Cenisihs 41 - ᐅᒋᐺ ᑭᒋᒪᓯᓇᐃᑲᓐᒎᓴᑉ ᑮᐐᑕᒪᐙᒡ ᐋᓃᓐ ᐁᔑᓯᓂᓂᒃ ᑳᑮᐃᔑᐸᐙᒋᑫᓂᒡ ᑭᒋᐅᑭᒫᓐ 1 ᓃᔓᐱᐴᓐ ᑕᔥ ᑳᐃᔥᒀ ᐃᔑᓭᓂᒃ, ᑭᒋᐅᑭᒫ ᐃᐃᒫ ᐄᒋᐸᑮᕽ Egypt ᑳᑮ ᐊᔮᒡ, ᑮᐃᔑ ᐸᐙᒋᑫ ᐄᓴᓐ ᐁᑮ ᓃᐸᐎᒡ ᐃᐃᒫ ᒌᑭᐲᒃ ᓈᔭᓬ Nile ᓰᐱᕽ᙮ 2 ᐁᑮ ᐸᐙᓈᒡ ᓃᔣᓱ 7 ᐱᔑᑭᐗᐞ ᐁᑮ ᐱᐅᒋ ᐊᒀᓰᓂᒡ ᐃᐃᒫ ᓰᐱᕽ ᐁᑮ ᒪᒥᓄᑳᒧᓂᒡ, ᐐᑫ ᑲᔦ ᐁᑮ ᒥᓄᓈᑯᓯᓂᒡ᙮ ᒦᑕᔥ ᐄᓴᓐ ᑳᐃᔑ ᒫᒌ ᒦᒋᓂᒡ ᒪᔥᑯᓰᓐ᙮ 3 ᐃᓇᔥᑫ ᑕᔥ ᑲᔦ ᐅᑮ ᐸᐙᓈᐞ ᓃᔣᓱ 7 ᐱᔑᑭᐗᐞ ᓈᑫ ᒦᓇᐙ ᐁᑮ ᐱᐅᒋ ᐊᒀᓰᓂᒡ ᐃᐃᒫ ᓈᔭᓬ ᓰᐱᕽ ᐐᑫ ᐁᑮ ᑲᐗᔅᑲᑌᓂᒡ, ᐐᑫ ᑲᔦ ᐁᑮ ᒫᓈᑎᓯᓂᒡ᙮ ᐃᐃᒫ ᑕᔥ ᑮᐱ ᓃᐸᐎᐗᒃ ᑳᔑ ᓃᐸᐎᓂᒡ ᑯᑕᒃ ᐱᔑᑭᐗᐞ ᑳᔑ ᑭᔥᑲᑲᒥᑳᓂᒃ᙮ 4 ᒦᑕᔥ ᐱᔑᑭᐗᒃ ᑳᑮ ᑲᐗᔅᑲᑌᐙᒡ, ᑳᑮ ᒫᓈᑎᓯᐙᒡ ᑲᔦ, ᐅᑮ ᑭᑕᒸᐙᐞ ᐃᐃ ᐱᔑᑭᐗᐞ ᑳᑮ ᒥᓄᑳᒧᓂᒡ, ᑳᑮ ᒥᓄᓈᑯᓯᓂᒡ ᑲᔦ᙮ ᒦᑕᔥ ᑭᒋᐅᑭᒫ ᑳᐃᔑ ᑯᔥᑯᓯᒡ᙮ 5 ᒦᓇᐙ ᑕᔥ ᑮᓂᐹ, ᒦᔥ ᒦᓇᐙ ᑳᐃᔑ ᐸᐙᒋᑫᒡ᙮ ᒦᔥ ᐅᐅ ᑳᐃᔑᓇᕽ᙮ ᐅᑮ ᐙᐸᒫᓐ ᐯᔑᒃ ᐸᑴᔑᑲᓂ ᑭᑎᑳᓈᑎᑰᓐ᙮ ᒦᑕᔥ ᐃᐃᒫ ᑳᐃᔑ ᐙᐸᑕᕽ ᓃᔣᓱ ᐸᑴᔑᑲᓂᒥᓇᓐ ᐁᒥᓄᑭᑭᓐ, ᐁᑮᔑᑭᓂᓂᑭᓐ ᑲᔦ᙮ 6 ᓃᔣᓱ 7 ᑕᔥ ᑲᔦ ᑯᑕᒃ ᐸᑴᔑᑲᓂᒥᓇᓐ ᐃᐃᒫ ᑮᐅᒋ ᓵᑭᑭᓅᓐ ᐁᑮ ᔒᑯᔥᑳᑭᓐ ᐁᑮ ᐹᒀᓯᑭᓐ ᑲᔦ ᐁᐙᐸᓂᓅᐌᓂᒃ᙮ 7 ᐃᓂ ᑕᔥ ᐸᑴᔑᑲᓂᒥᓇᓐ ᑳᑮ ᔒᑯᔥᑳᑭᓐ ᐅᑮ ᑭᑕᓈᐙᓐ ᐃᓂ ᐸᑴᔑᑲᓂᒥᓇᓐ ᑳᑮ ᒥᓄᑭᓂᓂᑭᓐ, ᑳᑮ ᑮᔑᑭᓂᓂᑭᓐ ᑲᔦ᙮ ᒦᑕᔥ ᑭᒋᐅᑭᒫ ᐯᕒᐆ Pharaoh ᑳᑮ ᐃᔑ ᑯᔥᑯᓯᒡ᙮ ᒦᔥ ᑳᐃᔑ ᑭᑫᑕᕽ ᐁᑮ ᐸᐙᒋᑫᒡ᙮ 8 ᐁᑭᔐᐹᐗᑲᓂᓂᒃ ᑕᔥ ᐐᑫ ᑮᐅᒑᓂᒣᑕᒻ᙮ ᒦᑕᔥ ᑳᐃᔑ ᐊᑐᒫᒡ ᑲᑭᓇ ᒣᒫᑖᐎᓯᓂᒡ, ᑫᑮᑖᐌᑕᒥᓂᒡ ᑲᔦ ᐃᓂᓂᐗᐞ ᑳᑮ ᐊᔮᓂᒡ ᐃᐃᒫ ᐄᒋᐸᑮᕽ᙮ ᑳᐐᓐ ᑕᔥ ᐊᐙᒡ ᐸᑮ ᐊᐎᔭᓐ ᐅᑮ ᑭᑫᑕᓰᓂ ᐋᓃᓐ ᑫᐃᓉᑑᓂᒡ ᑳᑮ ᐃᔑ ᐸᐙᒋᑫᒡ᙮ 9 ᐊᐊ ᑕᔥ ᑳᑮ ᐱᒥᐎᑑᒡ ᑭᒋᐅᑭᒫᓐ ᐅᒥᓂᒀᑲᓂᓂ ᐅᑮᐃᓈᓐ ᑭᒋᐅᑭᒫᓐ, ᑭᐐᑕᒪᐎᓐ ᓴ ᓅᑯᒻ ᑳᑮᔑᑲᒃ ᐋᓃᓐ ᑳᐃᔑ ᒪᒫᔒᔮᓐ᙮ 10 ᓃᓇᐎᓐᑦ ᓴ ᐊ ᑳᑮ ᓃᑳᓂᓯᒡ ᐅᑭᒫᐎ ᒌᐹᑴᐎᓂᓂ ᑭᑮ ᓂᔥᑭᐃᑰᓈᐸᓐ᙮ ᑭᑮ ᐃᔑ ᑭᐸᐅᓈᒻ ᐃᑕᔥ ᐅᐙᑳᐃᑲᓂᕽ ᐊᐊ ᑳᑎᐯᓂᒫᒡ ᐅᑲᓇᐌᒋᑫᐞ᙮ 11 ᐋᐱᑎᕽ ᐃᑕᔥ ᐁᑎᐱᑲᒃ ᑫᑰᓐ ᓂᑮ ᐃᔑ ᐸᐙᒋᑫᒥᓐ᙮ ᐃᓂ ᑕᔥ ᓂᐸᐙᒋᑲᓂᓈᓂᓐ ᐯᐸᑳᓐ ᑮᐃᓉᒋᑳᑌᐗᓐ᙮ 12 ᐊᐊ ᓴ ᐅᔥᑭᓃᑭ ᐄᐸᕒᐆ Hebrew ᓂᑮ ᐐᒋ ᑭᐸᐅᑰᒫᓈᓐ, ᑳᑮ ᐸᒦᑕᐙᒡ ᐃᓂ ᑳᑎᐯᓂᒫᓂᒡ ᐅᑲᓇᐌᒋᑫᐞ᙮ ᒦ ᓴ ᐊᐌ ᑳᐐᑕᒪᐗᑭᒡ ᑳᑮ ᐃᔑ ᐸᐙᒋᑫᔮᕽ᙮ ᒦᑕᔥ ᑳᐃᔑ ᐐᑕᒪᐎᔭᒥᓐᒡ ᐋᓃᓐ ᑳᐃᔑᓯᓂᓂᑭᓐ ᓂᐸᐙᒋᑲᓂᓈᓂᓐ᙮ 13 ᒪᔮ ᑕᔥ ᐃᑯ ᑮᐃᔑᓭᓂ ᑳᑮ ᐃᑭᑐᒡ᙮ ᑭᑮ ᑮᐌ ᐊᓄᑮᐃᔥ ᑳᑮ ᐃᓇᓄᑮᔮᐹᓐ᙮ ᑭᑮ ᐊᑰᓈ ᑕᔥ ᐐᓐ ᐊᐊ ᑳᑮ ᓃᑳᓂᓯᒡ ᒌᐹᑴᐎᓂᓂ, ᐅᑮᐃᓈᓐ᙮ 14 ᑭᒋᐅᑭᒫ ᑕᔥ ᐅᑮ ᓈᒋᓂᔕᐙᓐ ᒎᓴᐴᓐ Joseph᙮ ᐋᐱᒋ ᑕᔥ ᑲᑭᑖᑕᑉ ᑮᓈᓯᑭᑲᓂᐎᐗᓐ ᑳᑮ ᐃᔑ ᑭᐸᐅᒥᓐᒡ ᐊᓈᒪᑲᒥᒃ᙮ ᒎᓴᑉ ᑕᔥ ᑮᑲᔥᑭᐹᓱ, ᑮᒣᔥᑯᒋᑯᓇᔦ ᑲᔦ᙮ ᒦᔥ ᑳᐱ ᐃᔑ ᐊᑕ ᐙᐸᒫᒡ ᑭᒋᐅᑭᒫᓐ ᐯᕒᐆᓐ᙮ 15 ᑭᒋᐅᑭᒫᓐ ᑕᔥ ᐅᑮᐃᑰᓐ, ᓂᑮ ᐸᐙᒋᑫ᙮ ᑳᐐᓐ ᑕᔥ ᐊᐎᔭ ᐅᑭᑫᑕᓰᓐ ᐋᓃᓐ ᐁᔑᓯᓂᓂᒃ᙮ ᓂᓈᓅᑕᒻ ᓴ ᐁᐃᑰᔭᓐ, ᐊᐲ ᐁᓅᑕᒪᓐ ᐸᐙᒋᑲᓇᓐ ᐁᑲᔥᑭᑑᔭᓐ ᐁᐐᑕᒪᓐ ᐋᓃᓐ ᐁᔑᓯᑭᓐ, ᐅᑮᐃᑰᓐ᙮ 16 ᒎᓴᑉ ᑕᔥ ᑮᐃᔑ ᓇᑴᑕᒻ, ᑳᐐᓐ ᓃᓐ ᑫᑰᓐ ᓂᑖᔮᓰᓐ ᓂᐱᒫᑎᓯᐎᓂᕽ ᑫᐅᒋ ᐐᑕᒪᐎᓈᐹᓐ᙮ ᑭᔐᒪᓂᑑ ᓴ ᒪᔮ ᑭᑲ ᐐᑕᒫᒃ ᐁᔑᓯᓂᓂᒃ ᑭᐸᐙᒋᑲᓐ, ᐅᑮᐃᓈᓐ᙮ 17 ᒎᓴᑉ ᐃᑕᔥ ᐅᑮᐃᑰᓐ ᐯᕒᐆᓐ, ᓂᑮ ᐃᓈᐸᑖᓐ ᐄᓴᓐ ᐁᓃᐸᐎᔮᓐ ᒌᑭᐲᒃ ᓈᔭᓬ ᓰᐱᕽ᙮ 18 ᑮᐅᒋ ᐊᒀᓰᐗᒃ ᐃᑕᔥ ᐃᐃᒫ ᓰᐱᕽ ᓃᔣᓱ ᐱᔑᑭᐗᒃ ᐁᑮ ᒥᓄᑳᒧᐙᒡ, ᐁᑮ ᒥᓄᓈᑯᓯᐙᒡ ᐃᑕᔥ ᑲᔦ, ᒪᔥᑯᓰᓂ ᐁᑮ ᒦᒋᐙᒡ᙮ 19 ᓈᑫ ᒦᓇᐙ ᑮᐱ ᐊᒀᓰᐗᒃ ᓃᔣᓱ ᑯᑕᒃ ᐱᔑᑭᐗᒃ ᐁᑮ ᑲᐗᔅᑲᑌᐙᒡ, ᐁᑮ ᒫᓈᑎᓯᐙᒡ ᐃᑕᔥ ᑲᔦ᙮ ᑳᐐᓐ ᐐᑳ ᓂᐱ ᐙᐸᒫᓰᒃ ᐱᔑᑭᐗᒃ ᐅᐅᒫ ᐄᒋᐸᑮᕽ ᐃᐃ ᒋᐊᐲᒋ ᒫᓈᑎᓯᐙᒡ᙮ 20 ᐃᑭ ᑕᔥ ᑳᑮ ᑲᐗᔅᑲᑌᐙᒡ, ᑳᑮ ᒫᓈᑎᓯᐙᒡ ᐱᔑᑭᐗᒃ ᐅᑮ ᑭᑕᒸᐙᐞ ᐃᐃ ᓃᔣᓱ ᐱᔑᑭᐗᐞ ᑳᑮ ᒥᓄᑳᒧᓂᒡ ᓂᑕᒻ ᑳᑮ ᐊᒀᓰᓂᒡ᙮ 21 ᒥᓴᐙ ᑕᔥ ᐃᑯ ᐁᑮ ᐊᒸᐙᒡ ᐃᐃ ᐱᔑᑭᐗᐞ, ᑳᐐᓐ ᒋᑮ ᑭᑫᑖᑾᓂᓂᒃ; ᒦᑯ ᐯᔑᑾᓐ ᑳᐃᔑ ᒫᓈᑎᓯᐙᒡ ᑳᑮ ᐃᔑᓈᑯᓯᐙᐸᓐ᙮ ᒦᑕᔥ ᑳᐃᔑ ᑯᔥᑯᓯᔮᓐ᙮ 22 ᒦᓇᐙ ᑕᔥ ᓂᑮ ᐸᐙᒋᑫ᙮ ᓂᑮ ᐸᐙᑖᓇᓐ ᓃᔣᓱ ᐸᑴᔑᑲᓂᒥᓇᓐ ᐁᒥᓄᑭᑭᓐ, ᐁᑮᔑᑭᑭᓐ ᐃᑕᔥ ᑲᔦ ᐁᑮ ᐅᒋ ᓵᑭᑭᑭᓐ ᐯᔑᒃ ᐸᑴᔑᑲᓈᑎᑯᕽ᙮ 23 ᓈᑫ ᐃᑕᔥ ᑮᐱ ᓵᑭᑭᓅᓐ ᑯᑕᒃ ᓃᔣᓱ ᐁᑮ ᔒᑯᔥᑳᑭᓐ, ᐁᑮ ᐹᒀᓯᑭᓐ ᐃᑕᔥ ᐁᐙᐸᓂᓅᐌᒃ᙮ 24 ᑳᑮ ᔒᑯᔥᑳᑭᓐ ᐃᑕᔥ ᐅᑮ ᑭᑖᓈᐙᓐ ᐃᓂ ᑳᑮ ᒥᓄᑭᓂᓂᑭᓐ᙮ ᓂᑮ ᐐᑕᒪᐙᒃ ᐃᑕᔥ ᐃᑭ ᒣᒫᑖᐎᓯᐙᒡ, ᑳᐐᓐ ᐃᑕᔥ ᐊᐙᒡ ᐯᔑᒃ ᐊᐎᔭ ᐅᑮ ᑲᔥᑭᑑᓰᓐ ᒋᐐᑕᒪᐎᒡ᙮ 25 ᒎᓴᑉ ᑕᔥ ᐅᑮᐃᓈᓐ ᑭᒋᐅᑭᒫᓐ, ᐃᓂ ᓴ ᓃᔑᓐ ᑭᐸᐙᒋᑲᓇᓐ ᐯᔑᑾᓐ ᐃᔑᓯᓅᓐ᙮ ᑭᔐᒪᓂᑑ ᐅᔕ ᓃᔮᒃ ᑭᐐᑕᒫᒃ ᐋᓃᓐ ᐙᐊᓂ ᐃᔑᒋᑫᒡ᙮ 26 ᐃᑭ ᓴ ᓃᔣᓱ ᑳᑮ ᒪᒥᓄᑭᐙᒡ ᐱᔑᑭᐗᒃ ᑳᑮ ᐸᐙᓇᑣ, ᒦ ᓴ ᐃ ᓃᔣᓱ ᐱᐴᓐ᙮ ᐃᓂ ᑲᔦ ᓃᔣᓱ ᐸᑴᔑᑲᓂᒥᓇᓐ ᑳᑮ ᒥᓄᑭᐙᒡ ᑳᑮ ᐸᐙᓇᑣ, ᒦ ᓴ ᐃ ᑲᔦ ᓃᔣᓱ ᐱᐴᓐ᙮ ᐃᓂ ᓴ ᓃᔑᓐ ᑭᐸᐙᒋᑲᓇᓐ ᐯᔑᑾᓐ ᐃᔑᓯᓅᓐ᙮ 27 ᐃᑭ ᑕᔥ ᑳᑮ ᑲᐗᔅᑲᑌᐙᒡ ᐱᔑᑭᐗᒃ ᐅᑖᓈᕽ ᑳᑮ ᐅᒋ ᐊᒀᓰᐙᒡ, ᐃᑭ ᑲᔦ ᐸᑴᔑᑲᓂᒥᓇᓐ ᑳᑮ ᔒᑯᔥᑳᑭᓐ, ᑳᑮ ᐹᒀᓯᑭᓐ ᐁᐙᐸᓂᓅᐌᓂᒃ, ᒦ ᓴ ᐃᐌ ᓃᔣᓱ ᐱᐴᓐ ᑳᐐ ᒦᒋᒥᑳᓯᓄᒃ᙮ 28 ᒦᑕᔥ ᐁᓂᓈᓐ, ᑭᔐᒪᓂᑑ ᐅᔕ ᑭᐙᐸᑕᐃᒃ ᐋᓃᓐ ᐙᐊᓂ ᐃᔑᒋᑫᒡ᙮ 29 ᐃᓇᔥᑫ ᑕᔥ ᓃᔣᓱ ᐱᐴᓐ ᒥᓂᒃ ᐐᑫ ᑕᑭᒋ ᐌᓅᑕᓐ ᒦᒋᒻ ᐅᐅᒫ ᒥᓯᐌ ᐄᒋᐸᑮᕽ᙮ 30 ᐃᐃ ᑕᔥ ᑮᐃᔥᒀ ᐃᔑᓭᒃ, ᓃᔣᓱ ᐱᐴᓐ ᓴ ᑳᐐᓐ ᑕᐊᔮᓯᓅᓐ ᒦᒋᒻ᙮ ᐃᐃ ᓴ ᑳᑮ ᐃᔑ ᐌᓅᑕᒃ ᒦᒋᒻ ᑕᐗᓀᑖᑾᓐ ᐅᐅᒫ ᒥᓯᐌ ᐄᒋᐸᑮᕽ᙮ ᐃᐃ ᓴ ᑳᐐ ᒦᒋᒥᑳᓯᓄᒃ ᐐᑫ ᑕᓂᔑᐗᓈᒋᒋᑫᒪᑲᓐ ᐅᐅᒫ ᒥᓯᐌ ᐊᑮᕽ᙮ 31 ᐃᐃ ᑕᔥ ᑳᐐ ᐃᔑ ᐌᓅᒋᓭᒃ ᒦᒋᒻ ᐅᐅᒫ ᐄᒋᐸᑮᕽ, ᑳᐐᓐ ᐊᐙᒡ ᑕᑭᑫᑖᑾᓰᓅᓐ, ᐋᓃᔥ ᐃᐃ ᑳᐐ ᐊᔮᓯᓄᒃ ᒦᒋᒻ ᐙᐐᑫ ᑕᑭᒋ ᐙᓯᑖᐎᒋᑫᒪᑲᓐ᙮ 32 ᒦᑕᔥ ᐃᐃ ᓃᔣ ᑳᑮ ᐅᒋ ᐃᔑ ᐸᐙᒋᑫᔭᓐ, ᑫᒋᓈᒡ ᐃᑯ ᑭᔐᒪᓂᑑ ᐁᐅᓀᑕᕽ ᐋᓃᓐ ᐙᐃᔑᐌᐸᓂᓂᒃ᙮ ᐋᐱᒋ ᑲᔦ ᐐᐸ ᐃᐃ ᑕᐃᔑᐌᐸᓐ᙮ 33 ᑕᑲ ᑕᔥ ᑭᒋᐅᑭᒫ ᐅᑲ ᓇᓈᑕᐙᐸᒫᓐ ᐃᓂᓂᐗᓐ ᑫᐊᔮᒀᒥᓯᓂᒡ, ᑫᑮᑖᐌᑕᒥᓂᒡ ᑲᔦ᙮ ᒦᐗᓐ ᑕᔥ ᐃᓂ ᑫᐃᓇᓵᒡ ᒋᒫᒪᐎ ᑲᓇᐙᐸᑕᒥᓂᒡ ᐄᒋᐸᑭ᙮ 34 ᑕᑲ ᑲᔦ ᑭᒋᐅᑭᒫ ᐅᑲ ᐅᓈᐸᒫᐞ ᑯᑕᒃ ᐃᓂᓂᐗᐞ ᑫᓂ ᐋᓂᑫ ᑲᓇᐙᐸᑕᒥᓂᒡ ᐅᐅ ᐄᒋᐸᑮᓂ᙮ ᐅᑲ ᐅᑖᐱᓈᓈᐙ ᑲᔦ ᓃᔑᓐ ᑫᑰᓐ ᒥᓂᒃ ᐁᑕᓱ ᒥᑖᓱ ᑫᓂᑖᐎᑭᓂᓂᒃ ᐃᐃ ᐊᐲ ᓃᔣᓱ ᐱᐴᓐ ᑳᐐ ᐌᓅᒋ ᒦᒋᒥᑳᓂᒃ᙮ 35 ᐃᑭ ᓴ ᐃᓂᓂᐗᒃ ᐅᑲ ᒨᔕᑭᓈᓈᐙ ᑲᑭᓇ ᒦᒋᒻ ᐃᐃ ᐊᐲ ᓃᔣᓱ ᐱᐴᓐ ᑳᐐ ᒥᓄᓭᓂᒃ᙮ ᑕᑲ ᑲᔦ ᑕᒦᓈᐗᒃ ᒋᑲᔥᑭᑑᐙᒡ ᒫᓄ ᒋᓇᐃᓯᑑᐙᒡ ᐸᑴᔑᑲᓂᒥᓇᓐ, ᑕᑲ ᑲᔦ ᐅᑲ ᑲᓇᐌᑖᓈᐙ ᐃᐃᒫ ᑳᑕᓯᑭᓐ ᐆᑌᓇᐗᓐ᙮ 36 ᐃᐃ ᑕᔥ ᒦᒋᒻ ᑳᐐ ᒫᐗᒋᒋᑳᑌᒃ, ᒦ ᓴ ᐃᐌ ᑫᒦᒋᓈᑳᑌᒃ ᐊᐲ ᓃᔣᓱ ᐱᐴᓐ ᑳᐐ ᐊᔮᓯᓄᒃ ᒦᒋᒻ ᐋᔕ ᑫᑳ ᑳᐐ ᐃᔑᓭᒃ ᐅᐅᒫ ᐄᒋᐸᑮᕽ᙮ ᐃᑭ ᑕᔥ ᐯᒫᑎᓯᐙᒡ ᐅᐅᒫ ᐊᑮᕽ ᑳᐐᓐ ᑕᑲᐗᔅᑲᑌᓯᐗᒃ, ᐅᑮᐃᓈᓐ᙮ ᒎᓴᑉ ᑮᐃᔑᐃᓐᒡ ᒋᐅᑭᒫᑲᑕᕽ ᐄᒋᐸᑭ 37 ᑭᒋᐅᑭᒫ ᐯᕒᐆ Pharaoh ᐃᐃ ᑲᔦ ᐅᑖᓂᑫᐎᑭᒫᒪᐞ ᐅᑮ ᒥᓍᐸᑖᓈᐙ ᐃᐃ ᑳᑮ ᐐ ᐃᔑᒋᑫᓈᓂᐗᓂᓂᒃ᙮ 38 ᑭᒋᐅᑭᒫ ᑕᔥ ᐅᑮᐃᓈᐞ ᐅᑖᓂᑫᐎᑭᒫᒪᐞ, ᐐᑳ ᓇ ᑭᑲ ᒥᑲᐙᓈᓐ ᐃᓂᓂ ᐅᐅ ᒌᔑᐊᔮᒡ, ᑭᔐᒪᓂᑑᓐ ᐅᑕᒑᑯᓂ ᑫᐊᔮᓂᒡ ᐅᐱᒫᑎᓯᐎᓂᕽ, ᑮᐃᑭᑐ᙮ 39 ᑭᒋᐅᑭᒫ ᑕᔥ ᐅᑮᐃᓈᓐ ᒎᓴᐴᓐ Joseph, ᑭᔐᒪᓂᑑ ᑕᔥ ᐁᑮ ᐙᐸᑕᐃᒃ ᐅᐅ ᑲᑭᓇ, ᑳᐐᓐ ᓴ ᑯᑕᒃ ᐊᐎᔭ ᐃᔑᐊᔮᓰ ᒋᐊᔮᒀᒥᓯᒡ, ᑳᐐᓐ ᑲᔦ ᐊᐎᔭ ᐃᐃ ᐊᐲᒋ ᑲᑮᑖᐌᑕᓰ᙮ 40 ᑮᓐ ᓴ ᑭᑲ ᐅᑭᒫᑲᑖᓐ ᓂᑕᑮᒻ᙮ ᑲᑭᓇ ᑌᐯᓂᒪᒀ ᐯᒫᑎᓯᐙᒡ ᑭᑲ ᓇᐃᑖᑰᒃ ᐋᓃᓐ ᑫᐃᓈᑯᓂᑫᔭᓐ᙮ ᓃᓐ ᑕᔥ ᐁᑕ ᐁᑭᒋᐅᑭᒫᐎᔮᓐ ᑭᑲ ᓃᑳᓂᔥᑲᐎᓐ᙮ 41 ᐃᓇᔥᑫ ᑭᑑᓇᑭᒥᓐ ᑲᑭᓇ ᒋᓈᑲᒋᑑᔭᓐ ᐅᐅ ᐄᒋᐸᑭ Egypt᙮ ᒦ ᐃ ᑭᒋᐅᑭᒫ ᑳᐃᓈᒡ ᒎᓴᐴᓐ᙮ 42 ᑭᒋᐅᑭᒫ ᐯᕒᐆ ᐅᑮ ᑭᒋᑯᓈᓐ ᐅᑭᒋᐅᑭᒫᐎ ᓈᐲᓱᓇᓐ ᐁᑮ ᐱᓯᑲᒨᓈᒡ ᒎᓴᐴᓐ ᐅᓂᓰᑭᓂᒑᓂᓂᕽ᙮ ᐅᑮ ᐱᓯᑲᒨᓈᓐ ᑲᔦ ᐁᐅᓂᔑᔑᓂᓂᒃ ᑲᔥᑮᑮᐎᓐ ᑳᓭᓂᐹᐌᑲᓂᓂᒃ᙮ ᐅᑮ ᓈᐱᑲᒨᓈᓐ ᑳᐅᓵᐎ ᔔᓂᔮ ᐙᐱᑯᐗᓂᓂᒃ ᓴᑲᐹᓀᔮᐱᔅ᙮ 43 ᐅᑮ ᒦᓈᓐ ᐅᑭᒫᐎ ᑎᑎᐱᑖᐹᓈᑾᓐ ᒋᐋᐸᒋᐋᓂᒡ ᒋᐅᒋ ᑭᑫᑖᑯᓯᓂᒡ ᐁᑭᒋ ᐃᓀᑖᑯᓯᓂᒡ᙮ ᔑᒫᑲᓂᔕᐞ ᑳᑲᓇᐌᒋᑫᓂᒡ ᐅᑮ ᐊᓂ ᓃᑳᓃᑕᒫᑯᐞ ᐁᔖᔖᑯᐌᓂᒡ, ᑕᐐᒃ, ᑕᐐᒃ! ᐅᑮ ᐅᑭᒫᐎᐋᓐ ᑕᔥ ᒋᑎᐯᑕᒥᓂᒡ ᒥᓯᐌ ᐄᒋᐸᑭ᙮ 44 ᐯᕒᐆ ᐅᑮᐃᓈᓐ ᒎᓴᐴᓐ, ᑫᔮᐱ ᓃᓐ ᓂᑭᒋᐅᑭᒫᐤ! ᑳᐐᓐ ᑕᔥ ᐊᐎᔭ ᐄᒋᐸᑮᕽ ᑫᑰᓐ ᑕᐃᔑᒋᑫᓰ ᐹᓂᒫ ᑮᓐ ᐃᑭᑐᐗᒡ, ᐅᑮᐃᓈᓐ᙮ 45 ᒎᓴᑉ ᐃᑕᔥ ᑮᒦᓈ ᐐᓱᐎᓐ ᒌᔑᓂᑳᓱᒡ ᓵᐱᓈᑦ ᐹᓃᔭ Zaphenath-Paneah, ᐃᑴᐗᓐ ᑲᔦ ᑮᒦᓈ ᑫᐐᐎᒡ ᐋᓯᓈᑦ Asenath ᐁᔑᓂᑳᓱᓂᒡ᙮ ᐃᓂ ᑕᔥ ᐅᑌᑌᓐ ᐊᐊ ᐃᑴ ᐹᑎᐱᕒᐊ Potiphera ᑮᐃᔑᓂᑳᓱᐗᓐ, ᐁᑮ ᑭᒋ ᐊᓇᒥᐁᐎᑭᒫᐎᓂᒡ ᐃᐃᒫ ᐆᑌᓈᕽ ᐄᓬᐃᐊᐳᓬᐃᔅ Heliopolis᙮ 46 ᒎᓴᑉ ᑕᔥ ᓂᓯᒥᑕᓇ ᑮᑕᓱ ᐱᐴᓉ ᐃᐃ ᐊᐲ ᑮᓃᐸᐎᒡ ᐁᓈᓴᒦᓂᒡ ᐯᕒᐆᓐ ᑳᑮ ᑭᒋᐅᑭᒫᐎᓂᒡ ᐃᐃᒫ ᐄᒋᐸᑮᕽ᙮ ᒎᓴᑉ ᑕᔥ ᐃᐃᒫ ᑮᐅᒋ ᒫᒑ ᑳᑮ ᐃᔑᐊᔮᓂᒡ ᑭᒋᐅᑭᒫᓐ, ᒥᓯᐌ ᐁᑮ ᐸᐹ ᐃᔖᒡ ᐃᐃᒫ ᐄᒋᐸᑮᕽ᙮ 47 ᓃᔣᓱ ᐱᐴᓐ ᑕᔥ ᐐᑫ ᑮᐌᓅᒋᓭ ᐃᐃ ᐊᑭ, ᓃᐱᐗᐞ ᐁᑮ ᐅᔑᐆᒪᑲᒃ ᒦᒋᒻ᙮ 48 ᒎᓴᑉ ᑕᔥ ᐅᑮ ᒨᔕᑭᓈᓐ ᑲᑭᓇ ᒦᒋᒻ ᓃᔣᓱ ᐱᐴᓐ ᑳᑮ ᐌᓅᒋᓭᓂᒃ ᐃᐃᒫ ᐄᒋᐸᑮᕽ, ᐁᔑ ᐗᐆᑌᓇᐗᓂᓂᒃ ᐁᑮ ᐃᔑᐊᔮᑑᒡ᙮ ᐙᑳᔭᐄ ᑕᔥ ᐅᑮ ᐊᔪᑎᓈᓐ ᑳᑮ ᐊᔨᔑ ᐆᑌᓇᐗᓂᓂᒃ ᐃᐃ ᒦᒋᒻ ᑳᑮ ᓇᐊᑑᒡ᙮ 49 ᑖᐱᔥᑰ ᑕᔥ ᒥᑖᐗᕽ ᑳᑕᓯᓂᓂᒃ ᑭᒋᑲᒦᕽ ᑮᑕᓯᓂᓂ ᒦᒋᒻ ᒎᓴᑉ ᑳᑮ ᒫᐗᑑᓇᕽ᙮ ᑮᓅᑌ ᑭᐱᒌ ᑕᔥ ᐁᑎᐸᑭᑕᑭᐸᓐ, ᐋᓃᔥ ᐅᓵᒻ ᑮᐹᑏᓇᑎᓂᓂ᙮ 50 ᒋᑆ ᐅᒋᒋᓭᓂᒃ ᒋᐊᔮᓯᓄᒃ ᒦᒋᒻ, ᓃᔑᓐ ᒎᓴᑉ ᐅᑯᓯᓴᐞ ᐅᑮ ᓂᑖᐎᑭᑕᒫᑰᓐ ᐋᓯᓈᑑᓐ, ᑳᑮ ᐅᑌᑌᓂᒡ ᐹᑎᐱᕒᐊ ᑳᑮ ᐊᓇᒥᐁᐎᑭᒫᐎᓂᒡ ᐆᑌᓇ ᐄᓬᐃᐊᐳᓬᐃᔅ ᑳᑮ ᐃᔑᓂᑳᑌᓂᒃ᙮ 51 ᒎᓴᑉ ᐅᑮ ᐃᔑᓂᑳᓈᓐ ᓂᑕᒻ ᑳᑮ ᓂᑖᐎᑭᓂᒡ ᐅᑯᓯᓴᓐ ᒪᓈᓴ Manasseh᙮ ᐃᐃ ᑕᔥ ᑳᑮ ᐅᒋ ᐃᔑᓂᑳᓈᒡ, ᑭᔐᒪᓂᑑ ᑮᐃᔑᒋᑫ ᒋᒫᒥᑲᐎᓯᐙᓐ ᑲᑭᓇ ᑳᑮ ᐲᔑ ᒫᔑᓭᔮᓐ, ᑲᔦ ᓂᑌᑌ ᐅᐙᑳᐃᑲᓂᕽ ᑳᐊᔮᓂᒡ, ᑮᐃᑭᑐ᙮ 52 ᑯᑕᒃ ᐃᓂ ᐅᑯᓯᓴᓐ ᐅᑮ ᐃᔑᓂᑳᓈᓐ ᐄᐸᕒᐃᔭᒻ Ephraim᙮ ᐃᐃ ᑕᔥ ᑳᑮ ᐅᒋ ᐃᔑᓂᑳᓈᒡ, ᑭᔐᒪᓂᑑ ᓂᒦᓂᒃ ᐊᐱᓅᒌᔕᐞ ᐅᐅᒫ ᑳᐃᔑ ᑲᒀᑕᑭᑑᔮᓐ, ᑮᐃᑭᑐ᙮ 53 ᐃᐃ ᑕᔥ ᐊᐲ ᓃᔣᓱ ᐱᐴᓐ ᑳᑮ ᐌᓅᒋᓭᒃ ᒦᒋᒻ ᐃᐃᒫ ᐄᒋᐸᑮᕽ, ᑫᑲᐲ ᓴ ᑮᐴᓂᓭ᙮ 54 ᒦᑕᔥ ᓃᔣᓱ ᐱᐴᓐ ᑳᑮ ᐊᔮᓯᓄᒃ ᒦᒋᒻ ᑳᐃᔑ ᒫᒋᓭᒃ, ᐁᑮ ᐃᔑᓭᓂᒃ ᒎᓴᑉ ᑳᑮ ᐃᑭᑐᒡ᙮ ᒥᓯᐌ ᑳᐐᓐ ᑮᐊᔮᓯᓅᓐ ᒦᒋᒻ᙮ ᐃᐃᒫ ᑕᔥ ᐐᓐ ᐄᒋᐸᑮᕽ, ᑮᐊᔮ ᒦᒋᒻ᙮ 55 ᐊᐲ ᑕᔥ ᐯᒫᑎᓯᐙᒡ ᐃᐃᒫ ᐄᒋᐸᑮᕽ ᑳᑮ ᐃᔑᑖᐙᒡ ᐁᓅᑌᓭᐙᒡ ᒦᒋᒻ, ᐅᑮ ᑲᓅᓈᐙᓐ ᑭᒋᐅᑭᒫᓐ ᒋᒦᓂᑯᐙᒡ ᒦᒋᒻ᙮ ᑭᒋᐅᑭᒫ ᑕᔥ ᐅᑮᐃᓈᐞ ᑲᑭᓇ ᐯᒫᑎᓯᓂᒡ, ᒎᓴᑉ ᐊᑕ ᐙᐸᒥᒃ; ᐋᓃᓐ ᓴ ᑯ ᐁᓂᓀᒃ ᐃᔑᒋᑫᐙᒃ᙮ 56 ᒥᓯᐌ ᑕᔥ ᐊᐗᔑᒣ ᑮᐊᓂ ᐃᔑᐌᐸᓐ, ᒦᒋᒻ ᐁᑮ ᐊᔮᓯᓄᒃ ᐅᐅᒫ ᐊᑮᕽ᙮ ᒎᓴᑉ ᑕᔥ ᐅᑮ ᐹᑭᓈᓇᓐ ᑲᑭᓇ ᐙᑳᐃᑲᓇᓐ ᑳᑮ ᐃᔑ ᐊᑑᒡ ᒦᒋᒻ, ᐁᑮ ᐊᑖᐌᓂᒡ ᐃᐃ ᐯᒫᑎᓯᓂᒡ ᐄᒋᐸᑮᕽ ᑳᑮ ᐊᔮᓂᒡ᙮ 57 ᑲᑭᓇ ᑕᔥ ᐯᒫᑎᓯᐙᒡ ᐊᑮᕽ ᑮᐲᔖᐗᒃ ᐄᒋᐸᑮᕽ ᐁᑮ ᐊᑖᒫᐙᒡ ᒎᓴᐴᓐ ᒦᒋᒻ ᐋᓃᔥ ᑮᑭᒋ ᐗᓯᑖᐎᓭ ᒥᓯᐌ ᐊᑮᕽ ᐁᑮ ᐊᔮᓯᓄᒃ ᒦᒋᒻ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society