ᑑᑕᕒᐋᓇᒦ 9 - ᐅᒋᐺ ᑭᒋᒪᓯᓇᐃᑲᓐᐃᔅᕒᐃᔭᓬᐊᒃ ᑳᑮᐃᔑᔕᔒᐱᑕᒧᐙᒡ 1 ᐃᔅᕒᐃᔭᓬᐊᒃ Israel, ᓅᑕᒧᒃ! ᓅᑯᒻ ᓴ ᑳᑮᔑᑲᒃ ᑭᐐ ᐋᔕᐎᔥᑳᒻ ᐃᐃ ᒞᕒᑕᓐ Jordan ᓰᐱ᙮ ᒦᑕᔥ ᒋᐲᑎᑫᔥᑳᔦᒃ ᒋᒪᑲᒣᒀ ᐯᒫᑎᓯᐙᒡ ᓇᐗᒡ ᑳᐹᑏᓄᐙᒡ ᓇᐗᒡ ᑲᔦ ᑳᓲᑫᑖᑯᓯᐙᒡ ᐊᐲᒡ ᑮᓇᐙ, ᐅᑭᒋ ᐅᑑᑌᓈᒥᐙᓐ ᑲᔦ ᐐᑫ ᑳᐃᔥᐱ ᐙᑳᔮᐱᑭᓂᑳᑌᓂᑭᓐ᙮ 2 ᒦᐗᒃ ᓴ ᐃᑭ ᐯᒫᑎᓯᐙᒡ ᑳᓲᑭᓯᐙᒡ, ᑳᑲᑳᓅᓯᐙᒡ ᑲᔦ, ᐁᓇᑯᕽ Anak ᐌᑕᑳᓀᓯᐙᒡ! ᑭᑭᑫᓂᒫᐙᒃ ᐄᑐᒃ, ᑭᓈᓅᑖᒻ ᑲᔦ ᐁᐃᓂᑣ, ᐊᐌᓀᓐ ᐃᑕᔥ ᐃᓈ ᑫᒦᑳᓈᐸᓐ ᐃᐃ ᐁᓇᑯᕽ ᐌᑕᑳᓀᓯᓂᒡ᙮ 3 ᑫᒋᓈᐅᒃ ᓴ ᓅᑯᒻ ᑳᑮᔑᑲᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐅᔕ ᑳᓃᑳᓃᑕᒪᐎᓀᒃ ᐅᐅ ᑳᐋᔕᐎᔥᑳᔦᒃ, ᐃᔥᑯᑌ ᑳᐊᒀᑭᓯᑫᒪᑲᒃ ᐁᐃᓀᑖᑯᓯᒡ᙮ ᐐᓐ ᓴ ᐅᑲ ᓂᔑᐗᓈᒋᐋᐞ, ᐅᑲ ᔖᑰᒋᐋᐞ ᑲᔦ ᑳᐐ ᐊᓂ ᐃᔖᔦᒃ᙮ ᑮᓇᐙ ᑕᔥ ᑭᑲ ᓵᑭᑖᒪᐙᐙᐞ, ᑭᑖᑕᑉ ᑲᔦ ᑭᑲ ᒑᑭᐋᐙᐞ, ᑳᑮ ᐃᔑ ᐊᔓᑕᒫᐎᓀᒃ᙮ 4 ᐊᐲ ᑕᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ ᓵᑭᑖᒪᐙᒡ ᐁᔑᐊᔮᐌᒃ, ᑳᐐᓐ ᓴ ᑭᑲ ᐃᑭᑐᓰᒻ, ᓃᓐ ᐅᔕ ᐁᑾᔭᒀᑎᓯᐗᒃ ᑳᑎᐯᒋᑫᒡ ᑳᑮ ᐅᒋ ᐲᔑᒡ ᐅᐅᒫ ᒋᑎᐱᓇᐌᐎᓯᐗᒃ ᐅᐅ ᐊᑮᓂ᙮ ᐃᐃ ᐅᔕ ᑳᐅᒋ ᐃᔑᒋᑫᒡ, ᐅᓵᒻ ᐁᒪᒋᐃᔑᐌᐱᓯᓂᒡ ᐃᐃ ᑯᑕᒃ ᐯᒫᑎᓯᓂᒡ ᑳᑎᐯᒋᑫᒡ ᑳᐐ ᐅᒋ ᓵᑭᑖᒪᐙᒡ ᐁᔑᐊᔮᔦᒃ᙮ 5 ᑳᐐᓐ ᐃᑕᔥ ᐐᓐ ᑭᑾᔭᒀᑎᓯᐎᓂᐙᕽ, ᑳᐐᓐ ᑲᔦ ᐁᑾᔭᑯᓈᑾᑭᓐ ᑭᑌᐃᐙᓐ, ᑳᐐ ᐅᒋ ᐲᑎᑫᔥᑳᔦᒃ ᒋᑎᐱᓇᐌᐎᓯᔦᒃ ᐅᑕᑮᒥᐙ᙮ ᐃᐃ ᐅᔕ ᐅᓵᒻ ᐁᒪᒋᐃᔑᐌᐱᓯᓂᒡ ᐃᐃ ᐯᒫᑎᓯᓂᒡ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᐐ ᐅᒋ ᓵᑭᑖᒪᐙᒡ ᐙᐊᓂ ᐃᔖᐌᒃ ᒋᐃᔑᓭᓂᒃ ᑳᑮ ᐃᔑ ᐊᔩᒋ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᐙᐸᓃᐞ, ᐁᐸᕒᐊᐋᒪᓐ Abraham, ᐋᐃᓯᑰᓐ Isaac, ᐃᓂ ᑲᔦ ᒉᑲᐴᓐ Jacob᙮ 6 ᑭᑫᑕᒧᒃ ᐃᑕᔥ ᑳᐐᓐ ᐐᓐ ᑭᑾᔭᒀᑎᓯᐎᓂᐙᕽ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᐅᒋ ᒦᓂᓀᒃ ᐅᐅ ᐌᓂᔑᔑᓂᓂᒃ ᐊᑮᓂ ᒋᑎᐱᓇᐌᐎᓯᔦᒃ, ᑮᓇᐙ ᐄᑐᒃ ᑭᓂᑖ ᔕᔒᐱᑖᒻ᙮ 7 ᒫᒥᑲᐎᒃ ᐃᑕᔥ, ᑫᑯ ᐗᓃᑫᑫᒃ ᐋᓃᓐ ᑳᑮ ᐃᔑ ᓂᔥᑭᐁᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐌᑎ ᐱᑾᑕᑲᒥᒃ᙮ ᐁᑮᔑᑲᒃ ᓴ ᑳᑮ ᓇᑲᑕᒣᑭᐸᓐ ᐃᐃ ᐄᒋᐸᑭ Egypt ᐲᓂᔥ ᐃᑕᔥ ᐅᐅ ᐃᔑᐊᐲ ᑳᐱ ᑕᑯᔑᓀᒃ, ᒦ ᓴ ᐁᔑᒋᑫᔦᒃ ᐁᔕᔒᐱᑕᐌᒃ ᑳᑎᐯᒋᑫᒡ᙮ 8 ᐌᑎ ᓴ ᑲᔦ ᐗᒌᕽ ᓵᐃᓇᐃ Sinai ᐁᒋᑳᑌᒃ ᑭᑮ ᐃᔑ ᓂᔥᑭᐋᐙ ᑳᑎᐯᒋᑫᒡ ᐁᑮ ᑲᑳᒋᐁᒃ᙮ ᒦᑕᔥ ᑳᐊᐲᒋᓇᐌᐁᒃ ᑭᑖᑮ ᒑᑭᐃᑯᐙ ᐄᑐᒃ᙮ 9 ᐊᐲ ᑮᐊᒀᒪᒋᐌᔮᓐ ᐃᐃ ᐗᒋᐤ ᒋᐅᑎᓇᒀ ᓇᐸᑳᐱᑲᓯᓃᒃ, ᐁᔑ ᐅᔑᐲᐃᑳᑌᓂᒃ ᑳᑎᐯᒋᑫᒡ ᑳᑮ ᐅᓇᑕᒪᐎᓀᑭᐸᓐ ᐅᑕᔓᑕᒫᑫᐎᓐ᙮ ᒦᑕᔥ ᐌᑎ ᑳᐊᔮᔮᓐ ᐗᑭᑕᑎᓐ ᓃᒥᑕᓇ 40 ᑕᓱ ᑮᔑᒃ, ᓃᒥᑕᓇ ᑕᓱ ᑎᐱᒃ ᑲᔦ᙮ ᑳᐐᓐ ᐃᑕᔥ ᓂᑮ ᐅᒋ ᐐᓯᓂᓰ, ᑳᐐᓐ ᑲᔦ ᓂᑮ ᐅᒋ ᒥᓂᑴᓰ᙮ 10 ᒦᑕᔥ ᑳᑎᐯᒋᑫᒡ ᑳᒦᔑᒡ ᓃᔑᓐ ᓇᐸᑳᐱᑲᓯᓃᐞ, ᐐᓐ ᐃᑯ ᑭᔐᒪᓂᑑ ᑳᑮ ᐃᔑ ᐅᔑᐲᐃᑫᒡ᙮ ᒦᔥ ᐃᐃᒫ ᑳᐃᔑ ᐅᔑᐲᐃᑳᑌᓂᑭᓐ ᑳᑎᐯᒋᑫᒡ ᐅᑎᓈᑯᓂᑫᐎᓇᓐ ᐁᑮᐃᓂᓀᑭᐸᓐ ᐌᑎ ᑭᒋ ᐗᒌᕽ ᐃᔥᑯᑌᕽ ᐁᑮ ᐅᒋ ᑮᑭᑐᐸᓐ, ᐊᐲ ᐁᑮᔑᑲᒃ ᓂᑕᒻ ᑳᑮ ᒫᐗᒋᐃᑎᔭᑭᐸᓐ᙮ 11 ᐁᐊᓂ ᐃᔥᒀᓭᒃ ᐃᑕᔥ ᓃᒥᑕᓇ 40 ᑕᓱ ᑮᔑᒃ, ᓃᒥᑕᓇ ᑲᔦ ᑕᓱ ᑎᐱᒃ ᒦᐃ ᑳᑎᐯᒋᑫᒡ ᑳᑮ ᒦᔑᒡ ᓃᔑᓐ ᓇᐸᑳᐱᑲᓯᓃᐞ ᐁᔑ ᐅᔑᐲᐃᑳᑌᓂᒃ ᑳᑮ ᐅᔑᑑᒡ ᐊᔓᑕᒫᑫᐎᓐ᙮ 12 ᒦᔥ ᐅᐅ ᑳᑎᐯᒋᑫᒡ ᑳᑮᐃᔑᒡ, ᒫᒑᓐ ᐌᔩᑉ ᓃᓵᒪᒋᐌᓐ, ᑭᐱᒫᑎᓰᒪᒃ ᐅᔕ ᐄᒋᐸᑮᕽ ᑳᑮ ᐅᒋ ᓵᑭᒋᐎᓇᑣ ᐐᑫ ᒪᒋᐃᔑᒋᑫᐗᒃ᙮ ᐁᑕᑕᐌ ᐐᐸ ᐅᓇᑲᑖᓈᐙ ᐃᐃ ᑳᑮ ᐃᓇᒀᐸᓐ ᒋᐃᔑᒋᑫᓯᒀᐸᓐ; ᑮᐅᔑᑕᒫᓱᐗᒃ ᐅᔕ ᐲᐙᐱᑯ ᒪᓂᑑᑳᓇᓐ᙮ 