᑸᒡ ᐃᑕᔥ ᐅᓴᑲᐅᓈᑯᕽ, ᐁᑮᐊᓇᒥᐁᑕᐙᒡ ᑭᔐᒪᓂᑑᓐ᙮ 22 ᒎᓴᑉ ᐃᑕᔥ ᐅᑌᐺᔦᑕᒧᐎᓂᕽ, ᐋᔕ ᑫᑳ ᐁᐐᐊᓂᓂᐳᒡ, ᓃᔮᒃ ᐅᑮᑕᔑᑖᓐ ᐃᔅᕒᐃᔭᓬᐊᐞ Israel ᒋᓇᑲᑕᒥᓂᒡ ᐄᒋᐸᑮᓂ Egypt ᙮ ᒦᑕᔥ ᐃᐃ ᑳᑮᐐᑕᕽ ᐋᓃᓐ ᒪᔮ ᑫᑑᒋᑳᑌᓂᑭᓐ ᐅᑲᓇᓐ᙮ 23 ᒨᓯᔅ Moses ᐃᑕᔥ ᐅᓃᑭᐃᑰᐞ ᐁᑮᑌᐺᔦᑕᒥᓂᒡ ᑳᑮᐅᒋᑳᓂᑯᒡ ᓂᓱᑮᓯᔅ 3 ᒥᓂᒃ ᑮᐃᔥᒀ ᓂᑖᐎᑭᒡ᙮ ᐋᓃᔥ ᐅᑮᐙᐸᒥᑰᐞ ᐁᑮᒥᓄᓈᑯᓯᒡ᙮ ᑳᐐᓐ ᑲᔦ ᑮᑯᑖᒋᓰᐗᐞ ᐁᑮᐃᔑᒋᑫᓯᓂᒃ ᑭᒋᐅᑭᒫᓐ ᑳᑮᐃᓈᑯᓂᑫᓂᒡ᙮ 24 ᒨᓯᔅ ᐃᑕᔥ ᐅᑌᐺᔦᑕᒧᐎᓂᕽ ᐊᐲ ᑮᑮᔖᐯᐎᒡ, ᑳᑮᐅᒋ ᐃᓀᑕᓯᒃ ᒋᐃᒋᑲᓂᐎᒡ ᐯᕒᐆ Pharaoh ᐅᑖᓂᓴᓐ ᓴ ᐃᓂ ᐅᑯᓯᓴᓐ᙮ 25 ᐊᐗᔑᒣ ᑕᔥ ᑮᐃᓀᑕᒻ ᐁᐐᐐᒋᑲᒀᑕᑭᑑᒫᒡ ᐃᐃ ᐐᒋᐱᒫᑎᓰᐞ ᑭᔐᒪᓂᑑᓐ ᑳᑮᑎᐯᓂᒫᓂᒡ, ᐊᐲᒡ ᐐᓐ ᒋᒌᑫᑕᑭᐸᓐ ᐊᒋᓇ ᑳᐃᔑᒥᓉᑖᑾᓂᓂᒃ ᒪᒋᑑᑕᒧᐎᓂᓂ᙮ 26 ᒦᑕᔥ ᑳᐃᓇᑭᑕᕽ ᓇᐗᒡ ᐁᐅᓂᔑᔑᓂᓂᒃ ᒋᐃᔑᒪᒋᑕᔑᒥᓐᒡ ᐃᓂ ᑭᔐᒪᓂᑑᓐ ᑳᐅᓀᓂᒫᓂᒡ ᑫᐃᔑᒪᒋᑕᔑᒥᒥᓐᒡ, ᐊᐲᒡ ᐐᓐ ᑫᑮᐃᔑᐌᓅᑎᓯᐸᓐ ᐄᒋᐸᑮᕽ᙮ ᐋᓃᔥ ᐅᑮᐊᔕᐙᐸᑖᓐ ᓃᑳᓇᔭᐄ ᑫᒦᓂᓐᒡ ᑎᐸᐊᒫᑰᐎᓐ᙮ 27 ᒨᓯᔅ ᐃᑕᔥ ᐁᑮᑌᐺᔦᑕᕽ ᑳᑮᐅᒋᓇᑲᑕᕽ ᐄᒋᑉ ᐁᑮᓭᑭᓯᓯᒃ, ᐋᓇᐐᓐ ᑭᒋᐅᑭᒫᓐ ᐁᑮᓂᔥᑳᑎᓯᓂᒡ᙮ ᑳᐐᓐ ᑮᐃᓀᑕᓰ ᒋᑮᐌᒡ, ᐋᓃᔥ ᐅᑮᐙᐸᒫᓐ ᑳᓈᑯᓯᓯᓂᒃ ᑭᔐᒪᓂᑑᓐ᙮ 28 ᐅᑌᐺᔦᑕᒧᐎᓂᕽ ᐃᑕᔥ ᑳᑮᐅᒋᐅᔑᑑᒡ ᒋᐃᔑᒋᑫᓈᓂᐗᓂᓂᒃ ᐃᐃ ᐱᒫᒋᐃᑰᐎ ᐐᑾᑎᐎᓐ, ᐃᐃ ᑲᔦ ᑳᑮᐊᓅᑮᒡ ᒥᔅᑸᓂ ᒋᐊᒋᑳᑌᓂᒃ ᐃᔥᒀᑌᒫᑎᑯᑳᕽ᙮ ᒦᑕᔥ ᑳᑮᐅᒋ ᐃᔑᒋᑫᐙᒡ ᐃᓂ ᓴ ᑳᓂᔑᐌᓂᒡ ᐁᒐᓬᐊᓐ ᒋᓂᓵᓯᓂᒃ ᐃᐃ ᑳᓴᓰᑭᓯᓂᒡ ᑸᐎᓭᓴᐞ ᐃᐃᒫ ᐃᔅᕒᐃᔭᓬᐃᑳᕽ᙮ 29 ᐅᑌᐺᔦᑕᒧᐎᓂᐙᕽ ᐃᑕᔥ ᐃᔅᕒᐃᔭᓬᐊᒃ ᑳᑮᐅᒋᑲᔥᑭᑑᐙᒡ ᐁᐋᔕᐎᔥᑳᐙᒡ ᐃᐃᒫ ᑭᒋᒥᔅᑯᑲᒦᕽ Red Sea, ᐁᑮᐹᑾᑲᒥᑳᓂᒃ ᑳᑮᐃᔑᐱᒧᓭᐙᒡ᙮ ᐄᒋᐲᐎ Egyptian ᔑᒫᑲᓂᔕᒃ ᐃᑕᔥ ᐁᑮᑲᑴᑲᔥᑭᑑᐙᒡ ᑫᐐᓇᐙ, ᑲᑭᓇ ᓴ ᒦ ᐃᒫ ᑳᐃᔑᓂᓵᐹᐌᐙᒡ᙮ 30 ᐅᑌᐺᔦᑕᒧᐎᓂᐙᕽ ᐃᑕᔥ ᐃᐃ ᑭᒋᐆᑌᓈᓂ ᒉᕒᐊᑯ Jericho ᑳᑮᐃᔑ ᐙᑳᔮᐱᑭᓂᑳᑌᓂᒃ ᑳᑮᐅᒋᓃᓯᓭᓂᒃ ᐊᐲ ᐃᔅᕒᐃᔭᓬᐊᒃ ᑮᐃᔥᒀ ᑭᔑᐹᔥᑳᐙᒡ ᓃᔣᓱ 7 ᑮᔑᒃ᙮ 31 ᐅᕒᐁᐋᑉ Rahab ᑳᑮᐱᔑᒀᒋᑴᐎᒡ, ᐁᑮᑌᐺᔦᑕᕽ ᑳᑮᐅᒋᓂᓵᓯᐎᓐᒡ ᐊᐲ ᑮᓂᔑᐗᓈᒋᒋᑲᓂᐎᓂᒡ ᐃᐃ ᑳᑮᔕᔒᐱᑕᐙᓂᒡ ᑭᔐᒪᓂᑑᓐ᙮ ᐋᓃᔥ ᐌᐌᓂ ᐱᓵᓐ ᐅᑮᐲᑎᑲᓈᐞ ᐃᓂᓂᐗᐞ ᑳᑮᓃᑳᓂ ᐊᔨᓈᐱᓂᒡ, ᐃᔅᕒᐃᔭᓬᐃᑳᕽ ᑳᑮᐅᒌᓂᒡ᙮ 32 ᑫᔮᐱ ᓇ ᑕᔥ ᓂᑲᐙᐐᓈᒃ ᐊᐎᔭᒃ? ᑳᐐᓐ ᐃᑕᔥ ᓂᑌᐱᓭᓰ ᒋᑕᔑᒪᒀᐸᓐ ᑮᑎᔭᓐ Gideon, ᐯᕒᐊᒃ Barak, ᓵᒥᓴᓐ Samson, ᒉᐱᑕ Jephthah, ᑌᐱᑦ David, ᓵᒥᔫ Samuel, ᐃᑭ ᑲᔦ ᑳᑮᑲᓅᒋᑫᑕᒪᐙᐙᒡ ᑭᔐᒪᓂᑑᓐ᙮ 33 ᐅᑌᐺᔦᑕᒧᐎᓂᐙᕽ ᐃᑕᔥ ᐊᐲ ᑮᒦᑳᓱᐙᒡ ᑳᑮᐅᒋᔖᑰᒋᑑᐙᒡ ᐃᓂᓃᐎ ᐅᑭᒫᐎᐎᓇᓐ᙮ ᐅᑮᐅᓇᑑᓈᐙ ᑾᔭᒃ ᒋᐃᔑᒋᑫᓈᓂᐗᓂᓂᒃ᙮ ᐅᑮᑌᐱᓈᓈᐙ ᑲᔦ ᑭᔐᒪᓂᑑᓐ ᐅᑕᔓᑕᒫᑫᐎᓂᓂ᙮ ᐅᑮᑭᐸᐊᒪᐙᐙᐞ ᑲᔦ ᒥᔑᐱᔑᐗᐞ ᐅᑑᓂᓂ᙮ 34 ᐅᑮᐋᑕᐌᔥᑳᓈᐙᓐ ᑲᔦ ᑳᑮᑭᔕᑾᓀᓂᑭᓐ ᐃᔥᑯᑌᓐ, ᐁᑮᒫᒌᐸᐃᐙᑕᒧᐙᒡ ᑲᔦ ᐸᔑᐸᐃᑫᐎᑯᒫᓇᓐ᙮ ᐁᑮᐃᔑᐃᑣ ᑲᔦ ᒋᒪᔥᑲᐌᑖᑯᓯᐙᒡ ᐋᓇᐐᓐ ᐁᑮᒪᒉᑖᑯᓯᐙᒡ; ᐁᑮᓲᑫᑖᑯᓯᐙᒡ ᑲᔦ ᑮᒦᑳᓱᐙᒡ; ᐁᑮᒫᒌᔮᒪᐙᐙᒡ ᑲᔦ ᑳᑮᒪᔭᑭᓯᓂᒡ ᔑᒫᑲᓂᔕᐞ᙮ 35 ᐅᑌᐺᔦᑕᒧᐎᓂᐙᕽ ᐃᑕᔥ ᑲᔦ ᐃᑴᐗᒃ ᑳᑮᐅᒋ ᑮᐌ ᐙᐸᒫᐙᒡ ᐅᑎᓇᐌᒫᑲᓂᐙᐞ ᑳᑮᓂᐳᓂᐸᓐ ᐁᑮᑮᐌᐱᒫᑎᓯᐃᒥᓐᒡ᙮ ᐋᓂᑕ ᑕᔥ ᑲᔦ ᑮᑲᒀᑕᑭᒋᑲᓂᐎᐗᒃ ᐁᑮᐊᑕᐌᑕᓯᒀ ᒋᐸᑭᑎᓂᑣ, ᐋᓃᔥ ᐅᑮᐊᑕᐌᑖᓈᐙ ᒋᑮᐌᐱᒫᑎᓯᐃᑣ ᒋᐊᔮᐙᒡ ᓇᐗᒡ ᑳᐐᐅᓂᔑᔑᓂᓂᒃ ᐱᒫᑎᓯᐎᓐ᙮ 36 ᐋᓂᑕ ᑕᔥ ᑮᐃᔑᑲᒀᑕᑭᐋᐗᒃ ᐁᑮᐹᐱᓄᑕᐎᑣ, ᐁᑮᐸᐸᔕᔐᐅᑣ ᑲᔦ᙮ ᑯᑕᒃ ᑲᔦ ᐲᐙᐱᑴᔮᐲᓂ ᑮᐋᐸᑕᓂᓂ ᐁᑮᒪᒫᒋᑾᐱᓂᑣ, ᐁᑮᑭᐸᐅᑣ ᑲᔦ᙮ 37 ᐋᓂᑕ ᑕᔥ ᑮᐸᐲᒶᓯᓇᐋᐗᒃ, ᑯᑕᒃ ᑮᑖᔥᑭᐴᒋᑲᓂᐎᐗᒃ, ᐋᓂᑕ ᑲᔦ ᑭᒋᒨᑯᒫᓂᓂ ᑮᐋᐸᑕᓂᓂ ᐁᑮᓂᓯᑣ᙮ ᒥᓯᐌ ᑕᔥ ᑮᐸᐹᒥᐊᔮᐗᒃ ᒫᓇᒑᓂᔑᐗᔮᓇᐞ, ᒫᓇᑎᑯᐗᔮᓇᐞ ᐁᑮᐅᑭᑭᔥᑭᑲᓂᐙᒡ, ᐁᑮᑭᑎᒫᑭᓯᐙᒡ, ᐁᑮᑲᒀᑕᑭᐃᑣ, ᓅᒋᑯ ᑲᔦ ᐁᑮᑑᑕᐎᑣ᙮ 38 ᐋᓃᔥ ᑳᐐᓐ ᐊᑮᓂ ᑮᑌᐊᐲᑌᑖᑾᓯᓂᓂ ᐅᐅᒫ ᒋᑮᐊᔮᐙᐸᓐ᙮ ᐸᑾᑕᑲᒥᒃ ᓴ ᑮᑕᔑᐸᐹᒥᐸᐃᐌᐗᒃ, ᑳᐃᔑᐸᐲᑾᑎᓈᓂᒃ ᑲᔦ ᑮᐊᐸᐃᐌᐗᒃ᙮ ᑳᐃᔑᐗᐐᐹᐱᑳᓂᒃ, ᑳᐃᔑᐸᐸᑯᓀᑲᒥᑳᓂᒃ ᑲᔦ ᐁᑮᐊᔨᔑᑖᐙᒡ᙮ 39 ᐅᑯᐌᓂᐗᒃ ᐃᑕᔥ ᐋᐱᒋ ᑮᑭᒋᒥᓍᐸᒋᑲᓂᐎᐗᒃ ᐅᑌᐺᔦᑕᒧᐎᓂᐙᕽ ᐅᒋ᙮ ᔖᑰᒡ ᐃᑕᔥ ᑳᐐᓐ ᐅᑮᑌᐱᓇᓰᓈᐙ ᐃᐃ ᑭᔐᒪᓂᑑᓐ ᑳᑮᐊᔓᑕᒫᑫᓂᒡ᙮ 40 ᑭᔐᒪᓂᑑ ᑕᔥ ᑮᐃᓀᑕᒻ ᐁᐐᐅᔑᑕᒪᐎᓇᕽ ᓇᐗᒡ ᑫᑰᓂᓂ ᑳᐅᓂᔑᔑᓂᓂᒃ᙮ ᐋᓃᔥ ᑮᐃᓀᑕᒻ ᐹᓂᒫ ᑯ ᐐᒌᐎᒪᕽ ᐁᐐᑮᔑᓈᑯᓯᐋᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society