Coop 2 - ᐅᒋᐺ ᑭᒋᒪᓯᓇᐃᑲᓐᒎᑉ ᑮᑲᑴᒋᐃᑯᒡ ᐅᓇᓇᑳᓂᐌᓐ 1 ᒦᓇᐙ ᑕᔥ ᐁᐃᔑ ᑮᔑᑲᓂᓂᒃ ᑭᒋᑮᔑᑯ ᐊᐎᔭᒃ ᑳᑮ ᓂᑖ ᐊᑕ ᐙᐸᒫᐙᐸᓐ ᑳᑎᐯᒋᑫᓂᒡ, ᑫᐐᓐ ᓴ ᐅᓇᓇᑳᓂᐌ ᐃᐃᒫ ᑮᐱ ᑕᑸ, ᐁᑮ ᐱ ᐊᑕ ᐙᐸᒫᒡ ᑳᑎᐯᒋᑫᓂᒡ ᐁᓈᓴᒦᓂᒡ᙮ 2 ᒦᑕᔥ ᑳᑎᐯᒋᑫᒡ ᑳᐃᔑ ᑲᑴᒋᒫᒡ ᐅᓇᓇᑳᓂᐌᓐ, ᐋᓃᑎ ᑮᓐ ᑳᐱᐅᒋ ᑕᑯᔑᓇᓐ? ᐅᑮ ᐃᔑ ᑲᑴᒋᒫᓐ᙮ ᒦᔥ ᐅᐅ ᐅᓇᓇᑳᓂᐌᓐ ᑳᐃᔑ ᓇᑴᑖᑯᒡ, ᐌᑎ ᓴ ᓂᑮ ᐱ ᐅᒌ ᐊᑮᕽ ᑳᔑ ᓂᑖ ᐸᐹᒧᓭᔮᓐ, ᑳᔑ ᓂᑖ ᐋᔮᔕᐎᔥᑳᔮᓐ ᑲᔦ, ᐅᑮᐃᑰᓐ᙮ 3 ᒦᑕᔥ ᑳᑎᐯᒋᑫᒡ ᑳᐃᓈᒡ ᐅᓇᓇᑳᓂᐌᓐ, ᑭᑑᒋ ᓈᓈᑲᑕᐙᐸᒫ ᓇ ᓂᑕᓄᑮᐋᑲᓐ ᒎᑉ Job? ᑳᐐᓐ ᓴ ᐊᐎᔭᓐ ᐃᐃᒫ ᐊᑮᕽ ᐃᔑᐊᔮᓰᐗᓐ ᐃᐃ ᑳᐃᔑᐊᔮᒡ᙮ ᑳᐐᓐ ᐊᐙᒡ ᑫᑰᓂᓂ ᐃᔑ ᐊᓈᒣᑖᑯᓯᓰ, ᐐᑫ ᑾᔭᒀᑎᓯ᙮ ᐅᑯᑖᓀᓂᒫᓐ ᑲᔦ ᑭᔐᒪᓂᑑᓐ, ᑳᐐᓐ ᑲᔦ ᐅᐸᐹᐱᓯᔅᑫᑕᓰᓐ ᒪᒋᑫᑰᓐ᙮ ᐋᒋᑯ ᓴ ᐅᑭᒋᐌᑖᓐ ᐅᒥᓍᑎᓯᐎᓐ, ᐋᓇ ᑯᑕ ᐐᓐ ᐁᑮ ᑲᔥᑭᒥᔭᓐ ᒋᐸᑭᑎᓂᓈᓐ ᐋᓃᓐ ᐃᑯ ᒋᑑᑕᐗᒡ, ᐌᒋᑑ ᓴ ᑯ ᐃᔑ ᐊᓂᔖ ᐃᐃ ᑳᑑᑕᐗᒡ, ᐅᑮᐃᓈᓐ᙮ 4 ᒦᔥ ᑳᐃᔑ ᓇᑴᑖᑯᒡ, ᐃᓂᓂ ᐅᔕ ᑲᑭᓇ ᑫᑰᓂᓂ ᐅᑲ ᐸᑭᑎᓈᓐ ᒋᐱᒫᒋᑑᒡ ᐐᓐ ᐃᑯ ᐅᐱᒫᑎᓯᐎᓐ᙮ 5 ᐃᓇᔥᑫ ᑫᑰᓂᓂ ᑑᑕᐤ ᐅᐐᔭᐎᕽ, ᒦᑕᔥ ᒋᒪᒋᐃᓈᐱᓀᒥᒃ ᐁᓈᓴᒦᐗᒡ, ᐅᑮᐃᑰᓐ᙮ 6 ᒦᔥ ᑳᑎᐯᒋᑫᒡ ᑳᐃᓈᒡ ᐅᓇᓇᑳᓂᐌᓐ, ᐊᐤ, ᐱᓵᓐ ᓴ ᑯ ᐙᑑᑕᐗᒡ ᑑᑕᐤ, ᑫᑯ ᑕᔥ ᐐᓐ ᓂᓵᑫᓐ, ᐅᑮᐃᓈᓐ᙮ 7 ᒦᑕᔥ ᐅᓇᓇᑳᓂᐌᓐ ᑳᐃᔑ ᓇᑲᓂᑯᒡ ᐁᔑᐊᔮᒡ ᑳᑎᐯᒋᑫᒡ᙮ ᐅᓇᓇᑳᓂᐌ ᑕᔥ ᐅᑮ ᐃᔑᐋᓐ ᒎᐸᓐ ᒋᐅᔑᑭᐱᓯᒥᓂᒡ, ᐅᑎᒀᓂᓃᕽ ᐲᓂᔥ ᐅᓯᑎᓃᕽ᙮ 8 ᒎᑉ ᑕᔥ ᑮᐃᔖ ᐌᐱᓂᑲᓂᕽ ᐁᑮ ᐊᐎ ᓇᓇᒪᑕᐱᒡ᙮ ᒦᑕᔥ ᐊᑭᑯᕽ ᑳᑮ ᐅᒋ ᐸᑴᓭᓂᒃ ᐅᑮ ᐋᐸᒋᑑᓐ ᐁᑮ ᑳᑲᔥᑲᐅᑎᓱᒡ᙮ 9 ᒦᔥ ᐐᐗᓐ ᑳᐃᑯᒡ, ᑫᔮᐱ ᓇ ᑭᑭᒋ ᐃᓀᑖᓐ ᑭᒥᓍᑎᓯᐎᓐ? ᐃᓇᔥᑫ ᒪᒋᐃᓈᐱᓀᒻ ᑭᔐᒪᓂᑑ ᒋᑆ ᓂᐳᔭᓐ, ᐅᑮᐃᑰᓐ᙮ 10 ᐅᐅ ᓴ ᐅᑮ ᐃᔑ ᓇᑴᑕᐙᓐ ᐐᐗᓐ, ᑳᑲᑮᐹᑎᓯᐙᒡ ᐃᑴᐗᒃ ᑳᐃᔑᑮᔗᐙᒡ ᓴ ᒪᔮ ᑭᑎᔑᑮᔗ᙮ ᑳᐐᓐ ᐃᓇ ᐃᔑᓈᑾᓯᓅᓐ ᐱᓵᓐ ᒋᐅᑖᐱᓇᒪᐗᑭᐸᓐ ᑭᔐᒪᓂᑑ ᑮᐲᒋᓂᔕᐊᒪᐎᓇᕽ ᐃᐃ ᐌᓂᔑᔑᓂᓂᒃ, ᐃᐃ ᑲᔦ ᐌᓯᑖᐌᑖᑾᓂᓂᒃ? ᑮᐃᑭᑐ᙮ ᐅᐅ ᓴ ᑲᑭᓇ ᒎᑉ ᐁᔑᓭᒡ, ᑳᐐᓐ ᑲᓇᑫ ᑫᑰᓐ ᑮᐃᑭᑐᓰ ᒋᑮ ᐅᒋ ᒪᒋᑑᑕᕽ᙮ ᒎᑉ ᑮᐱᐊᑕ ᐙᐸᒥᑯᒡ ᓂᓯᓐ ᑳᑮᓵᑭᐐᒌᐙᒡ 11 ᓂᓯᓐ 3 ᑕᔥ ᒎᑉ ᑳᑮ ᓵᑭᐃᑯᒡ ᐁᓅᑕᒥᓂᒡ ᐁᑭᒋ ᑲᒀᑕᑭᑑᒡ ᐅᑮ ᐱ ᐊᑕ ᐙᐸᒥᑰᐞ ᐁᐐ ᒥᓉᑕᒧᐃᑯᒡ᙮ ᒦᐗᐞ ᐃᑕᔥ ᐅᐅ ᐁᓬᐃᐹᔅ Eliphaz ᐆᑌᓈᕽ ᑏᒪᓐ Teman ᐌᒌᓂᒡ, ᐱᓬᑖᑦ Bildad ᔔᐊ Shuah ᐊᑮᕽ ᐌᒌᓂᒡ, ᐊᐊ ᑕᔥ ᑲᔦ ᓲᐸᕒ Zophar ᓀᐊᒪ Naamah ᐊᑮᕽ ᐌᒌᓂᒡ᙮ ᑮᐃᓀᑕᒧᓂᑯᐸᓐ ᐁᐐ ᓇᑭᔥᑯᑖᑎᓂᒡ ᒫᒪᐤ ᐁᐐ ᐱ ᐊᑕ ᐙᐸᒥᑯᒡ᙮ 12 ᓃᔮᒃ ᑕᔥ ᐙᓴ ᐁᐅᒋ ᑌᐹᐸᒫᐙᒡ ᐃᑭ ᐃᓂᓂᐗᒃ ᒎᐸᓐ, ᑳᐐᓐ ᑕᔥ ᐅᑮ ᓂᓯᑕᐎᓇᐙᓯᐙᐙᓐ᙮ ᐊᐲ ᑕᔥ ᑳᓂᓯᑕᐎᓇᐙᐙᒡ, ᒦ ᓴ ᐃ ᑳᐃᔑ ᑭᔒᐌᐙᒡ ᐁᑮ ᒪᐎᐙᒡ᙮ ᒦᔥ ᑳᐃᔑ ᑖᔥᑮᑭᐱᑑᐙᒡ ᐅᑲᔥᑮᑮᐎᓂᐙᓐ᙮ ᐱᑸᓂ ᑲᔦ ᐅᑮ ᐃᔑ ᐱᐎᐌᐱᓈᓈᐙ ᐅᑎᒀᓂᐙᓐ ᐁᑮ ᐱᑸᐎᑑᐙᒡ᙮ 13 ᒥᑕᑲᒥᒃ ᑕᔥ ᑮᐃᔑ ᐅᓇᐱᐗᒃ ᐁᑮ ᐐᑕᐱᒫᐙᒡ ᒎᐸᓐ᙮ ᓃᔣᓱᑮᔑᒃ, ᓃᔣᓱᑎᐱᒃ ᑲᔦ ᒥᓂᒃ ᑳᐐᓐ ᑮᐅᒋ ᑮᑭᑐᓰᐗᒃ, ᐋᓃᔥ ᐅᑮ ᐙᐸᒫᐙᓐ ᐋᓃᓐ ᑳᐊᐲᒋ ᐐᓴᑫᑕᒥᓂᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society