Ehstar 9 - ᐅᒋᐺ ᑭᒋᒪᓯᓇᐃᑲᓐᒎᐗᒃ ᑮᒑᑭᐋᐙᒡ ᑳᔒᑫᓂᒥᑯᐙᒡ 1 ᒥᑖᔑᓂᓯᓐ 13 ᐁᐃᓇᑭᓱᓂᒡ ᐁᑕᕒ Adar ᒥᑖᔑᓃᔓᑮᓯᓲᓐ 12 ᒦ ᓴ ᐃ ᐊᐲ ᒋᑮ ᑑᒋᑳᑌᓂᑭᐸᓐ ᑭᒋᐅᑭᒫ ᐅᑑᓇᔓᐌᐎᓐ᙮ ᒦ ᐃᐌ ᐁᑮᔑᑲᓂᓂᒃ ᒎᐗᒃ ᑳᑮ ᔒᑫᓂᒥᑯᐙᒡ ᑳᑮ ᒥᓴᐌᑕᒥᓂᒡ ᒋᔖᑰᒋᐃᑯᐙᒡ, ᑌᑾᒡ ᐃᑕᔥ ᒎᐗᒃ ᐅᑮ ᔖᑰᒋᐋᐙᐞ᙮ 2 ᒎᐗᒃ ᐃᑕᔥ ᑮᐊᔪᑸᓄᐗᒃ ᐁᔑ ᐊᔭᔮᐙᒡ ᑭᒋ ᐆᑌᓈᑳᕽ ᐊᑮᕽ ᑳᑮ ᐃᔑ ᑭᒋᐅᑭᒫᐎᓂᒡ ᓭᕒᐊᒃᓰᓴᓐ Xerxes ᒋᒦᑳᓈᐙᒡ ᐃᐃ ᑳᐐ ᓂᓯᑯᐙᒡ᙮ ᑳᐐᓐ ᑲᓇᑫ ᐊᐎᔭᐞ ᐅᑮ ᔖᑰᒋᐃᑯᓰᐙᐞ, ᐋᓃᔥ ᐃᐃ ᑯᑕᒃ ᐯᑳᓉᐙᓇᑭᓯᓂᒡ ᐯᒫᑎᓯᓂᒡ ᐅᑮ ᑯᓯᑯᐙᐞ᙮ 3 ᑲᑭᓇ ᐄᑐᒃ ᑳᓃᑳᓂᔥᑲᒥᓂᒡ ᐊᑮᓐ, ᐃᐃ ᐌᑭᒫᐌᑖᑯᓯᓂᒡ ᑌᐯᑕᒥᓂᒡ ᐊᑮᓐ, ᐃᐃ ᑲᔦ ᑭᒋᐅᑭᒫᓐ ᑳᑮ ᐐᒋᐋᓂᒡ ᐅᑮ ᐐᒋᐃᑯᐙᐞ ᒎᐗᒃ ᐋᓃᔥ ᐅᑮ ᑯᑖᓀᓂᒫᐙᓐ ᒸᕒᑎᑳᐃᔭᓐ Mordecai᙮ 4 ᒥᓯᐌ ᑕᔥ ᑮᑭᑫᑖᑾᓂᓂ ᐯᐸᑳᓐ ᐊᑮᕽ ᒸᕒᑎᑳᐃ ᐁᒪᔥᑲᐌᑖᑯᓯᒡ᙮ ᐃᐃᒫ ᑲᔦ ᑭᒋᐅᑭᒫᐎᑲᒥᑯᕽ ᐋᒋᑫ ᑮᐊᓂ ᒪᔥᑲᐌᑖᑯᓯ᙮ 5 ᒎᐗᒃ ᐃᑕᔥ ᐙᑑᑕᐙᐙᒡ ᐃᑯ ᐃᐃ ᑳᔒᑫᓂᒥᑯᐙᒡ ᐅᑮ ᑑᑕᐙᐙᐞ᙮ ᑭᒋ ᒨᑯᒫᓇᓐ ᐅᑮ ᐋᐸᒋᑑᓈᐙᓐ ᐁᑮ ᓂᓵᐙᒡ ᑳᔒᑫᓂᒥᑯᐙᒡ ᐁᑮ ᓂᔑᐗᓈᒋᐋᐙᒡ᙮ 6 ᐃᐃᒫ ᓴ ᐐᓐ ᒫᐗᒡ ᑭᒋ ᐆᑌᓈᕽ ᓲᓴ Susa, ᒎᐗᒃ ᐅᑮ ᓂᓵᐙᐞ ᓈᓍᒃ 500 ᐃᓂᓂᐗᐞ᙮ 7 ᒦᐗᐞ ᐃᑕᔥ ᐅᐅ ᑲᔦ ᐁᒪᓐ Haman ᐅᑯᓯᓴᐞ ᑳᑕᑯ ᓂᓵᐙᒡ: ᐹᕒᔕᑌᑕ Parshandatha, ᑖᓬᐸᓐ Dalphon, ᐋᔅᐯᑕ Aspatha, 8 ᐳᕒᐁᑕ Poratha, ᐋᑌᓬᐃᔭ Adalia, ᐋᕒᐃᑌᑕ Aridatha, 9 ᐹᕒᒪᔥᑕ Parmasta, ᐊᕒᐃᓭᔩ Arisai, ᐊᕒᐃᑌᔩ Aridai, ᑲᔦ ᐹᔩᓵᑕ Vaizatha ᐁᑮ ᐊᔨᔑᓂᑳᓱᓂᒡ᙮ 10 ᒦᐗᐞ ᐃᓴ ᐅ ᐁᒪᓐ Haman ᐅᑯᓯᓴᐞ ᑳᑮ ᐅᑌᑌᒡ ᐊᒥᑌᑕᐗᓐ Hammedatha ᑳᑮ ᔒᑫᓂᒫᒡ ᒎᐗᐞ᙮ ᒎᐗᒃ ᐃᑕᔥ ᑳᐐᓐ ᐅᑮ ᐸᐹᒣᑕᓰᓈᐙᓐ ᐅᑕᔭᐄᒥᓂ᙮ 11 ᐃᐃ ᑕᔥ ᐁᑮᔑᑲᒃ ᐃᐃᒫ ᒫᐗᒋ ᑭᒋ ᐆᑌᓈᕽ ᓲᓴ, ᑮᐐᑕᒪᐙ ᑭᒋᐅᑭᒫ ᐋᓃᓐ ᒥᓂᒃ ᑳᓂᓯᒥᓐᒡ᙮ 12 ᒦᔥ ᑭᒋᐅᑭᒫ ᑳᑮᐃᓈᒡ ᑭᒋᐅᑭᒫᑴᓐ ᐁᔅᑕᕒᐊᓐ Esther, ᒎᐗᒃ ᐃᓴ ᓈᓍᒃ 500 ᐅᑮ ᓂᓵᐙᐞ ᐃᓂᓂᐗᐞ ᐅᐅᒫ ᑭᒋ ᐆᑌᓈᕽ ᓲᓴ, ᐃᐃ ᑲᔦ ᒥᑖᓱ 10 ᐁᒪᓇᓐ ᐅᑯᓯᓯᓂ᙮ ᑳᓇᑲ ᑕᔥ ᐊᒪᓐᒡ ᐁᔑᒋᑫᐙᑴᓐ ᐯᐸᑳᓐ ᐊᑮᕽ ᐁᔑ ᑎᐯᒋᑫᔮᓐ? ᓅᑯᒻ ᐃᑕᔥ ᐌᑯᓀᓐ ᐁᑕᐌᑕᒪᓐ? ᑭᑲ ᒦᓂᑰᐐᔅ᙮ ᐌᑯᓀᓐ ᐃᑯ ᐁᑕᐌᑕᒪᓐ ᑭᑲ ᒦᓂᑰ᙮ 13 ᒦᔥ ᐁᔅᑕᕒ ᑳᐃᔑ ᓇᑴᑕᕽ, ᑮᔥᐱᓐ ᑭᒋᐅᑭᒫ ᐃᔑ ᒥᓍᐸᑕᕽ ᑕᑲ ᐸᑭᑎᓐ ᐱᓵᓐ ᒎᐗᒃ ᐅᐅᒫ ᐁᔮᐙᒡ ᑭᒋ ᐆᑌᓈᕽ ᓲᓴ ᒋᐃᔑᒋᑫᐙᒡ ᐁᔑᓯᓂᓂᒃ ᑭᑑᓇᔓᐌᐎᓐ ᐙᐸᓂᓂᒃ᙮ ᑕᑲ ᒥᑖᓱ 10 ᐁᒪᓐ ᐅᑯᓯᓴᐞ ᑕᐊᑰᒋᑲᓂᐎᐗᐞ ᐊᐎᔭ ᑳᔑ ᐊᑰᒋᑲᓂᐎᒡ᙮ 14 ᒦᔥ ᐅᐅ ᑳᐃᑭᑐᒡ ᑭᒋᐅᑭᒫ ᒋᐃᔑᒋᑳᓂᐗᓂᓂᒃ᙮ ᑮᐃᑭᑐᓈᓂᐗᓐ ᐃᐃᒫ ᑭᒋ ᐆᑌᓈᕽ ᓲᓴ, ᒦᔥ ᑳᐃᔑ ᐊᑰᓂᒥᓐᒡ ᐁᒪᓐ ᒥᑖᓱ 10 ᐅᑯᓯᓴᐞ᙮ 15 ᒥᑖᔑᓃᐎᑮᔑᒃ 14 ᐁᐃᔑᓭᓂᒃ ᐁᐱᒪᑭᓱᓂᒡ ᐁᑕᕒ ᑮᓯᓲᓐ, ᒎᐗᒃ ᑮᐅᑸᓄᐃᑎᐗᒃ ᒦᓇᐙ ᐃᐃᒫ ᑭᒋ ᐆᑌᓈᕽ ᓲᓴ ᒦᔥ ᑳᑮ ᓂᓵᐙᒡ ᐊᐗᔑᒣ ᓃᔣᒃ 300 ᐃᓂᓂᐗᐞ᙮ ᒎᐗᒃ ᐃᑕᔥ ᑳᐐᓐ ᐅᑮ ᐸᐹᒣᑕᓰᓈᐙᓐ ᐅᑕᔭᐄᒥᓂ᙮ 16 ᒦᔥ ᐯᔑᑾᓐ ᒎᐗᒃ ᐯᐸᑳᓐ ᐊᑮᕽ ᑳᑮ ᐊᔮᐙᒡ ᑳᐃᔑ ᐅᑸᓄᐃᑎᐙᒡ ᐁᑮ ᓈᑕᒫᓱᐙᒡ᙮ ᓃᔣᓱᒥᑕᓇᔑᓈᓇᓐ ᑕᓯᕽ ᒥᑖᔂᒃ 75 ᐅᑮ ᓂᓵᐙᐞ ᑳᑮ ᔒᑫᓂᒥᑯᐙᒡ᙮ ᑳᐐᓐ ᐃᑕᔥ ᑲᓇᑫ ᐅᑮ ᐸᐹᒣᑕᓰᓈᐙ ᐅᑕᔭᐄᒥᓂ᙮ 17 ᒦᔥ ᐅᐅ ᑳᐃᔑᓭᒃ ᒥᑖᔑᓂᓯᓐ 13 ᐁᐃᓇᑭᓱᒡ ᐁᑕᕒ ᑮᓯᔅ᙮ ᒥᑖᔑᓃᐎᓐ 14 ᐃᑕᔥ ᐁᐃᓇᑭᓱᓂᒡ ᒦ ᐃ ᑳᐃᔑ ᐊᓉᐱᐙᒡ, ᐁᑮ ᐃᔑᑮᔑᑲᓄᑫᐙᒡ ᒋᒌᑫᑕᒥᕽ, ᑲᔦ ᑕᔥ ᒋᐐᑾᑎᓈᓂᐗᓂᓂᒃ᙮ 18 ᐃᑭ ᑕᔥ ᐐᓐ ᒎᐗᒃ ᐁᔮᐙᒡ ᐃᐃᒫ ᑭᒋ ᐆᑌᓈᕽ ᓲᓴ ᑮᐃᔑ ᒫᐗᒋᐃᑎᐗᒃ ᒥᑖᔑᓂᓯᓐ 13 ᐁᐃᓇᑭᓱᓂᒡ ᐁᑕᕒ ᑮᓯᓲᓐ, ᒥᑖᔑᓃᐎᓐ 14 ᑲᔦ ᐁᐃᓇᑭᓱᓂᒡ᙮ ᐹᓂᒫ ᑕᔥ ᒥᑖᔑᓈᓇᓐ 15 ᐁᐃᓇᑭᓱᓂᒡ ᐐᓇᐙ ᑳᑮ ᐊᓉᔑᓄᐙᒡ ᐁᑮ ᐃᔑᑮᔑᑲᓄᑫᐙᒡ ᒋᒌᑫᑕᒥᕽ, ᑲᔦ ᒋᑭᒋ ᐐᓯᓂᕽ᙮ 19 ᒦᑕᔥ ᐅᐅ ᒎᐗᒃ ᐱᑾᒑᔭᐄ ᑳᐊᔨᑖᐙᒡ, ᐆᑌᓈᓯᕽ ᑲᔦ ᑳᐊᔨᑖᐙᒡ ᑳᐅᒋ ᐊᓉᐲᐎ ᑮᔑᑲᓄᑫᐙᒡ ᒥᑖᔑᓃᐎᓐ 14 ᑮᐃᓇᑭᓱᓂᒡ ᑮᓯᓲᓐ ᐁᑕᕒ᙮ ᒦ ᐃᐌ ᐊᐲ ᒋᔩᑫᑕᒧᐙᒡ, ᐁᑭᒋ ᐐᓯᓂᐙᒡ ᑲᔦ, ᑲᔦ ᑕᔥ ᐁᒫᒦᓂᑎᐙᒡ ᑫᑰᓇᓐ ᒦᑭᐌᐎᓇᓐ᙮ ᒎᐎ ᐱᒫᒋᐃᑰᐎᑮᔑᑲᓐ ᐱᔫᕒᐃᒻ ᑳᐃᔑᓂᑳᑌᒃ 20 ᒸᕒᑎᑳᐃ Mordecai ᐃᑕᔥ ᑮᐊᓅᑮ ᐅᐅᐌᓂ ᒋᐅᔑᐲᐃᑳᑌᓂᒃ᙮ ᑮᐊᓅᑮ ᑲᔦ ᒋᐃᔑᓂᔕᐃᑳᑌᓂᑭᓐ ᐁᔑ ᐊᔭᔮᓂᒡ ᐯᔓ, ᐙᓴ ᑲᔦ ᑲᑭᓇ ᒎᐗᐞ ᐁᔑ ᐊᔭᔮᓂᒡ ᐯᐸᑳᓐ ᐊᑮᕽ ᐁᔑ ᑎᐯᑕᒥᓂᒡ ᑭᒋᐅᑭᒫᓐ ᓭᕒᐊᒃᓰᓴᓐ Xerxes᙮ 21 ᐁᑮ ᑲᓅᓈᒡ ᐁᑕᓱᐱᐴᓐ ᒋᒌᑫᑕᒧᐎ ᑮᔑᑲᓄᑫᓈᓂᐗᓂᓂᒃ ᒥᑖᔑᓃᐎᓐ 14, ᒥᑖᔑᓈᓇᓐ 15 ᑲᔦ ᐃᓇᑭᓱᓂᒡ ᐁᑕᕒ Adar ᑮᓯᓲᓐ᙮ 22 ᒦ ᓴ ᐃᐌ ᐊᐲ ᐄᑐᒃ ᐁᐃᔑ ᑮᔑᑲᓂᓂᒃ ᒎᐗᒃ ᑳᑮ ᒑᑭᐋᐙᒡ ᑳᔒᑫᓂᒥᑯᐙᒡ᙮ ᒦᐗᓐ ᐃᓴ ᐅᓄ ᑮᓯᓲᓐ ᐁᐱᒪᑭᓱᓂᒡ ᑳᑮ ᐐ ᓂᓯᑣᐸᓐ ᑳᑮ ᐅᒋ ᒫᓀᑕᒧᐙᐸᓐ, ᑌᑾᒡ ᐃᑕᔥ ᓅᑯᒻ ᐁᑮ ᐸᑳᓂᓭᓂᒃ ᑫᐅᒋ ᒌᑫᑕᒧᐙᒡ, ᑲᔦ ᑕᔥ ᑫᐅᒋ ᒥᓉᑕᒧᐙᒡ᙮ ᒸᕒᑎᑳᐃ ᐅᑮ ᐅᔑᐲᐊᒪᐙᐞ ᒋᑲᓇᐌᑕᒥᓂᒡ ᑳᑮ ᐃᔑᑮᔑᑲᓄᑫᕽ ᒋᑭᒋ ᐐᓯᓂᕽ, ᒋᒌᑫᑕᒧᓈᓂᐗᓂᓂᒃ ᑲᔦ᙮ ᑲᔦ ᑕᔥ ᒋᒫᒦᓂᑎᓈᓂᐗᓂᓂᒃ ᒦᒋᒻ, ᒋᒦᓂᒥᓐᒡ ᑲᔦ ᑫᑎᒫᑭᓯᓂᒡ᙮ 23 ᒎᐗᒃ ᐃᑕᔥ ᑮᐃᓀᑕᒨᒃ ᒋᒫᒌ ᑲᓇᐌᑕᒧᐙᒡ ᐃᐃ ᐃᓇᑲᒥᑭᓯᐎᓐ ᐁᑕᓱᐱᐴᓐ, ᐁᑮ ᐃᔑᒋᑫᐙᒡ ᒸᕒᑎᑳᐃᔭᓐ ᑳᑮ ᐃᔑᐲᐃᑫᓂᒡ᙮ 24 ᐊᐊ ᑕᔥ ᐁᒪᓐ Haman ᑳᑮ ᐅᑌᑌᒡ ᐊᒥᑌᑕᐗᓐ Hammedatha ᑳᑮ ᐅᑕᑳᓀᓯᓂᒡ ᐁᑳᒃ Agag ᑳᑮᐃᓂᒥᓐᒡ ᑳᑮ ᔒᑫᓂᒫᒡ ᒎᐗᐞ ᑮᐃᓀᑕᒧᑯᐸᓐ ᐁᐐ ᒑᑭᐋᒡ ᑲᑭᓇ ᒎᐗᐞ᙮ ᒦ ᐄᑐᒃ ᐃᐃ ᐱᔫᕒ ᑳᐃᔑᓂᑳᑌᓂᒃ ᑳᑮ ᐊᑕ ᒥᑯ ᐅᑖᐱᓂᑫᑯᐸᓀᓐ ᐊᐲ ᑮᔑᑲᓂᓂᒃ ᑫᓂᓵᒡ ᑲᑭᓇ ᒎᐗᐞ᙮ 25 ᐊᐲ ᑕᔥ ᑭᒋᐅᑭᒫ ᑳᑭᑫᑕᕽ ᐅᐅᐌᓂ, ᑮᐊᓅᑮ ᒋᐅᔑᐲᐃᑳᑌᓂᒃ ᐅᓇᔓᐌᐎᓐ ᐃᐃ ᐁᒪᓐ ᑳᐐ ᐃᔑ ᒪᒋᑑᑕᐙᓂᐸᓐ ᒎᐗᐞ ᒣᔥᑾᒡ ᒋᑮᐌ ᓈᓯᑳᑯᓂᒡ ᒋᐅᑖᐱᓀᓂᒡ, ᑲᔦ ᑕᔥ ᐅᑯᓯᓯᓂ ᒋᐊᑰᓂᒥᓐᒡ ᐊᐎᔭ ᑳᔑ ᐊᑰᒋᑲᓂᐎᒡ᙮ 26 ᒦᑕᔥ ᐅᓄ ᐊᓉᐲᐎ ᑮᔑᑰᓐ ᐱᔫᕒᐃᒻ ᐌᒋ ᐃᔑᓂᑳᑌᑭᓐ ᐋᓃᔥ ᑮᐊᑕ ᒦᑯ ᐅᑖᐱᓂᑫᓈᓂᐗᓂᑯᐸᓐ᙮ ᐃᐃ ᑲᔦ ᒸᕒᑎᑳᐃ ᑳᑮ ᐃᔑᐲᐃᑫᒡ ᐅᑑᔑᐲᐃᑲᓂᕽ, ᐃᐃ ᑲᔦ ᑲᑭᓇ ᑳᑮ ᐃᔑ ᐙᐸᑫᐙᒡ, ᐃᐃ ᑳᑮ ᐃᔑᓭᐙᒡ ᒎᐗᒃ᙮ 27 ᒎᐗᒃ ᐃᑕᔥ ᐐᓇᐙ ᐱᑯ ᑮᐃᓀᑕᒨᒃ, ᐃᐃ ᑲᔦ ᐅᐲᐌᓰᒥᐙᐞ, ᐊᐌᓀᓇᓐ ᐃᓴ ᑯᑫᓂ ᒎᐎᐎᓂᒡ ᒋᑲᓇᐌᒋᑳᑌᓂᒃ ᐃᐃ ᓃᔓᑮᔑᒃ ᑳᑮ ᐊᓉᐲᐎ ᑮᔑᑲᓄᑫᐙᒡ᙮ ᐅᐅ ᒋᐃᔑᒋᑫᕽ ᐁᑕᓱᐱᐴᓐ ᒪᔮ ᑳᑮ ᐃᔑ ᑭᑭᓄᐃᑫᓂᒡ ᒸᕒᑎᑳᐃᔭᓐ᙮ 28 ᒦᑕᔥ ᑳᑮ ᐃᓀᑕᒧᓈᓂᐗᕽ ᑲᑭᓇ ᐁᑕᔑᐙᒡ ᑖᐎᓂᕽ, ᑲᔦ ᐃᒫ ᑫᓂ ᐅᑕᑳᓀᓯᐙᒡ ᒥᓯᐌ ᐱᑯ ᐯᐸᑳᓐ ᐊᑮᕽ, ᑭᒋ ᐆᑌᓈᑳᕽ ᑲᔦ ᒋᒫᒥᑲᐎᐙᒡ ᒋᐊᓂ ᑲᓇᐌᑕᒧᐙᒡ ᐃᐃ ᑳᑮ ᐃᔑᑮᔑᑲᓄᑫᐙᒡ, ᒨᔕᒃ ᐃᐃ ᒋᐊᓂ ᐃᔑᒋᑫᓈᓂᐗᓂᓂᒃ᙮ 29 ᒦᑕᔥ ᑭᒋᐅᑭᒫᑴ ᐁᔅᑕᕒ ᑳᑮ ᐅᑌᑌᒡ ᐋᐱᐁᓬᐊᓐ Abihail, ᐊᐊ ᑲᔦ ᒸᕒᑎᑳᐃ ᑳᒎᐎᐎᒡ ᑮᐃᔑ ᒪᔥᑲᐎᐲᐃᑫᐗᒃ ᑫᒋᓈᒡ ᐃᑯ ᒋᐃᔑᒋᑫᕽ ᐅᐅ ᒸᕒᑎᑳᐃᔭᓐ ᑳᑮ ᐃᔑᐲᐃᑫᓂᐸᓐ ᐅᑖᓈᕽ᙮ 30 ᑲᑭᓇ ᓴ ᒎᐗᒃ ᑮᐅᔑᐲᐊᒪᐙᐗᒃ ᒥᓯᐌ ᐯᐸᑳᓐ ᓂᑯᑣᒃ ᓃᔥᑕᓇᔑᓃᔣᓱ 127 ᐊᑮᕽ ᐁᔑ ᐊᔭᔮᐙᒡ ᐃᐃᒫ ᓭᕒᐊᒃᓰᔅ ᐅᑑᑭᒫᐎᐎᓂᕽ᙮ ᐁᑮ ᐃᔑᐲᐊᒪᐎᑣ ᒋᒥᓄᓭᐙᒡ, ᐌᐌᓂ ᑲᔦ ᒋᐱᒫᑎᓯᐙᒡ᙮ 31 ᑮᐃᑭᑐᐗᒃ ᒋᐋᔩᒋ ᐅᓇᒋᑳᑌᓂᒃ ᐃᐃ ᒎᐎ ᐱᒫᒋᐃᑰᐎ ᑮᔑᑲᓐ ᐱᔫᕒᐃᒻ ᑳᐃᔑᓂᑳᑌᒃ, ᒋᐃᓇᑲᒥᑲᓂᓂᒃ ᑲᔦ ᑮᔑᑲᓂᓂᒃ ᑳᑮ ᐃᔑ ᐅᓇᒋᑳᑌᓂᒃ ᑕᔥ ᐱᑯ ᑳᑮ ᐃᔑ ᑲᓇᐌᑕᒧᐙᒡ ᐊᐲ ᐁᑮᔑᑲᓂᓂᒃ ᑮᐐᓯᓂᓯᒀᐸᓐ ᐊᐲ ᑲᔦ ᑮᒪᐎᐙᐸᓐ᙮ ᒦ ᓴ ᐅᐌᓂ ᐁᔅᑕᕒ ᑲᔦ ᒸᕒᑎᑳᐃ ᑳᑮ ᐃᑭᑐᐙᒡ ᐅᐅ ᒋᐃᔑᒋᑫᓈᓂᐗᓂᓂᒃ᙮ 32 ᐁᔅᑕᕒ ᐃᑕᔥ ᑳᑮ ᐃᔑ ᐅᓇᒋᑫᒡ ᑮᐅᒋ ᐋᔩᒋᓯᓐ ᑳᑮ ᐃᓇᒋᑳᑌᒃ ᒋᐃᔑᒋᑫᕽ ᒎᐎ ᐱᒫᒋᐃᑰᐎ ᑮᔑᑲᒃ᙮ ᑲᔦ ᑕᔥ ᑮᐅᔑᐲᐃᑳᑌ ᐃᐃᒫ ᐁᔑ ᐅᔑᐲᐃᑳᑌᒃ ᑲᑭᓇ ᑫᑰᓐ ᐁᓇᑲᒥᑲᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society