Ekihsatahs 32 - ᐅᒋᐺ ᑭᒋᒪᓯᓇᐃᑲᓐᐯᒫᑎᓯᐙᒡ ᑮᐊᓇᒥᐁᑕᐙᐙᒡ ᐋᐯ ᐱᔑᑮᑳᓇᓐ 1 ᐊᐲ ᑕᔥ ᐃᔅᕒᐃᔭᓬᐊᒃ Israel ᐁᑮ ᐙᐸᑕᒧᐙᒡ ᐁᑮ ᑆᑕᐎ ᓃᓴᒋᐌᓂᒡ ᒨᓯᓲᓐ Moses ᐃᐃᒫ ᑭᒋ ᐗᒌᕽ, ᐅᑮ ᒫᒪᐎ ᓈᓯᑲᐙᐙᓐ ᐁᕒᐊᓅᓐ Aaron ᐁᑮᐃᓈᐙᒡ, ᑕᑲ ᐊᐯ ᐅᔑᑕᒪᐎᔑᓈᒻ ᒪᓂᑑᒃ ᑫᓃᑳᓃᑕᒪᐎᓇᒀ᙮ ᐃᓇᔥᑫ ᑕᔥ ᐊᐊ ᒨᓯᔅ ᑳᐃᒋᑲᓂᐎᒡ, ᑳᑮ ᓵᑭᒋᐎᓂᓇᑭᒡ ᐌᑎ ᐄᒋᐸᑮᕽ Egypt, ᑳᐐᓐ ᓂᑭᑫᓂᒫᓯᐙᓈᓐ ᓇᒪᓐᒡ ᐄᑐᒃ ᑳᐃᔑᓭᑴᓐ, ᐅᑮᐃᓈᐙᓐ᙮ 2 ᒦᑕᔥ ᐁᕒᐊᓐ ᑳᐃᓈᒡ, ᐃᐃ ᓴ ᑳᐅᓵᐎ ᔔᓂᔮ ᐙᐱᑯᐎᓂᒡ ᐅᓈᐱᑌᐱᓱᓂᐙᐞ ᑳᑭᑭᔥᑲᐙᐙᒡ ᑭᐐᐎᐙᒃ, ᑭᑯᓯᓯᐙᒃ, ᑭᑖᓂᓯᐙᒃ ᑲᔦ, ᑮᒋᑯᓂᒥᒃ ᒋᐲᑕᒪᐎᔦᒃ ᐃᑕᔥ, ᐅᑮ ᐃᓈᐞ᙮ 3 ᒦᔥ ᑲᑭᓇ ᐯᒫᑎᓯᓂᒡ ᑳᑮ ᑭᒋᑯᔥᑲᐙᓂᒡ ᐌᓵᐎ ᔔᓂᔮ ᐙᐱᑯᐎᓂᒡ ᐅᓈᐱᑌᐱᓱᓂᓂ ᐁᑮ ᐲᑕᒫᑯᒡ ᐁᕒᐊᓐ᙮ 4 ᒦᔥ ᐁᕒᐊᓐ ᑳᐃᔑ ᓂᑳᐱᑭᔂᒡ ᓈᐱᑌᐱᓱᓇᐞ, ᐁᑮ ᐃᔑ ᓰᑭᓈᒡ ᑫᐅᒋ ᐃᔑᓈᑯᓯᓂᒡ ᐋᐯ ᐱᔑᑮᕽ᙮ ᒦ ᓴ ᐃ ᐁᑮ ᐅᔑᐋᒡ ᐋᐯ ᐱᔑᑮᑳᓇᓐ᙮ ᐯᒫᑎᓯᓂᒡ ᑕᔥ ᑮᐃᑭᑐᐗᐞ, ᐃᔅᕒᐃᔭᓬᐊᒃ Israel, ᒦ ᓴ ᐗᐊ ᑭᒪᓂᑑᒥᓈᓐ ᑳᑮ ᓵᑭᒋᐎᓂᓇᕽ ᐌᑎ ᐄᒋᐸᑮᕽ, ᐁᑮ ᐃᑭᑐᓂᒡ᙮ 5 ᐊᐲ ᓴ ᐁᕒᐊᓐ ᐁᑮ ᐙᐸᑕᕽ ᐅᐅ, ᒦ ᓴ ᐃ ᑳᐃᔑ ᐅᔑᑑᒡ ᑫᔑ ᐸᑭᑎᓈᓱᐎᓐᒡ ᐁᓈᓴᒥᑳᐸᐎᓂᒡ ᐃᓂ ᐋᐯ ᐱᔑᑮᑳᓇᓐ᙮ ᒦᔥ ᑳᐃᑭᑐᒡ, ᐙᐸᕽ ᓴ ᑕᐐᑾᑎᓈᓂᐗᓐ ᑫᐅᒋ ᑭᑌᓂᒥᓐᒡ ᑳᑎᐯᒋᑫᒡ᙮ 6 ᐐᐸ ᑕᔥ ᑮᐗᓂᔥᑳᐗᒃ ᐁᐊᓂ ᐙᐸᓂᓂᒃ, ᐁᑮ ᐸᑭᑎᓈᓱᐙᒡ ᐁᑮ ᐊᒀᑭᔂᐙᒡ ᐊᔭᐋᐎᔕᐞ, ᐅᑮ ᐸᑭᑎᓈᓈᐙ ᑕᔥ ᑲᔦ ᒥᓄ ᐐᒌᑎᐎ ᐸᑭᑎᓈᓱᐎᓇᓐ᙮ ᐯᒫᑎᓯᐙᒡ ᐃᑕᔥ ᑮᐅᓇᐱᐗᒃ ᐁᑮ ᐐᓯᓂᐙᒡ, ᐁᑮ ᒥᓂᑴᐙᒡ ᑲᔦ᙮ ᒦᑕᔥ ᑲᔦ ᑳᐃᔑ ᐱᔑᒀᑕᑲᒥᑭᓯᐙᒡ᙮ 7 ᑳᑎᐯᒋᑫᓂᒡ ᐃᑕᔥ ᒨᓯᔅ ᐅᑮᐃᑰᓐ, ᔐᒫᒃ ᓃᓵᒪᒋᐌᓐ, ᐊᑕ ᐙᐸᒻ ᑭᐱᒫᑎᓰᒪᒃ ᑳᑮ ᓵᑭᒋᐎᓇᑣ ᐌᑎ ᐄᒋᐸᑮᕽ᙮ ᐋᔕ ᐅᔕ ᓂᔑᐗᓈᑕᑲᒥᑭᓯᐗᒃ᙮ 8 ᐁᑕᑕᐌ ᐐᐸ ᐅᓇᑲᑖᓈᐙ ᐃᐃᐌ ᓇᑫ ᑳᑮ ᐃᓇᒀᐸᓐ ᒋᐃᔑᒋᑫᐙᒡ᙮ ᐅᓵᐎ ᔔᓂᔮ ᐙᐱᑯᕽ ᐁᑮ ᐅᒋ ᐅᔑᑕᒫᓱᐙᒡ ᐋᐯ ᐱᔑᑮᓴᓐ, ᒦᐗᓐ ᓴ ᐃᓂ ᑳᐊᓇᒥᐁᑕᐙᐙᒡ, ᑳᐸᑭᑎᓈᓲᑕᐙᐙᒡ ᑲᔦ᙮ ᒦᑕᔥ ᑲᔦ ᐁᑭᑐᐙᒡ, ᐃᔅᕒᐃᔭᓬᐊᒃ ᒦ ᓴ ᐗᐊ ᑭᒪᓂᑑᒥᓈᓐ ᑳᑮ ᓵᑭᒋᐎᓂᓇᕽ ᐌᑎ ᐄᒋᐸᑮᕽ᙮ 9 ᒦᔥ ᑳᐊᓂᐃᑯᒡ ᑳᑎᐯᒋᑫᓂᒡ, ᓂᐙᐸᒫᒃ ᓴ ᐯᒫᑎᓯᐙᒡ, ᐋᐱᒋ ᐁᔕᔒᐱᑕᒧᐙᒡ᙮ 10 ᑕᑲ ᑕᔥ ᓅᑯᒻ ᑫᑯ ᑲᑴ ᑭᐱᑎᓂᔑᑫᓐ, ᐋᐱᒋ ᐅᔕ ᓂᓂᔥᑭᐃᑰᒃ, ᒦ ᓴ ᑕᔥ ᑳᐐ ᐅᒋ ᓂᔑᐗᓈᒋᐊᒀ᙮ ᑮᓐ ᐃᑕᔥ ᐐᓐ ᑭᑲ ᐃᔑᐃᓐ ᒋᑭᒋ ᐃᓀᑖᑯᓯᐙᒡ ᑭᐲᐌᓰᒪᒃ, ᐅᑮᐃᑰᓐ᙮ 11 ᒦᑕᔥ ᒨᓯᔅ ᑳᑮ ᑲᑴ ᐗᐙᑲᐎᐋᒡ ᑳᑎᐯᒋᑫᓂᒡ ᐅᑭᔐᒪᓂᑑᒪᓐ, ᐁᑮᐃᓈᒡ, ᐌᑯᓀᓐ ᐃᑕᔥ ᐌᒋ ᐊᐲᒋ ᓂᔥᑭᐃᒀ ᐃᑭ ᐯᒫᑎᓯᐙᒡ ᑳᑮ ᐱ ᓵᑭᒋᐎᓇᑣ ᐌᑎ ᐄᒋᐸᑮᕽ ᑮᐋᐸᒋᑖᐗᒡ ᑭᒪᔥᑲᐎᓰᐎᓐ, ᐃᐃ ᑲᔦ ᑭᒪᔥᑲᐎᒋᑫᐎᓇᓐ? 12 ᐃᓇᔥᑫ ᒫᑭᔖ ᐄᒋᑉ ᑳᑎᓄᐎᐙᒡ ᑕᐃᑭᑐᐗᒃ, ᑮᒪᒋᐃᓀᑕᒻ ᐅᔕ ᑳᑮ ᐅᒋ ᒫᒌᓈᒡ ᐃᔅᕒᐃᔭᓬᐊᐞ ᐁᐐ ᐊᐎ ᓂᓵᒡ ᐌᑎ ᑭᒋ ᐗᒌᕽ᙮ ᐁᐐ ᓂᔑᐗᓈᒋᐋᒡ ᑲᔦ ᐗᐐᑫ ᐱᑯ ᐅᐅᒫ ᐊᑮᕽ᙮ ᒦ ᐃ ᐃᔑ ᐴᓂᑭᑖᓱᓐ, ᐋᓂᓭᑕᓐ ᐃᐃ ᑳᐐ ᐃᔑ ᒪᒋᑑᑕᐗᑣ ᑳᑎᐯᓂᒪᑣ ᐯᒫᑎᓯᐙᒡ᙮ 13 ᒫᒥᑲᐎᓄᑕᐤ ᐁᐸᕒᐊᐋᒻ Abraham, ᐋᐃᓯᒃ Isaac, ᐊᐊ ᑲᔦ ᐃᔅᕒᐃᔭᓬ Israel ᑳᑮ ᐊᓄᑮᑕᐎᒀ᙮ ᒦᐗᒃ ᐄᑐᒃ ᐃᑭ ᑮᓐ ᐃᑯ ᑳᑮ ᐊᔓᑕᒪᐗᑣ ᐅᐅ ᐁᑮ ᐃᓇᑣᐸᓐ, ᓂᑲ ᐃᔑᐋᒃ ᓴ ᑭᐲᐌᓰᒪᒃ ᒋᐊᓂ ᐹᑏᓄᐙᒡ ᑖᐱᔥᑰ ᑳᔑ ᐹᑏᓄᐙᒡ ᐗᓇᑯᔕᒃ ᐃᔥᐱᒥᕽ, ᒦᔥ ᑲᔦ ᐁᔑ ᐊᔓᑕᒪᐎᓈᓐ ᑲᑭᓇ ᑭᐲᐌᓰᒪᒃ ᐁᐐ ᒦᓇᒀ ᐅᐅ ᐊᑮᓂ, ᓀᐱᒡ ᐃᑯ ᒋᑎᐱᓇᐌᐎᓯᐙᒡ, ᐅᑮᐃᓈᓐ᙮ 14 ᒦᑕᔥ ᑳᑎᐯᒋᑫᓂᒡ ᑳᐃᔑ ᐋᑌᑕᒥᓂᒡ᙮ ᑳᐐᓐ ᑕᔥ ᐅᑮ ᑑᑕᐙᓰᓂ ᐯᒫᑎᓯᓂᒡ ᑳᐐ ᐃᔑ ᓂᔑᐗᓈᒋᐋᓂᐸᓐ᙮ 15 ᒦᔥ ᒨᓯᔅ ᑳᐃᔑ ᑴᑭᑳᐸᐎᒡ ᐁᑮ ᓃᓵᒪᒋᐌᒡ ᐃᐃᒫ ᑭᒋ ᐗᒌᕽ ᐁᑮ ᐱᒥᐎᓈᒡ ᓃᔑᓐ ᓇᐸᑳᐱᑲᓯᓃᐞ ᐁᔑ ᐅᔑᐲᐃᑳᑌᓂᒃ ᑭᔐᒪᓂᑑᓐ ᐅᑑᓇᔓᐌᓂᓂ ᑴᑴᑲᔭᐄ᙮ 16 ᑭᔐᒪᓂᑑ ᓴ ᐐᓐ ᐃᑯ ᐅᑮ ᐅᔑᐋᐞ ᐃᐃ ᓇᐸᑳᐱᑲᓯᓃᐞ, ᐐᓐ ᐃᑯ ᑲᔦ ᐅᑑᔑᐲᐃᑫᐎᓐ ᐁᑮ ᐅᔑᐲᐃᑳᑌᓂᒃ ᐃᐃᒫ ᓇᐸᑳᐱᑲᓯᓃᕽ᙮ 17 ᐊᐲ ᑕᔥ ᒑᔓᐙᓐ Joshua ᐁᓅᑕᐙᓂᒡ ᐯᒫᑎᓯᓂᒡ ᐁᔖᑯᐌᓂᒡ ᐅᑮᐃᑰᓐ ᒨᓯᔅ, ᒦ ᓴ ᐁᓂᑕᒫᓐ ᐁᒦᑳᑎᓈᓂᐗᕽ ᐌᑎ ᑳᔑ ᑲᐯᔑᓈᓂᐗᕽ, ᐅᑮᐃᑰᓐ᙮ 18 ᒦᔥ ᐅᐅ ᒨᓯᔅ ᑳᐃᑭᑐᒡ, ᑳᐐᓐ ᓃᓐ ᐃᐃ ᓂᑎᓂᑕᓰᓐ ᑳᐃᓉᓈᓂᐗᕽ ᑮᔖᑰᒋᑣᕽ, ᑳᐐᓐ ᑲᔦ ᓂᑎᓂᑕᓰᓐ ᑳᐃᓉᓈᓂᐗᕽ ᐊᐎᔭ ᑮᔖᑰᒋᐃᓐᒡ᙮ ᒪᑗ ᓂᑲᒧᓈᓂᐗᓐ ᐃᓴ ᓃᓐ ᓂᑎᓂᑕᒻ, ᑮᐃᑭᑐ᙮ 19 ᐊᐲ ᑕᔥ ᒨᓯᔅ ᐯᔓ ᐁᐊᓂ ᓈᓯᑲᕽ ᐁᔑ ᑲᐯᔑᓈᓂᐗᓂᓂᒃ, ᒦ ᓴ ᑳᑮ ᐙᐸᒫᒡ ᐱᔑᑮᑳᓇᓐ, ᑮᐙᐸᑫ ᑲᔦ ᐁᓃᒥᓈᓂᐗᓂᓂᒃ᙮ ᒦᔥ ᐃᐃ ᑳᑮ ᓂᔥᑳᑎᓯᒡ᙮ ᐃᐃᒫ ᑕᔥ ᐁᔑ ᒫᒌᔮᒪᑎᓈᓂᒃ ᐅᑮ ᐊᐸᑭᓈᐞ ᐃᐃ ᓇᐸᑳᐱᑲᓯᓃᐞ ᐁᑮ ᐱᑭᔥᑭᔑᒫᒡ᙮ 20 ᒦᑕᔥ ᒨᓯᔅ ᑳᑮ ᐅᑖᐱᓈᒡ ᐃᓂ ᐋᐯ ᐱᔑᑮᑳᓇᓐ ᑳᑮ ᐅᔑᐃᒥᓐᒡ᙮ ᒦᔥ ᑳᐃᔑ ᓂᑭᔂᒡ, ᐐᑫ ᑲᔦ ᐁᑮ ᐱᑭᔥᑳᐗᑲᐙᒡ ᓂᐲᕽ ᐃᑕᔥ ᐁᑮ ᐃᔑ ᐊᐹᑲᒥᓈᒡ᙮ ᒦᔥ ᑳᐃᔑ ᑑᑕᐙᒡ ᐃᔅᕒᐃᔭᓬᐊᐞ ᒋᒥᓂᑴᓂᒡ᙮ 21 ᒦᔥ ᑳᐃᓈᒡ ᐁᕒᐊᓅᓐ, ᐋᓃᓐ ᑕᔥ ᑳᑑᑕᐎᒀ ᐅᑯ ᐯᒫᑎᓯᐙᒡ, ᑮᓐ ᐁᑮ ᑑᑕᐗᑣ ᒋᑭᒋ ᒪᒋᐃᔑᒋᑫᐙᒡ? ᐅᑮᐃᓈᓐ᙮ 22 ᐅᐅ ᑕᔥ ᐁᕒᐊᓅᓐ ᐅᑮ ᐃᔑ ᓇᑴᑖᑰᓐ, ᑫᑯ ᓃᓐ ᓂᔥᑳᑎᓰᑲᑕᐎᔑᑫᓐ, ᑭᑭᑫᓂᒫᒃ ᐄᑐᒃ ᐅᑯ ᐯᒫᑎᓯᐙᒡ ᐁᐲᒋ ᐙᑫ ᒪᒋᑑᑕᒧᐙᒡ᙮ 23 ᒦ ᓴ ᐅᐅ ᑳᐃᔑᐙᒡ, ᑳᐐᓐ ᓂᑭᑫᓂᒫᓯᐙᓈᓐ ᐊᒪᓐᒡ ᐄᑐᒃ ᑳᐃᔑᓭᑴᓐ ᐊᐊ ᐃᓂᓂ ᒨᓯᔅ ᑳᑮ ᓵᑭᒋᐎᓂᓇᑭᒡ ᐌᑎ ᐄᒋᐸᑮᕽ! ᐅᔑᑕᒪᐎᔑᓈᒻ ᒪᓂᑑ ᑫᓃᑳᓃᑕᒪᐎᔭᒥᓐᒡ᙮ 24 ᒦᑕᔥ ᐅᐅ ᑳᐃᓇᒀ, ᐊᐌᓀᓇᒃ ᓴ ᑯ ᑫᑭᔥᑲᐙᐙᒡ ᐅᓵᐎ ᔔᓂᔮ ᐙᐱᑰᓐ ᐅᑲ ᑮᒋᑯᔥᑲᐙᐙᓐ᙮ ᒦ ᓴ ᑕᔥ ᑳᐃᔑᒋᑫᐙᒡ᙮ ᒦᔥ ᑳᐃᔑ ᒪᒍᑌ ᐌᐱᓂᒪᒃ, ᒦ ᓴ ᐃᐃᒫ ᑳᐅᒌᒡ ᐊᐊ ᐱᔑᑮᑳᓐ! 25 ᒨᓯᔅ ᐃᑕᔥ ᐁᐙᐸᒫᒡ ᐯᒫᑎᓯᓂᒡ ᐙᐃᔑᒋᑫᓂᒡ ᐃᑯ ᐁᓀᑕᒥᓂᒡ, ᐋᓃᔥ ᐁᕒᐊᓅᓐ ᐱᓵᓂᑯ ᐅᑮ ᐸᑭᑎᓈᓂ ᒋᐃᔑᒋᑫᓂᒡ ᐙᐃᔑᒋᑫᓂᒡ᙮ ᐋᐱᒋ ᓴ ᐃᔅᕒᐃᔭᓬᐊᐞ Israel ᑮᑲᑮᐹᓯᓈᑯᓯᐗᐞ ᐁᑮ ᑲᓇᐙᐸᒥᑯᓂᒡ ᑳᑮ ᔒᑫᓂᒥᑯᓂᒡ᙮ 26 ᒦᑕᔥ ᒨᓯᔅ ᑳᐃᔑ ᐅᔑᑳᐸᐎᒡ ᐃᐃᒫ ᑳᐅᒋ ᐲᑎᑫᔥᑭᑳᑌᓂᒃ ᐁᔑ ᑲᐯᔑᐎᓐᒡ ᐁᑮ ᐃᔑ ᔖᑯᐌᒡ, ᐊᐌᓀᓐ ᑕᔥ ᐃᑯ ᑳᐐ ᐐᒌᐙᒡ ᑳᑎᐯᒋᑫᓂᒡ ᓂᑲ ᐱ ᓈᓯᑳᒃ᙮ ᑲᑭᓇ ᑕᔥ ᐃᐃ ᓬᐄᐹᐃᕽ Levi ᐌᑕᑳᓀᓯᓂᒡ ᐅᑮ ᐱ ᓈᓯᑳᑰᐞ᙮ 27 ᒦᔥ ᐅᐅ ᑳᐃᓈᒡ, ᑳᑎᐯᒋᑫᒡ, ᑳᐅᑭᔐᒪᓂᑑᒥᔭᕽ ᓴ ᑭᑎᑯᐙ, ᑲᑭᓇ ᑳᑕᔑᔦᒃ ᓈᐱᔥᑲᒧᒃ ᑭᐸᔑᐸᐃᑫᐎᑯᒫᓂᐙᓐ, ᒥᓯᐌ ᑕᔥ ᐸᐹ ᐃᔖᒃ ᐲᓂᔥ ᐌᑎ ᐌᒀᐊᔭᐄ ᑳᔑ ᑲᐯᔑᓈᓂᐗᕽ, ᒋᓂᓭᒀ ᑎᐱᓇᐌ ᑮᒋᑭᐌᔨᐙᒃ, ᐃᑭ ᑲᔦ ᑳᓵᑭᐁᒀ, ᐃᑭ ᑲᔦ ᑳᐅᒋ ᐐᒋᑖᒣᒀ, ᐅᑮ ᐃᓈᐞ᙮ 28 ᐃᑭ ᑕᔥ ᓬᐄᐹᐃᕽ ᐌᑕᑳᓀᓯᐙᒡ ᑮᐃᔑᒋᑫᐗᒃ ᑳᑮ ᐃᑭᑐᓂᒡ ᒨᓯᓲᓐ᙮ ᓂᓯᕽ ᒥᑖᔂᒃ ᑕᔥ ᐅᑮ ᓂᓵᐙᐞ ᐃᓂᓂᐗᐞ ᐃᐃ ᐁᑮᔑᑲᓂᓂᒃ᙮ 29 ᒦᑕᔥ ᒨᓯᔅ ᑳᐃᓈᒡ ᓬᐄᐹᐃᕽ ᐌᑕᑳᓀᓯᓂᒡ, ᓅᑯᒻ ᓴ ᑳᑮᔑᑲᒃ ᒦ ᐃ ᐁᐃᔑᐃᑎᓱᔦᒃ ᐁᐯᑫᓂᒥᑰᔦᒃ ᒋᐊᓄᑮᑕᐌᒃ ᑳᑎᐯᒋᑫᒡ᙮ ᐁᑮ ᓂᓭᒀ ᑕᔥ ᑭᑯᓯᓯᐙᒃ, ᑮᒋᑭᐌᔨᐙᒃ ᑲᔦ ᑳᐅᒋ ᐸᑳᓀᓂᒥᑰᔦᒃ᙮ ᑳᑎᐯᒋᑫᒡ ᓴ ᐃᐃᓇᑫ ᑭᑎᔑ ᔕᐌᓂᒥᑯᐙ᙮ 30 ᐁᐊᓂ ᐙᐸᓂᓂᒃ ᑕᔥ ᒨᓯᔅ ᐅᑮ ᐃᓈᐞ ᐯᒫᑎᓯᓂᒡ, ᑮᓇᐙ ᓴ ᐋᐱᒋ ᑭᑮ ᑭᒋ ᒪᒋᐃᔑᒋᑫᒻ ᐃᐃ ᑳᑮ ᒪᒋᑑᑕᒣᒃ᙮ ᓅᑯᒻ ᑕᔥ ᓂᐐ ᐊᑕ ᐙᐸᒫ ᑳᑎᐯᒋᑫᒡ, ᒫᑭᔖ ᓂᑲ ᐅᑎᓈᓐ ᑫᐅᒋ ᐴᓀᑕᒪᐎᓀᒃ ᐃᐃ ᑳᑮ ᐃᔑ ᒪᒋᑑᑕᒣᒃ᙮ 31 ᒦᑕᔥ ᒨᓯᔅ ᑳᑮ ᑮᐌ ᓈᓯᑲᐙᒡ ᑳᑎᐯᒋᑫᓂᒡ ᐁᑮᐃᓈᒡ, ᐃᓇᔥᑫ ᐅᑯ ᐯᒫᑎᓯᐙᒡ ᐋᐱᒋ ᑮᑭᒋ ᒪᒋᐃᔑᒋᑫᐗᒃ, ᐁᑮ ᐅᔑᑕᒫᓱᐙᒡ ᐋᐯ ᐱᔑᑮ ᒪᓂᑑᑳᓇᓐ ᑳᐅᓵᐎ ᔔᓂᔮ ᐙᐱᑯᐎᓂᒡ᙮ 32 ᑕᑲ ᑕᔥ ᐴᓀᑕᒪᐤ ᐃᐃ ᑳᑮ ᐃᔑ ᒪᒋᐃᔑᒋᑫᐙᒡ, ᑮᔥᐱᓐ ᑕᔥ ᐐᐴᓀᑕᒪᐙᓯᐗᑣ, ᑳᓰᐲᐊᓐ ᓴ ᓃᓐ ᓂᐐᓱᐎᓐ ᐃᐃᒫ ᑳᔑ ᐅᔑᐲᐗᑣ ᑭᐱᒫᑎᓰᒪᒃ, ᐅᑮᐃᓈᓐ᙮ 33 ᒦᔥ ᐅᐅ ᑳᑎᐯᒋᑫᓂᒡ ᑳᐃᑯᒡ, ᐊᐌᓀᓇᒃ ᓴ ᑯ ᑳᑮ ᒪᒋᑑᑕᐎᐙᒡ, ᒦᐗᒃ ᓴ ᐃᑭ ᑫᑭᓰᐊᒪᐗᒀ ᐅᐐᓱᐎᓂᐙᓐ ᐃᐃᒫ ᓂᒪᓯᓇᐃᑲᓂᕽ᙮ 34 ᒦᑕᔥ ᐃᔑ ᒫᒑᓐ, ᒋᐃᔑᐎᓇᑣ ᐯᒫᑎᓯᐙᒡ ᑳᑮ ᐃᔑ ᑲᓅᓂᓈᓐ ᒋᐃᔖᔭᓐ᙮ ᐃᓇᔥᑫ ᑕᔥ ᓂᑌᒐᓬᐃᒻ ᑭᑲ ᓃᑳᓃᑕᒫᑯᐙ᙮ ᐊᐲ ᓴ ᑮᔑᑲᓂᓂᒃ ᑫᓇᓇᐊᒋᑫᐗᒃ, ᒦ ᓴ ᐃ ᐊᐲ ᑫᓇᓇᐊᓴᒀ ᐃᐃ ᑳᑮ ᐃᔑ ᒪᒋᐃᔑᒋᑫᐙᒡ, ᐅᑮᐃᑰᓐ᙮ 35 ᑳᑎᐯᒋᑫᒡ ᑕᔥ ᐅᑮ ᒦᓈᐞ ᐃᓈᐱᓀᐎᓐ ᐯᒫᑎᓯᓂᒡ ᐋᓃᔥ ᐅᑮ ᑲᔥᑭᒫᓂ ᐁᕒᐊᓅᓐ ᒋᐅᔑᐋᓂᒡ ᐋᐯ ᐱᔑᑮᑳᓇᓐ ᑳᐅᓵᐎ ᔔᓂᔮ ᐙᐱᑯᐎᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society