Ekihsatahs 2 - ᐅᒋᐺ ᑭᒋᒪᓯᓇᐃᑲᓐᒨᓯᔅ ᐅᓂᑖᐎᑭᐎᓐ ᐁᑕᔑᑌᓂᒃ 1 ᐃᐃ ᑕᔥ ᐊᐲ ᑮᐊᔮ ᐃᓂᓂ ᓬᐄᐹᐃᕽ Levi ᐁᑮ ᐅᑕᑳᓀᓯᒡ, ᐁᑮ ᐐᐎᒡ ᐃᑴᐗᓐ ᑳᑮ ᐐᒋ ᐅᑕᑳᓀᓰᒫᒡ᙮ 2 ᒦᑕᔥ ᐊᐊ ᐃᑴ ᑳᑮ ᐊᓂ ᑭᑭᔥᑲᐙᐗᓱᒡ ᐁᑮ ᐊᔮᐙᒡ ᑸᐎᓭᓴᓐ᙮ ᐁᑮ ᐙᐸᒫᒡ ᐃᑕᔥ ᐁᒥᓄᓈᑯᓯᓂᒡ, ᐅᑮ ᑳᓈᓐ ᓂᓱᑮᓯᔅ 3 ᒥᓂᒃ᙮ 3 ᐊᐲ ᑕᔥ ᑳᑲᔥᑭᑑᓯᒃ ᐊᐗᔑᒣ ᒋᑳᓈᒡ ᐃᓂ ᐊᐱᓅᒌᔕᓐ, ᒦ ᓴ ᒪᔥᑯᓰ ᒪᑲᑯᕽ ᑳᐃᔑ ᐲᓇᐙᒡ᙮ ᐅᑮ ᐃᔑᑑᓐ ᐃᐃ ᒪᑲᑯᓂ ᒋᐅᓯᑳᓯᓂᓂᒃ, ᐱᑭᐗᓐ ᐁᑮ ᐋᐸᒋᐋᒡ᙮ ᒦᑕᔥ ᑳᐃᔑ ᐸᑯᐲᐊᕽ ᒌᑫᐤ ᑳᑮ ᐃᔑ ᒪᔥᑯᓰᑳᓂᒃ ᐃᐃᒫ ᓈᔭᓬ Nile ᓰᐱᕽ᙮ 4 ᐅᑕᐌᒫᓐ ᐃᑕᔥ ᐊᐊ ᑸᐎᓭᔅ ᐙᓴ ᑮᐅᓵᐱᐗᓐ ᐁᐐ ᐙᐸᒥᑯᒡ ᐋᓃᓐ ᑫᐃᔑᓭᒡ᙮ 5 ᑭᒋᐅᑭᒫ ᑕᔥ ᐅᑖᓂᓴᓐ ᑮᓈᓯᐲᐗᓐ ᐃᐃᒫ ᓰᐱᕽ ᐁᐐ ᑭᓰᓯᐸᓱᓂᒡ᙮ ᒣᒀ ᑕᔥ ᐊᐊ ᐅᑖᓂᓯᒫ ᐁᐱᒫᔕᑳᒣᒡ ᑳᐐᒌᐎᑯᒡ ᐅᔥᑭᓃᑭᑴᐗᐞ ᑳᑮ ᐸᒦᑖᑯᒡ, ᐅᑮ ᐅᒋ ᐙᐸᑖᓐ ᒪᔥᑯᓰ ᒪᑲᑯᓂ ᐁᐊᑾᑌᓂᒃ ᐁᔑ ᒪᔥᑯᓰᑳᓂᒃ᙮ ᒦᔥ ᑳᑮ ᐊᓅᓈᒡ ᐯᔑᒃ ᑳᐸᒦᑖᑯᒡ ᒋᓈᓯᑲᒥᓂᒡ᙮ 6 ᐊᐲ ᑕᔥ ᐁᐹᑭᓇᕽ ᐃᐃ ᒪᑲᒃ, ᐊᐱᓅᒌᔕᓐ ᐅᑮ ᐙᐸᒫᓐ ᐁᒪᐎᓂᒡ᙮ ᒦᔥ ᑳᐃᔑ ᑰᐹᑌᓂᒫᒡ ᐁᑮ ᐃᑭᑐᒡ, ᒦ ᓴ ᐗᐊ ᐯᔑᒃ ᐄᐸᕒᐆᐎ ᐊᐱᓅᒌᔥ, ᑮᐃᑭᑐ᙮ 7 ᐊᐊ ᑕᔥ ᑸᐎᓭᔅ ᑳᑮ ᐅᑕᐌᒫᒡ ᐅᑮᐃᓈᓂ ᑭᒋᐅᑭᒫᓐ ᐅᑖᓂᓯᓂ, ᓂᑖ ᐃᔖ ᓇ ᒋᐊᐎ ᑲᓅᓇᒃ ᐄᐸᕒᐆᐎᑴ ᑫᓅᓂᐋᑕᒪᐎᒃ ᐃᓂ ᐊᐱᓅᒌᔕᓐ, ᐅᑮᐃᓈᓐ᙮ 8 ᒦᔥ ᑭᒋᐅᑭᒫᑴᔅ ᑳᐃᓈᒡ ᐃᓂ ᐃᑴᓭᓴᓐ, ᐊᐤ, ᒫᒑᓐ᙮ ᐊᐊ ᑕᔥ ᐃᑴᓭᔅ ᐅᑮ ᐊᐎ ᑲᓅᓈᓐ ᐅᒫᒫᓂ ᐃᓂ ᐊᐱᓅᒌᔕᓐ᙮ 9 ᑭᒋᐅᑭᒫᑴᔅ ᓴ ᐅᑮᐃᓈᓐ ᐃᓂ ᐃᑴᐗᓐ ᑳᑮ ᐊᑐᒥᒥᓐᒡ, ᒫᒌᔥ ᐊᐊ ᐊᐱᓅᒌᔥ ᒋᓅᓂᐋᑕᒪᐎᔭᓐ, ᑭᑲ ᑎᐸᐊᒪᐎᓐ ᐃᑕᔥ ᑲᔦ, ᐅᑮᐃᓈᓐ᙮ ᒦᑕᔥ ᐃᓂ ᐃᑴᐗᓐ ᑳᐃᔑ ᐅᑖᐱᓈᓂᒡ ᐃᓂ ᐊᐱᓅᒌᔕᓐ ᐁᑮ ᓅᓂᐋᑕᒫᑯᒡ᙮ 10 ᐊᐲ ᑕᔥ ᑳᑌᐊᐲᑖᑎᓯᓂᒡ ᐃᓂ ᐊᐱᓅᒌᔕᓐ, ᐊᐊ ᓴ ᐃᑴ ᐅᑮ ᐃᔑᐎᓈᓐ ᑳᑮ ᐃᔑᐊᔮᓂᒡ ᑭᒋᐅᑭᒫ ᐅᑖᓂᓴᓐ᙮ ᒦᑕᔥ ᐊᐊ ᐅᑖᓂᓯᒫ ᑳᐃᔑ ᐃᓇᑭᒫᒡ ᐃᓂ ᑸᐎᓭᓴᓐ ᐐᓐ ᐃᑯ ᐁᑮ ᐅᑯᓯᓯᒡ᙮ ᒦᑕᔥ ᑳᐃᑭᑐᒡ, ᓂᐲᕽ ᐃᑕᔥ ᐁᑮ ᐅᒋ ᐊᒀᓯᐱᓇᒃ, ᒨᓯᔅ ᓴ ᓂᑲ ᐃᔑᓂᑳᓈ, ᑮᐃᑭᑐ᙮ ᒨᓯᔅ ᑮᐊᐸᐃᐌᒡ ᒥᑎᔭᓐ Midian ᐊᑮᕽ 11 ᐊᐲ ᓴ ᒨᓯᔅ Moses ᑮᑮᔖᐯᐎᒡ, ᑮᐃᔖ ᐁᑮ ᐊᑕ ᐙᐸᒫᒡ ᐅᐐᒋ ᐅᑖᑎᓰᒫᑲᓇᐞ ᐃᔅᕒᐃᔭᓬᐊᐞ Israel᙮ ᒦᔥ ᑳᑮ ᐙᐸᑕᕽ ᐋᓃᓐ ᑳᐊᐲᒋ ᑲᒀᑕᑭᐃᒥᓐᒡ᙮ ᐅᑮ ᐙᐸᒫᓐ ᐃᑕᔥ ᐄᒋᐲᐎᓂᓂᐗᓐ Egyptian ᐁᐸᐸᑭᑌᐙᓂᒡ ᐯᔑᒃ ᐄᐸᕒᐆᐎᓂᓂᐗᓐ Hebrew ᑳᑮ ᐐᒋ ᐅᑖᑎᓰᒫᒡ᙮ 12 ᒥᓯᐌ ᓴ ᑕᔥ ᑮᐊᔨᓈᐱ, ᐁᑭᑫᑕᕽ ᐃᑕᔥ ᐊᐎᔭᓐ ᐃᐃᒫ ᐁᐊᔮᓯᓂᒃ, ᒦ ᓴ ᑳᐃᔑ ᓂᓵᒡ ᐃᓂ ᐄᒋᐲᐎᓂᓂᐗᓐ᙮ ᒦᔥ ᑳᐃᔑ ᓂᒀᐗᑲᐙᒡ ᐁᑮ ᑳᓈᒡ᙮ 13 ᒦᓇᐙ ᑕᔥ ᐁᐊᓂ ᐙᐸᓂᓂᒃ ᑮᐃᔖ ᐌᑎ᙮ ᐅᑮ ᐙᐸᒫᐞ ᓃᔑᓐ ᐄᐸᕒᐆᐎᓂᓂᐗᐞ Hebrews ᐁᒦᑳᑎᓂᒡ᙮ ᒦᑕᔥ ᑳᑮᐃᓈᒡ ᐃᓂ ᒪᔮ ᑳᒪᒫᔒᓂᒡ, ᐌᑯᓀᓐ ᐌᒋ ᒦᑳᓇᒡ ᐊᐊ ᑭᐐᒋ ᐅᑖᑎᓰᒫᑲᓐ? ᐅᑮᐃᓈᓐ᙮ 14 ᒦᔥ ᐅᐅ ᑳᐃᔑ ᓇᑴᑖᑯᒡ, ᐊᐌᓀᓐ ᑳᐃᓇᑭᒥᒃ ᒋᑎᐯᓂᒥᔮᕽ, ᒋᐅᓈᑯᓂᔮᕽ ᑲᔦ? ᑭᐐ ᓂᔑᔥ ᐃᓇ ᑖᐱᔥᑰ ᑳᑮ ᐃᔑ ᓂᓴᒡ ᐊᐊ ᐄᒋᐲᐎᓂᓂ, ᐅᑮᐃᑰᓐ᙮ ᒦᑕᔥ ᒨᓯᔅ ᑳᐃᔑ ᓭᑭᓯᒡ ᐁᑮ ᐃᑭᑐᒡ, ᑌᐺ ᐄᓴᓐ ᑭᑫᒋᑳᑌ ᐋᓃᓐ ᑳᐃᔑᒋᑫᔮᓐ᙮ 15 ᐊᐲ ᑕᔥ ᑭᒋᐅᑭᒫ ᐯᕒᐆ Pharaoh ᑳᓅᑕᕽ ᐋᓃᓐ ᑳᐃᓇᑲᒥᑲᓂᓂᒃ, ᒦᑕᔥ ᐁᑮ ᓇᓈᑐᓀᐊᕽ ᐋᑎ ᑫᐅᒋ ᓂᓯᒥᓐᒡ᙮ ᒦᑕᔥ ᒨᓯᔅ ᑳᑮ ᐅᒋ ᒫᒌᐸᐃᐌᒡ ᐁᔑᐊᔮᓂᒡ ᑭᒋᐅᑭᒫᓐ᙮ ᐌᑎ ᑕᔥ ᒥᑎᔭᓐ Midian ᐊᑮᕽ ᑮᐃᔑ ᐊᑕ ᑲᐯᔑ᙮ ᒦᑕᔥ ᐃᐃᒫ ᐅᑕᐃᐹᓂᕽ ᑳᑮ ᐃᔑ ᐅᓇᐱᒡ᙮ 16 ᑮᐊᔮ ᑕᔥ ᐊᓇᒥᐁᐎᑭᒫ ᐃᐃᒫ ᒥᑎᔭᓐ ᐊᑮᕽ, ᐁᑮ ᓃᔣᒋᓂᒡ 7 ᐅᑖᓂᓴᐞ᙮ ᒨᓯᔅ ᐃᑕᔥ ᐃᐃᒫ ᐁᓇᒪᑕᐱᒡ, ᑮᐱ ᑕᑯᔑᓅᐞ ᐃᐃ ᐅᑖᓂᓯᒫᐞ ᐁᑮ ᐱ ᒨᔥᑭᓀᐸᑑᓂᒡ ᐊᑑᐹᓇᓐ ᑳᐅᒋ ᒥᓂᑴᓂᒡ ᐅᑌᑌᓂ ᐅᒫᓇᒑᓂᔑᒥᓂ, ᐅᒫᓇᑎᑯᒥᓂ ᑲᔦ᙮ 17 ᑮᐱ ᑕᑯᔑᓅᒃ ᑕᔥ ᑯᑕᒃ ᐅᑲᓇᐎ ᒫᓇᒑᓂᔑᐌᒃ ᐃᑯᒋ ᐁᑮ ᐃᓈᒶᐙᓂᒡ ᐃᐃ ᐃᑴᐗᐞ᙮ ᒦᔥ ᒨᓯᔅ ᑳᑮ ᓈᑕᒪᐙᒡ ᐃᐃ ᐃᑴᐗᐞ, ᐅᑮ ᐐᒋᐋᐞ ᑲᔦ ᐁᒥᓇᐋᓂᒡ ᐅᑌᑌᓂ ᐅᒫᓇᒑᓂᔑᒥᓂ, ᐅᒫᓇᑎᑯᒥᓂ ᑲᔦ᙮ 18 ᐊᐲ ᑕᔥ ᐃᑭ ᐃᑴᐗᒃ ᐁᑮ ᑕᑯᔑᓄᐙᒡ ᐅᑌᑌᐙᓐ ᒉᑕᕒᐆᓐ Jethro ᐁᔑᐊᔮᓂᒡ ᐅᐅ ᐅᑮᐃᑯᐙᓐ, ᐌᑯᓀᓐ ᑕᔥ ᓅᑯᒻ ᑳᑮᔑᑲᒃ ᐌᒋ ᑭᑖᑕᐲᔦᒃ? ᐅᑮᐃᑯᐙᓐ᙮ 19 ᒦᔥ ᐅᐅ ᑳᐃᔑ ᓇᑴᑕᐙᐙᒡ, ᐄᒋᐲᐎᓂᓂ ᓴ ᓂᑮ ᓈᑕᒫᑯᓈᓐ ᐅᑲᓇᐎ ᒫᓇᒑᓂᔑᐌᒃ ᐃᑯᒋ ᐁᑮ ᑲᑴ ᐃᓈᒧᐅᓇᑭᑣ᙮ ᐐᓐ ᑕᔥ ᐃᑯ ᑲᔦ ᓂᑮ ᒀᐸᐃᐲᑕᒫᑯᓈᓐ ᐁᑮ ᒥᓇᐋᒡ ᒫᓇᒑᓂᔕᐞ᙮ 20 ᒦᑕᔥ ᐅᐅ ᑳᐃᓈᒡ ᐅᑖᓂᓴᐞ, ᐋᓃᑎ ᑕᔥ ᐁᔮᒡ? ᐌᑯᓀᓐ ᑕᔥ ᐌᑎ ᑳᐅᒋ ᓇᑲᓀᒃ? ᐊᑐᒥᒃ ᒋᐐᒋ ᐐᓯᓃᒥᓇᕽ, ᐅᑮ ᐃᓈᐞ᙮ 21 ᒨᓯᔅ ᓴ ᑮᐃᓀᑕᒻ ᐃᐃᒫ ᒋᐃᔑ ᑲᐯᔑᒡ᙮ ᒦᔥ ᒉᑕᕒᐆᓐ ᑳᑮ ᒦᓂᑯᒡ ᐅᑖᓂᓯᓂ ᓯᐴᕒᐊᐗᓐ Zipporah ᒋᐐᐎᒡ᙮ 22 ᒦᐗᓐ ᐃᑕᔥ ᐃᓂ ᐃᑴᐗᓐ ᑳᑮ ᐊᔮᐙᓂᒡ ᑸᐎᓭᓴᓐ᙮ ᒨᓯᔅ ᓴ ᑕᔥ ᑫᕒᔕᒻ Gershom ᐅᑮ ᐃᔑᓂᑳᓈᓐ ᐃᓂ ᐅᑯᓯᓴᓐ᙮ ᒦᔥ ᐅᐅ ᑳᐃᑭᑐᒡ, ᐋᓃᔥ ᐁᐲᐎᑌᐎᔮᓐ ᐅᐅᒫ ᐊᑮᕽ ᐃᐃ ᑳᐅᒋ ᐃᔑᓂᑳᓇᒃ, ᑮᐃᑭᑐ᙮ 23 ᓈᓈᑫ ᑕᔥ ᐁᑮ ᐊᓂ ᐃᔑᓭᓂᒃ ᑭᒋᐅᑭᒫ ᐄᒋᐸᑮᕽ Egypt ᑮᓂᐳ᙮ ᒦᑕᔥ ᐃᔅᕒᐃᔭᓬᐊᒃ Israel ᑳᑮ ᒨᑯᓀᐙᒡ ᐅᓵᒻ ᐁᑮ ᑲᒀᑕᑭ ᒥᑕᓄᑮᐃᑣ ᐁᑮ ᐸᒦᑖᑫᐙᒡ᙮ ᐅᑮ ᔖᑯᐙᓈᐙᓐ, ᐁᑮ ᒪᐎᐙᒡ ᑭᔐᒪᓂᑑᓐ ᒋᓈᑕᒫᑯᐙᒡ᙮ ᐅᓵᒻ ᐄᑐᒃ ᑮᑕᑯᓂᑳᓱᐗᒃ᙮ 24 ᒦᑕᔥ ᑭᔐᒪᓂᑑᓐ ᑳᑮ ᓅᑖᑯᐙᒡ ᐁᔑ ᒨᑯᓀᐙᒡ, ᐁᑮ ᒫᒥᑲᐎᓂᒡ ᑲᔦ ᑳᑮ ᐃᔑ ᐊᔓᑕᒪᐙᓂᑯᐸᓀᓐ ᐁᐸᕒᐊᐋᒪᓐ Abraham, ᐋᐃᓯᑰᓐ Isaac, ᐃᓂ ᑲᔦ ᒉᑲᐴᓐ Jacob᙮ 25 ᑭᔐᒪᓂᑑ ᐅᑮ ᐙᐸᒫᐞ ᐃᔅᕒᐃᔭᓬᐊᐞ ᐋᓃᓐ ᐁᔑ ᑲᒀᑕᑭᑑᓂᒡ, ᒦᔥ ᑳᑮ ᑰᐹᑌᓂᒫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society