Coona 1 - ᐅᒋᐺ ᑭᒋᒪᓯᓇᐃᑲᓐᒎᓇ ᑮᔕᔒᐱᑕᐙᒡ ᑳᑎᐯᒋᑫᓂᒡ 1 ᒎᓇ Jonah ᑕᔥ ᑳᑮ ᐅᑌᑌᒡ ᐊᒥᑖᐃᐗᓐ Amittai, ᐅᑮ ᑲᓅᓂᑰᓐ ᑳᑎᐯᒋᑫᓂᒡ, 2 ᑕᑲ ᐌᑎ ᐃᔖᓐ ᑳᒥᒑᒃ ᑭᒋ ᐆᑌᓈᕽ ᓂᓂᐯ Nineveh ᐁᒋᑳᑌᒃ, ᓲᑭ ᐐᑕᒪᐤ ᐃᐃᒫ ᑳᐊᔮᐙᒡ ᐁᑌᐱᒥᑯᐙᒡ ᐅᒪᒋᑑᑕᒧᐎᓂᐙᓐ᙮ ᓂᑭᑫᑕᒧᐙᓐ ᐅᔕ ᐋᓃᓐ ᐁᔑ ᒪᒋᐃᔑᐌᐱᓯᐙᒡ, ᐅᑮᐃᑰᓐ᙮ 3 ᑌᑾᒡ ᐃᑕᔥ ᒎᓇ ᓇᐹᒡ ᐃᓇᑫ ᑮᐃᔑ ᒫᒑ ᐁᑮ ᒫᒌᐸᐃᐙᓈᒡ ᑳᑎᐯᒋᑫᓂᒡ, ᐁᑮ ᐊᓂ ᓈᓯᐲᒡ ᒑᐸ Joppa ᐆᑌᓈᕽ᙮ ᒦᑕᔥ ᑳᑮ ᒥᑲᕽ ᑭᒋ ᓈᐱᒀᓐ ᑖᕒᔑᔥ Tarshish ᐃᓇᑫ ᐁᐐ ᐃᔖᒪᑲᓂᓂᒃ᙮ ᑳᐃᔥᒀ ᑎᐸᐃᑫᒡ ᐃᑕᔥ, ᒦ ᐃ ᑳᐃᔑ ᐐᒋᐴᓰᒫᒡ ᓈᐱᒀᓃᐎᓂᓂᐗᐞ ᐁᔖᓂᒡ ᑖᕒᔑᔥ ᐃᓇᑫ᙮ ᒦ ᐃ ᑳᐅᒋ ᐃᔖᒡ ᐁᑮ ᑕᐸᓰᓄᑕᐙᒡ ᑳᑎᐯᒋᑫᓂᒡ᙮ 4 ᑭᔐᒪᓂᑑ ᑕᔥ ᑮᐃᔑᒋᑫ ᒋᑭᒋ ᐸᑲᒫᓂᒪᓂᓂᒃ ᐃᐃᒫ ᑭᒋᑲᒦᕽ, ᒦ ᓴ ᑳᐊᐲᒋ ᐋᒀᓂᒪᓂᓂᒃ ᐋᐱᒋ ᓴ ᑮᓇᓃᓵᓀᑖᑾᓐ ᒋᐲᑾᐊᕽ ᐃᐃ ᑭᒋ ᓈᐱᒀᓐ᙮ 5 ᒦᔥ ᑲᑭᓇ ᓈᐱᒀᓃᐎᓂᓂᐗᒃ ᐐᑫ ᑳᑮ ᓭᑭᓯᐙᒡ, ᐁᑕᔑᐙᒡ ᓴ ᐅᑮ ᔖᑯᐙᓈᐙᐞ ᐅᒪᓂᑑᒥᐙᐞ ᒋᐐᒋᐃᑯᐙᒡ᙮ ᒦᑕᔥ ᑲᔦ ᑳᐃᔑ ᐸᐸᑯᐲ ᐌᐱᓇᒧᐙᒡ ᐴᓯᑖᓱᓇᓐ ᒋᓈᑲᑾᑌᓂᒃ ᐃᐃ ᑭᒋ ᓈᐱᒀᓐ᙮ ᒎᓇ ᑕᔥ ᐐᓐ ᐊᓈᒨᓇᒃ ᑮᐃᔖᑯᐸᓐ ᐁᑮ ᐊᐎ ᐱᒥᔑᕽ ᐐᑫ ᐁᑮ ᑭᐸᑭᑾᔑᒡ᙮ 6 ᒦᑕᔥ ᓈᐱᒀᓃᐎᑭᒫᓐ ᑳᑮ ᒥᑳᑯᒡ ᐁᓂᐹᒡ᙮ ᐅᑮ ᐋᒪᒋᐃᑰᓐ ᑕᔥ ᐁᑮᐃᑯᒡ, ᐌᑯᓀᓐ ᑕᔥ ᐃᓈ ᐌᒋ ᓂᐹᔭᓐ? ᑕᑲ ᐗᓂᔥᑳᓐ, ᒋᑲᓅᓇᒡ ᑫᑮᓐ ᑭᒪᓂᑑᒻ᙮ ᒫᑭᔖ ᑭᒪᓂᑑᒻ ᑭᑲ ᑰᐹᑌᓂᒥᑯᓈᓐ ᒦᑕᔥ ᒋᓂᔑᐗᓈᑎᓯᓯᐗᕽ, ᐅᑮᐃᑰᓐ᙮ 7 ᓈᐱᒀᓃᐎᓂᓂᐗᐞ ᑕᔥ ᑮᐊᔨᑎᐗᐞ, ᐊᐎᔪᒃ, ᑕᑲ ᓴ ᐃᔥᐱ ᐌᐱᓂᑫᑖ ᒋᐊᑕ ᑭᑫᓂᒪᕽ ᑳᓇᑲ ᐊᐌᑴᓐ ᐅᑎᔑᒋᑫᐎᓐ ᐅᐅ ᑳᐅᒋ ᓇᓃᓵᓂᓭᔭᕽ᙮ ᒦᑕᔥ ᑳᐃᔑ ᐃᔥᐱᐌᐱᓂᑫᓂᒡ᙮ ᒎᓇ ᑕᔥ ᒪᔮ ᐅᑮ ᒦᑯᔥᑳᑯᓐ ᐃᐃ ᐃᔥᐱ ᐌᐱᓂᑲᓐ᙮ 8 ᒦᑕᔥ ᐅᐅ ᑳᐃᑯᒡ ᓈᐱᒀᓃᐎᓂᓂᐗᐞ, ᑕᑲ ᓴ ᓅᑯᒻ ᐃᑯ ᐐᑕᒪᐎᔑᓈᒻ! ᐊᐌᓀᓐ ᓴ ᐅ ᐅᑎᔑᒋᑫᐎᓐ ᐅᐅ ᑳᐅᒋ ᐃᔑᐌᐱᓯᔭᕽ? ᐋᓃᓐ ᑮᓐ ᐁᓇᓄᑮᔭᓐ? ᐋᓃᑎ ᑲᔦ ᐌᒌᔭᓐ? ᐋᓃᓐ ᐁᔑᓂᑳᑌᒃ ᑭᑕᑮᒻ? ᐊᐌᓀᓐ ᑮᓐ ᑲᔦ ᐁᑎᓄᐎᔭᓐ? ᐁᑮᐃᑯᒡ᙮ 9 ᒦᑕᔥ ᐅᐅ ᒎᓇ ᑳᐃᔑ ᓇᑴᑕᕽ, ᓃᓐ ᐅᔕ ᐄᐸᕒᐆ Hebrew ᓂᑎᓄᐤ, ᓂᑯᑖᓀᓂᒫ ᓴ ᑳᑎᐯᒋᑫᒡ ᑳᐃᓂᓐᒡ᙮ ᒦ ᐊᐌ ᑳᑭᔐᒪᓂᑑᐎᒡ ᑭᒋᑮᔑᑯᕽ, ᑳᑮ ᐅᔑᑑᒡ ᑭᒋᑲᒻ, ᐊᑭ ᑲᔦ᙮ 10 ᐐᑫ ᑕᔥ ᑮᓭᑭᓯᐗᐞ ᐃᐃ ᐃᓂᓂᐗᐞ, ᒦᔥ ᑳᐃᑯᒡ, ᐌᑯᓀᓐ ᑕᔥ ᐃᐃ ᑳᐅᒋ ᐃᔑᒋᑫᔭᓐ? ᐅᑮ ᑭᑫᓂᒥᑰᐞ ᓴ ᐁᑮ ᒫᒌᐸᐃᐙᓈᒡ ᑳᑎᐯᒋᑫᓂᒡ ᐋᓃᔥ ᐋᔕ ᐅᑮ ᐐᑕᒪᐙᐞ᙮ 11 ᒦᑕᔥ ᐅᐅ ᑳᐃᑯᒡ, ᐋᓃᓐ ᑕᔥ ᐃᓈ ᑫᑑᑖᑰᔭᓐ ᒋᐊᓍᑎᕽ ᓃᓇᐎᓐᑦ ᐅᒋ? ᐋᓃᔥ ᐊᐗᔑᒣ ᑮᐊᓂ ᑭᒋᓅᑎᓂᓂ᙮ 12 ᒦᔥ ᒎᓇ ᑳᐃᓈᒡ, ᐃᓇᔥᑫ ᐸᑯᐲ ᐌᐱᓂᔑᒃ ᐃᐃᒫ ᑭᒋᑲᒦᕽ᙮ ᒦᑕᔥ ᐃᐃ ᒋᐊᓍᑎᕽ᙮ ᓂᑭᑫᑖᓐ ᐋᓃᔥ ᓃᓐ ᐃᐃ ᓂᑎᔑᒋᑫᐎᓐ ᑳᐅᒋ ᑭᒋ ᐸᑲᒫᓂᒪᓂᔑᔦᒃ, ᐅᑮ ᐃᓈᐞ᙮ 13 ᑌᑾᒡ ᐃᑕᔥ ᐃᑭ ᓈᐱᒀᓃᐎᓂᓂᐗᒃ ᑮᑭᒋ ᐊᔐᐼᔦᐗᒃ ᐁᑮ ᑲᑴ ᒥᔕᑲᐊᒧᐙᒡ᙮ ᑳᐐᓐ ᑕᔥ ᑮᑲᔥᑭᐅᓰᐗᒃ ᐅᓵᒻ ᐋᓃᔥ ᐊᐗᔑᒣ ᑮᐊᓂ ᑭᒋ ᒪᒫᑳᔥᑳᓂ᙮ 14 ᒦᑕᔥ ᑳᑮ ᑲᓅᓈᐙᒡ ᑳᑎᐯᒋᑫᓂᒡ, ᑮᓐ ᑌᐯᒋᑫᔭᓐ, ᑕᑲ ᑫᑯ ᓂᑲ ᓂᔑᐗᓈᑎᓯᓰᒥᓐ ᐅᐅ ᑳᑑᑕᒫᕽ ᐗᐊ ᐃᓂᓂ ᒋᐅᒋ ᓂᐳᒡ᙮ ᑕᑲ ᑲᔦ ᑳᐐᓐ ᑫᑰᓐ ᓂᑲ ᐅᒋ ᐊᓈᒣᑖᑯᓯᓰᒥᓐ ᓂᓴᑭᒡ ᐃᓂᓂ ᑳᒪᒫᔒᓯᒃ᙮ ᑮᓐ ᐄᑐᒃ ᑭᑎᔑᒋᑫ ᐋᓃᓐ ᐃᑯ ᐁᔑ ᒥᓍᐸᑕᒪᓐ, ᑮᐃᑭᑐᐗᒃ᙮ 15 ᒦ ᓴ ᐃ ᑳᐃᔑ ᒪᓂᐱᓈᐙᒡ ᒎᓇᐗᓐ ᐁᑮ ᐸᑯᐲ ᐌᐱᓈᐙᒡ᙮ ᒦᑕᔥ ᔐᒫᒃ ᑳᐃᔑ ᐊᓍᔮᓂᒪᓂᓂᒃ᙮ 16 ᒦᑕᔥ ᐃᑭ ᐃᓂᓂᐗᒃ ᑳᐃᔑ ᑭᒋ ᑯᑖᓀᓂᒫᐙᒡ ᑳᑎᐯᒋᑫᓂᒡ᙮ ᒦᔥ ᑳᐃᔑ ᐸᑭᑎᓈᓲᑕᒪᐙᐙᒡ, ᒦᔥ ᑲᔦ ᑳᐃᔑ ᐊᔓᑕᒪᐙᐙᒡ ᐁᐐ ᐊᓄᑮᑕᐙᐙᒡ᙮ 17 ᑳᑎᐯᒋᑫᒡ ᑕᔥ ᑮᐃᔑᒋᑫ ᒋᐁᐯᒦᓂᒡ ᑫᒋ ᒥᑎᑐᓂᒡ ᑭᓅᔐᓐ ᒋᑯᓈᓂᒡ ᒎᓇᐗᓐ᙮ ᒦᑕᔥ ᒎᓇ ᑳᑮ ᐊᔮᒡ ᓂᓱᑮᔑᒃ, ᓂᓱᑎᐱᒃ ᑲᔦ ᐲᒋᒥᓴᑦ ᑭᒋ ᑭᓅᔐᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society