ᑑᑕᕒᐋᓇᒦ 25 - ᐅᒋᐺ ᑭᒋᒪᓯᓇᐃᑲᓐ1 ᐊᐲ ᓴ ᐃᓂᓂᐗᒃ ᒫᔑ ᐐᒌᑎᐙᒡ, ᐃᔖᐙᒡ ᑕᔥ ᑎᐹᑯᓂᑏᐎᑲᒥᑯᕽ, ᑎᐹᑯᓂᑫᐎᑭᒫᓐ ᓴ ᑕᐅᓀᑕᒨᓐ ᐋᓃᓐ ᑫᐃᓈᑯᓂᑣ᙮ ᐊᐊ ᑕᔥ ᑫᑰᓐ ᑳᑮ ᐃᔑ ᒪᒫᔒᓯᒃ ᑕᐸᑭᑎᓈ, ᐊᐊ ᑕᔥ ᑳᑮ ᒪᒫᔒᒡ ᑕᐃᓇᑭᒫ ᐅᒪᒫᔒ᙮ 2 ᑮᔥᐱᓐ ᐃᑕᔥ ᐊᐊ ᐃᓂᓂ ᑳᑮ ᒪᒫᔒᒡ ᑲᔥᑭᑕᒫᓱᒡ ᒋᐸᐸᑭᑌᐅᓐᒡ, ᐅᑎᐹᑯᓂᐌᓐ ᓴ ᑕᐃᓈᑯᓂᑫᐗᓐ ᒋᐊᓂᒥᑯᔑᕽ᙮ ᒦᑕᔥ ᒋᐸᐸᔕᔐᐅᓐᒡ ᐁᓈᓴᒦᓂᒡ ᐅᑎᐹᑯᓂᐌᓐ᙮ ᒥᓂᒃ ᐃᑕᔥ ᐃᑯ ᑳᑮ ᒪᒫᔒᒡ, ᒦ ᐃ ᒥᓂᒃ ᑫᐸᔕᔐᐅᓐᒡ᙮ 3 ᑳᐐᓐ ᐃᑕᔥ ᐊᐗᔑᒣ ᓃᒥᑕᓇ 40 ᑕᓯᕽ ᑕᐸᔕᔐᐙᓰ, ᐋᓃᔥ ᑮᔥᐱᓐ ᐊᐗᔑᒣ ᐃᐃ ᒥᓂᒃ ᐸᔕᔐᐅᓐᒡ, ᒫᑭᔖ ᓴ ᑕᐅᓱᓵᒥᐋ ᐁᑲᓇᐙᐸᒥᓐᒡ᙮ 4 ᑫᑯ ᑭᐳᑑᓀᐱᓈᑫᒃ ᐱᔑᑭ ᒣᒀ ᐁᐸᐎᔥᑲᐙᒡ ᐸᑴᔑᑲᓇᓐ᙮ ᑫᐃᔑᒋᑫᑕᒪᐎᑎᐸᓐ ᑳᐃᔥᒀᐱᒫᑎᓯᒡ ᐐᒋᑭᐌᔨᒫ 5 ᑮᔥᐱᓐ ᓴ ᓃᔑᓐ ᐐᒋᑭᐌᔨᒫᒃ ᓃᔓᐅᑖᐙᒡ, ᐯᔑᒃ ᐃᑕᔥ ᓂᐳᒡ ᐁᐅᑯᓯᓯᓯᒃ, ᐃᓂ ᓴ ᐐᐗᓐ ᑳᐐᓐ ᐸᑳᓄᕽ ᓵᑭᒐᔭᐄ ᑕᔑ ᐐᑎᑫᓰᐗᓐ᙮ ᐊᐊ ᑕᔥ ᑯᑕᒃ ᐐᒋᑭᐌᔨᒫ ᐅᑲ ᐅᑖᐱᓈᓐ ᐃᓂ ᐃᑴᐗᓐ ᒋᐐᐎᒡ᙮ ᒦ ᓴ ᐃ ᐁᔑᓈᑾᓂᓂᒃ ᐅᒋᑕᑯ ᐊᐊ ᐐᒋᑭᐌᔨᒫ ᒋᐐᑎᑫᒫᐸᓐ ᐃᓂ ᐃᑴᐗᓐ᙮ 6 ᐃᓂ ᑕᔥ ᓂᑕᒻ ᑫᐊᔮᐙᐙᒡ ᐅᑯᓯᓯᐙᓐ, ᒦᐗᓐ ᓴ ᐃᓂ ᑫᓂ ᐋᓂᑫᐎᑑᓂᒡ ᐐᓱᐎᓂᓂ ᐃᓂ ᐐᒋᑭᐌᔨᐸᓃᓐ ᑳᑮ ᓂᐳᓂᒡ, ᑳᐐᓐ ᐃᑕᔥ ᐅᐐᓱᐎᓂᓂ ᑕᐴᓂ ᐊᔮᓯᓂᓂ ᐃᐃᒫ ᐃᔅᕒᐃᔭᓬᐊᑮᕽ Israel᙮ 7 ᑮᔥᐱᓐ ᐃᑕᔥ ᐐᓐ ᐊᐊ ᐃᓂᓂ ᐐᐐᑎᑫᒫᓯᒃ ᐃᓂ ᐐᒋᑭᐌᔨᐸᓃᓐ ᐐᐎᓂ, ᐊᐊ ᑕᔥ ᐃᑴ ᑕᐃᔖ ᐁᔑᐊᔮᓂᒡ ᑳᓃᑳᓂᓯᓂᒡ ᐅᐅ ᒋᐃᑭᑐᒡ, ᓂᓈᐯᒥᐸᓐ ᐐᒋᑭᐌᔭᓐ ᓴ ᑳᐐᓐ ᐃᓀᑕᓰᐗᓐ ᒋᐊᓂ ᐱᒥᐎᑑᓂᒡ ᐅᐐᓱᐎᓂ ᐃᐃᒫ ᐃᔅᕒᐃᔭᓬᐊᑮᕽ᙮ ᑳᐐᓐ ᓴ ᓂᐐ ᑑᑖᑯᓰ ᑫᑮ ᐃᔑᒋᑫᐸᓐ, ᓃᓂᒻ ᐃᑕᔥ ᐁᐃᓇᐌᒥᒡ, ᑕᐃᑭᑐ᙮ 8 ᐃᑭ ᑕᔥ ᑳᓃᑳᓂᓯᐙᒡ ᐆᑌᓈᕽ ᐅᑲ ᐊᑐᒫᐙᓐ ᐃᓂ ᐃᓂᓂᐗᓐ ᒋᑲᑲᓅᓈᐙᒡ᙮ ᑮᔥᐱᓐ ᐃᑕᔥ ᐋᒋᑯ ᐃᑭᑐᓂᒡ, ᑳᐐᓐ ᓂᐐ ᐐᑎᑫᒫᓰ᙮ 9 ᐊᐊ ᑕᔥ ᐃᑴ ᐅᑲ ᓈᓯᑲᐙᓐ ᐃᓂ ᐐᓂᒨᓐ ᑳᐐ ᐐᑎᑫᒥᑯᓯᒃ ᒋᐙᐸᒥᑯᒡ ᐃᐃ ᑳᓃᑳᓂᓯᓂᒡ ᐆᑌᓈᕽ, ᒦᑕᔥ ᑫᔑ ᑮᑕᑭᓯᓀᐱᓈᒡ ᒋᓯᒀᓈᒡ ᐅᐗᑌᑯᓃᕽ ᐅᐅ ᒋᐃᑭᑐᒡ, ᒦ ᓴ ᐅ ᐁᑑᑕᐎᓐᒡ ᐃᓂᓂ ᑳᑌᐺᑕᓯᒃ ᒋᐅᔑᑕᒪᐙᒡ ᐐᒋᑭᐌᔨᓂ ᐅᐲᐌᓰᒥᓂ, ᑕᐃᑭᑐ᙮ 10 ᐊᐊ ᑕᔥ ᐃᓂᓂ ᒦ ᐃ ᑫᔑ ᑭᑫᑖᑯᓯᒡ ᐃᐃᒫ ᐃᔅᕒᐃᔭᓬᐊᑳᕽ ᐃᓇᐌᒫᑲᓐ ᑳᑮ ᑮᑕᑭᓯᓀᐱᒋᑲᓂᐎᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society