Ekihsatahs 34 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᑮᐅᔑᐲᐃᑫᒡ ᐃᐃᒫ ᓇᐸᑳᐱᑲᓯᓃᕽ 1 ᒦᑕᔥ ᐅᐅ ᒨᓯᔅ Moses ᑳᐃᑯᒡ ᑳᑎᐯᒋᑫᓂᒡ, ᐅᔑᐞ ᓃᔑᓐ ᓇᐸᑳᐱᑲᓯᓃᒃ ᑖᐱᔥᑰ ᑳᑮ ᐃᔑᓈᑯᓯᐙᐸᓐ ᓂᑕᒻ ᑳᑮ ᐊᔮᐙᒡ, ᒦᓇᐙ ᑕᔥ ᓂᐐ ᐅᔑᐲᐋᓇᓐ ᐃᑭᑐᐎᓇᓐ ᑳᑮ ᐊᔮᑭᐸᓃᓐ ᐃᐃᒫ ᓂᑕᒻ ᓇᐸᑳᐱᑲᓯᓃᕽ ᑳᑮ ᐱᑭᔥᑭᔑᒪᑣ᙮ 2 ᐙᐸᕽ ᑭᔐᐹᐗᑲᒃ ᓴ ᑮᔒᑖᑲᓐ ᒋᐱ ᐊᒀᒪᒋᐌᔭᓐ ᐅᐅ ᑭᒋ ᐗᒋᐤ ᓵᐃᓇᐃ Sinai᙮ ᒦ ᓴ ᑕᔥ ᐌᑎ ᑫᔑ ᓇᑭᔥᑲᐎᔭᓐ ᐗᑭᒋ ᐗᒌᕽ᙮ 3 ᑳᐐᓐ ᓴ ᐊᐎᔭ ᑭᑲ ᐱ ᐐᒌᐎᑯᓰ ᐱᐊᒀᒪᒋᐌᔭᓐ, ᑳᐐᓐ ᑲᔦ ᐊᐎᔭ ᑕᐙᐸᒋᑲᓂᐎᓰ ᐃᐃᒫ ᑭᒋ ᐗᒌᕽ᙮ ᑳᐐᓐ ᑲᔦ ᒫᓇᒑᓂᔕᒃ, ᐱᔑᑭᐗᒃ ᑕᐅᑕᒋᑫᓰᐗᒃ ᐃᐃᒫ ᑳᔑ ᒫᒌᔮᒪᑎᓈᓂᒃ, ᐅᑮᐃᑰᓐ᙮ 4 ᒦᔥ ᒨᓯᔅ ᑳᑮ ᐅᔑᐋᒡ ᓃᔑᓐ ᓇᐸᑳᐱᑲᓯᓃᐞ ᐁᑮ ᐃᔑᐋᒡ ᑖᐱᔥᑰ ᓂᑕᒻ ᑳᑮ ᐃᔑᓈᑯᓯᓂᐸᓐ᙮ ᐐᐸ ᑕᔥ ᑭᑭᔐᑉ ᑮᐊᒀᒪᒋᐌ ᐃᐃ ᑭᒋ ᐗᒋᐤ ᓵᐃᓇᐃ ᐁᑮ ᐃᔑᒋᑫᒡ ᑳᑮᐃᑯᒡ ᑳᑎᐯᒋᑫᓂᒡ᙮ ᐅᑮ ᐊᒀᒪᒋᐌᐎᓈᐞ ᑕᔥ ᑲᔦ ᐃᐃ ᓃᔑᓐ ᓇᐸᑳᐱᑲᓯᓃᐞ᙮ 5 ᑮᐱ ᓈᔒᐗᓐ ᐃᑕᔥ ᑳᑎᐯᒋᑫᓂᒡ ᐗᑸᕽ ᐁᑮ ᐱ ᐊᔮᓂᒡ, ᐁᑮ ᐐᒋᑳᐸᐎᑕᑰᒡ ᒨᓯᔅ᙮ ᒦᑕᔥ ᐃᐃ ᑳᑮ ᐐᑕᒥᓂᒡ ᐅᐐᓱᐎᓂᓂ ᑳᑯᑖᓀᑖᑾᓂᓂᒃ, ᑳᑎᐯᒋᑫᒡ, ᐁᑮ ᐃᔑ ᐐᑕᒥᓂᒡ᙮ 6 ᒦᔥ ᑳᑎᐯᒋᑫᓂᒡ ᑳᑮ ᐱᒥ ᐊᔮᓂᒡ ᐁᔑᐊᔮᒡ ᒨᓯᔅ ᐁᑮ ᐃᑭᑐᓂᒡ, ᓃᓐ ᓴ ᑳᑭᑌᓂᒥᓐᒡ ᑳᑎᐯᒋᑫᒡ, ᑳᑭᔐᒪᓂᑑᐎᒡ, ᑳᑰᐹᓯᓈᑫᒡ, ᑳᒥᓄᑑᑖᑫᒡ ᑲᔦ, ᐋᐱᒋ ᑲᔦ ᓂᐯᒋᑭᑖᔅ, ᐹᑏᓇᑎᓐ ᑲᔦ ᑳᑖᐱᑕᐌᑖᑾᒃ ᓂᓵᑭᐃᐌᐎᓐ, ᐃᐃ ᑲᔦ ᓂᑌᐺᔦᑖᑯᓯᐎᓐ᙮ 7 ᓂᑲ ᒥᓄᑑᑕᐙᒃ ᑲᔦ ᐃᑭ ᑳᐹᑏᓄᐙᒡ ᑳᐊᔮᓂᑫ ᓂᑖᐎᑭᐃᑎᐙᒡ᙮ ᓂᐴᓀᑖᓇᓐ ᑲᔦ ᒪᒋᐊᔭᐄᓐ, ᒪᒋᑑᑕᒧᐎᓇᓐ ᑲᔦ᙮ ᑳᐐᓐ ᑕᔥ ᓂᑲ ᐋᓶᓈᓰᒃ ᒋᓇᓇᐊᓴᒀ ᐊᐱᓅᒌᔕᒃ, ᐅᔫᔑᓯᒫᒃ ᑲᔦ, ᐃᐃ ᐅᒋ ᑳᑮ ᐃᔑ ᒪᒋᑑᑕᒥᓂᒡ ᐅᔫᓯᐙᐞ ᓂᓯᕽ ᑯᒫ ᑲᔦ ᓃᐎᕽ ᑳᐲ ᐅᑕᑳᓀᓯᐙᒡ, ᐅᑮᐃᑰᓐ᙮ 8 ᒦᔥ ᒨᓯᔅ ᐌᐐᑉ ᑳᑮ ᐊᓂᒥᑯᑖᒡ ᒥᑕᑲᒥᒃ ᐁᑮ ᐊᓇᒥᐋᒡ᙮ 9 ᒦᔥ ᐅᐅ ᑳᐃᑭᑐᒡ, ᑌᐯᒋᑫᔭᓐ, ᑮᔥᐱᓐ ᑌᐺ ᒣᓍᐸᒥᐗᓀᓐ ᑕᑲ ᓴ ᑳᑎᐯᒋᑫᒡ ᑕᐃᔖ ᒣᑴᔭᐄ ᑳᔑ ᐊᔮᓂᒡ ᐯᒫᑎᓯᓂᒡ᙮ ᐋᓇᐐᓐ ᐁᔕᔒᐱᑕᒥᓂᒡ, ᒦ ᐃᔑ ᐴᓀᑕᒪᐎᔑᓈᒻ ᒪᒋᐊᔭᐄᕽ ᐅᒋ, ᓂᒪᒋᑑᑕᒧᐎᓂᓈᓂᓐ ᑲᔦ᙮ ᐅᑖᐱᓂᔑᓈᒻ ᑕᔥ ᓃᓇᐎᓐᑦ ᒋᑎᐯᓂᒥᔮᕽ, ᑮᐃᑭᑐ᙮ ᐊᔓᑕᒫᑫᐎᓐ ᑮᐅᔑᒋᑳᑌᒃ 10 ᑳᑎᐯᒋᑫᓂᒡ ᐃᑕᔥ ᒨᓯᔅ ᐅᑮᐃᑰᓐ, ᐃᓇᔥᑫ ᓂᐐ ᐅᔑᑑᓐ ᐁᔑ ᐊᔓᑕᒫᐗᒀ᙮ ᐁᔑ ᐊᔮᐙᒡ ᐯᒫᑎᓯᐙᒡ ᓂᐐ ᑑᑖᓇᓐ ᒫᒪᑳᒋᒋᑫᐎᓇᓐ ᒪᔑ ᐐᑳ ᑳᐱ ᑑᒋᑳᑌᓯᓄᑭᓐ, ᐐᑳ ᑲᔦ ᐯᒥᑑᒋᑳᑌᓯᓄᑭᓐ ᐁᔑᐊᔮᐙᒡ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ᙮ ᑲᑭᓇ ᓴ ᐯᒫᑎᓯᐙᒡ ᑫᐐᒋᑖᒣᒀ ᐅᑲ ᐙᐸᑖᓈᐙ ᐋᓃᓐ ᐁᐲᒋ ᑯᑖᓀᑖᑾᓂᓂᒃ ᑳᐐ ᑑᑕᒧᐗᒃ᙮ ᓃᓐ ᑳᑎᐯᒋᑫᒡ ᐅᐅ ᑳᐐ ᑑᑕᒪᐎᓇᑰᒃ᙮ 11 ᑫᒋᓈᒡ ᓴ ᑑᑕᒧᒃ ᑳᐃᓂᓇᑰᒃ ᓅᑯᒻ ᑳᑮᔑᑲᒃ᙮ ᓃᓐ ᓴ ᑯ ᓂᑲ ᒫᒌᐋᒪᐙᒃ, ᐁᒧᕒᐄ Amorites ᑳᑎᓄᐎᐙᒡ, ᑲᔦ ᑫᓇᓐ Canaanites, ᐁᑦ Hittites, ᐯᕒᐃᓰ Perizzites, ᑭᐲ Hivites, ᒌᐸᔅ Jebusites ᑲᔦ ᑳᑎᓄᐎᐙᒡ᙮ 12 ᐊᔮᒀᒥᓯᒃ ᐃᑕᔥ ᒋᐃᓈᓯᐌᒀ ᒋᒥᓄ ᐐᒌᐌᒀ ᐌᑎ ᐊᑮᕽ ᑳᐐ ᐃᔖᔦᒃ, ᒫᑭᔖ ᒦ ᐃᐌ ᓇᑫ ᑫᔑ ᑳᒋᒋᐃᓀᒀ ᑫᔑ ᒫᔑᐱᓂᓀᒀ᙮ 13 ᑌᑾᒡ ᐃᑕᔥ ᐅᐅ ᑭᑲ ᐃᔑᒋᑫᒻ᙮ ᑭᑲ ᐲᑯᐱᑖᐙᒻ ᐁᔑ ᐸᑭᑎᓈᓱᐙᒡ, ᑭᑲ ᐲᓴᐅᒫᐙᐞ ᑲᔦ ᐃᐃ ᑳᑭᑌᓂᒫᐙᒡ ᐊᓯᓃᐞ ᐯᑕᑭᓱᓂᒡ, ᑭᑲ ᑮᔥᑲᐅᒫᐙᐞ ᑲᔦ ᒥᑎᑰᐞ ᐌᒋ ᑭᑭᓇᐙᓯᓈᑯᓯᓂᒡ ᐃᐃ ᐃᑴᐎ ᒪᓂᑑᑳᓇᓐ ᐋᔕᕒᐊ Asherah ᐁᒋᑲᓂᐎᓂᒡ᙮ 14 ᑫᑯ ᐊᓇᒥᐁᑕᐙᑫᒀᓂᒃ ᐸᑳᓐ ᒪᓂᑑᑳᓇᒃ, ᓃᓐ ᐄᑐᒃ ᑳᑎᐯᒋᑫᔮᓐ, ᐁᔑᓂᑳᓂᑰᔮᓐ ᑳᐅᑌᑕᕽ, ᓃᓐ ᑭᔐᒪᓂᑑ ᑳᐅᑌᑕᒫᓐ᙮ 15 ᐊᔮᒀᒥᓯᒃ ᒋᐃᓈᓯᐌᒀ ᒋᒥᓄ ᐐᒌᐌᒀ ᐃᑭ ᐅᐅᒫ ᐊᑮᕽ ᑳᐃᔑᑖᐙᒡ᙮ ᒦ ᐄᑐᒃ ᐁᔑᒋᑫᐙᒡ ᐁᓅᒋᐋᐙᒡ ᐅᒪᓂᑑᒥᐙᐞ᙮ ᒦ ᓴ ᐃᐌ ᐁᓀᑖᑾᓂᓂᒃ ᑖᐱᔥᑰ ᐁᐱᔑᒀᒋᒋᑫᐙᒡ᙮ ᒦᔥ ᑲᔦ ᐁᔑᒋᑫᐙᒡ ᐁᐸᑭᑎᓈᓲᑕᒪᐙᐙᒡ᙮ ᒫᑭᔖ ᑕᔥ ᑭᑲ ᐊᑐᒥᑯᐙᒃ ᒋᐊᔕᒥᓀᒀ ᒦᒋᒻ ᑳᐸᑭᑎᓈᔂᑫᐙᒡ᙮ 16 ᑮᔥᐱᓐ ᐃᑕᔥ ᑲᔦ ᐅᑖᐱᓂᒣᒃ ᐅᑖᓂᓯᐙᐞ ᑫᐐᐎᐙᒡ ᑭᑯᓯᓯᐙᒃ, ᓅᒋᐋᓂᒡ ᐃᐃ ᒪᓂᑑᐞ ᐁᓀᑖᑾᓂᓂᒃ ᐁᐱᔑᒀᒋᒋᑫᓂᒡ, ᒦ ᓴ ᐃ ᑫᒋᓈᒡ ᒋᐌᐱᐃᑯᐙᒡ᙮ ᒦᔥ ᐃᐃ ᑭᑯᓯᓯᐙᒃ ᑫᐃᔑᒋᑫᐙᒡ᙮ 17 ᑫᑯ ᐲᐙᐱᑯᕽ ᐅᒋ ᐅᔑᑕᒫᓱᑫᒃ ᒪᓂᑑᑳᓇᒃ ᑫᐊᓇᒥᐁᑕᐌᒀ᙮ 18 ᐃᔑᒋᑫᒃ ᐃᑕᔥ ᒋᑲᓇᐌᑕᒣᒃ ᒋᐐᑾᑏᐗᑲᒥᑭᓯᔦᒃ ᒋᐊᒬᒃ ᐸᑴᔑᑲᓐ ᑳᐅᐱᓯᑲᓂᐎᓯᒃ᙮ ᓃᔣᓱᑮᔑᒃ ᓴ ᑭᑲ ᐊᒸᐙ ᐸᑴᔑᑲᓐ ᐌᐱᓯᑲᓂᐎᓯᒃ ᒋᑑᑕᒣᒃ ᑳᐃᓈᑯᓂᓇᑰᒃ᙮ ᓂᑮ ᐅᓇᑑᓐ ᐄᑐᒃ ᑮᓯᔅ ᐁᐱᑉ Abib ᐱᒪᑭᓱᒡ ᐅᐅ ᒋᐃᔑᒋᑫᔦᒃ, ᐋᓃᔥ ᒦ ᐃ ᐊᐲ ᐄᒋᐸᑮᕽ Egypt ᑳᑮ ᐅᒋ ᓵᑲᐊᒣᒃ ᐁᐱᑉ ᐁᐱᒪᑭᓱᒡ᙮ 19 ᒫᐗᒡ ᐃᑕᔥ ᐃᑯ ᓂᑕᒻ ᓀᑖᐎᑭᒡ ᐁᓂᓃᐎᒡ, ᑲᔦ ᐊᔭᐋᐎᔥ, ᓃᓐ ᓴ ᓂᑲ ᑎᐱᓇᐌᐎᔅ ᑯᒫ ᐌᒌᐙᑴᓐ ᐱᔑᑮᕽ, ᑯᒫ ᑲᔦ ᒫᓇᒑᓂᔑᕽ᙮ 20 ᑭᑲ ᑎᐸᐙᐙ ᓴ ᐐᓐ ᓂᑕᒻ ᓀᑖᐎᑭᒡ ᒫᔑᒥᑕᑎᒻ, ᒫᓇᒑᓂᔐᔅ ᒋᒣᔥᑯᒋ ᒦᑭᐌᔦᒃ᙮ ᑮᔥᐱᓐ ᐃᑕᔥ ᐐᓐ ᑎᐸᐙᓯᐌᒃ, ᒦ ᓴ ᐃ ᒋᐴᑯᑴᓀᒃ᙮ ᑭᑲ ᑎᐸᐙᐙᒃ ᓴ ᑲᑭᓇ ᓂᑕᒻ ᓀᑖᐎᑭᐙᒡ ᑭᑯᓯᓯᐙᒃ᙮ ᑳᐐᓐ ᓴ ᐊᐎᔭ ᓂᑲ ᐱ ᓈᓯᑳᑯᓰ ᒋᐲᑑᓯᒃ ᑫᑰᓐ ᑫᐸᑭᑎᓇᕽ᙮ 21 ᓂᑯᑣᓱᑮᔑᒃ ᓴ ᑭᑲ ᐊᓄᑮᒻ, ᓃᔣᓱᑮᔑᒃ ᐃᑕᔥ ᐃᔑᓭᒃ ᑭᑲ ᐊᓉᐱᒻ, ᒥᓴᐙ ᑯ ᐊᐲ ᐱᑭᔥᑲᑲᒥᑭᐱᒋᑫᕽ ᐊᐲ ᑲᔦ ᒪᓂᔑᑫᕽ᙮ 22 ᑭᑲ ᐃᔑᒋᑫᒻ ᐃᑕᔥ ᑲᔦ ᒋᐐᑾᑏᐗᑲᒥᑭᓯᔦᒃ ᐃᐃ ᐐᑾᑏᐎ ᑕᐗᑌᑭᓐ ᑳᐃᒋᑳᑌᒃ ᓂᑕᒻ ᑳᑭᔥᑭᔑᑳᑌᑭᓐ ᐸᑴᔑᑲᓂᒥᓇᓐ᙮ ᒦᓇᐙᔥ ᒋᐐᑾᑏᐗᑲᒥᑭᓯᔦᒃ ᐊᐲ ᑳᑮᔑᑭᑭᓐ ᑭᑎᑳᓇᓐ ᒋᐃᔑᒋᑫᔦᒃ ᐊᑲᐙᑌᐃᑲᓂ ᐐᑾᑎᐎᓐ ᑳᐃᒋᑳᑌᒃ᙮ 23 ᓂᓯᕽ ᓴ ᐁᑕᓱ ᐱᐴᓐ ᑲᑭᓇ ᑭᑎᓂᓃᒥᐙᒃ ᑕᐲᔖᐗᒃ ᐁᔑᐊᔮᐗᒃ ᓃᓐ ᑳᑎᐯᒋᑫᒡ ᑳᒫᐗᒋ ᒪᔥᑲᐎᓰᒡ ᑳᐅᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ᙮ 24 ᓂᑲ ᒫᒌᐋᒪᐙᒃ ᓴ ᐸᑳᓐ ᐯᒫᑎᓯᐙᒡ ᑫᓂ ᐃᔖᔦᒃ, ᒋᓇᑮ ᐊᔮᒃ ᑫᐅᑕᑮᒥᔦᒃ᙮ ᑳᐐᓐ ᐃᑕᔥ ᐊᐎᔭ ᐅᑲ ᐸᐹᒣᑕᓰᓐ ᑭᑕᑮᒥᐙ ᐊᐲ ᓂᓯᕽ ᐁᑕᓱ ᐱᐴᓐ ᐊᑕᐙᐸᒣᒃ ᐁᔑᐊᔮᒡ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ 25 ᑫᑯ ᐐᓐ ᐸᑭᑎᓈᑫᒃ ᐸᑴᔑᑲᓐ ᐌᐱᓯᑲᓂᐎᒡ ᐊᐲ ᐸᑭᑎᓈᓲᑕᒪᐎᔦᒃ ᐊᔭᐋᐎᔥ, ᑳᐐᓐ ᑲᔦ ᑕᐃᔥᑯᓭᓯᓅᓐ ᑫᑰᓐ ᑳᑮ ᐸᑭᑎᓈᓱᐙᑫᔦᒃ ᑮᐱᒫᒋᐃᑰᐎ ᐐᑾᑎᔦᒃ ᐲᓂᔥ ᒋᐊᓂ ᐙᐸᕽ᙮ 26 ᒫᐗᒡ ᓴ ᑯ ᐌᓂᔑᔑᒃ ᓂᑕᒻ ᐌᒋ ᓂᑖᐎᑭᑑᔦᒃ ᑭᑭᑎᑳᓂᐙᕽ ᑭᑲ ᐲᑑᒻ ᐃᐃᒫ ᑳᑎᐯᒋᑫᒡ ᐅᐙᑳᐃᑲᓂᕽ ᑭᑭᔐᒪᓂᑑᒥᐙ᙮ ᑫᑯ ᐐᓐ ᒫᓇᑎᑰᔅ ᐃᔑ ᑮᔑᔂᑫᒃ ᐅᒫᒫᓐ ᐅᒎᒎᔖᐴᒥᓃᕽ᙮ 27 ᑳᑎᐯᒋᑫᓂᒡ ᐃᑕᔥ ᒨᓯᔅ ᐅᑮᐃᑰᓐ, ᐅᔑᐲᐊᓐ ᐅᓄ ᐃᑭᑐᐎᓇᓐ ᑳᐃᓂᓈᓐ᙮ ᒦ ᓴ ᐃᐌ ᐃᑭᑐᐎᓂᕽ ᐁᔑ ᐊᐱᓯᑑᔮᓐ ᐅᐅ ᐊᔓᑕᒫᑫᐎᓐ ᑳᐅᔑᑕᒪᐗᒀ ᐃᔅᕒᐃᔭᓬᐊᒃ Israel, ᐅᑮᐃᑰᓐ᙮ 28 ᒨᓯᔅ ᐃᑕᔥ ᓃᒥᑕᓇ ᑕᓱ ᑎᐱᒃ, ᓃᒥᑕᓇ ᑕᓱ ᑮᔑᒃ ᐅᑮ ᐐᒋᐊᔮᒫᓐ ᑳᑎᐯᒋᑫᓂᒡ, ᑳᐐᓐ ᐃᑕᔥ ᑮᐅᒋ ᐐᓯᓂᓰ, ᑳᐐᓐ ᑲᔦ ᑮᐅᒋ ᒥᓂᑴᓰ᙮ ᒦᑕᔥ ᑳᑮ ᐅᔑᐲᐊᕽ ᐁᑭᑑᒪᑲᓂᓂᒃ ᐊᔓᑕᒫᑫᐎᓐ ᐃᐃᒫ ᓇᐸᑳᐱᑲᓯᓃᕽ᙮ ᒦᐗᓐ ᐃᓴ ᐃᓂ, ᒥᑖᓱ ᐅᓇᔓᐌᐎᓇᓐ ᑳᐃᔑᓂᑳᑌᓂᑭᓐ᙮ ᐊᐲ ᒨᓯᔅ ᑮᐙᓰᓐᑴᓱᒡ 29 ᐊᐲ ᑕᔥ ᒨᓯᔅ Moses ᑮᐱ ᓃᓵᒪᒋᐌᒡ ᐃᐃᒫ ᑭᒋ ᐗᒌᕽ ᓵᐃᓇᐃ Sinai ᐅᑮ ᐱᒥᐎᓈᐞ ᓃᔑᓐ ᓇᐸᑳᐱᑲᓯᓃᐞ ᐃᑭᑐᐎᓐ ᑳᑮ ᐃᔑ ᐅᔑᐲᐃᑳᑌᓂᒃ᙮ ᑳᐐᓐ ᐃᑕᔥ ᐅᑮ ᑭᑫᑕᓰᓐ ᐁᐙᓰᑴᓱᒡ ᐋᓃᔥ ᐅᑮ ᑲᑲᓅᓈᓐ ᑭᔐᒪᓂᑑᓐ᙮ 30 ᐊᐲ ᑕᔥ ᐁᕒᐊᓅᓐ Aaron, ᐃᐃ ᑲᔦ ᑲᑭᓇ ᐯᒫᑎᓯᓂᒡ ᐁᐙᐸᒥᑯᒡ ᐁᐙᓰᑴᓱᒡ, ᑮᑯᑖᒋᐗᐞ ᐯᔓ ᒋᓈᓯᑳᑯᒡ᙮ 31 ᒦᔥ ᒨᓯᔅ ᑳᑮ ᑲᓅᓈᒡ᙮ ᐁᕒᐊᓅᓐ ᑕᔥ ᐃᐃ ᑲᔦ ᑳᑮ ᓃᑳᓂᓯᓂᒡ ᐃᔅᕒᐃᔭᓬᐊᐞ Israel ᐅᑮ ᐱ ᓈᓯᑳᑰᐞ᙮ ᒦ ᓴ ᐃ ᑳᐃᔑ ᑲᓅᓈᒡ᙮ 32 ᐃᐃ ᑕᔥ ᐁᑮ ᐃᔥᒀ ᐃᔑᒋᑫᒡ, ᑲᑭᓇ ᓴ ᐃᔅᕒᐃᔭᓬᐊᐞ ᐅᑮ ᐱ ᓈᓯᑳᑰᐞ, ᒦ ᓴ ᑳᐃᔑ ᐐᑕᒪᐙᒡ ᒋᑑᑕᒥᓂᒡ ᑲᑭᓇ ᑫᑰᓐ ᑳᑎᐯᒋᑫᓂᒡ ᑳᑮᐃᑯᒡ ᐃᐃᒫ ᑭᒋ ᐗᒌᕽ ᓵᐃᓇᐃ᙮ 33 ᐊᐲ ᑕᔥ ᒨᓯᔅ ᑳᐃᔥᒀ ᐐᑕᒪᐙᒡ ᐯᒫᑎᓯᓂᒡ, ᒦ ᓴ ᑕᔥ ᑳᐃᔑ ᐋᑲᐐᑴᐅᑎᓱᒡ᙮ 34 ᐊᐲ ᑕᔥ ᐃᑯ ᒨᓯᔅ ᑳᐃᔖᒡ ᑳᑮ ᐃᔑᐊᔮᓂᒡ ᑳᑎᐯᒋᑫᓂᒡ ᐁᐐ ᑲᓅᓈᒡ, ᒦᑕᔥ ᑳᐃᔑ ᑮᒋᑯᔥᑲᕽ ᐃᐃ ᑳᑮ ᐋᑲᐐᑴᐅᒡ᙮ ᒦᓇᐙ ᑕᔥ ᑮᐱ ᓵᑲᐊᕽ, ᒦ ᐃ ᑳᑮ ᐃᔑ ᐐᑕᒪᐙᒡ ᐯᒫᑎᓯᓂᒡ ᐃᔅᕒᐃᔭᓬᐊᐞ ᐋᓃᓐ ᑳᑮ ᐃᔑ ᐊᓅᒋᑲᓂᐎᒡ ᒋᐃᑭᑐᒡ᙮ 35 ᐃᔅᕒᐃᔭᓬᐊᐞ ᑕᔥ ᐅᑮ ᐙᐸᒥᑰᐞ ᐁᐙᓰᑴᓱᒡ᙮ ᒦᑕᔥ ᒦᓇᐙ ᑳᐃᔑ ᐱᓯᑲᕽ ᐅᑖᑲᐐᑴᐅᓐ, ᐲᓂᔥ ᑮᐃᔖᒡ ᐁᔑᐊᔮᓂᒡ ᑳᑎᐯᒋᑫᓂᒡ ᐁᑮ ᑲᑲᓅᓈᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society