Cenisihs 7 - ᐅᒋᐺ ᑭᒋᒪᓯᓇᐃᑲᓐᐊᑭ ᑮᓂᑭᐸᒋᑳᑌᒃ 1 ᑳᑎᐯᒋᑫᓂᒡ ᑕᔥ ᓅᐗ Noah ᐅᑮᐃᑰᓐ, ᐴᓯᓐ ᐃᐃ ᑭᒋ ᒌᒫᓐ, ᑲᑭᓇ ᑯ ᐁᑕᔑᔭᓐ; ᑮᓐ ᐅᔕ ᐁᑕ ᑭᐙᐸᒥᓐ ᐅᐅᒫ ᒥᓯᐌ ᐊᑮᕽ ᑾᔭᒃ ᐁᐃᔑᒋᑫᔭᓐ ᐁᓈᓴᒦᔮᓐ᙮ 2 ᓃᔣᓶᐙᓐ 7 ᑕᔥ ᐸᔦᑫᑖᑯᓯᐙᒡ ᐊᔭᐋᐎᔕᒃ ᑭᑲ ᐴᓯᐋᒃ, ᐊᔮᐯᔭᐋᒃ, ᓅᔐᔭᐋᒃ ᐃᑕᔥ ᑲᔦ᙮ ᐯᐯᔑᑴᐙᓐ ᑕᔥ ᐐᓐ ᐁᑕ ᑭᑲ ᐴᓯᐋᒃ ᐊᔭᐋᐎᔕᒃ ᑳᐯᑫᑖᑯᓯᓯᒀ, ᐊᔮᐯᒃ, ᓅᔐᔭᐋᒃ ᑫᐐᓇᐙ᙮ 3 ᑭᑲ ᐴᓯᐋᒃ ᑕᔥ ᑲᔦ ᓃᔣᓶᐙᓐ 7 ᐱᓀᔒᔕᒃ ᐃᔥᐱᒥᕽ ᑳᐸᐹᒥᓭᐙᒡ, ᓈᐯᔭᐋᒃ, ᓅᔐᔭᐋᒃ ᑲᔦ, ᒫᓄ ᐁᔮᑕᓶᐙᓇᑭᓯᐙᒡ ᒋᓂ ᐊᔮᐙᒡ ᒋᓂ ᐊᔮᓂᑫ ᓂᑖᐎᑭᐃᑎᐙᒡ ᐅᐅᒫ ᒥᓯᐌ ᐊᑮᕽ᙮ 4 ᓃᔣᓱᑮᔑᒃ 7 ᐃᔑᓭᒃ ᓂᐐ ᐃᔑᒋᑫ ᒋᑭᒥᐗᕽ ᐊᑮᕽ᙮ ᓃᒥᑕᓇ 40 ᑕᓱ ᑮᔑᒃ ᑕᔥ ᑕᑭᒥᐗᓐ, ᓃᒥᑕᓇ 40 ᑕᓱ ᑎᐱᒃ ᑲᔦ᙮ ᐐᑫ ᓴ ᐱᑯ ᑲᑭᓇ ᑫᑰᓐ ᐯᒫᑕᒃ ᑳᑮ ᐅᔑᑑᔮᓐ ᐅᐅᒫ ᐊᑮᕽ ᓂᐐ ᓂᔑᐗᓈᒋᑑᓐ, ᐅᑮᐃᑰᓐ᙮ 5 ᓅᐗ ᑕᔥ ᑮᐃᔑᒋᑫ ᑲᑭᓇ ᑫᑰᓐ ᑳᑮ ᐃᔑ ᐊᓅᓂᑯᒡ ᑳᑎᐯᒋᑫᓂᒡ᙮ 6 ᓅᐗ ᑕᔥ ᓂᑯᑣᔂᒃ 600 ᑮᑕᓱ ᐱᐴᓉ ᐊᐲ ᑮᓂᑭᐲᓂᒃ ᐊᑭ᙮ 7 ᑮᐴᓯ ᑕᔥ ᐃᐃ ᑭᒋ ᒌᒫᓐ, ᐐᐗᓐ ᑲᔦ᙮ ᐅᑯᓯᓴᐞ ᑕᔥ ᑲᔦ ᑮᐴᓯᐗᐞ, ᐐᐎᓂ ᑕᔥ ᑲᔦ ᐋᓃᔥ ᑮᐐ ᐊᓂ ᓂᑭᐲᓂ ᐊᑭ᙮ 8 ᐊᔮᐯᔭᐋᐞ, ᓅᔐᔭᐋᐞ ᑲᔦ ᐁᑕᓶᐙᓇᑭᓯᓂᒡ ᐊᔭᐋᐎᔕᐞ, ᐱᓀᔒᔕᐞ, ᑲᑭᓇ ᑲᔦ ᑳᐱᒨᑌᓂᒡ ᐊᑮᕽ ᐯᔦᑭᓯᓂᒡ, ᐯᔦᑭᓯᓯᓂᒃ ᐃᑯ ᑲᔦ 9 ᐅᑮ ᐐᒋ ᐴᓰᒥᑰᐞ ᓅᐗ ᑭᒋ ᒌᒫᓂᕽ, ᒪᔮ ᑳᑮ ᐃᓇᓅᑮᒡ ᑭᔐᒪᓂᑑ᙮ 10 ᓃᔣᓱᑮᔑᒃ ᑕᔥ ᑳᐃᔥᒀ ᐃᔑᓭᒃ ᒦ ᐃ ᑳᑮ ᒫᒌ ᓂᑭᐲᒃ ᐊᑭ᙮ 11 ᓅᐗ Noah ᐃᑕᔥ ᓂᑯᑣᔂᒃ 600 ᑮᑕᓱ ᐱᐴᓉ, ᓃᔓᑮᓯᓲᓐ ᒥᑖᔑᓃᔣᓱ ᑮᔑᒃ 17 ᐁᐃᔑᓭᓂᒃ᙮ ᒦ ᐃ ᐊᐲ ᐁᑮᔑᑲᒃ, ᓂᐱ ᐊᓈᒪᑲᒥᒃ ᑮᐅᒋ ᒨᑭᒋᐗᓐ, ᐃᔥᐱᒥᕽ ᑲᔦ ᑮᐹᑭᔥᑳ, ᓂᐱ ᐁᑮ ᐅᒋ ᐸᑭᓯᕽ᙮ 12 ᑮᑭᒥᐗᓐ ᑕᔥ ᐅᐅᒫ ᐊᑮᕽ ᓃᒥᑕᓇ 40 ᑕᓱ ᑮᔑᒃ, ᓃᒥᑕᓇ ᑕᓱ ᑎᐱᒃ ᑲᔦ᙮ 13 ᐃᐃ ᑕᔥ ᐊᐲ ᐁᑮᔑᑲᓂᓂᒃ ᓅᐗ, ᐐᐗᓐ ᑲᔦ ᐋᔕ ᐃᐃᒫ ᑮᐴᓯᐗᒃ ᑭᒋ ᒌᒫᓂᕽ᙮ ᐅᑯᓯᓴᐞ ᔐᒻ Shem, ᐁᒻ Ham, ᒉᐸᑦ Japheth, ᐐᐎᓂ ᑲᔦ ᑮᐴᓯᐗᐞ ᐃᐃᒫ᙮ 14 ᐊᔭᐋᐎᔕᒃ ᑲᔦ ᑳᑕᓶᐙᓇᑭᓯᐙᒡ, ᐱᔑᑭᐗᒃ ᑳᑕᓶᐙᓇᑭᓯᐙᒡ, ᑳᐸᐹᒨᑌᐙᒡ ᑲᔦ ᒥᑕᑲᒥᒃ ᑳᑕᓶᐙᓇᑭᓯᐙᒡ᙮ ᐱᓀᔒᔕᒃ ᑲᔦ ᑳᑕᓶᐙᓇᑭᓯᐙᒡ ᑲᑭᓇ ᓴ ᐱᑯ ᐱᓀᔒᔕᒃ᙮ 15 ᑮᐃᔖᐗᒃ ᑲᑭᓇ ᐁᑮ ᐴᓯᐙᒡ ᑭᒋ ᒌᒫᓂᕽ ᑳᑮ ᐃᔑᐊᔮᓂᒡ ᓅᐗᐗᓐ᙮ ᑮᓀᓃᔑᐗᒃ ᐊᔭᐋᐎᔕᒃ ᐁᑮ ᐴᓯᐙᒡ᙮ 16 ᑳᑮ ᐴᓯᐙᒡ ᑕᔥ ᑮᐊᔮᐯᐎᐗᒃ, ᑮᓅᔐᔭᐋᐎᐗᒃ ᑲᔦ᙮ ᑲᑭᓇ ᓴ ᐁᑕᔑᐙᒡ ᑮᐴᓯᐗᒃ ᑭᔐᒪᓂᑑ ᐋᓃᔥ ᐅᑮᐃᓈᐞ ᒋᐴᓯᓂᒡ᙮ ᑳᑎᐯᒋᑫᒡ ᑕᔥ ᐊᑾᒌᕽ ᐅᑮ ᐅᒋ ᑭᐸᐋᓐ ᐃᔥᒀᑌᒻ᙮ 17 ᓃᒥᑕᓇ ᑕᓱ ᑮᔑᒃ ᑕᔥ ᑮᑕᔑ ᒨᔥᑲᐊᓐ, ᐲᓂᔥ ᐁᑮ ᐊᓂ ᑮᔥᑳᔭᐙᒃ᙮ ᒦᑕᔥ ᐃᐃ ᑭᒋ ᒌᒫᓐ ᑳᐃᔑ ᐋᐳᔥᑲᐊᑾᑌᒃ ᐃᐃᒫ ᐗᑭᒋᐲᒃ, ᐁᑮ ᓵᒥᓯᓯᓄᒃ ᒥᑕᑲᒥᒃ᙮ 18 ᓂᐱ ᑕᔥ ᐲᓂᔥ ᑮᐊᓂ ᑮᔥᑳᔭᐙ ᒥᓯᐌ ᐊᑮᕽ᙮ ᒦᑕᔥ ᑭᒋ ᒌᒫᓐ ᑳᑮ ᐃᔑ ᐋᐳᔥᑲᐊᑾᑌᒃ ᐗᑭᒋᐲᒃ᙮ 19 ᐲᓂᔥ ᐃᑕᔥ ᑮᐊᓂ ᓂᑭᐲ ᐅᐅ ᐊᑭ᙮ ᒫᐗᒡ ᓴ ᑳᐃᔥᐸᑎᓈᑭᓐ ᑭᒋ ᐗᒌᓐ ᑮᓂᑭᐲᐗᓐ ᒥᓯᐌ ᐊᑮᕽ᙮ 20 ᐐᑫ ᐲᓂᔥ ᑮᐊᓂ ᑮᔥᑳᔭᐙ, ᐲᓂᔥ ᓃᔥᑕᓇᔑᓈᓄᒥᓯᑦ 25 ᐁᑮ ᐹᔑᒋᐲᑭᓐ ᒫᐗᒡ ᐁᔥᐸᑎᓈᑭᓐ ᑭᒋ ᐗᒌᓐ᙮ 21 ᑲᑭᓇ ᑕᔥ ᑫᑰᓐ ᑳᑮ ᐱᒫᑕᒃ ᐊᑮᕽ ᑮᓂᐴᒪᑲᓐ᙮ ᑳᑕᔑᐙᒡ ᐱᓀᔒᔕᒃ, ᐊᔭᐋᐎᔕᒃ ᑲᔦ, ᑲᑭᓇ ᑲᔦ ᐯᒫᑎᓯᐙᒡ᙮ 22 ᑲᑭᓇ ᑕᔥ ᑫᑰᓐ ᑳᑮ ᐱᒫᑕᒃ ᑳᔑ ᐸᐹᑯᑲᒥᑳᒃ, ᑳᐸᑭᑕᓈᒨᒪᑲᒃ ᑮᓂᐴᒪᑲᓐ᙮ 23 ᑳᑎᐯᒋᑫᒡ ᑲᑭᓇ ᑫᑰᓂᓂ ᐅᑮ ᓂᔑᐗᓈᒋᑑᓐ ᑳᑮ ᐱᒫᑕᓂᓂᒃ᙮ ᐯᒫᑎᓯᓂᒡ, ᐊᔭᐋᐎᔕᐞ, ᑳᐸᐹᒨᑌᓂᒡ, ᐱᓀᔒᔕᐞ ᑲᔦ᙮ ᒦᔦᑕᑯ ᓅᐗ, ᐃᐃ ᑕᔥ ᑳᑮ ᐐᒋ ᐴᓰᒥᑯᒡ ᑳᐱᒫᑎᓯᓂᒡ᙮ 24 ᓂᑯᑣᒃ ᓈᓂᒥᑕᓇ 150 ᑕᓱ ᑮᔑᒃ ᑕᔥ ᑮᒨᔥᑲᐊᓐ ᐅᐅ ᐊᑭ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society