Emahs 4 - ᐅᒋᐺ ᑭᒋᒪᓯᓇᐃᑲᓐ1 ᓅᑕᒧᒃ ᐅᐅ ᑮᓇᐙ ᐃᑴᐗᒃ ᐁᔮᔦᒃ ᓴᒣᕒᐃᔭᕽ Samaria ᐯᔕᓐ Bashan ᐊᑮᕽ ᐱᔑᑮᕽ ᐁᓀᑖᑯᓯᔦᒃ ᑳᓂ ᐊᔮᒋᐳᔦᒃ᙮ ᑮᓇᐙ ᐄᑐᒃ ᑭᒫᔑ ᑑᑕᐙᐙᒃ ᑳᓃᓇᒫᑎᓯᐙᒡ, ᑭᐌᓵᓂᐋᐙᒃ ᑲᔦ ᑫᑎᒫᑭᓯᐙᒡ᙮ ᒦᔥ ᑲᔦ ᐁᓀᒀ ᑭᓈᐯᒥᐙᒃ, ᑕᑲ ᐲᑕᒪᐎᔑᓈᒻ ᑫᒥᓂᒀᑕᒫᕽ! 2 ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᑳᑭᑌᑖᑯᓯᒡ ᓴ ᐅ ᐃᔑ ᐊᔓᑕᒻ, ᑕᐅᒋᒋᓭ ᓴ ᒋᐃᔑ ᑮᔑᑲᒃ ᐊᐲ ᒋᒫᒌᓂᑰᔦᒃ ᑲᑭᓇ ᑳᑕᔑᔦᒃ ᑖᐱᔥᑰ ᐃᓇᑫ ᑮᑰᔭᒃ ᒀᔥᑴᐱᒋᑲᓂᕽ ᑳᔑ ᐐᑯᐱᓂᑣ᙮ 3 ᐁᑕᔑᔦᒃ ᓴ ᑭᑲ ᐃᔑᑖᐹᓂᑰᒻ ᐁᔑ ᐯᔓᐗᕽ ᑳᔑ ᐸᐸᑯᓀᔮᒃ ᐙᑳᔮᐱᑭᓂᑲᓐ ᑫᔑ ᓵᑭᒋᐌᐱᓂᑰᔦᒃ, ᐃᑭᑐ ᑳᑎᐯᒋᑫᒡ᙮ ᐃᔅᕒᐃᔭᓬᐊᒃ ᑮᐃᔑᐊᔮᐙᒡ ᒋᑮᑭᑭᓄᐊᒪᐙᓯᐎᑣ 4 ᒦᑕᔥ ᑳᒫᐗᒋ ᒪᔥᑲᐎᓰᒡ ᑳᑎᐯᒋᑫᒡ ᐁᓂᓀᒃ, ᒫᒑᒃ ᐃᔅᕒᐃᔭᓬᐊᒃ ᐯᑕᓬ Bethel ᐆᑌᓈᕽ ᐃᔖᒃ ᒋᐊᐎ ᒪᒋᑑᑕᒣᒃ᙮ ᑭᓬᑲᓬ Gilgal ᐆᑌᓈᕽ ᑲᔦ ᐃᔖᒃ ᒋᐊᐎ ᑭᒋ ᒪᒋᑑᑕᒣᒃ᙮ ᐱᓵᓐ ᑲᔦ ᐲᓂᑾᒃ ᐊᔭᐋᐎᔕᒃ ᑳᓂᑖ ᐸᑭᑎᓂᑣ ᐁᑕᓱ ᑭᑭᔐᑉ, ᐲᑑᒃ ᑲᔦ ᐯᔑᒃ ᑫᑰᓐ ᐁᑕᓱ ᒥᑖᓱ ᐁᔮᔦᒃ ᐁᑕᓱ ᓂᓱᑮᔑᒃ᙮ 5 ᐱᓵᓐ ᑲᔦ ᐸᑭᑎᓂᒃ ᐸᑴᔑᑲᓐ ᑳᐅᐱᓯᑲᓂᐎᒡ ᒋᐃᓍᓀᒃ ᒦᑴᒋᐎ ᐸᑭᑎᓂᑫᐎᓂᕽ, ᐱᓵᓐ ᑲᔦ ᑭᒋ ᒫᒦᒀᑕᒧᒃ ᐃᓂ ᑳᓂᑖ ᐁᔥᒀᑦ ᐸᑭᑎᓇᒣᒃ᙮ ᒦ ᐄᑐᒃ ᐃᐃ ᓇᑫ ᐁᔑ ᒥᓉᑕᒣᒃ ᐁᐃᔑᒋᑫᔦᒃ᙮ 6 ᑳᑑᑕᐎᓇᑰᒃ ᑳᔑ ᐊᔭᔮᔦᒃ ᐁᑕᓯᑭᓐ ᑭᒋ ᐆᑌᓇᐗᓐ ᒋᐊᔮᓯᐌᑭᐸᓐ ᒦᒋᒻ, ᒋᐊᔮᐙᓯᐌᒃ ᑲᔦ ᐸᑴᔑᑲᓐ ᐁᔑ ᐊᔭᔮᔦᒃ ᐆᑌᓈᑳᕽ, ᔖᑰᒡ ᐃᑕᔥ ᑳᐐᓐ ᑭᑮ ᐱᑮᐌᓄᑕᐎᓰᒻ, ᐃᑭᑐ ᑳᑎᐯᒋᑫᒡ᙮ 7 ᒦ ᑲᔦ ᑳᑑᑕᐎᓇᑰᒃ ᐁᑮ ᑆᑕᐎ ᑭᒥᐗᓄᑫᔮᓐ ᒫᐗᒡ ᐊᐲ ᑳᐹᑌᒃ ᐊᑭ᙮ ᓂᑮ ᐃᔑᒋᑫ ᓴ ᐯᔑᒃ ᐆᑌᓈᕽ ᒋᔑ ᑭᒥᐗᕽ, ᑳᐐᓐ ᐃᑕᔥ ᑯᑕᒃ ᐆᑌᓈᕽ ᑮᑭᒥᐗᓯᓅᓐ᙮ ᑮᑭᒥᐗᓐ ᓴ ᑲᔦ ᐯᔑᒃ ᑭᑎᑫᐗᑲᒥᑯᕽ, ᑯᑕᒃ ᐃᑕᔥ ᑭᑎᑫᐗᑲᒥᑯᕽ ᑳᐐᓐ ᑮᑭᒥᐗᓯᓅᓐ, ᑮᐹᑌ᙮ 8 ᐐᑫ ᓴ ᐁᓅᑌᔮᐹᑴᐙᒡ, ᐯᒫᑎᓯᐙᒡ ᐯᐸᑳᓐ ᐆᑌᓈᑳᕽ ᐌᒌᐙᒡ ᑮᐃᔖᐗᒃ ᑭᒋ ᐆᑌᓈᕽ ᐁᑮ ᐃᓀᑕᒧᐙᒡ ᒋᒥᑲᒧᐙᒡ ᓂᐲᓂ, ᑳᐐᓐ ᐃᑕᔥ ᒋᑮ ᑌᐱᓭᓂᒃ᙮ ᔖᑰᒡ ᐃᑕᔥ ᑳᐐᓐ ᑭᑮ ᐱᑮᐌᓄᑕᐎᔒᒻ᙮ 9 ᒦᔥ ᑲᔦ ᑳᐃᔑᒋᑫᔮᓐ ᒋᑭᒋ ᑭᔑᓅᐌᒃ, ᒋᐅᑕᒸᐸᑴᓰᑳᒃ ᐁᐐ ᓂᔑᐗᓈᒋᑑᔮᓐ ᑳᔑ ᑭᑎᑫᔦᒃ᙮ ᐸᐸᑭᓀᒃ ᐃᑕᔥ ᐐᓐ ᐅᑮ ᑭᑕᒸᐙᐞ ᐱᒃ ᑎᓄᐙᑎᑰᐞ figs, ᔔᒥᓈᑎᑰᐞ ᑲᔦ, ᔖᑰᒡ ᐃᑕᔥ ᑳᐐᓐ ᑭᑮ ᐱᑮᐌᓄᑕᐎᓰᒻ, ᐃᑭᑐ ᑳᑎᐯᒋᑫᒡ᙮ 10 ᒦᑕᔥ ᑲᔦ ᑳᑑᑕᐎᓇᑰᒃ ᒋᑭᒋ ᐋᑯᓯᔦᒃ ᑖᐱᔥᑰ ᑳᑮ ᑑᑕᐗᒀᐸᓐ ᐄᒋᑉ ᑳᑮ ᐊᔮᐙᒡ᙮ ᓂᑮ ᑑᑕᐙᒃ ᑲᔦ ᑭᑐᔥᑭᓃᑮᒥᐙᒃ ᑳᑕᔑ ᒦᑳᑎᐎᓐᒡ ᒋᑕᔑ ᓂᓯᑣ, ᑭᒥᑕᑎᒨᒥᐙᒃ ᑲᔦ ᒋᑳᒋᑎᓂᑣ᙮ ᑭᑮ ᑑᑕᐎᓂᓂᒻ ᑲᔦ ᒋᒥᓈᑕᒣᒃ ᐃᓂ ᐐᔭᐎᒫᓐ ᑫᒀᓂᓴᑭᒫᑾᑭᓐ ᐁᔑ ᑲᐯᔑᔦᒃ᙮ ᔖᑰᒡ ᐃᑕᔥ ᑳᐐᓐ ᑭᑮ ᐱᑮᐌᓄᑕᐎᓰᒻ᙮ 11 ᐋᓂᑕ ᓴ ᑭᑮ ᓂᔑᐗᓈᒋᐃᓂᓂᒻ ᑖᐱᔥᑰ ᑳᑮ ᑑᑕᒫᐹᓐ ᐃᓂ ᐆᑌᓇᐗᓐ ᔂᑕᒻ Sodom, ᑲᒸᕒᐊ Gomorrah ᑲᔦ ᐁᒋᑳᑌᑭᓐ᙮ ᑮᓇᐙ ᓴ ᑳᑮ ᔖᐾᔦᒃ ᒦ ᐃ ᑳᐃᔑᓈᑯᓯᔦᒃ ᑖᐱᔥᑰ ᒥᑎᒃ ᑳᐱᔅᑲᓀᒃ ᐃᔥᑯᑌᕽ ᑳᐅᒋ ᐅᑖᐱᓂᑳᑌᒃ, ᔖᑰᒡ ᐃᑕᔥ ᑳᐐᓐ ᑭᑮ ᐱᑮᐌᓄᑕᐎᓰᒻ᙮ 12 ᒦᑕᔥ ᑳᐐ ᓇᓇᐊᓯᓇᑰᒃ ᑮᓇᐙ ᐃᔅᕒᐃᔭᓬᐊᒃ᙮ ᐅᐅ ᑕᔥ ᐁᐐ ᑑᑕᐎᓇᑰᒃ, ᒦ ᐃ ᐃᔑ ᐊᔛᒃ ᒋᓇᑭᔥᑲᐌᒃ ᑭᑭᔐᒪᓂᑑᒥᐙ! 13 ᑭᔐᒪᓂᑑ ᐄᑐᒃ ᑳᑮ ᐅᔑᑑᒡ ᐗᒌᓐ, ᓅᑎᓐ ᑲᔦ ᑳᑮ ᐅᔑᑑᒡ᙮ ᐅᑭᑫᑖᑯᑕᒪᐙᓐ ᓴ ᐃᓂᓂᐗᓐ ᐃᓇᑫ ᐁᔑ ᓈᓈᑲᑕᐌᑕᕽ᙮ ᑳᑮᔑᑲᓂᓂᒃ ᑲᔦ ᐐᓐ ᐅᑲᔥᑭᑑᓐ ᒋᐊᓂ ᑲᔥᑮᑎᐱᑲᓂᓂᒃ᙮ ᐐᓐ ᑲᔦ ᑳᐱᒧᓵᑕᕽ ᐊᑮᓂ ᐁᔑ ᐃᔥᐹᓂᒃ᙮ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᓴ ᐃᔑᓂᑳᓱ, ᐃᑭᑐ ᑳᑎᐯᒋᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society