Ehstar 5 - ᐅᒋᐺ ᑭᒋᒪᓯᓇᐃᑲᓐᐁᔅᑕᕒ ᑮᐊᑐᒫᒡ ᑭᒋᐅᑭᒫᓐ, ᐁᒪᓇᓐ ᑲᔦ ᑮᐐᑾᑫᒡ 1 ᓂᓱᑮᔑᒃ ᐃᑕᔥ ᐁᐃᔑᓭᓂᒃ ᐁᔅᑕᕒ Esther ᐅᑮ ᐱᓯᑳᓐ ᑭᒋᐅᑭᒫᑴᐎ ᑭᑭᔥᑭᑲᓐ᙮ ᒦᔥ ᑳᐃᔑ ᐲᑎᑫᒡ ᐃᐃᒫ ᑭᒋᐅᑭᒫᐎᑲᒥᑯᕽ ᐁᑮ ᐃᓈᓴᒥᑳᐸᐎᒡ ᐃᓇᑫ ᐁᔑ ᓂᑖ ᐊᐱᓂᒡ ᑭᒋᐅᑭᒫᓐ᙮ ᑭᒋᐅᑭᒫᓐ ᐃᑕᔥ ᑮᐅᒋᔥᑲᐗᐱᐗᓐ ᐁᐊᐱᓂᒡ ᑭᒋᐅᑭᒫ ᑌᓴᐱᐎᓂᕽ ᐃᔥᒀᑌᕽ ᐃᓇᑫ ᐁᑮ ᐃᓈᓴᒪᐱᓂᒡ᙮ 2 ᐊᐲ ᑕᔥ ᑭᒋᐅᑭᒫ ᐁᐙᐸᒫᒡ ᐁᔅᑕᕒᐊᓐ ᐲᑎᒃ ᐁᓃᐸᐎᓂᒡ, ᐐᑫ ᑲᔦ ᐅᑮ ᒥᓍᐸᒫᓐ᙮ ᒦᑕᔥ ᑳᐃᔑ ᓃᒫᑯᓇᕽ ᐅᑭᒋᐅᑭᒫ ᓴᑲᐅᓈᑯᓂ᙮ ᐁᔅᑕᕒ ᐃᓴ ᐅᑮ ᓈᓯᑲᐙᓐ ᐁᑮ ᓵᒥᓇᕽ ᑭᒋᐅᑭᒫ ᓴᑲᐅᓈᑯᓂ᙮ 3 ᑭᒋᐅᑭᒫ ᓴ ᑕᔥ ᐅᑮ ᑲᑴᒋᒫᓐ ᐁᔅᑕᕒᐊᓐ, ᑫᑰᓐ ᐃᓇ? ᐐᑕᒪᐎᔑᓐ ᐌᑯᓀᓐ ᐁᑕᐌᑕᒪᓐ᙮ ᑭᑲ ᒦᓂᓐ ᐃᓴ ᑫᑰᓐ ᐁᑕᐌᑕᒪᓐ, ᒥᓴᐙ ᑯ ᐋᐱᑕ ᓂᑑᑭᒫᐎᐎᓐ᙮ 4 ᐁᔅᑕᕒ ᐃᑕᔥ ᑮᐃᔑ ᓇᑴᑕᒻ, ᑮᔥᐱᓐ ᑭᒋᐅᑭᒫ ᐃᔑ ᒥᓍᐸᑕᒪᓐ, ᑭᐸᑯᓭᓂᒥᓐ, ᐊᐊ ᑲᔦ ᐁᒪᓐ Haman ᒋᐲᔖᔦᒃ ᐁᑾᔮᒋᑕᒪᐎᓇᑰᒃ ᐁᐐ ᐐᑾᑫᔮᓐ ᓅᑯᒻ ᑳᐅᓈᑯᔑᒃ᙮ 5 ᒦᑕᔥ ᑭᒋᐅᑭᒫ ᑳᐃᑭᑐᒡ, ᔐᒫᒃ ᐊᑐᒥᒃ ᐁᒪᓐ ᒋᐃᔑᒋᑫᔮᕽ ᐁᔅᑕᕒ ᐁᔑ ᐊᑕᐌᑕᕽ᙮ ᒦᔥ ᑭᒋᐅᑭᒫ, ᐊᐊ ᑲᔦ ᐁᒪᓐ ᑳᑮ ᐃᔖᐙᒡ ᐁᑮ ᑾᔮᒋᑑᓂᒡ ᐁᔅᑕᕒᐊᓐ ᐐᑾᑎᐎᓐ᙮ 6 ᒣᒀ ᑕᔥ ᐁᒥᓂᑴᐙᒡ ᔔᒥᓈᐳ, ᑭᒋᐅᑭᒫ ᐅᑮ ᑲᑴᒋᒫᓐ ᐁᔅᑕᕒᐊᓐ, ᐌᑯᓀᓐ ᐁᑕᐌᑕᒪᓐ? ᐐᑕᒪᐎᔑᓐ, ᑭᑲ ᒦᓂᓐ ᐃᑕᔥ ᐁᑕᐌᑕᒪᓐ᙮ ᑭᑲ ᒦᓂᓐ ᐃᓴ ᐁᑕᐌᑕᒪᓐ, ᒥᓴᐙ ᑯ ᐋᐱᑕ ᓂᑑᑭᒫᐎᐎᓐ᙮ 7 ᒦᔥ ᐁᔅᑕᕒ ᑳᐃᔑ ᓇᑯᒫᒡ ᑭᒋᐅᑭᒫᓐ, ᒦ ᓴ ᐅᐌ ᐁᔑ ᑲᑴᑗᔮᓐ ᐁᐃᔑ ᒥᓴᐌᑕᒫᓐ᙮ 8 ᑮᔥᐱᓐ ᐃᑕᔥ ᑭᒋᐅᑭᒫ ᐃᓀᓂᒥᒡ ᐁᒥᓍᐸᒥᒡ, ᑮᔥᐱᓐ ᑲᔦ ᒥᓉᑕᕽ ᒋᒦᔑᒡ ᐁᔑ ᑲᑴᑗᐗᒃ, ᐃᓀᑕᕽ ᑲᔦ ᒋᔑ ᒦᔑᒡ ᐁᔑ ᒥᓴᐌᑕᒧᐗᒃ, ᒦᓇᐙ ᓴ ᑭᐸᑯᓭᓂᒥᓐ ᐁᒪᓐ ᑲᔦ ᒋᐲᔖᔦᒃ ᐙᐸᕽ ᐁᐐ ᑾᔮᒋᑕᒪᐎᓇᑰᒃ ᐐᑾᑎᐎᓐ᙮ ᒦᔥ ᐃᐃ ᐊᐲ ᑫᐐᑕᒪᐎᓈᓐ ᐌᑯᓀᓐ ᐁᑕᐌᑕᒫᓐ᙮ ᐁᒪᓐ ᑮᐅᓀᑕᕽ ᐋᓃᓐ ᐙᐃᔑᓂᓵᒡ ᒸᕒᑎᑳᐃᔭᓐ 9 ᐊᐲ ᓴ ᐁᒪᓐ Haman ᑳᐊᓂ ᓵᑲᐊᕽ ᐃᐃ ᐁᑮᔑᑲᓂᓂᒃ, ᐐᑫ ᓴ ᑮᒌᑫᑕᒻ, ᐁᑮ ᒥᓄᒪᒋᐅᒡ᙮ ᐁᐙᐸᒫᒡ ᐃᑕᔥ ᒸᕒᑎᑳᐃᔭᓐ Mordecai ᐁᐊᔮᓂᒡ ᐁᔑ ᐃᔥᒀᑌᒥᐗᓂᓂᒃ ᑭᒋᐅᑭᒫᐎᑲᒥᑯᕽ ᐁᑮ ᐙᐸᒫᒡ ᐁᓃᐸᐎᑖᑯᓯᒃ, ᑲᔦ ᑕᔥ ᐁᑭᑌᓂᒥᑯᓯᒃ, ᐐᑫ ᓴ ᐁᒪᓐ ᐅᑮ ᑭᒋ ᓂᔥᑭᐃᑰᓐ ᒸᕒᑎᑳᐃᔭᓐ᙮ 10 ᐅᑮ ᑲᔥᑭᑑᓐ ᐃᑕᔥ ᑫᑰᓐ ᒋᐃᔑᒋᑫᓯᒃ᙮ ᒦᔥ ᑳᐊᓂ ᑮᐌᒡ ᐁᑮ ᐊᑐᒫᒡ ᐅᓵᑭ ᐐᒌᐙᑲᓇᐞ, ᐐᐗᓐ ᑲᔦ ᓰᕒᐁᔥ Zeresh ᐁᔑᓂᑳᓱᓂᒡ᙮ 11 ᐐᑫ ᓴ ᑮᒪᒥᓍᓱ ᐁᑮ ᑕᔑᑕᕽ ᐁᔑ ᐌᓅᑎᓯᒡ, ᐁᑮ ᑕᔑᒫᒡ ᑲᔦ ᐅᑯᓯᓴᐞ, ᐋᓃᓐ ᑲᔦ ᑭᒋᐅᑭᒫᓐ ᑳᐃᔑ ᐃᔥᐸᑭᒥᑯᒡ ᐊᐲᒡ ᐐᓐ ᐃᑯ ᑯᑕᒃ ᐌᑭᒫᐌᑖᑯᓯᓂᒡ, ᐃᐃ ᑲᔦ ᐋᓂᑫᐎᑭᒫᐞ᙮ 12 ᒦᔥ ᑳᐊᓂ ᐃᑭᑐᒡ, ᐃᓇᔥᑫ ᑕᔥ ᑲᔦ, ᓃᓐ ᐁᑕ ᓂᑮ ᐊᑐᒥᒃ ᑭᒋᐅᑭᒫᑴ ᐁᔅᑕᕒ Esther ᒋᐐᒋ ᐐᓯᓃᒥᒪᒃ ᑭᒋᐅᑭᒫᓐ ᑮᐐᑾᑫᒡ᙮ ᒦᓇᐙ ᑕᔥ ᓂᑕᑐᒥᒃ ᐙᐸᓂᓂᒃ ᒋᐊᑕ ᐐᒋ ᐐᓯᓃᒥᒪᒃ ᑭᒋᐅᑭᒫᓐ᙮ 13 ᑳᐐᓐ ᐃᑕᔥ ᐅᐅ ᓂᑑᒋ ᒌᑫᑕᓰ ᒥᓂᒃ ᐃᑯ ᑫᐙᐸᒪᒃ ᐊᐊ ᒎ ᒸᕒᑎᑳᐃ ᐁᓇᒪᑕᐱᒡ ᑭᒋᐅᑭᒫ ᐃᔥᒀᑌᕽ, ᑮᐃᑭᑐ ᐁᒪᓐ᙮ 14 ᐐᐗᓐ ᐃᑕᔥ ᓰᕒᐁᔕᓐ, ᐃᐃ ᑲᑭᓇ ᐅᓵᑭ ᐐᒌᐙᑲᓇᐞ ᐅᑮᐃᑰᐞ, ᐃᓇᔥᑫ ᐅᔑᑑᓐ ᐊᐎᔭ ᑳᐃᔑ ᐊᑰᒋᑲᓂᐎᒡ, ᓃᔣᓯᒥᑕᓇᔑᓈᓇᓐ 75 ᑕᓱᒥᓯᑦ ᒋᐊᐲᑖᒃ᙮ ᑲᑴᒋᒫᑫᓐ ᐃᑕᔥ ᑭᒋᐅᑭᒫ ᑭᔐᐹᐗᑲᓂᓂᒃ ᐃᐃᒫ ᒋᔑ ᐊᑰᓈᒡ ᒸᕒᑎᑳᐃᔭᓐ᙮ ᒦᔥ ᐃᔑ ᐃᔖᑲᓐ ᐁᔑ ᐐᑾᑎᕽ ᒋᒥᓉᑕᒪᓐ᙮ ᐐᑫ ᑕᔥ ᐁᒪᓐ ᐅᑮ ᒥᓄᑖᓐ ᑳᑮᐃᓂᓐᒡ᙮ ᒦᔥ ᑳᐃᔑ ᐊᓅᑮᒡ ᒋᐅᔑᒋᑳᑌᓂᒃ ᐊᑰᒋᑲᓈᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society