Coop 19 - ᐅᒋᐺ ᑭᒋᒪᓯᓇᐃᑲᓐᒎᑉ ᑳᑮᐃᔑᓇᑴᑕᐙᒡ ᑳᑮᐊᑕᐙᐸᒥᑯᒡ 1 ᒦᑕᔥ ᐅᐅ ᒎᑉ ᑳᐃᔑ ᓇᑴᑕᕽ, 2 ᐋᓃᓐ ᐃᑕᔥ ᒥᓂᒃ ᐙᑲᒀᑕᑭᒥᔦᒃ? ᑭᑑᓂᐙᕽ ᐁᐐ ᐅᑖᐱᓇᔑᔦᒃ? 3 ᐋᔕ ᑕᔥ ᒥᑖᒌᕽ ᑳᐐᓐ ᓭᓯᒃ ᑭᐱ ᑑᑕᐎᓰᒻ, ᑳᐐᓐ ᑲᔦ ᐊᐙᒡ ᐸᑮ ᑭᑕᑲᒋᓰᒻ ᐁᐐ ᒫᔑ ᑑᑕᐎᔦᒃ᙮ 4 ᒥᓴᐙ ᓴ ᑯ ᑌᐺ ᑳᒪᒫᔒᐙᓀᓐ, ᑳᐐᓐ ᓴ ᑮᓇᐙ ᑫᑰᓐ ᑭᑲ ᐸᑲᒥᔥᑳᑯᓰᒻ᙮ 5 ᑮᔥᐱᓐ ᓴ ᐁᓀᓂᑎᓱᐌᑴᓐ ᓇᐗᒡ ᑮᓇᐙ ᐁᐹᔑᑌᑖᑯᓯᔦᒃ ᐊᐲᒡ ᓃᓐ, ᐃᐃ ᑲᔦ ᑳᔑ ᒫᔑᓭᔮᓐ ᐐᐅᒋ ᑲᑴ ᐊᓈᒥᒥᔦᒃ, 6 ᒦᔥ ᐃᐃ ᒋᑭᑫᑕᒣᒃ ᑭᔐᒪᓂᑑ ᐄᑐᒃ ᑳᒫᔑ ᑑᑕᐎᒡ, ᐐᓐ ᑲᔦ ᑳᑲᑴ ᐱᑕᐋᔑᒡ ᐅᑕᓴᐲᕽ᙮ 7 ᐋᓇ ᑮᔑ ᔖᑯᐌᔮᓐ, ᓂᐗᓂᑑᑖᑰ, ᑳᐐᓐ ᓴ ᐊᐎᔭ ᓂᓅᑖᑯᓰ, ᐋᓇ ᑲᔦ ᑮᐃᑭᑐᔮᓐ ᒋᐐᒋᐃᑯᔮᓐ, ᑳᐐᓐ ᓴ ᐊᐎᔭ ᓂᐸᐹᒥᑖᑯᓰ᙮ 8 ᐐᓐ ᑲᔦ ᐅᑮ ᑭᐹᑯᓈᓐ ᐃᓇᑫ ᑳᐃᔖᐗᒃ, ᒦᔥ ᑳᐅᒋ ᑆᓇᐎᑑᔮᓐ ᒋᔖᐳᔥᑳᔮᓐ, ᐅᑲᔥᑮᑎᐱᑭᑑᓐ ᓴ ᒦᑲᓈᓂ ᑳᐃᔖᐗᒃ᙮ 9 ᓂᑮ ᒪᑲᒥᒃ ᑲᔦ ᐁᔑ ᐌᓅᑎᓯᐗᑭᐸᓐ, ᐐᓐ ᑲᔦ ᑳᑮ ᐅᑖᐱᓇᒪᐎᒡ ᑳᑮ ᐃᔑ ᓴᓭᑳᐌᑖᑯᓯᐗᑭᐸᓐ᙮ 10 ᒥᓯᐌ ᑲᔦ ᐙᑳᔭᐄ ᓂᑑᒋ ᐲᑯᐱᓂᒃ, ᒦᔥ ᐃᐃ ᐲᓂᔥ ᑳᐐᓐ ᓂᑲ ᐊᔮᓰ᙮ ᒥᑎᒃ ᓴ ᑳᐸᑾᒋᐱᒋᑲᓂᐎᒡ ᑭᑭᒌᐱᒃ, ᒦ ᓴ ᐃ ᐁᑑᑕᕽ ᑳᐊᐯᓂᒧᐗᒃ᙮ 11 ᑭᔐᒪᓂᑑ ᐅᔕ ᐅᓂᔥᑳᑎᓯᐎᓐ ᓂᒨᔑᑖᐙᓐ, ᒦᑕᔥ ᑲᔦ ᐁᓇᑭᒥᒡ ᑖᐱᔥᑰ ᑳᔒᑫᓂᒥᑯᒡ᙮ 12 ᐅᔑᒫᑲᓂᔒᒪᐞ ᑲᔦ ᓂᑑᑎᓯᑯᐙᓈᐞ, ᐁᐅᔑᑑᓂᒡ ᑫᑰᓐ ᑫᐅᒋ ᔖᑰᒋᐃᒥᒡ, ᐁᐙᑳᔥᑲᐎᒥᒡ ᑳᔑ ᐊᔮᓂᒃ ᓂᐸᒀᓀᑲᒥᒃ᙮ 13 ᐅᑮ ᐃᔑᐋᐞ ᑲᔦ ᓃᒋᑭᐌᓯᐗᐞ ᒋᐌᐱᓂᒥᒡ, ᓂᐲᐎᑌᐌᓂᒥᑰᒃ ᑲᔦ ᐐᑫ ᐃᑭ ᑳᑮ ᑭᑫᓂᒥᐙᐸᓐ᙮ 14 ᓂᑎᓇᐌᒫᑲᓇᒃ ᑲᔦ ᓂᑮ ᐌᐱᓂᑰᒃ, ᓂᐗᓃᑫᓄᑖᑰᒃ ᑳᓵᑭ ᐐᒌᐎᐙᐸᓐ᙮ 15 ᐃᑭ ᓴ ᑳᐐᒋᑖᒪᒀ ᓂᑖᐎᓂᕽ, ᐃᑭ ᑲᔦ ᐃᑴᐗᒃ ᑳᐊᓄᑮᑕᐎᐙᒡ, ᐐᑫ ᓂᐲᐎᑌᐌᓂᒥᑰᒃ᙮ ᒦ ᐃ ᐁᔑ ᑲᓇᐙᐸᒥᐙᒡ ᑖᐱᔥᑰ ᐊᐎᔭ ᑳᒪᔭᑭᓯᒡ᙮ 16 ᐋᓇ ᑮᑲᓅᓇᒃ ᑲᔦ ᓂᑕᓄᑮᐋᑲᓐ, ᑳᐐᓐ ᓂᓅᑖᑯᓰ, ᒥᓴᐙ ᑯ ᐌᐌᓂ ᐋᓇᑮᑲᓅᓇᒃ ᒋᐐᒋᐃᒡ᙮ 17 ᓂᐐᐤ ᑲᔦ ᐐᑫ ᐅᒫᔑᒫᑖᓐ ᐋᓃᓐ ᐁᔑ ᒫᑯᓈᒧᐗᒃ, ᓃᒋᑭᐌᔭᒃ ᓴ ᑲᔦ ᐊᐙᒡ ᓂᒪᓈ ᐯᔣᐸᒥᑰᒃ᙮ 18 ᒥᓴᐙ ᓴ ᑯ ᐊᐱᓅᒌᔕᒃ ᓂᑖᓇᐌᓂᒥᑰᒃ, ᑮᐙᐸᒥᐙᒡ ᒦ ᐃ ᐁᔑ ᐹᐱᐃᐙᒡ᙮ 19 ᑲᑭᓇ ᓴ ᑳᓵᑭᐊᒀ ᑮᑲᓇᐙᐸᒥᐙᒡ ᓂᔒᑭᓈᑰᒃ᙮ ᐃᑭ ᑲᔦ ᒫᐗᒡ ᑳᓵᑭᐊᒀ, ᓅᑯᒻ ᓂᒫᔑ ᐐᒌᐎᑰᒃ᙮ 20 ᓂᔕᑲᔾ ᐅᔕ ᓂᑲᓂᕽ, ᓂᐐᔭᐎᕽ ᑲᔦ ᐸᓇᑲᑰᒌᓐ᙮ ᐋᐱᒋ ᓴ ᑭᒋ ᐊᑳᐙ ᓂᑮ ᔖᐾᑑᓐ ᓂᐱᒫᑎᓯᐎᓐ᙮ 21 ᑕᑲ ᑮᓇᐙ ᑳᓵᑭᐃᓇᑰᒃ ᑰᐹᑌᓂᒥᔑᒃ᙮ ᑭᔐᒪᓂᑑ ᐅᔕ ᐅᓂᓐᒡ ᓂᐸᑕᐱᓂᑯᐙᓐ᙮ 22 ᐌᑯᓀᓐ ᐃᑕᔥ ᐌᒋ ᑲᒀᑕᑭᐃᔦᒃ ᑖᐱᔥᑰ ᑭᔐᒪᓂᑑ ᑳᑑᑕᐎᒡ, ᑳᐐᓐ ᑌᒥᓂᒃ ᓂᑲᒀᑕᑭᐋᓯᐙᓈᓐ ᐃᓇ, ᑭᑎᓀᓂᒥᒻ? 23 ᐊᐯᔥ ᐅᓄ ᓂᑎᑭᑐᐎᓇᓐ ᐅᔑᐲᐃᑳᑌᑭᐸᓀᓐ ᐃᐃᒫ ᒪᓯᓇᐃᑲᓂᕽ, 24 ᒋᑮ ᐋᐸᑕᑭᐸᓐ ᐲᐙᐱᑯ ᐋᐸᒋᒋᑲᓐ ᒋᑮ ᓀᐱᒋ ᒪᓯᓈᐱᑲᐃᑳᑌᑭᐸᓐ ᐃᐃᒫ ᐊᓯᓃᕽ᙮ 25 ᓂᑭᑫᓂᒫ ᓴ ᓂᒻᐱᒫᒋᐃᐌᒻ ᐁᐱᒫᑎᓯᒡ, ᐐᓐ ᓴ ᐃᔥᒀᒡ ᒋᓃᐸᐎᒡ ᐊᑮᕽ, ᒦ ᓴ ᐊᐌ ᑫᓈᑕᒪᐎᒡ᙮ 26 ᒥᓴᐙ ᓴ ᑯ ᓂᔕᑲᔾ ᐋᑯᓯᐎᓂᕽ ᐅᒋ ᓂᔑᐗᓈᑎᓯᒡ, ᔖᑰᒡ ᐃᑕᔥ ᐅᐅᒫ ᓂᐐᔭᐎᕽ ᑫᔮᐱ ᐊᔮᔮᓐ, ᑭᔐᒪᓂᑑ ᓴ ᓂᑲ ᐙᐸᒫ᙮ 27 ᓃᓐ ᓴ ᐱᑯ ᓂᔥᑮᔑᑯᕽ ᓂᑲ ᐅᒋ ᐙᐸᒫ, ᑳᐐᓐ ᓴ ᓂᑲ ᐲᐎᑌᐗᑭᒫᓰ᙮ ᒦ ᓴ ᐃᐌ ᓂᑌᐃᕽ ᐁᔑ ᒥᓴᐌᑕᒫᓐ᙮ 28 ᑮᔥᐱᓐ ᑕᔥ ᐃᔑᔦᒃ, ᐋᓃᓐ ᑕᔥ ᐃᓈ ᑫᔑ ᑲᒀᑕᑭᐊᕽ, ᐋᓃᔥ ᐐᓐ ᐃᐃ ᑳᑑᑖᓱᒡ ᑳᐅᒋ ᒫᔑᓭᒡ? 29 ᑮᓇᐙ ᓴ ᐱᑯ, ᑯᑕᒧᒃ ᐃᐃ ᐸᔑᐸᐃᑫᐎᑯᒫᓐ, ᒦ ᐄᑐᒃ ᐃᐃᒫ ᐸᔑᐸᐃᑫᐎᑯᒫᓂᕽ ᑭᔐᒪᓂᑑ ᑫᐅᒋ ᓇᓇᐊᑑᒡ ᒪᒋᑑᑕᒧᐎᓐ᙮ ᒦᑕᔥ ᐃᐃ ᒋᑭᑫᑕᒣᒃ ᐁᐊᔮᒃ ᐃᐃ ᑎᐹᑯᓂᑰᐎᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society