Coowel 2 - ᐅᒋᐺ ᑭᒋᒪᓯᓇᐃᑲᓐᐸᐸᑭᓀᒃ ᑮᐋᐸᑎᓯᐙᒡ ᑫᐅᒋᑭᑫᒋᑳᑌᒃ ᐁᓀᑖᑾᓂᓂᒃ ᑳᑎᐯᒋᑫᒡ ᐅᑮᔑᑲᓄᒻ 1 ᐴᑖᑕᒧᒃ ᐴᑖᒋᑲᓐ ᓵᔭᓂᕽ, ᐃᐃᒫ ᐗᒌᕽ ᑳᑕᓀᑖᑯᓯᔮᓐ ᐃᔑ ᑎᐹᒋᒧᒃ ᐁᓇᓃᓵᓀᑖᑾᒃ᙮ ᓂᓂᑳᓂᒥᓯᒃ ᒎᑕ Judah ᐊᑮᕽ ᐁᔮᔦᒃ, ᐋᔕ ᐅᔕ ᑫᑳ ᐅᒋᒋᓭᓂ ᑳᑎᐯᒋᑫᒡ ᐅᑮᔑᑲᓄᒻ᙮ ᑌᐺ ᐯᔗᑖᑾᓂᓂ! 2 ᐋᐱᒋ ᓴ ᑕᑲᔥᑮᑎᐱᑲᓐ, ᑕᐲᑭᔅᑳᑌᑖᑾᓐ ᒋᐃᓀᑖᑾᒃ ᑖᐱᔥᑰ ᑳᓂᑾᑾᒃ ᐁᒪᑲᑌᐙᓇᑾᒃ᙮ ᐁᑕᑕᐌ ᓴ ᑕᐹᑏᓄᐗᒃ ᐸᐸᑭᓀᒃ ᒋᐱᓈᑯᓯᐙᒡ ᑖᐱᔥᑰ ᑳᐱ ᑲᔥᑮᑎᐱᑲᒃ ᑳᔑ ᒥᓯᑌᔥᑳᒃ ᑭᒋ ᐗᒌᑳᕽ᙮ ᑳᐐᓐ ᓴ ᐃ ᑫᑰᓐ ᐅᑖᓈᕽ ᐐᑳ ᐱᒥ ᐃᔑᐌᐸᓯᓅᓐ, ᑳᐐᓐ ᑲᔦᐃ ᐐᑳ ᒦᓇᐙ ᑕᓂ ᐃᔑᐌᐸᓯᓅᓐ᙮ 3 ᑖᐱᔥᑰ ᓴ ᐃᔥᑯᑌᕽ ᐃᓀᑖᑯᓯᐗᒃ ᐁᒦᒋᐙᒡ ᓀᑖᐎᑭᓂᓂᑭᓐ ᐁᓂ ᐃᔖᐙᒡ᙮ ᐁᓂ ᐃᔖᐙᒡ ᓴ ᒦ ᐃ ᐃᔑᓈᑾᓂᓂ ᐊᑮᓂ ᑖᐱᔥᑰ ᐄᑎᓐ ᑭᑎᑳᓇᑲᒥᒃ᙮ ᐅᑖᓈᕽ ᑕᔥ ᑳᑮ ᐲᔖᐙᒡ ᑖᐱᔥᑰ ᐱᑾᑕᑲᒥᑯᕽ ᐃᔑᓈᑾᓂᓂ᙮ ᑳᐐᓐ ᑲᓇᑫ ᑫᑰᓂᓂ ᐅᔖᐾᑲᑖᑯᓰᓈᐙ᙮ 4 ᒥᑕᑎᒨᕽ ᓴ ᐃᔑᓈᑯᓯᐗᒃ, ᐁᐲᒋ ᓂᑖ ᐱᒥᐸᑑᐙᒡ ᑖᐱᔥᑰ ᒦᑳᓱᐎ ᒥᑕᑎᒨᕽ᙮ 5 ᒦ ᓴ ᐃ ᐁᓂᑖᑯᓯᐙᒡ ᑖᐱᔥᑰ ᒦᑳᓱᐎ ᐅᑖᐹᓈᑾᒃ ᑳᐱᒥ ᐊᔮᐙᒡ, ᐁᔮᔮᔕᐎ ᒀᔥᑾᓂᐙᒡ ᑳᔑ ᐗᐗᒌᑳᓂᒃ᙮ ᒦ ᐃ ᐁᓂᑖᑯᓯᐙᒡ ᑖᐱᔥᑰ ᑳᔑ ᑳᑳᐸᑾᓀᑭᓐ ᒪᔥᑯᓰᓐ, ᑖᐱᔥᑰ ᔑᒫᑲᓂᔕᒃ ᑳᐅᔑ ᐊᔮᐙᒡ ᐁᐐ ᐊᑕ ᒦᑳᓱᐙᒡ᙮ 6 ᐯᒫᑎᓯᓂᒡ ᐃᑕᔥ ᐁᐙᐸᒥᑯᐙᒡ ᐁᐱᓈᑯᓯᐙᒡ ᒦ ᐃ ᐁᔑ ᐙᐱᓀᐎᓯᓂᒡ ᐁᐲᑖᓂᒥᓯᓂᒡ᙮ 7 ᑖᐱᔥᑰ ᓴ ᔑᒫᑲᓂᔕᒃ ᑳᒨᑮᒋᑫᐙᒡ ᒦ ᓴ ᐃ ᒪᔮ ᐁᔑᓈᑯᓯᐙᒡ; ᑖᐱᔥᑰ ᔑᒫᑲᓂᔑᕽ ᐊᐲᒋ ᓂᑖᐙᑕᐌᐗᒃ ᐁᐊᒀᑕᐌᐙᒡ ᐙᑳᔮᐱᑭᓂᑲᓂᕽ᙮ ᑲᑭᓇ ᓴ ᑾᔭᑯᔥᑳᐗᒃ ᐋᑎ ᓇᑫ ᐁᔖᐙᒡ, ᑳᐐᓐ ᑲᓇᑫ ᒋᐸᑫᔥᑳᐙᒡ᙮ 8 ᑳᐐᓐ ᑲᔦ ᒋᑲᑮᐱᔥᑯᑖᑎᐙᒡ᙮ ᔖᐳᔥᑳᐗᒃ ᑲᔦ ᐁᔑᐊᔮᔩᒋ ᑲᓇᐌᑖᑾᓂᓂᒃ, ᑳᐐᓐ ᑫᑰᓐ ᐅᑭᐱᑎᓂᑯᓰᓈᐙ᙮ 9 ᒦᔥ ᐁᔑ ᒨᑮᑕᒧᐙᒡ ᐆᑌᓈᓂ, ᐁᐹᔑᑖᑕᐌᐙᒡ ᐙᑳᔮᐱᑭᓂᑲᓂᓂ; ᐙᓭᒋᑲᓂᕽ ᐁᐅᒋ ᑲᔥᑭᐅᐙᒡ ᐁᐹᐲᑎᑫᐙᒡ ᐙᑳᐃᑲᓇᓐ ᑖᐱᔥᑰ ᐅᑭᒨᒋᔥᑲᒃ᙮ 10 ᒦᔥ ᐁᔑ ᑯᔥᑯᓭᓂᒃ ᐊᑭ ᐁᐊᓂ ᐱᒥ ᐊᔮᐙᒡ; ᑮᔑᒃ ᑲᔦ ᓂᓂᑭᔥᑳᓂ᙮ ᑮᓯᓲᓐ, ᑎᐱᑭᑮᓯᓲᓐ ᑲᔦ ᒦ ᐃ ᐁᓂ ᐃᔑ ᑲᔥᑮᑎᐱᑭᓈᑯᓯᓂᒡ, ᐗᓇᑯᔕᐞ ᑲᔦ ᑳᐐᓐ ᐊᐗᔑᒣ ᒋᓵᑳᓯᑫᓂᒡ᙮ 