ᑑᑕᕒᐋᓇᒦ 4 - ᐅᒋᐺ ᑭᒋᒪᓯᓇᐃᑲᓐᒨᓯᔅ ᑮᑲᓅᓈᒡ ᐃᔅᕒᐃᔭᓬᐊᐞ ᒋᓇᐃᑕᒥᓂᒡ 1 ᒨᓯᔅ Moses ᑕᔥ ᑮᐃᑭᑐ, ᐃᓇᔥᑫ ᑕᔥ ᓅᑯᒻ, ᑮᓇᐙ ᐃᔅᕒᐃᔭᓬᐊᒃ Israel, ᐱᓯᑕᒧᒃ ᐅᓄ ᐃᑭᑐᐎᓇᓐ, ᐃᓈᑯᓂᑫᐎᓇᓐ ᑲᔦ ᑳᑭᑭᓄᐊᒪᐎᓇᑰᒃ᙮ ᐃᔑᒋᑫᒃ ᐃᑕᔥ ᑲᔦ ᒋᐱᒫᑎᓯᔦᒃ, ᒋᐲᑎᑫᔥᑳᔦᒃ ᒋᐅᑖᐱᓇᒣᒃ ᒋᑎᐱᓇᐌᐎᓯᔦᒃ ᐃᐃ ᐊᑮᓂ ᑳᒦᓂᓀᒃ ᑳᑎᐯᒋᑫᒡ ᑳᑮ ᐅᑭᔐᒪᓂᑑᒥᐙᒡ ᑭᑫᑌᔭᐋᒥᐙᐸᓃᒃ᙮ 2 ᑫᑯ ᐊᐗᔑᒣ ᓇᑭᓇᑫᒃ ᑳᐃᓂᓇᑰᒃ, ᑫᑯ ᑲᔦ ᐊᒋᐎᓇᒧᑫᒃ᙮ ᐃᐃ ᓴ ᒋᑲᓇᐌᑕᒧᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐅᑎᓈᑯᓂᑫᐎᓇᓐ ᑳᐐᑕᒪᐎᓇᑰᒃ᙮ 3 ᑮᓇᐙ ᐄᑐᒃ ᐃᑯ ᑭᑮ ᐙᐸᑕᒧᐙᒻ ᑳᑮ ᐃᔑᒋᑫᒡ ᑳᑎᐯᒋᑫᒡ ᐌᑎ ᑭᒋ ᐗᒌᕽ ᐲᔭᕒ Peor ᐁᒋᑳᑌᓂᒃ᙮ ᐁᑕᔑᓂᒡ ᐄᑐᒃ ᐅᑮ ᓂᔑᐗᓈᒋᐋᐞ ᑳᑮ ᐱᒥᓂᔕᐙᓂᒡ ᒪᓂᑑᑳᓇᓐ ᐯᔭᓬ Baal ᐁᔑᓂᑳᓂᒥᓐᒡ᙮ 4 ᑮᓇᐙ ᑕᔥ ᐐᓐ ᑳᑮ ᑭᒋᐌᓂᒣᒃ ᐁᑮ ᑌᐺᔦᓂᒣᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑫᔮᐱ ᑭᐱᒫᑎᓯᒻ ᓅᑯᒻ ᑳᑮᔑᑲᒃ᙮ 5 ᐃᓇᔥᑫ ᑭᑮ ᑭᑭᓄᐊᒪᐎᓂᓂᒻ ᐃᑭᑐᐎᓇᓐ, ᐃᓈᑯᓂᑫᐎᓇᓐ ᑲᔦ, ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᐃᓇᓅᔑᒡ, ᒋᐃᔑᒋᑫᐌᒃ ᐃᐃᒫ ᑳᐐ ᐃᔑ ᐲᑎᑫᔥᑳᔦᒃ ᐊᑮᕽ ᑳᐐ ᑎᐱᓇᐌᐎᓯᔦᒃ᙮ 6 ᑑᑕᒧᐙᒃ ᐅᑎᓈᑯᓂᑫᐎᓇᓐ᙮ ᒦ ᓴ ᑕᔥ ᐅᐅᒫ ᑫᐅᒋ ᐯᑌᔮᐸᒥᓀᒀ ᑯᑕᒃ ᐯᒫᑎᓯᐙᒡ ᐋᓃᓐ ᐁᐲᒋ ᑲᑮᑖᐌᑕᒣᒃ᙮ ᐊᐲ ᓴ ᓅᑕᒧᐙᒡ ᐅᓄ ᑲᑭᓇ ᐃᓈᑯᓂᑫᐎᓇᓐ, ᑕᐃᑭᑐᐗᒃ ᐁᑕᑕᐌ ᓴ ᐅᑕᔮᓈᐙ ᑲᑮᑖᐌᑕᒧᐎᓐ, ᓂᓯᑐᑕᒧᐎᓐ ᑲᔦ ᐅᑯ ᑳᑭᒋ ᐃᓀᑖᑯᓯᐙᒡ ᐯᒫᑎᓯᐙᒡ᙮ 7 ᐊᔮᐗᒃ ᐃᓇᔥ ᑯᑕᒃ ᐯᑳᓉᐙᓇᑭᓯᐙᒡ ᐯᒫᑎᓯᐙᒡ ᒋᐊᐲᒋ ᑭᒋ ᐃᓀᑖᑯᓯᐙᐸᓐ ᒋᐊᔮᐙᐙᒡ ᒪᓂᑑᓐ ᐯᔓ ᑖᐱᔥᑰ ᑳᑎᐯᒋᑫᒡ ᑭᑭᔐᒪᓂᑑᒥᓈᓐ ᑳᔑ ᐯᔣᐸᒪᕽ ᐊᐲ ᑮᑲᓅᓇᕽ ᒋᐐᒌᐎᓇᕽ᙮ 8 ᐊᐌᓀᓇᒃ ᑕᔥ ᐃᑭ ᐸᑳᓐ ᑯᑕᒃ ᐯᑳᓉᐙᓇᑭᓯᐙᒡ ᐯᒫᑎᓯᐙᒡ ᐁᔮᐙᒡ ᐃᑭᑐᐎᓇᓐ, ᐃᓈᑯᓂᑫᐎᓇᓐ ᑲᔦ ᒋᔑ ᑾᔭᑴᑖᑾᓂᓂᑭᓐ ᐅᓄ ᑲᑭᓇ ᐃᓈᑯᓂᑫᐎᓇᓐ ᑳᐅᓇᑕᒪᐎᓇᑰᒃ ᓅᑯᒻ ᑳᑮᔑᑲᒃ᙮ 9 ᐊᔮᒀᒥᓯᒃ ᐃᑕᔥ ᐌᐌᓂ ᑲᔦ ᐃᔑᒋᑫᒃ ᒋᐗᓃᑫᓯᐌᒃ ᑫᑰᓇᓐ ᑳᑮ ᐙᐸᑕᒣᒃ, ᐋᓃᔥ ᒫᑭᔖ ᐗᓃᑫᔦᒃ ᐃᐃᒫ ᑭᑌᐃᐙᕽ, ᑳᐐᓐ ᒦᓇᐙ ᐐᑳ ᑭᑲ ᒫᒥᑲᐎᓰᒻ ᒥᓂᒃ ᑫᐱᒫᑎᓯᔦᒃ ᐅᐅᒫ ᐊᑮᕽ᙮ ᐅᐅᐌ ᓴ ᑕᔥ ᐃᔑᒋᑫᒃ, ᐊᓂ ᐐᑕᒪᐎᑾᒃ ᑭᓃᒑᓂᓯᐙᒃ, ᑫᓂ ᐅᓃᒑᓂᓯᐙᒡ ᑲᔦ ᒋᐊᓂ ᑭᑫᑕᒥᓂᒡ᙮ 10 ᐃᓇᔥᑫ ᒫᒥᑲᐎᒃ ᐊᐲ ᐁᑮᔑᑲᒃ ᑳᑮ ᓃᐸᐎᔦᑭᐸᓐ ᐁᓈᓴᒦᒡ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐌᑎ ᑭᒋ ᐗᒌᕽ ᐆᕒᐁᑉ Horeb ᑳᑮ ᐃᔑᓂᑳᑌᒃ᙮ ᒦᑕᔥ ᐅᐅ ᑳᐃᔑᐸᓐ ᑳᑎᐯᒋᑫᒡ, ᒫᐗᑑᓐ ᐯᒫᑎᓯᐙᒡ ᐃᐃᒫ ᑳᔑ ᐊᔮᐗᒃ, ᐁᐊᑕᐌᓂᒪᒀ ᒋᓅᑕᒧᐙᒡ ᓂᑎᑭᑐᐎᓇᓐ, ᒋᐅᒋ ᑭᑫᑕᒧᐙᒡ ᒋᑯᑖᓀᓂᒥᐙᒡ ᒥᓂᒃ ᐃᑯ ᑫᐱᒫᑎᓯᐙᒡ ᐅᐅᒫ ᐊᑮᕽ᙮ ᓂᓇᑕᐌᓂᒫᒃ ᑲᔦ ᒋᑭᑭᓄᐊᒪᐙᐙᒡ ᐅᓃᒑᓂᓯᐙᐞ᙮ 11 ᒦᑕᔥ ᐃᐃ ᑳᐃᔑᒋᑫᔦᒃ ᐯᔓ ᐁᑮ ᐲᔖᔦᒃ, ᐁᑮ ᐃᔑ ᓃᐸᐎᔦᒃ ᑳᔑ ᒫᒌᔮᒪᑎᓈᒃ ᑭᒋ ᐗᒋᐤ᙮ ᐁᑮ ᑭᒋ ᐱᔅᑲᓀᒃ ᐃᐃ ᑭᒋ ᐗᒋᐤ, ᐌᑎ ᐃᔥᐱᒥᕽ ᐁᑮ ᐃᓇᑯᓀᒃ ᐃᐃ ᐃᔥᑯᑌ᙮ ᐐᑫ ᑲᔦ ᐁᑮ ᐋᑲᐙᓇᑾᒃ, ᐐᑫ ᑲᔦ ᐁᑮ ᐋᑲᐙᐸᑌᒃ ᐃᐃ ᑭᒋ ᐗᒋᐤ᙮ 12 ᒦᔥ ᐅᐅ ᑳᑮᐃᓂᓀᒃ ᑳᑎᐯᒋᑫᒡ ᐃᐃᒫ ᐃᔥᑯᑌᕽ ᑮᐅᒋ ᑲᓅᓂᓀᒃ, ᐃᑭᑐᐎᓇᓐ ᓴ ᐁᑕ ᑭᑮ ᓅᑖᒻ, ᐁᑮ ᓅᑕᐌᒃ ᐊᐎᔭ ᐁᓅᑖᑯᓯᒡ, ᑳᐐᓐ ᑕᔥ ᐊᐎᔭ ᑭᑮ ᐙᐸᒫᓯᐙᐙ᙮ 13 ᒦ ᓴ ᑕᔥ ᐃᐃ ᑳᑮ ᐐᑕᒪᐎᓀᒃ ᐋᓃᓐ ᑫᔑ ᑲᓇᐌᑕᒧᐌᒃ ᐊᔓᑕᒫᑫᐎᓇᓐ ᑳᑮ ᐅᓇᑕᒪᐎᓀᒃ, ᒋᓇᐃᑕᒧᐌᒃ ᒥᑖᓱ 10 ᐃᓈᑯᓂᑫᐎᓇᓐ ᑳᑮ ᐅᔑᐲᐊᕽ ᐃᐃᒫ ᓇᐸᑳᐱᑲᓯᓃᕽ ᑳᑮ ᓃᔑᓂᒡ᙮ 14 ᒦᔥ ᑲᔦᐃ ᐊᐲ ᑳᑎᐯᒋᑫᒡ ᑳᑮ ᐊᓅᔑᐸᓐ ᒋᑭᑭᓄᐊᒪᐎᓇᑰᒃ ᐃᑭᑐᐎᓇᓐ, ᐃᓈᑯᓂᑫᐎᓇᓐ ᑲᔦ, ᑫᐃᔑᒋᑫᐌᒃ ᐃᒫ ᐊᑮᕽ ᑳᐊᓂ ᐃᔖᔦᒃ ᐁᐐ ᑎᐱᓇᐌᐎᓯᔦᒃ᙮ ᒨᓯᔅ ᑮᑲᓅᓈᒡ ᐃᔅᕒᐃᔭᓬᐊᐞ ᒋᒪᓂᑑᑫᓯᓂᒃ 15 ᑮᓇᐙ ᑕᔥ ᐊᔮᒀᒥᓯᒃ᙮ ᐁᑮ ᐙᐸᒫᓯᐌᒃ ᐃᑕᔥ ᐊᐎᔭ ᐊᐲ ᑮᑮᔑᑲᓂᓂᒃ ᑳᑎᐯᒋᑫᒡ ᐃᔥᑯᑌᕽ ᑮᐅᒋ ᑲᓅᓂᓀᒃ ᐌᑎ ᐆᕒᐁᑉ ᑳᐃᔑᓂᑳᑌᓂᒃ, 16 ᒦ ᓴ ᑕᔥ ᐃᐃ ᐃᔑ ᐊᔮᒀᒥᓯᒃ ᒋᓂᔑᐗᓈᒋᐃᑎᓱᓯᐌᒃ᙮ ᑫᑯ ᐅᔑᑕᒫᓱᑫᒃ ᒪᓂᑑᑳᓇᒃ ᐃᓂᓃᕽ, ᐃᑴᕽ ᑲᔦ ᒋᐃᔑᓈᑯᓯᐙᒡ᙮ 17 ᑳᐃᔑᓈᑯᓯᐙᒡ ᑲᔦ ᐊᐌᓀᓐ ᐃᑯ ᐊᔭᐋᐎᔕᒃ ᐃᐃᒫ ᐊᑮᕽ ᑳᐊᔮᐙᒡ, ᐃᑭ ᑲᔦ ᐱᓀᔒᔕᒃ ᑳᐸᐹᒥᓭᐙᒡ ᐃᔥᐱᒥᕽ᙮ 18 ᑫᑯ ᑲᔦ ᑳᐸᐹᒨᑌᐙᒡ ᑎᓄ ᐃᔑᐋᑫᒀᓂᒃ, ᑫᑯ ᑲᔦ ᐃᔑᐋᑫᒀᓂᒃ ᒋᐃᔑᓈᑯᓯᐙᒡ ᑖᐱᔥᑰ ᑭᓅᔐᕽ᙮ 19 ᐊᔮᒀᒥᓯᒃ ᑲᔦ ᐊᐲ ᑮᐃᓈᐱᔦᒃ ᐃᔥᐱᒥᕽ ᑮᐙᐸᒣᒃ ᑮᓯᔅ, ᑎᐱᑭᑮᓯᔅ ᑲᔦ, ᑲᑭᓇ ᑲᔦ ᐗᓇᑯᔕᒃ, ᒋᔑ ᒫᒌᔥᑳᓯᐌᒃ ᐃᐃ ᓇᑫ ᒋᐊᓇᒥᐁᑕᐙᓯᐌᒀ, ᑫᑯ ᑲᔦ ᐸᒦᑕᐙᑫᒀᓂᒃ᙮ ᑳᑎᐯᒋᑫᒡ ᑭᑭᔐᒪᓂᑑᒥᐙ ᐄᑐᒃ ᐅᑮ ᐸᑭᑎᓈᐞ ᐅᐅ ᐋᓂᑕ ᐯᒫᑎᓯᓂᒡ ᐅᐅᒫ ᐊᑮᕽ ᑳᐊᔮᓂᒡ ᒋᐊᓇᒥᐁᑕᐙᓂᒡ᙮ 20 ᑮᓇᐙ ᑕᔥ ᐐᓐ ᑳᑎᐯᒋᑫᒡ ᑭᑮ ᐅᑖᐱᓂᑯᐙ, ᐁᑮ ᓵᑭᒋᐎᓂᓀᒃ ᐌᑎ ᐄᒋᐸᑮᕽ Egypt ᐲᐙᐱᑯ ᐴᑕᐙᓈᐱᑯᕽ ᑳᑮ ᐃᓀᑖᑾᓂᓂᒃ, ᐐᓐ ᐃᑯ ᐁᐐ ᑎᐱᓇᐌᐎᓰᒥᓀᒃ ᑳᐱᒫᑎᓯᔦᒃ ᓅᑯᒻ ᑳᑮᔑᑲᓂᓂᒃ ᐁᐃᔑᐊᔮᔦᒃ᙮ 21 ᑳᑎᐯᒋᑫᒡ ᑕᔥ ᓃᓐ ᓂᑮ ᒫᓈᐸᒥᒃ ᑮᓇᐙ ᐅᒋ᙮ ᒦᑕᔥ ᑳᑮ ᐃᔑ ᐋᔩᒋᑮᔗᒡ ᒋᐋᔕᐎᔥᑳᐙᓯᐗᒃ ᐃᐃ ᒞᕒᑕᓐ Jordan ᓰᐱ, ᒋᐲᑎᑫᔥᑳᓯᐗᒃ ᐃᐃ ᐊᑮᓂ ᑳᐅᓂᔑᔑᓂᓂᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᐐ ᒦᓂᓀᒃ ᒋᑎᐯᑕᒧᐌᒃ᙮ 22 ᐅᐅᒫ ᑕᔥ ᓃᓐ ᐃᓇᑫ ᐊᑮᕽ ᓂᑲ ᑕᔑ ᐃᔥᒀ ᐱᒫᑎᔅ, ᑳᐐᓐ ᓂᑲ ᐋᔕᐎᔥᑳᓰ ᐃᐃ ᒞᕒᑕᓐ ᓰᐱ᙮ ᑮᓇᐙ ᑕᔥ ᑭᑲ ᐋᔕᐎᔥᑳᒻ ᒋᑎᐱᓇᐌᐎᓯᔦᒃ ᐃᐃ ᑳᐅᓂᔑᔑᒃ ᐊᑭ᙮ 23 ᐌᐌᓂ ᑕᔥ ᐊᔮᒀᒥᓯᒃ, ᒋᐗᓃᑫᓄᑕᒧᐙᓯᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᐃᓇᑕᒪᐎᓀᒃ ᐃᐃ ᐊᔓᑕᒫᑫᐎᓐ᙮ ᑭᑮ ᐅᒋᐃᑰᒻ ᐄᑐᒃ ᒋᐅᔑᑕᒫᑎᓱᓯᐌᒃ ᐋᓃᓐ ᐃᑯ ᒋᐃᔑᓈᑯᓯᓯᒀ ᒪᓂᑑᑳᓇᒃ᙮ 24 ᑳᑎᐯᒋᑫᒡ, ᑭᑭᔐᒪᓂᑑᒥᐙ ᐋᓃᔥ ᑖᐱᔥᑰ ᐃᓀᑖᑯᓯ ᐃᔥᑯᑌ ᑳᐊᒀᑭᓱᐌᒪᑲᒃ, ᑳᐐᓐ ᐅᔕ ᐅᒪᓈᒋᐋᓰᐞ ᑳᑲᑴ ᓈᐱᔥᑳᑯᒡ᙮ 25 ᐊᐲ ᑭᓉᔥ ᑮᑖᓄᑕᒣᒃ ᐃᐃ ᐊᑭ, ᐊᓂ ᐊᔮᐌᒀ ᑕᔥ ᑫᐅᓃᒑᓂᓯᔦᒃ, ᑫᐅᔫᔑᓯᔦᒃ ᑲᔦ, ᑮᔥᐱᓐ ᐃᑕᔥ ᐊᓂ ᒪᒋᐃᔑᐌᐱᓯᔦᒃ, ᐊᓂ ᐅᔑᐁᒀ ᑕᔥ ᑲᔦ ᒪᓂᑑᑳᓇᒃ, ᐊᓅᒋᑯ ᑲᔦ ᐊᓂ ᐃᔑᒋᑫᔦᒃ ᐁᓈᓴᒦᒡ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᒦ ᓴ ᐃ ᒋᓂᔥᑭᐁᒃ᙮ 26 ᓂᑲᓅᑖᓐ ᓴ ᑮᔑᒃ, ᐊᑭ ᑲᔦ ᒋᑎᐹᒋᒥᑯᔦᒃ ᓅᑯᒻ ᑳᑮᔑᑲᒃ, ᑮᔥᐱᓐ ᔕᔒᐱᑕᐎᔦᒃ, ᑳᐐᓐ ᑭᓉᔥ ᑭᑲ ᐊᔮᓰᒻ ᐃᐃᒫ ᐊᑮᕽ᙮ ᑳᐐᓐ ᓴ ᑭᓉᔥ ᑭᑲ ᑖᓄᑕᓰᒻ ᐃᐃ ᐊᑭ ᐊᑳᒥᕽ ᒞᕒᑕᓐ ᐁᔮᒃ ᑳᐐ ᐊᐎ ᑖᓄᑕᒣᒃ, ᐐᑫ ᓴ ᑭᑲ ᓂᔑᐗᓈᒋᐃᑰᒻ᙮ 27 ᑳᑎᐯᒋᑫᒡ ᓴ ᒥᓯᐌ ᑭᑲ ᐃᔑ ᐅᓶᓂᑯᐙ ᐁᔑᐊᔮᓂᒡ ᑯᑕᒃ ᐯᒫᑎᓯᓂᒡ, ᐋᐱᒋ ᑕᔥ ᐸᑮ ᐁᑕ ᑭᑲ ᐃᔥᑯ ᐱᒫᑎᓯᒻ ᐁᔑᐊᔮᐙᒡ ᑯᑕᒃ ᐯᒫᑎᓯᐙᒡ ᑳᑎᐯᒋᑫᒡ ᑳᐐ ᐃᔑᐎᓂᓀᒃ᙮ 28 ᒦᑕᔥ ᐌᑎ ᑫᑕᔑ ᐊᓇᒥᐁᑕᐌᒀ ᒪᓂᑑᑳᓇᒃ ᒥᑎᑯᕽ, ᑯᒫ ᑲᔦ ᐊᓯᓃᕽ ᑳᐅᒋ ᐅᔑᐃᑣ᙮ ᑳᐐᓐ ᐄᑐᒃ ᐙᐱᓰᐗᒃ, ᑳᐐᓐ ᑲᔦ ᓅᑕᓰᐗᒃ, ᑳᐐᓐ ᑲᔦ ᐐᓯᓂᓰᐗᒃ, ᑳᐐᓐ ᑲᔦ ᒥᓈᒋᑫᓰᐗᒃ᙮ 29 ᒦᑕᔥ ᐌᑎ ᑫᔑ ᑲᑴ ᒥᑲᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᑭᑲ ᒥᑲᐙᐙ ᑕᔥ ᑮᔥᐱᓐ ᑯᑕ ᐁᓂᑯᑯᑌᐁᔦᒃ ᓇᓈᑐᓀᐌᒃ᙮ 30 ᐊᐲ ᓴ ᐗᓯᑖᐎᓭᔦᒃ, ᑲᑭᓇ ᑲᔦ ᐅᓄ ᐅᑎᓯᑯᔦᒃ ᐌᑎ ᐊᓂ ᑲᑮᔑᑲᒃ, ᒦ ᓴ ᐃ ᒋᑮᐌᓄᑕᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᒦᔥ ᑲᔦ ᒋᓇᐃᑕᐌᒃ᙮ 31 ᑳᑎᐯᒋᑫᒡ ᐅᔕ ᑭᑭᔐᒪᓂᑑᒥᐙ ᐁᑎᓄᐎᒡ ᑳᑰᐹᓯᓈᑫᒡ᙮ ᑳᐐᓐ ᓴ ᑭᑲ ᓇᑲᓂᑯᓰᐙ, ᑳᐐᓐ ᑭᑲ ᓂᔑᐗᓈᒋᐃᑯᓰᐙ᙮ ᑳᐐᓐ ᑲᔦ ᑕᐗᓃᑫᓰ ᐐᓐ ᐃᑯ ᑳᑮ ᐊᔩᒋ ᐊᔓᑕᒪᐙᑯᐸᓀᓐ ᑭᑫᑌᔭᐋᒥᐙᐸᓃᐞ᙮ 32 ᐅᑖᓈᕽ ᐃᑕᔥ ᐃᓇᑫ ᒋᑆ ᓂᑖᐎᑭᔦᒃ ᐃᔑ ᐊᑕ ᑭᑫᒋᑫᒃ, ᐌᑎ ᐱᑯ ᑲᔦ ᒫᐗᒡ ᐅᑖᓈᕽ ᐊᐲ ᐁᑮᔑᑲᒃ ᑭᔐᒪᓂᑑ ᑮᐅᔑᐋᑯᐸᓀᓐ ᐃᓂᓂᐗᓐ ᐅᐅᒫ ᐊᑮᕽ᙮ ᒥᓯᐌ ᓴ ᐁᑯ ᑳᐱᔑ ᑮᔑᑲᒃ ᐃᔑᑲᑴᑗᓐ᙮ ᐐᑳ ᓇ ᑫᑰᓐ ᐅᐅ ᑮᐱ ᑭᒋ ᐃᔑᓭ? ᐐᑳ ᓇ ᐅᐅ ᑫᑰᓐ ᑮᐱ ᐃᓂᑖᑳᓂᐗᓐ? 33 ᐐᑳ ᓇ ᐊᐎᔭᒃ ᐯᒫᑎᓯᐙᒡ ᐅᑮ ᐱ ᓅᑕᐙᐙᓐ ᑭᔐᒪᓂᑑᓐ ᒣᑴ ᐃᔥᑯᑌᕽ ᒋᐅᒋ ᑲᓅᓂᑯᐙᒡ, ᒋᐱᒫᑎᓯᐙᐸᓐ ᐃᑕᔥ ᑖᐱᔥᑰ ᑮᓇᐙ ᑳᑮ ᐃᔑᓭᔦᒃ? 34 ᐐᑳ ᓇ ᐸᑳᓐ ᒪᓂᑑ ᐅᐱ ᑲᑴᒋᑑᓐ ᐯᒫᑎᓯᓂᒡ ᒋᐅᒋ ᐅᑖᐱᓇᒫᓱᒡ ᐁᔑᐊᔮᓂᒡ ᑯᑕᒃ ᐯᒫᑎᓯᓂᒡ, ᐐᓐ ᐃᑕᔥ ᐃᑯ ᐁᐐ ᑎᐱᓇᐌᐎᓯᒡ᙮ ᒦ ᐃᐌ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᑮ ᑑᑕᐎᓀᒃ ᐄᒋᐸᑮᕽ᙮ ᑭᑮ ᐙᐸᑕᒧᐙᒻ ᐄᑐᒃ ᑳᑮ ᐃᔑ ᑲᑴᒋᐃᐌᒡ, ᑳᑮ ᐃᔑ ᒪᒫᑖᐎᒋᑫᒡ, ᑳᑮ ᐃᔑ ᒫᒪᑳᒋᒋᑫᒡ, ᑳᑮ ᐃᔑ ᒦᑳᓱᒡ, ᐁᑮ ᐋᐸᒋᑑᒡ ᐅᓂᓐᒡ ᑫᒋ ᒪᔥᑲᐌᑖᑾᓂᓂᒃ᙮ 35 ᑮᓇᐙ ᐄᑐᒃ ᐅᐅ ᑭᑮ ᐃᔑ ᐙᐸᑕᐃᑰᒻ ᒋᑭᑫᓂᒣᒃ ᑳᑎᐯᒋᑫᒡ, ᐐᓐ ᐁᑭᔐᒪᓂᑑᐎᒡ᙮ ᑳᐐᓐ ᑯᑕᒃ ᒪᓂᑑᓐ ᐊᔮᓰᐗᓐ᙮ 36 ᑭᑮ ᐸᑭᑎᓂᑯᐙ ᓴ ᑭᒋ ᑮᔑᑯᕽ ᒋᐅᒋ ᓅᑕᐌᒃ, ᒋᑭᑭᓄᐎᓂᓀᒃ; ᐊᑮᕽ ᐃᑕᔥ ᐐᓐ ᑭᑮ ᐸᑭᑎᓂᑯᐙ ᒋᐙᐸᑕᒧᐌᒃ ᐅᑭᒋ ᐃᔥᑯᑌᒻ, ᒣᑴ ᐃᔥᑯᑌᕽ ᑭᑮ ᐅᒋ ᓅᑕᐙᐙ ᐁᑲᓅᓂᓀᒃ᙮ 37 ᐁᑮ ᓵᑭᐋᒡ ᐃᑕᔥ ᑭᑫᑌᔭᐋᒥᐙᐸᓃᐞ, ᒦ ᓴ ᐃ ᑳᑮ ᐅᒋ ᐅᓈᐸᒫᒡ ᐅᐲᐌᓰᒥᓂ᙮ ᐐᓐ ᐃᑕᔥ ᐃᑯ ᑭᑮ ᐐᒌᐎᑯᐙ ᐄᒋᐸᑮᕽ ᑮᐅᒋ ᓵᑭᒋᐎᓂᓀᒃ ᑮᐋᐸᒋᑑᒡ ᐅᑭᒋ ᒪᔥᑲᐎᓰᐎᓐ᙮ 38 ᐁᐐ ᓵᑭᑖᒪᐙᒡ ᐁᓂ ᐃᔖᐌᒃ ᑯᑕᒃ ᐯᒫᑎᓯᓂᒡ ᓇᐗᒡ ᐯᔮᑏᓄᓂᒡ, ᓇᐗᒡ ᑲᔦ ᒣᔥᑲᐌᑖᑯᓯᓂᒡ ᐊᐲᒡ ᑮᓇᐙ, ᐁᐐ ᐃᔑᐎᓂᓀᒃ ᒋᐲᑎᑫᔥᑳᐌᒃ ᐅᑕᑮᒥᓃᕽ ᑮᓇᐙ ᐁᐐ ᒦᓂᓀᒃ ᒋᑎᐱᓇᐌᐎᓯᔦᒃ᙮ 39 ᑭᑫᑕᒧᒃ ᐃᑕᔥ ᓅᑯᒻ ᑳᑮᔑᑲᒃ, ᑭᑌᐃᐙᕽ ᐃᔑ ᑭᑫᑕᒧᒃ ᑳᑎᐯᒋᑫᒡ ᐐᓐ ᐁᑭᔐᒪᓂᑑᐎᒡ ᐌᑎ ᐹᔑᒋ ᐃᔥᐱᒥᕽ, ᐌᑎ ᑲᔦ ᐊᓈᒥᕽ ᐃᓇᑫ ᐊᑮᕽ; ᑳᐐᓐ ᓴ ᑯᑕᒃ ᒪᓂᑑ ᐊᔮᓰ᙮ 40 ᐃᔑᒋᑫᐙᒃ ᓴ ᑕᔥ ᐁᔑᓯᓂᓂᒃ ᐅᑎᑭᑐᐎᓇᓐ, ᐅᑎᓈᑯᓂᑫᐎᓇᓐ ᑲᔦ, ᓅᑯᒻ ᑳᑮᔑᑲᒃ ᑳᐐᑕᒪᐎᓇᑰᒃ, ᒦᑕᔥ ᐃᐃ ᒋᒥᓄᓭᔦᒃ ᑭᓃᒑᓂᓯᐙᒃ ᑲᔦ, ᑰᔑᓯᐙᒃ ᑲᔦ ᑫᓂ ᐊᔮᐙᒡ ᑮᐃᔥᒀ ᐊᔮᔦᒃ᙮ ᑭᓉᔥ ᐃᑕᔥ ᑭᑲ ᐱᒫᑎᓯᒻ ᐃᐃᒫ ᐊᑮᕽ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᒦᓂᓀᒃ ᒨᔕᒃ ᐃᑯ ᐁᓂ ᐊᔮᔦᒃ, ᑮᐃᑭᑐ ᒨᓯᔅ Moses᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society