Haakeaai 1 - ᐅᒋᐺ ᑭᒋᒪᓯᓇᐃᑲᓐᑳᑎᐯᒋᑫᒡ ᑮᐊᓅᑮᒡ ᒋᑮᐌᐅᔑᒋᑳᑌᓂᒃ ᑭᒋ ᐊᓇᒥᐁᐎᑲᒥᒃ 1 ᓃᔓᐱᐴᓐ ᓴ ᑳᑭᒋᐅᑭᒫᐎᒡ ᐊᐊ ᑕᕒᐋᔭᔅ Darius ᐃᐃᒫ ᐯᕒᔕ Persia ᐊᑮᕽ, ᐯᔑᒃ ᐁᐃᓇᑭᓱᓂᒡ ᓂᑯᑣᓱᑮᓯᓲᓐ, ᒦ ᓴ ᐃ ᐊᐲ ᑳᑎᐯᒋᑫᒡ ᑳᑮ ᑲᓅᓈᒡ ᐋᑫᐋᐃᐗᓐ Haggai ᒋᑲᓅᓈᓂᒡ ᐌᑭᒫᑲᑕᒥᓂᒡ ᒎᑕ ᐊᑭ, ᓯᕒᐊᐸᐸᓬ Zerubbabel ᐁᔑᓂᑳᓱᓂᒡ ᐌᑌᑌᓂᒡ ᔒᔭᓬᑏᔭᓬᐗᓐ Shealtiel ᒋᑲᓅᓈᓂᒡ ᑲᔦ ᑭᒋ ᐊᓇᒥᐁᐎᑭᒫᓐ ᒑᔓᐙ Joshua ᐁᔑᓂᑳᓱᓂᒡ ᐌᑌᑌᓂᒡ ᒌᐅᓴᑕᑰᓐ Jehozadak᙮ 2 ᒦᑕᔥ ᐅᐅ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᑳᐃᓈᒡ ᐋᑫᐋᐃᐗᓐ, ᐅᐅ ᓴ ᐃᑭᑐᐗᒃ ᐯᒫᑎᓯᐙᒡ, ᑳᐐᓐ ᐄᑐᒃ ᒪᔑ ᐅᒋᒋᓭᓯᓅᓐ ᑳᑎᐯᒋᑫᒡ ᐅᑭᒋ ᐊᓇᒥᐁᐎᑲᒥᒃ ᒋᑮᐌ ᐅᔑᒋᑳᑌᓂᑭᐸᓐ᙮ 3 ᒦᑕᔥ ᐅᐅ ᑳᑎᐯᒋᑫᒡ ᑳᐃᓈᒡ ᐋᑫᐋᐃᐗᓐ ᒋᐃᑭᑑᑕᒫᑯᒡ, 4 ᓂᐱᒫᑎᓰᒪᒃ, ᒦ ᓇ ᐃ ᐋᔕ ᐁᐃᔑᓭᒃ ᑮᓇᐙ ᒋᑖᓄᑕᒣᒃ ᒣᓄᒋᑳᑌᑭᓐ ᐙᑳᐃᑲᓇᓐ ᓃᓐ ᑕᔥ ᐐᓐ ᓂᑭᒋ ᐊᓇᒥᐁᐎᑲᒥᒃ ᐁᓂᔑᐗᓈᓯᓈᑾᒃ᙮ 5 ᒦᑕᔥ ᐅᐅ ᐁᓂᓀᒃ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ, ᐃᓇᔥᑫ, ᓈᓈᑲᑕᐌᑕᒧᒃ ᐁᔑᒋᑫᔦᒃ᙮ 6 ᓃᐱᐗᐞ ᐃᓴ ᑭᑮ ᑭᑎᑫᒻ, ᐋᐱᒋ ᑕᔥ ᐸᑮ ᐁᑕ ᑭᑮ ᒪᓂᔖᒻ ᑳᑮ ᑭᑎᑳᑕᒣᒃ᙮ ᐁᐐᓯᓂᔦᒃ ᑲᔦ, ᑳᐐᓐ ᐃᑕᔥ ᑭᑌ ᐐᓯᓂᓰᒻ᙮ ᐁᒥᓂᑴᔦᒃ ᑲᔦ, ᑳᐐᓐ ᐃᑕᔥ ᑭᑌ ᒥᓂᑴᓰᒻ᙮ ᐁᐱᒋᑯᓇᔦᔦᒃ ᑲᔦ, ᑳᐐᓐ ᐃᑕᔥ ᑭᑌ ᑮᔔᓯᓰᒻ᙮ ᑮᐊᓄᑮᔦᒃ ᑲᔦ, ᑳᐐᓐ ᑭᑌ ᑲᔥᑭᒋᑫᓰᒻ ᑫᐅᑖᑎᓯᔦᒃ᙮ 7 ᒦᑕᔥ ᐅᐅ ᐁᓂᓀᒃ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ, ᐃᓇᔥᑫ ᓈᓈᑲᑕᐌᑕᒧᒃ ᐁᔑᒋᑫᔦᒃ᙮ 8 ᒫᒑᒃ ᐃᔖᒃ ᐌᑎ ᑳᔑ ᑭᒋ ᐱᑾᑎᓈᒃ, ᒋᓈᓯᑲᐌᒀ ᒥᑎᑰᒃ ᑫᐋᐸᒋᐁᒀ ᒋᑮᐌ ᐅᔑᑑᔦᒃ ᑭᒋ ᐊᓇᒥᐁᐎᑲᒥᒃ᙮ ᒦ ᓴ ᐃᐃᐌ ᑫᒥᓍᐸᑕᒫᓐ, ᒦᑕᔥ ᑲᔦ ᐃᐃᒫ ᑾᔭᒃ ᑫᑕᔑ ᑭᒋ ᐃᓀᑖᑯᐃᑰᔮᓐ᙮ 9 ᓃᐱᐗᐞ ᓴ ᑭᑮ ᑕᓀᑖᒻ ᑫᑰᓇᓐ ᒋᑮ ᒪᓂᔕᒣᑭᐸᓐ, ᐋᐱᒋ ᑕᔥ ᐸᑮ ᐁᑕ ᑫᑰᓐ ᑭᑮ ᐅᑎᓈᒻ᙮ ᐊᐲ ᑕᔥ ᐁᐱᑮᐌᐎᑑᔦᒃ ᓂᑯᒋ ᓴ ᓂᑮ ᐃᔑ ᐴᑖᑖᓇᓐ ᒋᒑᑭ ᐌᐹᓯᑭᓐ᙮ ᐌᑯᓀᓐ ᑕᔥ ᐃᐃ ᑳᑮ ᐅᒋ ᐃᔑᒋᑫᔮᓐ? ᐅᓵᒻ ᐄᑐᒃ ᓂᑭᒋ ᐊᓇᒥᐁᐎᑲᒥᑯᒻ ᐁᓂᔑᐗᓈᓯᓈᑾᒃ, ᐁᐅᑕᒦᑲᒣᒃ ᑮᓇᐙ ᑭᐙᑳᐃᑲᓂᐙᓐ᙮ 10 ᑮᓇᐙ ᓴ ᐃ ᑳᐅᒋ ᔕᑭ ᐊᔮᓯᓄᒃ, ᑫᑰᓐ ᑲᔦ ᑳᐅᒋ ᓂᑖᐎᑭᓯᓄᒃ᙮ 11 ᓃᓐ ᓴ ᐃ ᑳᐃᔑᒋᑫᔮᓐ ᑳᐅᒋ ᐹᑌᒃ ᐃᐃ ᑭᑎᑫᐗᑭ ᑳᐃᔑ ᐸᐲᑾᑎᓈᒃ ᑲᔦ᙮ ᒦ ᑲᔦ ᐃ ᑳᐅᒋ ᐹᑌᑭᓐ ᑳᔑ ᑭᑎᑳᑌᑭᓐ ᐸᑴᔑᑲᓂᒥᓇᓐ ᑲᔦ ᑳᔑ ᑭᑎᑳᓱᐙᒡ ᔔᒥᓇᒃ, ᐃᓂ ᑲᔦ ᑳᔑ ᑭᑎᑳᑌᑭᓐ ᐋᓬᐃᑉ olive ᑎᓄᐎᒥᓇᓐ, ᒥᓯᐌ ᑲᔦ ᒥᑕᑲᒥᒃ ᑫᑰᓇᓐ ᑳᔑ ᓂᑖᐎᑭᑭᓐ᙮ ᐃᓂᓂᐗᒃ, ᐊᔭᐋᐎᔕᒃ ᑲᔦ ᑳᔑ ᐊᔮᐙᒡ, ᐌᑯᓀᓐ ᓴ ᐱᑯ ᑫᑰᓐ ᑳᑲᑴ ᓂᑖᐎᑭᑑᔦᒃ, ᒦ ᓴ ᐃ ᑳᐅᒋ ᐹᑌᒃ᙮ ᐯᒫᑎᓯᐙᒡ ᑮᓇᐃᑕᐙᐙᒡ ᑳᑎᐯᒋᑫᓂᒡ 12 