Cwaan 21 - ᐅᒋᐺ ᑭᒋᒪᓯᓇᐃᑲᓐᒋᓴᔅ ᐁᑮᓈᑯᓰᑕᐙᒡ ᐅᑭᑭᓄᐊᒪᐙᑲᓇᐞ ᐁᓃᔣᒋᓂᒡ 1 ᑮᐃᔥᒀᓭᒃ ᐅᐅ, ᒦᓇᐙ ᒋᓴᔅ ᐅᑮᓈᑯᓰᑲᑕᐙᐞ ᐅᑭᑭᓄᐊᒪᐙᑲᓇᐞ ᑖᐃᐲᕒᐃᔭᔅ Tiberius ᓵᑲᐃᑲᓃᕽ ᐁᑮᐊᔮᓂᒡ᙮ ᒦ ᐅᐌ ᑳᑮᐱ ᐃᔑᐌᐸᒃ ᐌᑎ ᑳᑮᐃᔑᐙᐸᒥᓐᒡ ᒋᓴᔅ᙮ 2 ᑮᒫᒪᐎᐊᔮᐗᒃ ᓵᐃᒪᓐ ᐲᑕᕒ Simon Peter ᑲᔦ ᑣᒪᔅ Thomas ᓃᔓᐅᑌ ᑳᐃᔑᓂᑳᓱᒡ, ᑲᔦ ᓇᑖᓂᔭᓬ Nathanael ᐃᐃᒫ ᑫᓇ Cana ᑳᑮᐅᒌᒡ ᑳᓬᐊᓬᐄᐎ ᐊᑮᕽ Galilee, ᑲᔦ ᓭᐸᑏ Zebedee ᐅᑯᓯᓴᐞ ᑲᔦ ᓃᔑᓐ ᑯᑕᒃ ᒋᓴᔅ ᐅᑭᑭᓄᐊᒪᐙᑲᓇᐞ᙮ 3 ᓵᐃᒪᓐ ᐲᑕᕒ ᐅᑮᑲᓅᓈᐞ: ᓂᐐᐊᑕᐸᑭᑕᐙ, ᑮᐃᑭᑐ᙮ ᐊᐤ ᑭᑲᐐᒌᐎᑰ, ᐅᑮᐃᑰᐞ᙮ ᒦᑕᔥ ᐃᐃ ᑮᐊᓂᐴᓯᐗᒃ, ᑮᐊᓂᒫᒋᐅᐗᒃ᙮ ᑲᐯᑎᐱᒃ ᐃᑕᔥ ᐋᓇᑮᑕᓇᑲᒥᑭᓯᐙᒡ, ᑳᐐᓐ ᐊᐙᒡ ᐯᔑᒃ ᑮᐱᑕᐊᓈᓰᐗᒃ ᑭᓅᔐᓐ᙮ 4 ᐋᔕ ᑕᔥ ᐁᐊᓂᒨᑲᐊᓂᓂᒃ, ᒋᓴᔅ ᑮᓃᐸᐎ ᒌᑭᐲᒃ᙮ ᑭᑭᓄᐊᒪᐙᑲᓇᒃ ᐃᑕᔥ ᑳᐐᓐ ᐅᑮᑭᑫᓂᒫᓯᐙᐙᓐ ᐁᐋᐎᓂᒡ ᒋᓴᓲᓐ᙮ 5 ᒋᓴᔅ ᐃᑕᔥ ᐅᑮᑲᓅᓈᐞ: ᓃᒌᑐᒃ! ᑭᑮᐱᑕᐊᓈᒻ ᐃᓇ? ᐅᑮᐃᓈᐞ᙮ ᑳᐐᓐ, ᐅᑮᐃᑰᐞ᙮ 6 ᒦᑕᔥ ᑮᐃᑭᑐ: ᑭᒋᓂᑭᕽ ᐃᓇᑫᔫᓇᒃ ᐃᔑᐸᑯᐲᐌᐱᓂᒃ ᐊᓴᑉ, ᑭᑲᐱᑕᐊᓈᒻ, ᐅᑮᐃᓈᐞ᙮ ᒦᑕᔥ ᒦᓇᐙ ᑳᐃᔑᐸᑭᑕᐙᓂᒡ᙮ ᒦᔥ ᐁᑮᑆᐎᐱᓈᓂᒡ ᐅᐐᐸᓴᐲᓂ ᑳᐊᐲᒋᑭᒋᐱᑕᐊᓈᓂᒡ ᑭᓅᔐᐞ ᐃᒫ᙮ 7 ᐊᐊᔥ ᑭᓄᐊᒪᐙᑲᓐ ᒋᓴᓲᓐ ᒫᐗᒡ ᑳᑮᓵᑭᐃᑯᒡ ᐅᑮᑲᓅᓈᓐ ᐲᑕᕒᐆᓐ: ᒦ ᓇᑾᓇ ᐊ ᑳᑎᐯᒋᑫᒡ, ᐃᑭᑐ᙮ ᐊᐲ ᑳᓅᑕᕽ ᓵᐃᒪᓐ ᐲᑕᕒ ᒦᐗᓂᓂ ᐁᐋᐎᓂᒡ ᑳᑎᐯᒋᑫᓂᒡ, ᒦᑕᔥ ᑳᐃᔑᓈᐱᐌᐱᔥᑲᕽ ᐅᐲᓯᑲᐙᑲᓂᔥᑭᑲᓐ ᑳᑮᑮᒋᑯᔥᑲᕽ, ᒦᑕᔥ ᑳᐃᔑᐸᑯᐲᒀᔥᑾᓂᒡ᙮ 8 ᑯᑕᒃ ᐃᑕᔥ ᑭᑭᓄᐊᒪᐙᑲᓇᒃ ᑮᐱᓈᑕᑳᐊᒨᒃ ᒌᒫᓂᕽ, ᐁᓈᑕᑳᒣᔫᓈᐙᒡ ᐃᓂ ᐊᓴᐲᓐ, ᐐᑫ ᐁᒨᔥᑭᓀᓂᒡ ᑭᓅᔐᐞ ᐃᒫ ᐊᓴᐲᕽ᙮ ᑳᐐᓐ ᐋᐱᒋ ᐙᓴ ᒥᔕᐗᑳᒻ ᑮᐊᔮᓰᐗᒃ, ᒫᑭᔖ ᓂᑯᑣᒃ ᑕᓱᓂᒃ ᐃᐃᐌᑎ᙮ 9 ᐊᐲ ᑕᔥ ᑳᓂᐊᒀᑕᑯᑮᐙᒡ ᐅᑮᐙᐸᑖᓈᐙ ᐃᔥᑯᑌᐎᐊᑲᑲᔐ, ᔑᑾ ᐗᑭᑕᑲᑲᔐ ᑭᓅᔐᐞ ᐁᑭᔑᓱᓂᒡ, ᐸᑴᔑᑲᓇᐞ ᑲᔦ ᐁᐊᐱᓂᒡ᙮ 10 ᒦᑕᔥ ᒋᓴᔅ ᑮᐃᑭᑐ: ᐲᓂᑯᒃ ᐋᓂᑕ ᑭᓅᔐᒃ ᓅᑯᒻ ᑳᑮᐱᑕᐊᓈᔦᒃ, ᐅᑮᐃᓈᐞ᙮ 11 ᒦᔥ ᐃᐃ ᓵᐃᒪᓐ ᐲᑕᕒ ᒦᓇᐙ ᑮᑮᐌᐴᓯ ᐁᑮᐊᒀᓯᑖᐲᒡ ᐃᓂ ᐊᓴᐲᓐ, ᐁᒨᔥᑭᓀᓂᒡ ᑭᒋᑭᓅᔐᐞ, ᐃᑯᑣᒃ ᓈᓂᒥᑕᓇᔑᓂᓯᓐ 153 