Cenisihs 33 - ᐅᒋᐺ ᑭᒋᒪᓯᓇᐃᑲᓐᒉᑲᑉ ᑮᓇᑭᔥᑲᐙᒡ ᐄᔂᓐ 1 ᒉᑲᑉ Jacob ᑕᔥ ᐁᐃᓈᐱᒡ, ᐅᑮ ᐙᐸᒫᓐ ᐄᔂᓐ Esau ᐁᐱᓈᑯᓯᓂᒡ ᓃᐙᒃ 400 ᐃᓂᓂᐗᐞ ᐁᐱ ᐐᒌᐙᓂᒡ᙮ ᒦᑕᔥ ᑳᐃᔑ ᓀᓈᐎᓈᒡ ᐊᐱᓅᒌᔕᐞ ᐋᓂᑕ ᓬᐄᔭᐗᓐ Leah ᒋᐐᒌᐙᓂᒡ, ᐋᓂᑕ ᑲᔦ ᐅᕒᐁᒐᓬᐗᓐ Rachel, ᐋᓂᑕ ᑲᔦ ᐃᐃ ᓃᔑᓐ ᐅᑕᓄᑮᐋᑲᓂᑴᒪᐞ᙮ 2 ᐃᐃ ᑕᔥ ᐅᑕᓄᑮᐋᑲᓂᑴᒪᐞ, ᐊᐱᓅᒌᔕᐞ ᑲᔦ ᑳᑮ ᐐᒌᐙᓂᒡ ᒫᐗᒡ ᐃᑯ ᐅᑮ ᓃᑳᓃᐋᐞ᙮ ᓬᐄᔭᐗᓐ ᐃᑕᔥ ᐃᑯ ᐃᐃᒫ ᐊᐱᓅᒌᔕᐞ ᐃᑕᔥ ᑳᑮ ᐐᒌᐙᓂᒡ᙮ ᐅᕒᐁᒐᓬᐗᓐ ᐃᑕᔥ ᒎᓴᐴᓐ Joseph ᑲᔦ ᒫᐗᒡ ᐅᑖᓈᕽ ᐅᑮ ᐊᓵᐞ᙮ 3 ᒉᑲᑉ ᑕᔥ ᐐᓐ ᒫᐗᒡ ᑮᓃᑳᓃ᙮ ᓃᔣᒋᕽ 7 ᐃᑕᔥ ᑮᐊᓂ ᐃᔑ ᐊᓂᒥᑯᑖ ᒥᑕᑲᒥᒃ ᐁᐊᓂ ᐅᑎᓵᐸᒫᒡ ᐐᒋᑭᐌᔭᓐ᙮ 4 ᑌᑾᒡ ᐃᑕᔥ ᐄᔂᓐ ᑮᐲᒋᐸᑑᐗᓐ ᐁᑮ ᐱ ᐊᑕ ᓇᑭᔥᑳᑯᒡ ᐁᑮ ᑭᒋᑴᐱᓂᑯᒡ ᐁᑮ ᐊᔪᒌᒥᑯᒡ᙮ ᒥᒋᓃᔥ ᐃᑕᔥ ᑮᒪᐎᐗᒃ᙮ 5 ᐄᔂᓐ ᑕᔥ ᑮᐊᔨᓈᐱᐗᓐ᙮ ᐌᔮᐸᒫᓂᒡ ᐃᑕᔥ ᐃᑴᐗᐞ, ᐊᐱᓅᒌᔕᐞ ᑲᔦ, ᒦᔥ ᐅᐅ ᑳᐃᔑ ᑲᑴᒋᒥᑯᒡ, ᐊᐌᓀᓇᒃ ᐅᑯ ᑳᐐᒌᐎᒀ? ᐅᑮᐃᑰᓐ᙮ ᒉᑲᑉ ᑕᔥ ᑮᐃᔑ ᓇᑴᑕᒻ, ᒦᐗᐃ ᓴ ᐃ ᐊᐱᓅᒌᔕᐞ ᑭᔐᒪᓂᑑ ᑳᒦᓂᒡ ᓃᓐ ᑭᑕᓄᑮᐋᑲᓐ, ᑮᐃᑭᑐ᙮ 6 ᐃᐃ ᑕᔥ ᐊᓄᑮᐋᑲᓂᑴᐗᐞ ᐃᐃ ᑲᔦ ᐊᐱᓅᒌᔕᐞ ᐯᔓ ᑮᐲᔖᐗᐞ ᐁᑮ ᐊᓂᒥᑯᑖᓂᒡ᙮ 7 ᓬᐄᔭᐗᓐ ᑕᔥ ᑲᔦ, ᐊᐱᓅᒌᔕᐞ ᑳᑮ ᐐᒌᐎᑯᓂᒡ ᑲᔦ ᑮᐲᔖᐗᐞ ᐁᑮ ᐊᓂᒥᑯᑖᓂᒡ᙮ ᐃᔥᒀᒡ ᐃᑕᔥ ᐅᕒᐁᒐᓬᐗᓐ, ᒎᓴᐴᓐ ᑕᔥ ᑮᐲᔖᐗᐞ, ᐁᑮ ᐊᓂᒥᑯᑖᓂᒡ᙮ 8 ᐄᔂᓐ ᑕᔥ ᐅᑮᐃᑰᓐ, ᐋᓃᓐ ᐃᑕᔥ ᐁᓍᑕᒪᓐ ᐅᐅ ᑲᑭᓇ ᑳᐹᑏᓄᓈᓂᐗᕽ ᑳᑮ ᓇᑭᔥᑲᒫᓐ? ᐅᑮᐃᑰᓐ᙮ ᒉᑲᑉ ᑕᔥ ᐅᑮᐃᓈᓐ, ᒦ ᓴ ᐃ ᒋᐅᒋ ᒥᓍᐸᒥᔭᓐ, ᑮᓐ ᓂᑑᑭᒫᒻ, ᐅᑮᐃᓈᓐ᙮ 9 ᐅᐅ ᑕᔥ ᐄᔂᓐ ᐅᑮᐃᑰᓐ, ᓃᒋᑭᐌᓯ ᐋᔕ ᐅᔕ ᓃᐱᐗᐞ ᑫᑰᓐ ᓂᑕᔮᓐ, ᑲᓇᐌᑕᓐ ᑮᓐ ᑳᑎᐱᓇᐌᐎᓯᔭᓐ, ᐅᑮᐃᑰᓐ᙮ 10 ᒉᑲᑉ ᑕᔥ ᐅᑮᐃᓈᓐ, ᑳᐐᓐ! ᑮᔥᐱᓐ ᓴ ᒣᓍᐸᒥᐗᓀᓐ, ᑕᑲ ᐱᓵᓐ ᐅᑖᐱᓇᓐ ᐅᓄ ᑳᒦᓂᓈᓐ᙮ ᒦ ᓴ ᐃ ᐁᔑᓇᐎᓈᓐ ᑖᐱᔥᑰ ᐊᐎᔭ ᑳᐃᔑᓇᐙᒡ ᑳᐙᐸᒫᒡ ᑭᔐᒪᓂᑑᓐ, ᑮᓐ ᑕᔥ ᐋᔕ ᐁᒥᓍᐸᒥᔭᓐ ᐁᐅᑖᐱᓂᔭᓐ᙮ 11 ᑕᑲ ᑕᔥ ᐱᓵᓐ ᐅᑖᐱᓇᓐ ᐅᐅ ᑳᒦᓂᑰᔭᓐ ᑳᐲᒋᑳᑌᑭᓐ᙮ ᑭᔐᒪᓂᑑ ᐅᔕ ᐁᑕᑕᐌ ᓂᒥᓄᑑᑖᒃ, ᑲᑭᓇ ᑕᔥ ᑫᑰᓐ ᓂᑕᔮᓐ ᑫᔑ ᓅᑌᓭᓯᐙᓐ, ᐅᑮᐃᓈᓐ᙮ ᐅᑮ ᑲᑳᓱᒫᓐ ᐃᑕᔥ᙮ ᒦᑕᔥ ᑳᐃᔑ ᑲᔥᑭᒫᒡ᙮ 12 ᐄᔂᓐ ᑕᔥ ᑮᐃᑭᑐᐗᓐ, ᑕᑲ ᓴ ᒦ ᐃ ᐃᔑ ᒫᒑᑖ ᒋᓂ ᐱᒥ ᐊᔮᔭᕽ, ᓃᓐ ᑕᔥ ᑭᑲ ᓃᑳᓃᑕᒪᐎᓐ, ᐅᑮᐃᑰᓐ᙮ 13 ᐅᐅ ᑕᔥ ᒉᑲᑉ ᑮᐃᑭᑐ, ᓂᑑᑭᒫᒻ ᐄᑐᒃ ᐅᑭᑫᑖᓐ ᐁᓃᓇᒥ ᐊᔮᓂᒡ ᐊᐱᓅᒌᔕᐞ᙮ ᐃᔑᓈᑾᓐ ᑲᔦ ᒋᓈᓈᑲᒋᐊᒀ ᓅᔐ ᒫᓇᒑᓂᔕᒃ, ᓅᔐ ᐱᔑᑭᐗᒃ ᑲᔦ ᑳᐅᑕᔭᐋᓯᒥᐙᒡ᙮ ᑮᔥᐱᓐ ᐋᓃᔥ ᐯᔑᑯ ᑮᔑᒃ ᐃᑯ ᑭᒋ ᑲᑳᒋᓂᔕᐅᑣ, ᒦ ᓴ ᐃ ᑲᑭᓇ ᒋᓂᐳᐙᒡ᙮ 14 ᑕᑲ ᐱᓵᓐ ᑮᓐ ᓂᑑᑭᒫᒻ ᑭᑲᓂ ᐊᐲᓯᑳ ᒋᓃᑳᓃᑕᒪᐎᔭᓐ᙮ ᓃᓐ ᐃᑕᔥ ᐐᓐ ᐌᐌᓂ ᓂᐐ ᐱᒥ ᐊᔮ, ᐁᐲᓯᑳᐙᒡ ᐱᔑᑭᐗᒃ ᐁᐐ ᐊᐲᓯᑳᔮᓐ᙮ ᐁᐲᓯᑳᐙᒡ ᑲᔦ ᐊᐱᓅᒌᔕᒃ ᓂᑲ ᐊᐲᓯᑳ ᐲᓂᔥ ᒋᓂ ᑕᑯᔑᓈᓐ ᓰᔭᕒ Seir ᐁᒋᑳᑌᒃ ᑳᔑ ᐊᔮᔭᓐ ᓂᑑᑭᒫᒻ ᐁᓂᓈᓐ, ᐅᑮᐃᓈᓐ᙮ 15 ᐄᔂᓐ ᑕᔥ ᐅᑮᐃᑰᓐ, ᑕᑲ ᓴ ᓂᑲ ᓇᑲᓈᒃ ᐋᓂᑕ ᓂᑎᓂᓃᒪᒃ ᒋᐐᒌᐎᓂᓀᒀ, ᐅᑮᐃᑰᓐ᙮ ᒉᑲᑉ ᑕᔥ ᐅᑮᐃᓈᓐ, ᑳᐐᓐ ᒣᒬᒡ ᐃᓇ ᐃᐃ ᑭᑖ ᐃᔑᒋᑫᓰ᙮ ᑕᑲ ᐁᑕ ᒋᒥᓍᐸᒥᔭᓐ ᓂᑑᑭᒫᒻ, ᐅᑮᐃᓈᓐ᙮ 16 ᐃᐃ ᑕᔥ ᐁᑮᔑᑲᓂᓂᒃ ᐄᔂᓐ ᑮᐊᓂ ᒫᒑᐗᓐ ᓰᔭᕒ ᐃᓇᑫ ᐁᑮ ᐃᔑ ᑮᐌᓂᒡ᙮ 17 ᒉᑲᑉ ᑕᔥ ᐐᓐ ᑮᐃᔖ ᓴᑲᑦ Succoth ᐁᒋᑳᑌᓂᒃ, ᒦᑕᔥ ᐌᑎ ᑳᐃᔑ ᐅᔑᑑᒡ ᐅᑲᐯᔑᐎᓐ, ᐁᑮ ᐅᔑᑕᒪᐙᒡ ᑲᔦ ᑫᔑ ᑕᐱᓇᐎᔑᒨᓄᓂᒡ ᐅᑕᐗᑳᓇᐞ᙮ ᒦᑕᔥ ᑳᑮ ᐅᒋ ᐃᔑᓂᑳᑌᒃ ᐃᐃᒫ ᑕᐱᓇᐎᔑᒨᓄᐎᓂᕽ᙮ 18 ᐌᑎ ᑕᔥ ᒣᓱᐳᑌᒥᔭ Mesopotamia ᑳᐱᐅᒋ ᑕᑯᔑᕽ, ᐃᐃᒫ ᐆᑌᓈᕽ ᔒᑲᒻ Shechem ᑮᐃᔑ ᑕᑯᔑᓐ ᑫᓇᓐ Canaan ᐊᑮᕽ᙮ ᐁᑯ ᑌᐹᐸᑕᕽ ᐃᑕᔥ ᐆᑌᓈᓂ ᑮᐃᔑ ᑲᐯᔑ᙮ 19 ᑮᐊᑖᐌ ᑕᔥ ᐃᐃ ᐸᑮ ᒥᔕᐗᑲᒥᒃ, ᓂᑯᑣᒃ 100 ᐙᐹᐱᑯ ᔔᓂᔮᒃ ᐁᑮ ᐃᓇᑭᑌᓂᒃ᙮ ᒦᑕᔥ ᐃᐃᒫ ᑳᐃᔑ ᐅᓇᑭᑑᒡ ᐅᐸᒀᓀᑲᒥᒃ᙮ ᐅᑮ ᐊᑖᒫᐞ ᐃᐃ ᐁᒪᕒᐃᕽ Hamor ᑳᑮ ᐅᑕᑳᓀᓯᓂᒡ, ᐅᒥᔔᒥᓯᓂ ᑕᔥ ᔒᑲᒻ ᑳᑮ ᐃᔑᓂᑳᓱᓂᒡ᙮ 20 ᒦᑕᔥ ᐃᐃᒫ ᑳᐃᔑ ᐅᓈᐱᑭᓇᕽ ᑫᔑ ᐸᑭᑎᓈᓱᕽ, ᐁᓬ ᐌᑭᔐᒪᓂᑑᒥᐙᒡ ᐃᔅᕒᐃᔭᓬᐊᒃ ᐅᑮ ᐃᔑᓂᑳᑖᓐ᙮ |
Ojibwe Shorter Bible (Syllabic Script) © 2008 Canadian Bible Society
Canadian Bible Society