Coop 31 - ᐅᒋᐺ ᑭᒋᒪᓯᓇᐃᑲᓐᒎᑉ ᐃᔥᒀᒡ ᑮᑲᓅᑕᒫᓱᒡ 1 ᒦᑕᔥ ᑳᐃᔑ ᐊᔩᒋ ᐊᔓᑕᒫᑎᓱᔮᓐ, ᓂᔥᑮᔑᑯᕽ ᐐᑳ ᒦᓇᐙ ᒋᒪᒋ ᒥᓴᐌᓂᒫᓯᐗᒃ ᑲᓇᐙᐸᒪᒃ ᐅᔥᑭᓃᑭᑴ᙮ 2 ᐋᓃᓐ ᐃᑕᔥ ᐃᓂᓂ ᑫᑑᑖᑯᐸᓐ ᑳᒫᐗᒋ ᒪᔥᑲᐎᓰᓂᒡ ᑭᔐᒪᓂᑑᓐ ᐃᔥᐱᒥᕽ ᐁᔮᓂᒡ? ᐋᓃᓐ ᓴ ᓈ ᑫᔑ ᑮᐌ ᑎᐸᐊᒫᑯᐸᓐ? 3 ᐐᓐ ᐄᑐᒃ ᑭᔐᒪᓂᑑ ᑳᑑᑕᐙᒡ ᒣᒑᑎᓯᓂᒡ, ᒣᒫᔒᓂᒡ ᑲᔦ ᒋᓂᔑᐗᓈᑎᓯᓂᒡ, ᒋᒫᔑᓭᓂᒡ ᑲᔦ᙮ 4 ᐅᑭᑫᑖᓐ ᐄᑐᒃ ᐃᓇᑫ ᐁᔑᒋᑫᐗᒃ, ᐁᐙᐸᑕᕽ ᐁᑕᓱ ᑕᑯᑮᐗᒃ᙮ 5 ᑮᔥᐱᓐ ᑮᐃᔑ ᐱᒫᑎᓯᔮᐹᓐ ᒋᑮᐗᓂᒧᔮᓐ, ᐱᒥᓂᔕᐊᒫᐹᓐ ᑲᔦ ᑲᑲᔦᓂᓯᐎᓐ, 6 ᑕᑲ ᓴ ᑭᔐᒪᓂᑑ ᓂᑲᔑ ᐊᑕ ᑭᑫᓂᒥᒃ ᑳᑌᐺᒪᑲᓂᓂᒃ ᐅᑎᐹᐲᔥᑰᒋᑲᓂᕽ, ᒦᔥ ᒋᑭᑫᑕᕽ ᑫᑰᓐ ᐁᐃᔑ ᐊᓈᒣᑖᑯᓯᓰᐗᒃ! 7 ᑮᔥᐱᓐ ᑳᓇᑲᑕᒧᐙᓀᓐ ᑾᔭᒃ ᒦᑲᓇ, ᑯᒫ ᑲᔦ ᓂᑌᐃᕽ ᐅᒋ ᓈᓯᑲᒫᐹᓐ ᐁᐙᐸᑕᒫᓐ ᒪᒋᑫᑰᓐ, ᑯᒫ ᑲᔦ ᓂᓂᒌᕽ ᐅᒋ ᒪᒋᑑᑕᒫᓐ, 8 ᒦ ᓴ ᐄᓴᓐ ᑯᑕᒃ ᒋᒦᒋᐙᒡ ᑳᑮ ᑭᑎᑳᑕᒧᐗᒃ, ᒦᔥ ᓀᑖᐎᑭᑑᔮᓐ ᒋᐸᑾᑕᑮᐱᒋᑳᑌᑭᓐ᙮ 9 ᑮᔥᐱᓐ ᓴ ᑲᔦ ᓂᑌᐃᕽ ᐅᒋ ᒥᓴᐌᓂᒥᒪᒃ ᓂᐐᒋᑖᒫᑲᓐ ᐐᐗᓐ, ᑕᔑ ᐊᑲᒪᐎᒪᒃ ᐃᓴ ᐃᔥᒀᑌᕽ, ᐊᐎᔭ ᑫᔑ ᐙᐸᒥᓯᒃ 10 ᒦᔥ ᐄᓴᓐ ᓂᐐᐤ ᐱᓵᓐ ᒋᑭᔑᑌᐴᓈᐸᓐ ᐸᑳᓐ ᐃᓂᓂᐗᓐ, ᒋᐐᐯᒥᑯᐸᓐ ᑲᔦ ᑯᑕᒃ ᐸᑳᓐ ᐃᓂᓂᐗᓐ᙮ 11 ᐋᐱᒋ ᐄᑐᒃ ᐃᐃ ᑕᑭᒋ ᐊᑲᑌᑖᑾᓐ, ᒪᒋᒋᑫᐎᓐ ᑫᓇᓇᐊᒋᑳᑌᑭᐸᓐ! 12 ᒦ ᓴ ᐃᐌ ᐃᔥᑯᑌ ᑳᐊᒀᑭᓯᑫᒪᑲᒃ, ᑫᐅᒋ ᒑᑳᑭᑌᒃ ᑲᑭᓇ ᑫᑰᓐ ᐁᔮᔮᓐ᙮ 13 ᑮᔥᐱᓐ ᓴ ᐌᐌᓂ ᑳᑑᑕᐙᓯᐗᒀᐸᓐ ᓂᑕᓄᑮᐋᑲᓇᒃ, ᐊᐲ ᐁᑲᓅᔑᐙᒡ ᑫᑰᓐ ᐁᐃᔑ ᒫᔑ ᑑᑕᐗᒀ, 14 ᐋᓃᓐ ᐃᑕᔥ ᐃᓈ ᑫᐃᔑᒋᑫᐗᑭᐸᓐ ᐊᐲ ᑭᔐᒪᓂᑑ ᐅᒋᔥᑲᐎᑳᐸᐎᑕᐗᒃ? ᐋᓃᓐ ᐃᓴ ᐃᓈ ᑫᔑ ᓇᑴᑕᐗᑭᐸᓐ ᐅᓈᑯᓂᒡ? 15 ᒦ ᐄᑐᒃ ᐊᐊ ᐯᔑᑾᓐ ᑭᔐᒪᓂᑑ ᑳᑮ ᐅᔑᐃᒡ ᐅᒥᓴᑖᓃᕽ ᓂᒫᒫᓐ, ᑳᑮ ᐅᔑᐋᒡ ᑲᔦ ᓂᑕᓄᑮᐋᑲᓇᐞ᙮ 16 ᑳᐐᓐ ᓴ ᐐᑳ ᓂᑖᓉᑕᓰ ᒋᐐᒋᐊᒀᐸᓐ ᑫᑎᒫᑭᓯᐙᒡ ᐁᔑ ᓅᑌᓭᐙᒡ; ᑮᐙᒋᑴᐗᒃ ᑲᔦ ᑳᐐᓐ ᐐᑳ ᓂᐸᑭᑎᓈᓰᒃ ᒋᑰᐹᒋᓭᐙᒡ᙮ 17 ᑳᐐᓐ ᓴ ᐐᑳ ᓂᑎᔑᒋᑫᓰ ᒋᓅᑌᔅᑲᑌᒡ ᒋᐊᔕᒫᓯᐗᑭᐸᓐ ᑸᐗᔑᔖᓐ ᒣᒀ ᐁᐐᓯᓂᔮᓐ᙮ 18 ᐊᐲ ᓴ ᑯ ᑮᐱᐅᒋ ᐅᔥᑳᑎᓯᔮᓐ, ᓂᑮ ᐱᐅᒋ ᓈᓈᑲᒋᐋ ᑖᐱᔥᑰ ᐅᑌᑌᒫ ᐁᔑᒋᑫᒡ, ᑮᓂᑖᐎᑭᔮᓐ ᓴ ᓂᑮ ᐱᐅᒋ ᓈᓈᑲᒋᐋ ᑮᐙᒋᑴ᙮ 19 ᐊᐲ ᓴ ᑮᐙᐸᒪᒃ ᐊᐎᔭ ᑫᑰᓐ ᐁᓅᑌᓭᒡ, ᐅᓵᒻ ᐁᑭᑎᒫᑭᓯᒡ ᒋᐊᑖᐌᒡ ᑭᑭᔥᑭᑲᓇᓐ, 20 ᒦ ᓴ ᐁᔑ ᒦᓇᒃ ᑫᑭᑭᔥᑲᕽ ᐌᒌᓂᒃ ᒫᓇᒑᓂᔑᐗᔮᓂᕽ, ᑳᐅᑎᓇᒧᐗᒃ ᓂᒫᓇᒑᓂᔑᕽ᙮ ᒦᑕᔥ ᐁᔑ ᒦᑴᒋᐌᓂᒥᒡ ᒥᓯᐌ ᐅᑌᐃᕽ᙮ 21 ᑮᔥᐱᓐ ᓴ ᑳᒫᔑ ᑑᑕᐙᐗᑴᓐ ᑸᐗᔑᔖᓇᓐ, ᑭᑫᑕᒫᐹᓐ ᒋᐸᑭᓈᑫᔮᓐ ᐁᔑ ᑎᐹᑯᓂᑎᕽ, 22 ᑕᑲ ᓴ ᓂᓂᒃ ᑕᐅᒋ ᐸᑾᒋᓭ ᐁᔑ ᓴᑭᓯᕽ ᓂᑎᓂᒫᑲᓂᕽ, ᑲᔦ ᒋᐳᐴᑯᓭᑭᓐ ᓂᓂᑲᓐ᙮ 23 ᓂᑯᑕᒧᐙᓐ ᐅᔕ ᑭᔐᒪᓂᑑ ᐅᓇᓇᐊᔑᐌᐎᓐ, ᐁᑯᑕᒧᐗᒃ ᑲᔦ ᐁᔑ ᐅᑭᒫᐌᑖᑯᓯᒡ, ᑳᐐᓐ ᐃᐃ ᓂᑖ ᐃᔑᒋᑫᓰ᙮ 24 ᑮᔥᐱᓐ ᓴ ᐊᐯᓂᒧᓄᑕᐗᒃ ᐅᓵᐎ ᔔᓂᔮ, ᐃᔑᓂᑳᓇᒃ ᑲᔦ ᐅᓵᐎ ᔔᓂᔮ ᐌᒋ ᑫᒋᓈᐅᐌᓂᒧᔮᓐ, 25 ᐅᒋ ᑭᒋ ᐃᓀᓂᒧᔮᓐ ᑲᔦ ᐁᑭᒋ ᐌᓅᑎᓯᔮᓐ, ᐌᓅᑎᓯᐎᓐ ᓂᓂᒌᕽ ᑳᑮ ᐅᒋ ᑲᔥᑭᑑᔮᓐ, 26 ᑮᔥᐱᓐ ᑲᔦ ᑲᓇᐙᐸᒪᑭᐸᓐ ᑮᓯᔅ ᑮᓵᑳᓯᑫᒡ, ᑯᒫ ᑲᔦ ᑎᐱᑭᑮᓯᔅ ᑮᒥᓍᓯᑫᒡ, 27 ᑮᔥᐱᓐ ᐃᑕᔥ ᐃᐃᒫ ᓂᑌᐞ ᐅᒋ ᑮᒨᒋ ᑲᔥᑭᐃᑯᔮᐹᓐ ᒋᑭᑌᓂᒪᒀ, ᐅᒌᑕᒫᐹᓐ ᑲᔦ ᓂᓂᓐᒡ ᒋᐃᓍᑕᒫᓐ ᐁᑭᑌᓂᒪᒀ, 28 ᒦᐗᓐ ᓴ ᐅᓄ ᒪᒋᑑᑕᒧᐎᓇᓐ ᐁᔑᓈᑾᑭᐸᓐ ᒋᑎᐹᑯᓂᑳᑌᑭᐸᓀᓐ, ᐋᓃᔥ ᒦ ᐃ ᐄᓴᓐ ᐁᐃᑭᑐᔮᓐ ᐁᐊᔮᓯᒃ ᑭᔐᒪᓂᑑ ᐃᔥᐱᒥᕽ᙮ 29 ᐐᑳ ᓇ ᓂᑑᒋ ᒌᑫᑐᒧᐙᓐ ᐁᒫᔑᓭᐙᒡ ᑳᔒᑫᓂᒥᐙᒡ, ᓂᑑᒋ ᒥᓉᑕᒻ ᐃᓇ ᑲᔦ ᑮᐅᑎᓯᑯᐙᒡ ᒪᒋᑫᑰᓐ? 30 ᑳᐐᓐ ᓴ ᓂᐸᑭᑎᓂᑎᓱᓰ ᓂᑑᓂᕽ ᒋᐅᒋ ᒪᒋᑑᑕᒫᓐ, ᒋᑲᑴᑗᐗᑭᐸᓐ ᒋᒪᒐᑭᑌᓂᑭᓐ ᐅᐱᒫᑎᓯᐎᓂᐙᓐ᙮ 31 ᐐᑳ ᓇ ᐃᓂᓂᐗᒃ ᐁᓄᑮᑕᐎᐙᒡ ᑕᐃᑭᑐᐗᒃ, ᑰᓂᑫ ᐊᐎᔭ ᑕᒥᑲᐙ ᐐᑳ ᐌᒋ ᑌᐐᓯᓂᓯᒃ ᒎᐸᓐ Job ᐅᒦᒋᒥᒥᓃᕽ? 32 ᑳᐐᓐ ᓴ ᐐᑳ ᐲᐎᑌ ᐊᑾᒌᕽ ᐃᔑ ᓂᐹᓰ, ᒨᔕᒃ ᓴ ᑯ ᓂᑎᔥᒀᑌᒻ ᐹᑭᓯᓐ ᐱᓵᓐ ᐯᒥ ᐊᔮᐙᒡ ᒋᐲᑎᑫᐙᒡ ᓂᐙᑳᐃᑲᓂᕽ᙮ 33 ᑳᐐᓐ ᓴ ᐐᑳ ᓂᑲᑴ ᑳᑑᓰᓐ ᓂᒪᒋᑑᑕᒧᐎᓐ ᑖᐱᔥᑰ ᐋᑕᒻ Adam ᑳᑮ ᐃᔑᒋᑫᒡ, ᒋᑲᑴ ᑳᑑᔮᐹᓐ ᓂᒪᒋᐃᓀᑕᒧᐎᓐ ᓂᑌᐃᕽ, 34 ᐋᓃᔥ ᓂᑯᓵᒃ ᐊᐎᔭᒃ ᑳᐹᑏᓄᐙᒡ; ᐁᑯᑕᒧᐗᒃ ᑫᔑ ᒦᑭᓱᒥᐙᐸᓐ, ᒦ ᓴ ᑳᑮ ᐅᒋ ᓅᑖᑎᓰᐙᓐ ᐐᑳ ᐁᑮ ᓵᑲᐊᓯᐙᓐ᙮ 35 ᐊᐯᔥ ᐃᓈ ᐊᐎᔭ ᓅᑕᐎᒡ ᐅᐅ ᑳᐃᑭᑐᐗᒃ! ᑲᑭᓇ ᐅᔕ ᑳᐃᑭᑐᔮᓐ ᓂᑎᔑ ᑌᐺ᙮ ᑕᑲ ᑳᒫᐗᒋ ᒪᔥᑲᐎᓰᒡ ᑭᔐᒪᓂᑑ ᓂᑲ ᓇᑴᑖᒃ᙮ ᑕᑲ ᓴ ᐃᑭ ᐁᓈᒥᒥᐙᒡ ᒪᓯᓇᐄᑭᓄᕽ ᐅᑲ ᐃᔑ ᐅᔑᐲᐋᓈᐙ ᐋᓃᓐ ᐁᔑ ᐊᓈᒥᒥᐙᒡ᙮ 36 ᑫᒋᓈᒡ ᓴ ᓂᑎᓂᒫᑲᓂᕽ ᓂᑖ ᐸᐹ ᓈᐱᔥᑳᓐ, ᓂᑎᒀᓂᕽ ᑲᔦ ᓂᑖ ᑭᑭᔥᑳᓐ ᒋᐃᓍᑕᒫᐹᓐ ᑭᒋᐅᑭᒫᐙᓄᒀᓂᕽ᙮ 37 ᒦᑕᔥ ᑫᔑ ᐐᑕᒪᐗᑭᐸᓐ ᑲᑭᓇ ᑫᑰᓐ ᑳᐱ ᐃᔑᒋᑫᐗᒃ; ᒋᐱ ᓈᓯᑲᐗᑭᐸᓐ ᒋᐃᓀᓂᒧᔮᐹᓐ ᑖᐱᔥᑰ ᑭᒋᐅᑭᒫ ᐅᑯᓯᓴᓐ᙮ 38 ᑮᔥᐱᓐ ᓴ ᑳᑮᒨᑎᔮᐹᓐ ᐊᑭ ᑫᑎᑳᑕᒫᓐ, ᑳᒪᑲᒪᑭᐸᓐ ᐊᐎᔭ ᒪᔮ ᑌᐯᑕᕽ, 39 ᑮᔥᐱᓐ ᐃᐃᒫ ᐅᑕᒋᑫᔮᐹᓐ, ᑎᐸᐃᑫᓯᐙᐹᓐ ᐃᑕᔥ, ᑯᒫ ᑲᔦ ᓂᑎᔑᒋᑫᐎᓂᕽ ᐅᒋ ᑲᐗᔅᑲᑌᐙᒡ ᐅᑭᑎᑫᒃ, 40 ᑕᑲ ᓴ ᒣᔥᑾᒡ ᒪᔥᑯᓰᓐ, ᑳᐎᒥᓇᑲᔒᓐ ᑲᔦ ᑕᓂᑖᐎᑭᓅᓐ ᑫᑮ ᐃᔑ ᓂᑖᐎᑭᐸᓐ ᐸᑴᔑᑲᓐ, ᒪᓅᒥᓐ ᑲᔦ, ᑮᐃᑭᑐ ᒎᑉ᙮ ᒦ ᓴ ᐃ ᒥᓂᒃ ᑳᐃᑭᑐᒡ ᒎᑉ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society