11 ᑳᑎᐯᒋᑫᒡ ᓴ ᐱᓀᓰᐎᑖᑯᓯ ᐁᑲᓅᓈᒡ ᐅᔑᒫᑲᓂᔒᒪᐞ ᑫᓂ ᐃᔑᒋᑫᓂᒡ᙮ ᐐᑫ ᓴ ᑯ ᐹᑏᓄᐗᐞ, ᓲᑫᑖᑯᓯᐗᐞ ᑲᔦ ᐃᐃ ᑳᓇᐃᑖᑯᒡ ᐋᓃᓐ ᐁᔑ ᐊᓅᓈᒡ᙮ ᐁᑕᑕᐌ ᓴ ᑕᑭᒋ ᑲᒀᓂᓴᑫᑖᑾᓂᓂ ᑳᑎᐯᒋᑫᒡ ᐅᑮᔑᑲᓄᒻ᙮ ᐊᐌᓀᓐ ᐃᑕᔥ ᐃᓈ ᑫᔖᐾᐸᓐ? ᐯᒫᑎᓯᐙᒡ ᑮᐊᑐᒥᑣ ᒋᑴᑳᑎᓯᐙᒡ 12 ᒦᑕᔥ ᑳᑎᐯᒋᑫᒡ ᐁᑭᑐᒡ, ᓅᑯᒻ ᓴ ᑯ ᐱᑴᑭᑖᒃ ᒥᓯᐌ ᐱᑯ ᑭᑌᐃᐙᕽ, ᒋᐐᓯᓂᓯᐌᒃ ᒋᐊᓇᒥᐋᔦᒃ, ᒋᒪᐎᔦᒃ ᑲᔦ᙮ 13 ᑕᑲ ᑭᑌᐃᐙᓐ ᑕᐲᑯᓈᑾᓅᓐ ᐁᒫᓀᑕᒣᒃ, ᑳᐐᓐ ᐐᓐ ᑭᑭᑭᔥᑭᑲᓂᐙᓐ᙮ ᐊᐯᔪᒃ, ᐱᑮᐌᓄᑕᐎᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ ᐐᓐ ᐅᔕ ᒥᓄᑑᑖᑫ, ᑰᐹᑌᓂᒥᐌ ᑲᔦ᙮ ᐋᐱᒋ ᐅᔕ ᐯᒋᑭᑖᓱ, ᐐᑫ ᑲᔦ ᓵᑭᐃᐌ᙮ ᒪᓈ ᐃᔑᒋᑫ ᐅᔕ ᓅᒋᑯ ᒋᑑᑖᑫᒡ᙮ 14 ᒫᑭᔖ ᓴ ᑳᑎᐯᒋᑫᒡ ᑭᑭᔐᒪᓂᑑᒥᐙ ᑕᐋᑌᑕᒻ ᒣᔥᑾᒡ ᒋᒥᓄᓭᐃᓀᒃ ᒋᒦᓂᓀᒃ ᓃᐱᐗᐞ ᑫᓂᑖᐎᑭᑖᐌᒃ᙮ ᒦᑕᔥ ᐃᐃ ᒋᐊᔮᐎᒣᒃ ᐸᑴᔑᑲᓇᓐ, ᒋᐊᔮᐌᒃ ᑲᔦ ᔔᒥᓈᐳ ᑫᐋᐸᒋᑑᔦᒃ ᐊᐲ ᐸᑭᑎᓇᒪᐌᒃ ᑳᑎᐯᒋᑫᒡ ᑭᑭᔐᒪᓂᑑᒥᐙ᙮ 15 ᐌᑎ ᓴ ᐗᒌᕽ ᓵᔭᓐ Zion ᑳᐃᔑᓂᑳᑌᒃ ᑕᔑ ᐴᑖᑕᒧᒃ ᐃᐃ ᐴᑖᒋᑲᓐ; ᐊᓅᑮᓐ ᑕᔥ ᑲᔦ ᒋᐃᔑᒋᑳᓂᐗᕽ ᑫᑌᑖᑾᒃ ᒋᐐᓯᓂᓈᓂᐗᓯᓄᒃ ᒋᐊᓇᒥᐋᕽ, ᐊᑐᒻ ᑲᔦ ᐯᒫᑎᓯᐙᒡ ᒋᒫᐗᒋᐃᑎᐙᒡ! 16 ᒫᐗᑑᓐ ᐯᒫᑎᓯᐙᒡ, ᑲᓅᔥ ᑲᔦ ᒋᑾᔮᒌᐙᒡ ᒋᐊᓇᒥᐁ ᓇᑭᔥᑯᑖᑎᐙᒡ᙮ ᒫᐗᑑᓐ ᑲᔦ ᑳᓃᑳᓂᓯᐙᒡ, ᐊᐱᓅᒌᔕᒃ ᑲᔦ, ᐃᑭ ᑲᔦ ᑳᓅᓂᐙᒡ᙮ ᐃᑭ ᑲᔦ ᑳᐅᔥᑭ ᐐᑎᑫᑎᐙᒡ ᐅᑲ ᓇᑲᑖᓈᐙᓐ ᐅᑖᐎᓂᐙ ᒋᐲᔖᐙᒡ᙮ 17 ᑕᑲ ᐊᓇᒥᐁᐎᑭᒫᒃ ᐯᒦᑕᐙᐙᒡ ᑳᑎᐯᒋᑫᓂᒡ ᐁᓈᓴᒦᓂᒡ ᑕᑕᔑ ᒪᐎᐗᒃ ᐃᐃᒫ ᓇᓴᐗᔭᐄ ᑭᒋ ᐊᓇᒥᐁᐎ ᐃᔥᒀᑌᒥᕽ, ᐁᔑᐊᔮᓂᒃ ᑲᔦ ᑳᑕᔑ ᐸᑭᑎᓈᓱᐎᓐᒡ᙮ ᐅᐅᐌ ᓴ ᒋᐃᑭᑐᐙᒡ, ᑌᐯᒋᑫᔭᓐ, ᑰᐹᑌᓂᒥᔑᓈᒻ, ᑭᑎᐯᓂᒥᓈᒻ ᐄᑐᒃ! ᑫᑯ ᐸᑭᑎᓈᑫᓐ ᑯᑕᒃ ᐯᑳᓉᐙᓇᑭᓯᐙᒡ ᐯᒫᑎᓯᐙᒡ ᒋᒫᓀᓂᒥᔭᒥᑣ, ᒋᐋᓇᐌᓂᒥᔭᒥᑣ ᑲᔦ ᒋᐃᑭᑐᓯᒀ, ᐋᓃᓐ ᑕᔥ ᐃᓂ ᐅᑭᔐᒪᓂᑑᒥᐙᓐ, ᑕᐃᑭᑐᐗᒃ᙮ ᑭᔐᒪᓂᑑ ᑮᑮᐌᐃᔑᑑᒡ ᐊᑮᓂ ᒋᓂᑖᐎᑭᒋᑫᒪᑲᓂᓂᒃ 18 ᒦᑕᔥ ᑳᑎᐯᒋᑫᒡ ᑳᑮ ᓈᑯᑑᒡ ᐁᓈᓈᑲᑕᐌᑕᕽ ᐃᐃ ᐊᑮᓂ, ᐁᑮ ᑰᐹᑌᓂᒫᒡ ᐅᐱᒫᑎᓰᒪᐞ᙮ 19 ᒦᑕᔥ ᑳᐃᔑ ᓇᑴᑕᐙᒡ, ᑭᑲ ᐃᔑᓂᔕᐊᒪᐎᓂᓂᒻ ᓴ ᐸᑴᔑᑲᓐ, ᐅᔥᑭ ᔔᒥᓈᐳ, ᐱᒥᑌ ᑲᔦ ᒋᐊᔮᔦᒃ; ᒥᓂᒃ ᐃᑯ ᒋᑌᐱᓭᔦᒃ᙮ ᑳᐐᓐ ᑕᔥ ᒦᓇᐙ ᐐᑳ ᑯᑕᒃ ᐯᒫᑎᓯᐙᒡ ᑭᑲ ᒫᓀᓂᒥᑯᓰᐙᒃ᙮ 20 ᐸᐸᑭᓀᒃ ᓴ ᑮᐌᑎᓄᕽ ᑳᑮ ᐱ ᐅᒌᐙᒡ ᓂᑯᒋ ᓂᑲ ᐃᓈᒶᐙᒃ, ᒋᐃᓈᒶᐗᒀ ᐱᑾᑕᑲᒥᒃ ᑳᔑ ᐹᑌᓂᒃ᙮ ᑳᓃᑳᓂᔥᑳᐙᒡ ᓴ ᐙᐸᓄᕽ ᐃᓇᑫ ᔒᐎᑖᑲᓈᐳᐎ ᓵᑲᐃᑲᓃᕽ ᑕᔑ ᒫᒌᔥᑳᐗᒃ᙮ ᐅᑖᓈᕽ ᑕᔥ ᑳᐱᒥ ᐊᔮᐙᒡ ᓂᑳᐲᐊᓄᕽ ᑭᒋᑲᒦᕽ ᐃᓇᑫ ᑕᔑ ᒫᒌᔥᑳᐗᒃ᙮ ᐐᑫ ᓴ ᑕᐐᑖᓱᒫᑯᓯᐗᒃ ᑳᓂᐳᐙᒡ᙮ ᑌᐺ ᓴ ᑳᑎᐯᒋᑫᒡ ᑭᒋ ᑫᑰᓐ ᐃᔑᒋᑫ᙮ 21 ᑮᓐ ᐊᑭ ᑫᑯ ᓭᑭᓯᑫᓐ; ᒥᓉᑕᓐ, ᒌᑫᑕᓐ ᑲᔦ ᐋᓃᔥ ᑳᑎᐯᒋᑫᒡ ᑭᒋ ᑫᑰᓐ ᐃᔑᒋᑫ᙮ 22 ᐊᔭᐋᐎᔕᒃ, ᑫᑯ ᓭᑭᓯᑫᒃ, ᑳᔑ ᐸᐸᔥᒀᒃ ᐅᔕ ᑕᓂ ᐅᓵᐗᔥᑯ ᒪᔥᑯᓰᑳ᙮ ᒥᑎᑰᒃ ᑲᔦ ᐅᑲᓂ ᓂᑖᐎᑭᑑᓈᐙ ᔒᐎᒦᒋᒻ, ᐱᒃ fig ᑲᔦ ᑎᓄᐎᒥᓇᓐ, ᔔᒥᓇᒃ ᐃᑕᔥ ᑲᔦ ᑕᓂᑖᐎᑭᐗᒃ ᐐᑫ ᒋᐌᓅᒋ ᐊᔮᐙᒡ᙮ 23 ᐯᒫᑎᓯᔦᒃ, ᓵᔭᓂᕽ ᐁᔮᔦᒃ ᑕᑲ ᒥᓉᑕᒧᒃ᙮ ᐅᒋ ᒌᑫᑕᒧᒃ ᐁᐐᒌᐌᒃ ᑳᑎᐯᒋᑫᒡ, ᐐᓐ ᐄᑐᒃ ᑳᐃᔑᒋᑫᑕᒪᐎᓀᒃ ᓇᐃ ᐱᑯ ᒥᓂᒃ ᒋᑭᒥᐗᓂᓂᒃ ᐁᑕᒀᑭᓂᓂᒃ᙮ ᐐᓐ ᑳᐃᔑᒋᑫᒡ ᐌᒋ ᑭᒥᐗᓂᓂᒃ ᐁᑕᒀᑭᓂᓂᒃ, ᒋᑭᒥᐗᓂᓂᒃ ᑲᔦ ᑮᓰᑾᓂᓂᒃ ᑳᐱ ᓂᑖ ᐃᔑᐌᐸᒃ ᐅᑖᓈᕽ᙮ 24 ᑳᑕᔑ ᐸᐎᑲᓈᒋᑳᓱᒡ ᐸᑴᔑᑲᓐ ᓴ ᑲᔦ ᑕᒪᒨᔥᑭᓀᐗᓐ; ᑳᔑ ᐸᐎᔥᑭᑳᓱᐙᒡ ᔔᒥᓇᒃ ᓴ ᑲᔦ ᑕᐊᔮᒥᐲᐗᓐ᙮ ᐋᓬᐃᑉ ᑎᓄ ᐱᒥᑌ ᑲᔦ ᑕᐊᔮᒥᐲ᙮ 25 ᒦᑕᔥ ᒋᑮᐌ ᒦᓂᓇᑰᒃ ᑲᑭᓇ ᑕᓱᐱᐴᓐ ᒥᓂᒃ ᑫᑰᓐ ᑳᑮ ᐗᓂᒋᑫᔦᒃ ᐊᐲ ᐸᐸᑭᓀᒃ ᑮᑭᑖᐙᒡ ᑳᑮ ᑭᑎᑳᑕᒧᐌᑭᐸᓐ᙮ ᓃᓐ ᐄᑐᒃ ᑳᑮ ᐲᒋᓂᔕᐗᒀ ᐃᑭ ᐸᐸᑭᓀᒃ ᑳᔑ ᐊᔮᔦᒃ ᑳᑮ ᐹᑏᓄᐙᒡ ᑖᐱᔥᑰ ᔑᒫᑲᓂᔕᒃ ᑳᐊᐲᒋ ᐹᑏᓄᐙᒡ᙮ 26 ᐋᐱᒋ ᑕᔥ ᑭᑲ ᐌᓅᒋᑑᒻ ᒦᒋᒻ ᑫᒦᒋᔦᒃ, ᒦᔥ ᐐᑫ ᒋᑌᐐᓯᓂᔦᒃ᙮ ᒦᔥ ᑲᔦ ᒋᒦᑴᒋᐌᑕᒧᐌᒃ ᐅᑎᔑᓂᑳᓱᐎᓐ ᑳᑎᐯᒋᑫᒡ ᑭᑭᔐᒪᓂᑑᒥᐙ, ᐋᓃᔥ ᐐᓐ ᑳᑭᒋ ᐃᔑᒋᑫᑕᒪᐎᓀᒃ᙮ ᑳᐐᓐ ᑕᔥ ᒦᓇᐙ ᐐᑳ ᓂᐱᒫᑎᓰᒪᒃ ᑕᐊᑲᒋᓰᐗᒃ᙮ 27 ᒦ ᓴ ᑕᔥ ᐃᐃ ᒋᑭᑫᑕᒣᒃ ᓃᓐ ᑳᑎᐯᒋᑫᒡ ᐁᑎᓄᐎᔮᓐ ᐃᐃᒫ ᐃᔅᕒᐃᔭᓬᐃᑳᕽ᙮ ᓃᓐ ᑳᑎᐯᒋᑫᒡ ᐁᐅᑭᔐᒪᓂᑑᒥᒥᔦᒃ, ᑳᐐᓐ ᐸᑳᓐ ᒪᓂᑑ ᐊᔮᓰ᙮ ᑳᐐᓐ ᑕᔥ ᒦᓇᐙ ᐐᑳ ᓂᐱᒫᑎᓰᒪᒃ ᑕᐊᑲᒋᓰᐗᒃ᙮ ᑳᑎᐯᒋᑫᒡ ᐅᑮᔑᑲᓄᒻ ᐁᐯᔓᓈᑾᓂᓂᒃ 