Esara 1 - ᐅᒋᐺ ᑭᒋᒪᓯᓇᐃᑲᓐ

ᑭᒋᐅᑭᒫ ᓵᐃᕒᐊᔅ ᑮᑲᓅᓈᒡ ᒎᐗᐞ ᒋᑮᐌᓂᒡ

¹ ᐯᔑᑯᐱᐴᓐ ᑕᔥ ᑳᑮ ᑭᒋᐅᑭᒫᐎᒡ ᐌᑎ ᐯᕒᔕ Persia ᐊᑮᕽ ᓵᐃᕒᐊᔅ Cyrus ᐁᔑᓂᑳᓱᒡ, ᑳᑎᐯᒋᑫᓂᒡ ᓴ ᐅᑮ ᐃᓀᑕᒧᐃᑰᓐ ᐅᑌᐃᕽ᙮ ᒦᑕᔥ ᐃᐃᒫ ᑳᑮ ᐅᒋ ᐃᔑᓭᓂᒃ ᒉᕒᐊᒫᔭᐗᓐ Jeremiah ᑫᓅᑕᒪᐙᓂᒡ ᑭᔐᒪᓂᑑᓐ ᑳᑮ ᐃᑭᑐᓂᑯᐸᓀᓐ᙮ ᒦᑕᔥ ᐃᐃ ᑭᒋᐅᑭᒫ ᓵᐃᕒᐊᔅ ᑳᑮ ᐊᓅᑮᒡ ᒥᓯᐌ ᐁᔑ ᑎᐯᑕᕽ ᐊᑮᓂ ᒋᐸᐹ ᑎᐹᒋᒧᓈᓂᐗᓂᓂᒃ, ᑮᐊᓅᑮ ᑲᔦ ᒋᐅᔑᐲᐃᑳᑌᓂᒃ᙮ ᒦᑕᔥ ᐅᐅ ᑳᐃᔑᐲᐃᑫᒡ,

² ᒦ ᓴ ᐅᐌᓂ ᓵᐃᕒᐊᔅ ᑫᒋᐅᑭᒫᐎᒡ ᐯᕒᔕ ᐊᑮᕽ ᐁᑭᑐᒡ, ᑳᑎᐯᒋᑫᒡ ᑳᑭᔐᒪᓂᑑᐎᒡ ᑭᒋᑮᔑᑯᕽ ᐅᔕ ᓂᑮ ᒦᓂᒃ ᑲᑭᓇ ᐅᑭᒫᐎᐎᓇᓐ ᐅᐅᒫ ᐊᑮᕽ ᑳᐊᔮᓂᑭᓐ, ᐐᓐ ᑲᔦ ᓂᑮ ᐅᓇᑭᒥᒃ ᒋᐅᔑᑑᔮᓐ ᑭᒋ ᐊᓇᒥᐁᐎᑲᒥᒃ ᑫᑕᔑ ᐊᓇᒥᐁᑕᐎᓐᒡ ᐌᑎ ᑭᒋ ᐆᑌᓈᕽ ᒉᕒᐆᓴᓬᐊᒥᕽ Jerusalem, ᒎᑕ Judah ᐊᑮᕽ᙮

³ ᐊᐌᓀᓐ ᓴ ᐱᑯ ᐁᔮᑴᓐ ᐌᑎ ᑳᔑ ᒫᒪᐎ ᐊᔮᔦᒃ ᑮᓇᐙ ᑲᑭᓇ ᑭᔐᒪᓂᑑ ᐅᐱᒫᑎᓰᒪᐞ ᑳᐃᑰᔦᒃ, ᑭᔐᒪᓂᑑ ᑕᔥ ᑭᑲ ᐐᒌᐎᑯᐙ᙮ ᐱᓵᓐ ᓴ ᑯ ᑭᑲ ᐃᔖᒻ ᑭᒋ ᐆᑌᓈᕽ ᒉᕒᐆᓴᓬᐊᒥᕽ ᐌᑎ ᒎᑕ ᐊᑮᕽ, ᒋᐊᐎ ᑮᐌ ᐅᔑᑑᔦᒃ ᑫᑕᔑ ᐊᓇᒥᐁᑕᐎᓐᒡ ᑳᑎᐯᒋᑫᒡ, ᐃᔅᕒᐃᔭᓬᐊᒃ ᐌᑭᔐᒪᓂᑑᒥᐙᒡ᙮ ᐐᓐ ᐄᑐᒃ ᑳᑭᔐᒪᓂᑑᐎᒡ, ᒦᔥ ᑲᔦ ᐃᐃᒫ ᒉᕒᐆᓴᓬᐊᒥᕽ ᐁᔮᒡ᙮

