Cenisihs 50 - ᐅᒋᐺ ᑭᒋᒪᓯᓇᐃᑲᓐᐃᔅᕒᐃᔭᓬ ᑮᐃᔥᒀᐱᒫᑎᓯᒡ 1 ᒎᓴᑉ Joseph ᐃᑕᔥ ᐃᐃᒫ ᑮᐃᔑ ᐊᐸᓂᐅ ᑳᐃᔑ ᐱᒥᔑᓂᓂᒡ ᐅᑌᑌᓐ ᐁᑮ ᒪᐎᒡ, ᐁᑮ ᐅᒌᒫᒡ ᑲᔦ᙮ 2 ᒦᑕᔥ ᒎᓴᑉ ᑳᐃᔑ ᐊᓅᓈᒡ ᑳᑮ ᐊᓄᑮᑖᑯᒡ ᒪᔥᑭᑮᐎᓂᓂᐗᐞ ᒋᑾᔮᒋᐃᒥᓐᒡ ᐅᑌᑌᓐ, ᒌᔑᐃᒥᓐᒡ ᑳᑮ ᐃᔑᐃᑣ ᑳᑮ ᓇᐃᓂᒥᓐᒡ᙮ ᑮᐃᔑᒋᑫᐗᐞ ᑕᔥ ᐃᐃ ᒪᔥᑭᑮᐎᓂᓂᐗᐞ᙮ 3 ᓃᒥᑕᓇ 40 ᑕᓱ ᑮᔑᒃ ᑕᔥ ᐊᐎᔭ ᑮᑕᔑᑭᑲᓂᐎ ᑮᑾᔮᒋᐃᓐᒡ ᑮᐃᔑᐃᓐᒡ ᒋᐙᓈᑎᓯᓯᒃ᙮ ᐯᒫᑎᓯᐙᒡ ᑕᔥ ᐄᒋᐸᑮᕽ Egypt ᑳᑮ ᐅᒌᐙᒡ ᓃᔣᓯᒥᑕᓇ 70 ᑕᓱ ᑮᔑᒃ ᐅᑮ ᒪᐎᒫᐙᓐ ᐃᔅᕒᐃᔭᓬᐊᓐ Israel᙮ 4 ᐁᑮ ᐃᔥᒀᓭᓂᒃ ᑕᔥ ᒥᓂᒃ ᑕᓱ ᑮᔑᒃ ᑳᑮ ᒪᐎᒥᒥᓐᒡ ᐃᔅᕒᐃᔭᓬᐊᓐ, ᒎᓴᑉ ᐅᑮᐃᓈᐞ ᑳᑮ ᐊᓄᑮᑕᐙᓂᒡ ᑭᒋᐅᑭᒫᓐ, ᑮᔥᐱᓐ ᒥᓍᐸᒥᔦᒃ, ᑕᑲ ᐅᐅᐌ ᐊᐎ ᐃᓂᒃ ᑭᒋᐅᑭᒫ ᓃᓐ ᐁᐃᑭᑐᔮᓐ: 5 ᐊᐲ ᓴ ᓂᑌᑌᐸᓐ ᐋᔕ ᑫᑳ ᑮᐐ ᐊᓂ ᐃᔥᒀ ᐱᒫᑎᓯᒡ, ᓂᑮ ᑲᔥᑭᒥᒃ ᒋᐊᔓᑕᒪᐗᒃ, ᒋᔑ ᓇᐃᓇᒃ ᑳᑮ ᐃᔑ ᐅᔑᑕᒫᓱᑯᐸᓀᓐ ᒋᔑ ᓇᐃᓂᓐᒡ ᐌᑎ ᑫᓇᓐ Canaan ᐊᑮᕽ᙮ ᑕᑲ ᐸᑭᑎᓂᔑᓐ ᒌᔖᔮᓐ ᒋᐊᐎ ᓇᐃᓇᒃ ᓂᑌᑌᐸᓐ᙮ ᒦᓇᐙ ᑕᔥ ᓂᑲ ᐱᑮᐌ ᑕᑯᔑᓐ᙮ 6 ᐅᐅ ᑕᔥ ᑭᒋᐅᑭᒫᓐ ᐅᑮ ᐱᐃᑰᓐ, ᐱᓵᓂᑯ ᐃᔖᓐ ᒋᐊᐎ ᓇᐃᓇᒡ ᑭᑌᑌᐸᓐ ᑳᑮ ᐃᔑ ᐊᔓᑕᒪᐙᐗᑎᐸᓀᓐ᙮ 7 ᒎᓴᑉ ᑕᔥ ᑮᐊᓂ ᒫᒑ ᐁᑮ ᐊᐎ ᓇᐃᓈᒡ ᐅᑌᑌᐸᓃᓐ᙮ ᑭᒋᐅᑭᒫᓐ ᑳᑮ ᐸᒦᑕᐙᓂᒡ, ᑳᑮ ᑲᓇᐌᑕᒥᓂᒡ ᑲᔦ ᐅᑖᐎᓂᓂ, ᐃᐃ ᑲᔦ ᑳᑮ ᓃᑳᓀᑖᑯᓯᓂᒡ ᐃᓂᓂᐗᐞ ᐃᐃᒫ ᐄᒋᐸᑮᕽ ᐁᑮ ᐐᒌᐎᑯᒡ᙮ 8 ᑲᑭᓇ ᑲᔦ ᐁᑕᔑᓂᒡ ᐐᒋᑭᐌᔭᐞ, ᑲᑭᓇ ᑲᔦ ᐅᑌᑌᐸᓃᓐ ᑳᑮ ᐃᓇᐌᒫᓂᒡ ᑮᐃᔖᐗᐞ᙮ ᐅᓃᒑᓂᓯᐙᐞ ᑕᔥ ᐐᓐ ᑳᑮ ᐊᔭᑳᔒᔑᓂᒡ, ᐃᓂ ᑲᔦ ᐅᒫᓇᒑᓂᔑᒥᐙᐞ, ᐅᒫᓇᑎᑯᒥᐙᐞ, ᐃᐃ ᑲᔦ ᐅᐱᔑᑮᒥᐙᐞ ᐅᑮ ᓇᑲᓈᐙᐞ ᐃᐃᒫ ᑰᔑᓐ Goshen ᐊᑮᕽ᙮ 9 ᐃᓂᓂᐗᐞ ᑕᔥ ᑲᔦ ᑳᑮ ᐱᒥᑖᐸᐋᓂᒡ ᐅᑖᐹᓈᑾᐞ, ᐃᐃ ᑲᔦ ᑳᑮ ᐱᒥᐗᓀᐸᐃᑯᓂᒡ ᒥᑕᑎᒧᕽ ᑮᑕᑯ ᐃᔖᐗᐞ᙮ ᐐᑫ ᓴ ᑯ ᑮᐹᑏᓄᐗᒃ᙮ 10 ᐊᐲ ᑕᔥ ᐁᑮ ᑕᑯᔑᓄᐙᒡ ᐃᐃᒫ ᐁᑕᑦ Atad ᑳᑮ ᓂᑖ ᑕᔑ ᐸᐗᑲᓈᓱᓂᒡ ᐸᑴᔑᑲᓇᓐ ᐙᐸᓄᕽ ᐃᓇᑫ ᒞᕒᑕᓐ Jordan ᓰᐱᕽ, ᒦ ᐃᒫ ᐁᓂᑯᒃ ᑳᑕᓇᑌᒧᐙᒡ ᑭᓉᔥ ᐃᑯ᙮ ᒎᓴᑉ ᑕᔥ ᓃᔣᓱᑮᔑᒃ 7 ᑮᐃᔑᒋᑫ ᑳᑮ ᓂᑖ ᐃᔑᒋᑫᕽ ᐊᐎᔭ ᑮᐐ ᓇᐃᓂᓐᒡ᙮ 11 ᐃᑭ ᑕᔥ ᐯᒫᑎᓯᐙᒡ ᑳᑮ ᐊᔮᐙᒡ ᑫᓇᓐ ᐊᑮᕽ ᐁᐙᐸᒫᐙᒡ ᐁᒪᐎᓂᒡ ᐃᐃᒫ ᐁᑕᑦ ᑮᐃᑭᑐᐗᒃ, ᐃᓇᔥᑫ ᑭᓃᓐ ᐁᓇᑲᒥᑭᓯᐙᒡ ᐄᒋᑉ ᑳᐅᒌᐙᒡ ᐁᒪᐎᐙᒡ, ᑮᐃᑭᑐᐗᒃ᙮ ᒦ ᐃᒫ ᑕᔥ ᑳᑮ ᐅᒋ ᐃᔑᓂᑳᑌᓂᒃ ᑳᑮ ᐃᔑ ᒪᐎᐙᒡ, ᐅᑕᓇᑌᒧᐎᓂᐙ ᐄᒋᑉ ᑳᐅᒌᐙᒡ᙮ 12 ᐃᔅᕒᐃᔭᓬ ᑕᔥ ᐅᑮ ᐃᔑᒋᑫᐃᑰᐞ ᑳᑮᐃᓈᑯᐸᓀᓐ ᐅᑯᓯᓴᐞ ᒋᑆ ᐃᔥᒀ ᐱᒫᑎᓯᒡ᙮ 13 ᐅᑯᓯᓴᐞ ᐁᑮ ᐃᔑᐎᑑᓂᒡ ᐅᐐᔭᐤ ᑫᓇᓐ ᐊᑮᕽ ᐁᑮ ᐊᑕ ᓇᐃᓇᒥᓂᒡ ᐌᑎ ᑳᑮ ᐃᔑ ᐐᐹᐱᑳᓂᒃ ᒪᒃᐲᓬᐊ Machpelah, ᐙᐸᓄᕽ ᐃᓇᑫ ᒪᒻᕒᐃ Mamre᙮ ᐁᐸᕒᐊᐋᒻ Abraham ᐄᑐᒃ ᑮᐊᑖᒫᑯᐸᓐ ᐃᓂ ᐃᓂᓂᐗᓐ ᐁᑦ Hittite ᑳᑮ ᑎᓄᐎᒡ, ᐄᐸᕒᐊᓐ Ephron ᑳᑮ ᐃᔑᓂᑳᓱᓂᒡ, ᐃᐃ ᐅᑕᑮᒥᓂ ᒌᐯᑲᒥᒃ ᐁᐐ ᐃᓍᑕᕽ᙮ 14 ᒎᓴᑉ ᐃᑕᔥ ᑳᐃᔥᒀ ᓇᐃᓈᒡ ᐅᑌᑌᐸᓃᓐ ᑮᐃᔑ ᑮᐌ ᐄᒋᐸᑮᕽ ᐃᐃ ᑲᔦ ᐐᒋᑭᐌᔭᐞ, ᑲᑭᓇ ᓴ ᐱᑯ ᑳᑮ ᐐᒌᐎᑯᒡ᙮ ᒎᓴᑉ ᑮᐴᓀᑕᒪᐙᒡ ᐐᒋᑭᐌᔭᐞ 15 ᒎᓴᑉ Joseph ᐐᒋᑭᐌᔭᐞ ᑮᐃᑭᑐᐗᐞ ᑮᐃᔥᒀ ᓂᐳᓂᒡ ᐅᑌᑌᐙᓐ, ᐌᑯᓀᓐ ᐃᑕᔥ ᐐᓐ ᑫᔮᐱ ᒎᓴᑉ ᓀᔥᑫᓂᒥᓄᐗᑴᓐ, ᐁᓀᑕᒧᑴᓐ ᑲᔦ ᐁᐐ ᑎᐸᐊᒪᐎᓇᕽ ᑲᑭᓇ ᑳᑮ ᐃᔑ ᒫᔑ ᑑᑕᐗᕽ! 16 ᐅᑮ ᐊᓅᓈᐙᓐ ᑕᔥ ᐊᐎᔭᓐ ᒋᐊᐎ ᐐᑕᒪᐙᓂᒡ ᒎᓴᐴᓐ ᐁᑮ ᐃᑭᑐᐙᒡ, ᑭᑌᑌ ᓴ ᑮᐃᑭᑐ ᒋᑆ ᐃᔥᒀ ᐱᒫᑎᓯᒡ᙮ 17 ᐅᐅᐌᓂ ᓴ ᐃᓈᑫᒃ ᒎᓴᑉ ᑭᐸᑯᓭᓂᒥᓐ ᒋᐴᓀᑕᒪᐗᑣ ᑎᐱᓇᐌ ᑮᒋᑭᐌᔭᒃ ᑳᑮ ᐃᔑ ᒪᒫᔒᑲᑕᐎᒀ, ᐃᐃ ᑲᔦ ᑳᑮ ᐃᔑ ᒪᒋᑑᑕᒧᐙᒡ ᐊᐲ ᑮᐗᓂ ᑑᑕᐎᒀ᙮ ᑕᑲ ᑕᔥ ᓅᑯᒻ ᐴᓀᑕᒪᐎᔑᓈᒻ ᑳᑮ ᐗᓂ ᑑᑖᑰᔭᓐ, ᓃᓇᐎᓐᑦ ᐄᑐᒃ ᑳᐸᒦᑕᐗᑭᒡ ᑭᑌᑌᐸᓐ ᐅᑭᔐᒪᓂᑑᒪᓐ᙮ ᒎᓴᑉ ᑕᔥ ᑮᒪᐎ ᐊᐲ ᐁᓅᑕᕽ ᑳᑮᐃᓂᓐᒡ᙮ 18 ᐐᒋᑭᐌᔭᐞ ᐅᑮ ᐱ ᓈᓯᑳᑰᐞ ᐁᑮ ᐊᓂᒥᑯᑖᓂᒡ ᑳᑮ ᐃᔑᐊᔮᒡ ᐁᑮᐃᑯᒡ, ᐃᓇᔥᑫ ᑳᐸᒦᑕᐎᒀ ᓂᑎᓄᐎᒥᓐ, ᐅᑮᐃᑰᐞ᙮ 19 ᒎᓴᑉ ᑕᔥ ᐅᑮ ᐃᔑ ᓇᑴᑕᐙᐞ, ᑫᑯ ᓭᑭᓯᑫᒃ᙮ ᓃᓐ ᓂᑖ ᐃᔑᒋᑫᐙᓐ ᐃᓇ ᑭᔐᒪᓂᑑ ᐅᑎᔑᒋᑫᐎᓐ? 20 ᐃᐃ ᑕᔥ ᑳᑮ ᐃᓀᑕᒣᒃ ᑳᐐ ᐃᔑ ᒪᒋᑑᑕᐎᔦᑭᐸᓐ, ᑭᔐᒪᓂᑑ ᑕᔥ ᐐᓐ ᐃᐃᒫ ᑮᐅᒌᓂ ᐅᒥᓄᑑᑖᑫᐎᓐ᙮ ᒦᑕᔥ ᐃᐃ ᓅᑯᒻ ᓃᐱᐗᐞ ᐯᒫᑎᓯᐙᒡ ᑳᐅᒋ ᐱᒫᑎᓯᐙᒡ ᐃᐃ ᑳᑮ ᐃᔑᓭᓂᒃ᙮ 21 ᐃᓇᔥᑫ ᑕᔥ ᑫᑯ ᓭᑭᓯᑫᒃ, ᑭᑲ ᓈᓈᑲᒋᐃᓂᓂᒻ ᓴ, ᐃᑭ ᑲᔦ ᑭᓃᒑᓂᓯᐙᒃ᙮ ᒦᔥ ᑳᐃᔑ ᒥᓉᑕᒥᓂᒡ ᐌᐌᓂ ᐁᑮ ᑲᑲᓅᓈᒡ᙮ ᒎᓴᑉ ᐁᑕᔑᑌᓂᒃ ᑮᓂᐳᒡ 22 ᒎᓴᑉ Joseph ᓴ ᐃᐃᒫ ᐄᒋᐸᑮᕽ Egypt ᑮᐊᔨᑖ, ᐃᐃ ᑲᔦ ᑲᑭᓇ ᐅᑌᑌᓐ ᐅᑎᓇᐌᒫᑲᓂᓂ᙮ ᓂᑯᑣᒃ ᒥᑖᓱ 110 ᑕᔥ ᑮᑕᓱ ᐱᐴᓉ᙮ 23 ᒎᓴᑉ ᑕᔥ ᑮᑌ ᐱᒫᑎᓯ ᐁᑮ ᐙᐸᒫᒡ ᐅᑖᓂᑰᐱᓲᒪᐞ ᐄᐸᕒᐃᔭᒥᕽ Ephraim ᑳᑮ ᐅᑕᑳᓀᓯᓂᒡ᙮ ᐅᑮ ᑌ ᐙᐸᒫᐞ ᑲᔦ ᐅᑖᓂᑰᐱᓲᒪᐞ ᑳᑮ ᐅᓃᒑᓂᓯᒥᑯᓂᒡ ᒣᑭᕒᐆᓐ Machir᙮ ᒪᓈᓴ Manasseh ᐄᑐᒃ ᑮᐅᑯᓯᓯ ᐃᓂ ᒣᑭᕒᐆᓐ᙮ ᒦᐗᐃ ᐃᐃ ᑲᔦ ᑳᑮ ᑌᐱᒫᑎᓯᒡ ᒋᐙᐸᒫᒡ᙮ 24 ᒦᑕᔥ ᒎᓴᑉ ᑳᐃᓈᒡ ᐐᒋᑭᐌᔭᐞ, ᒦᐋᔕ ᑫᑳ ᒌᔥᒀ ᐱᒫᑎᓯᔮᓐ, ᔖᑰᒡ ᑕᔥ ᑭᔐᒪᓂᑑ ᑌᐺ ᑭᑲ ᓈᓈᑲᒋᐃᑯᐙ᙮ ᐅᐅᒫ ᑲᔦ ᐊᑮᕽ ᐄᒋᑉ ᑭᑲ ᐅᒋ ᒫᒌᓂᑯᐙ ᒌᔑᐎᓂᓀᒃ ᐌᑎ ᑳᑮ ᐃᔑ ᐊᔓᑕᒪᐙᑯᐸᓀᓐ ᐁᐸᕒᐊᐋᒪᓐ Abraham, ᐋᐃᓯᑰᓐ Isaac, ᐃᓂ ᑲᔦ ᒉᑲᐴᓐ Jacob᙮ 25 ᒎᓴᑉ ᑕᔥ ᐅᑮᐃᓈᐞ ᐃᔅᕒᐃᔭᓬᐊᐞ ᒋᐊᐱᒧᓂᒡ ᐁᑮᐃᓈᒡ, ᐊᔓᑕᒪᐎᔑᒃ, ᐊᐲ ᑭᔐᒪᓂᑑ ᐃᔑᐎᓂᓀᒃ ᐌᑎ ᑫᓇᓐ Canaan ᐊᑮᕽ, ᒫᒌᑑᑫᒃ ᓂᑲᓇᓐ, ᐁᑮᐃᓈᒡ᙮ 26 ᐄᒋᐸᑮᕽ, ᑕᔥ ᒎᓴᑉ ᑮᑕᔑ ᐃᔥᒀ ᐱᒫᑎᓯ, ᓂᑯᑣᒃ ᒥᑖᓱ 110 ᐁᑮ ᑕᓱ ᐱᐴᓉᒡ᙮ ᑮᑾᔮᒋᒋᑳᑌᓂ ᑕᔥ ᑲᔦ ᐅᐐᔭᐤ, ᐁᑮ ᐲᓇᐃᑳᑌᓂᒃ ᒋᐯᒪᑲᑯᕽ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society