Coop 5 - ᐅᒋᐺ ᑭᒋᒪᓯᓇᐃᑲᓐ1 ᓅᑯᒻ ᐃᑕᔥ ᑕᑲ ᑮᑭᑐᓐ, ᑕᑲ ᐊᐌᑴᓐ ᑫᓇᑴᑕᐎᓄᑴᓐ! ᐊᐌᓀᓐ ᐃᑕᔥ ᐃᓈ ᑫᑌᑖᑯᓯᒡ ᑫᓈᓯᑲᐗᑎᐸᓐ? 2 ᑫᑮᐹᑎᓯᒡ ᐃᓴ ᑳᔒᑫᑕᕽ ᐅᓂᓯᑰᓐ, ᐊᐎᔭ ᓴ ᑲᔦ ᑫᑫᑕᓯᒃ ᑫᑰᓐ ᐅᓂᓯᑰᓐ ᑳᐋᔮᔐᑕᕽ᙮ 3 ᓃᓐ ᓴ ᐱᑯ ᓂᐱ ᐙᐸᒫᒃ ᑫᑮᐹᑎᓯᐙᒡ ᐁᑯᑖᐎᑭᐙᒡ ᑫᐅᒋ ᑫᒋᓈᒡ ᐊᔮᐙᒡ, ᒦᔥ ᑳᐃᔑ ᑴᑕᑐ ᒪᒋᐃᑕᒧᐗᒃ ᐅᑖᐎᓂᐙᓐ᙮ 4 ᐅᓃᒑᓂᓯᐙᐞ ᓴ ᑳᐐᓐ ᐐᑳ ᑕᐊᔮᓰᐗᐞ ᐱᓵᓐ ᑫᔑ ᐱᒫᑎᓯᓂᒡ, ᑳᐐᓐ ᓴ ᐊᐎᔭᓐ ᐅᑲ ᓈᑕᒫᑯᓰᓂ ᑎᐹᑯᓂᒥᓐᒡ᙮ 5 ᑫᐗᔅᑲᑌᐙᒡ ᓴ ᐊᐎᔭᒃ ᐅᑲ ᒦᒋᓈᐙ ᑫᑮᐹᑎᓯᓂᒡ ᑫᑎᑳᑕᒥᓂᒡ, ᒥᓴᐙ ᑯ ᐃᓂ ᐸᑴᔑᑲᓂᒥᓇᓐ ᓀᑖᐎᑭᓂᓂᑭᓐ ᐁᔑ ᑳᐎᒥᓇᑲᔒᑳᓂᒃ᙮ ᑫᓅᑕᔮᐹᑴᓂᒡ ᓴ ᐅᑲ ᐊᔮᔐᓂᒥᑰᐞ ᑳᔑ ᐌᓅᑎᓯᒡ! 6 ᐐᓴᑫᑕᒧᐎᓐ ᓴ ᑳᐐᓐ ᐅᒌᒪᑲᓯᓅᓐ ᒪᑲᑌᐗᑲᒥᑯᕽ, ᑳᐐᓐ ᑲᔦ ᒫᔑᓭᐎᓐ ᐊᑮᕽ ᐅᒋ ᓂᑖᐎᑭᓯᓅᓐ᙮ 7 ᔖᑰᒡ ᐃᑕᔥ ᐃᓂᓂ ᐃᔑ ᓂᑖᐎᑭ ᒋᒫᔑᓭᒡ, ᑖᐱᔥᑰ ᑯ ᑫᒋᓈᒡ ᑳᔑ ᐃᔥᐱᓭᒃ ᑳᐸᑭᓀᒃ᙮ 8 ᑮᔥᐱᓐ ᐃᑕᔥ ᐃᐃ ᐃᔑᓭᑭᐸᓐ, ᓃᓐ ᓴ ᐐᓐ ᓂᑖᑮ ᓈᓯᑲᐙ ᑭᔐᒪᓂᑑ ᒋᐸᑭᑎᓇᒪᐗᑭᐸᓐ ᐅᐅ ᐃᔑᓭᐗᒃ᙮ 9 ᐐᓐ ᐄᑐᒃ ᐅᑭᒋ ᐃᔑᒋᑫᐎᓇᓐ ᑳᑲᔥᑭᒋᑳᑌᓯᓂᓂᑭᓐ ᒋᓂᓯᑐᒋᑳᑌᓂᑭᓐ, ᐅᒫᒪᑳᒋᒋᑫᐎᓇᓐ ᑲᔦ ᑳᐐᓐ ᑲᔥᑭᒋᑳᑌᓯᓂᓂᐗᓐ ᒋᐊᑭᒋᑳᑌᓂᑭᓐ᙮ 10 ᐐᓐ ᐄᑐᒃ ᑳᐃᔑᒋᑫᒡ ᒋᑭᒥᐗᓂᓂᒃ ᐅᐅᒫ ᐊᑮᕽ, ᑳᐃᔑᒋᐗᓂᑑᒡ ᓂᐲᓂ ᒥᔕᐗᑲᒥᒃ᙮ 11 ᐅᑎᔥᐯᑖᑯᓯᐋᐞ ᑲᔦ ᐃᐃ ᑳᑕᐸᓭᓂᒧᓂᒡ, ᐅᓈᑲᒋᐋᐞ ᓴ ᐃᐃ ᑳᒫᓀᑕᒥᓂᒡ᙮ 12 ᐅᐗᓇᔥᑴᐋᐞ ᓴ ᐙᐃᔑᒋᑫᓂᐸᓐ ᑳᓇᑲᒋ ᑲᑲᔦᓂᓯᓂᒡ, ᒦᔥ ᐁᔑ ᐋᓇᐌᐎᓯᓂᒡ ᐙᐃᔑᒋᑫᓂᐸᓐ᙮ 13 ᒦᑕᔥ ᑲᔦ ᐁᔑ ᑳᒋᑎᓈᒡ ᑫᑮᑖᐌᓂᑎᓱᓂᒡ ᑳᔑ ᓇᑲᒋ ᑲᑲᔦᓂᓯᓂᒡ, ᒦᔥ ᐙᐃᔑᒋᑫᓂᐸᓐ ᑳᐐᓐ ᑭᑫᑖᑾᓯᓂᓂ᙮ 14 ᑳᑲᔥᑮᑎᐱᑲᓂᓂᒃ ᓴ ᐅᑑᑎᓯᑯᓈᐙ ᐁᑮᔑᑲᓂᓂᒃ, ᑮᓈᐗᑴᓂᒃ ᐃᔑᓈᑯᓯᐗᒃ ᑖᐱᔥᑰ ᑳᓇᓈᑐᒌᓂᑫᒡ ᑳᑲᔥᑮᑎᐱᑲᓂᓂᒃ᙮ 15 ᑭᔐᒪᓂᑑ ᓴ ᐅᓈᑕᒪᐙᐞ ᑫᑎᒫᑭᓯᓂᒡ ᒋᐅᑎᓯᑯᓯᓂᒃ ᓂᐳᐎᓐ, ᐅᓈᑕᒪᐙᐞ ᑲᔦ ᑫᑎᒫᑭᓯᓂᒡ ᒋᐌᓵᓂᐃᒫᓯᐎᒥᓐᒡ᙮ 16 ᒦᑕᔥ ᑫᑎᒫᑭᓯᓂᒡ ᐌᒋ ᐊᐯᓂᒧᓂᒡ, ᑳᒪᒉᑖᑾᒃ ᓴ ᑕᔥ ᑳᐐᓐ ᑕᓅᑖᑏᒪᑲᓯᓅᓐ᙮ 17 ᔕᐌᑖᑯᓯ ᓴ ᐃᓂᓂ ᑫᑾᔭᑯᓂᑯᒡ ᑭᔐᒪᓂᑑᓐ, ᑫᑯ ᑕᔥ ᐋᓇᐌᑕᒧᐙᑫᓐ ᑮᒫᒦᓄᓂᒃ ᑳᒫᐗᒋ ᒪᔥᑲᐎᓰᒡ᙮ 18 ᐅᓰᑑᐱᑑᓐ ᓴ ᑫᑰᓐ ᑮᒫᑭᑑᒡ, ᐅᓂᒌᕽ ᓴ ᐅᒋ ᐐᓴᑫᑕᒧᐃᐌ, ᒦᔥ ᑲᔦ ᐃᐃᒫ ᐅᓂᒌᕽ ᐌᒋ ᐊᑕᐎᐃᐌᒡ᙮ 19 ᓂᑯᑣᒋᕽ ᓴ ᐅᑎᓯᑯᐗᒡ ᒫᔑᓭᐎᓇᓐ, ᑭᑲ ᓇᓈᑕᒫᒃ᙮ ᓃᔣᒋᕽ ᐃᑕᔥ ᐅᑎᓯᑯᐗᒡ, ᒦ ᐃ ᑳᐐᓐ ᑲᓇᑫ ᑭᑲ ᐃᔑ ᐐᓴᑫᑕᓰ᙮ 20 ᐊᐲ ᓴ ᐊᔮᓯᓂᓂᒃ ᒦᒋᒻ ᐅᐅᒫ ᐊᑮᕽ, ᑭᑲ ᓈᑕᒫᒃ ᓴ ᒋᑲᐗᔅᑲᑌᐙᓯᐗᒡ, ᒦᑳᑎᐎᓐᒡ ᑲᔦ ᑭᑲ ᓈᑕᒫᒃ ᒋᓂᓯᑰᐙᓯᐗᒡ᙮ 21 ᑭᔐᒪᓂᑑ ᓴ ᑲᔦ ᑭᑲ ᓈᑕᒫᒃ ᒪᒋ ᑕᔑᒥᑰᐗᒡ, ᑭᑲ ᑲᓇᐌᓂᒥᒃ ᑲᔦ ᒦᑳᑎᐎᓐᒡ ᒋᓂᓯᑰᐙᓯᐗᒡ᙮ 22 ᑭᑲ ᐹᐱᑑᓐ ᓴ ᓀᔑᐗᓈᒋᒋᑫᒪᑲᒃ, ᒦᒋᒻ ᑲᔦ ᑳᓅᑌᓭᒃ, ᑳᐐᓐ ᑭᑲ ᑯᓵᓰᒃ ᐊᔭᐋᐎᔕᒃ ᐁᔮᐙᒡ ᐊᑮᕽ᙮ 23 ᑳᐐᓐ ᓴ ᑲᔦ ᐊᓯᓃᒃ ᑕᐊᔮᓰᔀᒃ ᑫᔑ ᐱᑭᔥᑲᑲᒥᑲᐃᑫᔭᓐ ᒥᔕᐗᑲᒥᒃ, ᐱᑾᒋ ᐊᔭᐋᐎᔕᒃ ᐱᓵᓐ ᑭᑲ ᐐᒌᐎᑰᒃ᙮ 24 ᒦᑕᔥ ᒋᑭᑫᑕᒪᓐ ᐱᓵᓐ ᒋᐊᔨᑖᔭᓐ ᑭᐸᒀᓀᑲᒥᑯᕽ; ᓈᓈᑲᓴᐙᐸᑕᒪᓐ ᓴ ᑭᑕᔭᐄᒪᓐ, ᑳᐐᓐ ᓴ ᑫᑰᓐ ᑭᑲ ᐗᓂᑑᓰᓐ᙮ 25 ᑭᑲ ᑭᑫᑖᓐ ᓴ ᑲᔦ ᒋᐹᑏᓄᐙᒡ ᑭᓃᒑᓂᓴᒃ, ᑭᐲᐌᓰᒪᒃ ᓴ ᑕᑕᔑᐗᒃ ᑖᐱᔥᑰ ᒪᔥᑯᓰᓐ ᑳᑕᓯᑭᓐ ᐅᐅᒫ ᐊᑮᕽ᙮ 26 ᑖᐱᔥᑰ ᓴ ᐸᑴᔑᑲᓂᒥᓇᓐ ᑳᑮᔑᑭᑭᓐ ᒋᒪᓂᔑᑳᑌᑭᓐ, ᒦ ᓴ ᑫᐃᔑᓈᑾᒃ ᑭᐱᒫᑎᓯᐎᓐ ᐊᐲ ᐊᑭᐌᓰᐎᔭᓐ᙮ 27 ᐃᓇᔥᑫ ᓴ ᓂᑮ ᐊᑕ ᑭᑫᑖᒥᓐ ᐅᐅ, ᓂᑭᑫᑖᒥᓐ ᓴ ᐁᑌᐺᐎᓂᐗᕽ᙮ ᓅᑕᓐ ᓴ ᐅ, ᒋᑭᑫᑕᒪᓐ ᒋᒥᓄᑑᑖᑯᔭᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society