Cenisihs 40 - ᐅᒋᐺ ᑭᒋᒪᓯᓇᐃᑲᓐᒎᓴᑉ ᑮᐐᑕᕽ ᐋᓃᓐ ᐁᓈᐸᑕᒥᓂᒡ ᑕᑯᓂᑲᓇᐞ 1 ᓂᑯᑎᕽ ᐃᑕᔥ ᐃᑯ ᐁᐊᓂ ᐊᔨᔑᓭᓂᒃ, ᑳᓈᑲᒋᑑᒡ ᔔᒥᓈᐳ, ᐊᐊ ᑲᔦ ᐅᑭᒫᐎ ᒌᐹᑴᐎᓂᓂ ᑳᑮ ᑮᔑᑌᐴᓈᒡ ᑭᒋᐅᑭᒫᓐ, ᐅᑮ ᒫᓈᐸᒥᑯᐙᓐ ᐅᑑᑭᒫᒥᐙᓐ ᑳᑮ ᑭᒋᐅᑭᒫᐎᓂᒡ ᐄᒋᐸᑮᕽ Egypt᙮ 2 ᐯᕒᐆ Pharaoh ᓴ ᐐᑫ ᐅᑮ ᓂᔥᑭᐃᑰᐞ ᐅᐅ ᓃᔑᓐ ᐋᓂᑫᐎᑭᒫᐞ, ᓀᔮᓈᑲᒋᑑᓂᒡ ᔔᒥᓈᐳ, ᐅᑭᒫᐎ ᒌᐹᑴᐎᓂᓂᐗᓐ ᐃᑕᔥ ᑲᔦ᙮ 3 ᐅᑮ ᐃᔑ ᐸᑭᑎᓈᐞ ᐃᑕᔥ ᒋᔑ ᑭᐸᐅᒥᓐᒡ ᐅᐙᑳᐃᑲᓂᓃᕽ ᑕᑯᓂᐌᐎᑭᒫᓐ ᑳᑎᐯᓂᒫᓂᒡ ᐅᑲᓇᐌᒋᑫᐞ ᑭᐸᐅᑏᐎᑲᒥᑯᕽ᙮ ᒦ ᓴ ᐃᐌ ᐯᔑᑾᓐ ᑳᑮ ᐃᔑ ᑭᐸᐅᒥᓐᒡ ᒎᓴᐴᓐ Joseph᙮ 4 ᑕᑯᓂᐌᐎᑭᒫ ᑕᔥ ᐅᑮ ᒦᓈᓐ ᒎᓴᐴᓐ ᒋᓈᑲᒋᐋᓂᒡ᙮ ᑭᓉᔥ ᐃᑕᔥ ᐃᐃᒫ ᑮᐊᔮᐗᐞ᙮ 5 ᒥᒋᓃᔥ ᐃᑕᔥ ᐃᐃ ᐃᓂᓂᐗᐞ, ᑳᓈᑲᒋᑑᓂᒡ ᔔᒥᓈᐳ, ᒌᐹᑴᐎᓂᓂᐗᓐ ᐃᑕᔥ ᑲᔦ ᑭᒋᐅᑭᒫᓐ ᑳᑮ ᑎᐯᓂᒥᑯᓂᒡ, ᐁᑭᐸᐅᒥᓐᒡ, ᑮᐸᐙᒋᑫᐗᐞ ᐯᔑᑾᓐ ᐁᑎᐱᑲᓂᓂᒃ᙮ ᐅᑎᓈᐸᒋᑲᓂᓂ ᑕᔥ ᐁᔑ ᐯᐯᔑᑯᓂᒡ ᐯᐸᑳᓐ ᑮᐃᔑ ᓂᓯᑐᑖᑾᓂᓂᐗᓐ᙮ 6 ᑫᔐᐹᐗᑲᓂᓂᒃ ᐃᑕᔥ ᐊᐲ ᒎᓴᑉ ᑳᐅᑎᓵᒡ, ᐅᑮ ᐙᐸᒫᐞ ᐐᑫ ᐁᒥᑯᔥᑳᑌᑕᒥᓂᒡ᙮ 7 ᐅᑮ ᑲᑴᒋᒫᐞ ᐃᑕᔥ ᐃᐃ ᐋᓂᑫᐎᑭᒫᐞ ᑳᑮ ᐊᓄᑮᑕᐙᓂᐸᓐ ᐯᕒᐆᓐ ᑳᑮ ᐐᒋ ᑕᑯᓂᑰᒫᒡ ᐅᑑᑭᒫᒪᓐ ᐅᐙᑳᐃᑲᓂᓃᕽ, ᐌᑯᓀᓐ ᐃᑕᔥ ᐌᒋ ᒫᓀᑕᒧᐎᓈᑯᓯᔦᒃ? ᐁᑮᐃᓈᒡ᙮ 8 ᐅᐅ ᑕᔥ ᐅᑮᐃᑰᐞ, ᒥᒋᓃᔥ ᐅᔕ ᓂᑮ ᐸᐙᒋᑫᒥᓐ, ᑳᐐᓐ ᐃᑕᔥ ᐊᐎᔭ ᐊᔮᓰ ᑫᐐᑕᑭᐸᓐ ᐁᔑᓯᓂᓂᑭᓐ, ᐅᑮᐃᑰᐞ᙮ ᒎᓴᑉ ᐃᑕᔥ ᐅᑮᐃᓈᐞ, ᑭᔐᒪᓂᑑ ᐄᑐᒃ ᐁᑕ ᐅᑲᔥᑭᑑᓐ ᒋᐐᑕᕽ ᐃᓈᐸᒋᑲᓇᓐ ᐁᔑᓯᓂᓂᑭᓐ᙮ ᐐᑕᒪᐎᔑᒃ ᑭᐸᐙᒋᑲᓂᐙᓐ, ᐅᑮᐃᓈᐞ᙮ 9 ᐃᓂ ᑕᔥ ᒥᓂᒀᑲᓐ ᑳᑮ ᐱᒥᐎᑑᓂᒡ ᐅᑮ ᐐᑕᒫᑰᓐ ᐋᓃᓐ ᑳᐃᓈᐸᑕᒥᓂᒡ ᐁᑮᐃᑯᒡ, ᔔᒥᓈᑎᒃ ᓂᑮ ᐸᐙᓈ ᐁᑮ ᐙᐸᒪᒃ ᐃᓈᓴᒦᔮᓐ᙮ 10 ᑮᓂᓯᓅᓐ 3 ᐄᓴᓐ ᐗᑎᑾᓇᓐ ᐃᐃᒫ ᔔᒥᓈᑎᑯᕽ᙮ ᐊᐲ ᑕᔥ ᐃᑯ ᐄᓴᓐ ᐁᐊᓂ ᒫᒌ ᓄᑲᑎᑾᓀᓯᒡ, ᒦ ᐃ ᑳᐃᔑ ᑮᔑᐸᑮᒡ, ᔔᒥᓇᒃ ᐁᑮ ᑮᔕᑎᓱᐙᒡ᙮ 11 ᑭᒋᐅᑭᒫ ᑕᔥ ᐄᓴᓐ ᓂᑮ ᑕᑯᓇᒧᐙᓐ ᐅᒥᓂᒀᑲᓐ; ᒦᑕᔥ ᐄᓴᓐ ᑳᐃᔑ ᐅᑖᐱᓂᒪᒃ ᔔᒥᓇᐞ ᐁᑮ ᐲᒋ ᓰᔅᑰᐲᑭᓂᒪᒃ ᐃᐃᒫ ᒥᓂᒀᑲᓂᒃ᙮ ᒦᑕᔥ ᑳᐃᔑ ᒦᓇᒃ ᐃᐃ ᒥᓂᒀᑲᓐ, ᐅᑮᐃᑰᓐ᙮ 12 ᒎᓴᑉ ᐃᑕᔥ ᐅᑮᐃᓈᓐ, ᒦ ᓴ ᐅᐌ ᐁᔑᓯᕽ ᑭᑎᓈᐸᒋᑲᓐ᙮ ᐃᓂ ᓴ ᓂᓯᓐ ᐗᑎᑾᓇᓐ ᑳᑮ ᐸᐙᑕᒪᓐ, ᒦ ᓴ ᐃ ᓂᓱᑮᔑᒃ᙮ 13 ᓂᓱᑮᔑᒃ ᓴ ᐃᔑᓭᓂᒃ ᐯᕒᐆ ᑭᑲ ᐸᑭᑎᓂᒃ, ᒋᑮᐌ ᐊᓯᒃ ᐋᓃᓐ ᑳᑮ ᐃᓇᓄᑮᐗᑎᐸᓐ᙮ ᒦᓇᐙ ᑕᔥ ᑭᑲ ᒦᓈ ᑭᒋᐅᑭᒫ ᒥᓂᒀᑲᓐ, ᑖᐱᔥᑰ ᑳᑮᓂᑖ ᐃᔑᒋᑫᔭᐸᓐ ᑮᐱᒥᐎᑑᔭᓐ ᐅᒥᓂᒀᑲᓐ᙮ 14 ᒥᑴᓂᒥᔒᑲᓐ ᐃᑕᔥ ᐊᐲ ᐊᓂ ᒥᓄᓭᔭᓐ, ᑕᑲ ᑲᔦᐲ ᒥᓄᑑᑕᐎᔒᑲᓐ ᒋᒫᒥᑰᒥᔭᓐ ᒋᐐᑕᒪᐗᒡ ᐯᕒᐆ, ᒋᓵᑭᓯᐃᒡ ᐅᐅᒫ ᑭᐸᐅᑏᐎᑲᒥᑯᕽ᙮ 15 ᐋᓃᔥ ᓃᓐ ᒫᓄ ᑲᑳᒋᒡ ᓂᑮ ᐅᒋ ᐲᓂᑰ ᐄᐸᕒᐆᐗᒃ Hebrews ᐅᑕᑮᐙᕽ᙮ ᐅᐅᒫ ᑕᔥ ᑲᔦ ᑳᐐᓐ ᑫᑰᓐ ᓂᑮ ᐃᔑᒋᑫᓰ ᒋᑲᔥᑭᑕᒫᓱᔮᐹᓐ ᑫᐅᒋ ᑭᐸᐅᑰᔮᓐ, ᐅᑮᐃᓈᓐ᙮ 16 ᐊᐲ ᑕᔥ ᐊᐊ ᐅᑭᒫᐎ ᒌᐹᑴᐎᓂᓂ ᐁᓅᑕᕽ ᐁᒥᓄ ᐐᑌᓂᒃ ᐁᔑᓯᓂᓂᒃ ᐅᑎᓈᐸᒋᑲᓂᓂ ᐃᓂ ᑳᐱᒥᐎᑑᓂᒡ ᒥᓂᒀᑲᓐ, ᒦᔥ ᑳᐃᓈᒡ ᒎᓴᐴᓐ, ᑫᓃᓐ ᓴ ᓂᑮ ᐸᐙᒋᑫ᙮ ᓂᑎᒀᓃᕽ ᐄᓴᓐ ᓂᑮ ᐱᒥᐎᑑᓇᓐ ᓂᓯᓐ 3 ᐸᑴᔑᑲᓂ ᒪᑲᑰᓐ᙮ 17 ᐃᐃᐌ ᑕᔥ ᐗᑭᒐᔭᐄ ᐸᑴᔑᑲᓂ ᒪᑲᒃ ᑳᑮ ᐊᔮᒃ, ᑮᐯᐸᑳᓇᑎᓅᓐ ᐄᓴᓐ ᐃᓂᓶᒀᓇᓐ ᐯᕒᐆ ᑫᒦᒋᒡ᙮ ᐱᓀᔒᔕᒃ ᐃᑕᔥ ᐄᓴᓐ ᐅᑮ ᒦᒋᓈᐙ ᐃᐃ ᒦᒋᒻ ᐃᐃᒫ ᐸᑴᔑᑲᓂ ᒪᑲᑯᕽ, ᐁᑮ ᐃᑭᑐᒡ᙮ 18 ᒎᓴᑉ ᐃᑕᔥ ᐅᑮᐃᓈᓐ, ᒦ ᓴ ᐅᐌ ᐁᔑᓯᕽ ᑭᐸᐙᒋᑲᓐ᙮ ᐃᓂ ᓂᓯᓐ ᐸᑴᔑᑲᓂ ᒪᑲᑰᓐ, ᒦ ᓴ ᐃ ᓂᓱᑮᔑᒃ᙮ 19 ᓂᓱᑮᔑᒃ ᓴ ᐃᔑᓭᓂᒃ, ᐯᕒᐆ ᑭᑲ ᐸᑭᑎᓂᒃ, ᒋᑮᔥᑭᑴᑕᐅᒃ᙮ ᒥᑎᑯᕽ ᐃᑕᔥ ᐅᑲ ᐊᑰᑑᓐ ᑭᐐᔭᐎᓂ, ᐱᓀᔒᔕᒃ ᐃᑕᔥ ᐅᑲ ᒦᒋᓈᐙ ᑭᐐᔭᐎᓂ, ᐅᑮᐃᓈᓐ᙮ 20 ᐁᓂᓱᑮᔑᑾᑳᓂᒃ ᐃᑕᔥ ᐯᕒᐆ ᑮᑎᐱᔥᑲᒻ᙮ ᐅᑮ ᐐᑾᒫᐞ ᐃᑕᔥ ᑲᑭᓇ ᐅᑕᓄᑮᐋᑲᓇᐞ᙮ ᐅᑮ ᐸᑭᑎᓈᓐ ᐃᑕᔥ ᐃᓂ ᒥᓂᒀᑲᓐ ᑳᐱᒥᐎᑑᓂᒡ, ᐃᓂ ᑲᔦ ᐅᑭᒫᐎ ᒌᐹᑴᐎᓂᓂᐗᓐ ᐁᓈᓴᒦᓂᒡ ᑯᑕᒃ ᐋᓂᑫᐎᑭᒫᐞ᙮ 21 ᐅᑮ ᑮᐌ ᐃᓇᓵᓐ ᐃᑕᔥ ᐃᓂ ᑳᐱᒥᐎᑑᓂᒡ ᒥᓂᒀᑲᓐ ᑳᑮ ᐃᓇᓄᑮᓂᐸᓐ᙮ ᒦᓇᐙ ᑕᔥ ᐅᑮ ᒦᓈᓂ ᒥᓂᒀᑲᓂᓂ ᐯᕒᐆᓐ ᐅᓂᒌᓃᕽ᙮ 22 ᐅᑮ ᐊᑰᓈᓐ ᐃᑕᔥ ᐐᓐ ᐃᓂ ᐅᑭᒫᐎ ᒌᐹᑴᐎᓂᓂᐗᓐ, ᑖᐱᔥᑰ ᒎᓴᐴᓐ ᑳᑮ ᐃᓈᓂᑯᐸᓀᓐ ᐁᐐᑕᒪᐙᓂᒡ ᐁᔑᓯᓂᓂᒃ ᐅᐸᐙᒋᑲᓂᓂ᙮ 23 ᐊᐊ ᑕᔥ ᑳᑮ ᐱᒥᐎᑑᒡ ᒥᓂᒀᑲᓐ, ᑳᐐᓐ ᑮᐅᒋ ᒫᒥᑲᐎᓰ ᒎᓴᐴᓐ; ᒦ ᐃ ᑳᐃᔑ ᐗᓃᑫᒡ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society