ᑳᑭᑫᑖᓱᒡ 1 - ᐅᒋᐺ ᑭᒋᒪᓯᓇᐃᑲᓐᐱᒫᑎᓯᐎᓐ ᑫᑰᓐ ᐁᐃᓈᐸᑕᓯᓄᒃ 1 ᒦ ᓴ ᐅᓄᐌᓂᐗᓐ ᐅᑎᑭᑐᐎᓇᓐ ᑳᑭᑫᑖᓱᒡ, ᑌᐱᑑᓐ David ᑳᑮ ᐅᑯᓯᓯᒥᑯᒡ ᑳᑮ ᑭᒋᐅᑭᒫᐎᐸᓐ ᒉᕒᐆᓴᓬᐊᒥᕽ Jerusalem᙮ 2 ᐅᐅ ᓴ ᐃᑭᑐ ᑳᑭᑫᑖᓱᒡ, ᐃᔑ ᐊᓂᔖ ᓴ ᑯ ᐃᔑ ᐊᓂᔖ᙮ ᒦ ᓴ ᐃ ᑲᑭᓇ ᑫᑰᓐ ᐁᓀᑖᑾᒃ᙮ 3 ᐯᒫᑎᓯᒡ ᓴ ᐊᓄᑮ ᒥᓂᒃ ᐃᑯ ᐯᒫᑎᓯᒡ, ᑳᐐᓐ ᐃᑕᔥ ᑫᑰᓐ ᒋᓈᑾᓂᓂᒃ ᐌᑯᑐᑴᓐ ᑳᑲᔥᑭᑑᑴᓐ ᑮᐊᓄᑮᒡ ᔒᐹᑮᓯᔅ᙮ 4 ᐯᒫᑎᓯᐙᒡ ᓴ ᐱᐊᔮᓂᑫ ᓂᑖᐎᑭᐃᑎᐗᒃ, ᒦᔥ ᑲᔦ ᑫᓂᔑ ᓂᐳᐙᒡ᙮ ᐅᐅ ᑕᔥ ᐐᓐ ᐊᑭ ᒨᔕᒃ ᐃᑯ ᑕᐊᔮᒪᑲᓐ᙮ 5 ᑮᓯᔅ ᓴ ᒨᑲᐊᒻ, ᐸᑭᔑᒧ ᑲᔦ, ᒦᔥ ᐃᐃ ᒦᓇᐙ ᐁᔑ ᐌᔩᐱᔥᑳᒡ ᐁᐃᔖᒡ ᐋᓃᑎ ᑫᐅᒋ ᒨᑲᐊᕽ᙮ 6 ᔖᐗᓄᕽ ᓴ ᐃᓇᑫ ᐃᓈᓂᒪᓐ, ᑮᐌᑎᓄᕽ ᑲᔦ, ᐁᒥᒋ ᑭᔑᐹᔮᓂᒪᕽ, ᒦᔥ ᒦᓇᐙ ᐯᒥᔑ ᑮᐌᔮᓂᒪᕽ᙮ 7 ᑲᑭᓇ ᓴ ᓰᐲᓐ ᑭᒋᑲᒦᕽ ᐃᔑᒋᐗᓅᓐ, ᑳᐐᓐ ᑕᔥ ᑭᒋᑲᒻ ᒪᔑ ᒋᒨᔥᑭᓀᐲᒃ᙮ ᒦᑕᔥ ᐃᐃ ᓂᐱ ᐁᔑ ᑮᐌᒪᑲᒃ ᐋᓃᑎ ᑳᑮ ᐅᒋ ᒫᒌᒋᐗᑭᐸᓐ ᓂᑕᒻ᙮ 8 ᑲᑭᓇ ᓴ ᑫᑰᓐ ᐊᔦᑯᓰᐃᐌᒪᑲᓐ, ᑳᐐᓐ ᑲᔥᑭᒋᑳᑌᓯᓅᓐ ᒋᐐᒋᑳᑌᑭᐸᓐ᙮ ᑳᐐᓐ ᓴ ᐐᑳ ᑭᑌ ᐙᐸᒋᑫᓰᒥᓐ, ᑳᐐᓐ ᑲᔦ ᐐᑳ ᑭᑌᓅᒋᑫᓰᒥᓐ᙮ 9 ᐋᓃᓐ ᓴ ᑳᑮ ᐃᔑᐌᐸᑭᐸᓐ ᒦᓇᐙ ᑕᑮᐌ ᐃᔑᐌᐸᓐ, ᐋᓃᓐ ᑲᔦ ᑳᑮ ᐃᔑᒋᑫᓈᓂᐗᑭᐸᓐ ᓴ ᒦᓇᐙ ᑕᑮᐌ ᐃᔑᒋᑫᓈᓂᐗᓐ, ᑳᐐᓐ ᓴ ᐅᔥᑭ ᑫᑰᓐ ᐊᔮᓯᓅᓐ ᐅᐅᒫ ᐊᑮᕽ᙮ 10 ᑳᐐᓐ ᓴ ᑫᑰᓂᓂ ᐊᐎᔭ ᐅᑖᐃᑕᓰᓐ, ᐃᓇᔥᑫ ᐙᐸᑕᒧᒃ ᐃᐃ ᐅᔥᑭ ᑫᑰᓐ᙮ ᐋᔕ ᐄᑐᒃ ᐃᓈ ᐃᐃ ᒣᐎᔕ ᑮᐅᒋ ᐊᔮᒪᑲᓐ ᒋᑆ ᓂᑖᐎᑭᔭᕽ᙮ 11 ᑳᐐᓐ ᓴ ᑫᑰᓇᓐ ᐅᑖᓈᕽ ᑳᑮ ᐱᐊᔮᑭᓐ ᒫᒥᑲᐎᓄᒋᑳᑌᓯᓅᓇᓐ, ᐃᓂ ᑕᔥ ᑲᔦ ᐱᒌᓇᒃ ᑫᓂ ᐊᔮᑭᓐ᙮ ᑳᐐᓐ ᑲᔦ ᐊᐎᔭ ᐊᔮᓰ ᑫᓂ ᒫᒥᑲᐎᓄᑕᕽ ᐅᐅ ᓅᑯᒻ ᑳᐃᔑᓭᓂᒃ, ᐋᓃᓐ ᑲᔦ ᐌᑎ ᐱᒌᓇᒃ ᑫᓂ ᐃᔑᓭᓂᒃ᙮ ᑳᑭᑫᑖᓱᒡ ᐁᑕᔑᑕᕽ ᑳᑮᑭᑫᑕᕽ 12 ᓃᓐ ᓴ ᑳᑭᑫᑖᓱᔮᓐ ᓂᑮ ᑭᒋᐅᑭᒫᐤ ᐃᐃᒫ ᒉᕒᐆᓴᓬᐊᒥᕽ Jerusalem ᐁᑮ ᑎᐯᓂᒪᒀ ᐃᔅᕒᐃᔭᓬᐊᒃ Israel᙮ 13 ᒦ ᓴ ᑳᐃᔑᒋᑫᔮᓐ ᓂᑲᑮᑖᐌᑕᒧᐎᓐ ᐁᑮ ᐋᐸᒋᑑᔮᓐ ᐁᑮ ᐐ ᑲᑴ ᑭᑫᑕᒫᓐ ᑲᑭᓇ ᑫᑰᓇᓐ ᑳᐃᔑᒋᑫᓈᓂᐗᕽ ᐅᐅᒫ ᐊᑮᕽ᙮ ᐁᑕᑕᐌ ᓴ ᑭᔐᒪᓂᑑ ᐅᑭᑎᒪᐋᓐ ᐯᒫᑎᓯᓂᒡ᙮ 14 ᑲᑭᓇ ᓴ ᑫᑰᓇᓐ ᓂᐱ ᐙᐸᑖᓇᓐ ᑳᐱ ᐃᔑᒋᑫᓈᓂᐗᕽ ᐅᐅᒫ ᐊᑮᕽ; ᒦ ᓴ ᑕᔥ ᐃᔑ ᐊᓂᔖ ᐁᐃᔑᒋᑫᓈᓂᐗᕽ! ᒦ ᓴ ᐃ ᐁᓀᑖᑾᒃ ᑖᐱᔥᑰ ᑳᑲᑴ ᐱᒥᓂᔕᐃᑳᑌᒃ ᓅᑎᓐ᙮ 15 ᐃᐃ ᓴ ᑳᐙᐙᑭᐊᔮᒃ ᑳᐐᓐ ᑕᑲᔥᑭᒋᑳᑌᓯᓅᓐ ᒋᒦᓄᓂᑳᑌᑭᐸᓐ, ᑳᐐᓐ ᑲᔦ ᑕᑲᔥᑭᒋᑳᑌᓯᓅᓐ ᒋᐊᑭᒋᑳᑌᑭᐸᓐ ᑫᑰᓐ ᐁᔮᓯᓄᒃ᙮ 16 ᒦᑕᔥ ᐅᐅ ᑳᐃᑎᓱᔮᓐ, ᐃᓇᔥᑫ ᓴ ᓃᓐ ᐋᐱᒋ ᓂᐱ ᑭᒋ ᐃᓀᑖᑯᔅ, ᐐᑫ ᑲᔦ ᓂᑲᑮᑖᐌᑕᒻ ᐊᐲᒡ ᐐᓐ ᐃᑭ ᑯᑕᒃ ᐅᑖᓈᕽ ᑳᑮ ᐱ ᑎᐯᑕᒧᐙᒡ ᐃᐃ ᒉᕒᐆᓴᓬᐊᒻ᙮ ᓇᐗᒡ ᓴ ᓃᓐ ᓂᐱ ᑭᑫᑖᓐ ᐌᑯᓀᓐ ᑳᐃᒋᑳᑌᒃ ᑲᑮᑖᐌᑕᒧᐎᓐ, ᑭᑫᑕᒫᐎᓐ ᑲᔦ᙮ 17 ᒦᑕᔥ ᒦᓇᐙ ᑳᑮ ᐃᓀᑕᒫᓐ ᐁᐐ ᑲᑴ ᑭᑫᑕᒫᓐ ᐁᔑ ᐸᑳᓀᑖᑾᒃ ᑭᑫᑕᒫᐎᓐ, ᑲᑮᐹᑎᓯᐎᓐ ᑲᔦ᙮ ᐁᐐ ᑲᑴ ᑭᑫᑕᒫᓐ ᑲᔦ ᐁᔑ ᐸᑳᓀᑖᑾᒃ ᑲᑮᑖᐌᑕᒧᐎᓐ, ᑮᐗᔥᑴᔮᑎᓯᐎᓐ ᑲᔦ᙮ ᒦᑕᔥ ᒦᓇᐙ ᑳᐃᔑ ᑭᑫᑕᒫᓐ ᐃᐃ ᐁᑮ ᐃᔑᓈᑾᒃ ᑖᐱᔥᑰ ᐁᑮ ᑲᑴ ᐱᒥᓂᔕᐊᒫᓐ ᓅᑎᓐ᙮ 18 ᐋᓃᔥ ᐅᐅ ᐃᔑᓭ ᐊᐎᔭ ᓴ ᐊᐗᔑᒣ ᑳᓂ ᑲᑮᑖᐌᑕᕽ ᐋᒌᑫ ᐊᓂ ᐅᒑᓂᒣᑕᒻ᙮ ᐊᐎᔭ ᑲᔦ ᐊᐗᔑᒣ ᑳᓂ ᐅᑭᑫᑕᒫᐎᓂᒡ, ᒦ ᐊᐌ ᑳᓂ ᒫᓀᑕᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society