ᒦᑕᔥ ᐊᐊ ᓯᕒᐊᐸᐸᓬ ᐁᔑᓂᑳᓱᒡ ᐌᑌᑌᒡ ᔒᔭᓬᑏᔭᓬᐗᓐ Shealtiel ᐊᐊ ᑲᔦ ᑭᒋ ᐊᓇᒥᐁᐎᑭᒫ ᒑᔓᐙ Joshua ᐁᔑᓂᑳᓱᒡ ᐌᑌᑌᒡ ᒌᐅᓴᑕᑰᓐ Jehozadak, ᐃᑭ ᑕᔥ ᑲᔦ ᑲᑭᓇ ᐯᒫᑎᓯᐙᒡ ᑳᑮ ᐱᑮᐌᐙᒡ, ᐹᐱᓬᐊᓐ Babylon ᐊᑮᕽ ᑳᑮ ᐃᔑᐎᓂᑣᐸᓐ ᑮᐃᔑᒋᑫᐗᒃ ᑭᔐᒪᓂᑑᓐ ᑳᑎᐯᒋᑫᓂᒡ ᑳᑮᐃᑯᐙᒡ᙮ ᐅᑮ ᑌᐺᑕᐙᐙᓐ ᐋᑫᐋᐃᐗᓐ Haggai ᐁᑭᑐᓂᒡ ᐁᑲᓅᑕᒪᐙᓂᒡ ᑳᑎᐯᒋᑫᓂᒡ᙮ ᐅᑮ ᑯᓵᐙᓐ ᑳᑎᐯᒋᑫᓂᒡ᙮ 13 ᒦᑕᔥ ᐋᑫᐋᐃ ᑫᓅᑕᒪᐙᒡ ᑳᑎᐯᒋᑫᓂᒡ ᑳᑮ ᐐᑕᒪᐙᒡ ᐯᒫᑎᓯᓂᒡ ᐋᓃᓐ ᐁᑭᑐᓂᒡ ᑳᑎᐯᒋᑫᓂᒡ, ᓃᓐ ᐃᓴ ᑭᐐᒌᐎᓂᓂᒻ, ᑭᑎᑯᐙ ᑳᑎᐯᒋᑫᒡ᙮ 14 ᒦᑕᔥ ᑳᑎᐯᒋᑫᒡ ᑳᐃᔑ ᐅᐱᐋᒡ ᐅᑖᒑᑯᓃᕽ ᑲᑭᓇ ᐊᐎᔭᓐ ᒋᐊᓄᑳᑕᒥᓂᒡ ᑭᒋ ᐊᓇᒥᐁᐎᑲᒥᒃ᙮ ᒦᐗᒃ ᐃᑕᔥ ᐅᑯ, ᐊᐊ ᐌᑭᒫᑲᑕᕽ ᒎᑕ ᐊᑭ, ᓯᕒᐊᐸᐸᓬ ᐁᔑᓂᑳᓱᒡ ᐌᑌᑌᒡ ᔒᔭᓬᑏᔭᓬᐗᓐ᙮ ᐊᐊ ᑲᔦ ᑭᒋ ᐊᓇᒥᐁᐎᑭᒫ ᒑᔓᐙ Joshua ᐁᔑᓂᑳᓱᒡ ᐌᑌᑌᒡ ᒌᐅᓴᑕᑰᓐ, ᐃᑭ ᑕᔥ ᑲᔦ ᐯᒫᑎᓯᐙᒡ ᐹᐱᓬᐊᓐ ᐊᑮᕽ ᑳᑮ ᐱᐅᒋ ᑕᑯᔑᓄᐙᒡ᙮ ᒦᑕᔥ ᐅᑯ ᑳᑮᒫᑕᓄᑳᑕᒧᐙᒡ ᐅᑭᒋ ᐊᓇᒥᐁᐎᑲᒥᑯᓂ ᑳᑎᐯᒋᑫᓂᒡ ᑳᒫᐗᒋ ᒪᔥᑲᐎᓰᓂᒡ ᐅᑭᔐᒪᓂᑑᒥᐙᓐ, 15 ᐅᐅ ᐃᔑ ᐊᐲ ᓃᔥᑕᓇᔑᓃᐎᓐ ᑮᐃᓇᑭᓱᓂᒡ ᓂᑯᑣᓱᑮᓯᓲᓐ ᐁᐊᓂ ᓃᔓᐱᐴᓇᑳᓂᒃ ᑮᑭᒋ ᐅᑭᒫᐎᒡ ᐊᐊ ᑕᕒᐋᔭᔅ Darius ᐃᐃᒫ ᐯᕒᔕ Persia ᐊᑮᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society