ᐁᑕᔑᓂᒡ᙮ ᐋᓇᑮᐊᐲᒋᐹᑏᓄᓂᒡ, ᑳᐐᓐ ᑕᔥ ᑮᐲᑯᔥᑳᓰ ᐊᐊ ᐊᓴᑉ᙮ 12 ᒦᑕᔥ ᑮᐃᑭᑐ ᒋᓴᔅ: ᐱᐐᓯᓂᒃ, ᐅᑮᐃᓈᐞ᙮ ᑳᐐᓐ ᐊᐙᒡ ᐊᐎᔭ ᑭᑭᓄᐊᒪᐙᑲᓇᒃ ᑮᑌᐃᓀᓂᑎᓱᓰᐗᒃ: ᐊᐌᓀᓐ ᑮᓐ, ᒋᐃᓈᐙᒡ, ᐋᓃᔥ ᐅᑮᑭᑫᓂᒫᐙᓐ ᐁᐋᐎᓂᒡ ᑳᑎᐯᒋᑫᓂᒡ᙮ 13 ᒦᔥ ᐃᐃ ᒋᓴᔅ ᐅᑮᐊᐎᐅᑖᐱᓈᓐ ᐃᓂ ᐸᑴᔑᑲᓇᓐ ᐁᑮᐊᔕᒫᒡ᙮ ᒦᔥ ᐃᐃ ᑲᔦ ᐃᓂ ᑭᓅᔐᐞ᙮ 14 ᐊᒦ ᐃᐌ ᓂᓯᕽ ᒋᓴᔅ ᐁᑮᓈᑯᐃᑎᓱᑕᐙᒡ ᐃᐃ ᐅᑭᑭᓄᐊᒪᐙᑲᓇᐞ ᐋᔕ ᐁᑮᑮᐌᐱᒫᑎᓯᒡ᙮ ᒋᓴᔅ ᐁᑮᑲᑴᒋᒫᒡ ᐲᑕᕒᐆᓐ, ᑭᓵᑭᐞ ᐃᓇ? 15 ᑳᐃᔥᒀᐐᓯᓂᐙᒡ ᐃᑕᔥ ᒋᓴᔅ ᐅᑮᑲᓅᓈᓐ ᓵᐃᒪᓐ ᐲᑕᕒᐆᓐ Simon Peter: ᑮᓐ ᑕᔥ ᓵᐃᒪᓐ, ᐅᑯᓯᓴᓐ ᒞᓐ, ᐊᐗᔑᒣ ᓇ ᑭᓵᑭᐞ ᐊᐲᒡ ᐅᑯ ᑳᔑᓵᑭᐃᐙᒡ? ᒦᔥ ᐃᐌ ᐃᑭᑐᐗᓐ: ᐁᐊᐞ, ᑌᐯᒋᑫᔭᓐ, ᑭᑭᑫᑖᓐ ᐁᓵᑭᐃᓈᓐ, ᐅᑎᑰᓐ᙮ ᒦᔥ ᑮᐃᑭᑐ ᒋᓴᔅ: ᐊᔕᒻ, ᑲᓇᐌᓂᒻ ᓂᒫᓇᒑᓂᔐᓯᒪᒃ, ᐅᑮᐃᓈᓐ᙮ 16 ᒦᑕᔥ ᒦᓇᐙ ᐅᑲᓅᓈᓐ: ᓵᐃᒪᓐ, ᐅᑮᐃᓈᓐ, ᑮᓐ ᐅᑯᓯᓴᓐ ᒞᓐ, ᑭᓵᑭᐞ ᐃᓇ? ᒦᔥ ᑮᐃᑭᑐᐗᓐ: ᐁᐊᐞ, ᑌᐯᒋᑫᔭᓐ, ᑭᑭᑫᑖᓐ ᐁᓵᑭᐃᓈᓐ᙮ ᒦᑕᔥ ᒋᓴᔅ ᐅᑮᐃᓈᓐ: ᑲᓇᐌᓂᒻ ᓂᒫᓇᒑᓂᔑᒪᒃ᙮ 17 ᑫᔮᐱ ᐋᐱᑎᕽ ᐅᑮᑲᑴᒋᒫᓐ, ᒦ ᓂᓯᕽ: ᓵᐃᒪᓐ, ᑮᓐ ᐅᑯᓯᓴᓐ ᒞᓐ, ᑭᓵᑭᐞ ᐃᓇ? ᐅᑮᐃᓈᓐ᙮ ᑮᒫᓀᑕᒻ ᐃᑕᔥ ᐊᐊ ᐲᑕᕒ, ᐋᓃᔥ ᐋᔕ ᓂᓯᕽ ᐁᑮᑲᑴᒋᒥᑯᒡ: ᑭᓵᑭᐞ ᐃᓇ? ᒦᔥ ᐃᐃᐌ ᑳᐃᓈᒡ: ᑌᐯᒋᑫᔭᓐ, ᑭᑭᑫᑖᓐ ᐄᑐᒃ ᑲᑭᓇ ᑫᑰᓐ᙮ ᑭᑭᑫᓂᒻ ᐁᓵᑭᐃᓈᓐ᙮ ᒦᑕᔥ ᒋᓴᔅ ᐅᑮᐃᓈᓐ: ᑲᓇᐌᓂᒻ ᓂᒫᓇᒑᓂᔑᒪᒃ᙮ 18 ᓂᑌᐺ ᐁᐐᑕᒪᐎᓈᓐ: ᒣᒀ ᐁᐅᔥᑭᓃᑭᔭᓐ ᑭᑮᐅᔒᑖ ᑯ, ᐙᐃᔖᔭᓐ ᓴ ᑯ ᑭᑮᐃᔖ᙮ ᐊᐲ ᑕᔥ ᐁᐊᓂᐊᑭᐌᓯᐎᔭᓐ, ᑭᑲᔕᔒᐱᓂᑫᑖ, ᑯᑕᒃ ᐊᐎᔭ ᑭᑲᒪᒫᒋᑾᐱᓂᒃ, ᑭᑲᐃᔑᐎᓂᒃ ᑳᐐᐃᔖᓯᐗᓐ᙮ 19 ᐅᐌᔥ ᐁᑮᐃᓈᒡ, ᐅᑮᑭᑭᓇᐙᒋᐐᑕᒪᐙᓐ ᐋᓃᓐ ᑫᐃᔑᓂᐳᓂᒡ, ᑫᐃᔑᑭᒋ ᐃᓀᑖᑯᐋᓂᒡ ᑭᔐᒪᓂᑑᓐ᙮ ᒦᑕᔥ ᐅᐅᐌ ᑳᐃᑭᑐᒡ ᒋᓴᔅ: ᐱᒥᓂᔕᐅᔑᓐ᙮ ᒋᓴᔅ ᐁᑮᐃᓈᒋᒫᒡ ᐃᓂ ᑯᑕᒃ ᑭᑭᓄᐊᒪᐙᑲᓇᓐ 20 ᐲᑕᕒ Peter ᐁᑴᑭᑳᐸᐎᒡ ᐅᑮᐙᐸᒫᓐ ᐁᐱᐱᒥᓂᔕᐃᑫᓂᒡ ᐃᓂ ᑯᑕᒃ ᑭᑭᓄᐊᒪᐙᑲᓇᓐ ᒫᐗᒡ ᒋᓴᔅ ᑳᑮᓵᑭᐋᒡ, ᒦᐗᓂᓂ ᑳᑮᐃᓂᑖᓂᒡ ᐯᔓ ᐅᑳᑭᑲᓂᓃᕽ ᒋᓴᓲᓐ ᒣᒀ ᐁᐅᓈᑯᔑᐐᓯᓂᐙᒡ ᐁᑮᑲᑴᒋᒫᓂᒡ: ᑌᐯᒋᑫᔭᓐ, ᐊᐌᓀᓐ ᑳᐐᒪᒥᔑᒥᒃ? 