Coowel 1 - ᐅᒋᐺ ᑭᒋᒪᓯᓇᐃᑲᓐ1 ᒦ ᓴ ᐅᐅᐌᓂ ᒎᐌᓬ Joel ᑳᑮ ᐅᑌᑌᒡ ᐲᑑᐌᓬ Pethuel ᐁᔑᓂᑳᓱᓂᒡ ᑳᐃᑯᒡ ᑳᑎᐯᒋᑫᓂᒡ ᒋᐃᔑ ᐐᑕᒫᑫᒡ᙮ ᐯᒫᑎᓯᐙᒡ ᑮᒪᐎᑕᒧᐙᒡ ᑮᓂᔑᐗᓈᑕᓂᓂᑭᓐ ᐅᑭᑎᑳᓂᐙᓐ 2 ᐱᓯᑕᒧᒃ ᐅᐅ ᑮᓇᐙ ᑳᑭᑖᑎᓯᔦᒃ; ᑲᑭᓇ ᒎᑕ Judah ᐊᑮᕽ ᐁᔮᔦᒃ᙮ ᐐᑳ ᓇ ᐅᐅᐌ ᑮᐱᒥ ᐃᔑᐌᐸᓐ ᐅᑖᓈᕽ ᑳᐱᒫᑎᓯᔦᒃ, ᑮᐱᒫᑎᓯᐙᐸᓐ ᑲᔦ ᑭᑫᑌᔭᐋᒥᐙᐸᓃᒃ? 3 ᐐᑕᒪᐎᑾᒃ ᑭᓃᒑᓂᓯᐙᒃ ᒋᓂ ᐐᑕᒪᐙᐙᒡ ᐅᓃᒑᓂᓯᐙᐞ, ᒋᐊᓂ ᐋᓂᑫ ᐐᑕᒪᐙᓂᒡ ᐃᑕᔥ ᐅᓃᒑᓂᓯᓂ᙮ 4 ᐐᑫ ᓴ ᑕᐹᑏᓉᐙᓇᑭᓯᐗᒃ ᐸᐸᑭᓀᒃ ᑫᑕᑯᔑᓄᐙᒡ ᑭᑭᑎᑫᐎᓂᐙᕽ᙮ ᐯᔑᑴᐙᓐ ᓴ ᑫᐃᔥᑾᑕᒧᐙᒡ ᑭᑭᑎᑳᓂᐙᓐ, ᒦᐗᓐ ᓴ ᐃᓂ ᑯᑕᒃ ᑫᑭᑖᐙᒡ᙮ 5 ᑯᔥᑯᓯᒃ, ᒪᐎᒃ ᑮᓇᐙ ᑳᑮᐗᔥᑴᐲᔥᑭᔦᒃ; ᒪᐎᒃ ᑲᑭᓇ ᑳᓂᑖ ᒥᓂᑴᔦᒃ ᔔᒥᓈᐳ᙮ ᒦ ᐃ ᐄᑐᒃ ᐁᒪᑲᒥᑰᔦᒃ ᒋᒥᓂᑴᓯᐌᒃ᙮ 6 ᐸᐸᑭᓀᒃ ᓴ ᐁᐹᑏᓄᐙᒡ ᐁᓲᑫᑖᑯᓯᐙᒡ ᐱᑕᑯᔑᓅᒃ ᑭᑕᑮᒥᓈᓂᕽ; ᐋᐱᒋ ᐁᐹᑏᓄᐙᒡ᙮ ᑳᐐᓐ ᑕᑲᔥᑭᐋᓰᐗᒃ ᒋᐊᑭᒥᑣᐸᓐ᙮ ᒥᔑᐱᔒᕽ ᓴ ᐊᐲᒋ ᑳᔖᐱᑌᐗᒃ᙮ 7 ᐐᑫ ᓴ ᐅᓂᔑᐗᓈᒋᑑᓈᐙᓐ ᑳᔑ ᓂᑖᐎᑭᓂᒡ ᔔᒥᓇᐞ᙮ ᐱᒃ fig ᑎᓄᐙᑎᑰᐞ ᑲᔦ ᐐᑫ ᐅᓂᔑᐗᓈᒋᐋᐙᐞ᙮ ᐗᓇᑫᑾᐞ ᑲᔦ ᐐᑫ ᐅᓂᔑᐗᓈᒋᐋᐙᐞ, ᒦᔥ ᐁᓂᔑ ᐙᐱᔥᑳᓂᑭᓐ ᐗᑎᑾᓇᓐ ᐁᓈᐱᓇᑑᐙᒡ᙮ 8 ᐯᒫᑎᓯᔦᒃ, ᒪᐎᒃ ᒋᐃᔑᒋᑫᔦᒃ ᑖᐱᔥᑰ ᐯᑭ ᐅᔥᑭᓃᑭᑴ ᑳᔑ ᒪᐎᒡ ᐁᑭᑭᔥᑲᕽ ᐊᓴᐸᑕᐲᐌᑭᓐ᙮ ᒦ ᐄᑐᒃ ᐁᔑᒋᑫᒡ ᑮᒪᐎᒫᒡ ᑮᐗᓂᐋᒡ ᑳᐐ ᐅᓈᐯᒥᐸᓐ᙮ 9 ᑳᐐᓐ ᐅᔕ ᐊᐗᔑᒣ ᐸᑴᔑᑲᓐ ᑳᐸᑭᑎᓂᓐᒡ, ᔔᒥᓈᐳ ᑲᔦ ᑳᐸᑭᑎᓂᑳᑌᒃ ᑭᒋ ᐊᓇᒥᐁᐎᑲᒥᑯᕽ ᐊᔮᓯᓅᓇᓐ᙮ ᒦᔥ ᑳᐅᒋ ᒪᐎᐙᒡ ᐊᓇᒥᐁᐎᑭᒫᒃ, ᐃᑭ ᑲᔦ ᑳᐸᒦᑕᐙᐙᒡ ᑳᑎᐯᒋᑫᓂᒡ᙮ 10 ᑭᑎᑫᐗᑲᒥᑰᓐ ᓴ ᐐᑫ ᒪᔕᔥᒀᐗᓐ, ᒥᑕᑲᒥᒃ ᑲᔦ ᐐᑫ ᐹᑌ᙮ ᐸᑴᔑᑲᓐ ᐐᑫ ᐁᓂᔑᐗᓈᑎᓯᒡ, ᐅᔥᑭ ᔔᒥᓈᐳ ᑲᔦ ᓅᑌᓭ᙮ ᑳᐐᓐ ᑲᔦ ᐱᒥᑌ ᐅᒌᒪᑲᓯᓅᓐ᙮ 11 ᐸᑭᑌᑕᒧᒃ ᑮᓇᐙ ᑳᑭᑎᑫᔦᒃ᙮ ᑭᒋ ᒪᐎᒃ ᑮᓇᐙ ᑳᓂᑖᐎᑭᐁᒀ ᔔᒥᓇᒃ᙮ ᒋᒪᐎᒣᒃ ᐸᑴᔑᑲᓂᒥᓇᓐ, ᒪᓅᒥᓇᓐ ᑲᔦ ᐋᓃᔥ ᓅᑌ ᓂᔑᐗᓈᒋᒋᑳᑌᐗᓐ ᒋᒫᒨᔕᑭᓂᑳᑌᓯᓄᑭᓐ ᐊᐲ ᒪᓂᔑᑫᓈᓂᐗᕽ᙮ 12 ᔔᒥᓈᑎᑰᒃ ᓴ ᐐᑫ ᐹᓱᐗᒃ, ᐱᒃ fig ᑎᓄᐙᑎᑰᒃ ᑲᔦ᙮ ᑲᑭᓇ ᓴ ᑯ ᒥᑎᑰᒃ ᐹᓱᐗᒃ ᑳᔑ ᓂᑖᐎᑭᑭᓐ ᔒᐎᒦᒋᒪᓐ᙮ ᐯᒫᑎᓯᐙᒡ ᓴ ᑯ ᑳᒥᓉᑕᒧᐃᑯᐙᒡ ᑳᐐᓐ ᑕᑭᑫᑖᑾᓯᓂᓂ᙮ 13 ᑮᓇᐙ ᐁᓇᒥᐁᐎᑭᒫᐎᔦᒃ, ᑳᐸᒦᑕᐌᒃ ᑲᔦ ᑳᑎᐯᒋᑫᒡ ᑳᔑ ᐸᑭᑎᓈᓱᕽ, ᐱᓯᑲᒧᒃ ᐊᓴᐸᑕᐲᐌᑭᓐ ᒋᒪᒪᐎᔦᒃ᙮ ᐊᐯᔪᒃ, ᑲᐯᑎᐱᒃ ᐃᐃ ᐃᔑᑯᓇᔦᒃ, ᑮᓇᐙ ᑳᐸᒦᑕᐌᒃ ᐁᓈᓴᒦᒡ ᑳᑎᐯᒋᑫᒡ᙮ ᒋᐅᑕᑌᒧᔦᒃ ᐸᑴᔑᑲᓐ, ᔔᒥᓈᐳ ᑲᔦ ᑳᓂᑖ ᐸᑭᑎᓂᑳᑌᑭᐸᓀᓐ ᐁᑮ ᑮᔥᑭᓇᒫᑰᔦᒃ ᐃᐃᒫ ᑭᑭᔐᒪᓂᑑᒥᐙ ᐅᑭᒋ ᐊᓇᒥᐁᐎᑲᒥᑯᕽ᙮ 14 ᐊᓅᑮᒃ ᒋᐃᔑᒋᑳᓂᐗᕽ ᑫᑌᑖᑾᒃ ᒋᐐᓯᓂᓈᓂᐗᓯᓄᒃ ᒋᐊᓇᒥᐋᕽ; ᐊᑐᒻ ᒋᒫᐗᒋᐃᑎᐙᒡ ᐯᒫᑎᓯᐙᒡ᙮ ᐊᑐᒻ ᑲᑭᓇ ᑳᓃᑳᓂᓯᐙᒡ, ᑲᑭᓇ ᐃᐃᒫ ᐊᑮᕽ ᑳᐃᔑᑖᐙᒡ ᒋᐲᔖᐙᒡ ᐅᑕᓇᒥᐁᐎᑲᒥᑯᓃᕽ ᑳᑎᐯᒋᑫᓂᒡ ᑭᑭᔐᒪᓂᑑᒥᐙᓐ᙮ ᒦᔥ ᐃᐃ ᒋᔖᑯᐙᓈᐙᒡ! 15 ᐁᑕᑕᐌ ᐅᔕ ᐐᑭᒋ ᐃᔑ ᑮᔑᑲᓐ! ᑳᑎᐯᒋᑫᒡ ᐅᑮᔑᑲᓄᒻ ᐅᔕ ᐋᔕ ᑫᑳ ᐅᒋᒋᓭᓂ᙮ ᒦ ᓴ ᐃ ᐊᐲ ᑳᒫᐗᒋ ᒪᔥᑲᐎᓰᒡ ᑳᐐ ᑭᒋ ᓂᔑᐗᓈᒋᒋᑫᒡ᙮ 16 ᑭᑮ ᑲᓇᐙᐱᒥᓐ ᓴ ᐁᓂᔑᐗᓈᒋᒋᑳᑌᑭᓐ ᑳᑮ ᑭᑎᑳᑕᒪᕽ᙮ ᑳᐐᓐ ᓴ ᐋᐲᒋᑯ ᒥᓉᑕᒧᐎᓐ ᐊᔮᓯᓅᓐ ᑭᒋ ᐊᓇᒥᐁᐎᑲᒥᑯᕽ᙮ 17 ᑭᑎᑳᓀᓴᓐ ᓴ ᔒᑯ ᐹᑌᐗᓐ ᐹᑌᑲᒥᑯᑳᕽ᙮ ᑳᐐᓐ ᓴ ᑫᑰᓐ ᒦᒋᒻ ᐊᔮᓯᓅᓐ ᑫᓇᐃᓂᑳᑌᑭᐸᓐ᙮ ᒦᒋᒥᐎ ᐊᑖᓱᐎᑲᒥᑰᓐ ᓴ ᐐᑫ ᐲᑯᔥᑳᐗᓐ᙮ 18 ᐃᓇᔥᑫ ᐁᓉᐎᐃᑎᐙᒡ ᐱᔑᑭᐗᒃ, ᒥᓯᐌ ᐁᐸᐹᒧᓭᐙᒡ ᐋᓃᔥ ᑳᐐᓐ ᓂᑯᒋ ᐃᔑ ᒪᔥᑯᓰᑳᓯᓂᓂ᙮ ᒫᓇᒑᓂᔕᒃ ᑲᔦ ᑲᒀᑕᑭᑑᐗᒃ᙮ 19 ᑮᓐ ᑌᐯᒋᑫᔭᓐ, ᑮᓐ ᐅᔕ ᑳᔖᑯᐙᓂᓈᓐ! ᑳᔑ ᒪᒪᔥᑯᓰᑳᒃ ᐅᔕ ᐐᑫ ᒑᑳᑭᑌ᙮ ᒥᑎᑰᒃ ᓴ ᑲᔦ ᐐᑫ ᒑᑳᑭᓱᐗᒃ᙮ 20 ᐊᔭᐋᐎᔕᒃ ᐅᔕ ᑲᔦ ᑭᓇᓈᑐᒥᑰᒃ; ᐅᓵᒻ ᐋᓃᔥ ᐃᔅᑲᑌᐗᓐ ᓰᐲᓴᓐ᙮ ᐐᑫ ᑲᔦ ᑮᒑᑳᑭᑌ ᑳᔑ ᒫᔥᑯᓰᑳᑭᐸᓐ ᒥᔕᐗᑲᒥᒃ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society