Ekihsatahs 20 - ᐅᒋᐺ ᑭᒋᒪᓯᓇᐃᑲᓐᑭᔐᒪᓂᑑ ᑮᒦᑭᐌᒡ ᒥᑖᓱ ᐅᓇᔓᐌᐎᓇᓐ 1 ᑭᔐᒪᓂᑑ ᑕᔥ ᐅᓄ ᑲᑭᓇ ᑮᐃᑭᑐ ᐃᑭᑐᐎᓇᓐ: 2 ᓃᓐ ᐅᔕ ᑳᑎᐯᒋᑫᒡ ᑭᑭᔐᒪᓂᑑᒻ ᑳᑮ ᓵᑭᒋᐎᓂᓈᓐ ᐌᑎ ᐄᒋᐸᑮᕽ Egypt, ᑳᑮ ᐃᔑ ᑲᒀᑕᑭ ᒥᑦᑲᓄᑮᐃᑯᔭᐸᓐ᙮ 3 ᑫᑯ ᐸᑳᓐ ᒪᓂᑑᒃ ᐊᔮᐙᑫᓐ ᐁᓈᓴᒦᔮᓐ᙮ 4 ᑫᑯ ᐅᔑᑕᒫᓱᑫᓐ ᒪᓂᑑᐎ ᐅᔑᒋᑲᓇᒃ ᒋᐃᔑᓈᑯᓯᐙᒡ ᑫᑰᓐ ᐁᔑᓈᑾᒃ ᑭᒋ ᑮᔑᑯᕽ, ᑯᒫ ᑲᔦ ᐊᑮᕽ, ᑯᒫ ᑲᔦ ᐌᑎ ᑫᑰᓐ ᐁᔮᒃ ᐊᓈᒥᐲᒃ᙮ 5 ᑫᑯ ᑲᔦ ᐅᒋᒌᑾᓇᐲᑕᐙᑫᓐ ᐊᐌᓀᓇᒃ ᐃᑯ ᑎᓄ ᒪᓂᑑᑳᓇᒃ, ᑫᑯ ᑲᔦ ᐊᓇᒥᐁᑕᐙᑫᓐ᙮ ᓃᓐ ᐄᑐᒃ ᑳᑎᐯᒋᑫᒡ ᐌᑭᔐᒪᓂᑑᒥᔭᓐ, ᑳᐐᓐ ᑕᔥ ᐊᐙᒡ ᐃᑯ ᑭᐸᑭᑎᓂᓯᓅᓐ ᐸᑳᓐ ᒪᓂᑑ ᒋᐊᔮᐗᒡ᙮ ᓂᑲ ᓇᓇᐊᓵᒃ ᓴ ᐃᑭ ᑳᔒᑫᓂᒥᐙᒡ, ᐅᐲᐌᓰᒥᐙᐞ ᑲᔦ, ᐲᓂᔥ ᓂᓯᕽ, ᑯᒫ ᑲᔦ ᓃᐎᕽ ᑫᓂ ᐊᔮᓂᑫ ᓂᑖᐎᑭᐃᑎᐙᒡ᙮ 6 ᓂᑲ ᓈᑯᑕᒪᐙᒃ ᐃᑕᔥ ᐐᓐ ᐋᓃᓐ ᐁᔑ ᓵᑭᐊᒀ ᐲᓂᔥ ᒥᑖᔂᒃ ᑫᓂ ᓂᑖᐎᑭᐃᑎᐙᒡ ᐃᑭ ᑳᓵᑭᐃᐙᒡ, ᑳᓇᐃᑕᐎᐙᒡ᙮ 7 ᑫᑯ ᑕᔥ ᑲᔦ ᐊᓅᒋᑯ ᐃᓈᐸᒋᑑᐙᑫᓐ ᑳᑎᐯᒋᑫᒡ ᐅᐐᓱᐎᓐ ᑭᑭᔐᒪᓂᑑᒻ, ᑳᐐᓐ ᐅᔕ ᑳᑎᐯᒋᑫᒡ ᐅᑲ ᐋᓶ ᓇᓇᐊᓵᓰᓐ ᐃᓂᐌᓂᐗᓐ ᐊᓅᒋᑯ ᑳᐃᓈᐸᒋᑑᓂᒡ ᐅᐐᓱᐎᓐ᙮ 8 ᒫᒥᑲᐎᓄᑕᓐ ᑲᔦ ᑳᐊᓉᐲᐎ ᑮᔑᑲᒃ, ᑭᔐᒪᓂᑑ ᓴ ᐃᐃᐌᓂ ᐅᑮᔑᑲᓄᒻ᙮ 9 ᓂᑯᑣᓱᑮᔑᒃ ᓴ ᑭᐸᑭᑎᓂᑰ ᒋᑑᑕᒪᓐ ᑲᑭᓇ ᑭᑕᓄᑮᐎᓇᓐ᙮ 10 ᐃᐃ ᑕᔥ ᐐᓐ ᑳᓃᔣᓱᑮᔑᑲᒃ ᒦ ᓴ ᐃ ᐁᐊᓉᐲᐎ ᑮᔑᑲᒃ ᑭᔐᒪᓂᑑ ᐐᓐ ᐃᑯ ᑳᑎᐯᑕᕽ᙮ ᑳᐐᓐ ᓴ ᐊᐎᔭ ᑕᐊᓄᑮᓰ ᐃᐃ ᐊᐲ᙮ ᑳᐐᓐ ᑭᑲ ᐊᓄᑮᓰᒻ, ᑭᑯᓯᓴᒃ, ᑭᑖᓂᓴᒃ, ᑭᑕᓄᑮᐋᑲᓇᒃ ᑳᐃᑴᐎᐙᒡ, ᑳᐃᓂᓃᐎᐙᒡ ᑲᔦ᙮ ᑳᐐᓐ ᑲᔦ ᑭᑕᐗᑳᓇᒃ, ᐃᑭ ᑲᔦ ᑳᒪᔭᑭᓯᐙᒡ ᑳᐐᒋ ᐊᔮᒥᒀ᙮ 11 ᒦᑕᔥ ᓃᓐ ᑳᑎᐯᒋᑫᔮᓐ ᓂᑯᑣᓱᑮᔑᒃ ᓂᑮ ᐊᓄᑮ ᐁᑮ ᐅᔑᑑᔮᓐ ᑮᔑᒃ, ᐊᑭ, ᑲᑭᓇ ᑲᔦ ᑫᑰᓐ ᐃᐃᒫ ᐁᔮᑭᓐ᙮ ᓃᔣᓱᑮᔑᒃ ᐃᑕᔥ ᐁᐃᔑᓭᒃ ᒦ ᐃ ᑳᑮ ᐊᓉᐱᔮᓐ᙮ ᒦᑕᔥ ᑳᑮ ᐅᒋ ᑭᑌᑖᑯᑑᔮᓐ, ᐁᑮ ᐃᓇᑭᑕᒫᓐ ᓃᓐ ᐃᑯ ᐁᐐ ᑎᐱᓇᐌᐎᓯᔮᓐ᙮ 12 ᑭᑌᓂᒻ ᑭᑌᑌ, ᑭᒫᒫ ᑲᔦ, ᑭᓉᔥ ᒋᐱᒫᑎᓯᔭᓐ ᐃᐃᒫ ᐊᑮᕽ ᑳᑎᐯᒋᑫᒡ ᑭᑭᔐᒪᓂᑑᒻ ᑳᐐ ᒦᓂᒃ᙮ 13 ᑫᑯ ᑲᔦ ᓂᔑᐌᑫᓐ᙮ 14 ᑫᑯ ᑲᔦ ᐸᐹᒣᓂᒥᒫᑫᓐ ᐊᐎᔭ ᐅᐐᑎᑫᒫᑲᓇᓐ ᐱᔑᒀᒐᔭᐃᕽ ᐃᓇᑫ᙮ 15 ᑫᑯ ᑲᔦ ᑮᒨᑎᑫᓐ᙮ 16 ᑫᑯ ᑲᔦ ᐊᓅᒋᑯ ᐃᔑ ᐊᓂᔕ ᐊᓈᒥᒫᑫᓐ ᑮᒋᐱᒫᑎᔅ ᑫᐅᒋ ᒫᔑᓭᒡ᙮ 17 ᑫᑯ ᑲᔦ ᒥᓴᐌᑕᒪᐙᑫᓐ ᑮᒋᐱᒫᑎᔅ ᐅᐙᑳᐃᑲᓐ᙮ ᑫᑯ ᑲᔦ ᒥᓴᐌᓂᒥᒫᑫᓐ ᑮᒋᐱᒫᑎᔅ ᐐᐗᓐ, ᑯᒫ ᑲᔦ ᐅᑕᓄᑮᐋᑲᓇᓐ ᑳᐃᑴᐎᓂᒡ, ᑯᒫ ᑲᔦ ᑳᐃᓂᓃᐎᓂᒡ᙮ ᑫᑯ ᑲᔦ ᒥᓴᐌᑕᒪᐙᑫᓐ ᐅᐱᔑᑮᒪᓐ, ᐅᒫᔑᒥᑕᑎᒨᒪᓐ, ᑫᑰᓂᓂ ᑲᔦ ᑮᒋᐱᒫᑎᔅ ᑳᐊᔮᒡ᙮ ᐯᒫᑎᓯᐙᒡ ᑮᑯᑖᓀᓂᒫᐙᒡ ᑭᔐᒪᓂᑑᓐ 18 ᑲᑭᓇ ᑕᔥ ᐯᒫᑎᓯᐙᒡ ᐅᑮ ᐙᐸᑖᓈᐙ ᐁᑭᒋ ᐱᓀᓰᐗᓂᓂᒃ, ᐁᑲᑭᒋ ᐃᓈᑌᓭᓂᒃ ᑲᔦ᙮ ᐅᑮ ᓅᑖᓈᐙ ᑲᔦ ᑭᒋ ᐴᑖᒋᑲᓐ ᐁᓅᑖᑾᓂᓂᒃ, ᐅᑮ ᐙᐸᑖᓈᐙ ᑲᔦ ᑭᒋ ᐗᒌᓂ ᐁᐊᒀᐸᑌᓂᒃ᙮ ᐯᒫᑎᓯᐙᒡ ᑕᔥ ᑮᓂᓂᑳᓂᒥᓯᐗᒃ, ᐙᓴ ᑲᔦ ᑮᐃᔑ ᓃᐸᐎᐗᒃ᙮ 19 ᒦᑕᔥ ᑳᐃᓈᐙᒡ ᒨᓯᓲᓐ Moses, ᑕᑲ ᑮᓐ ᑲᓅᔑᔑᓈᒻ, ᑭᑲ ᐱᓯᑖᑰ ᑕᔥ, ᑫᑯ ᑕᔥ ᐐᓐ ᐸᑭᑎᓈᑫᓐ ᑭᔐᒪᓂᑑ ᒋᑲᓅᔑᔭᒥᓐᒡ, ᒋᓂᐳᓯᐙᕽ, ᐅᑮᐃᑰᐞ᙮ 20 ᒦᔥ ᐅᐅ ᒨᓯᔅ ᑳᐃᔑ ᓇᑴᑕᐙᒡ, ᑫᑯ ᓭᑭᓯᑫᒃ, ᑭᔐᒪᓂᑑ ᐅᔕ ᑭᓇᑕ ᑭᑫᓂᒥᑯᐙ, ᐐᑳ ᒋᐴᓂ ᑯᑖᓀᓂᒫᓯᐌᒃ, ᐐᑳ ᒋᒪᒋᑑᑕᓯᐌᒃ, ᐅᑮ ᐃᓈᐞ᙮ 21 ᐙᓴ ᑕᔥ ᐯᒫᑎᓯᓂᒡ ᑮᐃᔑ ᓃᐸᐎᐗᐞ, ᒣᒀ ᒨᓯᔅ ᐯᔓ ᐁᓈᓯᑲᕽ ᐗᑸᓂ ᑳᑮ ᑲᔥᑮᑎᐱᑭ ᑭᐸᑳᓇᑾᓂᓂᒃ ᐁᔑᐊᔮᓂᒡ ᑭᔐᒪᓂᑑᓐ᙮ ᐅᓇᔓᐌᐎᓐ ᑳᑮᒦᑭᐌᒡ ᑫᐃᔑᒋᑳᑌᒃ ᐅᓈᐱᑭᓂᑲᓐ 22 ᒦᑕᔥ ᒨᓯᔅ ᑳᐃᑯᒡ ᑳᑎᐯᒋᑫᓂᒡ, ᒦ ᓴ ᐅᐌ ᑫᐃᓇᑣ ᐃᔅᕒᐃᔭᓬᐊᒃ, ᑮᓇᐙ ᓴ ᑯ ᑭᑮ ᐙᐸᑖᒻ ᐋᓃᓐ ᐃᓇᑫ ᑳᑮ ᐅᒋ ᑲᓅᓂᓇᑰᒃ ᑭᒋ ᑮᔑᑯᕽ᙮ 23 ᑫᑯ ᐐᓐ ᐅᓵᐎ ᔔᓂᔮ ᐙᐱᑯᕽ, ᐙᐹᐱᑯ ᔔᓂᔮ ᐙᐱᑯᕽ ᑲᔦ ᐅᒋ ᐅᔑᑕᒫᓱᑫᒃ ᒪᓂᑑᑳᓇᒃ ᑫᐊᓇᒥᐁᑕᐌᒀ, ᐯᑭᔥ ᐃᑕᔥ ᓃᓐ ᒋᐊᓇᒥᐁᑕᐎᔦᒃ᙮ 24 ᒥᑕᑲᒥᒃ ᓴ ᐅᒋ ᐅᔑᑕᒪᐎᔑᒃ ᑳᔑ ᐸᑭᑎᓈᓱᕽ᙮ ᒦᑕᔥ ᐃᐃᒫ ᑫᔑ ᐸᑭᑎᓈᔂᑕᒣᒃ ᑳᐊᒀᑭᑌᑭᓐ ᑎᓄ ᐸᑭᑎᓈᓱᐎᓇᓐ, ᐃᓂ ᑲᔦ ᒥᓄ ᐐᒌᑎᐎ ᐸᑭᑎᓈᓱᐎᓇᓐ᙮ ᒦ ᓴ ᐃᐌ ᑫᔑ ᐸᑭᑎᓀᒀ ᒫᓇᒑᓂᔕᒃ, ᒫᓇᑎᑾᒃ, ᐱᔑᑭᐗᒃ ᑲᔦ᙮ ᐊᐲ ᑕᔥ ᑫᐃᔑᒋᑫᔮᓐ ᒋᑭᑌᒋᑳᑌᒃ ᓂᐐᓱᐎᓐ, ᑭᑲ ᐱᐊᑕ ᐙᐸᒥᓂᓂᒻ ᒋᔕᐌᓂᒥᓇᑰᒃ ᑲᔦ᙮ 25 ᑮᔥᐱᓐ ᐃᑕᔥ ᐊᓯᓃᕽ ᐅᒋ ᐅᔑᑑᔦᒃ ᑳᔑ ᐸᑭᑎᓈᓱᕽ, ᑫᑯ ᐐᓐ ᐋᐸᒋᐋᑫᑾᓂᒃ ᐊᓯᓃᒃ ᑳᑮᔥᑳᐱᑲᐅᑣ, ᐋᓃᔥ ᑭᑲ ᐐᓂᑑᒻ ᑮᔥᐱᓐ ᐋᐸᒋᒋᑲᓇᓐ ᐋᐸᒋᑑᔦᒃ᙮ 26 ᑫᑯ ᑕᔥ ᐐᓐ ᐃᔑᑑᑫᒃ ᒋᑕᑕᑯᑮᐎᓂᑲᑌᒃ᙮ ᒫᑭᔖ ᓴ ᐃᓈᑕᐌᔦᒃ ᑭᑲ ᐗᓈᒌᒻ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society