28 ᓈᓈᑫ ᑕᔥ ᓂᑲ ᓰᑭᓇᒪᐙᒃ ᓂᓐᑕᒑᑾᓐ ᑳᔑ ᐊᔮᐙᒡ ᑲᑭᓇ ᐯᒫᑎᓯᐙᒡ᙮ ᑭᑯᓯᓯᐙᒃ, ᑭᑖᓂᓯᐙᒃ ᑲᔦ ᑕᒦᓂᑰᐎᓯᐗᒃ ᒋᑲᓅᑕᒪᐙᐙᒡ ᑭᔐᒪᓂᑑᓐ᙮ ᑭᑕᑭᐌᓰᒥᐙᒃ ᓴ ᑕᐸᐙᒋᑫᐗᒃ᙮ ᑭᑑᔥᑭᓃᑮᒥᐙᒃ ᑕᔥ ᐅᑲ ᐙᐸᑖᓈᐙᓐ ᐃᔑᓇᒧᐎᓇᓐ᙮ 29 ᐊᐲ ᓴ ᑮᔑᑲᒃ ᓰᑭᓇᒃ ᓂᓐᑕᒑᒃ ᓂᑕᓄᑮᐋᑲᓇᒃ ᐁᑴᐎᐙᒡ, ᐁᓂᓃᐎᐙᒡ ᑲᔦ ᓴ ᑫᐐᓇᐙ ᑕᒦᓂᑰᐎᓯᐗᒃ᙮ 30 ᓂᑲ ᓈᑯᑑᓇᓐ ᑕᔥ ᓂᒫᒪᑳᒋᒋᑫᐎᓇᓐ ᑮᔑᑯᕽ, ᐃᐃᒫ ᐊᑮᕽ, ᒋᓈᑾᒃ ᒥᔅᑶ, ᐃᔥᑯᑌ, ᐐᑫ ᑲᔦ ᒋᐗᑸᐙᐸᑌᒃ᙮ 31 ᐊᐊ ᑕᔥ ᑮᓯᔅ ᑕᓂ ᑲᔥᑮᑎᐱᑭᓯ, ᑎᐱᑭᑮᓯᔅ ᑕᔥ ᑕᓂ ᒥᔅᑯᓯ ᑖᐱᔥᑰ ᒥᔅᑶ ᒋᑆ ᐅᒋᒋᓭᓂᒃ ᑳᐐ ᑭᒋ ᐃᔑᑮᔑᑲᓂᓂᒃ, ᑳᐐ ᑲᒀᓂᓴᑫᑖᑾᓂᓂᒃ ᑳᑎᐯᒋᑫᒡ ᐅᑮᔑᑲᓄᒻ᙮ 32 ᐊᐌᓀᓐ ᑕᔥ ᐃᑯ ᑫᑲᓅᓈᒡ ᑳᑎᐯᒋᑫᓂᒡ ᒋᓈᑕᒫᑯᒡ ᑕᐱᒫᒋᐋ᙮ ᒦ ᐄᑐᒃ ᐅᐅ ᑳᑎᐯᒋᑫᒡ ᐁᑭᑐᒡ, ᐋᓂᑕ ᓴ ᒉᕒᐆᓴᓬᐊᒥᕽ Jerusalem ᐁᔮᐙᒡ ᑕᔖᐾᐗᒃ; ᐃᑭᐌᓂᐗᒃ ᓃᓐ ᐐᓐ ᑫᐅᓈᐸᒪᒀ ᑕᐱᒫᑎᓯᐗᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society