⁴ ᑲᑭᓇ ᓴ ᐃᑭ ᑳᑮ ᔖᐾᐙᒡ, ᐋᓃᑎ ᐱᑯ ᐁᔑᑖᐙᑴᓐ, ᑕᑲ ᐯᒫᑎᓯᓂᒡ ᑳᐐᒋᐊᔮᒫᐙᒡ ᐅᑲ ᐐᒋᐃᑯᐙᐞ᙮ ᐅᑲ ᒦᓂᑯᐙᐞ ᐙᐹᐱᑯ ᔔᓂᔮᓐ, ᐅᓵᐎ ᔔᓂᔮᓐ ᑲᔦ, ᐋᐸᒋᒋᑲᓇᓐ ᑲᔦ, ᐱᔑᑭᐗᐞ ᑲᔦ᙮ ᑕᑕᑯ ᒦᓈᐗᒃ ᓴ ᑲᔦ ᑫᐸᑭᑎᓂᑳᑫᐙᒡ ᐅᐙᑳᐃᑲᓂᓃᕽ ᑭᔐᒪᓂᑑᓐ ᐌᑎ ᑭᒋ ᐆᑌᓈᕽ ᒉᕒᐆᓴᓬᐊᒥᕽ᙮ ᒦ ᓴ ᐅᐅᐌ ᑳᑮ ᐃᔑᐲᐃᑫᒡ᙮

⁵ ᐃᑭ ᑕᔥ ᐁᑕᓱᑖᐎᓂᕽ ᑳᑮ ᓃᑳᓂᓯᐙᒡ ᒎᑕᑳᕽ, ᐯᒋᒪᓂᑳᕽ Benjamin ᑲᔦ ᑳᑮ ᐅᑕᑳᓀᓯᐙᒡ, ᐃᑭ ᑲᔦ ᐊᓇᒥᐁᐎᑭᒫᒃ, ᓬᐄᐹᐃ ᑳᐅᑕᑳᓀᓯᐙᒡ ᑲᔦ, ᑲᑭᓇ ᐃᑭᐌᓂᐗᒃ ᑲᔦ ᑳᑮ ᐃᓀᑕᒧᐃᑯᐙᒡ ᑭᔐᒪᓂᑑᓐ ᒋᐃᔑᒋᑫᐙᒡ᙮ ᒦᔥ ᑳᐃᔑ ᐅᔒᑖᐙᒡ ᐁᐐ ᐃᔖᐙᒡ ᐁᐐ ᐊᑕ ᐅᔑᑑᐙᒡ ᐅᐙᑳᐃᑲᓂᓂ ᑳᑎᐯᒋᑫᓂᒡ ᐌᑎ ᒉᕒᐆᓴᓬᐊᒥᕽ᙮

⁶ ᒦᑕᔥ ᑲᑭᓇ ᐁᑮ ᐐᒋᐃᑯᐙᒡ ᐅᐐᒋᑖᒫᑲᓂᐙᐞ ᐁᑮ ᒦᓂᑯᐙᒡ ᐙᐹᐱᑯ ᔔᓂᔮᓐ, ᐅᓵᐎ ᔔᓂᔮᓐ ᑲᔦ, ᐋᐸᒋᒋᑲᓇᓐ ᑲᔦ, ᐱᔑᑭᐗᐞ ᑲᔦ᙮ ᑫᑰᓇᓐ ᑲᔦ ᑮᒦᓈᐗᒃ ᑳᑮ ᐊᑭᑌᓂᑭᓐ ᐯᑭᔥ ᐃᑕᔥ ᐁᑮ ᒦᓂᑣ ᑫᐸᑭᑎᓂᑳᑫᐙᒡ᙮

