Haapakahk 1 - ᐅᒋᐺ ᑭᒋᒪᓯᓇᐃᑲᓐ1 ᒦ ᓴ ᐅᐅᐌᓂ ᑎᐹᒋᒧᐎᓐ ᐋᐸᑲᒃ Habakkuk ᐅᑲᓅᑕᒫᑫ ᑳᑮ ᐙᐸᑕᐃᑯᒡ ᑳᑎᐯᒋᑫᓂᒡ᙮ ᐋᐸᑲᒃ ᑮᐅᒋᒪᒪᔦᒋᐎ ᑳᑮᑭᑐ ᐌᐌᓂ ᐁᐃᓈᑯᓂᑫᓈᓂᐗᓯᓂᓂᒃ 2 ᑮᓐ ᑌᐯᒋᑫᔭᓐ, ᐋᓃᓐ ᐃᑕᔥ ᒥᓂᒃ ᑫᑲᓅᓂᓈᓐ ᒋᑆ ᓅᑕᐎᔭᓐ, ᒋᑆ ᓈᑕᒪᐎᔮᕽ ᐅᐅ ᑳᔑ ᒪᒋᑑᑖᑯᔮᕽ? 3 ᐌᑯᓀᓐ ᐃᑕᔥ ᐌᒋ ᐸᑭᑎᓂᔭᓐ ᒋᑲᓇᐙᐸᑕᒫᓐ ᓭᓯᒃ ᐁᐃᓈᑯᓂᑫᓈᓂᐗᓯᓄᒃ? ᐌᑯᓀᓐ ᐃᑕᔥ ᐌᒋ ᐸᐹᐱᓯᔅᑫᑕᓯᐗᓐ ᐗᓂᑑᑕᒧᐎᓐ? ᓂᔑᐗᓈᒋᒋᑫᐎᓐ ᐄᑐᒃ, ᐅᒻᐺᑲᒥᑭᓯᐎᓐ ᑲᔦ ᒥᓯᐌ ᐊᔮᒪᑲᓐ ᐙᑳᔭᐄ; ᒥᓯᐌ ᐁᒦᑳᑎᓈᓂᐗᕽ, ᐁᑮᑳᑎᓈᓂᐗᕽ᙮ 4 ᐃᐃ ᓴ ᐃᓈᑯᓂᑫᐎᓐ ᑫᑮ ᐃᔑ ᐊᓄᑮᒪᑲᑭᐸᓐ ᑳᐐᓐ ᐃᔑᓭᓯᓅᓐ, ᑳᐐᓐ ᑫᑰᓐ ᒋᐊᐲᑌᑖᑾᒃ᙮ ᒦᔥ ᒣᒋᐃᔑᐌᐱᓯᐙᒡ ᑳᐅᒋ ᔖᑰᑖᑯᓈᐙᒡ ᑾᔭᒃ ᑳᐃᔑ ᐱᒫᑎᓯᓂᒡ, ᐁᓂᐹᒋᓯᑑᐙᒡ ᑾᔭᒃ ᐃᓈᑯᓂᑫᐎᓐ᙮ ᓅᒋᑯ ᐁᐃᓍᑌᒃ ᐃᓈᑯᓂᑫᐎᓐ᙮ ᑳᑎᐯᒋᑫᓂᒡ ᑳᑮᐃᔑᓇᑴᑖᑯᒡ ᐋᐸᑲᒃ 5 ᒦᑕᔥ ᑳᑎᐯᒋᑫᒡ ᑳᐃᓈᒡ ᐅᐱᒫᑎᓰᒪᐞ, ᐃᓇᔥᑫ ᑲᓇᐙᐸᒥᑾᒃ ᐁᑕᓶᐙᓇᑭᓯᐙᒡ ᐯᒫᑎᓯᐙᒡ ᐙᑳᔭᐄ ᐁᔮᐙᒡ, ᐐᑫ ᑕᔥ ᑭᑲ ᒫᒪᑳᓵᐱᔑᓂᒻ᙮ ᑫᑰᓐ ᐅᔕ ᓂᐐ ᐃᔑᒋᑫ ᒣᒀ ᑳᐱᒫᑎᓯᔦᒃ ᑫᑌᐺᑕᓯᐌᒃ ᒥᓴᐙ ᑯ ᐋᓇ ᐐᑕᒫᑰᔦᒃ᙮ 6 ᓂᐐ ᐃᔑᐋᒃ ᓴ ᐹᐱᓬᐊᓐ Babylon ᐌᒌᐙᒡ ᒋᐅᑭᒫᑲᑖᑫᐙᒡ, ᑫᒀᓂᓴᑭᓯᐙᒡ, ᒣᓈᒋᐃᐌᓯᒀ ᑲᔦ᙮ ᒦᐗᒃ ᓴ ᐃᑭ ᒥᓯᐌ ᐊᑮᕽ ᑫᐱᒥ ᐊᔮᐙᒡ ᒋᒪᑲᑗᐙᒡ ᐊᑮᓐ ᑌᐯᑕᓯᒀ᙮ 7 ᐐᑫ ᓴ ᑯᑖᓀᑖᑯᓯᐗᒃ ᐁᑲᒀᓂᓴᑫᑖᑯᓯᐙᒡ; ᐐᓇᐙ ᒦ ᐁᑕ ᑯ ᐅᑎᓈᑯᓂᑫᐎᓂᐙᓐ ᑳᐱᒥᓂᔕᐊᒧᐙᒡ ᑳᐅᒋ ᑭᒋ ᐃᓀᓂᑎᓱᐙᒡ᙮ 8 ᐅᒥᑕᑎᒨᒥᐙᐞ ᓴ ᓇᐗᒡ ᑭᔒᐸᐃᑎᐗᐞ ᐊᐲᒡ ᐐᓐ ᑭᒋ ᐴᔒᓴᐞ, ᓇᐗᒡ ᐁᐋᑴᑖᑯᓯᓂᒡ ᐊᐲᒡ ᐐᓐ ᒪᐄᑲᓇᐞ ᑮᓂ ᐅᓈᑯᔑᓂᓂᒃ᙮ ᐅᔑᒫᑲᓂᔒᒥᐙᐞ ᐯᒥᐗᓀᐸᐃᑯᓂᒡ ᓴ ᐙᓴ ᐱᒥ ᐅᒌᐗᐞ ᐁᐲᔖᓂᒡ, ᐁᐃᓀᑖᑯᓯᓂᒡ ᑖᐱᔥᑰ ᒥᑕᔅᑭᑎᒀᓈᑫᓯᐗᐞ ᑳᒨᑮᒋᑫᓂᒡ ᐁᐐ ᐊᒧᐌᓂᒡ᙮ 9 ᑲᑭᓇ ᓴ ᐲᔖᐗᒃ ᐁᐐ ᐅᒻᐺᑲᒥᑭᓯᐙᒡ, ᒦᔥ ᑲᑭᓇ ᐊᐎᔭᐞ ᐁᔑ ᓭᑭᓯᓂᒡ ᐁᐱᓈᑯᓯᐙᒡ᙮ ᑳᑳᒋᑎᓈᐙᒡ ᓴ ᒥᑖᐗᑯᕽ ᐊᐲᒋ ᐹᑏᓄᐗᐞ᙮ 10 ᒦᔥ ᐁᔑᒋᑫᐙᒡ ᐁᒦᑭᓱᒫᐙᒡ ᑭᒋᐅᑭᒫᐞ, ᐁᐹᐱᓄᑕᐙᐙᒡ ᑲᔦ ᑌᐯᓂᒥᐌᓂᒡ᙮ ᑳᐐᓐ ᑲᓇᑫ ᐊᐸᐃᐌᐎᑲᒥᑰᓐ ᒋᐊᑳᐙᑕᒧᐙᒡ᙮ ᐅᐱᑯᓯᑑᓈᐙ ᓴ ᐊᑲᒥᑯᓂ ᐋᓴᒪᔭᐄ ᐊᐸᐃᐌᐎᑲᒥᑯᕽ, ᒦᔥ ᐁᔑ ᑳᒋᒋᑑᐙᒡ᙮ 11 ᓅᑎᓄᕽ ᓴ ᐃᓀᑖᑯᓯᐗᒃ ᐁᐱᒥ ᐊᔮᐙᒡ, ᒦᔥ ᑳᐐᓐ ᒋᐊᓂ ᑭᑫᑖᑯᓯᐙᒡ᙮ ᐐᓇᐙ ᐄᑐᒃ ᑕᑌᐱᒫᐗᒃ ᐁᒪᒫᔒᐙᒡ, ᐐᓇᐙ ᑯ ᐅᒪᔥᑲᐎᓰᐎᓂᐙᓐ ᐁᐅᒪᓂᑑᒥᐙᒡ᙮ ᒦᓇᐙ ᐋᐸᑲᒃ ᑮᒪᒪᔦᒋᐎᑲᓅᓈᒡ ᑳᑎᐯᒋᑫᓂᒡ 12 ᑮᓐ ᑌᐯᒋᑫᔭᓐ ᓂᑭᔐᒪᓂᑑᒻ, ᑮᓐ ᑳᑭᒋ ᐃᓀᑖᑯᓯᔭᓐ, ᐌᑎ ᐄᑐᒃ ᓀᐱᒋ ᐅᑖᓈᕽ ᑭᐱᐅᒋ ᐊᔮ! ᑳᐐᓐ ᓴ ᓂᑲ ᓂᐳᓰᒥᓐ᙮ ᑮᓐ ᐄᑐᒃ ᑳᑮ ᐅᓈᐸᒪᑣ ᒋᐅᓈᑯᓂᔭᒥᑣ! ᑮᓐ ᐊᓯᓐ ᑳᓈᑕᒫᑫᔭᓐ, ᑮᓐ ᑭᑮ ᐃᓇᑭᒫᒃ ᒋᓇᓇᐊᓯᒥᔭᒥᑣ᙮ 13 ᑭᔥᑮᔑᑰᓐ ᓴ ᐅᓵᒻ ᐯᑫᑖᑾᓅᓐ ᒋᑲᓇᐙᐸᑕᒪᐸᓐ ᒪᒋᑫᑰᓐ; ᑳᐐᓐ ᒋᔕᔒᐱᓇᐌᐃᑯᔭᐸᓐ ᒪᒫᔒᐎᓐ᙮ ᐌᑯᓀᓐ ᐃᑕᔥ ᐌᒋ ᔕᔒᐱᓇᐌᐃᑯᔭᓐ ᐁᔑ ᑲᑲᔦᔑᒋᑫᐙᒡ? ᐌᑯᓀᓐ ᐃᑕᔥ ᐌᒋ ᓅᑖᑎᓯᐗᓐ ᐁᑕᔑ ᓂᔑᐗᓈᒋᐋᐙᒡ ᓇᐗᒡ ᑾᔭᒃ ᐁᔑ ᐱᒫᑎᓯᓂᒡ ᐊᐲᒡ ᐐᓇᐙ ᐁᓈᑎᓯᐙᒡ? 14 ᒦᑕᔥ ᐁᓀᑖᑾᒃ ᐃᓂᓂ ᐁᑮ ᐃᔑᐊᒡ ᑖᐱᔥᑰ ᑮᑰᔨᕽ ᑭᒋᑲᒦᕽ ᐁᔮᓂᒡ, ᑖᐱᔥᑰ ᐊᒥᔅᑯᓰᓴᒃ ᑳᐊᔮᐙᓯᒀ ᑫᑭᑭᓄᐎᓂᑯᐙᒡ᙮ 15 ᒦᑕᔥ ᐹᐱᓬᐊᓐ ᑳᐅᒌᐙᒡ ᐁᔑ ᒀᔥᑴᐱᓈᐙᒡ ᐯᒫᑎᓯᓂᒡ ᑖᐱᔥᑰ ᑮᑰᔭᐞ, ᑲᔦ ᐅᐐᐸᓴᐲᐙᐞ ᐁᐅᒋ ᑳᒋᑎᓈᐙᒡ, ᒦᔥ ᐁᔑ ᒫᒌᑖᐹᓈᐙᒡ, ᐁᔖᑯᐌᐙᒡ ᐁᐲᒋ ᒥᓉᑕᒧᐙᒡ᙮ 16 ᒦᔥ ᐁᔑ ᐸᑭᑎᓈᓲᑕᒪᐙᐙᒡ ᐅᑕᓴᐲᐙᐞ, ᐁᒥᓈᓴᒪᐙᐙᒡ ᑲᔦ, ᐋᓃᔥ ᐅᑕᓴᐲᒥᐙᕽ ᐅᒋ ᑲᔥᑭᑕᒫᓱᐗᒃ ᒋᐌᓅᑎᓯᐙᒡ ᑫᑰᓇᓐ᙮ 17 ᒦ ᓇ ᑕᔥ ᒨᔕᒃ ᑫᐃᓈᐸᒋᐋᐙᒡ ᐅᑕᓴᐲᒥᐙᐞ ᒋᒑᑭᐋᐙᒡ ᐁᑕᓶᐙᓇᑭᓯᓂᒡ ᐯᒫᑎᓯᓂᒡ ᒋᒪᓈᒋᐋᓯᒀ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society