13 ᒦᔥ ᑳᐊᓂ ᐃᑭᑐᒡ, ᓂᐙᐸᒫᒃ ᓴ ᐃᑭ ᐯᒫᑎᓯᐙᒡ, ᑌᐺᓴ ᐁᑕᑕᐌ ᔕᔒᐱᑕᒧᒃ᙮ 14 ᑫᑯ ᑕᔥ ᐸᐹᒣᓂᒥᔑᑫᓐ, ᐁᐐ ᓂᔑᐗᓈᒋᐊᒀ, ᐁᐐ ᑮᓰᐊᒧᐗᒃ ᑲᔦ ᐅᐐᓱᐎᓂᐙᓐ ᐅᐅᒫ ᔒᐹᑮᔑᒃ᙮ ᑮᓐ ᐃᑕᔥ ᐐᓐ ᑭᑲ ᐃᔑᐃᓐ ᒋᒪᔥᑲᐌᑖᑯᓯᔭᓐ, ᒋᐹᑏᓄᐙᒡ ᑭᐲᐌᓰᒪᒃ ᐊᐲᒡ ᐐᓇᐙ ᐃᑭ ᐃᔅᕒᐃᔭᓬᐊᒃ, ᓂᑮᐃᒃ᙮ 15 ᒦᑕᔥ ᑳᐃᔑ ᑴᑮᔮᓐ ᐁᑮ ᓃᓴᒋᐌᔮᓐ ᐃᐃ ᑭᒋ ᐗᒋᐤ ᒣᒀ ᐁᐱᔅᑲᓀᒃ᙮ ᓂᑮ ᐱᒥᐎᓈᒃ ᐃᑕᔥ ᑲᔦ ᐃᑭ ᓃᔑᓐ ᓇᐸᑳᐱᑲᓯᓃᒃ ᐁᔑ ᐅᔑᐲᐃᑳᑌᓂᒃ ᐅᓇᔓᐌᐎᓐ᙮ 16 ᒦᑕᔥ ᑳᑮ ᐙᐸᒥᓇᑰᒃ ᑌᐺ ᐄᓴᓐ ᐁᑮ ᒪᒋᑑᑕᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ ᑭᑮ ᐅᔑᑕᒫᓱᒻ ᐄᓴᓐ ᐲᐙᐱᑯᐎ ᐱᔑᑮᑳᓐ; ᐋᐱᒋ ᐐᐸ ᐁᑮ ᓇᑲᑕᒧᐌᒃ ᑳᑎᐯᒋᑫᒡ ᑳᑮᐃᓂᓀᑭᐸᓐ ᒋᐃᔑᒋᑫᓯᐌᑭᐸᓐ᙮ 17 ᒦᑕᔥ ᐃᑭ ᓃᔑᓐ ᓇᐸᑳᐱᑲᓯᓃᒃ ᑳᑮ ᑕᑯᓇᒀ ᓂᓂᒌᕽ, ᑳᐃᔑ ᐊᐸᑭᓇᒀ ᐁᑮ ᐱᑭᔥᑭᔑᒪᒀ ᐁᔑᐊᔮᔦᒃ᙮ 18 ᒦᑕᔥ ᒦᓇᐙ ᑳᐃᔑ ᐸᑭᔑᓈᓐ ᐁᑮ ᐊᓂᒥᑯᑖᔮᓐ ᐁᓈᓴᒦᒡ ᑳᑎᐯᒋᑫᒡ ᓃᒥᑕᓇ 40 ᑕᓱ ᑮᔑᒃ, ᓃᒥᑕᓇ ᑲᔦ ᑕᓱ ᑎᐱᒃ᙮ ᑳᐐᓐ ᐃᑕᔥ ᓂᑮ ᐅᒋ ᐐᓯᓂᓰ, ᑳᐐᓐ ᑲᔦ ᓂᑮ ᐅᒋ ᒥᓂᑴᓰ ᐅᓵᒻ ᐋᓃᔥ ᐃᐃ ᑲᑭᓇ ᑳᑮ ᐃᔑ ᒪᒋᑑᑕᒣᒃ, ᐁᑮ ᐃᔑᒋᑫᐌᒃ ᒪᒋᑫᑰᓐ ᐁᓈᓴᒦᒡ ᑳᑎᐯᒋᑫᒡ᙮ ᒦᑕᔥ ᑳᑮ ᐅᒋ ᓂᔥᑭᐁᒃ᙮ 19 ᐐᑫ ᓴ ᓂᑮ ᑯᑕᒧᐙᓐ ᐅᓂᔥᑳᑎᓯᐎᓐ, ᐐᑫ ᐁᑮ ᐋᑯᑭᑖᓱᒡ ᑳᑎᐯᒋᑫᒡ, ᑮᐊᐲᒋᑭᑖᓱ ᓴ ᑯ ᒋᑮ ᒑᑭᐃᓀᑭᐸᓐ᙮ ᒦᓇᐙ ᑕᔥ ᑳᑎᐯᒋᑫᒡ ᓂᑮ ᐱᓯᑖᒃ᙮ 20 ᑳᑎᐯᒋᑫᒡ ᓴ ᐅᑮ ᐊᐲᒋ ᓂᔥᑭᐃᑰᓐ ᐁᕒᐊᓅᓐ Aaron ᒋᑮ ᓂᓵᐸᓐ; ᒦᔥ ᐃᐃ ᐊᐲ ᐁᕒᐊᓐ ᑳᑮ ᐊᓇᒥᐁᑕᒪᐗᒃ᙮ 21 ᒦᑕᔥ ᑳᑮ ᐅᑖᐱᓇᒫᓐ ᐃᐃ ᒪᒋᑫᑰᓐ ᑳᑮ ᐅᔑᑑᔦᒃ, ᐱᔑᑮᑳᓐ ᑳᑮ ᐅᔑᐁᒃ, ᐁᑮ ᒪᒍᑌ ᐌᐱᓇᒃ ᐁᑮ ᐲᓴᐗᒃ᙮ ᒦᔥ ᐐᑫ ᑳᐃᔑ ᐲᓯᐴᓇᒃ ᐲᓂᔥ ᐁᑮ ᒥᒋ ᐹᔥᑭᓀᓭᒡ᙮ ᒦᑕᔥ ᑳᐃᔑ ᐌᐱᓇᒫᓐ ᐃᐃ ᐹᔥᑭᓀᓭ ᐃᐃᒫ ᓰᐲᓯᕽ ᑳᑮ ᐅᒋᒋᐗᕽ ᐗᒌᕽ᙮ 22 ᐌᑎ ᑕᔥ ᑖᐯᕒᐊ Taberah ᐁᒋᑳᑌᒃ, ᒪᓴ Massah ᑲᔦ, ᐌᑎ ᑲᔦ ᑭᑉᕒᐋᑦ ᐊᑖᐊᐸ Kibroth Hattaavah ᑭᑮ ᐃᔑ ᓂᔥᑭᐋᐙ ᑳᑎᐯᒋᑫᒡ᙮ 23 ᐊᐲ ᓴ ᑕᔥ ᑳᑎᐯᒋᑫᒡ ᑮᐅᒋ ᒫᒋᓂᔕᐅᓀᒃ ᑲᑌᔥ ᐸᕒᓂᔭ Kadesh-Barnea ᐅᐅ ᑭᑮᐃᑯᐙ, ᒫᒑᒃ ᐃᑕᔥ ᐊᐎ ᑎᐱᓇᐌᐎᓯᒃ ᐃᐃ ᐊᑭ ᑳᑮ ᒦᓂᓇᑰᒃ, ᒦᑕᔥ ᑳᐃᔑ ᔕᔒᐱᑕᒧᐌᒃ ᐅᑎᓈᑯᓂᑫᐎᓇᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ ᑳᐐᓐ ᒋᑮ ᑌᐺᔦᓂᒣᒃ, ᑳᐐᓐ ᑲᔦ ᑭᑮ ᐱᓯᑕᐙᓯᐙᐙ᙮ 24 ᐌᑎ ᓴ ᐁᑮᔑᑲᒃ ᐌᒋ ᒫᒌ ᑭᑫᓂᒥᓇᑰᒃ ᑭᑑᒋ ᔕᔒᐱᑕᐙᐙ ᑳᑎᐯᒋᑫᒡ᙮ 25 ᒦᑕᔥ ᑳᑮ ᐅᒋ ᐊᓂᒥᑯᔑᓈᓐ ᓃᒥᑕᓇ 40 ᑕᓱ ᑮᔑᒃ, ᓃᒥᑕᓇ ᑕᓱ ᑎᐱᒃ ᑲᔦ ᐁᓈᓴᒦᒡ ᑳᑎᐯᒋᑫᒡ, ᐋᓃᔥ ᑳᑎᐯᒋᑫᒡ ᑮᐃᑭᑐᑯᐸᓐ ᐁᐐ ᓂᔑᐗᓈᒋᐃᓀᒃ᙮ 26 ᒦᔥ ᑳᑮ ᐊᓇᒥᐁᑕᐗᒃ ᑳᑎᐯᒋᑫᒡ ᐅᐅ ᐁᑮᐃᓇᒃ, ᐆ ᑌᐯᒋᑫᔭᓐ ᑭᔐᒪᓂᑑ, ᑫᑯ ᓂᔑᐗᓈᒋᐋᑫᓐ ᑭᐱᒫᑎᓰᒪᒃ, ᑮᓐ ᑌᐯᓂᒪᑣ, ᑭᑭᒋ ᐃᓀᑖᑯᓯᐎᓂᕽ ᑳᑮ ᐅᒋ ᔖᐾᐊᑣ, ᑭᒪᔥᑲᐎᓰᐎᓐ ᑲᔦ ᑮᐋᐸᒋᑖᐗᒡ ᑮᐅᒋ ᓵᑭᒋᐎᓇᑣ ᐄᒋᐸᑮᕽ᙮ 27 ᒫᒥᑲᐎᓄᑕᐤ ᑳᑮ ᐅᑕᓄᑮᐋᑲᓂᒥᔭᓐ ᐁᐸᕒᐊᐋᒻ Abraham, ᐋᐃᓯᒃ Isaac, ᐊᐊ ᑲᔦ ᒉᑲᑉ Jacob: ᑫᑯ ᑕᔥ ᐸᐹᐱᓯᔅᑫᑕᒧᐙᑫᓐ ᐁᔑ ᑲᑮᐹᑎᓯᐙᒡ ᐅᑯ ᐯᒫᑎᓯᐙᒡ, ᐃᐃ ᐁᔑ ᒪᒋᐃᔑᐌᐱᓯᐙᒡ, ᐃᐃ ᑲᔦ ᐁᔑ ᒪᒋᑑᑕᒧᐙᒡ᙮ 28 ᒫᑭᔖ ᓴ ᐅᐅ ᑕᐃᑭᑐᐗᒃ ᐌᑎ ᐁᔮᐙᒡ ᐊᑮᕽ ᑳᑮ ᐱᐅᒋ ᓵᑭᒋᐎᔑᔮᕽ, ᑳᑎᐯᒋᑫᒡ ᐅᔕ ᐁᑮ ᑲᔥᑭᑑᓯᒃ ᒋᐃᔑᐎᓈᒡ ᐌᑎ ᐊᑮᕽ ᑳᑮ ᐃᔑ ᐊᔓᑕᒪᐙᐸᓐ, ᐁᔒᑫᓂᒫᒡ ᑲᔦ, ᒦ ᓴ ᑳᑮ ᐅᒋ ᐃᔑᐎᓈᒡ ᐱᑾᑕᑲᒥᑯᕽ ᐁᐐ ᑕᔑ ᓂᓵᒡ᙮ 29 ᑮᓐ ᐄᑐᒃ ᐃᑭ ᑭᐱᒫᑎᓰᒪᒃ, ᑮᓐ ᑳᑎᐱᓇᐌᐎᓯᔭᓐ, ᑭᒪᔥᑲᐎᓰᐎᓐ ᐄᑐᒃ ᑭᑮ ᐋᐸᒋᑑᓐ, ᑭᓂᒃ ᑲᔦ ᑳᑮ ᔒᐱᓂᑫᓂᔭᓐ, ᑮᐃᑭᑐ ᒨᓯᔅ Moses᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society