Ekihsatahs 6 - ᐅᒋᐺ ᑭᒋᒪᓯᓇᐃᑲᓐ1 ᑳᑎᐯᒋᑫᓂᒡ ᐃᑕᔥ ᐅᑮᐃᑰᓐ, ᒦᑕᔥ ᐃᐃ ᓅᑯᒻ ᒋᐙᐸᑕᒪᓐ ᐋᓃᓐ ᐙᑑᑕᐗᒃ ᐯᕒᐆ᙮ ᓃᓐ ᓴ ᐱᑯ ᓂᒪᔥᑲᐎᓰᐎᓂᕽ ᓂᑲ ᐅᒋ ᑑᑕᐙ ᒋᐸᑭᑎᓈᒡ ᒋᒫᒑᓂᒡ, ᐅᑕᑮᒥᕽ ᑲᔦ ᒋᐅᒋ ᓵᑭᑖᒪᐙᒡ ᐃᔅᕒᐃᔭᓬᐊᐞ, ᐅᑮᐃᑰᓐ᙮ ᑭᔐᒪᓂᑑᓐ ᑮᐊᑐᒥᑯᒡ ᒨᓯᔅ 2 ᒦᑕᔥ ᒨᓯᔅ Moses ᑳᐃᑯᒡ ᑭᔐᒪᓂᑑᓐ, ᓃᓐ ᓴ ᑳᑎᐯᒋᑫᒡ! 3 ᓂᑮ ᓈᑯᓰᑕᐙᒃ ᓴ ᐁᐸᕒᐊᐋᒻ Abraham, ᐋᐃᓯᒃ Isaac, ᐊᐊ ᑲᔦ ᒉᑲᑉ Jacob ᐁᑮ ᐃᔑ ᐙᐸᒥᐙᒡ ᐁᑎᓄᐎᐗᒃ ᑳᒫᐗᒋ ᒪᔥᑲᐎᓰᓂᒡ ᑭᔐᒪᓂᑑᓐ᙮ ᑳᐐᓐ ᓂᑮ ᑭᑫᓂᒥᑯᓰᒃ ᐁᔑᓂᑳᓱᐗᒃ ᐁᑎᐯᒋᑫᐗᒃ᙮ 4 ᒦᑕᔥ ᑲᔦ ᑳᑮ ᐋᔩᒋ ᐊᔓᑕᒪᐗᒀ, ᑫᓇᓐ Canaan ᐊᑮᓂ ᐁᐐ ᒦᓇᒀᐸᓐ, ᑳᑮ ᐃᔑ ᐲᐎᑌᐌᑖᑯᓯᐙᐸᓐ ᒣᒀ ᐌᑎ ᑮᐃᔑᑖᐙᐸᓐ᙮ 5 ᔖᑰᒡ ᐃᑕᔥ ᑫᔮᐱ ᓂᓅᑕᐙᒃ ᐃᔅᕒᐃᔭᓬᐊᒃ Israel ᐁᒨᑯᓀᐙᒡ᙮ ᐄᒋᑉ Egypt ᑳᐊᔮᓂᒡ ᐃᑕᔥ ᐃᐃ ᑳᑑᑖᑯᐙᒡ ᐁᑲᒀᑕᑲᓄᑮᐃᑯᐙᒡ, ᓂᒫᒥᑲᐎᐙᓐ ᓴ ᓂᑕᔓᑕᒫᑫᐎᓐ ᑳᑮ ᐅᔑᓯᑕᒪᐗᒀᐸᓐ᙮ 6 ᒦᑕᔥ ᐅᐅ ᑫᐃᓇᑣ ᐃᔅᕒᐃᔭᓬᐊᒃ: ᓃᓐ ᓴ ᑳᑎᐯᒋᑫᒡ ᑳᐐ ᓵᑭᓯᐃᓇᑰᒃ ᐁᔑ ᒪᒫᒋᑾᐱᓂᓀᒀ ᐄᒋᑉ ᑳᐊᔮᐙᒡ, ᐁᐐ ᐋᐸᐅᓂᓇᑰᒃ ᐃᐃᒫ ᑳᔑ ᑌᑕᑯ ᒥᑕᓄᑮᐃᑰᔦᒃ᙮ ᑭᑲ ᓈᑕᒪᐎᓂᓂᒻ ᓴ ᐁᐐ ᐋᐸᒋᑑᔮᓐ ᓂᒪᔥᑲᐎᓰᐎᓐ ᒋᑭᒋ ᓴᓇᑳᑯᓇᒀ ᑲᔦ ᐃᑭ ᐄᒋᐸᑮᕽ ᑳᐊᔮᐙᒡ᙮ 7 ᓃᓐ ᓴ ᑯ ᑭᑲ ᐅᐱᒫᑎᓰᒥᓂᓂᒻ, ᓃᓐ ᒋᐅᑭᔐᒪᓂᑑᒥᒥᔦᒃ᙮ ᒦᑕᔥ ᒋᑭᑫᑕᒣᒃ ᓃᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐁᑎᓄᐎᔮᓐ, ᐁᑮ ᓵᑭᒋᐎᓂᓇᑰᒃ ᐃᐃᒫ ᐁᔑ ᑲᒀᑕᑭ ᒥᑕᓄᑮᐃᓀᒀ ᐃᑭ ᐄᒋᐸᑮᕽ ᑳᐊᔮᐙᒡ᙮ 8 ᒦᔥ ᒋᐃᔑᐎᓂᓇᑰᒃ ᐌᑎ ᐊᑮᕽ ᑳᑮ ᐋᔩᒋ ᐊᔓᑕᒪᐗᒀᐸᓐ ᐁᐐ ᒦᓇᒃ ᐁᐸᕒᐊᐋᒻ, ᐋᐃᓯᒃ, ᒉᑲᑉ ᑲᔦ᙮ ᑭᑲ ᒦᓂᓂᓂᒻ ᓴ ᑮᓇᐙ ᐱᑯ ᒋᑎᐱᓇᐌᐎᓯᔦᒃ; ᓃᓐ ᐅᔕ ᑳᑎᐯᒋᑫᔮᓐ, ᑭᑲᐃᓈᒃ, ᐅᑮᐃᑰᓐ᙮ 9 ᒦᑕᔥ ᒨᓯᔅ ᑳᑮ ᐐᑕᒪᐙᒡ ᐃᔅᕒᐃᔭᓬᐊᐞ ᐋᓃᓐ ᑳᐃᑭᑐᓂᒡ ᑳᑎᐯᒋᑫᓂᒡ᙮ ᑳᐐᓐ ᐃᑕᔥ ᐅᑮ ᐱᓯᑖᑯᓰᐞ, ᐐᑫ ᐋᓃᔥ ᑮᐋᓂᓭᑕᒨᐞ ᐲᒐᔭᐄ ᑳᐊᐲᒋ ᑲᒀᑕᑭ ᒥᑕᓄᑮᐃᒥᓐᒡ᙮ 10 ᒦᔥ ᑳᑎᐯᒋᑫᓂᒡ ᑳᐃᑯᒡ, 11 ᒫᒑᓐ, ᐊᐎ ᑲᓅᔥ ᐯᕒᐆ ᑫᒋᐅᑭᒫᐎᒡ ᐅᐅᒫ ᐄᒋᐸᑮᕽ ᒋᐸᑭᑎᓈᒡ ᐃᔅᕒᐃᔭᓬᐊᐞ ᐅᑕᑮᒥᕽ ᒋᐅᒋ ᒫᒑᓂᒡ, ᐅᑮᐃᑰᓐ᙮ 12 ᒦᔥ ᒨᓯᔅ ᑳᐃᔑ ᓇᑴᑕᕽ, ᐃᔅᕒᐃᔭᓬᐊᒃ ᐄᑐᒃ ᑳᐐᓐ ᐊᐙᒡ ᓂᐐ ᐱᓯᑖᑯᓰᒃ, ᐋᓃᓐ ᐃᑕᔥ ᐃᓈ ᐯᕒᐆ ᑫᔑ ᐱᓯᑕᐎᐸᓐ, ᑳᐐᓐ ᐄᑐᒃ ᓂᓂᑖ ᑳᑮᑭᑐᓰ, ᐅᑮᐃᓈᓐ᙮ 13 ᑳᑎᐯᒋᑫᓂᒡ ᐃᑕᔥ ᐅᑮᐃᑯᐙᓐ ᒨᓯᔅ, ᐊᐊ ᐁᕒᐊᓐ Aaron, ᐐᑕᒪᐤ ᐃᔅᕒᐃᔭᓬᐊᒃ, ᐊᐊ ᑲᔦ ᐯᕒᐆ ᑭᒋᐅᑭᒫ ᐄᒋᐸᑮᕽ, ᑮᓇᐙ ᐁᐊᓅᓂᓇᑰᒃ ᒋᓵᑭᓯᐁᒀ ᐃᔅᕒᐃᔭᓬᐊᒃ ᐃᐃᒫ ᐄᒋᐸᑮᕽ, ᐅᑮᐃᑯᐙᓐ᙮ ᒨᓯᔅ, ᐁᕒᐊᓐ ᑕᔥ ᑲᔦ ᐋᑎ ᑳᑮᐅᑕᑳᓀᓯᐙᒡ 14 ᐅᐅ ᓴ ᑮᐃᔑᓂᑳᓱᐗᐞ ᑳᑮ ᐱ ᓃᑳᓀᑖᑯᓯᓂᑯᐸᓀᓐ᙮ ᓂᑕᒻ ᑳᑮ ᓂᑖᐎᑭᒡ ᐅᕒᐆᐸᓐ Reuben ᑳᑮ ᐅᑌᑌᒡ ᒉᑲᐴᓐ Jacob ᐅᑯᓯᓴᐞ ᐁᓇᒃ Hanoch, ᐸᓬᐆ Pallu, ᐄᓯᕒᐊᓐ Hezron, ᑳᕒᒦ Carmi ᑲᔦ᙮ 15 ᒦ ᓴ ᐅᐌᓂ ᓯᒥᔭᓐ Simeon ᐅᑯᓯᓴᐞ ᑳᐃᔑᓂᑳᓱᓂᒡ, ᒌᒥᔪᐌᓬ Jemeul, ᒉᒥᓐ Jamin, ᐆᐋᑦ Ohad, ᒉᑭᓐ Jakin, ᓲᐋᕒ Zohar, ᔐᔪᓬ Shaul ᑲᔦ᙮ 16 ᒦ ᓴ ᐅᐌᓂ ᑳᐃᔑᓂᑳᓱᓂᒡ ᓬᐄᐹᐃ Levi ᐅᑯᓯᓴᐞ ᐁᔑ ᐅᔑᐲᐃᑳᓱᓂᒡ, ᑫᕒᔕᓐ Gershon, ᑰᐊᑦ Kohath, ᒦᕒᐁᕒᐋᐃ Merari᙮ ᓬᐄᐹᐃ ᓂᑯᑣᒃ ᓂᓯᒥᑕᓇᔑᓃᔣᓱ 137 ᑕᓱ ᐱᐴᓐ ᒥᓂᒃ ᐁᑮ ᐱᒫᑎᓯᒡ᙮ 17 ᐅᐅ ᓴ ᑫᕒᔕᓐ ᑮᐃᔑᓂᑳᓱᐗᐞ ᐅᑯᓯᓴᐞ, ᓬᐃᑉᓈᐃ Libni, ᔑᒥᐋᐃ Shimei ᑲᔦ᙮ 18 ᑰᐊᑦ ᐅᑯᓯᓴᐞ ᓴ ᑮᐃᔑᓂᑳᓱᐗᐞ, ᐊᒻᕒᐊᒻ Amram, ᐃᓵᕒ Izhar, ᐄᐸᕒᐊᓐ Hebron, ᔫᓵᔦᓬ Uzziel ᑲᔦ᙮ 19 ᒦᕒᐁᕒᐋᐃ ᐅᑯᓯᓴᐞ ᑮᐃᔑᓂᑳᓱᐗᐞ, ᒪᓬᐋᐃ Mahli, ᒨᔥᓵᐃ Mushi ᑲᔦ, ᒦᐗᒃ ᐄᑐᒃ ᐅᑯ ᑲᔦ ᓬᐄᐹᐃᕽ ᑳᑮ ᐅᒋ ᑎᐯᑖᑯᓯᐙᒡ᙮ 20 ᐊᒻᕒᐊᒻ Amram ᓴ ᑮᐐᐎ ᒐᑲᐯᑦ Jochebed ᐁᔑᓂᑳᓱᓂᒡ ᐅᑑᓯᓴᓐ᙮ ᒦᔥ ᐃᐃᒫ ᑳᐅᒌᐙᒡ ᐁᕒᐊᓐ Aaron, ᐊᐊ ᑲᔦ ᒨᓯᔅ Moses᙮ ᐊᒻᕒᐊᒻ ᓴ ᓂᑯᑣᒃ ᓂᓯᒥᑕᓇᔑᓃᔣᓱ 137 ᑕᓱ ᐱᐴᓐ ᒥᓂᒃ ᑮᐱᒫᑎᓯ᙮ 21 ᐃᓵᕒ Izhar ᐅᑯᓯᓴᐞ ᓴ ᑮᐃᔑᓂᑳᓱᐗᐞ, ᑰᕒᐊ Korah, ᓀᐯᒃ Nepheg, ᓯᑲᕒᐄ Zichri ᑲᔦ᙮ 22 ᔫᓵᔦᓬ Uzziel ᓴ ᑮᐃᔑᓂᑳᓱᐗᐞ ᐅᑯᓯᓴᐞ, ᒥᔐᔭᓬ Mishael, ᐁᓬᓴᐸᓐ Elzaphan, ᓯᑕᕒᐋᐃ Sithri ᑲᔦ᙮ 23 ᒦᔥ ᐁᕒᐊᓐ ᑳᑮ ᐐᐎᒡ ᐄᓬᐃᔒᐸ Elisheba ᐁᔑᓂᑳᓱᓂᒡ ᐊᒥᓇᑖᐸᓐ Amminadab ᐌᑌᑌᓂᒡ, ᓇᔕᓐ Nahshon ᐃᑕᔥ ᑎᐱᓇᐌ ᑳᑮ ᐅᐐᒋᑴᒫᓂᒡ᙮ ᒦᐗᒃ ᐃᓴ ᐅ ᑳᐅᑯᓯᓯᐙᒡ ᓀᑖᑉ Nadab ᐊᐹᐃᐆ Abihu, ᐁᓬᐃᐁᓴᕒ Eleazar, ᐃᑕᒫᕒ Ithamar ᑲᔦ ᐁᔑᓂᑳᓱᓂᒡ᙮ 24 ᑰᕒᐊ Korah ᓴ ᐅᑯᓯᓴᐞ ᐅᐅ ᑮᐃᔑᓂᑳᓱᐗᐞ, ᐋᓭᕒ Assir, ᐁᓬᑫᓇ Elkanah, ᐊᐹᐃᓴᑉ Abiasaph ᑲᔦ, ᒦᐗᒃ ᓴ ᐅᑯ ᑰᕒᐋᐊᕽ ᑳᑮ ᐅᑕᑳᓀᓯᐙᒡ᙮ 25 ᐊᐊ ᓴ ᐁᓬᐃᐁᓴᕒ ᐌᑌᑌᒡ ᐁᕒᐊᓅᓐ ᑮᐐᐎ ᐯᔑᒃ ᐱᔫᑎᔦᓬᐊᓐ Putiel ᐅᑖᓂᓯᓂ᙮ ᒦᔥ ᐃᐃᒫ ᐱᓀᔭᓴᓐ Phinehas ᑳᐅᒋ ᓂᑖᐎᑭᓂᒡ᙮ ᒦᐗᒃ ᓴ ᐅᑯ ᑳᑮ ᓃᑳᓀᑖᑯᓯᐙᒡ ᐅᑖᐎᓂᐙᕽ ᓬᐄᐹᐃᕽ ᑳᑮ ᐅᒋ ᑕᑎᐯᑖᑯᓯᐙᒡ᙮ 26 ᒦ ᓴ ᐗᐊ ᐯᔑᑾᓐ ᐁᕒᐊᓐ ᐊᐊ ᑲᔦ ᒨᓯᔅ ᑳᑮᐃᑯᐙᒡ ᑳᑎᐯᒋᑫᓂᒡ, ᓵᑭᒋᐎᓂᑾᒃ ᐃᔅᕒᐃᔭᓬᐊᒃ Israel ᐃᐃᒫ ᐅᒋ ᐄᒋᐸᑮᕽ Egypt ᐁᔑ ᐯᐹᑏᓄᐙᒡ, ᐁᑮᐃᑯᐙᒡ᙮ 27 ᒦᐗᒃ ᓴ ᐃᑭ ᑳᑮ ᑲᓅᓈᐙᒡ ᐯᕒᐆᓐ Pharaoh ᑭᒋᐅᑭᒫᓐ ᐱᓵᓐ ᒋᐸᑭᑎᓈᓂᒡ ᒋᓵᑲᐊᒥᓂᒡ ᐃᔅᕒᐃᔭᓬᐊᐞ Israel ᐃᐃᒫ ᐄᒋᐸᑮᕽ᙮ ᒦ ᓴ ᐗᐊ ᐯᔑᑾᓐ ᐁᕒᐊᓐ ᔑᑾ ᒨᓯᔅ᙮ ᒨᓯᔅ, ᐁᕒᐊᓐ ᑲᔦ ᑳᑮᐃᓈᑯᓂᑯᐙᒡ ᑳᑎᐯᒋᑫᓂᒡ ᒋᑑᑕᒧᐙᒡ 28 ᐊᐲ ᓴ ᒨᓯᔅ ᑳᑲᓅᓂᑯᒡ ᑳᑎᐯᒋᑫᓂᒡ ᐃᐃᒫ ᐄᒋᐸᑮᕽ, 29 ᐅᐅ ᐅᑮᐃᑰᓐ, ᓃᓐ ᓴ ᑳᑎᐯᒋᑫᒡ᙮ ᐐᑕᒪᐤ ᐯᕒᐆ Pharaoh ᑳᑭᒋᐅᑭᒫᐎᒡ ᐃᐃᒫ ᐄᒋᐸᑮᕽ ᑲᑭᓇ ᑫᑰᓐ ᑳᐃᓂᓈᓐ, ᐅᑮᐃᑰᓐ᙮ 30 ᒦᔥ ᐅᐅ ᒨᓯᔅ ᑳᐃᔑ ᓇᑴᑕᕽ, ᑳᐐᓐ ᐄᑐᒃ ᓂᓂᑖ ᑮᑭᑐᓰ, ᐋᓃᓐ ᐃᑕᔥ ᐃᓈ ᑫᔑ ᐱᓯᑕᐎᐸᓐ ᑭᒋᐅᑭᒫ ᐯᕒᐆ? ᑮᐃᑭᑐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society