⁷ ᐊᐊ ᑕᔥ ᑭᒋᐅᑭᒫ ᓵᐃᕒᐊᔅ ᐅᑮ ᐱ ᓵᑭᓯᑑᓇᓐ ᐋᐸᒋᒋᑲᓇᓐ ᑳᑮ ᐅᒋ ᑎᐯᑖᑾᓂᓂᑭᓐ ᐃᐃᒫ ᐅᐙᑳᐃᑲᓂᓃᕽ ᑳᑎᐯᒋᑫᓂᒡ᙮ ᓀᐸᑲᓈᓴᕒ Nebuchadnezzar ᑳᑮᑭᒋᐅᑭᒫᐎᑯᐸᓀᓐ ᐄᑐᒃ ᒉᕒᐆᓴᓬᐊᒥᕽ ᑮᐅᒋ ᐲᑑᑯᐸᓀᓐ, ᒦᔥ ᑳᐃᔑ ᐲᑎᑲᑑᑯᐸᓀᓐ ᐅᒪᓂᑑᑳᓇᐞ ᐅᐙᑳᐃᑲᓂᓃᕽ᙮

⁸ ᒦᑕᔥ ᑭᒋᐅᑭᒫ ᓵᐃᕒᐊᔅ ᑳᑮ ᐊᓅᓈᒡ ᑳᓈᓈᑲᒋᐋᓂᒡ ᐅᑭᒫᐎ ᔔᓂᔮᓐ ᒥᑕᕒᐄᑕᑦ Mitherdath ᐁᔑᓂᑳᓱᓂᒡ, ᒋᐲᑑᓂᒡ ᐃᓂ ᐋᐸᒋᒋᑲᓇᓐ᙮ ᒦᑕᔥ ᑳᐃᔑ ᓴᑲᑲᑭᑕᒥᓂᒡ ᐁᑮ ᒦᓈᓂᒡ ᐃᓂ ᔐᔥᐯᓴᕒᐊᓐ Sheshbazzar ᑳᑮ ᑲᓇᐌᓂᒫᓂᒡ ᐃᐃᐌᓂᐗᐞ ᒎᑕ ᑳᑮ ᐅᒋ ᑎᐯᑖᑯᓯᓂᒡ᙮

⁹ ᒦᐗᓐ ᐃᑕᔥ ᐅᓄ ᑳᒦᓈᓂᒡ; ᓂᓯᒥᑕᓇ 30 ᐅᓈᑲᓇᓐ ᐌᓵᐙᐱᑯ ᔔᓂᔮ ᐙᐱᑯᐗᓂᓂᑭᓐ, ᒥᑖᔂᒃ 1,000 ᐅᓈᑲᓇᓐ ᑳᐙᐹᐱᑯ ᔔᓂᔮ ᐙᐱᑯᐗᓂᓂᑭᓐ, ᓃᔥᑕᓇᔑᔖᑲᓱ 29 ᑲᔦ ᐐᓯᓂᐎ ᐋᐸᒋᒋᑲᓇᓐ᙮

¹⁰ ᓂᓯᒥᑕᓇ 30 ᐅᓈᑲᓀᓴᓐ ᐌᓵᐙᐱᑯ ᔔᓂᔮ ᐙᐱᑯᐗᓂᓂᑭᓐ, ᓃᐙᒃ 400 ᐅᓈᑲᓀᓴᓐ ᑳᐙᐹᐱᑯ ᔔᓂᔮ ᐙᐱᑯᐗᓂᓂᑭᓐ, ᒥᑖᔂᒃ 1,000 ᐃᑕᔥ ᑯᑕᒃ ᐐᓯᓂᐎ ᐋᐸᒋᒋᑲᓇᓐ᙮

¹¹ ᑲᑭᓇ ᑕᔥ ᑫᑰᓇᓐ ᑳᑮ ᐅᓵᐙᐱᑯ ᔔᓂᔮ ᐙᐱᑯᐗᓂᓂᑭᓐ, ᑳᑮ ᐙᐹᐱᑯ ᔔᓂᔮ ᐙᐱᑯᐗᓂᓂᑭᓐ ᑳᑮ ᒫᒌᑑᐙᒡ ᓈᓂᕽ ᒥᑖᔂᒃ ᓃᐙᒃ 5,400 ᑮᑕᓯᓂᓂᐗᓐ᙮ ᒦᐗᓐ ᓴ ᐅᓄ ᔐᔥᐯᓴᕒ ᑳᑕᑯ ᒫᒌᑑᒡ ᑮᐐᒌᐙᒡ ᐃᔅᕒᐃᔭᓬᐊᐞ ᑳᑮ ᑲᓇᐌᑖᑯᓯᓂᒡ᙮ ᐹᐱᓬᐊᓐ Babylon ᐊᑮᕽ ᑕᔥ ᑮᐅᒋ ᒫᒑᐗᒃ ᒉᕒᐆᓴᓬᐊᒥᕽ ᐁᑮ ᐃᔖᐙᒡ᙮