ᑑᑕᕒᐋᓇᒦ 30 - ᐅᒋᐺ ᑭᒋᒪᓯᓇᐃᑲᓐᐋᓃᓐ ᑫᑮᐃᔑᒋᑫᓈᓂᐗᑭᐸᓐ ᒋᔕᐌᑖᑯᓯᕽ 1 ᐃᓇᔥᑫ ᑕᔥ ᐋᔕ ᑭᑮ ᒦᓂᓂᓂᒻ ᑮᓇᐙ ᐱᑯ ᒋᐅᓀᑕᒫᓱᔦᒃ ᐁᑕᐌᑕᒧᐌᑴᓐ ᒋᔕᐌᑖᑯᓯᔦᒃ, ᑯᒫ ᑲᔦ ᐁᑕᐌᑕᒧᐌᑴᓐ ᒋᒪᒐᑭᒥᑰᔦᒃ᙮ ᐊᐲ ᑕᔥ ᐃᔑᑖᔦᒃ ᐌᑎ ᑳᔑ ᐊᔮᐙᒡ ᑳᐯᐸᑳᓉᐙᓇᑭᓯᐙᒡ ᐯᒫᑎᓯᐙᒡ, ᑳᑮ ᐃᔑ ᐅᓶᓂᓀᒃ ᑳᑎᐯᒋᑫᒡ, ᐅᐅ ᑕᔥ ᐃᔑᓭᔦᒃ, ᒦᑕᔥ ᐃᐃ ᒋᒫᒥᑲᐎᔦᒃ ᐋᓃᓐ ᑳᑮ ᐃᔑ ᒦᓂᓇᑰᒃ ᒋᔑ ᐅᓀᑕᒫᓱᔦᒃ᙮ 2 ᑮᔥᐱᓐ ᑕᔥ ᑮᓇᐙ, ᐃᑭ ᑲᔦ ᑭᐲᐌᓰᒥᐙᒃ ᑮᐌ ᓈᓯᑲᐌᒃ ᑳᑎᐯᒋᑫᒡ, ᐗᐐᑫ ᒥᓯᐌ ᑭᑌᐃᐙᕽ ᐅᒋ ᓇᐃᑕᒧᐌᒃ ᐅᑎᓈᑯᓂᑫᐎᓇᓐ ᐅᓄ ᑳᐐᑕᒪᐎᓇᑰᒃ ᓅᑯᒻ ᑳᑮᔑᑲᒃ᙮ 3 ᒦᑕᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒋᑮᐌ ᒥᓄᓭᐃᓀᒃ, ᒋᑭᑎᒫᑭᓇᐎᓀᒃ ᑲᔦ᙮ ᒥᓯᐌ ᓴ ᑳᑮ ᐊᔨᔑ ᐅᓶᓂᓀᑭᐸᓐ ᑳᔑ ᐊᔮᓂᒡ ᐯᑳᓉᐙᓇᑭᓯᓂᒡ ᐯᒫᑎᓯᓂᒡ, ᑭᑲ ᐅᒋ ᑮᐌ ᒫᒨᔕᑭᓂᑯᐙ ᑲᑭᓇ ᑳᑕᔑᔦᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ 4 ᒥᓴᐙ ᑯ ᑮᔥᐱᓐ ᑮᐃᔑᐎᓂᑰᔦᑭᐸᓐ ᒫᐗᒡ ᐃᑯ ᑳᔑ ᐗᐙᓴᐗᕽ ᐅᐅ ᐊᑭ, ᒦ ᓴ ᐌᑎ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑫᐅᒋ ᒫᐗᑑᓂᓀᒃ, ᒦ ᑲᔦ ᐌᑎ ᑫᐅᒋ ᐲᓂᓀᒃ᙮ 5 ᑳᑎᐯᒋᑫᒡ ᑭᑭᔐᒪᓂᑑᒥᐙ ᑕᔥ ᑭᑲ ᐱ ᐃᔑᐎᓂᑯᐙ ᐃᐃᒫ ᐊᑮᕽ ᑭᑫᑌᔭᐋᒥᐙᐞ ᑳᑮ ᑎᐱᓇᐌᐎᓯᓂᒡ, ᑮᓇᐙ ᒋᑎᐱᓇᐌᐎᓯᔦᒃ᙮ ᑭᑲ ᐃᔑᐃᑯᐙ ᑲᔦ ᓇᐗᒡ ᑮᓇᐙ ᒋᒥᓄᓭᐌᒃ, ᓇᐗᒡ ᑲᔦ ᒋᐹᑏᓄᐌᒃ ᐊᐲᒡ ᐐᓐ ᐃᐃ ᑳᑮ ᑕᔑᓂᒡ ᑭᑫᑌᔭᐋᒥᐙᐸᓃᐞ᙮ 6 ᒦᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒋᐃᔑᐃᓀᒃ, ᑭᐲᐌᓰᒥᐙᐞ ᑲᔦ ᒋᓇᐃᑕᒧᐌᒃ ᑭᑌᐃᐙᕽ᙮ ᒦ ᓴ ᑕᔥ ᐃᐃ ᒋᓵᑭᐁᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒥᓯᐌ ᑯ ᑭᑌᐃᐙᕽ, ᒥᓯᐌ ᑲᔦ ᑭᑕᒑᑯᐙᕽ ᑮᓇᐙ ᒋᐅᒋ ᐱᒫᑎᓯᔦᒃ᙮ 7 ᒦᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒣᔥᑾᒡ ᒋᐃᔑᐋᒡ ᑳᔒᑫᓂᒥᒥᓀᒃ, ᑳᑲᒀᑕᑭᐃᒥᓀᒃ ᑲᔦ ᒋᐸᑲᒥᔥᑳᑯᓂᒡ ᐃᐃ ᑳᑮ ᐃᔑ ᓂᐳᐗᑭᒥᑰᔦᑭᐸᓐ᙮ 8 ᒦᑕᔥ ᒦᓇᐙ ᒋᓇᐃᑕᒧᐌᒃ ᑳᑎᐯᒋᑫᒡ ᑳᐃᓂᓀᒃ, ᒋᑲᓇᐌᑕᒧᐌᒃ ᑲᔦ ᑲᑭᓇ ᐅᑎᓈᑯᓂᑫᐎᓇᓐ ᑳᐐᑕᒪᐎᓇᑰᒃ ᓅᑯᒻ ᑳᑮᔑᑲᒃ᙮ 9 ᑳᑎᐯᒋᑫᒡ ᑭᑭᔐᒪᓂᑑᒥᐙ ᓴ ᑕᔥ ᑲᔦ ᑭᑲ ᐃᔑᐃᑯᐙ ᐗᐐᑫ ᒋᐌᓅᒋ ᒥᓄᓭᐌᒃ, ᑲᑭᓇ ᑫᑰᓐ ᑭᓂᒌᐙᕽ ᑳᐅᒋ ᐃᔑᒋᑫᐌᒃ᙮ ᑭᑲ ᐃᔑᐃᑯᐙ ᑲᔦ ᒋᓂ ᐹᑏᓄᓂᒡ ᑭᓃᒑᓂᓯᐙᐞ, ᒋᓂ ᐹᑏᓄᓂᒡ ᑲᔦ ᑭᐱᔑᑮᒥᐙᐞ᙮ ᒦᑕᔥ ᐯᔑᑾᓐ ᑫᑑᑕᕽ ᑭᑭᑎᑳᓇᑲᒥᑯᐙᓐ ᒋᐌᓅᒋ ᓂᑖᐎᑭᒋᑫᒪᑲᓂᓂᑭᓐ᙮ ᑳᑎᐯᒋᑫᒡ ᐅᔕ ᑕᒥᓉᑕᒻ ᒦᓇᐙ ᒋᒥᓄᓭᐃᓀᒃ, ᑖᐱᔥᑰ ᑳᑮ ᐃᔑ ᒥᓉᑕᕽ ᐁᒥᓄᓭᐋᒡ ᑳᑮ ᐅᑫᑌᔭᐋᒥᔦᒃ᙮ 10 ᑮᔥᐱᓐ ᑯᑕ ᓇᐃᑕᒧᐌᒃ ᐋᓃᓐ ᐁᓂᓀᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᒋᑲᓇᐌᑕᒧᐌᒃ ᐅᑎᓈᑯᓂᑫᐎᓇᓐ, ᐅᑎᑭᑐᐎᓇᓐ ᑲᔦ ᑳᐅᔑᐲᐃᑳᑌᓂᑭᓐ ᐃᐃᒫ ᒪᓯᓇᐃᑲᓂᕽ ᑳᔑ ᐅᔑᐲᐃᑳᑌᓂᒃ ᐅᓇᔓᐌᐎᓐ᙮ ᑮᔥᐱᓐ ᑯᑕ ᐃᔑ ᑴᑮᑕᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ ᒥᓯᐌ ᑯ ᑭᑌᐃᐙᕽ, ᒥᓯᐌ ᑯ ᑲᔦ ᑭᑕᒑᑯᐙᕽ᙮ 11 ᐅᐅᐌ ᓴ ᐃᓈᑯᓂᑫᐎᓐ ᑳᐐᑕᒪᐎᓇᑰᒃ ᓅᑯᒻ ᑳᑮᔑᑲᒃ ᑳᐐᓐ ᑭᑲ ᓴᓇᑫᑕᓰᒻ, ᑳᐐᓐ ᑲᔦ ᐙᓴ ᐊᔮᒪᑲᓯᓅᓇᓐ᙮ 12 ᑳᐐᓐ ᑲᔦ ᑭᒋ ᑮᔑᑯᕽ ᐊᔮᓯᓅᓐ ᑮᓇᐙ ᒋᐅᒋ ᐃᑭᑐᔦᑭᐸᓐ, ᐊᐌᓀᓐ ᐃᑕᔥ ᐃᓈ ᑫᐃᔖᐸᓐ ᐃᔥᐱᒥᕽ ᑭᒋ ᑮᔑᑯᕽ ᒋᓈᓯᑲᑭᐸᓐ, ᑫᐱᓯᑕᒪᑭᐸᓐ, ᒋᑑᑕᒧᐗᑭᐸᓐ ᑲᔦ ᐁᔑᓯᓂᓂᒃ᙮ 13 ᑳᐐᓐ ᑲᔦ ᐊᑳᒥᕽ ᑭᒋᑲᒦᕽ ᐊᔮᓯᓅᓐ ᒋᐅᒋ ᐃᑭᑐᔦᑭᐸᓐ, ᐊᐌᓀᓐ ᐃᑕᔥ ᐊᑳᒥᕽ ᑫᐃᔖᐸᓐ ᑭᒋᑲᒦᕽ ᒋᓈᓯᑲᑭᐸᓐ ᒋᐲᑕᒪᐎᓇᕽ ᑕᔥ ᒋᐱᓯᑕᒧᐗᕽ, ᒋᑑᑕᒧᐗᑭᐸᓐ ᑲᔦ? 14 ᐃᐃᐌᓂ ᑕᔥ ᐐᓐ ᑭᔐᒪᓂᑑ ᐅᑎᑭᑐᐎᓐ ᑭᐯᔣᐸᑕᒧᐙᒻ, ᑭᑑᓂᐙᕽ ᐄᑐᒃ ᑭᑕᔮᒻ, ᑭᑌᐃᐙᕽ ᑲᔦ, ᑮᓇᐙ ᒋᑲᔥᑭᑑᔦᒃ ᒋᑑᑕᒧᐌᒃ᙮ 15 ᐃᓇᔥᑫ ᑕᔥ ᑭᐙᐸᑖᒻ ᓅᑯᒻ ᑳᑮᔑᑲᒃ ᐁᐸᑭᑎᓇᒪᐎᓇᑰᒃ ᒋᐅᓀᑕᒫᓱᔦᒃ ᐌᑯᓀᓐ ᐁᑕᐌᑕᒣᒃ, ᐱᒫᑎᓯᐎᓐ ᑯᒫ ᑲᔦ ᓂᐳᐎᓐ; ᑳᐅᓂᔑᔑᕽ ᑯᒫ ᑲᔦ ᑳᒫᓈᑕᒃ᙮ 16 ᑮᔥᐱᓐ ᓴ ᓇᐃᑕᒧᐌᒃ ᐅᑎᓈᑯᓂᑫᐎᓇᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑳᐐᑕᒪᐎᓇᑰᒃ ᓅᑯᒻ ᑳᑮᔑᑲᒃ, ᑮᔥᐱᓐ ᑲᔦ ᓵᑭᐁᒃ, ᓇᐃᑕᒧᐌᒃ ᑲᔦ, ᑲᓇᐌᑕᒧᐌᒃ ᐃᑕᔥ ᑲᔦ ᑲᑭᓇ ᐅᑎᓈᑯᓂᑫᐎᓇᓐ, ᒦ ᓴ ᐃ ᒋᒥᓄᓭᔦᒃ, ᒦᑲᔦᐃ ᒋᓂ ᐹᑏᓄᔦᒃ ᑳᑕᔑᔦᒃ᙮ ᑳᑎᐯᒋᑫᒡ ᑭᑭᔐᒪᓂᑑᒥᐙ ᓴ ᑭᑲ ᒥᓄᓭᐃᑯᐙ ᐃᐃᒫ ᐊᑮᕽ ᑳᐐ ᑎᐱᓇᐌᐎᓯᔦᒃ᙮ 17 ᑮᔥᐱᓐ ᑕᔥ ᐐᓐ ᔕᔒᐱᑕᐌᒃ, ᐐᐱᓯᑕᓯᐌᒃ ᑲᔦ, ᐃᔑ ᐐᑯᔥᑳᔦᒃ ᐃᑕᔥ ᑲᔦ ᒋᐊᓇᒥᐁᑕᐌᒀ ᑯᑕᒃ ᐸᑳᓐ ᒪᓂᑑᒃ ᐐᐊᓄᑮᑕᐌᒀ ᑲᔦ, 18 ᒦᑕᔥ ᑫᑫᑦ ᐁᔑ ᐐᑕᒪᐎᓇᑰᒃ ᓅᑯᒻ ᑳᑮᔑᑲᒃ, ᒦ ᓴ ᐃ ᒋᓂᔑᐗᓈᒋᐃᑰᔦᒃ᙮ ᑳᐐᓐ ᑕᔥ ᑭᓉᔥ ᑭᑲ ᐱᒫᑎᓯᓰᒻ ᐌᑎ ᐊᑮᕽ ᑳᐃᔖᔦᒃ ᐊᑳᒥᓰᐱ ᒞᕒᑕᓐ Jordan᙮ 19 ᒦᔥ ᒋᑲᓅᑕᒫᓐ ᐃᐃ ᑮᔑᒃ, ᐃᐃ ᑲᔦ ᐊᑭ ᒋᑎᐹᒋᒥᑯᔦᒃ ᓅᑯᒻ ᑳᑮᔑᑲᒃ ᐁᐸᑭᑎᓇᒪᐎᓇᑰᒃ ᐁᓈᓴᒦᔦᒃ ᒋᐅᑖᐱᓇᒣᒃ ᐱᒫᑎᓯᐎᓐ; ᑯᒫ ᑲᔦ ᓂᐳᐎᓐ; ᐃᐃ ᑲᔦ ᔕᐌᑖᑯᓯᐎᓐ ᑯᒫ ᑲᔦ ᒪᒐᑭᒥᑰᐎᓐ᙮ ᐃᐃ ᓴ ᐃᑕᐙ ᐱᒫᑎᓯᐎᓐ ᐅᑖᐱᓇᒧᒃ, ᑮᓇᐙ ᒋᐱᒫᑎᓯᔦᒃ, ᐃᑭ ᑲᔦ ᑭᐲᐌᓰᒥᐙᒃ ᒋᐱᒫᑎᓯᐙᒡ᙮ 20 ᓵᑭᐁᒃ ᑕᔥ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᓇᐃᑕᐌᒃ ᑲᔦ ᐋᓃᓐ ᐁᓂᓀᒃ, ᐁᑭᒋ ᐃᓀᓂᒣᒃ ᑲᔦ, ᒦ ᓴ ᐃᒫ ᑫᐅᑎᓇᒣᒃ ᐱᒫᑎᓯᐎᓐ ᑭᓉᔥ ᑫᐅᒋ ᐱᒫᑎᓯᔦᒃ᙮ ᐃᐃᒫ ᓴ ᐊᑮᕽ ᒋᑕᔑ ᐱᒫᑎᓯᔦᒃ ᑳᑎᐯᒋᑫᒡ ᑳᑮ ᐊᔓᑕᒪᐙᒡ ᐁᐐ ᒦᓈᑯᐸᓀᓐ ᑭᑫᑌᔭᐋᒥᐙᐸᓃᐞ ᐁᐸᕒᐊᐋᒪᓐ Abraham, ᐋᐃᓯᑰᓐ Isaac, ᐃᓂ ᑲᔦ ᒉᑲᐴᓐ Jacob, ᑮᐃᑭᑐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society