Emahs 5 - ᐅᒋᐺ ᑭᒋᒪᓯᓇᐃᑲᓐᑮᑲᓅᓂᑣ ᒋᑴᑳᑎᓯᐙᒡ 1 ᐯᒫᑎᓯᔦᒃ ᐃᔅᕒᐃᔭᓬᐊᒃ ᑕᑲ ᐱᓯᑕᒧᒃ ᐅᐅ ᓇᐃᓂᑏᐎ ᓂᑲᒧᓐ ᑳᐐ ᓂᑲᒨᑕᐎᓇᑰᒃ: 2 ᐃᔅᕒᐃᔭᓬᐊᒃ ᐁᓀᑖᑯᓯᐙᒡ ᐯᑭ ᐅᔥᑭᓃᑭᑴᕽ ᓴ ᑮᔖᑰᒋᐋᐗᒃ, ᐐᑳ ᒦᓇᐙ ᒋᑮᐌ ᐊᔮᓯᒀ᙮ ᐅᑕᑮᒥᐙᕽ ᑮᐃᔑ ᐌᐱᓂᑲᓂᐎᐗᒃ, ᑳᐐᓐ ᐊᐎᔭᓐ ᐅᑲ ᑮᐌ ᐸᓯᑸᐃᑯᓰᐙᓐ᙮ 3 ᒦ ᓴ ᐅᐅᐌᓂ ᑳᑎᐯᒋᑫᒡ ᐁᑭᑐᒡ, ᒥᑖᔂᒃ 1,000 ᔑᒫᑲᓂᔕᒃ ᓴ ᐃᔅᕒᐃᔭᓬᐃ ᐆᑌᓈᕽ ᐅᒋ ᒫᒑᐙᒡ, ᓂᑯᑣᒃ 100 ᓴ ᐁᑕ ᑕᐱᑮᐌᐗᒃ᙮ ᒦᓇᐙ ᑕᔥ ᑯᑕᒃ ᐆᑌᓈᕽ ᓂᑯᑣᒃ ᐅᒋ ᒫᒑᐙᒡ, ᒥᑖᓱ 10 ᐁᑕ ᑕᐱᑮᐌᐗᒃ᙮ 4 ᒦᑕᔥ ᐅᐅ ᑳᑎᐯᒋᑫᒡ ᐁᓂᐃᓈᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ, ᓃᓐ ᐱᓈᓯᑲᐎᔑᒃ, ᒦᔥ ᒋᐱᒫᑎᓯᔦᒃ; 5 ᑫᑯ ᑲᔦ ᐯᑕᓬᑳᕽ Bethel ᐃᔑ ᐊᑐᓀᐅᔑᑫᒃ, ᑫᑯ ᐐᓐ ᐃᔖᑫᒃ ᑭᓬᑲᓬ Gilgal, ᑫᑯ ᑲᔦ ᐲᐊᕒᔒᐸ Beersheba ᐃᓇᑫ ᐃᔖᑫᒃ᙮ ᑭᓬᑲᓬ ᐁᔮᐙᒡ ᐄᑐᒃ ᐸᑳᓐ ᐊᑮᕽ ᐐᐃᔑᐎᓈᐗᒃ, ᐯᑕᓬ ᑲᔦ ᑳᐐᓐ ᑫᑰᓐ ᑕᓂ ᐃᓀᑖᑾᓯᓅᓐ, ᐃᑭᑐ ᑳᑎᐯᒋᑫᒡ᙮ 6 ᐱᓈᓯᑲᐎᒃ ᑳᑎᐯᒋᑫᒡ ᒋᐱᒫᑎᓯᔦᒃ᙮ ᑮᔥᐱᓐ ᓴ ᐃ ᐃᔑᒋᑫᓯᐌᒃ, ᐃᔥᑯᑌᕽ ᐅᔕ ᑕᐃᓀᑖᑯᓯ ᒋᐱᓈᔒᒡ ᐁᔑᐊᔮᓂᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ᙮ ᒦᔥ ᒋᒑᑳᑭᔂᒡ ᐃᐃᒫ ᐯᑕᓬ ᐆᑌᓈᕽ ᐁᔮᓂᒡ᙮ ᑳᐐᓐ ᓴ ᐊᐎᔭᓐ ᐅᑲ ᐋᑕᐌᐊᓰᓂ᙮ 7 ᑳᐐᓐ ᓴ ᑭᑲ ᒪᓈᒋᐃᑰᓰᒻ ᑮᓇᐙ ᑳᓇᐹᒋᓯᑑᔦᒃ ᐌᐌᓂ ᐃᓈᑯᓂᑫᐎᓐ, ᑳᐅᒋ ᐗᔦᔑᒣᒀ ᑲᔦ ᐯᒫᑎᓯᐙᒡ ᐋᓃᓐ ᑫᑮ ᐃᔑᒋᑫᐙᐸᓐ! 8 ᑳᑎᐯᒋᑫᒡ ᐅᑮ ᐅᔑᐋᐞ ᐗᓇᑯᔕᐞ, ᓂᑯᑣᓱ ᐗᓇᑯᔕᐞ ᑳᐊᔪᑾᑰᒋᓂᓂᒡ ᐸᓬᐄᐊᑏᔅ ᔑᑾ ᑳᐊᑕᐌᒋᑫᓂᒡ ᐅᕒᐄᔭᓐ ᐁᓂᒥᓐᒡ᙮ ᐐᓐ ᑳᑲᔥᑭᑑᒡ ᑳᑲᔥᑮᑎᐱᑲᓂᓂᒃ ᒋᓂ ᐙᓭᔮᓂᒃ, ᑳᑮᔑᑲᓂᓂᒃ ᑲᔦ ᒋᓂ ᑎᐱᑲᓂᓂᒃ᙮ ᐐᓐ ᑲᔦ ᑳᑲᓅᑕᕽ ᑭᒋᑲᒦᓂ ᒦᔥ ᐁᔑ ᓰᑭᓇᕽ ᐁᔑ ᐊᔭᑮᐗᓂᓂᒃ᙮ ᑳᑎᐯᒋᑫᒡ ᐅᔕ ᐃᔑᓂᑳᓱ᙮ 9 ᐐᓐ ᓴ ᑳᓂᔑᐗᓈᒋᐋᒡ ᑳᓲᑫᑖᑯᓯᓂᒡ, ᑳᓂᔑᐗᓈᒋᑑᒡ ᑲᔦ ᑳᓲᑲᓂᓂᑭᓐ ᐅᑕᐸᐃᐌᐎᑲᒥᑯᓂ᙮ 10 ᑭᔒᑫᓂᒫᐙ ᑲᔦ ᐊᐎᔭ ᐌᐌᓂ ᑳᑲᑴ ᐃᓈᑯᓂᑫᒡ, ᐐᑫ ᑲᔦ ᑳᑌᐺᒡ ᐃᐃᒫ ᑳᑕᔑ ᑎᐹᑯᓂᑎᐎᓐᒡ᙮ 11 ᐐᑫ ᑲᔦ ᑭᐌᓵᓂᐋᐙᒃ ᑫᑎᒫᑭᓯᐙᒡ, ᐁᒪᑲᒣᒀ ᐅᐸᑴᔑᑲᓂᒥᐙᓐ᙮ ᐋᓇᐐᓐ ᐁᐅᔑᑕᒫᓱᔦᒃ ᐌᐙᓂᔑᔑᑭᓐ ᐊᓯᓃ ᐙᑳᐃᑲᓇᓐ, ᑳᐐᓐ ᐃᑕᔥ ᑭᑲ ᑖᓄᑕᓰᒻ᙮ ᐁᒥᓄᑑᔦᒃ ᑲᔦ ᑳᔑ ᑭᑎᑳᓀᒀ ᔔᒥᓇᒃ, ᑳᐐᓐ ᐃᑕᔥ ᐃᐃᒫ ᑭᑲ ᐅᒋ ᒥᓂᒀᑕᓰᒻ ᔔᒥᓈᐳ᙮ 12 ᓂᑭᑫᑖᓇᓐ ᐅᔕ ᐁᐹᑏᓇᑎᑭᓐ ᑭᒪᒫᔒᐎᓂᐙᓐ, ᑭᒪᒋᑑᑕᒧᐎᓂᐙᓐ ᑲᔦ ᐐᑫ ᐁᐹᑏᓇᑎᑭᓐ᙮ ᑭᐌᓵᓂᐋᐙᒃ ᑲᔦ ᑾᔭᒃ ᐯᒫᑎᓯᐙᒡ, ᔔᓂᔮ ᑮᑎᐸᐊᒫᑰᔦᒃ ᒦ ᐃ ᐁᔑ ᐅᓀᑕᒣᒃ ᐋᓃᓐ ᑫᐃᓈᑯᓂᑫᔦᒃ᙮ ᐐᑫ ᑲᔦ ᑭᑰᐹᒋ ᐗᔦᔑᒫᐙᒃ ᑫᑎᒫᑭᓯᐙᒡ ᑳᔑ ᑎᐹᑯᓂᑎᐎᓐᒡ᙮ 13 ᒦᑕᔥ ᐁᔑ ᐅᓂᔑᔑᕽ ᒋᓅᑖᑎᓰᓈᓂᐗᑭᓐᐸᓐ ᐅᐅ ᐊᐲ ᑲᑭᓇ ᑫᑰᓐ ᑳᒪᒋᐃᔑᐌᐸᒃ᙮ 14 ᒫᓄ ᓴ ᑲᑴ ᐃᔑᒋᑫᒃ ᒋᑑᑕᒣᒃ ᑳᐅᓂᔑᔑᒃ, ᑫᑯ ᐐᓐ ᑑᑕᑫᒃ ᒪᒋᑫᑰᓐ, ᒦᑕᔥ ᐃᐃ ᒋᐱᒫᑎᓯᔦᒃ᙮ ᑳᑎᐯᒋᑫᒡ ᑭᔐᒪᓂᑑ ᑳᒫᐗᒋ ᒪᔥᑲᐎᓰᒡ ᓴ ᑌᐺ ᑭᑲ ᐐᒌᐎᑯᐙ ᑖᐱᔥᑰ ᑳᑮ ᐃᑭᑐᔦᑭᐸᓐ᙮ 15 ᔒᑫᑕᒧᒃ ᒪᒋᑫᑰᓐ, ᓵᑭᑑᒃ ᐃᐃ ᑳᐅᓂᔑᔑᒃ᙮ ᑫᒋᓈᒡ ᑲᔦ ᐅᓇᑑᒃ ᐌᐌᓂ ᐃᓈᑯᓂᑫᐎᓐ ᒋᐊᔮᒃ ᐃᐃᒫ ᑳᔑ ᐅᓈᑯᓂᑫᕽ᙮ ᑳᑎᐯᒋᑫᒡ ᑭᔐᒪᓂᑑ ᑳᒫᐗᒋ ᒪᔥᑲᐎᓰᒡ ᓴ ᑕᔥ ᐄᑐᒃ ᐅᑲ ᑰᐹᓯᓇᐙᐞ ᐯᒫᑎᓯᓂᒡ ᐃᔅᕒᐃᔭᓬᐊᐞ ᒎᓴᐳᕽ Joseph ᑳᐅᑕᑳᓀᓯᓂᒡ ᑳᐃᔥᑯ ᐱᒫᑎᓯᓂᒡ᙮ 16 ᒦᑕᔥ ᐅᐅ ᑳᑎᐯᒋᑫᒡ ᑭᔐᒪᓂᑑ ᑳᒫᐗᒋ ᒪᔥᑲᐎᓰᒡ ᑳᐅᒋ ᐃᑭᑐᒡ, ᑕᓈᓅᑖᑯᓯᓈᓂᐗᓐ ᓴ ᒋᑭᒋ ᒪᐎᓈᓂᐗᕽ ᒋᒫᓀᑕᒧᓈᓂᐗᕽ ᐃᐃᒫ ᑳᔑ ᒪᒦᑲᓈᐗᕽ ᑭᒋ ᐆᑌᓇ᙮ ᐃᑭ ᓴ ᑲᔦ ᑭᑎᑫᐎᓂᓂᐗᒃ ᑕᑲᓅᓈᐗᒃ ᒋᐐᒋ ᒪᐎᒫᐙᒡ ᐃᐃ ᑳᑎᐸᐊᒪᐎᒥᓐᒡ ᑳᓂᑖ ᒪᐎᑳᓱᓂᒡ᙮ 17 ᒥᓯᐌ ᓴ ᔔᒥᓇᐞ ᑳᔑ ᑭᑎᑳᓱᓂᒡ ᑕᐸᐹ ᑕᔑ ᒪᐎᐗᒃ ᐋᓃᔥ ᑭᐐ ᐅᑎᓯᓂᓂᒻ ᐁᔑᐊᔮᔦᒃ ᐁᐐ ᓇᓇᐊᓯᓇᑰᒃ, ᐃᑭᑐ ᑳᑎᐯᒋᑫᒡ᙮ 18 ᐋᐱᒋ ᓴ ᑭᑲ ᑭᒋ ᑰᐹᓯᓈᑯᓯᒻ ᑮᓇᐙ ᑳᐊᑕᐌᑕᒣᒃ ᒋᐅᒋᒋᓭᒃ ᑮᔑᑲᒃ ᐊᐲ ᑳᑎᐯᒋᑫᒡ ᑳᐐ ᓈᑯᓯᒡ! ᐋᓃᓐ ᑕᔥ ᐃᓈ ᑫᔑ ᒥᓄᓭᔦᑭᐸᓐ ᐃᐃ ᐊᐲ ᑮᔑᑲᒃ? ᑮᓇᐙ ᓴ ᐐᓐ ᑳᑮᔑᑲᒃ ᐁᑲᔥᑮᑎᐱᑲᒃ ᑭᑲ ᐃᓀᑖᒻ, ᑳᐐᓐ ᐙᓭᔮ ᑭᑲ ᐃᓀᑕᓰᒻ᙮ 19 ᒦ ᓴ ᑫᐃᓀᑖᑾᒃ ᑖᐱᔥᑰ ᐃᓂᓂ ᑳᒫᒌᐸᐃᐙᓈᒡ ᒥᔑᐱᔑᐗᓐ, ᒪᑾᓐ ᐃᑕᔥ ᑳᓇᑭᔥᑲᐙᒡ᙮ ᑖᐱᔥᑰ ᑲᔦ ᐃᓂᓂ ᑳᐊᔮᐸᑖᑸᒡ ᐅᑖᐎᓂᕽ ᑭᓀᐱᑰᓐ ᐃᑕᔥ ᑳᒫᑾᒥᑯᒡ᙮ 20 ᐃᐃ ᓴ ᐊᐲ ᑮᔑᑲᒃ ᑳᑎᐯᒋᑫᒡ ᑳᐐ ᓈᑯᓯᒡ ᑕᑲᔥᑮᑎᐱᑲᓐ ᐄᑐᒃ, ᑳᐐᓐ ᑕᐙᓭᔮᓯᓅᓐ᙮ ᐐᑫ ᓴ ᐱᑯ ᑕᑲᔥᑮᑎᐱᑲᓐ, ᑳᐐᓐ ᐊᐙᒡ ᐸᑮ ᑯ ᑕᐙᓭᔮᓯᓅᓐ᙮ 21 ᓂᔒᑫᑖᓐ ᐃᓴ ᓂᑖᓇᐌᑖᓇᓐ ᑲᔦ ᐃᓂ ᑭᑕᓇᒥᐁᐐᑾᑎᐎᓂᐙᓐ᙮ ᑳᐐᓐ ᑲᔦ ᓂᒥᓍᐸᑕᓰᓇᓐ ᐃᐃ ᑳᔑ ᓂᑖ ᒫᐙᒋᐃᑎᔦᒃ᙮ 22 ᐋᓇ ᓴ ᐲᑕᒪᐎᔦᒃ ᐃᓂ ᑎᓄ ᑳᐊᒀᑭᑌᑭᓐ ᐸᑭᑎᓈᓱᐎᓇᓐ, ᐸᑴᔑᑲᓐ ᑲᔦ ᑎᓄ ᐸᑭᑎᓈᓱᐎᓇᓐ, ᑳᐐᓐ ᓴ ᓂᑲ ᐅᑖᐱᓇᓰᓇᓐ᙮ ᑳᐐᓐ ᑲᔦ ᓂᐐ ᐅᑖᐱᓈᓰᒃ ᐸᑭᑎᓇᒪᐎᔦᒃ ᐃᑭ ᑳᐋᒋᐴᓂᑣ ᐊᔭᐋᐎᔕᒃ, ᐸᑭᑎᓈᓱᐎᓇᓐ ᑎᓄ ᑳᐅᒋ ᒥᓄ ᐐᒌᑎᕽ᙮ 23 ᑕᑲ ᒦ ᐃ ᐃᔑ ᐴᓂᑑᒃ ᐃᐃ ᑳᐅᐲᑭᓯᔦᒃ ᐁᓂᑲᒧᔦᒃ᙮ ᑳᐐᓐ ᓂᐐ ᐱᓯᑕᓰᓐ ᐋᓃᓐ ᐁᓉᐌᒧᒋᑫᔦᒃ᙮ 24 ᑌᑾᒡ ᑕᔥ ᐅᐅ ᐃᔑᒋᑫᒃ, ᑖᐱᔥᑰ ᓰᐱ ᑳᐱᒥᒋᐗᕽ ᒋᐃᔑ ᓈᑯᑑᔦᒃ ᐌᐌᓂ ᐁᔑ ᒥᓄᑑᑖᑫᔦᒃ, ᑾᔭᒀᑎᓯᐎᓐ ᑲᔦ ᒋᐃᔑᓈᑾᒃ ᑖᐱᔥᑰ ᓰᐱ ᐐᑳ ᑳᐹᑌᓯᓄᒃ᙮ 25 ᐃᔅᕒᐃᔭᓬᐊᒃ, ᑭᑮ ᐲᑕᒪᐎᒻ ᐃᓇ ᐸᑭᑎᓈᓱᐎᓇᓐ, ᐸᑭᑎᓂᑫᐎᓇᓐ ᑲᔦ ᒣᒀ ᑮᐊᔮᔦᑭᐸᓐ ᓃᒥᑕᓇ 40 ᑕᓱᐱᐴᓐ ᐌᑎ ᐱᑾᑕᑲᒥᒃ? 26 ᐁᐊᓇᒥᐁᑕᐌᒃ ᐃᑕᔥ ᐊᐊ ᐅᔑᒋᑲᓐ ᐅᑭᒫᐎ ᒪᓂᑑᑳᓐ ᓴᑰᑦ Sakkuth ᑳᐃᓂᓐᒡ, ᐊᐊ ᑲᔦ ᐗᓇᑯᔒᐎ ᒪᓂᑑᑳᓐ ᑲᐃᐗᓐ ᑳᐃᓂᓐᒡ, ᒦᐗᒃ ᓴ ᐃᑭ ᐄᓴᓐ ᑫᒫᒌᓀᒀ, 27 ᐊᐲ ᐃᔑᐎᓂᓇᑰᒃ ᐌᑎ ᐸᑳᓐ ᐊᑮᕽ ᒋᐊᐎ ᑕᔑ ᑭᐸᐅᑰᔦᒃ ᐌᑎ ᐊᐗᓯᓇᑫ ᑎᒫᔅᑲᔅ Damascus ᐆᑌᓈᕽ, ᐃᑭᑐ ᑳᑎᐯᒋᑫᒡ᙮ ᒦ ᐄᑐᒃ ᐊᐊ ᑳᒫᐗᒋ ᒪᔥᑲᐎᓰᒡ ᑭᔐᒪᓂᑑ ᑳᐃᔑᓂᑳᓱᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society