21 ᐊᐲᔥ ᐲᑕᕒ ᐁᑮᐙᐸᒫᒡ ᐁᐱᒥᓂᔕᐅᑯᐙᒡ ᐅᑮᐃᓈᓐ ᒋᓴᓲᓐ: ᑌᐯᒋᑫᔭᓐ, ᐋᓃᓐ ᑕᔥ ᐗᐊ ᑫᐃᔑᒋᑫᐃᓐᒡ? ᑮᐃᑭᑐ᙮ 22 ᒋᓴᔅ ᑮᐃᑭᑐ: ᑮᔥᐱᓐ ᐃᓀᑕᒫᓐ ᑫᔮᐱ ᒋᐱᒫᑎᓯᒡ ᐲᓂᔥ ᐃᑯ ᒋᐱᑕᑶᔑᓈᓐ, ᐌᑯᓀᔥ ᑮᓐ ᑫᐅᒋᐸᐹᒥᓯᐎᓂᔭᓐ? ᑮᓐ ᐱᒥᓂᔕᐅᔑᓐ, ᐅᑎᓈᓐ᙮ 23 ᐅᐅ ᑕᔥ ᑮᒫᒌᔮᑐᑌ ᐁᑮᐊᓂᐐᑕᒫᑎᐙᒡ ᐅᑌᐺᑕᒨᒃ, ᐁᑳ ᒋᓂᐳᓯᒃ ᐊᐊ ᑭᑭᓄᐊᒪᐙᑲᓐ᙮ ᒋᓴᔅ ᐃᑕᔥ ᑳᐐᓐ ᑮᐅᒋ ᐃᑭᑐᓰ ᐁᑳ ᒋᓂᐳᓯᓂᒃ᙮ ᐅᐅᐌ ᓴ ᒪᔮ ᑮᐃᑭᑐ: ᑮᔥᐱᓐ ᐃᑕᔥ ᐃᓀᑕᒫᓐ ᑫᔮᐱ ᒋᐱᒫᑎᓯᒡ ᐲᓂᔥ ᒋᐱᑕᑶᔑᓈᓐ, ᐌᑯᓀᔥ ᑮᓐ ᐌᐸᐹᒥᓯᐎᓂᔭᓐ? ᑮᐃᑭᑐ᙮ 24 ᐊᒦ ᐗᐊ ᑭᑭᓄᐊᒪᐙᑲᓐ ᑳᑮᑎᐹᑐᑕᕽ ᐅᓄ, ᑲᔦ ᑳᑮᐅᔑᐲᐊᕽ ᐅᓄ᙮ ᓂᑭᑫᑖᒥᓐ ᐃᓴ ᐅᑎᐹᒋᒧᐎᓐ ᐁᑌᐺᒪᑲᓂᓂᒃ᙮ 25 ᐃᓇᔥᑫ ᑕᔥ ᐊᔮᓂᐗᓐ ᓃᐱᐗᐞ ᑯᑕᒃ ᑫᑰᓇᓐ ᒋᓴᔅ ᑳᑮᐊᔨᑑᑕᕽ ᐅᐅᒫ ᐁᐐᑌᓯᓂᓂᑭᓐ᙮ ᐊᐴᔥᑫ ᐄᑐᒃ ᑲᑭᓇ ᐁᑕᓱᐯᔑᒃ ᐅᔑᐲᐃᑳᑌᑭᐸᓃᓐ, ᑳᐐᓐ ᐊᐙᒡ ᑖᑮᑌᐸᔥᑭᓀᓯᓅᓇᓐ ᒥᓯᐌ ᐊᑮᕽ ᐃᓂ ᒪᓯᓇᐃᑲᓇᓐ ᑫᑮᐅᔑᐲᐃᑳᑌᑭᐸᓃᓐ ᓂᑎᓀᑕᒻ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society